1. Parataiso oomunepani tiheeni, nave tiheeni nlakelenlaahu weera weera?

 OLELO veelaponi, ookhalavo parataiso yoowo achu ancipale anakhalaaya mwa murecele nave aakhalano ichu sincipale wi epake. Parataiso ene yoola ookhalano achu macikhwi ene yaawo anapuha murecele weeparipari. Yaale eri mu parataiso ene yoola ari oolakelela ohimuhiya. Awo tho annachuna wi achu ancipale ekhale vamoha wakhala wooweryeya mu nipuro nenla nootikhiniha. Parataiso taani yoowo? Parataiso oomunepani! a

2. Tiheeni eri yootikhinihaxa mu parataiso oomunepani?

² Ti yootikhiniha mukhalelo Yehova owenryeiye opatuxa nipuro noomaaleleya phaama veeri va elapo yeeyo Satana otatunxeiye okhala nipuro nenlo nsaren’ye onanara, wiica ni sawoopiha. (1 Yoh. 5:19; Wup. 12:12) Muluku ahu oosivela oosuwela phaameene mukhalelo oryaaya woonanaraxa okhala mmukhalelo yoola wa ichu, nave nthowa na yeeyo owo onnanivaha okhapelela yoowo nnachunaahu wi ntitelele winnuwa makupa oomunepani, wi niwerye otitelela omurumeelaka yoowo moohakalala. Masu awe annamuloca parataiso oomunepani ntoko “woochawelavo” ni “emaca enaheliwa maahi.” (Yes. 4:6; 58:11, PMM) Ni mareeliho a Yehova, yaale anapaka makupa a parataiso yoola oomunepani ananwerya okhala oohakalala ni ookhapeleleya mu elukuluku yeela yookuchula ni yoovila.—Yes. 54:14; 2 Tim. 3:1.

3. Waakhwanela taani wa masu oopacerya a Yesaya ekapitulu 65?

³ Moorweela wa mulipa a miririmu Yesaya, Yehova aahiloca mukhalelo okumi waahaalaaya okhala wa yaale yaahaala okhala mparataiso yoowo oomunepani. Nyuwaano munanwerya waalakhanya  masu yaala mu Yesaya ekapitulu 65, yaawo yaawaakhwanenle omapacereryo wa eyaakha ya 537 E.E.K. Mu elukuluku yeele, Ayuta oocharuwa yaahitaphuliwa wookapuroni o Papulo nave yaahikookela mu elapo aya. Yehova aahaareeliha achu awe nave aahaakhaviherya weeriha epooma yaatoloxiwe yo Yerusalemu okhala yaphaama ni orehereryiwa empa awe okhala nipuro na malapelo eeparipari o Isarayeli.—Yes. 51:11; Sak. 8:3.

4. Waakhwanela taani wa masu enaakhwanela mahiku ahu yaala a Yesaya ekapitulu 65?

⁴ Waakhwanela wanaawiili wa yooloherya ya Yesaya epacenrye mu 1919 E.K., vaavaa alapeli a mmahiku ahu a Yehova yaataphuliwaaya wookapuroni wa Papulo Mutokotoko. Tivaavaanto parataiso oomunepani aapacenryeiye wunnuwa. Alaleeryi yaala amvai a Omwene yaahitikitherya miloko mincipale nave yaahunnuwiha mikhalelo soomunepani. Alopwana ni athiyana yaawo wuupaceryani yaarino meecelo a okumi oonanara ni owali ‘ yaahiwara omuchu ovyaani yoowo opatuxiwe mwawiiwanana ni yookhwela ya Muluku.’ (Aef. 4:24) Mweeparipari, mareeliho mancipale yaawo Yesaya orempeiye enahaala waakhwanela moomalela omwaahiyu mu elapo evyaani. Nyenya mmahiku yaala nookahalano mareeliho mancipale yaawo nnapuhaahu. Nnahaala woona mukhalelo parataiso yoola oomunepani onanivoloweleiye nave ntakhara heeni nihinaphwanelaahu omuhiya.

