1. Paradeise ya moya ke’ng, gona re swanetše go ikemišetša go dira’ng?

 LEHONO mo lefaseng go na le paradeise yeo e tletšego ka bophelo bjo bo kgahlišago. Paradeise ye e tletše ka batho ba dimilione bao ba thabelago khutšo ya kgonthe. Bao ba lego ka gare ga yona ba ikemišeditše go se e tlogele. Ba nyaka le gore batho ba bangwe ba bantšhi le bona ba tle ba thabele paradeise yeo. Paradeise yeo ke ya mohuta mang? Ke paradeise ya moya! a

2. Ke’ng se se kgahlišago ka paradeise ya moya?

² Go thabiša kudu gore Jehofa o bopile lefelo le le lebotse gare ga lefase le le bušwago ke Sathane leo le tletšego ka lehloyo, bobe e bile le le kotsi. (1 Joh. 5:19; Kut. 12:12) Modimo wa rena yo a re ratago o bona dilo tše mpe tšeo di tlišwago ke tshepedišo ye ya dilo e bile o re nea dilo ka moka tšeo re di hlokago gore re šireletšege le gore re kgone go mo hlankela re thabile. Lentšu la gagwe le hlalosa paradeise ya moya e le lefelo leo le bolokegilego la “botšhabelo” le “serapa se se nošetšwago gabotse.” (Jes. 4:6; 58:11) Jehofa o thuša bao ba dulago paradeiseng ye gore ba kgone go thaba le go šireletšega mehleng ye e thata ya bofelo.—Jes. 54:14; 2 Tim. 3:1.

3. Jesaya kgaolo 65 e ile ya phethagala bjang la mathomo?

³ Jehofa o ile a diriša moporofeta Jesaya go hlalosa gore bophelo bja batho bao ba tlago go phela paradeiseng ya moya bo  be bo tlo ba bjang. Tlhaloso ye e hwetšagala go Jesaya 65, gomme e ile ya phethagala la mathomo ka 537 B.C.E. Ka nako yeo Bajuda bao ba bego ba itshola ba ile ba lokollwa bokgobeng Babilona gomme ba boela gagabo bona. Jehofa o ile a šegofatša batho ba gagwe le go ba thuša gore ba tsošološe Jerusalema e be e botse gape e bile ba tsošološe tempele gore batho ka moka bao ba dulago Isiraele ba mo hlankele go yona gape.—Jes. 51:11; Sak. 8:3.

4. Jesaya kgaolo 65 e ile ya phethagala bjang ka lekga la bobedi?

⁴ Boporofeta bja Jesaya bo phethagetše ka lekga la bobedi ka 1919 C.E. ge bahlanka ba Jehofa ba lehono ba lokollwa bokgobeng bja Babilona o Mogolo. Ke moka paradeise ya moya e ile ya thoma go gola lefaseng ka moka. Bagoeledi ba ditaba tše dibotse ba ile ba thoma go hloma diphuthego tše dintšhi le go tšweletša dika tše di enywago ke moya. Banna le basadi bao ba bego ba rata dintwa e bile ba na le mekgwa ya bophoofolo, ba ile ba “[fetoša] tsela yeo [ba] phelago ka yona gore e dumelelane le thato ya Modimo.” (Baef. 4:24) Ke nnete gore ditšhegofatšo tše dintšhi tšeo Jesaya a boletšego ka tšona di tlo phethagala lefaseng le leswa leo le sa tlago. Eupša le gona bjale go na le dilo tše dintšhi tšeo re di thabelago. A re boneng gore paradeise ye ya moya e re ama bjang le gore ke ka baka la’ng re se ra swanela go e tlogela.

TSELA YEO BAO BA LEGO PARADEISENG YA MOYA BA IKWAGO KA YONA

5. Ka ge Jesaya 63:13 e boletše, ke’ng seo re se thabelago ka paradeise ya moya?

⁵ Ba phetše gabotse e bile ba lapologile. Boporofeta bja Jesaya bo bapetša bophelo bja batho bao ba lego paradeiseng ya moya le bja bao ba sego go yona. (Bala Jesaya 65:13.) Jehofa o kgotsofatša dinyakwa tša moya tša bahlanka ba gagwe ka mo go tletšego. O re neile moya wa gagwe o mokgethwa, Beibele le dijo tše dingwe tša moya gore re kgone go ‘ja, . . . go nwa, . . . le go thaba.’ (Bapiša le Kutollo 22:17.) Go fapana le rena, bao ba sego paradeiseng ya moya ba swarwa ke “tlala. . . , ba a nyorwa e bile ba hlabja ke dihlong,’ ba swerwe ke tlala ya moya.—Amose 8:11.

