1.‏ روحانی فردوس کیہہ اے تے سانوں کیہہ کرن دا ارادہ کرنا چاہی دا اے؟‏

 اَج زمین تے اِک ایہو جیہا فردوس اے جدے چ لکھاں لوک رہ رہے نیں۔ ایہہ لوک آپس چ مِل‌جُل کے رہ رہے نیں تے چنگے کم کر رہے نیں۔ ایس فردوس چ رہن والے لوکاں نے ارادہ کیتا ہویا اے کہ اوہ کدی وی ایہنوں چھڈ کے نئیں جان گے۔ نالے اوہ ایہہ وی چاہندے نیں کہ ہور لوک وی ایس فردوس چ آن۔ ایہہ کیہڑا فردوس اے؟ ایہہ روحانی فردوس اے۔‏ a

2.‏ روحانی فردوس دی سب توں خاص گل کیہہ اے؟‏

² ایہہ بڑی حیرانی دی گل اے کہ یہوواہ نے ایس خطرناک تے نفرت نال بھری دُنیا چ اِک ایہو جیہا ماحول بنایا ہویا اے جدے چ اوہدے بندے اِک دُوجے نال بڑے پیار تے صلح صفائی نال رہ رہے نیں۔(‏1-‏یوحنا 5:‏19؛‏ مُکاشفہ 12:‏12‏)‏ ساڈا پیار کرن والا خدا ایہہ ویکھ رہیا اے کہ شیطان دی دُنیا چ لوکاں نُوں کِنّاں زیادہ نقصان تے دُکھ پونچ رہیا اے۔ پر اوہنے اپنے بندیاں نُوں اِک ایہو جہے محفوظ ماحول چ رکھیا اے جتھے اوہ خوشی نال اوہدی عبادت کر سکدے نیں۔ اوہدے کلام چ روحانی فردوس بارے دَسیا گیا اے کہ ایہہ اِک پناہ دی جگہ ہون دے نال نال اِک ہرے بھرے باغ وانگوں وی اے۔ (‏یسعیاہ 4:‏6؛‏ 58:‏11‏)‏ ایس فردوس چ رہن والے لوکاں تے یہوواہ دی برکت اے۔ ایس لئی اوہ ایس آخری زمانے چ آن والیاں مشکلاں دے باوجود خوش رہندے نیں تے اپنے آپ نُوں محفوظ محسوس کردے نیں۔—‏یسعیاہ 54:‏14؛‏ 2-‏تیمُتھیُس 3:‏1‏۔‏

3.‏ یسعیاہ 65 باب چ لکھی پیشین‌گوئی پہلی وار کیویں پوری ہوئی؟‏

³ یہوواہ نے اپنے نبی یسعیاہ دے ذریعے دَسیا کہ روحانی فردوس چ رہن والیاں لئی ماحول کیہو  جیہا ہوئے گا۔ ایس پیشین‌گوئی بارے یسعیاہ 65 باب چ دَسیا گیا اے۔ ایہہ پہلی وار اوہدوں پوری ہوئی جدوں یہودی 537 قبل‌ازمسیح چ بابل دی غلامی چوں آزاد ہوئے تے اپنے ملک واپس آئے۔ یہوواہ نے اپنے بندیاں دی مدد کیتی تاکہ اوہ شہر یروشلم نُوں فیر توں خوب‌صورت بنا دین جیہڑا بالکل تباہ ہو گیا سی تے ہیکل نُوں وی بنان تاکہ اوتھے یہوواہ دی عبادت فیر توں شروع ہو سکے۔—‏یسعیاہ 51:‏11؛‏ زِکریاہ 8:‏3‏۔‏

