1. Ki ete paradi spiritiel, ek ki nou bien deside pou fer?

 LOR later azordi, ena enn paradi kot ena bann milyon dimounn ki pe viv dan lape ek zot bien okipe pou fer bann bon kitsoz. Sa paradi-la, se nou paradi spiritiel! a Bann dimounn ki deza dan sa paradi spiritiel la, zot bien deside pou kontign res ladan, ek zot anvi ki enn maximum dimounn vinn zwenn zot ladan.

2. Ki kitsoz extraordiner konsernan nou paradi spiritiel?

² Mem si nou pe viv dan move lemond Satan, kot bann dimounn ena laenn pou zot kamarad, Zeova inn kree enn plas sinbolik kot so bann serviter viv dan lape ek linite. Extraordiner, pa vre! (1 Zan 5:19; Rev. 12:12) Zeova trouve kouma lemond Satan pe afekte bann dimounn. Akoz sa, Li fer an-sort ki so bann serviter santi zot an sekirite, pou ki zot kapav kontign servi Li dan lazwa. Labib dekrir paradi spiritiel kouma “enn plas kasiet” ek “enn zardin ki bien aroze.” (Iza. 4:6; 58:11) Avek benediksion Zeova, bann dimounn ki dan sa paradi-la zot ere, mem si zot pe viv dan enn “lepok kritik, difisil pou siporte.”—Iza. 54:14; 2 Tim. 3:1.

3. Kouma profesi ki trouv dan Izai sapit 65 ti realize dan lepase?

³ Zeova ti servi profet Izai pou explike kouma lavi bann dimounn ti pou ete dan sa paradi spiritiel la. Nou trouv sa dan Izai sapit 65. Sa profesi-la ti realize enn premie fwa lane 537 Avan Nou Lepok. Sa lane-la, bann Zwif ki ti repanti, ti libere depi Babilonn ek zot ti retourn Zerizalem. Zeova ti beni so pep, ek Li ti ed zot pou rekonstrir lavil Zerizalem.  Li ti osi ed zot pou rekonstrir so tanp, plas prinsipal kot zot ti ador Li dan Izrael.—Iza. 51:11; Zaka. 8:3.

4. Kouma profesi ki trouv dan Izai sapit 65 inn realize dan nou lepok?

⁴ Dan nou lepok, profesi Izai ti realize enn deziem fwa an 1919 kan bann serviter Zeova ti sorti dan Gran Babilonn. Apartir sa moman-la, paradi spiritiel ti koumans devlope. Par exanp, bann proklamater Rwayom Bondie ti koumans form boukou lasanble lor later, ek bann frer ek ser ti fer zefor pou devlop bann kalite Kretien. Bann dimounn ki avan ti violan, ti “met lor zot nouvo personalite ki finn kree dapre volonte Bondie.” (Efe. 4:24) Li vre ki boukou benediksion ki ena dan Izai sapit 65 pou realize dan lemond nouvo. Selman, depi aster-la mem, nou pe deza gagn boukou benediksion. Anou get bann bienfe ki nou gagne kan nou dan paradi spiritiel, ek anou gete kifer nou bizin kontign fer zefor pou res ladan.

BANN BIENFE KI NOU GAGNE DAN PARADI SPIRITIEL

5. Dapre Izai 65:13, ki bienfe nou gagne kan nou dan paradi spiritiel?

⁵ Nou bien nouri ek nou santi nou bien. Dan so profesi, Izai montre diferans ki ena ant lavi bann dimounn ki dan paradi spiritiel ek lavi bann dimounn ki andeor. (Lir Izai 65:13.) Zeova pe donn so bann serviter tou seki zot bizin pou ki zot kapav res pros ar Li. Li donn nou so lespri sin, so Parol Labib, ek enn kantite manze spiritiel, pou ki nou kapav “manze, . . . bwar, . . . [ek] dan lazwa.” (Konpar ar Revelasion 22:17.) Sa bien diferan pou bann dimounn ki andeor paradi spiritiel! Profesi Izai dir ki “zot pou gagn fin . . . , zot pou gagn swaf . . . , [ek] zot pou gagn onte.” Zot dan sa sitiasion-la parski zot pena enn bon lamitie ar Zeova.—Amos 8:11.

