1. Eaa te parataito pae vaerua, e eaa ta tatou ka anoanoia kia rave?

 E PARATAITO tetai i te enua nei tei kī i te tangata e rave ra i te au angaanga memeitaki. E mirioni ua atu ia ratou tei rekareka i te ’au. Kua iki teia aronga auraka e akaruke i teia parataito. Kua inangaro katoa ratou i te au tangata ravarai kia piri mai kia ratou. Eaa teia turanga meitaki? Ko te parataito pae vaerua! a

2. Eaa te mea umere no runga i te parataito pae vaerua?

² Ma te umere, kua akanoo a Iehova i tetai turanga ’au e te taokotai no tona iti tangata noatu tei roto ratou i te ao kino o Satani. (1 Ioa. 5:19; Apo. 12:12) Te kite maira to tatou Atua i te au kino e tupu nei e kua oronga mai aia i te ’au kia tupu ruperupe tatou i te pae vaerua. Te akamārama maira tana Tuatua i te parataito pae vaerua ei “akapuanga” e mei “te kainga tamauu meitakiia ki te vai.” (Isa. 4:6; 58:11) Ma te akameitakianga a Iehova, ka mataora e ka tinamou te oraanga o te aronga i roto i teia parataito, noatu te ngatā o teia tuatau openga.—Isa. 54:14; 2 Timo. 3:1.

3. Eaa te tupuanga mua no Isaia pene 65?

³ Na roto i te peroveta ko Isaia, kua akamārama mai a Iehova i te turanga oraanga o te aronga e noo ra i  te parataito pae vaerua. Ka kitea teia i roto ia Isaia pene 65, tei akatupuia i te 537 M.T.N. I te reira tuatau, kua akarangatiraia te au ngati Iuda tei tataraara mei ia Babulonia e kua oki ki to ratou enua. Kua akameitaki a Iehova i tona iti tangata e kua tauturu ia ratou kia akamanea i te oire o Ierusalema e kia akanoo akaou i te akamorianga mou i Iseraela.—Isa. 51:11; Zeka. 8:3.

4. Eaa te tupuanga rua no Isaia pene 65?

⁴ Te rua o te tupuanga o te totou a Isaia, kua matara mai te iti tangata o Iehova mei te tuikaa o Babulonia Maata i te 1919 T.N. Aru mai kua totoa te parataito pae vaerua ki te ao katoa. E maata te au putuputuanga tei maroiroi i te tutu aere i te Patireia e kua akaari katoa ratou i te au tu Kerititiano. Kua rauka i te au tane e te au vaine e tu kino e te rikarika to ratou i mua ana i te ‘akatangata ou ia ratou kia tau i te Atua.’ (Ephe. 4:24) E tika, ka akatupuia te katoa anga o ta Isaia i totou a te tuatau ki mua. Noatu ra, te puapingaia nei tatou i teia tuatau. Ka uriuri tatou akapeea teia parataito pae vaerua me tauturu ia tatou e te tumu auraka tatou e akaruke i te reira.

ORAANGA I ROTO I TE PARATAITO PAE VAERUA

5. Ia Isaia 65:​13, eaa ta tatou e rekareka ra i roto i te parataito pae vaerua?

⁵ Oraanga matutu e te maroiroi. Te akataka maira ta Isaia totou i te tuke i te oraanga o te aronga i roto i te parataito pae vaerua e te aronga i vao ake. (E tatau ia Isaia 65:13.) Kua oronga ua mai a Iehova i te au mea pae vaerua ki tona aronga akamori. Kua rauka ia tatou tona vaerua tapu, tana Tuatua, e te au kai pae vaerua kia “kai, . . . e inu, . . . [e kia] rekareka” tatou. (Akaaiteia kia Apokalupo 22:17.) Kareka te aronga i vao ake i te parataito pae vaerua ka “pongi [ratou] . . . , ka mate i te kaki vai . . . , [e] ka akama.” Kare o ratou pirianga ki te Atua.—Amo. 8:11.

6. Akapeea a Ioela 2:​21-24 te akataka anga i te au kai pae vaerua e akapeea tatou e puapingaia ai?

⁶ I roto i tana totou, kua tata a Ioela i te au mea mei te sitona, te wina e te manongi olive kia akaari i to Iehova tu oronga ua ki Tona iti tangata e pera te au kai pae vaerua. (Ioela 2:​21-24) Kua oronga aia i te Pipiria, te au puka Pipiria, ta tatou website, au uipaanga, akaputuputuanga e te uruoaanga. Ka puapingaia tatou mei teia au kai pae vaerua i te au rā, ka matutu e ka maroiroi katoa tatou.

7. Eaa te akatupu ra i te ‘ngakau rekareka’ kia tatou? (Isaia 65:14)

⁷ Oraanga mataora e te mareka ua. Ka rekareka te iti tangata o te Atua no to ratou aroa takinga meitaki. (E tatau ia Isaia 65:14.) E ‘ngakau rekareka’ to tatou no te au tuatua mou e te au taputou manea i roto i te Pipiria e pera to tatou manakonakoanga no te atinga oko o Karaiti. E mea mataora tikai i te uriuri i teia ki to tatou au taeake e te au tuaine!—Sala. 34:8; 133:​1-3.

