ບົດຄວາມສຶກສາທີ 17
ເພງທີ 111 ສິ່ງທີ່ເຮັດໃຫ້ພວກເຮົາມີຄວາມຍິນດີ
ໃຫ້ຢູ່ໃນອຸທິຍານໂດຍໄນຕໍ່ໆໄປ
“ໃຫ້ດີໃຈແລະມີຄວາມສຸກຕະຫຼອດໄປໃນສິ່ງທີ່ເຮົາຈະສ້າງ.”—ອຊຢ. 65:18
ຈຸດສຳຄັນ
ເຮົາຈະຮຽນວ່າເຮົາຈະໄດ້ຮັບປະໂຫຍດຫຍັງເມື່ອຢູ່ໃນອຸທິຍານໂດຍໄນ ແລະເຮົາຈະຊ່ວຍຄົນອື່ນແນວໃດໃຫ້ຢາກເຂົ້າມາຢູ່ໃນອຸທິຍານນີ້.
1. ອຸທິຍານໂດຍໄນແມ່ນຫຍັງ? ແລະເຮົາຄວນຕັ້ງໃຈທີ່ຈະເຮັດຫຍັງ?
ໃນທຸກມື້ນີ້ມີບ່ອນໜຶ່ງໃນໂລກທີ່ເປັນອຸທິຍານທີ່ງາມໆແລະມີແຕ່ຄວາມສະຫງົບສຸກ. ມີຫຼາຍລ້ານຄົນຢູ່ຫັ້ນແລະເຂົາເຈົ້າກຳລັງເຮັດສິ່ງທີ່ດີຫຼາຍຢ່າງ. ເຂົາເຈົ້າຕັ້ງໃຈທີ່ຈະຢູ່ໃນອຸທິຍານນີ້ຕໍ່ໆໄປ. ນອກຈາກນັ້ນ ເຂົາເຈົ້າຍັງຢາກໃຫ້ອີກຫຼາຍຄົນມາຢູ່ນຳເຂົາເຈົ້າໃນອຸທິຍານນີ້. ອຸທິຍານນີ້ແມ່ນຫຍັງ? ແມ່ນອຸທິຍານໂດຍໄນ. a
2. ອຸທິຍານໂດຍໄນເປັນຕາງຶດແນວໃດ?
2 ພະເຢໂຫວາເຮັດສິ່ງທີ່ເປັນຕາງຶດຫຼາຍ. ເພິ່ນໄດ້ສ້າງສະພາບແວດລ້ອມທີ່ເຮັດໃຫ້ຜູ້ຮັບໃຊ້ຂອງເພິ່ນມີຄວາມສະຫງົບສຸກແລະເປັນອັນໜຶ່ງອັນດຽວກັນໃນທ່າມກາງໂລກຂອງຊາຕານທີ່ມີແຕ່ຄວາມກຽດຊັງ ຄວາມຊົ່ວຮ້າຍ ແລະອັນຕະລາຍ. (1ຢຮ. 5:19; ພນມ. 12:12) ພະເຢໂຫວາພະເຈົ້າທີ່ມີຄວາມຮັກເຫັນວ່າໂລກທີ່ຊາຕານປົກຄອງສ້າງຄວາມເສຍຫາຍໃຫ້ເຮົາຫຼາຍແທ້ໆ ເພິ່ນຈຶ່ງເຮັດໃຫ້ເຮົາຮູ້ສຶກປອດໄພເພື່ອຈະຮັບໃຊ້ເພິ່ນຕໍ່ໆໄປຢ່າງມີຄວາມສຸກ. ຄຳພີໄບເບິນເວົ້າເຖິງອຸທິຍານໂດຍໄນວ່າເປັນ “ບ່ອນຫຼົບ” ທີ່ປອດໄພ ແລະເປັນ “ສວນທີ່ຖືກຫົດນ້ຳຈົນປຽກ.” (ອຊຢ. 4:6; 58:11) ພະເຢໂຫວາອວຍພອນຄົນທີ່ຢູ່ໃນອຸທິຍານໂດຍໄນໃຫ້ມີຄວາມສຸກແລະຮູ້ສຶກປອດໄພເຖິງວ່າຈະຢູ່ໃນສະໄໝສຸດທ້າຍທີ່ມີແຕ່ຄວາມຫຍຸ້ງຍາກລຳບາກ.—ອຊຢ. 54:14; 2ຕມ. 3:1
3. ຄຳພະຍາກອນໃນເອຊາຢາບົດ 65 ເກີດຂຶ້ນແທ້ແນວໃດເທື່ອທຳອິດ?