4.‏ یسعیاہ 65 باب چ لکھی پیشین‌گوئی اَج ساڈے زمانے چ کیویں پوری ہو رہی اے؟‏

⁴ یسعیاہ 65 باب چ لکھی پیشین‌گوئی دُوجی وار 1919 چ پوری ہونی شروع ہوئی۔ اوس ویلے یہوواہ دے بندے وڈے بابل دی غلامی توں آزاد ہوئے۔ اِنج روحانی فردوس ساڈے زمانے چ قائم ہویا تے ہولی ہولی ودھدا گیا۔ خدا دے بندے جوش نال مُنادی کرن لگ پئے جدی وجہ توں بوہت ساریاں کلیسیاواں بنیاں تے ایہناں چ موجود مسیحی روح دا پھل ظاہر کرن لگ پئے۔ جیہڑے لوک پہلے بوہت ظالم سن تے بھیڑے کم کردے سن، اوہناں نے اوس ”‏نوِیں شخصیت نُوں پا لیا جیہڑی خدا دی مرضی دے مطابق ڈھالی گئی اے۔“‏ (‏اِفِسیوں 4:‏24‏)‏ سچ اے کہ یسعیاہ نبی نے پیشین‌گوئی چ جیہڑیاں برکتاں دا ذکر کیتا، اوہنوں وچوں بوہت ساریاں مستقبل چ نوِیں دُنیا چ مِلن گیاں۔ پر یہوواہ اَج وی سانوں بوہت ساریاں برکتاں دے رہیا اے۔ آؤ ویکھئے کہ روحانی فردوس چ رہندے ہوئیاں سانوں کیہڑے فائدے ہو رہے نیں تے سانوں کدی وی ایہنوں چھڈ کے کیوں نئیں جانا چاہی دا۔‏

روحانی فردوس چ رہن والے کیہو جیہا محسوس کردے نیں؟‏

5.‏ یسعیاہ 65‏:‏13چ لکھے وعدے دے مطابق روحانی فردوس چ رہن والے لوکاں نوں کیہڑیاں برکتاں مِل رہیاں نیں؟‏

⁵ صحت‌مند تے تازہ دم۔‏ یسعیاہ نبی دی پیشین‌گوئی چ صاف صاف دَسیا گیا اے کہ روحانی فردوس چ رہن والیاں دی زندگی کیہو جہی ہوئے گی تے ایہدے توں باہر رہن والیاں دی زندگی کیہو جہی ہوئے گی۔ ‏(‏یسعیاہ 65:‏13 نُوں پڑھو۔)‏ یہوواہ اپنے بندیاں نُوں ہر اوہ شے دے رہیا اے جدی مدد نال اوہ اوہدے نیڑے رہ سکدے نیں۔ اوہنے سانوں اپنی پاک روح تے اپنا کلام دِتا اے۔ ایہدے علاوہ اوہنے سانوں ڈھیر سارا روحانی کھانا وی دِتا اے جنہوں اَسی کھانے پینے آں تے ایہدے توں خوش ہُنے آں۔ (‏مُکاشفہ 22:‏17 تے غور کرو۔)‏ پر جیہڑے لوک روحانی فردوس توں باہر نیں، اوہ بُھکھے تے پیاسے نیں تے شرمندگی دا سامنا کردے نیں کیونکہ اوہناں نُوں پاک کلام دی تلیم نئیں مِل رہی تے اوہ خدا نُوں نئیں جان دے۔—‏عاموس 8:‏11‏۔‏

6.‏ یُوایل 2:‏21-‏24 دے مطابق یہوواہ نے سانوں کیہڑیاں نعمتاں دِتیاں نیں تے اَسی اوہناں توں کیویں فائدہ حاصل کر سکنے آں؟‏