6. Kouma Zoel 2:21-24 montre ki Zeova donn so bann serviter seki zot bizin, ek ki bienfe nou gagne kan nou nouri nou bien?

⁶ Dan so profesi, Zoel koz lor bann kado ki Zeova donn so bann serviter, kouma bann sereal, divin, ek delwil zoliv. Li ti koz lor la pou montre ki Zeova Li zenere ek ki Li donn so bann serviter tou seki zot bizin, sirtou lor plan spiritiel. (Zoel 2:21-24) Azordi, Zeova donn nou nou manze spiritiel gras-a Labib, bann piblikasion, nou sit Internet, bann renion, ek bann lasanble. Si nou nouri nou bien sak zour, nou pou an bonn sante ek nou pou santi nou bien.

7. Ki kitsoz fer nou ‘leker kontan’? (Izai 65:14)

⁷ Nou leker kontan ek nou ere. Bann serviter Bondie “kriye dan lazwa” parski zot leker ranpli ar rekonesans pou Zeova. (Lir Izai 65:14.) Bann lansegnman ek bann promes bien ankourazan ki ena dan Labib, ek zoli lesperans ki nou gagne gras-a laranson, fer nou ‘leker kontan.’ Anplis, kan nou koz lor sa bann kitsoz-la ar nou bann frer ek ser, sa rann nou ere!—Ps. 34:8; 133:1-3.

8. Ki de kalite bien inportan ena dan nou paradi spiritiel?

⁸ Lamour ek linite se de kalite bien inportan ki ena dan nou paradi spiritiel. Labib dir ki lamour se “enn lien ki ini bann dimounn ansam.” (Kol. 3:14) Lamour ek linite ki ena dan pep Zeova azordi, se enn avangou nou lavi dan lemond nouvo. Dan lemond nouvo, pou ena boukou plis lamour ek linite ant bann serviter Zeova. Enn ser rakonte seki li ti remarke premie fwa ki li ti vinn Lasal. Li dir:  “Mo pa ti kone ki savedir ena enn lavi ere. Mem ar mo fami, zame mo pa ti ere. Premie fwa ki mo ti trouv vre lamour se kan mo ti zwenn bann Temwin Zeova.” Se gras-a nou paradi spiritiel ki enn kikenn kapav vremem ere ek zwaye. Dan lemond Satan, bann dimounn kapav pans bann move kitsoz lor bann Temwin Zeova. Selman, devan lizie Zeova, nou ena enn zoli nom ek enn bon repitasion, parey kouma nou bann frer ek ser dan lemond antie.—Iza. 65:15.

9. Dan Izai 65:16, 17, ki promes Zeova fer konsernan bann maler ki nou pe gagne?

⁹ Nou kalm ek nou pa strese. Izai 65:14 dir ki tou dimounn ki swazir pou res andeor paradi spiritiel pou “kriye parski zot leker pou dan lapenn [ek] zot pou plore for-for, parski zot lespri pou abat net.” Me ki pou ariv tou bann move kitsoz ki pe fer bann serviter Zeova soufer azordi? Labib dir ki biento “nou pou vremem bliye tou bann maler ki nou finn gagne.” (Lir Izai 65:16, 17.) Zeova pou fer tou sa bann move kitsoz-la disparet, ek nou pa pou mem rapel sa bann kitsoz-la.

10. Kifer nou bien kontan ki nou form parti enn gran fami bann frer ek ser? (Get zimaz osi.)

¹⁰ Azordi, bann sitiasion ki ena dan sa lemond-la kapav bien stres nou. Selman, kan nou asiste nou bann renion, nou santi nou pli kalm ek nou mwin strese. Kifer nou dir sa? Parski kan nou zwenn nou bann frer ek ser, ek ki nou tou nou montre bann kalite kouma lamour, lazwa, lape, zantiyes, ek douser, nou santi nou pli kalm. (Gal. 5:22, 23) Nou bien kontan ki nou form parti enn gran fami bann frer ek ser, pa vre! Bann ki kontign res dan paradi spiritiel pou kapav trouv promes Zeova konsernan “enn nouvo lesiel ek enn nouvo later” realize.