MUKHALELO ANIISOONAAYA YAALE ARI MPARATAISO OOMUNEPANI

5. Mwawiiwanana ni Yesaya 65:13, mphurelo taani nnakhalaahuno moorweela wa okhala mu parataiso oomunepani?

⁵ Okumi waphaama ni wiichuuwihiwa. Yooloherya ya Yesaya ennooniherya wi wookhalavo ohiyana otokweene variyari va okumi wa yaale ari mparataiso oomunepani ni yaale ahiri mparataiso yoowo (Mwaalakhanye Yesaya 65:13, PMM.) Mwa mahala, Yehova onnaavaha alapeli awe soothene awo anachunaaya wi etitelele omulapela yoowo. Owo oonivaha munepa awe waawela, Masu awe oorempwa Piipiliya, ni yoolya yincipale yoomunepani wi niweryeke ‘olya, . . . owurya, . . . [ni] ohakalala.’ (Mulikanyihe ni Wupulula 22:17.) Mukhalelo ahu ti woohiyana ni yaale ahiri mparataiso oomunepani awo ‘ annavoliwa etala . . . , annakhwa nthanana . . . , [ni] annuulihiwa muru.’ Awo aakhalano othoiwa mmakupaaya oomunepani.—Amosi 8:11.

6. Ti mwawiihai Yoweli 2:21-24 onaloceiye ichu ikina seiyo Yehova onanivaheiye nave tho ti mwawiihai nnahaalaahu ophuravo phaama wa ichu soothene seiya?

⁶ Mu yooloherya awe Yoweli, aahipharihela ichu soochuneya sa mookumini ntoko yoolya, eviinyu ni aseite wi ooniherye wi Yehova mwa mahala onnaavahererya achu awe yeeyo awo anachunaaya, ophitaanyerya yoolya yoomunepani. (Yow. 2:21-24) Owo oneerano yeela moorweela wa Piipiliya ni soolaleeryiwa sahu inathipeleya Mpiipiliyani, esaiti ahu, hiiha tho ntoko mithkumano sahu sa muloko, mithukumano sa ekulucu ni sa miceche. Wakhala wi ninnalya yoolya yeela yoomunepani yeeyo Yehova onanivaheiye mahiku oothene, nnahaala okhalano okumi waphaama ni wiichuuwihiwa.

7. Tiheeni enaneeriha okhalano ‘ohakalala wa mmurimani?’ (Yesaya 65:14)

⁷ Okhala oohakalala. Achu a Muluku anahaala ‘okhuwela moohakalala’ nthowa nawi murima aya onahaala osareya othamalela wa yeeyo Yehova onapakeiye. (Mwaalakhanye Yesaya 65:14.) Hiyaano nookhalano ‘ohakalala wa mmurimani’ nthowa na iparipari seiyo inanlipiha nave tho wanthowa na ewehereryo ahu yoolipa enathipeleya mu mukucho wa Yesu. Vaavaa nnalocaahu ichu soomunepani wa anna ni arokora ninnakhala oohakalalaxa!—Sal. 34:8; 133:1-3.

8. Mikhalelo taani miili mitokweene sa parataiso oomunepani?

⁸ Osivela ni wiiwanana variyari va achu a Yehova ichu piili soochuneya mu parataiso oomunepani. “Nimakelo noophaameya na wiiwanana”  nenla ninnanivaha yawooniherya mukhalelo okumi onahaalaaya okhala mu elapo evyaani, weiwo alapeli a Yehova anahaalaaya opuha osivela ni wiiwanana opwaha mahiku yaala. (Ako. 3:14) Murokora mmoha ooloca sa yeeyo oonneiye mu ekwaha awe yoopacerya ya waasuwela Anamoona a Yehova: “Miyaano nkaasuwenle mukhalelo wa okhala oohakalala, naari mu emusi aka. Ekwaha aka yoopacerya koonnaaka osivela mu saweera, waari variyari va Anamoona a Yehova.” Yoowo onachuna okhalano ohakalala weeparipari onaphwanela ovolowa mparataiso oomunepani. Moohipwacha yeeyo achu analocaaya vooloca sa Anamoona a Yehova, nookhalano nsina naphaama ni meecelo aphaama wa Yehova nave tho anna ni arokora ahu orukurerya elapo.—Yes. 65:15.