⁶ یُوایل نبی نے اِک پیشین‌گوئی چ زندگی دِیاں کجھ بنیادی چیزاں بارے دَسیا جیویں کہ اناج، مے تے تیل۔ ایہدے توں ظاہر ہوندا اے کہ یہوواہ اپنے بندیاں نُوں دل کھول کے اوہ چیزاں دیندا اے جنہاں دی اوہناں نُوں لوڑ اے۔ ایہناں چیزاں چ روحانی کھانا وی شامل اے۔ (‏یُوایل 2:‏21-‏24)‏ یہوواہ سانوں ایہہ روحانی کھانا اپنے کلام، ایہدے توں تیار ہون والیاں کتاباں تے ویڈیوز، ساڈی ویب‌سائٹ تے ساڈیاں عبادتاں تے کنونشناں دے ذریعے دیندا اے۔ اَسی ہر روز ایہناں چیزاں توں فائدہ حاصل کر سکنے آں۔ اِنج اَسی تازہ‌دم محسوس کرنے آں کیونکہ اَسی یہوواہ دے ہور نیڑے ہو جانے آں۔‏

7.‏ کیہڑیاں گلاں دی وجہ توں سانوں دِلوں خوشی مِلدی اے؟ (‏یسعیاہ 65:‏14‏)‏

⁷ خوش تے مطمئن۔‏ یہوواہ دے بندے دل دی خوشی نال گاندے نیں کیونکہ اوہناں دے دل شکرگزاری نال بھرے ہوئے نیں۔ ‏(‏یسعیاہ 65:‏14 نُوں پڑھو۔)‏ اَسی ایس لئی دِلوں خوش رہنے آں کیونکہ پاک کلام چ لکھیاں سچائیاں توں ساڈا ایمان مضبوط ہوندا اے۔ ایہدے چ لکھے وعدیاں توں سانوں تسلی مِلدی اے تے یسوع مسیح دی قربانی دی وجہ توں سانوں پکی امید مِلدی اے۔ اپنے بھین بھراواں نال ایہناں ساریاں چیزاں بارے گل کر کے سانوں بڑی خوشی مِلدی اے۔—‏زبور 34:‏8؛‏ 133:‏1-‏3‏۔‏

8.‏ روحانی فردوس دِیاں دو خاص گلاں کیہڑیاں نیں؟‏

⁸ یہوواہ دے بندے اِک دُوجے نال پیار کردے نیں تے اوہناں دا  ایکا بڑا مضبوط اے۔ ایہناں دو گلاں دی وجہ توں ساڈا روحانی فردوس بوہت خاص اے۔ ایس پیار تے ایکے نُوں ویکھ کے اندازہ ہوندا اے کہ نوِیں دُنیا چ اوہناں دا ایکا تے پیار دا بندھن ہور مضبوط ہوئے گا۔ (‏کُلسّیوں 3:‏14‏)‏ اِک بھین نے دَسیا کہ جدوں اوہ پہلی وار یہوواہ دے گواہواں دی عبادت چ آئی تے اوہنوں کیہو جیہا لگیا۔ اوہنے کہیا:‏ ”‏مینوں تے پتہ ای نئیں سی کہ مَیں خوش کیویں رہ سکنی آں خاص طور تے اپنے گھر والیاں نال۔جدوں مَیں یہوواہ دے گواہواں نال مِلی تے مَیں پہلی وار ویکھیا کہ محبت اصل چ وکھائی کیویں جاندی اے۔“‏ روحانی فردوس چ آن نال ای اِک بندے نُوں سچی خوشی تے اِطمینان مِل سکدا اے۔ دُنیا دے لوک یہوواہ دے گواہواں بارے بھانویں جو مرضی کہن، پر یہوواہ نے اپنے بندیاں نُوں عزت بخشی اے تے اوہناں نُوں اپنے خاندان چ شامل کیتا اے۔—‏یسعیاہ 65:‏15‏۔‏

