1. Mäpaya, ¿te mä paraiso ja nuua ha rä Xiꞌmhai ꞌne te di debe gä mꞌu̱ihu̱ desidido gä pe̱fihu̱?

 MÄPAYA nuua ha rä Xiꞌmhai ja nꞌa rä paraiso habu̱ ꞌmu̱i yä miyontho yä jäꞌi nuꞌu̱ xa ꞌmu̱i ocupado pe̱fi yä hogä tꞌo̱tꞌe. Ha nunä paraiso, gatꞌho nuya yä jäꞌi di ntsitsꞌi nꞌa ngu mä nꞌaa ꞌne pe̱ꞌtsi nꞌa rä hogä amista ko rä Zi Dada Jeoba. Nuyu̱ ꞌmu̱i desidido nunka dä bo̱ni de nunä paraiso ꞌne di mbitabi märꞌaa pa dä ehe ꞌne dä disfruta de nunä paraiso. Pe nunä paraiso, hingä nꞌa rä luga, sino nꞌa rä mꞌu̱i temäꞌentho xä rꞌakägihu̱ rä Zi Dada Jeoba.

2. ¿Te di nheki mäpaya ha rä Xiꞌmhai, pe te xä logra rä Zi Dada Jeoba?

² Ho̱nse̱ rä Zi Dada Jeoba xä za xä japi xä nja nunä paraiso, mäske ha nunä Xiꞌmhai ja ndunthi yä ntꞌu̱tsate, yä ntsꞌomꞌu̱i ꞌne yä peligro (1 Juan 5:19; Apoc. 12:12). Rä Zithu ne dä u̱ngägihu̱ ko gatꞌho nuya yä tsꞌo tꞌo̱tꞌe. Pe koꞌmu̱ rä Zi Dada Jeoba xa di mäkägihu̱, xä ꞌuegägihu̱ de nuya yä peligro ja ha nunä xiꞌmhai ꞌne xä tsigägihu̱ ha rä hnini. Rä Mäkä Tꞌofo kompara rä hnini rä Zi Dada Jeoba ngu nꞌa rä paraiso habu̱ dä za gä nkuatꞌihu̱, ꞌne xa mähotho ngu nꞌa rä jardin näꞌä xa xä nkꞌantꞌi (Is. 4:6; 58:11). Ko rä mfatsꞌi rä Zi Dada Jeoba, gatꞌho nuꞌu̱ ꞌmu̱i ha nunä paraiso, tini ndunthi rä johya ꞌne di senti seguro ha nuya yä gäxä pa di ꞌmu̱ihu̱ (Is. 54:14; 2 Tim. 3:1).

3. ¿Hämꞌu̱ bi kumpli nuꞌu̱ yä noya hutsꞌi ha rä mfistꞌofo Isaías rä capítulo 65?

³ Ha rä mfistꞌofo Isaías rä capítulo 65, rä Zi Dada Jeoba bi mändabi rä profeta Isaías dä yꞌofo te mä mꞌu̱i ma xä nheki ha rä hnini. Ngu po rä je̱ya 537 änte de xä mꞌu̱i rä Kristo nuua ha rä Xiꞌmhai, bi thogi ja ngu xki yꞌofo rä profeta Isaías. Ha näꞌä tiempoꞌä, nuꞌu̱ yä judío mi ꞌmu̱i de gä esclavo ha rä dähni Babilonia, bi the̱gi libre ꞌne bi za bi mengi ha yä hai. Rä Zi Dada Jeoba bi jäpi nuyu̱ yä judío ꞌne bi matsꞌi bi hyoki mänꞌaki Jerusalén ꞌne rä templo. Ha nunä templo, ja gehni gatꞌho yä judío ma xä xo̱kämbeni mänꞌaki rä Zi Dada Jeoba (Is. 51:11; Zac. 8:3).

4. ¿Hanja di kumpli mäpaya nuꞌu̱ yä noya hutsꞌi ha rä mfistꞌofo Isaías rä capítulo 65?

