1. ¿Keniuj tikueyichiuaj Jehová, uan toni moneki tikixtaliskej tikchiuaskej?

 AXKAN miakej kisenueyichiuaj Jehová uan kinpaleuiaj oksekin. Yejuan pouij itech inechikol Dios kampa yolseujtokej, uan kiixtalianij amo keman kikauaskej Jehová. Yejuan no kinekij kinpaleuiskej oksekin maj no kuali mouikakan iuan Jehová uan iniuan oksekin.

2. ¿Keyej semi tikmojkaitaj maj ueli tiksenueyichiuakan Jehová?

² Maski axkan miakej tetauelitaj uan kichiuaj tein amo kuali, Jehová kichiuani maj ueli tiksenueyichiuakan (1 Juan 5:19; Apoc. 12:12). Yejua kimati ke nochi tein Satanás kichiua uelis techtajyouiltis. Sayoj ke kichiua maj itekitikauan kuali momachilikan para maj kisentokakan kitekitilikan. Itech iTajtol kijtoua ke kampa tiksenueyichiuaj Jehová kemej yeskia kampa se mopaleuia uan “kampa onkak xochit tein kualtsin kiatekiaj” (Is. 4:6; 58:11). Kemej Jehová kintiochiua akin ompa kisenueyichiuaj, yejuan ueli yolpakij uan amo mouij (Is. 54:14; 2 Tim. 3:1).

3. ¿Keniuj mochiuak tein kijtoua Isaías capítulo 65?

³ Itech amatajkuilol Isaías capítulo 65, Jehová kijtoj keniuj kualtsin tikueyichiuaskiaj iniuan tokniuan. Tein kijtoj tanauatijkej Isaías yekinika mochiuak itech xiuit 537 achto ke ualaskia Cristo. Itech nejon tonalmej babilonios  kinkaujkej judíos akin moyolpatakajya maj kisakan de Babilonia uan maj mokepanij kampa achto nemiaj. Kemej Jehová kintatiochiuij uan kinpaleuij, kiyekchijchiujkej Jerusalén, uan kichiujkej maj oksepa kualtsin moitani. Kiyektalijkej templo para maj oksepa kiueyichiuanij Jehová ompa Israel ijkon kemej yejua kineki (Is. 51:11; Zac. 8:3).

4. ¿Keniuj mochiujtiani axkan tein kijtoua Isaías capítulo 65?

⁴ Tein kijtoj Isaías no mochiujtok axkan. Peuak itech xiuit 1919, keman itekitikauan Jehová kiskej de Ueyi Babilonia, tein kijtosneki nochi taneltokalismej tein takajkayauaj. Desde ijkuak peuak tiksenueyichiuaj Jehová itech nochi taltikpak. Miakej tokniuan akin kiuelitayaj tanojnotsaskej tapaleuijkej maj mochiuanij miakej nechikolmej. Uan axkan miakej takamej uan siuamej akin achto semi tateuiayaj uan auilnemiaj amo kichiuajok nochi nejon taman uan ‘nemijya ijkon kemej Dios kineki’ (Efes. 4:24). Sayoj ke miak taman tein kijtoj Isaías mochiuas itech xochital. Maski ijkon, axkan tikselijtokejya miak tatiochiualismej. Maj tikitakan keniuj techpaleuia maj tikueyichiuakan Jehová iniuan tokniuan uan keyej amo moneki tikauaskej.

¿KENIUJ TECHPALEUIA TIKUEYICHIUASKEJ JEHOVÁ INIUAN OKSEKIN?

5. Kemej kijtoua Isaías 65:​13, ¿toni tatiochiualismej tikseliaj komo tiksenueyichiuaj Jehová?

⁵ Kuali tietokej uan tikpataj tein moneki. Tein kijtoj Isaías kinextia keniuj tel taman se nemi keman se kiueyichiua Jehová iniuan oksekin uan keman amo ijkon tikchiuaj (xikonixtajtolti Isaías 65:13). Jehová kinmaka itekitikauan nochi tein moneki para maj kisentokakan kiueyichiuakan. Techpaleuia ika ichikaualis, iTajtol uan tataman tamachtilis tein mokixtia itech Biblia para maj kemej yeskia titakuakan, titatayikan uan tiyolpakikan (no xikonita Apocalipsis 22:17). Akin amo kiueyichiuaj Dios iniuan oksekin kemej yeskia “mayanaj”, “amikij” uan “mopinaujtiaj”. Amo kichiuaj tein kinpaleuis maj kuali mouikakan iuan Dios (Amós 8:11).

