1. Anersaakkut paratiisi suua, sunalu aalajangiusimasariaqarparput?

 NUNARSUARMI maannakkut assersuutaasumik paratiiseqarpoq. Tassani inuit millionillit eqqisseqatigiil­luinnarlutillu ajunngitsuinnarnik aallutaqarput. Taakkualu taanna qimanngisaan­narniarlugu aalajangiusimavaat. Aamma inuppassuit taama nuannerluin­nartumik atugaqar­nissaat kissaatigaat. Suna pineqarami? Anersaakkut paratiisi! a

2. Sooq anersaakkut paratiisi immikkuul­larissuua?

² Nunarsuarmi Saatanip uumissuinermik ajussusermillu siammar­teriffigisaani Jehovap toqqissisimanartunik avatangiiseqar­tippaatigut. (Joh 1. 5:19; Saqq 12:12) Pissutsit ajortut inunnut ajoqutaangaartarput. Jehovalli anersaakkut ingerlal­luarnias­sagatta asannilluni toqqissisimatip­paatigut. Anersaakkut paratiisi Biibilimi ‘qimarnguf­fissatut’ aamma ‘naatsiivittut naggoril­luartutut’ allaatigineqarpoq. (Es 4:6; 58:11) Ulluni kingullerni erloqinar­torsiorfiusuni makkunani Jehovap pilluaq­qusineratigut anersaakkut paratiisimiittut nuannaarlutillu toqqissisimasin­naapput. – Es 54:14; Tim 2. 3:1.

3. Esaja kapitali 65 itsaq qanoq eqquuppa?

³ Jehovap pruffiiti Esaja anersaakkut paratiisimiittut qanoq atugaqarumaar­nerannik allatsippaa. Tamanna Esajap allagaani  kapitali 65-imi allaatigineqarpoq, siulittuullu 537-mi Kr.in.si. eqquuteq­qaarpoq. Taamani juutit peqqissimisut Babylonnimiit aniguisitaallutik nunaminnut uterput. Jehovap innuttani pilluaq­qullugit Jerusalemmip guutisiorfiullu qarmaqqin­neqarnis­saannik ikiorpai guutisiorneq ilumoortoq pilerseq­qillugu. – Es 51:11; Zak 8:3.

4. Esaja kapitali 65 nalitsinni qanoq eqquuppa?

⁴ Esajap siulittuutaa 1919-imiilli aappassaanik eqquutilerpoq. Ukiumimi tassani Jehovap kiffai Babylon­nersuarmiit aniguisitaammata. Taamanimiilli anersaakkut paratiisi nunarsuarmut tamarmut siammariartorpoq. Oqaluus­sisartut aallussil­luartut ilagiinnik amerlasuunik pilersitsipput. Ersarippoq Guutip anersaavanit sunnertillutik allannguisut, inuimmi nakuuser­tartuusimasut inuunerlus­simasullu “kinaassuseq nutaaq Guutip piumasaanut naapertuuttumik pinngor­tinneqartoq” atisimavaat. (Ef 4:24) Soorunami Esajap allaatigisaasa ilarpassui paratiisissami aatsaat tamakkiisumik eqquutissapput. Maannali nuannaarutis­sarpassuaqareerpugut. Paasiniariartigu qanoq anersaakkut paratiisi iluaqutigisar­neripput aamma sooq qimanngisaan­nassagipput.

ANERSAAKKUT PARATIISIMIITTUT ILISARNAATAAT

5. Esaja 65:13-imi neriorsuutigineqartutut anersaakkut paratiisimiikkatta suna nuannaarutigisin­naavarput?

⁵ Anersaakkut peqqissuseq nakussatsin­neqarnerlu. Anersaakkut paratiisimiittut atugaat tassaniin­ngitsut atugaannit allaanerul­luinnarnerat Esajap siulittuutaani allaatigineqarpoq. (Esaja 65:13 atuaruk). Jehovap kiffani imminut qanimut attaveqarsin­naaqqullugit anersaakkut pisariaqartitaat naammat­torsuarmik isumagil­luartarpai. Anersaavanik illernartumik tunineqaratta, Biibileqaratta anersaakkullu inuussutis­sarpassuaqaratta ‘nerillutalu imerlutalu nuannaarsin­naavugut’. (Aamma takuuk Saqqummersitat 22:17). Anersaakkut paratiisimiin­ngitsut allaanerul­luinnartumik atugaqarput. Taakkumi ‘kaallutillu imerusul­lutillu kanngusutsin­neqarput’. Jehova nalugamikku anersaakkut pisariaqartitaat matussuser­neqarneq ajorput. – Am 8:11.