⁴ Nuꞌu̱ yä noya bi yꞌofo rä profeta Isaías hingä ho̱nse̱ bi kumpli  mäyaꞌmu̱, sino ke ꞌnehe di kumpli ha nuya yä pa di ꞌmu̱ihu̱. Bi mu̱di bi kumpli ha rä je̱ya 1919; nuꞌmu̱ nuꞌu̱ pe̱päbi rä Zi Dada Jeoba bi mꞌu̱i libre, ꞌne bi bo̱ni de yä hyate relijion fädi ngu rä Däta Babilonia. Dende geꞌmu̱, näꞌä rä paraiso —näꞌä rä mꞌu̱i temäꞌentho di nheki ha rä hnini rä Zi Dada Jeoba— xä ntu̱ngi po gatꞌho rä Xiꞌmhai. Ko ngatꞌho yä ganä, nuꞌu̱ pe̱päbi rä Zi Dada Jeoba bi forma yä congregación. Ndunthi yä ñꞌo̱ho̱ ꞌne yä ꞌme̱hñä nuꞌu̱ xki zitsꞌi nꞌa rä mꞌu̱i xä ntsꞌo o xa myä tsꞌomꞌu̱i, bi paati yä mꞌu̱i ꞌne nubye̱ ꞌmu̱i ja ngu di mända rä Zi Dada Jeoba (Efes. 4:24). Mähyoni gä benihu̱ ge nuꞌu̱ yä noya bi yꞌofo rä profeta Isaías, ma dä uadi dä kumpli xti hä näꞌä rä rꞌayꞌo xiꞌmhai xä prometegihu̱ rä Zi Dada Jeoba. Pe dende nubye̱, ya di hänihu̱ ndunthi yä benefisio de gä ꞌmu̱ihu̱ ha rä hnini rä Zi Dada Jeoba. Ma gä handihu̱ ndaꞌu̱ nuꞌu̱ yä jäpi ꞌne por hanja nunka di debe gä po̱nihu̱ de nunä paraiso.

NUꞌU̱ YÄ JÄPI DI NHEKI HA RÄ HNINI RÄ ZI DADA JEOBA

5. Ja ngu udi Isaías 65:​13, ¿te mä jäpi pe̱ꞌtsi nuꞌu̱ toꞌo ꞌmu̱i mbo ha rä hnini rä Zi Dada Jeoba?

⁵ Di tsihu̱ rä ñhuni xä ntꞌaxi näꞌä rꞌakägihu̱ rä nzaki ꞌne rä tsꞌe̱di. Rä profeta Isaías bi yꞌofo te mä mꞌu̱i di nheki ha nunä Xiꞌmhai ꞌne te mä mꞌu̱i di nheki mbo ha rä hnini rä Zi Dada Jeoba (hñeti Isaías 65:13). Rä Zi Dada Jeoba go geꞌä mismo umbäbi te dä zi gatꞌho nuꞌu̱ pe̱päbi. Hää, xä rꞌakägihu̱ rä espiritu santo, rä Mäkä Tꞌofo ꞌne mä ndunthi yä mfatsꞌi (hyandi ꞌnehe te mää Apocalipsis 22:17). Pe nuꞌu̱ toꞌo hinxä yu̱tꞌi mbo ha rä hnini rä Zi Dada Jeoba ꞌñenä go thogi rä thuhu, rä nduthe ꞌne rä mꞌe̱ꞌtsa. Hää, thogi rä thuhu ꞌne rä nduthe ngeꞌä hingi pätuäbi rä Noya rä Zi Dada Jeoba (Amós 8:11).

6. ¿Te mä ñhuni no̱ni ha Joel 2:​21-24, te di signifika ꞌne hanja di benefisiagihu̱?

