1. Lauma paradaisona be dahaka, bona laloda baita hadai dahaka baita kara?

 HARI ina nega ai taunimanima milion momo na paradaiso ta lalonai bona ḡaukara namodia momo e karamu. Idia na maino korikorina e moalelaiamu bona asie uramu una paradaiso bae rakatania. Danu idia na e uramu momo bae durudia una paradaiso lalonai bae vareai. Una be gabu korikorina ta? Lasi, una na lauma paradaisona! a

2. Dahaka dainai lauma paradaisona na gabu namona?

² Laulau dalanai, Iehova na gabu namona ta e karaia, bona unuseni ai taunimanima na e moalemu bona e ḡaukara heboumu, a Satana ena tanobada ai taunimanima na e heinai hehenimu. (1 Ioa. 5:19; Apok. 12:12) Ia na e itaiamu Satana ena tanobada ese taunimanima edia mauri na e hadikaiamu, una dainai ena taunimanima e durudiamu mai moaledia ida ia bae hesiai henia. Baibul ai, ia ese lauma paradaisona na e gwauraia “metai gabuna” bona “e dairia louloumu umana.” (Isa. 4:6; 58:11) Bona Iena heduru dainai, una lauma paradaisona ai e nohomu taudia na ina dina gabedia lalodiai e moalemu bona maino ai e nohomu.—Isa. 54:14; 2 Tim. 3:1.

3. Idaunegai Isaia karoa 65 be ede e ḡuḡuru toma?

³ Iehova ese peroveta tauna Isaia ena amo, lauma paradaisona ai bae noho taudia edia mauri e herevalaia. Una na Isaia  karoa 65 ai bo davariamu, una peroveta herevana e ḡuḡuru negana ginigunana na laḡani 537 B.C.E. Una laḡani ai, e helalo-kerehai Iuda taudia na Babulono ena iḡui amo e ruhadia bena edia tano e lou henia. Iehova ese idia na e hanamodia bona e durudia Ierusalem na gabu hairaina ai e halaoa bona unuseni ai dubu helaḡa danu e haginia lou, una na Israel ai Iehova e tomadiho heniava gabuna badana.—Isa. 51:11; Sek. 8:3.

4. Hari ina nega ai Isaia karoa 65 be ede e ḡuḡuru tomamu?

⁴ Isaia karoa 65 ena peroveta herevana e ḡuḡuru negana iharuana na laḡani 1919 C.E. Una laḡani ai, Iehova ena hesiai taudia na Babulono Badana ena iḡui amo e ruhadia. Una murinai, tanobada heḡeḡemadai ai lauma paradaisona na taina ruana e bada e laova. Basileia e harorolaia goadagoadava taudia ese kongrigeisin momo e hagini. Unu kongrigeisin taudia haida na guna daḡedaḡe bona matabodaḡa karadia e karava, to Baibul ena hereva e dibaia bona e badinaia neganai, idia ese “kara matamatadia e kara, una na Dirava ena ura heḡereḡerena.” (Efe. 4:​24, NWT) Isaia ese e perovetalai hahenamodia momo na vaira nega ai be ḡuḡurumu. To hari danu, lauma paradaisona lalonai hahenamo momo ta moalelaimu. Mani lauma paradaisona ena namo bona basita rakatania badidia aita herevalai.

LAUMA PARADAISONA AI E NOHOMU TAUDIA ESE E MOALELAIMU ḠAUDIA

5. Isaia 65:13 heḡereḡerena, lauma paradaisona ai dahaka ta moalelai?

⁵ Toadia na nanamo bona asie hitolomu. Isaia ena peroveta herevadia ese lauma paradaisona lalonai bona murimurinai e nohomu taudia edia mauri e herevalai. (Isaia 65:13 ba duahia.) Lauma paradaisona ai e nohomu taudia na Iehova ese e naridiamu dainai, edia hetura karana Ia ida na goada. Heḡereḡere, lauma helaḡa, Baibul, bona lauma anianidia e henidiamu unu amo idia na “bae aniani, . . . ranu bae inu, . . . [bona] bae moale.” (Apokalupo 22:17 ida ba haheḡereḡerea.) To lauma paradaisona murimurina ai e nohomu taudia na ‘e hitolomu,’ ‘e ranu masemu,’ bona ‘e hahemaraidiamu.’ Lauma dalana ai heduru na asie abimu dainai Dirava bae hetura henia na auka.—Amos 8:11.