9.‏ یسعیاہ 65:‏16‏، 17چ کیہہ وعدہ کیتا گیا اے؟‏

⁹ دِلی سکون۔‏ یسعیاہ 65:‏14 چ دَسیا گیا اے کہ جیہڑے لوک روحانی فردوس چ نئیں آنا چاہندے، اوہ دُکھ دی وجہ توں رون گے تے مایوسی نال وین پان گے۔ پر خدا اوہناں دُکھاں تے تکلیفاں بارے کیہہ کرے گا جنہاں دا سامنا اَج اوہدے بندیاں نُوں ہوندا اے؟ پاک کلام چ وعدہ کیتا گیا اے کہ یہوواہ ساڈیاں تکلیفاں تے مصیبتاں نُوں ختم کر دَوے گا تے وقت آن تے ساڈے ذہناں وچوں بھیڑیاں یاداں نُوں مٹا دے گا۔—‏یسعیاہ 65:‏16، 17 نُوں پڑھو۔‏

10.‏ جدوں تُسی بھین بھراواں نال ہوندے او تے توانوں کیہو جیہا لگدا اے؟ (‏تصویر نُوں وی ویکھو۔)‏

¹⁰ عبادتاں تے جا کے سانوں دِلی سکون مِلدا اے تے اَسی شیطان دی دُنیا وَلّوں مِلن والے دُکھاں تکلیفاں نُوں بُھل جانے آں۔ جدوں اَسی خدا دی پاک روح دے پھل چ شامل خوبیاں جیویں کہ محبت، خوشی، اِطمینان، مہربانی تے نرمی ظاہر کرنے آں تے اَسی روحانی فردوس دے ماحول نُوں پُر سکون بنا رہے ہُنے آں۔ (‏گلتیوں 5:‏22، 23‏)‏ یہوواہ دی تنظیم دا حصہ ہونا ساڈے لئی اِک بڑی وڈی برکت اے۔ جیہڑے لوک روحانی فردوس چ رہن گے، اوہ نویں اسمان تے نوِیں زمین بارے یہوواہ دے وعدے نُوں پورا ہوندیاں ویکھن گے۔‏

11.‏ یسعیاہ 65:‏18، 19 دے مطابق یہوواہ نے جیہڑا روحانی فردوس بنایا اے، اوہدے بارے سانوں کیہو جیہا محسوس کرنا چاہی دا اے؟‏

¹¹ شکرگزاری۔‏ یسعیاہ نبی نے ایہہ وی دَسیا کہ سانوں روحانی فردوس چ رہندے ہوئیاں خوش ہونا چاہی دا اے کیونکہ ایہنوں یہوواہ نے بنایا اے۔ ‏(‏یسعیاہ 65:‏18، 19 نُوں پڑھو۔)‏ یہوواہ ساڈے ذریعے لوکاں دی مدد کر رہیا اے تاکہ اوہ شیطان دی دُنیا نُوں چھڈ کے ایہدا حصہ بنن کیونکہ روحانی فردوس توں باہر خدا بارے سچائی نئیں سکھائی جاندی۔ پر اَسی اوہناں برکتاں لئی بڑے شکرگزار آں جیہڑیاں سچائی سکھن نال سانوں مِلیاں نیں تے ساڈی ایہہ دِلی خواہش اے کہ اَسی ایہہ سچائیاں دُوجیاں نُوں وی سکھائیے۔—‏یرمیاہ 31:‏12‏۔‏

12.‏ یسعیاہ 65:‏20-‏24 چ جیہڑے وعدیاں دا ذکر کیتا گیا اے، اوہناں بارے توانوں کیہو جیہا محسوس ہوندا اے تے کیوں؟‏