⁶ Rä profeta Joel bi no̱ni yä semilla, rä binu ꞌne rä aseite de gä olibo, pa dä mää ge rä Zi Dada Jeoba ma xä umbäbi gatꞌho näꞌä di japäbi mꞌe̱di rä hnini (Joel 2:​21-24). Pe rä Zi Dada Jeoba hingä ho̱nse̱ ma xä umbäbi te dä zi ꞌne te dä hyee rä hnini, sino ke ꞌnehe ma xä umbäbi näꞌä rä ñhuni ehe de rä Noya. Mäpaya di handihu̱ hanja rä Zi Dada Jeoba di kumpli näꞌä bi promete ꞌne rꞌakägihu̱ rä Mäkä Tꞌofo, yä mfistꞌofo, rä página jw.org, yä mhuntsꞌi ꞌne yä däta mhuntsꞌi. Njabu̱, dä za gä ñunihu̱ hyaxtho ko nunä rä ñhuni xä ntꞌaxi bi ehe de rä Noya, näꞌä rꞌakägihu̱ rä nzaki ꞌne rä tsꞌe̱di.

7. ¿Por hanja xa tsamäñho mä korasohu̱? (Isaías 65:14)

⁷ Di sentihu̱ ndunthi rä johya. Nuju̱ di pe̱päbihu̱ rä Zi Dada Jeoba di mafihu̱ ko rä johya ꞌne di umbäbihu̱ njamädi po gatꞌho näꞌä di hänihu̱ de geꞌä (hñeti Isaías 65:14). ¿Por hanja xa tsamäñho mä korasohu̱? Ngeꞌä di hetihu̱ rä Mäkä Tꞌofo ꞌne di tinihu̱ näꞌä mäjuäni de Äjuä ꞌne de näꞌä xä promete dä me̱fi. ꞌNehe xtä pädihu̱ ge ko näꞌä rä te bi uni rä Hesu, rä Zi Dada Jeoba ma dä hä nꞌa rä hogä mꞌu̱i pa xudi ndämäni. ¡Hängu rä johya di sentihu̱ ora ko märꞌa yä ku di ñähu̱ de nuya yä hogä tꞌo̱tꞌe xtä pädihu̱! (Sal. 34:8; 133:​1-3).

8. ¿Por hanja rä hnini rä Zi Dada Jeoba ꞌñenä nꞌa rä paraiso?

⁸ Rä hnini rä Zi Dada Jeoba ꞌñenä nꞌa rä paraiso ngeꞌä gatꞌho ꞌmu̱i unido ꞌne di mädi nꞌa ngu mä nꞌaa. Näꞌä di nheki mäpaya, geꞌä faxkägihu̱ gä imäjinähu̱ ge xti ꞌñepu̱ rä rꞌayꞌo xiꞌmhai, gatꞌho ma dä mꞌu̱i unido ꞌne xa ma dä nja ndunthi rä mhäte (Col. 3:14). Nꞌa rä zi nju pede te bi mbeni nuꞌmu̱ po ri mu̱di bi konose yä testigo rä Jeoba. Nuni zi nju enä: «Nuga nunka xti tini rä johya nixi ha mä familia. Pe nuꞌmu̱ dä konose yä testigo rä Jeoba, dä handi hanja xa mäjuäni di mädi nꞌa ngu mä nꞌaa». Ja ngu nunä zi nju, gatꞌho toꞌo ne dä senti rä johya, pe̱ꞌtsi te dä yu̱tꞌi ꞌnehe ha nunä paraiso. Hindi mporta te dä mää yä jäꞌi de gekhu̱, di pädihu̱ ge rä Zi Dada Jeoba di nugägihu̱ xä ñho ꞌne nugägihu̱ ngu de rä familia (Is. 65:15).

9. ¿Te ma dä thogi ko gatꞌho nuꞌu̱ yä tꞌo̱tꞌe jakägihu̱ gä sufrihu̱ mäpaya? (Isaías 65:​16, 17).