6. Jehovap tunissutai Joelip allagaani qanoq allaatigineqarpat, qanorlu iluaqutigisarpagut? (Joeli 2:21-24)

⁶ Joelip siulittuutimini inuussutissanut akuusinnaasut – soorlu karrit, viinni oliivenillu uuliaa – Jehovap tukkorluni tunissutaanut assersuutitut eqqartorpai. Jehovap pisariaqar­titatsinnik tamanik tunisarpaatigut. (Joel 2:21-24) Assersuutigalugu Biibili, Biibililersaarutigut, nittartagarput aamma ataatsimiinnerit ataatsimeersuar­nerillu aqqutigalugit isumassorluar­tarpaatigut. Ullut tamaasa anersaakkut inuussutissat pisarsin­naavagut, taamaat­tumillu anersaakkut peqqillutalu nakussatsin­neqartarpugut.

7. Suut ‘uummatitta iluunngaannit qiimmat­taatigisin­naavagut’? (Esaja 65:14)

⁷ Nuannaarneq nalerisimaarnerlu. Jehovamut qujamasungaaratta ‘qiimmat­tarsinnaavugut’. (Esaja 65:14 atuaruk). Guutip oqaasiani ilumoortut, neriorsuutit tuppallernartut Jiisusillu utertitsis­sutitut pilliutaa tunngavigalugu neriuuterput ‘uummatitta iluunngaannit qiimmat­taatigisin­naavagut’. Uppeqatigullu taakku eqqartoraangatsigit qamuuna nuannaar­tarpugut! – Tuss 34:9; 133:1-3.

8. Pingaarutillit suut marluk anersaakkut paratiisip immikkuul­larissuuneranut ersiutaappat?

⁸ Jehovap kiffaasa asaqatigiinnerat ataasioqatigiin­nerallu anersaakkut paratiisip immikkuul­larissuuneranut ersiutaapput. Taakku paratiisissami inuunissap qanoq issaneranut qilanaar­tuutaapput. Taamanik­kussamummi  Jehovap kiffai suli asaqatigiin­nerulerlutillu ataasioqatigiin­nerulissapput. (Kol 3:14) Qatanngutip arnap Jehovap Nalunaajaasui naapeqqaaramigit qanoq misiginerluni ima oqaluttuaraa: “Misigissuseq nuannaarneq nalugaluarpara, ilaquttak­kaluunniit ilagigaluaraangakkit. Iliuutsikkut asannit­tuliortoqarnera siullerpaamik takuara Jehovap Nalunaajaasuisa akornanni.” Kialuunniit qamannga pisumik nuannaarumalluni nalerisimaarumallunilu anersaakkut paratiisi misigisariaqarpaa. Eqqaamajuk Jehovap kiffai allanit ajortumik eqqartor­neqartaraluartut Jehovap ‘allamik ateqartikkai’, tassa ajunngitsumik ilisimaneqartutut isigigai aamma iluaralugillu ataqqinarsisikkai. Aamma anersaakkut ilaquttatsinnit ataqqineqarpugut. – Es 65:15.

9. Esaja 65:16, 17-imilu qanoq neriorsor­neqarpugut?

⁹ Toqqissisimaneq. Esaja 65:14-imi allassimavoq anersaakkut paratiisimiik­kusunngitsut ‘uummammigut naalliunnermik nilliasartut nimaarlutillu isumatsan­nerminni’. Jehovalli kiffai aamma erloqinartumik misigisaqarsin­naapput. Tamanna Jehovap qanoq iliuuseqarfigissavaa? Isumagiumaarpaa nanertuutaasut ‘puigorneqar­nissaat’, taassumalu ‘isaanut takussaajun­naassapput’. (Esaja 65:16, 17 atuakkit). Jehovap ajornar­torsiutigut tamaasa peerumaarpai, siunissamilu eqqaamajun­naarlugillu anniaatigiun­naassavagut.

10. Uppeqativit peqatigisarnerat sooq qujamasuutigaajuk? (Aamma asseq takuuk).

¹⁰ Maannangaaq toqqissisimaneq misigisin­naavarput, ataatsimiik­kaangattami ajortut nanertuutaasin­naasullu puioral­lartaratsigit. Tamattalu anersaap inerititaasa – soorlu asanninnerup, nuannaarnerup, eqqissinerup, inussiar­nisaarnerup saamanerullu – ersersin­nerisigut avatangiisitsinnik toqqissisimanar­tuutitseqataasin­naavugut. (Gal 5:22, 23) Ilumut Guutip peqatigiis­sortaanut ilaasin­naanerput pilluaq­qussutaavoq! Anersaakkut paratiisimiiginnartut “qilak nutaaq nunalu nutaaq” pillugit Guutip neriorsuutaata tamakkiisumik eqquunnera misigissavaat.