9. Mwawiiwanana ni Yesaya 65:16, 17 tiheeni enahaala weereya ni ichu seiyo inantannyerya makacamiho?

⁹ Okhala oomaaleleya. Yesaya 65:14, PMM, olonce wi yaale anathanla otitelela okhala ocai wa parataiso oomunepani ‘ enamweewula ni murima owiinne, nave enamunla ni osoosiwa murima.’ Hanka vooloca sa ichu seiho sitannyile wiicela wa achu a Muluku? Ichu seiya, ‘inamucuwaliwa [naari] hisuupuweliwa va miithoni va [Muluku].’ (Mwaalakhanye Yesaya 65:16, 17, PMM.) Yehova onahaala weeriha wi makacamiho ahu ecakanele, nave moovira wa elukuluku wuupuwelela onanara yoowo onantannyerya wiicela onahaala ocakanela moomalela.

10. Ntakhara heeni munoonaanyu wi mareeliho okhala vamoha ni anna ni arokora Eekristu? (Moone tho eruku.)

¹⁰ Naamwi hiihaano, muupuwelo ahu onnakhala woomaaleleya vaavaa nnakhalaahu mmithukumano Seekristu, weiwo nnanwerya okhala oomaleleya ni ohuupuwela soonyenyeiha sa elapo yeela yoonanara. Vaavaa nnooniheryaahu mikhalelo seiyo inapaka makupa wa sawiima soomunepani sa Muluku, ntoko osivela, ohakalala, murecele, opixa murima, oreera murima, osareya saphaama, hiyaano niinakhaviherya omaaleleya waphaama yoowo orivovo mparataiso oomunepani. (Aka. 5:22, 23) Ninnathamalela vancipale nthowa na okhala mmarehereryo a Yehova! Yaale anahaala otitelela okhala mu parataiso oomunepani anahaala woona waakhwanela moomalela wa yoororomeliha ya Muluku ya “erimu yahiihaano ni elapo yahiihaano.”

11. Mwawiiwanana ni Yesaya 65:18, 19, ti mwawiihai muniisoonaanyu vaavaa musuwenlaanyu wi Yehova oompaka parataiso oomunepani?

¹¹ Othamalela ni ohakalala. Yesaya onnanivaha nthowa nikina nnaneeriha okhala ‘oohakalala ni ootheya’ mu parataiso oomunepani. Parataiso yoola oomunepani opakiwe ni Yehova. (Mwaalakhanye Yesaya 65:18, 19.) Marehereryo a elapo yeela henaahusiha achu vooloca sa Muluku, ti nthowa nene Yehova onaniphariheleiye wi aakhaviherye achu okhumamo mmarehereryo yaawo wi epake makupa a parataiso ahu yoola ootikhiniha oomunepani! Nri oohakalalaxa  ni mareeliho nnapuhaahu wanthowa na okhala mu eparipari, nave ninnaceenyeryeya waaleela akina vooloca sa yaawo.—Yer. 31:12.

12. Muniisoona hai vaavaa munaalakhanyaanyu yoororomeliha enalociwa mu Yesaya 65:20-24, nave ntakhara heeni?

¹² Ninnathamalela tho ni ohakalala ni ewehereryo yeeyo nryaahuno ntoko achu nnakhala mparataiso oomunepani. Pahiru wuupuwela mu soothene seiyo nnahaalaahu woona ni opaka mu elapo evyaani ya Muluku! Piipiliya onnaroromeliha wi: ‘Mwaana harwa akhwa . . . ari nikwiya, naari awuuluvala ihikwanenle miyakha sawe.’ Nnahaala ‘otekaka ipa ni okonakamo [nave] nnamwaalaka miri ni olyaaka sawiima saya.’ ‘Hinlapaka mwakuru mahaleene’ nthowa nawi nnahaala ‘oreelihiwa ni Yehova.’ Owo onnaniroromeliha okumi wookhapeleleya, waphaama ni yoolakelela yeeparipari. ‘Ophiyerya wi nihaakumve okhuwela’ owo onamusuwela soothowa sa mmoha ti mmoha nave ‘onamwaakhwaniherya soothowa sa muchu ti muchu.’—Yes. 65:20-24; Sal. 145:16.

