1. Mpaladiiso a mu kikudi nkinyi, na abitungu tuikale na kitshibilo kia kukita kinyi?

 KUI mpaladiiso a mu kikudi pa nsenga lelo uno, muule na bantu bepaane nka mu kukita mianda i buwa. Muule na midiyo ya bantu be mu butaale bua binyibinyi. Booso bapue kutuela mu uno Mpaladiiso, mbaate kitshibilo kia kupela kuimutuuka. Abakumiina’shi p’akumueka mushindo bantu be bungi bebalonde mu ino mbalo i pa buayo. Mbalo kinyi? Mu mpaladiiso a mu kikudi! a

2. Nkinyi akitukaanyisha pabitale mpaladiiso a mu kikudi?

² Muanda wa kukaanya ngua’shi, Yehowa mmukite mbalo ya mu kinfuanyi yadi mutuule bantu baaye mu buumune na mu butaale, nsunga mbiabadi bashaale mu nsenga ayikunkushibua na Satana, na i masaku, mui bantu beshikuene. (1 Yo. 5:19; Kbf. 12:12) Efile Mukulu eetu sha kifulo kuete amono bukitshishi bui bubi bua uno ndumbuluilo, na kuete etupa kioso kiatudi nakio lukalo bua kuipusha mu bulami bua’shi tumone bia kutungunuka na kumufubila na muloo. Bifundue abilesha mpaladiiso a mu kikudi bu “kifuamino” kia binyibinyi na bu “efuba di’abamiamina meema.” (Yesh. 4:6; 58:11) Booso bashaale mu uno mpaladiiso a mu kikudi, be na muloo na abepusha mu bulungantu mu kino kipungo ki bukopo kia mafuku a ku nfudiilo.—Yesh. 54:14; 2 Ti. 3:1.

3. Butemuki bui mu Yeeshaya shapitre 65 bubaadi bulombane mu Isalele a kala naminyi?

³ Ku bukuashi bua mutemuki Yeshaya, Yehowa baadi muleshe abikekala nshalelo a baaba booso be mu mpaladiiso a mu kikudi. We kupeta ino mianda mu Yeeshaya shapitre 65, mui buno butemuki bubaadi bulombane mu kipua kia 537 K.K.B. Mu aa mafuku, bena Yunda babaadi belangie ku mashimba babebatushiishe  mu bupika mu Babilone baaluka ku nsenga yabo. Yehowa baadi muelele muilo waye miabi na eukuasha buawudia kulumbuula dingi kibundi kia Yelusaleme kibaadi kiluishibue, bua kutuula ntempelo na kualushuula lulanguilo lua binyibinyi kui bena Isalele.—Yesh. 51:11; Yak. 8:3.

4. Butemuki bui mu Yeeshaya shapitre 65 mbulombane naminyi lelo uno?

⁴ Kulombana kua kabidi kua butemuki bua Yeshaya kubabangile mu kipua kia 1919 B.B. pa babangile balanguidi ba Yehowa ba ano mafuku eetu kutuuka mu bupika bua Babilone Mukata. Na dingi, Mpaladiiso a mu kikudi babangile kutama mu nsenga ishima. Balungudi ba Bufumu ba sha kisumi, babaadi babangie kutuula tukongie tui bungi na abo nkubanga kulesha ngikashi ya buina Nkidishitu. Bana balume na bana bakashi babaadi na bikitshino bia buntomboshi na muikeelo wi butete, “babafuadile bumuntu bupia bubaadi bupangibue muyile kikiebe ki’eshimba di’Efile Mukulu.” (Ef. 4:24) Biabia, miabi i bungi ibaabadi baleshe kui Yeshaya ayikalombana dingi kalolo kushi bu mu kinfuanyi mu nsenga ipia. Anka, kubanga lelo uno tukuete kupeta miabi mu mishindo i bungi muanda tui mu mpaladiiso a mu kikudi. Biabia, tutaluuleyi mushindo wi uno mpaladiiso a mu kikudi na bukitshishi kuatudi, na buakinyi ta tui balombene kuimutuuka.