 ⁹ Di pe̱ꞌtsihu̱ nꞌa rä tsaya ha mä mfenihu̱. Ha Isaías 65:14 mää ge nuꞌu̱ hinxä yu̱tꞌi ha rä hnini rä Zi Dada Jeoba, mafi po näꞌä rä u̱gi senti ha yä koraso ꞌne zoni ko rä dumu̱i. Pe, ¿te di senti yä ꞌme̱go rä Zi Dada Jeoba? ¿Te ma dä thogi ko gatꞌho nuꞌu̱ yä tꞌo̱tꞌe japäbi dä sufri mäpaya? Rä Zi Dada Jeoba di promete: «Nuꞌu̱ yä sufrimiento mi ja mä mꞌe̱tꞌo ya hinto ma dä beni. ꞌNe mä da, ya hinte mä dumu̱i ma dä hyandi» (hñeti Isaías 65:​16, 17). Hää, rä Zi Dada Jeoba ma dä japi dä mꞌe̱di gatꞌho yä sufrimiento ꞌne yä u̱gi, ꞌne ko rä tiempo asta ya nixi ma gä benihu̱ nuya yä tsꞌo tꞌo̱tꞌe.

10. Xi nuꞌi, ¿por hanja gi kamfri ge xi nꞌa rä dängä jäpi gä ꞌmu̱ihu̱ entre mä kuhu̱? (Hyandi ꞌnehe rä foto).

¹⁰ ¿Hänge mäjuäni ge ora di ntinihu̱ ha mä mhuntsꞌihu̱, di sentihu̱ nꞌa rä tsaya ha mä mfenihu̱? Hää, ora di ꞌmu̱ihu̱ entre mä kuhu̱, asta di pumfrihu̱ nuꞌu̱ yä dumu̱i di thogihu̱. Pe, ¿te dä za gä pe̱fihu̱ pa njabu̱ dä sigi dä nja nꞌa rä mꞌu̱i temäꞌentho ngu nꞌa rä paraiso? Mähyoni gä udihu̱ nuꞌu̱ yä hogä mꞌu̱i no̱ni rä Mäkä Tꞌofo, ngu rä mhäte, rä johya, nꞌa rä hogä ntsitsꞌi, rä ñhojäꞌi ꞌne rä pasensia (Gál. 5:​22, 23, TNM). ¡Xa nꞌa rä däta nsu näꞌä di pe̱ꞌtsihu̱ de gä mꞌu̱ihu̱ ha rä hnini rä Zi Dada Jeoba! Mu̱ gä sigihu̱ gä o̱thu̱ ntsꞌe̱di po gä ꞌmu̱ihu̱ ha rä hnini rä Zi Dada Jeoba ꞌne nunka gä po̱nihu̱, ma gä handihu̱ hanja ma dä kumpli rä promesa de dä hä nꞌa rä «rꞌayꞌo mähetsꞌi ꞌne nꞌa rä rꞌayꞌo xiꞌmhai».

11. ¿Te di sentihu̱ ngeꞌä di ꞌmu̱ihu̱ ha nunä paraiso xä hyoki rä Zi Dada Jeoba? (Isaías 65:​18, 19).

¹¹ Näꞌä rä johya di sentihu̱, jakägihu̱ gä umfu̱ njamädi Jeoba. Rä profeta Isaías sigi mää por hanja yä ꞌme̱go rä Zi Dada Jeoba, di pe̱ꞌtsihu̱ ndunthi yä raso pa gä sentihu̱ rä johya. Nunä paraiso habu̱ di ꞌmu̱ihu̱, go xä hyoki rä Zi Dada Jeoba (hñeti Isaías 65:​18, 19). Mäpaya, yä jäꞌi hingi tꞌuti näꞌä mäjuäni de Äjuä ꞌne ꞌñenä go yꞌo ha yä yꞌotꞌä ꞌmatha. Hänge rä Zi Dada Jeoba usagihu̱ pa gä fatsꞌihu̱ nuꞌu̱ yä zi jäꞌi dä bo̱ni de näꞌä rä yꞌotꞌä ꞌmathaꞌä ꞌne dä yu̱tꞌi ha rä hnini habu̱ di nheki nꞌa rä mꞌu̱i ngu nꞌa rä paraiso. ¡Hängu rä johya di sentihu̱ ngeꞌä di ꞌmu̱ihu̱ habu̱ tꞌudi näꞌä mäjuäni de rä Zi Dada Jeoba! Po geꞌä di ne gä xipäbihu̱ märꞌa yä jäꞌi pa dä hñäni ꞌnehe nuya yä jäpi (Jer. 31:12).