8. Eaa te nga tu maata tei anoanoia i roto i te parataito pae vaerua?

⁸ Ko te aroa e te taokotai te nga tu maata tei anoanoia i roto i te parataito  pae vaerua. Te akaari maira te “tatua apa kore” mei teaa rai te oraanga i roto i te ao ou, e ka rekareka te au tavini o Iehova i te aroa e te taokotai tei kare i aite ki teia tuatau. (Kolo. 3:14) Kua karanga tetai tuaine tana i kite i roto i te iti tangata o Iehova: “Kua kite au i te mataora e kare i roto i toku ngutuare. Kua aroa mai te Au Kite o Iehova iaku.” Kia mataora e kia mareka ua, ka anoanoia tetai kia piri mai ki roto i te parataito pae vaerua. Noatu eaa te manako o teianei ao no te iti tangata o Iehova, e ingoa meitaki to ratou i roto i tona ngutuare.—Isa. 65:15.

9. Eaa ta Isaia 65:​16, 17 e taputou maira no te oraanga mamae?

⁹ Oraanga meitaki e te maru. Karanga a Isaia 65:14 no te aronga i vao ake i te parataito pae vaerua ka mamae to ratou ngakau, ma te aue i te atiati anga o te vaerua. Inara akapeea te mamae tei tupu ki te iti tangata o te Atua? Aere ua rai, ka ‘ngaropoinaia te au mea pekapeka i muatangana, e kua uuna keia ïa oki i mua i to te Atua mata.’ (E tatau ia Isaia 65:​16, 17.) Ka takore a Iehova i to tatou manamanata, ka ngaro takiri e kare e akamanako akaouia.

10. Eaa koe i manako ei e akameitakianga kia piri ki te au taeake e te au tuaine? (Akara katoa i te tutu.)

¹⁰ I teia tuatau, me aere tatou ki te au uipaanga ka maru to tatou oraanga e kare tatou e taitaia. Ka tauturu katoa tatou i te au taeake me akaari tatou i te aroa, te rekareka, te ’au, te takinga meitaki e te maru, ko te au ua teia o te vaerua o te Atua. (Gala. 5:​22, 23) E akameitakianga kia piri tatou ki ta Iehova akaaerenga! Ko te aronga ka noo tamou ki roto i te parataito pae vaerua, ka kite ratou me tupu ta Iehova taputou no “te rangi ou e te enua ou.”

11. Ia Isaia 65:​18, 19, akapeea ta Iehova parataito pae vaerua i te akakeu anga ia tatou?

¹¹ Oraanga rekareka e te pereperekavana. Akakite maira a Isaia i te tumu kia “rekareka [tatou], e e rere ua i te rekareka” i te parataito pae vaerua. Na Iehova teia i anga. (E tatau ia Isaia 65:​18, 19.) No reira aia i taangaanga ai ia tatou kia tauturu i te tangata kia akaruke i teianei ao e kia piri ki tana akaaerenga! Te mataora nei tatou i te  kite i te tuatua mou e kua akakeuia tatou kia akakite i te reira ki tetai ke.—Iere. 31:12.

12. Eaa toou manako no te au taputou ia Isaia 65:​20-24, e eaa te tumu?

¹² Kua rekareka katoa tatou no to tatou manakonakoanga i roto i te parataito pae vaerua. Akamanako ana i ta tatou ka kite e ka rave i roto i to Iehova ao ou! Te taputou maira te Pipiria: “Kare e kitea akaouia ki reira te tamaiti no nga rā iti ua, e te tangata metua kare i akaopeia tona au rā.” Ka ‘patu tatou i te au are, e na tatou uaorai e noo; e na tatou e tanu i te au kainga vine, ka kai ei i te kai i reira.’ E ‘kare tatou e angaanga puapinga kore ua’ no te mea ka “akameitakiia [tatou] e Iehova.” Kua taputou mai aia i tetai oraanga puapinga, mareka ua e te meitaki. “E riro oki ïa, ou ratou e kapiki mai ei,” kua kite a Iehova i to ratou anoano e te “akamerengo nei [aia] i te kaki o te au mea ora katoa nei.”—Isa. 65:​20-24; Sala. 145:16.

13. Ia Isaia 65:​25, eaa te au tauianga ka rave tetai pae me akamata ratou i te tavini ia Iehova?

¹³ Oraanga ’au e te tinamou. Ma te tauturu a te vaerua tapu, kua taui tetai pae e tu kino to ratou i mua ana i to ratou oraanga. (E tatau ia Isaia 65:25.) Kua tauta pakari ratou i te akaruke i te reira tu kino. (Roma 12:2; Ephe. 4:​22-24) E tika, e aronga apa ua te iti tangata o Iehova e ka tupu rai te tarevake. Inara kua rauka ia Iehova i te taokotai “i te tangata ravarai,” ma te aroa e te ’au. (Tito 2:11) Na te Atua Mana Katoatoa teia temeio i akatupu!