13. Ti mwawiihai Yesaya 65:25 onaloceiye sa matorokelo yaawo achu anapakaaya mu okumi aya vaavaa anapaceryaaya omurumeela Yehova?

¹³ Okhapeleleya ni murecele. Nnikhaviheryo na munepa waweela wa Muluku, ancipale yaawo yaarino mikhalelo soonanara yaahipaka matorokelo awooneya mu ikumi saya. (Mwaalakhanye Yesaya 65:25.) Awo yaahipaka owetha waya wi ehiye mikhalelo seiyo sooheseya. (Aro. 12:2; Aef. 4:22-24) Eparipari wi achu a Yehova toohiphaameya, mwa yeeyo nlelo nnahaala ohesaka. Mwawiihiiha, Yehova ohaathukumanya “achu a mukhalelo woothene” mu nimakelo nenlo nihinapaseya mu osivela ni murecele. (Titu 2:11) Ela yootikiniha yeeyo pahiru Muluku aikuru soothene onawereiye weerano!

14. Ti mwawiihai yootakiherya ya munna mmoha enooniheryaaya wi masu a Yesaya 65:25 teeparipari?

¹⁴ Apwanne mweeparipari achu ananwerya otoroka omuchu aya? Muupuwelele yaweereya ela. Mmiravo mmoha yoowo aarino iyaakha 20, aahiwaleliwa mu kariposo ikwaha sincipale nave aarino okumi wa ocapaheya ni nlala. Owo aahiwaleliwa nthowa na wiiya ikaaro, wiiya mmavaate ni milacu mikina mitokotoko. Owo aari ooreheryeya owana ni muchu vyakala. Vaavaa iiwaleiye mu ekwaha awe yoopacerya eparipari ya Piipiliya ni apacerya othukumana ni Anamoona a Yehova, owo aahilekecheya wi oophwanya echu yeeyo yaahaala weeriha okumi awe okhala— mparataiso oomunepani. Amanle opatisiwa, owo aanamaala uupuwelela mukhalelo masu a Yesaya 65:25 yaaphariheleyaaya wa yoowo. Owo aahihiya okhala muchu oowali ni a nlala ntoko mwaco, nave akhala muchu a murecele ntoko epucepuche.

15. Ntakhara heeni nnachunaahu waawopa achu akina okhala vamoha ni hiyaano mu parataiso oomunepani nave nni neereno hai yeeyo?

¹⁵ Yesaya 65:13, PMM onapacerya ni masu ariki: ‘Apwiya Yehova anii.’ Eversikulu ya 25 enakuchula ni masu awi: “Analoca ti Apwiya.” Soororomeliha sawe sinnaakhwanela. (Yes. 55:10, 11) Parataiso oomunepani echu yeeparipari. Yehova ohuuraanya emusi ya alapeli awe yeeyo ehinalikanyihiwa. Wanthowa na okhala makupa a emusi yeela, hiyaano nookhalano murecele yoowo wahaahaala okhala wooweryeya mu elapo yeela ya nlala. (Sal. 72:7) Ti nthowa nene nnachunahu waakhaviherya achu ancipale ovolowa mu emusi ya onnahu wa elapo yoothene. Nnanwerya weerano yeeyo moorweela wa otikithereya mu waapaka oohuserya.—Mat. 28:19, 20.