MUSHINDO AWIPUSHA BAABA BOOSO BE MU MPALADIISO A MU KIKUDI

5. Nka bu biabadi bapue kuibitemuka mu Yeeshaya 65:​13, mmiloo kinyi ikuete kupeta baaba booso be mu mpaladiiso a mu kikudi?

⁵ Abadishibua kalolo mu kikudi na be na mbidi bukome. Butemuki bua Yeshaya abulesha kuilekeena kukata kui pankatshi pa bano booso be mu mpaladiiso a mu kikudi na bano bashi muanka. (Badika Yeeshaya 65:13.) Yehowa kuete kulombasha nkalo ya mu kikudi ya balanguidi baaye kalolo. Tui na kikudi kiaye kiselele, Eyi diaye difundibue, na biakudia bia mu kikudi biatudi balombene “kudia, . . . kutoma, . . . [na] kuikala na muloo.” (Puandikisha na Kibafumbuilue 22:17.) Mu kuilekeena na mpaladiiso a mu kikudi, bano bashi muanka “abafu nsala, . . . abafu nyota, . . . [na] buufu.” Muanda nkalo yabo ya mu kikudi ta ngilombashibue.—Am. 8:11.

6. Mukanda wa Yowele 2:​21-24, ngupuandikishe bidibua bietu bia mu kikudi na kinyi, na mmushindo kinyi wabidi bilombene kuitukuasha?

⁶ Mu butemuki bua Yowele, mmufubishe bintu bi’abawuku kui bantu bu ntete, muimu wa olive, na maalua a nfinyo bua kulesha’shi Yehowa e na kalolo kakulombeesha muilo waye nkalo yawo, mu ino nkalo mui mpaa na bidibua bia mu kikudi. (Yow. 2:​21-24) Bu kileshesho, mmuitupe Bible, mikanda ayipatuula Bible, site eetu a Internete, bisangilo bia mu tukongie, na bikongeno bikata na bipeela. Abitungu tuiatshile mpango ya kudia bidibua bia mu kikudi bi’abetupa efuku dioso, na su tubakitshi biabia, atudishibua kalolo mu kikudi na kuikala na bukome bui bungi.

7. Nkinyi akitupa “muloo mu mashimba”? (Yeeshaya 65:14)

⁷ Be na muloo na abasankaa na biabadi nabio. Muilo w’Efile Mukulu “ukwete kwela tukundakunda bwa muloo” muanda mu mashimba muabo mmuule mbaa na lutumbu. (Badika Yeeshaya 65:14.) Bia binyibinyi abinyingisha na milayilo ayitupa bukome i muiyi di’Efile Mukulu, mpaa na lukulupilo luetu luimeene pa mulambu wa nkuulo wa Yesu Nkidishitu abitupa “muloo mu mashimba.” Kuakula pa bitale ino mianda na bakuetu balume na bakashi ba mu kikudi, akuitupa miloo ya binyibinyi!—Mis. 34:8; 133:​1-3.

8. Ngikashi kinyi ibidi ikata i mu mpaladiiso a mu kikudi?

⁸ Kifulo na buumune bui munkatshi mua muilo wa Yehowa, ngi ngikashi ibidi ikata i mu mpaladiiso a mu kikudi. Buno “buumune” abuitupa kinangu kia abikekala nshalelo mu nsenga ipia, amukekala bafubi ba Yehowa booso na muloo mpaa na kifulo kikata na buumune kukila biabakuete kuileshena lelo uno. (Kol. 3:14) Ungi mukuetu mukashi muina Nkidishitu atentekiesha muanda ubaadi mumone pa baadi muimoneene na muilo w’Efile Mukulu bua musuusa wa kumpala.  Amba’shi: “Ntshi naadi nawuku bia kuikala na muloo ami nabene na kuikala na muloo mu kifuko kiande nya. Musuusa wa kumpala unammuene kifulo mu bikitshino nyi mmunkatshi mua Tumonyi tua Yehowa.” Biabia, muntu ooso akumiina kuikala na muloo na kusanka na biadi nabio, abitungu atuele mu mpaladiiso a mu kikudi. Sunga bantu ba ino nsenga banangushena naminyi pabitale bafubi ba Yehowa, be na eshina dia kineemo, be na nkumo i buwa mu kifuko kia Yehowa ki mu nsenga ishima.—Yesh. 65:15.