14. Akapeea te kaveinga ia Isaia 65:25 i tau ei ki tetai taeake?

¹⁴ Ka rauka ainei i te tangata i te taui i to ratou tu? Akamanako ana i teia akaraanga. E maata te taime i tukunaia ai tetai mapu tane ki roto i te are auri e i tona 20 mataiti kua rave aia i te au angaanga kikino. Kua keia aia i te motoka, kua tomo are e te vai atura. Kua akatupu pekapeka aia ki tetai ke. I tona kite anga i te tuatua mou, kua aere ki te uipaanga a te Au Kite o Iehova, kua kite mai aia i tetai akakoroanga puapinga no te akamori ia Iehova. Te papetitoia anga aia, kite mai aia e kua tau rai te kaveinga ia Isaia 65:25 kiaia. Kua taui aia i tona tu kino mei te riona ki te tu maru mei te mamoe.

15. Eaa tatou ka inangaro ei i tetai pae kia piri mai ki te parataito pae vaerua, e akapeea tatou me rave i te reira?

¹⁵ Karanga a Isaia 65:13 e: “Te na ko maira te Atu ra ko Iehova.” Kua taopenga te irava 25: “Te tuatua mairā Iehova.” E tupu ua ana tana i tuatua. (Isa. 55:​10, 11) Te vai nei rai te parataito pae vaerua. Kua akanoo a Iehova i tetai akaaerenga umere tikai. Ka kitea te ’au e te rekareka i roto i tona iti tangata noatu te kino o teianei ao. (Sala. 72:7) No reira tatou ka inangaro ei i te tauturu i te tangata kia piri mai ki teia akaaerenga, na te akariro anga i te tangata ei pipi.—Mata. 28:​19, 20.

TAUTURU I TETAI KE KIA PIRI MAI KI TE PARATAITO PAE VAERUA

16. Eaa te ka tauturu i te tangata kia piri mai ki te parataito pae vaerua?

¹⁶ E tuanga puapinga ta tatou ka rave i te tauturu i tetai ke kia piri mai ki te  parataito pae vaerua. Ka aru tatou i te akaraanga o Iehova. Kare aia e māro ana i te tangata kia piri mai ki tana akaaerenga. Mari ra, ka akavaitata aia ia ratou kiaia. (Ioa. 6:44; Iere. 31:3) Ka rauka i te au tangata ngakau tika i te apii i te au tu manea o Iehova e te akavaitata atu kiaia. Akapeea tatou me tauturu i tetai ke kia piri mai ki te parataito pae vaerua, na roto i to tatou au tu meitaki?

17. Akapeea tatou me tauturu i tetai ke kia piri mai ki te parataito pae vaerua?

¹⁷ Ko tetai mataara no te tauturu i tetai ke kia piri mai ki te parataito pae vaerua na te akaari anga i te aroa e te tu takinga meitaki. Me aere mai te aronga ou ki te au uipaanga, ka inangaro tatou kia aite to ratou tu ki to Korinetia i taito. Karanga ratou: “Tei rotopu tikai te Atua ia kotou.” (1 Kori. 14:​24, 25; Zeka. 8:23) No reira e akono tatou i te akoanga “ei au oki to roto ia kotou uaorai.”—1 Tesa. 5:13.

18. Eaa te ka akakeu i tetai ke kia piri mai ki te akaaerenga?

¹⁸ E akamanako ua rai tatou i to tatou au taeake e te au tuaine Kerititiano mei ia Iehova rai. Ka akamanako tatou i to ratou au tu meitaki e kare i to ratou tu apa ua. Ka akatupu tatou i te ’au ki tetai e tetai na roto i te aroa e kia “takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai.” (Ephe. 4:32) Ka akakeu teia i tetai ke kia piri mai ki te parataito pae vaerua. b

 E NOO UA KI ROTO I TE PARATAITO PAE VAERUA

19. (a) I roto i te pia “ Akaruke Ratou e Kua Oki Akaou Mai,” eaa ta tetai pae i tuatua te oki anga mai ratou ki te parataito pae vaerua? (e) Eaa ta tatou ka rave? (Akara katoa i te tutu.)

¹⁹ Akameitaki tikai tatou ia Iehova no to tatou parataito pae vaerua! E mea manea te reira no te mea e maata te tangata te akamori nei ia Iehova kare i aite mei to mua ana. Kia mareka ua tatou i ta Iehova parataito pae vaerua. Ko tetai tei inangaro i te oraanga matutu e te maroiroi, mataora e te mareka ua, maru e te meitaki ka anoanoia aia kia piri mai ki te parataito pae vaerua e auraka e akaruke i te reira! Inara kia matakite, no te mea te tauta nei a Satani i te akavare ia tatou kia akaruke. (1 Pete. 5:8; Apo. 12:9) Auraka tatou e tuku iaia kia autu. E tauta pakari i te paruru i te tu manea, mā e te ’au o te parataito pae vaerua.