3 ພະເຢໂຫວາໃຊ້ຜູ້ພະຍາກອນເອຊາຢາໃຫ້ເວົ້າເຖິງຊີວິດຂອງຄົນທີ່ຢູ່ໃນອຸທິຍານໂດຍໄນວ່າຈະເປັນແນວໃດ. ເຮົາສາມາດອ່ານກ່ຽວກັບເລື່ອງນີ້ໃນເອຊາຢາບົດ 65. ຄຳພະຍາກອນຂອງເອຊາຢາເກີດຂຶ້ນແທ້ເປັນເທື່ອທຳອິດໃນປີ 537 ກ່ອນຄລິດຕະສັກກະຫຼາດ. ຕອນນັ້ນ ຄົນຢິວຖືກປົດປ່ອຍຈາກການເປັນຊະເລີຍຢູ່ບາບີໂລນ ແລະເຂົາເຈົ້າໄດ້ກັບໄປເມືອງເຢຣູຊາເລັມທີ່ເປັນບ້ານເກີດຂອງເຂົາເຈົ້າ. ພະເຢໂຫວາອວຍພອນຄົນຢິວເຫຼົ່ານັ້ນແລະຊ່ວຍເຂົາເຈົ້າໃຫ້ຟື້ນຟູເມືອງເຢຣູຊາເລັມທີ່ຮ້າງເປົ່າໃຫ້ກັບມາງາມອີກເທື່ອໜຶ່ງ ແລະຟື້ນຟູວິຫານເຊິ່ງເປັນສູນກາງຂອງການນະມັດສະການແທ້ຂອງຄົນອິດສະຣາເອນ.—ອຊຢ. 51:11; ຊຄຢ. 8:3
4. ຄຳພະຍາກອນໃນເອຊາຢາບົດ 65 ເກີດຂຶ້ນແທ້ແນວໃດໃນທຸກມື້ນີ້?
4 ຄຳພະຍາກອນຂອງເອຊາຢາເກີດຂຶ້ນແທ້ເທື່ອທີ 2 ຕັ້ງແຕ່ປີ 1919 ຕອນທີ່ຜູ້ນະມັດສະການຂອງພະເຢໂຫວາໄດ້ເປັນອິດສະຫຼະຈາກບາບີໂລນໃຫຍ່. ຕັ້ງແຕ່ນັ້ນມາ ອຸທິຍານໂດຍໄນກໍເລີ່ມແຜ່ຂະຫຍາຍໄປທົ່ວໂລກ. ຜູ້ປະກາດຂ່າວດີເລື່ອງການປົກຄອງຂອງພະເຈົ້າທີ່ກະຕືລືລົ້ນໄດ້ຕັ້ງປະຊາຄົມໃນບ່ອນຕ່າງໆ ແລະເຂົາເຈົ້າໄດ້ສະແດງຄຸນລັກສະນະແບບຄລິດສະຕຽນ. ແຕ່ກີ້ຄົນເຫຼົ່ານີ້ມັກໃຊ້ຄວາມຮຸນແຮງແລະເປັນຄົນບໍ່ມີສິນລະທຳ. ແຕ່ເຂົາເຈົ້າໄດ້ປ່ຽນແປງໂຕເອງໂດຍ “ປູກຝັງນິດໄສໃໝ່ທີ່ຖືກສ້າງຂຶ້ນຕາມທີ່ພະເຈົ້າຕ້ອງການ.” (ອຟຊ. 4:24) ແນ່ນອນວ່າສິ່ງດີໆຫຼາຍຢ່າງທີ່ເອຊາຢາເວົ້າເຖິງຈະເກີດຂຶ້ນແທ້ໃນໂລກໃໝ່. ແຕ່ຕອນນີ້ເຮົາກໍໄດ້ຮັບປະໂຫຍດຫຼາຍຢ່າງຈາກການໄດ້ຢູ່ໃນອຸທິຍານໂດຍໄນ. ໃຫ້ເຮົາມາເບິ່ງວ່າເຮົາໄດ້ຮັບປະໂຫຍດຫຍັງແດ່ ແລະເປັນຫຍັງເຮົາຄວນຢູ່ໃນອຸທິຍານນີ້ຕໍ່ໆໄປ.
ຄົນທີ່ຢູ່ໃນອຸທິຍານໂດຍໄນໄດ້ຮັບສິ່ງດີໆຫຍັງແດ່?
5. ຕາມທີ່ສັນຍາໄວ້ໃນເອຊາຢາ 65:13 ເຮົາຈະໄດ້ຫຍັງເມື່ອຢູ່ໃນອຸທິຍານໂດຍໄນ?
5 ໄດ້ຮັບການລ້ຽງຢ່າງດີແລະສົດຊື່ນ. ຄຳພະຍາກອນຂອງເອຊາຢາເຮັດໃຫ້ເຫັນຄວາມແຕກຕ່າງກັນຫຼາຍແທ້ໆລະຫວ່າງຄົນທີ່ຢູ່ໃນອຸທິຍານໂດຍໄນກັບຄົນທີ່ບໍ່ໄດ້ຢູ່. (ອ່ານເອຊາຢາ 65:13) ພະເຢໂຫວາໃຫ້ຜູ້ຮັບໃຊ້ຂອງເພິ່ນມີທຸກສິ່ງທີ່ຈຳເປັນ ເຊັ່ນ: ເຮົາໄດ້ຮັບພະລັງບໍລິສຸດ ເຮົາມີຄຳພີໄບເບິນ ແລະປຶ້ມຕ່າງໆຂອງອົງການເພື່ອເຮົາຈະ “ມີແນວກິນ . . . ມີນ້ຳກິນ . . . [ແລະ] ມີຄວາມສຸກ.” (ສົມທຽບກັບພະນິມິດ 22:17) ກົງກັນຂ້າມ ຄົນທີ່ບໍ່ໄດ້ຢູ່ໃນອຸທິຍານໂດຍໄນ “ຈະອຶດຢາກ . . . ຈະຫິວນ້ຳ . . . [ແລະ] ຈະອັບອາຍ” ຍ້ອນເຂົາເຈົ້າບໍ່ຮູ້ຈັກພະເຢໂຫວາ.—ອມ. 8:11
6. ໃນໂຢເອນ 2:21-24 ພະເຢໂຫວາໃຫ້ຫຍັງເຮົາແດ່ ແລະສິ່ງເຫຼົ່ານີ້ເປັນປະໂຫຍດຕໍ່ເຮົາແນວໃດ?