11. Dapre Izai 65:18, 19, ki nou resanti kan nou dan paradi spiritiel?

¹¹ Nou zwaye ek nou rekonesan. Izai dir ki nou bizin “kontan ek res dan lazwa” dan paradi spiritiel, parski se Zeova ki’nn kree sa paradi-la. (Lir Izai 65:18, 19.) Lemond Satan pa ansegn bann dimounn laverite lor Bondie. Alor, li normal ki Zeova pe servi nou pou ed zot pou sorti dan sa move lemond-la ek pou rant dan nou zoli paradi spiritiel. Dan sa paradi-la, nou pe gagn boukou benediksion ar Zeova, ek sa bizin motiv nou pou ed lezot pou konn plis lor sa bann benediksion-la.—Zer. 31:12.

12. Ki to resanti kan to mazinn promes ki trouv dan Izai 65:20-24, ek kifer?

 ¹² Nou zwaye ek nou rekonesan osi pou zoli lesperans ki nou ena pou lavenir. Si nou kontign res dan paradi spiritiel, mazinn bann kitsoz ki nou pou trouve ek ki nou pou fer dan lemond nouvo. Labib dir: “Nepli pou ena okenn ti-baba . . . ki pou viv zis de-trwa zour, ek bann vie dimounn pou viv lontan.” Nou pou “ranz bann lakaz ek [nou] pou res ladan, [nou] pou plant bann karo rezin ek [nou] pou manz zot bann frwi.” Nou “pa pou rinte pou nanye,” parski nou pou bann dimounn “ki Zeova inn beni.” Zeova promet nou ki nou lavi pou ena enn sans ek ki nou pou ena enn zoli lavi. “Avan mem ki [nou] kriye,” Li pou fini kone seki nou bizin, ek Li pou ‘satisfer nou dezir.’—Iza. 65:20-24; Ps. 145:16.

13. Dapre Izai 65:25, ki sanzman bann dimounn inn fer dan zot lavi pou ki zot kapav servi Zeova?

¹³ Nou anpe ek nou santi nou an sekirite. Avek led lespri sin Zeova, boukou dimounn ki avan ti violan, agresif, ek malonet, inn fer bann sanzman dan zot lavi. (Lir Izai 65:25.) Zot inn fer zefor pou rezet sa bann vilin defo-la. (Rom. 12:2; Efe. 4:22-24) Li vre ki bann serviter Zeova zot ankor inparfe ek zot pou kontign fer bann erer. Selman, gras-a Zeova, “tou sort kalite dimounn” pe reisi viv ansam dan lamour ek lape. (Tit 2:11) Sa kalite mirak-la, se zis nou Bondie Zeova ki kapav fer sa!

14. Servi enn lexanp pou montre kouma Izai 65:25 inn realize.

¹⁴ Eski vremem bann move dimounn kapav sanze? Anou get lexanp enn zenn ki plizir fwa inn al dan prizon, ek laz 20 an, li ti deza pe viv enn lavi imoral, li ti bien violan, ek li ti bien kontan lager. Li ti al dan prizon parski li ti kokin bann dimounn, li ti kokin bann loto, ek li ti fer bann lezot move kitsoz ankor. Selman, kan li’nn aprann bann verite ki ena dan Labib ek kan li’nn koumans asiste bann renion, li’nn trouv enn rezon pou sanz so lavi; li’nn anvi ador Zeova dan paradi spiritiel. Azordi, li enn frer, ek souvan li dir ki Izai 65:25 koz lor li. Kifer? Parski avan li ti koumadir enn lion telman li ti violan. Me aster-la, li koumadir enn mouton parski li’nn vinn enn dimounn ki kontan lape.