6. ¿Toni taman takual ika motajtoua itech Joel 2:​21-24, toni kiixnextia uan keniuj techpaleuia?

⁶ Joel kijtoj se taman tein mochiuaskia: ke Jehová kinmakaskia ixolal miak takual tein okachi monekia, kemej xinach, vino uan aceite (Joel 2:​21-24). Joel kinekia kijtos ke Jehová kinmakaskia ixolal nochi tein kinpoloskia uan no tein kinpaleuiskia maj iuan motokikan. ¿Keniuj kichiua axkan? Ika Biblia, toamaixuan, jw.org, nechikolmej uan uejueyi nechikolmej. Nejin techpaleuia maj kuali timomachilikan uan maj tikpatakan tein moneki.

7. ¿Keyej semi tiyolpakij? (Isaías 65:14).

⁷ Tiyolpakij uan kuali timomachiliaj. Tiitekitikauan Dios kuali timomachiliaj uan yejua ika semi tiyolpakij (xikonixtajtolti Isaías 65:14). ¿Uan keyej semi tiyolpakij? Porin semi techyolchikaua tikajsiskej itech iTajtol Dios tein melauak uan tatiochiualismej tein tikpiaskej. Tejuan tikmatij ke tein Jehová motenkaua yekmelauj mochiuas porin Jesús toka motemaktiko. Uan semi tiyolpakij keman ika titajtouaj nejin iniuan tokniuan (Sal. 34:8; 133:​1-3).

8. ¿Toni ome taman tiknextiaj akin tiksenueyichiuaj Jehová?

⁸ Tiitekitikauan Jehová tiknextiaj nejin  ome taman: timotasojtaj uan amo tixexeliujtokej. Uan kemej timotasojtaj, kuali timouikaj. Nejin techpaleuia maj tiknemilikan keniuj tinemiskej itech xochital. Ijkuak, okachi timotasojtaskej uan okachi kuali timouikaskej (Col. 3:14). Se tokniuj siuat kijtoua ke kimojkaitak keman kinixmatik itaixpantijkauan Jehová: “Nejua amo niyolpakia, nion iniuan nochankauan. Keman nikinixmatik itaixpantijkauan Jehová, nikitak keniuj se kinextia ke yekmelauj se tetasojta”. Akin kineki yolpakis uan kuali momachilis moneki kiueyichiuas Jehová iniuan oksekin. Maski techijtouiliskej tein amo melauak, Jehová uan nochin akin iniuan tikueyichiuaj kuali techitaj (Is. 65:15).

9. ¿Toni panos ika nochi tein techtajyouiltia? (Isaías 65:​16, 17).

⁹ Tiyolseujtokej uan amo timotekipachouaj. Isaías 65:14 kijtoua ke akin amo kiueyichiuaskej Jehová iuan ixolal “tsajtsiskej porin moyolkokoskej uan chokaskej porin yoltajyouiskej”. ¿Uan toni kinpanos itekitikauan Dios? ¿Kisentokaskej tajyouiskej? Jehová motenkaua: “Kielkauaskej tein kintekipachouaya, uan amo oksepa nikitasok” (xikonixtajtolti Isaías 65:​16, 17). Yejua kiixpolos nochi tein techtajyouiltia uan yolik kichiuas maj tikelkaujtiakan.

10. ¿Keyej uelis tikonijtos ke semi kualtsin maj ueli tietokan iniuan tokniuan? (No xikonita taixkopin).

¹⁰ Maski axkan miak taman techtekipachoua, kuali timomachiliaj uan tiyolseujtokej keman tietokej nechikolmej. ¿Keniuj uelis titapaleuiskej maj nochin yolseujtokan keman tiksenueyichiuaj Jehová? Moneki maj tiknextikan ke techixyekana ichikaualis Dios keman titetasojtaj, tiyolpakij, tiyolseujtokej, tikualtakamej uan tiyolnejmachmej (Gál. 5:​22, 23). ¡Semi kualtsin maj tipouikan itech inechikol Dios! Komo tiksentokaj tikueyichiuaj Dios, uelis tikitaskej keniuj kichijchiua se“yankuik iluikak uan se yankuik taltikpak”.