6 ໃນຄຳພະຍາກອນຂອງໂຢເອນ ລາວເວົ້າເຖິງອາຫານຫຼັກໃນຊີວິດ ເຊັ່ນ: ເຂົ້າ ເຫຼົ້າແວງ ແລະນ້ຳມັນໝາກກອກເພື່ອສະແດງໃຫ້ເຫັນວ່າພະເຢໂຫວາຈະໃຫ້ເຮົາມີສິ່ງຈຳເປັນທຸກຢ່າງ ເຊິ່ງລວມເຖິງຄວາມຮູ້ທີ່ເສີມຄວາມເຊື່ອ. (ຢອ. 2:21-24) ໃນທຸກມື້ນີ້ ພະເຢໂຫວາໃຫ້ເຮົາມີຄຳພີໄບເບິນ ປຶ້ມຕ່າງໆ ເວັບໄຊ ການປະຊຸມປະຈຳປະຊາຄົມ ແລະການປະຊຸມໃຫຍ່ຕ່າງໆ. ເຮົາໄດ້ຮັບປະໂຫຍດຈາກສິ່ງເຫຼົ່ານີ້ທຸກມື້ ເຮົາຈຶ່ງຮູ້ສຶກວ່າໄດ້ຮັບການລ້ຽງຢ່າງດີແລະສົດຊື່ນຂຶ້ນ.
7. ອັນໃດເຮັດໃຫ້ເຮົາມີຄວາມສຸກຫຼາຍ? (ເອຊາຢາ 65:14)
7 ມີຄວາມສຸກແລະຮູ້ສຶກພໍໃຈ. ຜູ້ຮັບໃຊ້ຂອງພະເຢໂຫວາ “ຮ້ອງດ້ວຍຄວາມດີໃຈ” ຍ້ອນເຂົາເຈົ້າຮູ້ສຶກຂອບໃຈພະເຢໂຫວາຫຼາຍ. (ອ່ານເອຊາຢາ 65:14) ເມື່ອເຮົາໄດ້ຮູ້ຄວາມຈິງແລະໄດ້ເຫັນຄຳສັນຍາທີ່ໃຫ້ກຳລັງໃຈໃນຄຳພີໄບເບິນ ແລະເຮົາໝັ້ນໃຈໃນຄວາມຫວັງໄດ້ຍ້ອນຄ່າໄຖ່ຂອງພະເຢຊູ ເຮົາກໍ “ມີຄວາມສຸກ.” ການເວົ້າເລື່ອງນີ້ກັບພີ່ນ້ອງຮ່ວມຄວາມເຊື່ອເຮັດໃຫ້ເຮົາມີຄວາມສຸກຫຼາຍແທ້ໆ.—ພສ. 34:8; 133:1-3
8. ສອງຢ່າງທີ່ເດັ່ນໃນອຸທິຍານໂດຍໄນມີຫຍັງແດ່?
8 ຄວາມຮັກແລະຄວາມເປັນນ້ຳໜຶ່ງໃຈດຽວກັນຂອງຜູ້ຮັບໃຊ້ຂອງພະເຢໂຫວາເປັນ 2 ຢ່າງທີ່ເດັ່ນໃນອຸທິຍານໂດຍໄນ. ຄວາມ “ເປັນນ້ຳໜຶ່ງໃຈດຽວກັນ” ຊ່ວຍເຮົາໃຫ້ນຶກພາບອອກເລີຍວ່າຊີວິດໃນໂລກໃໝ່ຈະເປັນແນວໃດ. ໃນຕອນນັ້ນ ຜູ້ຮັບໃຊ້ຂອງພະເຢໂຫວາຈະຮັກກັນແລະເປັນນ້ຳໜຶ່ງໃຈດຽວກັນຫຼາຍກວ່າໃນຕອນນີ້ອີກ. (ກລຊ. 3:14) ພີ່ນ້ອງຍິງຄົນໜຶ່ງເລົ່າປະສົບການຕອນທີ່ລາວໄດ້ເຈິກັບພະຍານພະເຢໂຫວາເທື່ອທຳອິດ. ລາວເວົ້າວ່າ: “ຕອນນັ້ນຂ້ອຍບໍ່ຮູ້ເລີຍວ່າຄວາມສຸກເປັນແນວໃດ ຍ້ອນໃນຄອບຄົວຂອງຂ້ອຍບໍ່ມີຄວາມສຸກ. ແຕ່ເທື່ອທຳອິດທີ່ຂ້ອຍເຫັນພະຍານພະເຢໂຫວາສະແດງຄວາມຮັກຕໍ່ກັນ ຂ້ອຍຈຶ່ງຮູ້ວ່າຄວາມຮັກແທ້ເປັນແນວໃດ.” ຖ້າຜູ້ໃດຢາກມີຄວາມສຸກແລະຄວາມພໍໃຈ ຕ້ອງເຂົ້າມາໃນອຸທິຍານໂດຍໄນ. ບໍ່ວ່າຄົນໃນໂລກນີ້ຈະຄິດແນວໃດກ່ຽວກັບຜູ້ຮັບໃຊ້ຂອງພະເຢໂຫວາ ແຕ່ເຂົາເຈົ້າກໍມີຊື່ສຽງທີ່ດີສຳລັບເພິ່ນແລະພີ່ນ້ອງຮ່ວມຄວາມເຊື່ອ.—ອຊຢ. 65:15
9. ເອຊາຢາ 65:16, 17 ເວົ້າແນວໃດກ່ຽວກັບຄວາມເຈັບປວດໃຈແລະຄວາມທຸກລຳບາກທີ່ເຮົາເຈິໃນຕອນນີ້?