WAAKHAVIHERYA AKINA OCHUNA OVOLOWA MU PARATAISO OOMUNEPANI

16. Tiheeni enahaala waakhaviherya achu akina ochuna opaka makupa a parataiso oomunepani?

¹⁶ Mmoha ti mmoha a hiyo onanwerya opaka echu yoochuneya wi aakhaviherye akina ochuna ovolowa mparataiso oomunepani. Nnanwerya waakhwaniherya murici yoola moorweela wa omutakiherya Yehova. Yehova hanamukhinyereya  muchu opaka makupa a marehereryo awe. Ohiya yeeyo, owo ‘onniiruhela’ achu mmukhalelo waphaama. (Yoh. 6:44; Yer. 31:3) Ti nthowa nene, muchu amanle ohuserya makhalelo ni omuchu awe Yehova, honaweryeya wi muchu ahichune okhala va onthamwene awe. Nyenya ti mwawihai mikhalelo sahu saphaama ni meecelo ahu inahaalaaya oweeriha achu akina ovolowa mu parataiso oomunepani?

17. Nni niweerihe hai achu akina ovolowa mu parataiso oomunepani?

¹⁷ Mukhalelo mmoha wa waakeriha achu mparataiso oomunepani ori moorweela waakhaliha phaama anna ni arokora ahu moosivela ni mooreera murima. Vaavaa muchu onaphiyeiye mu empa ya Omwene mu ekwaha awe yoopacerya, nnachuna wi owo iisooneke phaama hiiha ntoko achu yaale yoonenle mithukumano mmuloko wakhalai o Korintu. Awo yaahiloca wi: “Chiri Muluku ori ni nyuwo.” (1 Ako. 14:24, 25; Sak. 8:23) Mwawiihiiha, nnaphwanela owiriyana ekano ya ‘okhala a murecele mukina ni mukhwaawe’—1 Ate. 5:13.

18. Tiheeni enahaala oweeriha achu ovolowa mmarehereryo ahu?

¹⁸ Ilukuluku soothene nnaphwanela owoonaka anna ni arokora ahu hiiha ntoko Yehova onawooneleiyevo. Ninneerano yeela moorweela wa otikitheryeya mu mikhalelo saya saphaama ohiya mu ohiphaameya waya, yoowo onahaala ocakanela moohilekela. Nnaphwanela orehereryaka nikacamiho vyakala nenlo nnakhalaahuno ni annihu mmukhalelo woosivela moorweela wa okhala “ooreera murima mukina ni mukhwaawe, oomorelana ikharari, oolevelelana mukina ni mukhwaawe ni murima woothene.” (Aef. 4:32) Mmukhalelo yoola, parataiso oomunepani onahaala otannya mirima sa achu yaawo tho anachuna okhalihiwa mmukhalelo si yoola. b

 MUTITELELE OKHALA MU PARATAISO OOMUNEPANI

19. (1) Mwawiiwanana ni ekaaxa “ Awo Yaakhumamo Nave Ekookelamo”, tiheeni akina aloncaaya emanle okookelamo mu parataiso oomunepani? (2) Teevi enaphwanela okhala yoolakelela anyu? (Moone tho eruku.)

¹⁹ Ninnathamalela vancipale opaka makupa mu parataiso oomunepani! Owo taphaamaxa opwaha echu ekina, nave ookhalano alapeli a Yehova ancipale opwaha khalai. Nnaphwanela otitelela okhala mparataiso yoowo Yehova ompankeiye ntakhara hiyaano. Yoowo onachuna wiichuuwihiwa, okhala oohakalala, oomaaleleya ni ookhapeleleya onaphwanela ovolowa mu parataiso yoola oomunepani nave ahirwe akhumemo! Nyenya mukhaleno ekaasope, nthowa nawi Satana onnapaka owetha wawe wi aniwoke ni onikumiherya vaate va parataiso yoola oomunepani. (1 Pet. 5:8; Wup. 12:9) Niheemererye wi owo awerye weerano yeeyo. Nnaphwanela opaka owetha wahu wi nikhapelele oreera, weela ni murecele yoowo nryaahuno mu parataiso oomunepani.