6. Joele 2:​21-24 e hlalosa bjang dimpho tšeo Jehofa a re neago tšona, gona di ka re hola bjang?

⁶ Joele o ile a bolela boporofeteng bja gagwe a diriša dijo, beine le makhura, go bontšha ka mokgwa woo Jehofa a hlokomelago batho ba gagwe ka dilo tšeo ba di hlokago go akaretša le dijo tša moya. (Joele 2:​21-24) O re nea dijo tša moya a diriša Beibele, dikgatišo tše di theilwego Beibeleng, wepesaete, diboka, dikopano tša tikologo le tša selete. Re tlo phela gabotse le go lapologa ge re ka diriša dilo tše letšatši le lengwe le le lengwe.

7. Ke’ng seo se dirago gore re be le “boemo bjo bobotse bja pelo”? (Jesaya 65:14)

⁷ Ba thabile e bile ba kgotsofetše. Bahlanka ba Modimo ba “goeletša ka lethabo” ka gobane ba leboga Jehofa kudu. (Bala Jesaya 65:14.) Ditherešo tše di agago le dikholofetšo tše di lego ka Lentšung la Modimo tše di kgothatšago gotee le kholofelo yeo re nago le yona yeo e theilwego sehlabelong sa Jesu sa topollo, di dira gore re be le “boemo bjo bobotse bja pelo.” Re thaba kudu ge re boledišana le bana babo rena le dikgaetšedi ka dilo tše!—Ps. 34:8; 133:​1-3.

8. Ke dika dife tše pedi tše dikgolo tša bao ba lego paradeiseng ya moya?

⁸ Bahlanka ba Jehofa bao ba lego paradeiseng ya moya ba na le dika tše pedi tše dikgolo e lego lerato le botee. “Botee” bjo bo re bontšha gore bophelo bo tla ba bo le bjang lefaseng le leswa moo bahlanka ba Jehofa  ba tlago go ratana le go ba le botee go feta lehono. (Bakol. 3:14) Kgaetšedi yo mongwe o hlalosa seo a se bonego ge a be a kopana le bahlanka ba Jehofa la mathomo. O re: “Mathomong ke be ke sa kgone go thaba le ge ke be ke na le ba lapa la ka. Eupša ge ke be ke kopana le Dihlatse tša Jehofa, ke ile ka bona lerato leo ba le bontšhanago.” Motho yo mongwe le yo mongwe yo a nyakago go thaba le go kgotsofala e le ka kgonthe, o swanetše go latswa paradeise ya rena ya moya. Bahlanka ba Jehofa lefaseng ka moka ba na le botumo bjo bobotse go sa šetšwe gore lefase le nagana eng ka bona.—Jes. 65:15.

9. Jesaya 65:​16, 17 e tshepiša gore go tlo direga’ng ka mathata ao re nago le ona?

⁹ Ba dula ba išitše maswafo fase. Jesaya 65:14 e re bao ba kgethago go se be paradeiseng ya moya ba “tlo lla ka baka la bohloko bja pelo e bile [ba] tlo golola ka baka la go tlalelwa moyeng.” Eupša go tlo direga eng ka dilo ka moka tšeo di bakelago batho ba Modimo bohloko le tlaišego? Dilo tšeo di tlo ‘lebalwa e bile tša utega mahlong a Modimo.’ (Bala Jesaya 65:​16, 17.) Jehofa o tlo tloša mathata a rena ka moka gomme re ka se sa gopola le kamoo mathata ao a ilego a re kweša bohloko ka gona.

10. Ke ka baka la’ng e le tšhegofatšo go ba gare ga bana beno le dikgaetšedi? (Bona le seswantšho.)

¹⁰ Gona bjale re a thaba ge re eba gona dibokeng moo re kgonago go khutša gomme ra lebala ka mathata ao a tlišwago ke lefase le le lebe. Re thuša le bana babo rena le dikgaetšedi gore ba lapologe ge re ba bontšha lerato, lethabo, khutšo, botho, le boleta e lego dika tšeo di enywago ke moya wa Modimo. (Gal. 5:​22, 23) Ke tšhegofatšo e kgolo go ba karolo ya mokgatlo wa Modimo! Bao ba dulago ba le paradeiseng ya moya ba tlo bona go phethagala ga tshepišo ya Modimo ya magodimo a “mafsa le lefase le lefsa.”

