1. Phaladiso ya mu nyuma idi itshi? Itshi athu ana khala gale mu phaladiso yene adi naye gutshita?

 MANGINO gudi nu phaladiso ya gifuanesa ha mavu. Phaladiso yene idi yaguzala nu athu avula ana kalagala ndaga jiabonga, athu ene adi mu guhuima gua giamatshidia. Athu ana khala mu phaladiso yene anago gutshigina guzoga muene nga hazonda. Ana tshigina nji egi athu avula angine mu phaladiso yene ya mu nyuma! a

2. Ndaga itshi ya gushimana idi phaladiso ya mu nyuma?

² Mavu awa a Satana adi azala pha nu ingonza nu umbalagaji, uvi ndaga ya gushimana idi egi, Yehowa wafugile phaladiso ya gifuanesa akombeledi enji ana khala hamoshi mu guhuima. (1 Yone 5:19; Gumo. 12:12) Tata wetu wa guzumba wana mona luholo mavu awa ana tshita athu gubola, hene wana bamba akombeledi enji hagula alandule gumukombelela nu gusuanguluga guagasue. Biblia yana monesa egi phaladiso yene ya mu nyuma idi gifua fundo dia ‘gulengela’ nu “dihia didi mu tshidiwa meya avula.” (Yesh. 4:6; 58:11) Yehowa wana kuatesa athu ana jinga mu phaladiso yene, ha gukhala mu gusuanguluga nu mu ubambi mu masugu awa a gisugishilo.​—Yesh. 54:14; 2 Tim. 3:1.

3. Mu luholo lutshi profesi idi mu Yeshaya 65 yataganesewe mu tangua dikulu?

³ Yehowa wakuatesele profete Yeshaya ha gumonesa gubonga athu adi mujinga mu phaladiso ya mu nyuma mbaaheta. Mukanda wa Yeshaya mukhapho 65 udi mumonesa gubonga guene athu mbaaheta. Thomo profesi yene yatagenesewe mu givo 537 Gutuama dia Guvualewa gua Yesu (G.G.Y). Mu tangua diene,  enya Yuda anyi abalumuine mutshima azogele mu uhiga gu Babilona, avutugile mu gifutshi giawo. Yehowa washimbigile akombeledi enji nu waakuatesele ha gulondega luko dimbo dia Yelusalema muabonga handaga diamuangewe. Waakuatesele nji ha gutunga luko tempelo hagula ibue fundo dia gukombelela mukunda nu enya Isalele.​—Yesh. 51:11; Zak. 8:3.

4. Mu luholo lutshi profesi idi mu Yeshaya 65 yana taganesewa mu masugu etu?

⁴ Profesi ya Yeshaya yatagenesewe luko mu givo 1919 Gungima dia Guvualewa gua Yesu (G.Y.), tangua akombeledi a Yehowa a mutangua dietu azogele mu uhiga wa Babilona Yakoma. Gungima phaladiso ya mu nyuma yasendesele gukoma mage-mage ha mavu. Alongeshi a Ufumu asendesele guzola mahungu avula nu gumonesa makalegelo a Uklisto. Athu anyi akhalele thomo enya khuta nu akhalele mutshita ndaga jia musonyi, “asudigile umuthu uhe-uhe wafugiwe mu gudivua nu gutshigina gua Nzambi.” (Ef. 4:24) Idi yadiago egi ndaga jiavula jiazuelele Yeshaya, mbajitagenesewa diago mu mavu ahe-ahe. Uvi mangino nji, tuana heta gubonga guavula mu phaladiso ya gifuanesa. Henyaha, tuzuelelenu luholo phaladiso yene idi gututadila nu mukunda natshi tushigo naye guzoga muene.

LUHOLO ATHU ADI MU PHALADISO YA MU NYUMA ANA GUDIVUA

5. Gifua luholo profesi idi mu Yeshaya 65:13 idi guyimonesa, ndaga jitshi jiana gutusuanguluisa mu phaladiso ya mu nyuma?

⁵ Ana khala nu sante yabonga nu ima yagudia ya mu nyuma. Profesi ya Yeshaya idi mumonesa gudisha guakoma guana khala mukatshi dia athu adi mu phaladiso ya mu nyuma nu athu adi hanze ya phaladiso yene. (Tanga Yeshaya 65:13.) Yehowa wana hana akombeledi enji ima yagasue adi nawo funu ha gukhala nu ufuta wabonga n’enji. Ha gufezegesa, tuana khala nu nyuma yenji nu Mbimbi yenji nu ima iko ya gudia ya mu nyuma hagula tuajiya ‘gudia, . . . nu gunua . . . [nu] gusuanguluga.’ (Tala nji Gumonesa 22:17.) Uvi athu anyi ashigo mu phaladiso ya mu nyuma, ‘adi nu nzala . . . , nu luhungu . . . , [nu] adi nu musonyi.’ Anago gujiya Nzambi.​—Am. 8:11.