9 ຜ່ອນຄາຍແລະສະຫງົບໃຈ. ເອຊາຢາ 65:14 ບອກວ່າ ຄົນທີ່ເລືອກທີ່ຈະບໍ່ຢູ່ໃນອຸທິຍານໂດຍໄນຈະ “ຮ້ອງໄຫ້ຍ້ອນເຈັບປວດໃຈ [ແລະ] ຈະຮ້ອງໄຫ້ເສຍໃຈຍ້ອນໝົດຫວັງ.” ແຕ່ຄວາມເຈັບປວດແລະຄວາມທຸກລຳບາກທີ່ຜູ້ຮັບໃຊ້ຂອງພະເຢໂຫວາເຈິໃນທຸກມື້ນີ້ເດຈະເປັນແນວໃດ? ຄຳພີໄບເບິນບອກວ່າ ໃນທີ່ສຸດ “ຈະບໍ່ມີໃຜຄິດເຖິງຄວາມທຸກລຳບາກທີ່ເຄີຍມີແຕ່ກີ້ [ແລະ] ຈະບໍ່ມີສິ່ງເຫຼົ່ານີ້ໃຫ້ [ພະເຈົ້າ] ໄດ້ເຫັນອີກ.” (ອ່ານເອຊາຢາ 65:16, 17) ພະເຢໂຫວາຈະເຮັດໃຫ້ບັນຫາທຸກຢ່າງຂອງເຮົາໝົດໄປ ແລະເຮົາຈະບໍ່ຄິດເຖິງເລື່ອງທີ່ເຮັດໃຫ້ເຮົາເຈັບປວດໃຈອີກເລີຍ.
10. ເປັນຫຍັງເຈົ້າຈຶ່ງຮູ້ສຶກດີໃຈທີ່ໄດ້ຢູ່ກັບພີ່ນ້ອງຮ່ວມຄວາມເຊື່ອ? (ເບິ່ງຮູບນຳ)
10 ແມ່ນແຕ່ຕອນນີ້ເຮົາກໍຮູ້ສຶກສະຫງົບໃຈຫຼາຍເມື່ອເຂົ້າຮ່ວມການປະຊຸມ. ຢູ່ຫັ້ນເຮົາຮູ້ສຶກຜ່ອນຄາຍແລະບໍ່ເຄັ່ງຕຶງກັບສິ່ງທີ່ເກີດຂຶ້ນໃນໂລກຂອງຊາຕານ. ເຮົາຍັງຊ່ວຍພີ່ນ້ອງຮ່ວມຄວາມເຊື່ອໃຫ້ຮູ້ສຶກສະຫງົບໃຈໄດ້ຄືກັນເມື່ອເຮົາສະແດງຄວາມຮັກ ຄວາມຍິນດີ ສັນຕິສຸກ ຄວາມເມດຕາ ແລະຄວາມອ່ອນໂຍນເຊິ່ງເປັນຜົນທີ່ເກີດຈາກພະລັງຂອງພະເຈົ້າ. (ຄລຕ. 5:22, 23) ເຮົາດີໃຈແທ້ໆທີ່ໄດ້ຢູ່ໃນອົງການຂອງພະເຢໂຫວາ! ຜູ້ທີ່ຢູ່ໃນອຸທິຍານໂດຍໄນຈະໄດ້ເຫັນຄຳສັນຍາຂອງພະເຢໂຫວາເກີດຂຶ້ນແທ້ເມື່ອເພິ່ນສ້າງ “ຟ້າສະຫວັນໃໝ່ແລະໂລກໃໝ່.”