12. Xi nuꞌi, ¿te gi senti ora gi handi te mää Isaías 65:​20-24 ꞌne por hanja?

¹² Mäpaya ꞌñenä ya go di ꞌmu̱ihu̱ ha rä paraiso ngeꞌä di pe̱ꞌtsihu̱ nꞌa rä hogä ntsitsꞌi ko rä Zi Dada Jeoba, ꞌne xa di umbäbihu̱ njamädi po näꞌä xä prometegihu̱ ge ma dä me̱fi xudi ndämäni. Xi nuꞌi, ¿dä za gi imäjinä gatꞌho näꞌä ma gi hyandi ꞌne ma gi pe̱fi ha rä rꞌayꞌo xiꞌmhai? Rä Mäkä Tꞌofo enä: «Ha gehni, yä ꞌue̱ne gatꞌho ma dä te, ꞌne yä jäꞌi ya hingä ma dä nxita [ . . . ,] nuꞌu̱ ma dä hyoki  yä nguu pa go dä mꞌu̱hniꞌu̱; ꞌne nuꞌu̱ ma dä gätsꞌi yä obxi ꞌne dä zipäbi yä fruta. [ . . . ] Nuꞌu̱ hingä ma dä nzabitho nixi ma dä ꞌme̱tä yä tsꞌe̱di». Rä Zi Dada Jeoba di prometegihu̱ ge ha rä rꞌayꞌo xiꞌmhai, ma gä pe̱ꞌtsihu̱ nꞌa rä mꞌu̱i temäꞌentho, hinte mä mbidi ma dä nja, ꞌne gatꞌho näꞌä ma gä pe̱fihu̱ ma dä rꞌakägihu̱ ndunthi rä johya. Rä Zi Dada Jeoba mää te ma dä me̱fi po gekhu̱ ha rä rꞌayꞌo xiꞌmhai ora enä: «Änte dä yꞌakägi rä mfatsꞌi, nuga ma gä thädi; mientra nuꞌu̱ tobe di ñä, nuga ma gä o̱de». Ja ngu di handihu̱, rä Zi Dada Jeoba di prometegihu̱ ge ma dä rꞌakägihu̱ gatꞌho näꞌä di honihu̱ pa gä pe̱ꞌtsihu̱ ndunthi rä johya ꞌne gä ꞌmu̱ihu̱ temäꞌentho (Is. 65:​20-24; Sal. 145:16).

13. Ja ngu di handihu̱ ha Isaías 65:​25, ¿te mä mpadi xä ja ha yä bida nuꞌu̱ yä jäꞌi pe̱päbi rä Zi Dada Jeoba?

¹³ Di pe̱ꞌtsihu̱ nꞌa rä mꞌu̱i temäꞌentho ꞌne hindi tsuhu̱. Ko rä mfatsꞌi rä Zi Dada Jeoba, ndunthi yä jäꞌi nuꞌu̱ mä mꞌe̱tꞌo mi tsitsꞌi nꞌa rä mꞌu̱i xä ntsꞌo ꞌne mi porta ngu yä mboꞌni, nubye̱ xä paati yä mꞌu̱i (hñeti Isaías 65:25). Koꞌmu̱ xä bädi de rä Zi Dada Jeoba, nubye̱ xä bädi xä dominä yä mfeni ꞌne xä zopu̱ näꞌä rä mꞌu̱i xä ntsꞌo mi tsitsꞌi (Rom. 12:2; Efes. 4:​22-24). Mäjuäni ge nuju̱ di pe̱päbihu̱ rä Zi Dada Jeoba, pe dyä imperfectohu̱ ꞌne rꞌabu̱ di kometehu̱ yä error. Pe mäske njabu̱, rä Zi Dada Jeoba xä logra xä ja nꞌa rä milagro ko rä hnini: xä logra ge yä jäꞌi —de rꞌa nꞌañꞌo yä dähni de rä Xiꞌmhai— dä mꞌu̱i unido ꞌne dä mädi nꞌa ngu mä nꞌaa (Tito 2:11). Ninꞌa rä jäꞌi hinxä logra xä japäbi dä mꞌu̱i unido ꞌne dä mädi yä jäꞌi ja ngu xä logra rä Zi Dada Jeoba.