6. Luholo lutshi mukanda wa Yowele 2:21-24 udi mumonesa ima ya gudia ya mu nyuma tuana khala nayo? Luholo lutshi tuajiya guheta gubonga mu ima yene?

⁶ Mu profesi yasonegele Yowele, watangele ima ya ndando gifua, mbuto, vinyo, nu maji a olive ha gumonesa egi Yehowa wana hana akombeledi enji ima adi nayo funu nu ima ya gudia ya mu nyuma. (Yow. 2:21-24) Ha gufezegesa, watuhanele Biblia nu mikanda yetu iko, nu site yetu nu gudibungisa gua mu hungu nu ba asamble. Gula tudi mukalegela ima yene lusugu nu lusugu, mbatuheta ngolo nu mbatukhala nu sante yabonga ya mu nyuma.

7. Ndaga itshi yana ‘gutusuanguluisa’? (Yeshaya 65:14)

⁷ Ana khala nu gusuanguluga handaga adi nu ima ana khala nayo funu. Akombeledi a Nzambi ana khala nu “gusuanguluga” handaga ana khala nu khadilo dia guhana Yehowa mersi. (Tanga Yeshaya 65:14.) Tuana ‘khala nu gusuanguluga’ handaga giamatshidia nu ndaga jialayele Nzambi jidi mu Biblia nu felela tuana khala nadio mukunda nu mulambu wa Klisto, jiana kolesa gutshigina guetu. Tangua tuana zuelela ndaga eji nu aphangi’etu Aklisto, tuana suanguluga diago!​—Ngi. 34:8; 133:1-3.

8. Makalegelo atshi mbadi athu adi mu phaladiso ya mu nyuma ana gudimonesela?

⁸ Akombeledi a Yehowa ana khala mu phaladiso ya mu nyuma handaga ana gudizumba nu ana khala mu gudivua. ‘Guzumba guene gudi gifua shinga yana gutujitshiga.’ Handaga guana gutukuatesa ha gumona luholo mbatujinga mu mavu ahe-ahe, fundo mbatudizumba muavula nu mbatujinga hamoshi gubalega mangino. (Kol. 3:14) Phangi mumoshi wa mukhetu udi mumonesa luholo lua divuile muene tangua adimonele  nu Matemue a Yehowa mbala ya thomo. Wazuelele egi: “Ngakhalelego mujiya luholo ngajiya guheta gusuanguluga mu fami yami. Ngamonele guzumba gua giamatshidia mbala ya thomo tangua ngataganele nu Matemue a Yehowa.” Muthu wagasue udi mutshigina gukhala nu gusuanguluga gua giamatshidia, nu guheta ima idi nayo muene funu, udi naye gukhala mu phaladiso ya mu nyuma. Ikhale athu a ha mavu awa ana tangijila akombeledi a Yehowa ndaga jiabola, uvi Matemue a Yehowa ana khala nu lukuma luabonga mukatshi dia fami ya Yehowa.​—Yesh. 65:15.

9. Ndaga jitshi Yeshaya 65:16, 17 idi muzuela mukunda nu malamba tudi mutagana nawo mangino?

⁹ Ana khala mu guhuima. Yeshaya 65:14 idi muzuela egi, athu ashigo mu phaladiso ya mu nyuma ‘ana dila handaga ana khala nu gikenene giakola.’ Uvi itshi tuajiya guzuela mukunda nu ndaga jiagasue jiana hana akombeledi a Nzambi lamba nu gikenene? Idi yadiago egi ndaga jiene jiagasue ‘mbaajibuita mutshima nu mbajikhala jia gusuega gu meso a Nzambi.’ (Tanga Yeshaya 65:16, 17.) Yehowa mbawumanesela malamba etu agasue, mbatushigo luko muvua gikenene mukunda nu malamba ene.

10. Mukunda natshi udi mutangiza egi gukhala hamoshi nu aphangi Aklisto gudi diago gishimbigo? (Tala nji gifuanesa.)

¹⁰ Mangino tuana gudivua mu guhuima tangua tuanaya mu gudibungisa gua mu hungu, handaga tuana balegesa tangua hamoshi nu aphangi’etu Aklisto, ngenyi tuana buita mutshima gu ndaga jia ha mavu awa jiana gutuhana gikenene. Tangua tuana monesa mabundu a nyuma ya Nzambi gifua: Guzumba, gusuanguluga, guhuiminyina, gisemo, gutuluga, tuana kuatesa aphangi’etu a mala nu a akhetu ha gudivua muabonga. (Gal. 5:22, 23) Tuana khala nu gusuanguluga luholo tudi mu ulondegi wa Nzambi! Athu adi mu phaladiso ya mu nyuma mbaamona diago gutagenesewa gua ndaga jiazuelele Nzambi egi udi mufuga “dilu dihe-dihe nu mavu ahe-ahe.”