6. Ioel 2:​21-24 ai Iehova ese e henidamu ḡaudia haida be dahaka, bona unu ese ita be ede e duruda tomamu?

⁶ Ioel ese e perovetalai ḡaudia, heḡereḡere uit, wain, bona olive oil amo e hahedinaraiamu, Iehova ese ena taunimanima edia dabu ḡaudia na e henidiamu, bona lauma dalana ai danu lauma aniani amo e ubudiamu. (Ioel 2:​21-24) Heḡereḡere, ia ese e henida ḡaudia haida na Baibul, Baibul pablikeisindia, eda websait, wiki ta ta heboudia, sekit hebouhebou bona riginol hebouheboudia. Namona na dina ta ta ita ese unu lauma aniani na baita abidia, unu amo ita na baita goadamu bona baita moalemu.

7. Dahaka ese “lalo-namo” e havaraiamu? (Isaia 65:14)

⁷ E moalemu. Dirava ena “hesiai taudia ese ane bae abi, edia lalo-namo dainai.” (Isaia 65:14 ba duahia.) Baibul ai hereva momokanidia, tauhalo herevadia, bona Iesu ena mauri idavalaina boubouna ese eda vaira nega helarona e hagoadaiamu bona una ese “lalo-namo” e havaraiamu. Eda tadikaka bona taihu ida unu ta herevalaimu neganai, eda abidadama na e goadamu bona ta moalemu!—Sal. 34:8; 133:​1-3.

8. Lauma paradaisona ai mai anina bada ḡaudia rua be dahaka?

⁸ Lauma paradaisona lalonai, lalokau bona lalotamona na mai anina bada Iehova ena taunimanima ediai. Unu kara ruaosi na ita “ihatamonada ḡauna herea-daena,” bona e hadibadamu, tanobada matamatana ai, Iehova ena  hesiai taudia ese unu kara ruaosi na be hahedinaraidia ḡoevaḡoevamu. (Kol. 3:14) Taihu ta na nega ginigunana Iehova ena taunimanima e itadia neganai, e gwa: “Iehova ena Witnes taudia na e helalokau hehenimu. Lau egu ai una na ḡau matamatana, badina egu famili ai una kara na asina itaiamu.” Bema ta na e uramu moale korikorina baine mamia, namona na Iehova e tomadiho heniamu taudia padadiai baine noho. Herevana taunimanima ese Iehova ena hesiai taudia na ede bae lalodia toma, to Iehova ena ruma bese lalonai, idia na lada namona vada e abia.—Isa. 65:15.

9. Hari ta davarimu hisihisidia be Isaia 65:​16, 17 ese ede e herevalaidia toma?

⁹ Lalomaino ai e nohomu. Isaia 65:14 ese Iehova asie tomadiho heniamu taudia na ini e gwauraidia tomamu, idia na edia ‘lalo-hisihisi ai e tai lolololo, bona [lalometau dainai, NWT] e ḡanaḡanamu.’ To Dirava ena taunimanima e hahisidiamu ḡaudia be oremu, eiava? Baibul na e gwaumu, unu ḡau iboudiai na Dirava ena hesiai taudia ‘lalodia amo bae boio bona Dirava matana amo bae hehuni.’ (Isaia 65:​16, 17 ba duahidia.) Iehova ese iseda hekwakwanai iboudiai na be kokidiamu, bona una nega ai hari ta mamimu hisihisidia na basita mamidia loumu.

10. Dahaka dainai Kristen tadikaka bona taihu padadiai ba noho na hahenamo ta? (Laulau danu ba itaia.)

¹⁰ Kristen heboudia ta laomu neganai, eda hemami na e namomu, badina unu kahai, ita na ta moalemu bona tanobada dikana ese e hahisidamu ḡaudia na asita lalodia momomu. Danu Dirava ena lauma huahuadia, heḡereḡere lalokau, moale, maino, haheauka, bona hebogahisi ta hahedinaraimu neganai eda tadikaka bona taihu na lalomaino ai e nohomu. (Gal. 5:​22, 23) Momokani, Dirava ena orea ai ta nohomu na hahenamo badana! Iehova e tomadiho heniamu taudia ese Dirava ena gwauhamata, “guba matamatana bona tanobada matamatana,” be ḡuḡurumu negana na be itaiamu.