11. ¿Keniuj moneki timomachiliskej porin tiksenueyichiuaj Jehová? (Isaías 65:​18, 19).

¹¹ Timotasojkamatij uan tikuelitaj ompa tietoskej. Isaías kimelaua keyej tiitekitikauan Dios tiyolpakij. Yejua Jehová akin kichiua maj ueli tiksenueyichiuakan (xikonixtajtolti Isaías 65:​18, 19). Yejua ika Jehová kichiua maj tikinpaleuikan oksekin maj amo kisentokakan kineltokakanok tein takajkayauaj uan maj tikinpaleuikan maj no touan kiueyichiuakan  Jehová. ¡Semi tiyolpakij porin tikixmatij tein melauak! Yejua ika, tiknekij ika tikinnojnotsaskej oksekin (Jer. 31:12).

12. ¿Keniuj tionmomachilia keman tikonixtajtoltia tein Dios motenkaua itech Isaías 65:​20-24, uan keyej?

¹² Akin tiksenueyichiuaj Jehová semi timotasojkamatij uan tiyolpakij ika tein Jehová kichiuati. ¡Xikonnemili nochi tein uelis tikonitas uan tikonchiuas itech xochital! Biblia kijtoua: “Ompa pilimej amo sayoj nemiskej seki tonalmej, nion akin xiuejkejya momikiliskej”. Uan no kijtoua ke “kinchijchiuaskej kalmej uan ompa nemiskej; kitokaskej uvajmekat uan kikuaskej itakilo”. Uan no, “amo nenkaj motekitiltiskej” porin Jehová kintiochiuas. Dios motenkaua ke kuali nemiskej, amo teyi kinpolos uan kuali momachiliskej. Dios kimatis tein kinpoloua ‘maski yejuan ayamo kinotsaskej’, uan ‘kimakas tein kineki nochi tein yoltok’ (Is. 65:​20-24; Sal. 145:16).

13. ¿Keniuj kijtoua Isaías 65:25 ke tamatij akin kipataj tein kichiuayaj para kitekitiliskej Jehová?

¹³ Tiyolseujtokej uan amo timouij. Miakej akin achto tateuiayaj, takajkayauayaj uan kualaniaj mopatakej porin ichikaualis Dios kinpaleuij (xikonixtajtolti Isaías 65:25). Semi mochikauanij para amo kichiuaskejok nejon tein amo kuali (Rom. 12:2; Efes. 4:​22-24). Sayoj ke tiitekitikauan Dios titajtakolejkej, yejua ika ipa timopoloskej. Maski ijkon, Jehová kichiuani maj miakej kuali mouikakan, maj motasojtakan uan maj yolseujtokan (Tito 2:11). ¡Sayoj Dios akin kipia nochi chikaualis ueliskia kichiuas nejon!

14. ¿Keniuj kipanok se tokniuj kemej kijtoua Isaías 65:25?

¹⁴ ¿Yekmelauj ueli se mopata? Tein kipanok nejin takat kinextia ke kemaj. Se takat akin kipiaya 20 xiujmej, akin semi tateuiaya uan auilnemia miakpa kitsakkej porin kichiuaya tein amo kuali, yejua kiichtekia carros uan okseki taman. Uan nochipa kinekia tateuis. Keman kikakik toni yekmelauj tamachtia Biblia uan peuak youi nechikolmej iniuan itaixpantijkauan Jehová, kineltokak ke kiajsik teisa tein kichiuaskia maj yolpaki: kiueyichiuas Jehová iniuan oksekin. Satepan ke moauij, miakpa kinemilij ke tein kipanoka katka kemej tein kijtoua Isaías 65:25. Amo katkaok kemej se tekuani, ta kemej se ichkatsin.

15. ¿Keyej tiknekij tikinpaleuiskej oksekin maj no touan kiueyichiuakan Jehová, uan keniuj tikchiuaj?