11. Luholo lutshi tudi naye gudivua mu phaladiso ya mu nyuma yafugile Yehowa? (Yeshaya 65:18, 19)

¹¹ Ana khala nu gusuanguluga guavula. Yeshaya udi mumonesa ndaga iko idi naye gututuma ha ‘gukhala nu gusuanguluga guavula’ mu phaladiso ya mu nyuma. Yehowa walondele phaladiso yene ya gifuenesa. (Tanga Yeshaya 65:18, 19.) Hene tuanago gudihula ha gumona luholo Yehowa wana gutukalegela ha gukuatesa athu ha guzoga mu ndaga jia ha mavu awa, hagula angine mu phaladiso ya gifuanesa! Luholo tudi mu giamatshidia, tuana suanguluga muavula nu gubonga tuana heta, hene tuana longesa athu ako giamatshidia giene.​—Yel. 31:12.

12. Luholo lutshi udi gudivua mukunda nu ndaga jidi mu Yeshaya 65:20-24? Mukunda natshi?

 ¹² Tuana khala nji nu gusuanguluga ha guhana Nzambi mersi mukunda nu felela dietu handaga diana gutukuatesa ha gukhala nu ufuta wabonga n’enji. Tangiza ndaga jiagasue mbatumona nu jinyi mbatutshita mu mavu ahe-ahe! Biblia yana laya egi: ‘Ana a gitebe mbaashigo mufua . . . luko hadi ene azonda, athu agukola mbaasala nu monyo ha gutagenesa masugu awo.’ ‘Mbaatunga jinzo, mbaakhala muene, mbaakuna mashui a mabundu a vinyo, mbaadia mabundu awo.’ ‘Mbaashigo mutshita mudimo wa githuhu’ handaga ‘Yehowa Nzambi mbawashimbiga.’ Udi gutulaya egi mbatukhala mu ubambi, mbatumona gutagenesewa gua ndaga jiatulayele muene. Wazuelele egi: ‘Mbangutaya gutoga guawo gutuama egi angutamege.’ Muene mbawujiya ndaga muthu wagasue udi nayo funu nu ‘mbawutagenesa nzala jia muthu wagasue.’​—Yesh. 65:20-24; Ngi. 145:16.

13. Luholo lutshi Yeshaya 65:25 idi mumonesa usombegeshi athu akalegele tangua asendesele gukombelela Yehowa?

¹³ Ana khala mu guhuima nu mu ubambi. Nyuma ya Nzambi yakuatesele athu avula akhalele thomo mbundudi nu enya mambo ha gusombegesa. (Tanga Yeshaya 65:25.) Atshitshile ngolo ha gubemba makalegelo abola. (Roma 12:2; Ef. 4:22-24) Idi yadiago egi akombeledi a Nzambi ashigo athu atagana, hene mbatulandula gujimbila. Uvi Yehowa wana bungisa “athu a maluholo agasue” ana gumuzumba nu ana zumba athu ako. Gishina giene ana khala ha moshi mu guhuima. (Tito 2:11) Phamba Nzambi wa ngolo jiagasue wajiya gutshita ndaga eyi ya gushimana!

14. Ndaga itshi yabuidile phangi mumoshi wa yala yatagenesele Yeshaya 65:25?

¹⁴ Athu ajiya diago gusombegesa makalegelo awo ba? Tutadilenu gifezegeselo egi. Muvuala mumoshi wa yala wambiwe mu bologo ivo yavula hakhalele muene nu ivo 20, wakhalele mutshita ndaga jia musonyi muavula, wakhalele nji mbundudi. Wambiwe mu bologo handaga wakuyile gamiyo, wakhalele nji mutshita ndaga jiko jiabola diago. Wakhalele nu khadilo dia gulua itumba. Tangua diavuile muene giamatshidia gidi mu Biblia mbala ya thomo, wasendesele guya mu gudibungisa gua mu hungu. Watshiginyile diago egi waheta felela mu monyo wenji, yakotelesa egi gukombelela Yehowa mu phaladiso ya mu nyuma. Gungima dia gubatijiwa guenji, wakhalele mutangigiza luholo luajiya muene gukalegela mbimbi jidi mu Yeshaya 65:25. Wasombegesele makalegelo enji, gakhalelego luko mbundudi uvi wabuile gifua gimeme, yakotelesa egi muthu wa huiminyina.