11. Isaia 65:​18, 19 heḡereḡerena, Iehova ese e karaia lauma paradaisona ese ita be ede e duruda tomamu?

¹¹ Iehova e tenkiu heniamu. Ina lauma paradaisona ai ita baita “moale” badidia haida na Isaia ese e herevalai. Ina lauma paradaisona na Iehova ese e karaia ḡauna. (Isaia 65:​18, 19 ba duahidia.) Una dainai ia ese ita e ḡaukaralaidamu lauma dalana ai e dabumu oreadia amo taunimanima baita durudia ina paradaiso mai hairaina ai bae vareai totona, badina edia orea taudia na Baibul amo edia taunimanima asie hadibadia namonamomu! Ita be hereva momokani mai dibada dainai hahenamo  momo ta moalelaimu, bona ta uramu ma haida baita hadibalaidia.—Ier. 31:12.

12. Iehova ena gwauhamata Isaia 65:​20-24 o duahidiamu neganai emu hemami be ede bamona, bona dahaka dainai?

¹² Ina lauma paradaisona ai ta nohomu tauda ese Iehova baita tenkiu henia, ia ese e henida helarona dainai. Tanobada matamatana ai ita ese baita itamu bona baita karamu ḡaudia mani a lalo! Baibul na e gwauhamata: “Dina dia hoho e maurimu merona, eiava ena dina se haḡuḡurudiamu tau-burukana, na ia lalonai basie hedinarai lou.” Ita ese ‘ruma baita haginimu bena baita noholaimu, vine imeadia baita hadomu, bena anidia baita animu.’ Iehova ese be hanamodamu dainai ‘basita hekwarahi kavamu.’ Ia na e gwauhamata baine gimada, mauri namona baita moalelaia bona basita lalohisihisi. Ta ‘do se boiboi ai,’ ia na vada mai dibana ena ura ḡauna be dahaka, bona dia una mo, ia ese ‘mauri ḡaudia iboudiai bogadia be hakunudiamu.’—Isa. 65:​20-24; Sal. 145:16.

13. Isaia 65:25 ai, Iehova e uramu bae hesiai henia taudia be dahaka sensi e karamu?

¹³ Maino ai e nohomu bona asie garimu. Guna taunimanima haida na daḡedaḡe taudia bona koikoi taudia, to Dirava ena lauma ena heduru amo edia mauri lalonai sensi badadia e kara. (Isaia 65:25 ba duahia.) Idia na e hekwarahi unu kara gunadia bae rakatani. (Roma 12:2; Efe. 4:​22-24) Momokani, Dirava ena taunimanima na dia ḡoevadae dainai, nega haida kerere be karamu. To, Iehova ese “taunimanima idauidau” na iena orea lalonai e haboudiamu bona idia na e helalokau hehenimu bona maino ai e nohomu. (Tito 2:​11, NWT) Oibe, siahu ibounai Diravana sibona ese una baine havaraia diba!

14. Isaia 65:25 ena hereva be edena dala ai tadikaka ta enai e ḡuḡuru?

¹⁴ Taunimanima ese edia kara bae haidau diba, eiava? Mani ina eregabe tauna ena ekspiriens aita herevalaia. Ia na laḡanina 20 e abia neganai, pulisi ese e hadiburaia loulouva, ia na matabodaḡa bona daḡedaḡe karadia e ura heniva tauna ta. Ia na motuka e henaova, ruma kohudia e henaova, bona taravatu iutuna karana haida daidiai e hadiburaia. Danu ia na badu haraḡa tauna. Nega ginigunana ia ese Baibul ena hereva momokani e dibaia bona Iehova ena Witnes edia hebou ela neganai, e laloparara ena mauri na mai badina—una na lauma paradaisona ai ia ese Iehova baine tomadiho henia. E bapatiso bona Witnes tauna ta ai ela neganai, nega momo Isaia 65:25 ia enai e ḡuḡuru dalana e laloa. Ia na e gwaumu guna ia na daḡedaḡe tauna leona na heto, to hari ia na maino tauna ta mamoe na heto.

