1. Мо тыгай духовный рай да тушто илыше-влакын могай кумылышт уло?

 ТАЧЕ мландыште рай уло. Тушто миллионло еҥ ила. Нуно тынысым йӧратыше да порым ыштыше улыт. Тиде райыште илыше-влак эре тушто лийнешт да весе-влакымат тушто лияш ӱжыт. Могай рай нерген тыште ойлалтеш? Духовный рай нерген! a

2. Молан духовный райын улмыжо — тиде чынжымак чудо?

² Тӱня таче ужмышудымаш да осал дене темын (1 Иоан. 5:19; Почм. 12:12). Тыгай лӱдыкшыштӧ тыныс вер лиймылан ӧрат веле. Тиде тӱня шуко ойго ден чон корштымашым конда, сандене йӧратыше Юмына духовный райым ыштен. Тидлан кӧра тудын служитлышыже-влак тудлан куанен служитлен кертыт. Библийыште духовный рай «шылме вер» да «сайын вӱдыжтарыме сад-пакча» дене таҥастаралтеш (Ис. 4:6; 58:11). Иегова тиде райыште илыше-влакым суапландара, сандене тиде неле пытартыш кечылаште нуным лӱдмаш огеш авалте (Ис. 54:14; 2 Тим. 3:1).

3. Исайя 65-ше ужаш гыч ончылгоч каласымаш икымше гана кузе шукталтын?

³ Иегова почын пуэн, могай илыш духовный райыште лиеш. Тиде ончылгоч каласымашым Исайя книгаште 65-ше ужаште возымо. Икымше гана тудо мемнан эра деч ончыч 537 ийыште шукталтын. Тунам ӧкынышӧ еврей-влак вавилон плен гыч лектыныт да шочмо мландыш пӧртылыныт. Иегова нуным суапландарен. Тудо нунылан кӱ ораш савырныше Иерусалимым да храмым угыч чоҥаш  полшен. Тиде храмыште израильтян-влак угыч Иеговалан кумалын кертыныт (Ис. 51:11; Зах. 8:3).

4. Исайя 65-ше ужаш гыч ончылгоч каласымаш мемнан жапыште кузе шукталтеш?

⁴ Исайян ончылгоч каласымашыже кокымшо гана 1919 ийыште шукталташ тӱҥалын. Тунам Иегован служитлышыже-влак Кугу Вавилонын пленже гыч лектыныт. Ту ий гыч духовный рай кугемаш тӱҥалын. Юмын Кугыжаныш нерген увер чот шаркалалтын. Тӱня мучко погынымаш-влак чумыралтыныт, а духовный райыште илыше-влак христиан койышым куштеныт. Пӧръеҥ ден ӱдырамаш-влак, кудышт ончыч торжа лийыныт да яжарланен иленыт, Юмын эрыкше почеш ыштыме «у айдемыш» вӱдылалтыныт (Еф. 4:24). Конешне, Исайя книгаште палемдыме суапландарымаш-влак гыч шукышт тӱрыснек ончыкыжым у тӱняште веле шукталтыт. Но южо суапландарымашым ме тачат ужына. Айста ончен лектына, могай пайдам мыланна духовный рай конда, да шоналтена, молан мыланна тудым кодаш огеш кӱл.

МОЛАН МЫЛАННА ДУХОВНЫЙ РАЙЫШТЕ ЛИЯШ КЕЛША

5. Исайя 65:13 гыч ончылгоч каласымаш мемнан ӱмбалне кузе шукталтеш?

⁵ Ме кочкын темше да таза улына. Исайян ончылгоч каласымаште раш ончыктымо, мо дене ойыртемалтыт духовный райыште илыше-влак нунын деч, кӧ тушто огеш иле. (Исайя 65:13 лудын лекса.) Мыланна Иегова дене лишыл кодашлан тудо чылажымат пуа. Тудо мыланна святой шӱлышыжым, Библийым да шуко духовный кочкышым пуэн. Сандене ме кочкына, йӱына да куанена. (Почмаш 22:17 дене таҥастарыза.) А духовный райыште илыдыме-влак нерген мом каласаш лиеш? Нуно шужен коштыт, йӱмӧ шумо деч орланат да намысыште илат, вет нуно Юмым огыт пале (Ам. 8:11).