14. ¿Hanja di handihu̱ ge näꞌä mää Isaías 65:​25, geꞌä bi thogi ko nꞌa rä zi jäꞌi?

¹⁴ Pe, ¿xa mäjuäni dä za dä paati yä uso ꞌne yä mꞌu̱i yä jäꞌi? Hää. Geꞌä bi thogi nꞌa rä ñꞌo̱ho̱ näꞌä xa mrä tsꞌomꞌu̱i. Nuꞌmu̱ mi pe̱ꞌtsi 20 nje̱ya nuni ñꞌo̱ho̱, ya xki ma fadi ndunthi yä mꞌiki. ¿Por hanja? Ngeꞌä mi pe yä karro ꞌne mi komete märꞌa yä delito. Pe nuꞌmu̱ po ri mu̱di bi yꞌo̱de de rä Mäkä Tꞌofo, ꞌne bi mu̱di bi ntini ha nuꞌu̱ yä mhuntsꞌi o̱tꞌe yä testigo rä Jeoba, xa bi desia dä mꞌu̱i ꞌnehe ha nunä paraiso ꞌne dä usa rä bida pa dä me̱päbi rä Zi Dada Jeoba. Mꞌe̱fa de bi nxixtehe, njatꞌä mi handi ge xki paatä rä bida ja ngu mää Isaías 65:25. Hää, mä mꞌe̱tꞌo mi porta ngu nꞌa rä zate, pe nubye̱ xki paatä rä mꞌu̱i ꞌne xki zo̱ho̱ xki nja ngu nꞌa rä zi mänxo de̱ti.

15. ¿Te di nheki ha rä hnini rä Zi Dada Jeoba ꞌne por hanja di nehu̱ gä utihu̱ märꞌa yä zi jäꞌi de Geꞌä?

¹⁵ Ha Isaías 65:13 fu̱di enä: «Gehnä mängä rä Zi Dada Jeoba». ꞌNe ha rä versículo 25 huadi enä: «Njabu̱ enä Jeoba». Kongehnä ne dä mää ge gatꞌho näꞌä di promete rä Zi Dada Jeoba, nzäntho di kumpli (Is. 55:​10, 11). Mäpaya, ya di nheki nꞌa rä paraiso ha rä hnini rä Zi Dada Jeoba ja ngu xki promete. Mäpaya di handihu̱ ndunthi yä tsꞌo tꞌo̱tꞌe nuua ha rä Xiꞌmhai. Pe näꞌä rä mꞌu̱i temäꞌentho di tinihu̱ ha rä hnini rä Zi Dada Jeoba, ꞌñenä näꞌä rä dehe ꞌne nꞌa rä xudi di tinihu̱ ora di yꞌohu̱ ha nꞌa rä yꞌotꞌä ꞌmatha (Sal. 72:7). Po gatꞌho nuya yä jäpi di handihu̱ ha rä hnini rä Zi Dada Jeoba, di ne gä sigihu̱ gä o̱thu̱ ntsꞌe̱di po gä utihu̱ märꞌa yä jäꞌi de rä Zi Dada Jeoba, ꞌne dä me̱ꞌtsi rä oportunida de dä yu̱tꞌi ꞌnehe ha nunä paraiso (Mat. 28:​19, 20).

¿TE MÄHYONI GÄ PE̱FIHU̱ PA NJABU̱ MÄRꞌA YÄ JÄꞌI DÄ YU̱TꞌI ꞌNEHE HA NUNÄ PARAISO?

16. ¿Te japäbi yä jäꞌi dä ne dä yu̱tꞌi ha rä hnini rä Zi Dada Jeoba?