ເຮົາມີຄວາມສຸກແທ້ໆທີ່ໄດ້ຢູ່ໃນຄອບຄົວຂອງພະເຢໂຫວາໃນອຸທິຍານໂດຍໄນ (ເບິ່ງຂໍ້ 10) c
11. ຕາມເອຊາຢາ 65:18, 19 ອຸທິຍານໂດຍໄນທີ່ພະເຢໂຫວາສ້າງຂຶ້ນມາຄວນເຮັດໃຫ້ເຮົາຮູ້ສຶກແນວໃດ?
11 ຕື່ນເຕັ້ນແລະເຫັນຄ່າ. ເອຊາຢາຍັງເວົ້າເຖິງເຫດຜົນທີ່ເຮົາຄວນ “ດີໃຈແລະມີຄວາມສຸກ” ທີ່ໄດ້ຢູ່ໃນອຸທິຍານໂດຍໄນ ເຊິ່ງເປັນສະພາບແວດລ້ອມທີ່ພະເຢໂຫວາສ້າງຂຶ້ນມາ. (ອ່ານເອຊາຢາ 65:18, 19) ບໍ່ແປກໃຈເລີຍທີ່ພະເຢໂຫວາໃຊ້ເຮົາໃຫ້ຊ່ວຍຄົນອື່ນໃຫ້ອອກມາຈາກອົງການຕ່າງໆຂອງໂລກນີ້ທີ່ບໍ່ໄດ້ສອນຄວາມຈິງກ່ຽວກັບເພິ່ນ ແລະພາເຂົາເຈົ້າໃຫ້ເຂົ້າມາຢູ່ໃນອຸທິຍານໂດຍໄນທີ່ງາມໆ. ການຮູ້ຄວາມຈິງເຮັດໃຫ້ເຮົາໄດ້ຮັບປະໂຫຍດຫຼາຍຢ່າງ ເຮົາຈຶ່ງຢາກບອກຄົນອື່ນໃຫ້ຮູ້ກ່ຽວກັບເລື່ອງນີ້ຄືກັນ.—ຢຣມ. 31:12
12. ຄຳສັນຍາໃນເອຊາຢາ 65:20-24 ເຮັດໃຫ້ເຈົ້າຮູ້ສຶກແນວໃດ? ແລະຍ້ອນຫຍັງຈຶ່ງຮູ້ສຶກແບບນັ້ນ?
12 ເຮົາຍັງຕື່ນເຕັ້ນແລະເຫັນຄ່າຄວາມຫວັງທີ່ເຮົາມີຍ້ອນໄດ້ຢູ່ໃນອຸທິຍານໂດຍໄນ. ລອງຄິດເບິ່ງວ່າເຮົາຈະໄດ້ເຫັນແລະໄດ້ເຮັດຫຍັງແດ່ໃນໂລກໃໝ່! ຄຳພີໄບເບິນສັນຍາວ່າ: “ຈະບໍ່ມີແອນ້ອຍທີ່ເກີດມາຢູ່ໄດ້ແຕ່ສອງສາມມື້ແລ້ວກໍຕາຍ. ຜູ້ເຖົ້າຈະມີອາຍຸຍືນຍາວແລະຈະບໍ່ຕາຍກ່ອນໄວ.” ເຮົາຈະ “ປຸກເຮືອນແລະໄດ້ຢູ່ໃນເຮືອນນັ້ນ [ແລະ] ຈະເຮັດສວນໝາກລະແຊັງແລະໄດ້ກິນໝາກຂອງມັນ.” ເຮົາຈະ “ບໍ່ຕ້ອງເຮັດວຽກເອົາແທ້ເອົາວ່າແລ້ວບໍ່ໄດ້ຫຍັງ” ຍ້ອນ “ພະເຢໂຫວາ [ຈະ] ອວຍພອນ” ເຮົາ. ເພິ່ນສັນຍາວ່າຈະໃຫ້ເຮົາມີຊີວິດທີ່ມີຄວາມສຸກ ປອດໄພ ແລະມີຈຸດມຸ່ງໝາຍໃນຊີວິດ. ພະເຢໂຫວາຮູ້ວ່າເຮົາແຕ່ລະຄົນຈຳເປັນຕ້ອງມີຫຍັງແລະຈະຕອບ “ກ່ອນທີ່ [ເຮົາ] ຈະຮ້ອງຫາ” ເພິ່ນ ແລະເພິ່ນຈະ “ໃຫ້ທຸກຊີວິດໄດ້ສົມຫວັງ.”—ອຊຢ. 65:20-24; ພສ. 145:16
13. ເອຊາຢາ 65:25 ເວົ້າເຖິງການປ່ຽນແປງຂອງຄົນທີ່ເຂົ້າມາຮັບໃຊ້ພະເຢໂຫວາແນວໃດ?