15. Ki kitsoz motiv nou pou ed lezot pou vinn dan paradi spiritiel, ek kouma nou kapav fer sa?

¹⁵ Izai 65:13 koumans par sa bann parol-la: “Ala seki Segner Siprem Zeova dir.” Ek verse 25 terminn koumsa: “Ala seki Zeova dir.” Ki sa bann parol-la vedir? Sa bann parol-la montre ki Zeova touletan realiz so bann promes. (Iza. 55:10, 11) Nou paradi spiritiel, li vremem existe azordi! Dan sa paradi-la, ena enn gran fami bann frer ek ser ki pe ador Zeova dan linite. Ek parski nou form parti dan sa fami-la, nou santi nou anpe ek an sekirite, mem si nou pe viv dan enn lemond ki bien violan. (Ps. 72:7) Sa bann rezon-la bizin motiv nou pou ed lezot osi pou vinn dan sa paradi spiritiel-la. Kouma nou kapav fer sa? Nou fer sa kan nou ed zot pou aprann konn nou Gran Bondie Zeova.—Mat. 28:19, 20.

KOUMA NOU KAPAV ATIR BANN DIMOUNN POU ZOT VINN DAN PARADI SPIRITIEL?

16. Ki kitsoz kapav atir bann dimounn dan nou paradi spiritiel?

¹⁶ Sakenn parmi nou ena enn responsabilite bien inportan: Nou bizin fer nou paradi spiritiel vinn bien atiran, pou ki bann dimounn anvi vinn ladan. Ek pou nou fer sa, nou bizin imit Zeova. Zeova pa fors  personn pou vinn dan so lorganizasion. Okontrer, avek zantiyes, Li “atir” bann dimounn ver Li. (Zan 6:44; Zer. 31:3) Kan bann dimounn ki sinser aprann kouma Zeova Li enn Bondie ki ena lamour ek bann lezot zoli kalite, sa atir zot ver Li. Me nou, kouma nou kapav atir bann dimounn dan nou paradi spiritiel, gras-a nou bann zoli kalite ek nou bon kondwit?

17. Kouma nou kapav atir bann dimounn dan nou paradi spiritiel?

¹⁷ Enn fason ki nou kapav atir bann dimounn dan nou paradi spiritiel, se kan nou montre lamour ek bonte anver nou bann frer ek ser. Kan bann nouvo vinn Lasal, nou anvi ki zot ena mem reaksion ki bann dimounn ki ti asiste renion dan lavil Korint. Bann-la ti dir: “Bondie vremem parmi zot.” (1 Kor. 14:24, 25; Zaka. 8:23) Alor, anou kontign fer zefor pou “viv anpe” ar sakenn nou kamarad.—1 Tes. 5:13.

18. Ki kitsoz kapav atir bann dimounn ver nou lorganizasion?

¹⁸ Nou bizin touletan fer zefor pou trouv nou bann frer ek ser parey kouma Zeova trouv zot. Pou nou fer sa, nou bizin res konsantre lor zot bann zoli kalite, pa lor zot bann defo. Anplis, biento zot pou nepli ena sa bann defo-la! Si nou ‘bon sakenn anver nou kamarad, nou ena enn konpasion ranpli ar tandres, ek nou pardonn sakenn nou kamarad avek tou nou leker,’ nou pou kapav regle ninport ki ti biz-biz ki nou ena avek lezot. (Efe. 4:32) Kan nou ena sa bann kalite-la, nou paradi spiritiel vinn pli atiran, ek li atir bann dimounn ki apresie sa bann zoli kalite-la. b

 KONTIGN RES DAN NOU PARADI SPIRITIEL

19. (a) Dapre lankadre “ Zot Ti Ale, Me Zot Inn Retourne,” ki sertin frer ek ser inn dir kan zot inn retourn dan paradi spiritiel? (b) Ki nou bien deside pou fer? (Get zimaz osi.)

¹⁹ Nou bien kontan nou paradi spiritiel, pa vre! Sak zour ki pase, li vinn pli zoli ek ena pli boukou serviter Zeova ladan. Akoz sa, nou bizin ena rekonesans pou sa paradi ki Zeova inn kree pou nou la. Pou ki nou santi nou bien, nou pa strese, nou ere, ek nou santi nou an sekirite, nou bizin kontign res dan nou paradi spiritiel ek fode zame nou kit li. Satan pou esey fer tou seki li kapav pou ki nou pa res dan sa paradi-la. (1 Pier 5:8; Rev. 12:9) Me fode pa nou les li fer sa! Okontrer, nou bizin fer tou seki nou kapav pou ki nou paradi spiritiel li res enn plas kot ena lape, ki zoli, ek ki sin.