 ¹² روحانی فردوس دا حصہ بنن نال سانوں جیہڑی امید مِلی اے اوہدے لئی اَسی بڑے شکرگزار آں۔ ذرا سوچو کہ نوِیں دُنیا چ زندگی کِنّی شاندار ہوئے گی!‏ بائبل چ وعدہ کیتا گیا اے کہ اوتھے کوئی ایہو جیہا بچہ نئیں ہوئے گا جیہڑا تھوڑے دِناں لئی جئے تے کوئی ایہو جیہا وڈیرا نئیں ہوئے گا جیہڑا اپنی عمر پوری نہ کرے۔ اَسی گھر بنانواں گے تے اوہناں چ وَساں گے۔ اَسی باغ لاواں گے تے اوہناں دا پھل کھانواں گے۔ساڈی محنت ضائع نئیں ہوئے گی کیونکہ اَسی یہوواہ دے مبارک لوک ہوواں گے۔ یہوواہ نے سانوں ایہو جہی زندگی دین دا وعدہ کیتا اے جدے چ کوئی ڈر نئیں ہوئے گا سگوں خوشیاں ای خوشیاں ہون گیاں۔ ساڈی زندگی دا اِک مقصد ہوئے گا۔ ساڈے منگن توں پہلاں ای یہوواہ نُوں پتہ ہوئے گا کہ سانوں کیہڑیاں شیواں دی لوڑ اے تے اوہ ہر جاندار دی خواہش پوری کرے گا۔—‏یسعیاہ 65:‏20-‏24؛‏ زبور 145:‏16‏۔‏

13.‏ جدوں لوک یہوواہ دی خدمت کرنی شروع کردے نیں تے یسعیاہ 65:‏25 دے مطابق اوہ اپنی زندگی چ کیہڑیاں تبدیلیاں کردے نیں؟‏

¹³ صلح پسند تے محفوظ۔‏ خدا دی پاک روح دی مدد نال ایہو جہے بوہت سارے لوکاں نے اپنیاں زندگیاں چ تبدیلیاں کیتیاں نیں جیہڑے پہلاں بڑے ظالم تے بے‌ایمان ہوندے سن۔ ‏(‏یسعیاہ 65:‏25 نُوں پڑھو۔)‏ اوہناں نے اپنیاں بھیڑیاں عادتاں نُوں چھڈن لئی سخت محنت کیتی اے۔ (‏رومیوں 12:‏2؛‏ اِفِسیوں 4:‏22-‏24‏)‏ ایہہ سچ اے کہ اپنی زندگی چ تبدیلیاں کرن دے بعد خدا دے بندے گُناہ توں پاک نئیں ہو جاندے سگوں اوہناں کولوں غلطیاں ہوندیاں رہندیاں نیں۔ (‏طِطُس 2:‏11‏)‏ پر یہوواہ نے ہر طرحاں دے لوکاں نُوں محبت تے صلح دے بندھن چ بنھ دِتا اے۔ ایہہ معجزہ صرف ساڈا طاقتور خدا یہوواہ ای کر سکدا اے۔‏

14.‏ یسعیاہ 65:‏25 چ لکھی گل اِک بھرا بارے کیویں سچ ثابت ہوئی؟‏

¹⁴ کیہہ لوک واقعی اپنے آپ نُوں بدل سکدے نیں؟ ایس بارے ذرا اِک بھرا دی مثال تے غور کرو۔ جدوں اوہ جوان سی تے اوہ کئی وار جیل گیا تے 20 سال دی عمر تک اوہ بڑا ظالم تے بدکار انسان بن گیا۔ اوہنوں گڈیاں چوری کرن، ڈاکے پان تے ایہو جہے کئی ہور وڈے وڈے جرم کرن دی وجہ توں جیل چ پایا گیا۔ اوہ نکی نکی گل تے لڑن نُوں پیندا سی۔ جدوں اوہنے پہلی وار پاک کلام دِیاں سچائیاں بارے سکھیا تے عبادتاں تے جان لگ پیا تے اوہنوں پکا یقین ہو گیا کہ اوہنوں زندگی دا مقصد مِل گیا اے تے اوہ اِک محفوظ ماحول چ آ گیا اے۔ بپتسمہ لین توں بعد اوہنوں اِنج لگیا کہ یسعیاہ 65:‏25 چ لکھی گل اوہدے ای بارے اے۔ اِک طرحاں نال اوہ خطرناک شیر توں بدل کے اِک معصوم بھیڈ بن گیا یعنی اوہ بڑا ای صلح پسند تے پیار کرن والا بن گیا۔‏