15. Dahaka dainai ta uramu haida baita boiridia lauma paradaisona ai bae vareai?

¹⁵ Isaia 65:13 na ina hereva amo e matama. E gwa: “Siahu Ibounai Lohiabadana Iehova na ini e gwau tomamu.” Siri 25 dokona be e gwaumu: “Iehova na e herevamu.” Ia uduna amo e lasimu herevadia na hanaihanai e ḡuḡurumu. (Isa. 55:​10, 11) Ita iboudai na Iehova ese vada e karaia lauma paradaisona lalonai ta nohomu. Iehova e tomadiho heniamu taudia na maino ai e nohomu bona e moalemu. Una na ina tanobada ai basio itaiamu toana ta. (Sal. 72:7) Badi unu bamodia daidiai, ta uramu momo baita durudia, ita ida Iehova baita hesiai henia. Una dainai, hahediba taudia ihalaodia ḡaukarana na baita goadalaia.—Mat. 28:​19, 20.

EDENA DALA AI TAUNIMANIMA BAITA DURUDIA LAUMA PARADAISONA AI BAE VAREAI?

16. Dahaka ese taunimanima e durudiamu lauma paradaisona ai bae vareai?

¹⁶ Namona na baita ḡaukara hebou lauma paradaisona baita hahairaia, unu amo haida na be uramu bae vareai. Una baine vara totona, namona na Iehova baita tohotohoa. Ia ese ta  se doriamu iena orea ai baine vareai. To, mai lalokauna ida ta na ia dekena e “veria” maimu. (Ioa. 6:44; Ier. 31:3) Kudou maoro taudia ese Iehova ena lalokau karadia e dibadiamu neganai, idia na e uramu ia turana ai baela. Edena dala ai iseda kara namodia amo taunimanima baita durudia lauma paradaisona ai bae vareai?

17. Edena dala ai haida baita durudia lauma paradaisona ai bae vareai?

¹⁷ Haida baita durudia lauma paradaisona ai bae vareai dalana ta na, iseda tadikaka bona taihu baita lalokau henidia bona baita kara namo henidia. Kristen ginigunadia edia negai, hebou ela matama taudia haida na ini e gwau toma: “Momokani, Dirava na umui bogaraḡimui ai.” Ita na ta uramu nega ginigunana eda hebou baema taudia danu unu bae gwau toma. (1 Kor. 14:​24, 25; Sek. 8:23) Una dainai, namona na Baibul ena haheḡani heḡereḡerena, “ta ta ida maino ai baita noho.”—1 Tes. 5:​13, NWT.

18. Dahaka ese taunimanima bae durudia eda orea lalonai bae vareai?

¹⁸ Namona na Iehova ese eda Kristen tadikaka taihu e lalodiamu dalana heḡereḡerena baita lalodia. Una baita karaia dalana ta na, edia kara namodia mo baita lalodia bada, dia edia kerere. Danu, mai lalokauda ida ‘baita hekaha heheni; baita hebogahisi heheni; eda dika baita hegwau tao heheni.’ (Efe. 4:32) Unu baita kara tomamu neganai, taunimanima na be uramu lauma paradaisona ai bae vareai. b

LAUMA PARADAISONA AI BA NOHO

19. (a) Maua ladana “ E Rakatani Bena E Lou” heḡereḡerena, lauma paradaisona ai e vareai lou taudia haida be dahaka e gwa? (b) Laloda baita hadai dahaka baita kara? (Laulau danu ba itaia.)

¹⁹ Ita ta moalemu badina na, lauma paradaisona ai ta nohomu! Unuseni ai Iehova e  tomadiho heniamu taudia na momo herea, dia guna bamona. Una dainai, hanaihanai Iehova baita tenkiu henia una lauma paradaisona dainai. Bema ta na e uramu namo baine davari, namona na lauma paradaisona ai baine vareai bona basine raka lasi! To baita bogaauka bona baita gima, badina Satana na e uramu baine koida bena lauma paradaisona baita rakatania. (1 Pet. 5:8; Apok. 12:9) Ena dala na basita kehoa. To baita ḡaukara goada lauma paradaiso ena hairai baita gimaia.