¹⁶ Kada nꞌa de gekhu̱ mähyoni gä o̱thu̱ ntsꞌe̱di po gä de̱mbäbihu̱ rä mꞌu̱i rä Zi Dada Jeoba. Njabu̱, ora dä hyandi märꞌa yä zi jäꞌi, nuꞌu̱ ꞌnehe dä ne dä ꞌñehe kongekhu̱. Rä Zi Dada Jeoba hindi obligabi yä jäꞌi dä yu̱tꞌi ha rä hnini ꞌne dä me̱päbi. Pe hää ko ndunthi rä mhäte ꞌne rä ñhojäꞌi, Jeoba uti yä jäꞌi hängu di mädi ꞌne di mbitabi dä joni Kongeꞌä (Jer. 31:3; Juan 6:44). Nuꞌu̱ yä zi mänxo jäꞌi —hindi mporta te mä mꞌu̱i xä zitsꞌi mä mꞌe̱tꞌo— ora xä zo̱ho̱ xä konose rä Zi Dada Jeoba ꞌne xä hyandi tenguꞌä rä mꞌu̱i, geꞌä xä japäbi xä mädi ndunthi ꞌne xä ne xä me̱päbi. Pe xi nuju̱ ya  di ꞌmu̱ihu̱ ha nunä paraiso, ¿te mähyoni gä pe̱fihu̱ pa njabu̱ märꞌa yä zi jäꞌi dä ne dä yu̱tꞌi ha rä hnini rä Zi Dada Jeoba?

17. ¿Te debe gä pe̱fihu̱ kada nꞌa de gekhu̱ pa njabu̱ märꞌa yä zi jäꞌi dä ne dä joni ko rä hnini rä Zi Dada Jeoba?

¹⁷ Nuju̱ ya di ꞌmu̱ihu̱ ha rä hnini rä Zi Dada Jeoba, ꞌñenä go di ꞌmu̱ihu̱ ha nꞌa rä paraiso. Pe, ¿te di debe gä pe̱fihu̱ pa njabu̱ märꞌa yä zi jäꞌi dä ne dä joni ha rä hnini rä Zi Dada Jeoba? Mähyoni gä tratahu̱ gatꞌho yä ku ko rä ñhojäꞌi ꞌne rä mhäte. Ha yä pa nuꞌu̱ yä mu̱di kristianu, po̱de rꞌa yä jäꞌi bi ntini ha nuꞌu̱ yä mhuntsꞌi mi tꞌo̱tꞌe ha Corinto. Ora bi hyandi näꞌä rä mꞌu̱i temäꞌentho mi ja ha rä mhuntsꞌi, nuꞌu̱ yä zi jäꞌi bi ꞌñenä: «Xa mäjuäni Äjuä ꞌmu̱i kongeꞌähu̱» (1 Cor. 14:​24, 25; Zac. 8:23). Mäpaya, geꞌä di nehu̱ ꞌnehe dä senti nuꞌu̱ yä zi jäꞌi di ntini ha yä mhuntsꞌi. Po geꞌä xa mähyoni gä jamäsuhu̱ nunä konseho habu̱ enä: «Ntsitsꞌihu̱ xä ñho nꞌa ngu mä nꞌaa» (1 Tes. 5:​13, TNM).

18. ¿Hanja ne rä Zi Dada Jeoba gä tratahu̱ gatꞌho mä kuhu̱ ꞌne por hanja?