¹⁵ Isaías 65:13 peua ika nejin tajtolmej: “Yejua nejin tein kijtoua ToUeyi Teko Jehová”. Uan versículo 25 tami ika nejin tajtolmej: “Kijtoua Jehová”. Tein yejua motenkaua nochipa kichiua (Is. 55:​10, 11). Axkan tikueyichiuajya Jehová iniuan tokniuan, ijkon kemej yejua kijtojka ke mochiuaskia. Maski kampa tinemij mochiua miak taman tein amo kuali, tejuan kuali timouikaj, kuali timomachiliaj uan tiyolseuij (Sal. 72:7). Yejua ika, tiknekij tikinpaleuiskej oksekin maj no touan kiueyichiuakan Jehová. ¿Keniuj tikchiuaj? Keman timochikauaj tikinmachtiskej oksekin (Mat. 28:​19, 20).

¿KENIUJ UELIS TIKINPALEUISKEJ OKSEKIN MAJ NO TOUAN KIUEYICHIUAKAN JEHOVÁ?

16. ¿Toni kichiua maj oksekin no kinekikan touan kiueyichiuaskej Jehová?

¹⁶ Tinochin uelis tikchiuaskej teisa para maj okachi miakej kinekikan kiueyichiuaskej Dios. ¿Keniuj? Komo tikchiuaj kemej Jehová. Yejua amo akin  kichikaujkauia maj kiueyichiua, ta iuan motokiaj porin kiitaj keniuj yejua kinnextilia ke kintasojta (Jer. 31:3; Juan 6:44). Akin momachtiaj keniuj tamati Jehová uan kiitaj ke techtasojta, kinpaleuia maj iuan motokikan. ¿Toni uelis tikchiuaskej para maj oksekin no kinekikan kiueyichiuaskej?

17. ¿Toni uelis tikchiuaskej para maj oksekin no kinekikan touan kiueyichiuaskej Jehová?

¹⁷ Komo tikinnextiliaj tokniuan ke tikintasojtaj, tapaleuis maj oksekin no kinekikan kiueyichiuaskej Jehová. Akin amo taneltokayaj uan yajkej nechikol ompa Corinto kijtojkej nejin: “Dios yekmelauj namouan yetok”. Tejuan no tiknekij maj ijkon momachilikan akin yekinika yaskej nechikolmej (1 Cor. 14:​24, 25; Zac. 8:23). Yejua ika semi moneki maj tikchiuakan nejin tein Biblia tayolmajxitia: “Xiyolseujkanemikan se iuan okse” (1 Tes. 5:13).

18. ¿Toni uelis kichiuas maj oksekin kinekikan motokiskej itech inechikol Jehová?

¹⁸ No moneki timochikauaskej tikinitaskej tokniuan kemej kinita Jehová. Yejua ika, tikitaj tein kuali tein kichiuaj uan amo sayoj keman mopolouaj, porin satepan amo mopoloskejok. Komo tikintasojtaj techpaleuis maj tikyektalikan tein yeski kuejmol, yejua ika moneki tikchiuaskej nejin: “Xikualtakamej se iuan okse, ximoiknelikan uan ximotapojpoluikan ika nochi namoyolo” (Efes. 4:32). Nochin akin kinekiskej maj kinnextilikan ke kintasojtaj, kinekiskej touan kiueyichiuaskej Jehová. a

 MAJ TISENTOKAKAN TIKUEYICHIUAKAN JEHOVÁ INIUAN TOKNIUAN

19. 1) ¿Toni kijtouanij sekin akin oksepa peujkej kiueyichiuaj Jehová iniuan tokniuan? (Xikonita recuadro “ Yajkaj uan oksepa mokepkej”). 2) ¿Toni moneki tikixtaliskej tikchiuaskej? (No xikonita taixkopin).

¹⁹ ¡Semi tiyolpakij tikueyichiuaskej Jehová iniuan tokniuan! Axkan okachi kualtsin uan okachi miakej kitekitiliaj Jehová. Maj nochipa tiktasojkamatilikan Dios porin techkaua maj tikueyichiuakan. Komo tiknekij kuali tietoskej, tiyolpakiskej, tiyolseujtoskej uan amo timouiskej, moneki tikueyichiuaskej Jehová uan amo keman tikauaskej. Sayoj ke moneki timoyekpiaskej porin Satanás kineki techkajkayauas para maj tikauakan inechikol Dios (1 Ped. 5:8; Apoc. 12:9). Maj amo tikauakan maj techkajkayaua. Maj timochikauakan kuali timouikaskej iniuan akin kiueyichiuaj Jehová uan maj amo tixexeliujtokan.