15.‏ اَسی دُوجیاں نُوں روحانی فردوس چ آن دی دعوت کیوں دینے آں تے اَسی اِنج کیویں کرنے آں؟‏

¹⁵ یسعیاہ 65:‏13 دے شروع چ ایہہ کہیا گیا اے:‏ یہوواہ خدا ایہہ فرماندا اے۔ نالے 25 ایت دے آخر چ ایہہ کہیا گیا اے:‏ یہوواہ فرماندا اے۔ یہوواہ دی کہی ہر گل پتھر تے لکیر ہوندی اے۔ (‏یسعیاہ 55:‏10، 11‏)‏ اوہنے روحانی فردوس نُوں قائم کرن دا وعدہ کیتا سی جیہڑا قائم ہو گیا اے۔ یہوواہ نے اِک ایہو جیہا خاندان بنایا اے جیہڑا بوہت ای انوکھا اے۔ ایس خاندان دا حصہ ہون دی وجہ توں اَسی اِک دُوجے نال صلح صفائی نال رہن دی پوری کوشش کرنے آں تے ظلم نال بھری ایس دُنیا چ وی اپنے آپ نُوں محفوظ محسوس کرنے آں۔ (‏زبور 72:‏7‏)‏ ایہناں ای گلاں دی وجہ توں اَسی زیادہ توں زیادہ لوکاں دی مدد کرنا چاہنے آں کہ اوہ وی ایس خاندان دا حصہ بنن۔ ایس لئی اَسی شاگرد بنان دے کم چ ودھ چڑھ کے حصہ لینے آں۔—‏متی 28:‏19، 20‏۔‏

اَسی دُوجیاں نُوں روحانی فردوس چ کیویں لیا سکنے آں؟‏

16.‏ کیس گل دی وجہ توں لوک روحانی فردوس چ آ رہے نیں؟‏

¹⁶ اَسی سارے روحانی فردوس دی خوبصورتی نُوں ودھان چ اپنا اپنا حصہ پا رہے آں۔ ایسے خوب‌صورتی دی وجہ توں لوکاں دا دل کردا اے کہ اوہ وی ایہدے چ آن۔ یہوواہ دی مثال تے عمل کرن نال اَسی اپنے ایس کم نُوں ہور چنگی طرحاں کر سکنے آں۔ یہوواہ کدی وی کسے نُوں زبردستی  اپنی تنظیم چ نئیں لیاندا۔ ایہدی بجائے اوہ بڑے پیار نال لوکاں نُوں اپنے وَل کھچدا اے۔ (‏یوحنا 6:‏44؛‏ یرمیاہ 31:‏3‏)‏ جدوں نیک دل لوک یہوواہ دِیاں شاندار خوبیاں بارے جان جاندے نیں تے اوہ اوہنوں پیار کرن لگ پیندے نیں تے اوہدے وَل کِھچے آندے نیں۔ اَسی لوکاں دی مدد کیویں کر سکنے آں تاکہ اوہ وی روحانی فردوس چ آ جان؟‏

17.‏ اَسی کیہہ کر سکنے آں تاکہ لوک روحانی فردوس چ آ جان؟‏

¹⁷ دُوجیاں نُوں روحانی فردوس چ لیان دا اِک طریقہ ایہہ وے کہ اَسی اپنے ہم‌ایماناں نال پیار تے مہربانی نال پیش آئیے۔ جدوں کوئی بندہ ساڈیاں عبادتاں تے آندا اے تے اوہنوں کیہو جیہا محسوس ہونا چاہی دا اے؟ اَسی چاہنے آں کہ اوہ وی بالکل اوہو جیہا محسوس کرے جیہو جیہا کُرنتھس چ رہن والے اوہناں غیرایمان لوکاں نے محسوس کیتا جیہڑے شاید مسیحیاں دی عبادت چ گئے سن۔ اوہناں نے کہیا کہ خدا واقعی تواڈے درمیان اے۔ (‏1-‏کُرنتھیوں 14:‏24، 25؛‏ زِکریاہ 8:‏23‏)‏ آؤ اَسی سارے ایس نصیحت تے عمل کردے رہیے کہ اَسی اِک دُوجے نال پیار تے صلح نال رہواں گے۔—‏1-‏تھسلُنیکیوں 5:‏13‏۔‏