6. Кузе Иегова Иоиль 2:21—24 почеламутлаште возымо сӧрымыжым шукта?

⁶ Иоиль пророк шурно, йошкар арака да олив ӱй нерген палемда. Акрет годсо Израильыште тиде тӱҥ кочкыш лийын. Тыге Иегова шке служитлышыже-влакым ӱшандарен: духовный шотышто нунын чыла кӱлешан лиеш (Иоиль 2:21—24). А таче Иегова могай кочкышым пуа? Мемнан Библий, Библиеш негызлыме публикаций-влак, сайт, тыгак вашлиймаш ден конгрессна-влак улыт. Ме кажне кечын теммешке кочкын кертына. Сандене ме шужен она кошт да таза улына.

7. Молан ме шӱмыштына куаным шижын йывыртена? (Исайя 65:14).

⁷ Ме пиалан улына. Юмын служитлышыже-влак «шӱмыштышт куаным шижын йывыртат», вет тудлан тауштышо улыт. (Исайя 65:14 лудын лекса.) Ме чыным да Юмын Мутшо гыч тудын сӧрымашыже-влакым палена! Тыгак мемнан пеҥгыде ӱшанна уло, кудыжым Христосын тӱлен налше надыреш негызлыме. Чыла тидлан ме Иеговалан таум ойлена. А иза-ака-влак дене нине суапландарымаш-влак нерген мутланымаш мемнам эше чотрак пиаланым ышта (Пс. 33:9; 132:1—3).

8. Духовный райын кок тӱҥ ойыртемже могай?

⁸ Духовный райын кок тӱҥ ойыртемже — тиде Юмын калыкыште улшо йӧратымаш да иктылык. Коклаштына улшо лишыл кыл мыланна сайрак умылаш полша, могай мемнан илыш у тӱняште лиеш. Тунам Юмын служитлышыже-влак эше шукырак йӧратымаш ден иктылыкым ужыт  (Кол. 3:14). Ик ака ойла, могай тудын шижмашыже лийын, кунам тудо Иегован Таныкше-влак дене икымше гана вашлиялтын: «Ешыштат мый пиалан лийын омыл. Иегован Таныкше-влак коклаште мый икымше гана ужынам, кузе еҥ-влак чынжымак икте-весым йӧратат да тидым паша ден ончыктат». Духовный райыш пурен веле, еҥ-влак умылат, кузе чынжымак пиалан да куаныше лияш. Очыни, ондак нуно Иегован Таныкше-влак нерген шуко удам колыныт. Но, вашлиймашкына толын, нуно ужыт: Иегова мемнам чынжымак суапландара (Ис. 65:15).

9. Исайя 65:16, 17 дене келшышын, кузе Иегова мемнам орланымаш деч утараш сӧра?

⁹ Ме она тургыжлане да ончыко лӱдде ончена. Исайя 65:14 почеламутышто возымо дене келшышын, кӧн духовный райыште илымыже ок шу, нуно «шӱм корштымашлан кӧра кычкыраш да тодылалтме кумыл верч кечкыжаш» тӱҥалыт. Но таче Юмын служитлышыж-влакат орланат. Туге гынат нуно раш палат: жап эртымеке, чыла «ойго мондалтеш». (Исайя 65:16, 17 лудын лекса.) Иегова чыла корштымашым тӱрыснек пытара, да корштымаш нерген шарнымаш ушыштат огеш код.

10. Молан тыланда иза-ака-влак коклаште лияш келша? (Тыгак сӱретым ончыза.)

¹⁰ Вашлиймашкына толын, ме проблемына-влак нерген жаплан монден кертына. Тушто чонна лыплана. Ме йӧратыше, куаныше, тынысле, поро да ӱҥышӧ улына гын, иза-ака-влаклан тымык верыште гай шкем шижаш полшена, вет чыла нине койыш-влак Юмын шӱлышын саскашкыже пурат (Гал. 5:22, 23). Юмын организацийыштыже лияш пеш кугу пиал! Кӧ духовный райыште кодеш, нуно шке шинчашт дене ужыт, кузе Иегова «у кава» ден «у мланде» нерген сӧрымашым тӱрыснек шукта.