13 ສະຫງົບສຸກແລະປອດໄພ. ພະລັງບໍລິສຸດຂອງພະເຢໂຫວາໄດ້ຊ່ວຍຫຼາຍຄົນທີ່ເຄີຍມີນິດໄສທີ່ໂຫດຮ້າຍຄືກັບສັດໃຫ້ປ່ຽນແປງໂຕເອງໄດ້ແທ້ໆ. (ອ່ານເອຊາຢາ 65:25) ເຂົາເຈົ້າໄດ້ຖິ້ມນິດໄສເກົ່າທີ່ບໍ່ດີ. (ຣມ. 12:2; ອຟຊ. 4:22-24) ແນ່ນອນວ່າຜູ້ຮັບໃຊ້ຂອງພະເຢໂຫວາຍັງເປັນຄົນບໍ່ສົມບູນແບບ ເຮົາຈຶ່ງເຮັດຜິດພາດຢູ່. ແຕ່ພະເຢໂຫວາໄດ້ລວບລວມ “ຄົນທຸກປະເພດ” ທີ່ຮັກເພິ່ນແລະຮັກກັນແລະກັນໃຫ້ມາຢູ່ນຳກັນ. ຜົນກໍຄືເຮົາມີສັນຕິສຸກແລະເປັນນ້ຳໜຶ່ງໃຈດຽວກັນ. (ຕຕ. 2:11) ການອັດສະຈັນແບບນີ້ມີແຕ່ພະເຈົ້າຜູ້ມີລິດເດດສູງສຸດເທົ່ານັ້ນທີ່ເຮັດໄດ້!
14. ເອຊາຢາ 65:25 ເປັນຈິງແນວໃດກັບພີ່ນ້ອງຊາຍຄົນໜຶ່ງ?
14 ຄົນເຮົາຈະປ່ຽນແປງໂຕເອງໄດ້ແທ້ໆບໍ? ໃຫ້ເຮົາເບິ່ງປະສົບການນີ້ນຳກັນ. ຜູ້ຊາຍຄົນໜຶ່ງອາຍຸປະມານ 20 ປີ ເຄີຍເຂົ້າຄຸກອອກຄຸກຫຼາຍເທື່ອ ລາວມັກໃຊ້ຊີວິດແບບຜິດສິນລະທຳແລະມັກໃຊ້ຄວາມຮຸນແຮງ. ລາວຕິດຄຸກຍ້ອນລັກລົດໃຫຍ່ ລັກເຄື່ອງ ແລະກໍ່ອາດຊະຍາກຳຮ້າຍແຮງອື່ນໆ. ລາວພ້ອມທີ່ຈະມີເລື່ອງກັບທຸກຄົນ. ຕອນທີ່ລາວໄດ້ຍິນຄວາມຈິງໃນຄຳພີໄບເບິນເທື່ອທຳອິດແລະໄດ້ເຂົ້າຮ່ວມການປະຊຸມກັບພະຍານພະເຢໂຫວາ ລາວໝັ້ນໃຈວ່າໄດ້ເຈິຈຸດມຸ່ງໝາຍໃນຊີວິດແລ້ວ ນັ້ນກໍຄື ການໄດ້ນະມັດສະການພະເຢໂຫວາຢູ່ອຸທິຍານໂດຍໄນ. ຫຼັງຈາກລາວຮັບບັບເຕມາແລະເຂົ້າມາເປັນພະຍານພະເຢໂຫວາແລ້ວ ລາວມັກຄິດເລື້ອຍໆວ່າເອຊາຢາ 65:25 ຖືກກັບຊີວິດຂອງລາວ. ລາວໄດ້ປ່ຽນຈາກຄົນທີ່ມັກໃຊ້ຄວາມຮຸນແຮງແລະໂຫດຮ້າຍຄືກັບສິງມາເປັນຄົນທີ່ຮັກຄວາມສະຫງົບສຸກຄືກັບແກະນ້ອຍ.
15. ເປັນຫຍັງເຮົາຢາກຊວນຄົນອື່ນໃຫ້ເຂົ້າມາຢູ່ໃນອຸທິຍານໂດຍໄນ? ແລະເຮົາຈະເຮັດແບບນັ້ນໄດ້ແນວໃດ?
15 ເອຊາຢາ 65:13 ເລີ່ມຕົ້ນດ້ວຍຄຳວ່າ “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າວ່າ” ແລະທ້າຍຂໍ້ 25 ເວົ້າວ່າ “ພະເຢໂຫວາເວົ້າແນວນີ້.” ຄຳເວົ້າຂອງພະເຢໂຫວາເປັນຈິງສະເໝີ. (ອຊຢ. 55:10, 11) ໃນທຸກມື້ນີ້ ອຸທິຍານໂດຍໄນມີແລ້ວ. ພະເຢໂຫວາໄດ້ສ້າງຄອບຄົວໜຶ່ງທີ່ມີແຕ່ຜູ້ນະມັດສະການເພິ່ນ ເຊິ່ງເປັນຄອບຄົວທີ່ພິເສດຫຼາຍ. ເມື່ອເຮົາໄດ້ຢູ່ໃນຄອບຄົວນີ້ ເຮົາກໍມີຄວາມສະຫງົບສຸກແລະຮູ້ສຶກປອດໄພເຖິງວ່າຈະຢູ່ໃນໂລກທີ່ມີແຕ່ຄວາມຮຸນແຮງ. (ພສ. 72:7) ຍ້ອນແນວນີ້ ເຮົາຈຶ່ງຢາກຊ່ວຍຄົນໃຫ້ຫຼາຍທີ່ສຸດເທົ່າທີ່ເຮັດໄດ້ໃຫ້ເຂົ້າມາຢູ່ໃນຄອບຄົວນີ້ນຳກັນ. ເຮົາຈະເຮັດແບບນີ້ໄດ້ໂດຍທຸ່ມເທໂຕເອງໃນການສອນຄົນໃຫ້ເປັນລູກສິດ.—ມທ. 28:19, 20
ເຮົາຈະຊ່ວຍຄົນອື່ນແນວໃດໃຫ້ຢາກເຂົ້າມາຢູ່ໃນອຸທິຍານໂດຍໄນ?