18.‏ کیہڑی چیز لوکاں دے دل چ ساڈی تنظیم دا حصہ بنن دی خواہش پیدا کر سکدی اے؟‏

¹⁸ سانوں ہمیشاں اپنے بھین بھراواں نُوں یہوواہ دی نظر نال ویکھنا چاہی دا اے۔ اَسی اِنج کیویں کر سکنے آں؟ اوہناں دِیاں خوبیاں تے دھیان دین نال خامیاں تے نئیں کیونکہ خامیاں آخرکار ختم ہو جان گیاں۔ جے کسے گل دی وجہ توں ساڈی اپنے کسے بھین بھرا نال اَن‌بن ہو گئی اے تے سانوں پیار نال ایس مسئلے نُوں حل کرنا چاہی دا اے۔ ایس معاملے چ سانوں اِک دُوجے نال پیار تے بڑی ہمدردی نال پیش آنا چاہی دا اے تے دِلوں اِک دُوجے نُوں معاف کرنا چاہی دا اے۔ (‏اِفِسیوں 4:‏32‏)‏ ایس طرحاں اوہناں لوکاں دے دل چ ساڈی تنظیم دا حصہ بنن دی خواہش پیدا ہوئے گی جیہڑے پیار تے محبت لئی ترسدے نیں۔‏ b

 روحانی فردوس چ رہوو

19.‏ (‏الف)‏جیویں کہ بکس ‏”‏ اوہ واپس آ گئے‏“‏ چ دَسیا گیا اے، کجھ لوکاں نے روحانی فردوس چ واپس آن دے بعد کیہہ کہیا؟ (‏ب)‏ ساڈا کیہہ ارادہ ہونا چاہی دا اے؟ (‏تصویر نُوں وی ویکھو۔)‏

¹⁹ روحانی فردوس یہوواہ وَلّوں اِک بڑی خاص نعمت اے۔ ایہہ فردوس پہلے نالوں وی کِتے زیادہ سوہنا ہو گیا اے تے ہُن ایہدے چ یہوواہ دی وڈیائی کرن والیاں دی تعداد ہور زیادہ ودھ گئی اے۔ دُعا اے کہ اَسی ایس فردوس لئی یہوواہ دے ہمیشاں شکرگزار رہیے جنہے ایہنوں ساڈے لئی بڑے پیار نال بنایا اے۔ جیہڑا وی انسان تازہ دم، مطمئن، پُرسکون تے محفوظ رہنا چاہندا اے، اوہنوں ایس روحانی فردوس چ آنا چاہی دا اے تے فیر کدی وی ایہنوں چھڈ کے نئیں جانا چاہی دا۔ پر سانوں خبردار رہنا چاہی دا اے کیونکہ شیطان بڑی کوشش کردا اے تاکہ اوہ کسے نہ کسے طریقے نال سانوں ایس روحانی فردوس چوں باہر لے آئے۔ سانوں کدی وی شیطان نُوں کامیاب نئیں ہون دینا چاہی دا۔ (‏1-‏پطرس 5:‏8؛‏ مُکاشفہ 12:‏9‏)‏ آؤ اَسی پکا ارادہ کرئیے کہ اَسی ایس فردوس دی خوبصورتی، پاکیزگی تے سکون نُوں ہمیشاں قائم رکھاں گے۔‏