11. Исайя 65:18, 19 дене келшышын, Иегован духовный райыштыже лийын, мом ме шижына?

¹¹ Ме тауштышо да йывыртыше улына. Вара Исайя умылтара, молан мемнан духовный райыште куанаш амал-влак улыт. Тиде райым Иегова ыштен. (Исайя 65:18, 19 лудын лекса.) Сандене тудо еҥ-влаклан тиде тошто тӱнян организацийже-влак гыч лекташ полша, кушто Юмо нерген шоям туныктат. А духовный райыште ме шкенам чапле пеледалтше садерыште семын шижына, сандене весе-влакымат тушко ӱжмына шуэш (Иер. 31:12).

12. Исайя 65:20—24 почеламут-влак гыч могай сӧрымаш тыланда поснак келша да молан?

 ¹² Духовный райыште илыше-влакын тауштышо да йывыртыше лияшлан эше ик амал уло — тиде у тӱняште илаш ӱшан. Шоналтыза веле, могай илыш тушто лиеш! Библий сӧра: «Тушто уже огеш лий ни аза, кудыжо икмыняр кечым гына илен, ни коча, кудыжо шке илышым илен лектын огыл». Ме пӧртым чоҥаш да тушто илаш тӱҥалына, виноград аҥам шындаш да саскажым кочкаш тӱҥалына. «Пашам арам ышташ» она тӱҥал, вет Иегова мемнам суапландара. Тудо мыланна лӱдыкшӧ деч посна, пиалан да чын смысл дене темше илышым сӧра. Йодынат она шукто, а Юмо уже пала, мо мыланна кӱлеш. Тудо «чыла илыше-влакын кумылыштым» шукта (Ис. 65:20—24; Пс. 144:16).

13. Исайя 65:25 дене келшышын, Иеговалан служитлаш тӱҥалын, еҥ-влак кузе вашталтыт?

¹³ Ме тынысле улына да шкем тымык верыште гай шижына. Юмын шӱлышыжлан кӧра шукышт тӱрыснек вашталтыныт. Ончыч нуно ир янлык семын торжа лийыныт але весе-влакым ондален иленыт. (Исайя 65:25 лудын лекса.) Но уда койышышт деч утлашлан нуно уло вийым пыштеныт (Рим. 12:2; Еф. 4:22—24). Конешне, ме кызытат сулыкан улына, сандене йоҥылышым ыштен кертына. Туге гынат Иегова мемнам, тӱрлӧ еҥ-влакым, йӧратымаш да тыныслык дене иктеш ушен (Тит. 2:11). Тыгай чудым Чылакертше Юмо гына ыштен кертеш!

14. Кузе ик изан историйже Исайя 65:25 гыч шомакын чын улмыжым пеҥгыдемда?

¹⁴ Айдеме тӱрыснек вашталтын кертеш мо? Примерым ончен лектына. Ик рвезе чот торжа да осал лийын да, 20 ийыш шумеке, шуко гана казаматыште шинчен. Тудым машина-влакым шолыштмылан, еҥ-влакын пӧртыштым грабитлымылан да моло кугу преступленийым ыштымылан ик гана огыл арестоватленыт. Тудо чӱчкыдын весе-влак дене кредалын. Варажым тиде рвезе библийысе чыным пален налын да Иегован Таныкше-влакын вашлиймашышкышт кошташ тӱҥалын. Тунам тудо илыш смыслым муын, а смыслже — Иеговалан духовный райыштыже служитлаш. Тынеш пурымо деч вара тудо чӱчкыдын шонен, Исайя 65:25 гыч шомак-влак мыняр чот тудлан келшен толыт. Каласаш лиеш, тудо ир лев гыч пачаш савырнен.

15. Молан еҥ-влакым духовный ешышкына ӱжмына шуэш, да кузе ме тидым ыштен кертына?