16. ອັນໃດເຮັດໃຫ້ຄົນຢາກເຂົ້າມາຢູ່ໃນອຸທິຍານໂດຍໄນ?
16 ເຮົາແຕ່ລະຄົນສາມາດເຮັດບາງຢ່າງເພື່ອຊ່ວຍຄົນອື່ນໃຫ້ຢາກເຂົ້າມາຢູ່ໃນອຸທິຍານໂດຍໄນ. ວິທີໜຶ່ງແມ່ນ ການຮຽນແບບພະເຢໂຫວາ. ເພິ່ນບໍ່ໄດ້ບັງຄັບໃຜໃຫ້ເຂົ້າມາໃນອົງການຂອງເພິ່ນ ແຕ່ເພິ່ນ “ຊັກນຳ” ເຂົາເຈົ້າດ້ວຍຄວາມອ່ອນໂຍນໃຫ້ເຂົ້າມາຫາເພິ່ນ. (ຢຮ. 6:44; ຢຣມ. 31:3) ເມື່ອຄົນທີ່ມີຫົວໃຈທີ່ດີໄດ້ຮຽນຮູ້ກ່ຽວກັບຄວາມຮັກແລະຄຸນລັກສະນະທີ່ດີຂອງພະເຢໂຫວາ ເຂົາເຈົ້າກໍຢາກເຂົ້າມາຫາເພິ່ນດ້ວຍໂຕເອງ. ຄຸນລັກສະນະທີ່ດີແລະການປະພຶດທີ່ດີຂອງເຮົາຈະຊ່ວຍຄົນອື່ນແນວໃດໃຫ້ຢາກເຂົ້າມາຢູ່ໃນອຸທິຍານໂດຍໄນ?
17. ເຮົາຈະຊ່ວຍຄົນອື່ນແນວໃດໃຫ້ຢາກເຂົ້າມາຢູ່ໃນອຸທິຍານໂດຍໄນ?
17 ວິທີທີ່ເຮົາຈະຊ່ວຍຄົນອື່ນໃຫ້ຢາກເຂົ້າມາຢູ່ໃນອຸທິຍານໂດຍໄນແມ່ນ ການສະແດງຄວາມຮັກແລະຄວາມເຫັນອົກເຫັນໃຈຕໍ່ພີ່ນ້ອງ. ເມື່ອມີຄົນໃໝ່ມາປະຊຸມກັບເຮົາ ເຮົາຢາກໃຫ້ເຂົາເຈົ້າຮູ້ສຶກຄືກັບຄົນທີ່ມາຮ່ວມປະຊຸມໃນເມື່ອງໂກຣິນໂທສະໄໝບູຮານ ຄົນເຫຼົ່ານັ້ນເວົ້າວ່າ: “ພະເຈົ້າຢູ່ກັບພວກເຈົ້າແທ້ໆ.” (1ກຣ. 14:24, 25; ຊຄຢ. 8:23) ດັ່ງນັ້ນ ເຮົາຕ້ອງເຮັດຕາມຄຳແນະນຳທີ່ວ່າ “ຂໍໃຫ້ພວກເຈົ້າຢູ່ນຳກັນຢ່າງສະຫງົບສຸກ.”—1ທຊ. 5:13
18. ອັນໃດອາດຊ່ວຍຄົນໃຫ້ຢາກເຂົ້າມາຢູ່ໃນອົງການຂອງເຮົາ?