15. Mukunda natshi tudi naye gutamega athu ako ha gungina mu phaladiso ya mu nyuma? Luholo lutshi tuajiya guyitshita?

¹⁵ Yeshaya 65:13 idi musendesa egi: ‘Yehowa Fumu Wabalega Gukoma udi muzuela egi.’ Verse 25 idi musugisa egi: ‘Yehowa wazuela.’ Tangua diagasue wana tagenesa ndaga jiana laya muene. (Yesh. 55:10, 11) Phaladiso ya mu nyuma idi diago ndaga ya giamatshidia. Yehowa walondele fami ya akombeledi enji. Fami yene yana khala diago yagudisha nu fami jiko. Mukatshi dia fami yene, tuana khala mu guhuima nu mu ubambi ha mavu awa a khuta. (Ngi. 72:7) Hene tuana kuatesa athu avula ha gungina mu fami yetu ya Aklisto. Tuajiya guyitshita gula tudi gudihana muavula ha gubuisa athu alandudi.​—Mat. 28:19, 20.

LUHOLO TUAJIYA GUNANA ATHU AKO MU PHALADISO YA MU NYUMA

16. Itshi yajiya gukuatesa athu ako ha gungina mu phaladiso ya mu nyuma?

¹⁶ Muthu wagasue mukatshi dietu, udi nu ginemo gia gunana athu ako mu phaladiso ya  mu nyuma. Tuajiya guyitshita gula tudi mulandula gifezegeselo gia Yehowa. Handaga muene ganago shinjiga athu ha gungina mu ulondegi wenji. Uvi wana ‘nana’ athu gudi muene nu gisemo giagasue. (Yone 6:44; Yel. 31:3) Athu adi nu mitshima yatagana, ana longuga ndaga jiavula jiatadila guzumba gua Yehowa nu makalegelo enji ako abonga, ana suena gudi muene. Luholo lutshi makalegelo etu abonga ajiya gunana athu ako mu phaladiso ya mu nyuma?

17. Luholo lutshi tuajiya gunana athu ako mu phaladiso ya mu nyuma?

¹⁷ Gula tudi mukalegela aphangi’etu Aklisto ndaga nu guzumba nu gisemo, tuajiya gunana athu ako mu phaladiso ya mu nyuma. Gula athu aza mbala ya thomo mu gudibungisa gua mu hungu, tuana tshita yagasue hagula adivue gifua muadivile athu anyi ayile mu gudibungisa mu dimbo dia Kolinto. Azuelele egi: “Nzambi udi diago mukatshi dienu.” (1 Kol. 14:24, 25; Zak. 8:23) Hene, tudi naye gulandula gukalegela longo didi muzuela egi: “Khalenu mu guhuima nu athu ako.”​—1 Tes. 5:13.

18. Itshi yajiya gunana athu ako mu ulondegi wetu?

¹⁸ Tudi naye gutadila aphangi’etu Aklisto gifua luholo Yehowa wana guatadila. Tuajiya guyitshita gula tudi mutala makalegelo awo abonga uvi gubola guawo ndo, handaga mu mavu ahe-ahe mbaabua athu atagana. Gula ndaga imoshi yatukatula guhuima nu aphangi, tudi naye gutshita ngolo ha guyimanesela nu guzumba guagasue nu ‘gudimonesela mutshima wabonga, nu gudivila khenda nu guditotesela nu mutshima umoshi.’ (Ef. 4:32) Ngenyi, athu ana tshigina nji egi a akalegele ndaga nu guzumba mbaangina mu phaladiso ya mu nyuma. b

 KHALA MUKATSHI DIA PHALADISO YA MU NYUMA

19. a) Gifua luholo galuanda “ Athu Azogele nu Avutugile mu Phaladiso ya mu Nyuma” gadi guyimonesa, itshi athu ako azuelele tangua avutugile? b) Desizio ditshi tudi naye guzula? (Tala nji gifuanesa.)

¹⁹ Tudi muhana Nzambi mersi mukunda nu phaladiso yetu ya mu nyuma! Mangino phaladiso yene idi yabonga diago nu idi nu akombeledi a Yehowa avula gubalega luholo yakhalele thomo. Mukut’etu agasue, tulandulenu guhana Yehowa mersi handaga walondele phaladiso ya mu nyuma mukunda nu esue. Muthu wagasue udi mutshigina guheta ima ya gudia ya mu nyuma, gusuanguluga, guhuima, ubambi, udi naye gungina mu phaladiso ya mu nyuma nu gusala muene mayilago! Uvi tudi naye gumonesa gutema handaga Satana wana tshita ngolo ha gutukatula mu phaladiso yene. (1 Phet. 5:8; Gumo. 12:9) Tushigo naye gumuhana njila ha gubinga. Tutshitenu ngolo hagula phaladiso ya mu nyuma ikhale yabonga, yaphelegeta nu fundo dia guhuima.