¹⁵ Исайя 65:13 тыгай мут дене тӱҥалеш: «Кӱшылсӧ Господь Иегова тыге ойла». А тиде ужашын 25-ше почеламутын мучаштыже возымо: «Ойла Иегова». Юмын сӧрымашыже-влак эре шукталтыт (Ис. 55:10, 11). Духовный рай уже уло. Иегова чынжымак ойыртемалтше калыкым чумырен. Тудын калыкше коклаште ме тынысым шижына, да тушто мыланна нимогай лӱдыкшӧ уке (Пс. 71:7). Сандене шукырак еҥ-влаклан мемнан духовный ешышкына ушнаш полшымына шуэш. А тидлан каяш да тунемше-влакым ямдылаш кӱлеш (Матф. 28:19, 20).

ВЕСЕ-ВЛАКЫН ДУХОВНЫЙ РАЙЫШТЕ ЛИЯШ КУМЫЛЫШТ ЛИЙЖЕ МАНЫН, МОМ МЕ ЫШТЕН КЕРТЫНА?

16. Молан еҥ-влакын духовный райыште лияш кумылышт лектеш?

¹⁶ Весе-влакын духовный райыш толаш кумылышт лекше манын, мемнан гыч кажныже шукым ыштен кертеш. Тидлан мыланна Иегова деч примерым налман. Тудо шке организацийышкыже еҥ-влакым вийын огеш пурто. Тудо шкеж дек нуным  порын ӱжын конда (Иер. 31:3; Иоан. 6:44). Кунам поро шӱман еҥ-влак Иегован йӧратымашыже да вес чапле койышыжо-влак нерген пален налыт, нунын тудын дек лишемаш кумылышт лектеш. Весе-влакын духовный райыште лияш кумылышт лийже манын, кузе ме шкенан койыш ден пашана дене духовный райым сӧрастарен кертына?

17. Вашлиймашкына толын, еҥ-влак мом ужыт?

¹⁷ Икымше, мом еҥ-влак вашлиймаштына ужыт, тиде мемнан коклаште улшо йӧратымаш ден порылыкнам. Вашлиймашкына икымше гана толын, еҥ-влакын могай шижмашышт лектеш? Нуно акрет годсо Коринфыште илыше-влак семынак каласышт манын, мемнан кумылна уло. Коринфян-влак каласеныт: «Юмо чынжымак тендан дене» (1 Кор. 14:24, 25; Зах. 8:23). Тугеже, мыланна умбакыжат библийысе кӱштымаш почеш ыштыман: «Шке коклаштыда тынысын илыза» (1 Фес. 5:13).

18. Молан еҥ-влакын Юмын организацийышкыже ушнаш кумылышт лектеш?

¹⁸ Иза-ака-влак шотышто ончалтышна Иегован гаяк лийже манын, ме уло вийым пыштена. Сандене нунын уда койышыштым огыл, а сайжым ужаш тыршена. Вет, жап эртымеке, нунын ик уда койышыжат огеш код. Конешне, коклаштына южгунам келшыдымаш лектеш. Но ме «икте-весе деке поро да пушкыдо кумылан» лийын да икте-весым уло кумылын проститлен, келшыдымашым йӧратымаш дене сеҥаш тыршена (Еф. 4:32). Тидлан кӧра духовный райыш толыт еҥ-влак, кӧ шке илышыштыже йӧратымаш ден порылыкым ужнеже b.

 ДУХОВНЫЙ РАЙЫШТЕ КОДСА

19. а) Духовный райыш пӧртылшӧ-влак мом ойлат? ( «Нуно духовный райыш пӧртылыныт» рамкым ончыза.) б) Духовный райым аклена манын, кузе ончыкташ лиеш? (Тыгак сӱретым ончыза.)

¹⁹ Мыланна духовный рай чот келша. Кажне кечын тудо сылнештеш, да тушто Иеговам чапландарыше калык шукемеш веле. Тиде чапле пӧлеклан Иеговам тауштымым нигунамат она чарне. Духовный райыш толын, ме пиалым, куаным, тыныслыкым шижына, да тушто нимо деч она лӱд. Мыланна тиде духовный райым коден кайыман огыл. Мыланна тӱткӧ лийман, вет Сатана мемнам тушечын ондален лукташ тӧча (1 Пет. 5:8; Почм. 12:9). Но ме ондалалтшаш огынал. Айста духовный райын моторлыкшым, арулыкшым да тыныслыкшым умбакыжат аралена.