18 ເຮົາຄວນພະຍາຍາມເບິ່ງພີ່ນ້ອງຄືກັບທີ່ພະເຢໂຫວາເບິ່ງເຂົາເຈົ້າ. ເຮົາສາມາດເຮັດແບບນັ້ນໄດ້ໂດຍເບິ່ງຈຸດທີ່ດີ ບໍ່ແມ່ນຄວາມບໍ່ສົມບູນແບບຂອງເຂົາເຈົ້າ ຍ້ອນວ່າໃນທີ່ສຸດຄວາມບໍ່ສົມບູນແບບນັ້ນກໍຈະໝົດໄປ. ເມື່ອເຮົາມີເລື່ອງທີ່ບໍ່ເຂົ້າໃຈກັນກັບພີ່ນ້ອງ ເຮົາຈະແກ້ໄຂບັນຫາໃນແບບທີ່ສະແດງຄວາມຮັກໂດຍ “ເມດຕາກັນ ເຫັນອົກເຫັນໃຈກັນ ໃຫ້ອະໄພກັນຢ່າງໃຈກວ້າງ.” (ອຟຊ. 4:32) ຖ້າເຮົາເຮັດແບບນີ້ ຄົນທີ່ຢາກໄດ້ຮັບການປະຕິບັດແບບດຽວກັນນີ້ກໍຢາກຈະເຂົ້າມາຢູ່ໃນອຸທິຍານໂດຍໄນ. b
ໃຫ້ຢູ່ໃນອຸທິຍານໂດຍໄນຕໍ່ໆໄປ
19. (ກ) ໃນຂອບ “ ເຂົາເຈົ້າອອກໄປ ແລ້ວກໍກັບເຂົ້າມາ” ບາງຄົນທີ່ກັບເຂົ້າມາໃນອຸທິຍານໂດຍໄນເວົ້າແນວໃດ? (ຂ) ເຮົາຄວນຕັ້ງໃຈທີ່ຈະເຮັດຫຍັງຕໍ່ໆໄປ? (ເບິ່ງຮູບນຳ)
19 ເຮົາເຫັນຄ່າອຸທິຍານໂດຍໄນຫຼາຍແທ້ໆ! ອຸທິຍານນີ້ງາມຫຼາຍກວ່າເກົ່າ ແລະຄົນທີ່ເຂົ້າມານະມັດສະການພະເຢໂຫວາກໍມີຫຼາຍຂຶ້ນເລື້ອຍໆ. ຂໍໃຫ້ເຮົາເຫັນຄ່າອຸທິຍານທີ່ພະເຢໂຫວາສ້າງໃຫ້ເຮົາ. ທຸກຄົນທີ່ຢາກສົດຊື່ນ ມີຄວາມສຸກ ສະຫງົບໃຈ ແລະຮູ້ສຶກປອດໄພຕ້ອງເຂົ້າມາຢູ່ໃນອຸທິຍານໂດຍໄນ ແລະໃຫ້ຢູ່ໃນອຸທິຍານນີ້ຕໍ່ໆໄປ! ແຕ່ເຮົາຕ້ອງລະວັງ ຍ້ອນຊາຕານພະຍາຍາມສຸດຂີດເພື່ອຈະເຮັດໃຫ້ເຮົາອອກຈາກອຸທິຍານໂດຍໄນນີ້. (1ປຕ. 5:8; ພນມ. 12:9) ເຮົາຕ້ອງບໍ່ຍອມໃຫ້ມັນເຮັດສຳເລັດ. ດັ່ງນັ້ນ ຂໍໃຫ້ເຮົາພະຍາຍາມເຕັມທີທີ່ຈະປົກປ້ອງອຸທິຍານໂດຍໄນໃຫ້ງາມ ບໍລິສຸດ ແລະສະຫງົບສຸກຕໍ່ໆໄປ.
ຄົນທີ່ຢູ່ໃນອຸທິຍານໂດຍໄນຕໍ່ໆໄປຈະມີຄວາມສຸກຄືກັນໃນໂລກໃໝ່ທີ່ເປັນອຸທິຍານແທ້ໆ (ເບິ່ງຂໍ້ 19)
ເຈົ້າຈະຕອບແນວໃດ?
-
ອຸທິຍານໂດຍໄນແມ່ນຫຍັງ?
-
ຄົນທີ່ຢູ່ໃນອຸທິຍານໂດຍໄນໄດ້ຮັບສິ່ງດີໆຫຍັງແດ່?
-
ເຮົາຈະຊ່ວຍຄົນອື່ນແນວໃດໃຫ້ຢາກເຂົ້າມາຢູ່ໃນອຸທິຍານໂດຍໄນ?
ເພງທີ 144 ຈ້ອງເບິ່ງທີ່ລາງວັນ
a ການອະທິບາຍຄຳສັບ: ຄຳວ່າ “ອຸທິຍານໂດຍໄນ” ໝາຍເຖິງສະພາບແວດລ້ອມທີ່ສະຫງົບສຸກຍ້ອນໄດ້ນະມັດສະການພະເຢໂຫວາ. ເມື່ອເຮົາໄດ້ຢູ່ໃນອຸທິຍານໂດຍໄນ ເຮົາກໍມີຄວາມສຸກທີ່ໄດ້ໃກ້ຊິດກັບພະເຢໂຫວາແລະກັບພີ່ນ້ອງ.
b ເບິ່ງວິດີໂອຕອນນີ້ພວກເຂົາເປັນແນວໃດ? ອະເລນາ ຊິດນິໂກວາ—ວິທີທີ່ຄວາມຝັນຂອງຂ້ອຍເປັນຈິງ ໃນເວັບໄຊ jw.org ແລະເບິ່ງວ່າພີ່ນ້ອງອະເລນາໄດ້ຮັບສິ່ງດີໆຫຍັງແດ່ເມື່ອຢູ່ໃນອຸທິຍານໂດຍໄນ. (ພາສາໄທ)
c ຄຳອະທິບາຍຮູບ: ພີ່ນ້ອງຫຼາຍຄົນມີຄວາມສຸກທີ່ໄດ້ລົມກັນຢູ່ຫໍປະຊຸມ ແຕ່ພີ່ນ້ອງຊາຍຄົນໜຶ່ງໄປນັ່ງຢູ່ຄົນດຽວ.