¹⁸ Mähyoni gä o̱thu̱ ntsꞌe̱di po gä handihu̱ kada nꞌa mä kuhu̱ ja ngu handi rä Zi Dada Jeoba. Mänꞌa dä hogi gä handihu̱ nuꞌu̱ yä hogä mꞌu̱i pe̱ꞌtsi, hingä näꞌä hingi pe̱fi xä ñho. Mähyoni gä benihu̱ ge gatꞌho nuꞌu̱ yä uso hinxä ñho di pe̱ꞌtsihu̱, ma dä mꞌe̱di asta ha rä rꞌayꞌo xiꞌmhai. ꞌNehe, mähyoni gä o̱thu̱ ntsꞌe̱di pa ko ndunthi rä mhäte ꞌne rä ñhojäꞌi, gä hokihu̱ nuꞌu̱ yä xuñha di pe̱ꞌtsihu̱ ko märꞌaa. Hää, mähyoni gä jamäsuhu̱ nunä konseho rꞌakägihu̱ rä Mäkä Tꞌofo ora enä: «Ntratahu̱ ko rä ñhojäꞌi nꞌa ngu mä nꞌaa, ntratahu̱ ko rä mhäte ꞌne rä nhuekäte. ꞌNe ogi yꞌu̱yahu̱ gi unihu̱ rä mpumbäte» (Efes. 4:​32, TNM). Mu̱ gä pe̱fihu̱ njabu̱, nuꞌmu̱ nuꞌu̱ yä zi jäꞌi di sufri mäpaya, ma dä ne dä ꞌñehe ko rä hnini rä Zi Dada Jeoba habu̱ di nheki nꞌa rä mꞌu̱i temäꞌentho ngu nꞌa rä paraiso. a

 ¡OGI PO̱NI DE RÄ HNINI RÄ ZI DADA JEOBA!

19. a) Ja ngu di handihu̱ ha rä recuadro « Bi bo̱ni pe bä pengi», ¿te mää rꞌa yä zi ku nuꞌu̱ xki bo̱ni de rä hnini rä Zi Dada Jeoba pe ya bä pengi? b) ¿Te di debe gä mꞌu̱ihu̱ desidido gä pe̱fihu̱? (Hyandi ꞌnehe rä foto).

¹⁹ ¡Xi nꞌa rä däta nsu näꞌä di pe̱ꞌtsihu̱ de gä ꞌmu̱ihu̱ mbo ha rä hnini rä Zi Dada Jeoba ngeꞌä ꞌñenä go ya di ꞌmu̱ihu̱ ha nꞌa rä paraiso! Mäpaya mänꞌa xa mähotho nunä paraiso ꞌne mänꞌa ꞌmu̱i xi ndunthi nuꞌu̱ pe̱päbi rä Zi Dada Jeoba ja ngu nunka änte xki nheki. Hängu di umbäbihu̱ njamädi rä Zi Dada Jeoba ngeꞌä mäske di ꞌmu̱ihu̱ ha nꞌa rä Xiꞌmhai habu̱ di nheki ndunthi yä tsꞌo tꞌo̱tꞌe, Jeoba xä hyoki nꞌa rä paraiso pa nuju̱ ꞌne pa nuꞌu̱ toꞌo ne dä yu̱tꞌi. Hää, gatꞌho toꞌo tuthe de rä Noya Äjuä, toꞌo ne dä senti rä johya ꞌne nꞌa rä tsaya ha rä mfeni, ꞌne toꞌo ne dä senti seguro, mähyoni dä yu̱tꞌi ꞌnehe ha rä hnini rä Zi Dada Jeoba ꞌne nunka dä bo̱ni de gehnä. Pe, ¿te mähyoni gä pe̱fihu̱ nuju̱ ya di ꞌmu̱ihu̱ mbo ha rä hnini rä Zi Dada Jeoba? Mähyoni xa gä nsuhu̱ de rä Zithu, ngeꞌä näꞌä hyaxtho xa o̱tꞌe ntsꞌe̱di pa dä hyakägihu̱ ꞌne dä jakägihu̱ gä po̱nihu̱ de nunä paraiso habu̱ di ꞌmu̱ihu̱ (1 Ped. 5:8; Apoc. 12:9). Mähyoni xa gä o̱thu̱ ntsꞌe̱di pa hingä umbäbihu̱ rä gusto ꞌne pa gä suhu̱ nunä paraiso ꞌne njabu̱ dä sigi dä nheki mähotho, dä nheki xä ntꞌaxi ꞌne pa dä sigi dä nja rä mhäte, rä ñhojäꞌi ꞌne nꞌa rä hogä ntsitsꞌi.