11. Go ya ka Jesaya 65:​18, 19, paradeise ya moya yeo Jehofa a e dirilego e swanetše go re kgoma bjang?

¹¹ Ba thabile e bile ba a leboga. Jesaya o tšwela pele ka go re botša gore ke ka baka la’ng re swanetše go ba le mabaka a go “hlalala le go thaba” mo paradeiseng ya moya. Paradeise ye e dirilwe ke Jehofa. (Bala Jesaya 65:​18, 19.) Ka gona ga go makatše ge Jehofa a re diriša go thuša batho go tšwa mekgatlong ye ya lefase, yeo e sa rutego therešo ka Modimo gomme ra ba thuša gore ba be karolo ya paradeise ya moya! Re thabela ditšhegofatšo tšeo re di hwetšago ge re le therešong e bile re nyaka go botša ba bangwe ka tšona.—Jer. 31:12.

12. O ikwa bjang ka ditshepišo tšeo di lego go Jesaya 65:​20-24, gona ka baka la’ng?

 ¹² Re tloga re leboga le go thabela kholofelo yeo re nago le yona ka ge re le badudi ba paradeise ya moya. Nagana ka dilo ka moka tšeo re tlago go di bona le go di dira lefaseng le leswa la Modimo! Beibele e re tshepiša gore: “Go ka se sa ba le lesea le le amušwago le le phelago matšatši a sego kae, e bile go ka se be le mokgalabje yo a sa fetšego matšatši a gagwe.” Re tla “ aga dintlo [ra] dula go tšona; [re] tla bjala dirapa tša merara [ra] ja dienywa tša tšona.” Re ka se “itapišetše lefeela” ka gobane re tla ba “bašegofatšwa ba Jehofa.” O re tshepiša bophelo bjo bo šireletšegilego, bjo bo kgotsofatšago le bjo bo nago le morero. “Le gona e tla re pele ga ge ba ka goeletša,” o tla ba a šetše a tseba gore ba hloka eng gomme a “kgotsofatša kganyogo ya batho le diphoofolo.”—Jes. 65:​20-24; Ps. 145:16.

13. Jesaya 65:25 e hlalosa bjang diphetogo tšeo batho ba di dirago maphelong a bona ge ba thoma go hlankela Jehofa?

¹³ Ba na le khutšo e bile ba bolokegile. Batho ba bantšhi bao ba bego ba na le mekgwa ya bophoofolo ba ile ba dira diphetogo tše dikgolo maphelong a bona ba thušwa ke moya o mokgethwa. (Bala Jesaya 65:25.) Ba ile ba šoma ka thata go fetoša mekgwa ya bona ya kgale. (Baroma 12:2; Baef. 4:​22-24) Ke therešo gore ka ge re se ra phethagala re sa dutše re dira diphošo. Le ga go le bjalo, Jehofa o kgobokantšhitše ‘batho ba mehuta yohle’ bao ba mo ratago le bao ba ratanago gomme seo se dira gore ba be le khutšo le botee. (Tito 2:11) Selo sa mohuta wo se ka dirwa feela ke Modimo ramatlaohle!

14. Ngwanabo rena yo mongwe o ile a bona bjang go phethagala ga Jesaya 65:25 bophelong bja gagwe?

¹⁴ Na ruri batho ba ka kgona go fetoša tsela yeo ba phelago ka yona? Nagana ka mohlala wo: Lesogana leo le bego le dutše le swarwa gantšhi, ge le be le na le mengwaga e 20 le be le šetše le phela bophelo bjo bo gobogilego le bja go rata dintwa. Le ile la golegwa ka baka la go utswa koloi, go tsenela batho ka dintlong tša bona le melato e mengwe e megolo. Le be le dula le ikemišeditše go lwa le motho yo mongwe le yo mongwe. Ge le be le thoma go ithuta ditherešo tša ka Beibeleng le go ya dibokeng tša Dihlatse tša Jehofa, le ile la kgodišega gore bophelo bja lona bo na le morero. Ka morago ga go kolobetšwa gore e be Hlatse, lesogana leo le be le dula le nagana ka Jesaya 65:25. Le fetošitše bophelo bja lona bja go rata dintwa gomme gona bjale ke ngwanabo rena yo a nago le khutšo.