11. Anersaakkut paratiisimiinnerput qanoq misigilis­sutigaarput? (Esaja 65:18, 19)

¹¹ Qujamasunneq qilanaarnerlu. Anersaakkut paratiisimiinnitta ‘tipaatsuutiginissaanut qiimmat­taatiginis­saanullu’ pissutis­saqarluarnerput Esajap aamma allaatigaa. Anersaakkut paratiisi alutornartoq Jehovap pilersitaraa. (Esaja 65:18, 19 atuakkit). Tupinnanngilaq Jehovap inuit anersaakkut taarsiortut ilumoortup qaamaneranut isernis­saannut ikiorusut­tarmagit. Uagullu aqqutigaluta taamaaliortarpoq.  Biibilimi ilumoortut ilisimagatsigit qujamasungaarpugut, allanullu oqaluttuarerusoqaagut. – Jer 31:12.

12. Neriorsuutit Esajap allagaani allaatigineqartut qanoq misigilis­sutigaagit, aamma sooq? (Esaja 65:20-24)

¹² Jehova ikinngutigil­luaratsigu neriuuteqarnerput qujamasuutigeqaarput neriorsuutaasalu eqquunnissaat qilanaaringaarlutigu. Siunissami Jehova sunik tamanik nutaanngor­titsereerpat pissutsit qanoq ittuussanersut takorlooriakkit. Biibilimi ima neriorsuuteqarpoq: “Meeqqanik naalungiaanerminni toqusoqas­saassaaq utoqqarsuar­nilluunniit ukiussaminnik naammatsitsisiman­ngitsunik.” ‘Illuliorumaarpugut nammineq inigisas­satsinnik viinnequtinillu ikkussuilluta inerititaanillu nerilluta.’ ‘Sulilus­sinnassan­ngilagut’ Jehovamit pilluaq­qusaassagatta. Neriorsorpaatigut toqqissisimanartumik siunertaqarluar­tumillu inuuneqar­tissalluta. ‘Suli torlulan­ngitsugut’ nalussanngilaa qanoq pisariaqar­titaqar­nersugut, aamma ‘pinngortitat tamaasa kissaatigisaannik qaarsil­lartissavai’. – Es 65:20-24; Tuss 145:16.

13. Jehovamut kiffartor­tunngortut allannguinerat Esaja 65:25-mi qanoq allaatigineqarpa?

¹³ Eqqissisimaneq saamanerlu. Inuit uumasutut qaasuttutut pissuseqarsimasut Jehovap anersaava iluaqutigalugu inuunerminnik allannguil­luinnarsimapput. (Esaja 65:25 atuaruk). Pissusipalaatik pissuseriun­naarniarlugit ilungersorlutik sulissutigisimavaat. (Rom 12:2; Ef 4:22-24) Soorunami Jehovamut kiffaasugut naammal­luinnan­ngitsuugatta suli kukkusarpugut. Jehovalli ‘inuit tamalaat’ imminut asannittut ataatsimoor­tissimavai, asaqatigiittullu taakku ilumoortumik eqqisseqatigiil­lutillu ataasioqatigiipput. (Tit 2:11) Guuti Killeqan­ngitsumik Pissaanilik kisimi taamaalisitsisinnaavoq!

14. Esaja 65:25-p eqquunneranik assersuuteqarit.

¹⁴ Inuit ilumut allannguisin­naappat? Aap, assersuuteqariarta. Angut inuusuttoq 20-nik ukioqalerami arlaleriarluni parnaarus­saaqqareersimasoq assut inuunerluppoq nakuuser­tartuullunilu. Biilinik allanillu tillinniar­tarnini allatullu ingasattumik pinerlun­niartarnini pissutigalugit parnaarus­saasarsimavoq. Unataariaan­naasarpoq. Biibilimili ilumoortut ilikkaq­qaaramigit Jehovallu Nalunaajaasuisa ataatsimiinnerini najuuttalerami paasivaa anersaakkut paratiiseqartoq – tassa paasivaa Jehovamut kiffartorneq inuunerup siunertarigaa. Nalunaajaasun­ngoreerluni Esaja 65:25 imminut tulluus­sorisarpaa. Løvitut qaasuttutut pissuseqarun­naarluni savaaqqatut saamasun­ngorsimavoq.

15. Sooq allat anersaakkut paratiisimut qaaqqorusuppagut, aamma qanoq taamaaliorsin­naavugut?

¹⁵ Eqqarsaatigiuk neriorsuisoq kinaanersoq. Esaja 65:13-imi allassimavoq: “Ima oqarpoq Guuti Naalagaq.” Versillu 25-p naggataatungaani allassimavoq: “Oqarpoq Naalagaq.” Jehovallu oqaasii eqquuttuaannarput. (Es 55:10, 11) Anersaakkut paratiisi maanna misigaarput! Jehova qatanngutigiis­suarnik immikkuul­larissunik pilersitsisimavoq. Ilaqutariis­sortaanut ilaagatta nunarsuarmi nakuuserfiusumi inuugaluarluta toqqissisimallutalu nuannaarsin­naavugut. (Tuss 72:7) Taamaat­tumillu sapinngisatsinnik inuit amerlanerpaat anersaakkut paratiisimut ilaaleq­qullugit ikiorusuppagut. Taamaaliorsin­naavugut Jehova Biibililu pillugit ilinniar­titsinikkut. – Mat 28:19, 20.

INUIT ALLAT QANOQ ANERSAAKKUT PARATIISIMUT KAJUNGILERSIS­SINNAAGIGUT

16. Inuit anersaakkut paratiisimut qanoq kajungilertarpat?

¹⁶ Tamatta inuit anersaakkut paratiisimut kajungilersin­niarlugit iliuuseqarsin­naavugut.  Jehovap ilaarneratigut taamaaliorsin­naavugut. Taassuma inuit pinngitsaalillugit peqatigiis­sortaminut kajungilersinneq ajorpai. Saamasumilli imminut ‘qanillisittarpai’. (Joh 6:44; Jer 31:3) Inuit eqqortuliorusuttut Jehovap asanninnera pissusiilu nuanningaartut pillugit ilinniaraangamik taassumunnga qanillerusulertarput. Uagut pissuseris­saarnitsigut inuit anersaakkut paratiisimut qanoq kajungilersis­sinnaavagut?

17. Inuit allat anersaakkut paratiisimut qanoq kajungilersis­sinnaavagut?

¹⁷ Inuit allat anersaakkut paratiisimut kajungilersis­sinnaavagut uppeqatitta asannittumik inussiar­nersumillu pisarnerisigut. Ataatsimiin­nitsinni najuuteq­qaartut itsaq uppertuun­ngitsut Korintimi ataatsimiinnernut najuuteq­qaarsimagunartut assigalugit isummer­tikkusuppagut. Taakkumi ima oqaramik: “Ilumut Guuti akornas­sinniippoq.” (Kor 1. 14:24, 25; Zak 8:23) Taamaattumik ‘eqqisseqatigiinnermik’ siunnersuut maleruarusupparput. – Tes 1. 5:13.

18. Suna pissutigalugu peqatigiis­sortagut inuit nuannarilersin­naavaat?

¹⁸ Uppeqatigut pillugit Jehovatut isiginnit­taaseqar­nissarput sulissutigiuas­savarput. Taamaaliorsin­naavugut naammal­luinnan­ngissutaat atuukkun­naartussat pinnagit pissusiisali nuannersut isiginiar­nerisigut. Isumaqatigiin­ngissutit asanninneq aallaavigalugu aaqqissin­naavagut ‘immitsinnut inussiar­nersumik pisarnitsigut, qamannga pisumik misigin­neqatigin­ninnitsigut ilumoorlutalu isumakkeerfigin­ninnitsigut’. (Ef 4:32) Taava inuit taamatut pineqarusuttut anersaakkut paratiisimut kajungilissapput. b

 ANERSAAKKUT PARATIISIMIITTUARIT

19. (a) Inuit ilaat anersaakkut paratiisimut utereerlutik qanoq oqarsimappat? (Ungalusaq “ Uterput” takuuk). (b) Tamatta suna aalajangiusimas­savarput? (Aamma asseq takuuk).

¹⁹ Anersaakkut paratiisimiinnerput qujamasuutigeqaarput! Aatsaat taama alutornar­tigivoq, anersaakkullu paratiisimut ilaasut aatsaat taama amerlatigipput. Qujamasuutigiuartigu Jehovap toqqissisimanartunik avatangiiseqar­timmatigut. Kinaluunniit nakussatsin­neqarumasoq, nalerisimaarumasoq toqqissisimajumasorlu anersaakkut paratiisimiiler­tariaqarpoq qimanngisaan­narnissaalu aalajangiusimallugu. Eqqaamajulli Saatanip anersaakkut paratiisi qimassagipput kissaatigigamiuk tammartin­niarsarigaatigut. (Pet 1. 5:8; Saqq 12:9) Iluatsitsinissaanut periarfis­seqinatigu! Anersaakkut paratiisip alutornarnera, minguitsuunera eqqissinar­tuuneralu sernigiuartigit!