15. Ke ka baka la’ng re nyaka go mema ba bangwe gore ba be le rena paradeiseng a moya, gona re ka dira seo bjang?

¹⁵ Jesaya 65:13 e thoma ka mantšu ao a rego: “Se ke seo Mmuši Morena Jehofa a se boletšego.” Temana 25 e feleletša ka mantšu ao a rego “go boletše Jehofa.” Seo Jehofa a se bolelago se dula se phethagala. (Jes. 55:​10, 11) Paradeise ya moya ke ya kgonthe. Jehofa o re neile lapa leo le nago le batho bao ba mo hlankelago leo re ka se le hwetšego felo. Ka ge re le karolo ya lapa la gagwe re na le khutšo e bile re ikwa re bolokegile. (Ps. 72:7) Ka baka leo re nyaka go thuša batho ba bantšhi ka mo go ka kgonegago ka gona gore le bona e be karolo ya lapa le. Re ka dira se ka go etiša pele mošomo wa go dira barutiwa.—Mat. 28:​19, 20.

RE KA GOGELA BJANG BATHO PARADEISENG YA MOYA?

16. Batho ba gogelwa ke’ng paradeiseng ya moya?

¹⁶ Yo mongwe le yo mongwe wa rena o na le karolo e bohlokwa yeo a swanetšego go e phetha ya go dira gore batho ba kgahlwe ke paradeise ya moya. Re ka kgona go dira se ge re ka  ekiša Jehofa. Ga a gapeletše batho gore ba tle ka mokgatlong wa gagwe. Go e na le moo o ba ‘gogela’ go yena ka boleta. (Joh. 6:44; Jer. 31:3) Batho ba dipelo tše dibotse bao ba ithutago ka dika tša Jehofa le semelo sa gagwe se se kgahlišago ba gogelega go yena. Rena re ka gogela batho bjang paradeiseng ya moya ka dika tša rena le boitshwaro bja rena bjo bobotse?

17. Re ka gogela batho ba bangwe paradeiseng ya moya bjang?

¹⁷ Tsela e nngwe yeo re ka gogelago batho paradeiseng ya moya ka yona ke ka go swara bana babo rena le dikgaetšedi ka botho. Ge batho bao ba nago le kgahlego ba thoma go tla dibokeng tša rena, re nyaka gore ba ikwe go swana le batho bao e bego e se Bakriste bao go ka diregago gore ba ile ba ya dibokeng tša kua Korinthe ya kgale. Ba ile ba re: “Ruri Modimo o gare ga lena.” (1 Bakor. 14:​24, 25; Sak. 8:23) Ka gona re swanetše go tšwela pele re ‘eba le khutšo seng sa rena.’—1 Bathes. 5:13.

18. Batho ba bangwe ba ka gogelwa ke eng ka mokgatlong wa rena?

¹⁸ Re swanetše go dula re leka go lebelela bana babo rena le dikgaetšedi ka tsela yeo Jehofa a ba lebelelago ka yona. Re dira seo ka go lebelela dilo tše dibotse tšeo ba di dirago e sego mafokodi a bona, ao e se kgale a tlago go fela. Re ka rarolla mathata ao a bago gona gare ga rena ka go bontšhana lerato, ‘go bontšhana botho, go kwelana bohloko, le go lebalelana ka pelo ka moka.’ (Baef. 4:32) Ge re dira bjalo re tlo gogela batho bao ba nyakago go swarwa ka tsela e swanago, paradeiseng ya moya. b

 DULA O LE PARADEISENG YA MOYA

19. (a) Ka ge re bone lepokising leo le rego “ Ba Ile ba Sepela ba Boa,” batho ba bangwe ba boletše’ng ka morago ga go boa paradeiseng ya moya? (b) Re swanetše go ikemišetša go dira’ng? (Bona le seswantšho.)

¹⁹ Re leboga paradeise ya rena ya moya kudu! Ke e botse kudu go feta mathomong e bile e tletše ka bahlanka ba bantšhi ba Jehofa go feta le ge e le neng pele. Eka re ka dula re leboga kudu paradeise ye Jehofa a re diretšego yona. Motho yo mongwe le yo mongwe yo a nyakago go lapologa, go kgotsofala, go iša maswafo fase le go šireletšega, o swanetše go tla paradeiseng ya moya gomme a se ke a tloga go yona! Eupša hlokomela gore Sathane o dula a leka ka thata go re tloša paradeiseng ye. (1 Pet. 5:8; Kut. 12:9) Ga se ra swanela go mo dumelela a atlega. A re duleng re šoma ka thata gore re šireletše paradeise ye ya rena ya moya e botse, yeo e nago le khutšo le e hlwekilego.