9. Mukanda wa Yeeshaya 65:​16, 17, awitulaa kinyi pabitale mianda ikuete kuitukiengiesha lelo uno mu nshalelo?

⁹ Be na luishinko na be mu butaale. Mukanda wa Yeeshaya 65:14 awamba’shi, baaba booso abapele kutuela mu mpaladiiso a mu kikudi “abakeele misaase bwa dikyenga adikala mu mashimba aabo [na] kutompola muanda wa kufudiila kua binangu.” Kadi tui kuamba naminyi bua mianda yooso ibaadi ayinyongosha muilo w’Efile Mukulu? Kushi mpaka, ino mianda yooso “ayikalubibwa [na] ayikala ifiibwe ku meeso ku’[Efile Mukulu].” (Badika Yeesheya 65:​16, 17.) Yehowa akakatusha nkalakashi yooso na t’atukatentekiesha dingi mushindo ubaabidi abitukiengiesha nya.

10. Buakinyi opusha’shi uno nyi mmuabi ukata wa kuibunga pamune na bakuetu be na Nkidishitu? (Tala dingi kifuatulo.)

¹⁰ P’atuende ku bisangilo bietu bia kakongie, atupushaa butaale muanda yaya nsaa t’atutuulaa binangu ku mianda ya uno ndumbuluilo e bubi ayitufuishiisha tuinyongoshi nya. Atukuatshishenaa butaale bua bakuetu balume na bakashi ba mu kikudi nsaa y’atulesha ngikashi bu ino: Kifulo, muloo, butaale, kalolo, bikale mu bipindi bia kikuba kia kikudi ki’Efile Mukulu. (Nga. 5:​22, 23) Tui na muabi ukata p’atue kuikala mu uno ndumbuluilo a Efile Mukulu! Bano booso abakashaala mu mpaladiiso a mu kikudi abakamono kulombana kua mulayilo w’Efile Mukulu wa “nsenga ipia na mayilu apia.”

11. Muyile Yeeshaya 65:​18, 19, mpaladiiso a mu kikudi abadi bapangie kui Yehowa e na bukitshishi kinyi kuatudi?

¹¹ Kuikala na lutumbu na muloo. Yeshaya baadi mupatuule dingi buakinyi abitungu tuikale na “muloo na kusepeela” mu mpaladiiso a mu kikudi. Yehowa ngi mupangie uno mpaladiiso a mu kikudi. (Badika Yeeshaye 65:​18, 19.) T’abitukaanyisha nya muanda Yehowa kuete kuitufubisha buatudia kukuasha bantu bua’shi batuukie mu ndumbuluilo a ino nsenga mupue kuluila, batuele mu uno mpaladiiso e buwa bukile a mu kikudi! Tui na muloo wa miabi yatukuete kusangeela muanda tui mu bia binyibinyi, na abitutakula buatudia kuibilungula bangi.—Yel. 31:12.

12. W’epushaa naminyi pabitale mulayilo wabadi bafunde mu mukanda wa Yeeshaya 65:​20-24, na mbuakinyi?

¹² Na dingi, tui na lutumbu na muloo bua lukulupilo luatudi nalo bu biatudi bashaale mu  mpaladiiso a mu kikudi. Banda kunangushena kapeela, pabitale bintu bioso bi’atukamono na bi’atukakitshi mu nsenga ipia y’Efile Mukulu! Bible mmulee’shi: ‘Mwamwa t’amukekala dimo mwana tooka . . . akafu kunyima kwa mafuku apeela, sunga mununu sh’akumbasha bungi bua mafuku aaye.’ Dingi ‘atukebaka mashibo na tukemushaale [na] atukakunu nfinyo na tukadye bikuba byayo.’ Na ‘t’atukafumbakana dimo bisumanga’ muanda ‘Yehowa aketuelela myabi.’ Yehowa etulaa nshalelo e buwa na a muloo bua kulombasha mpango yaye. “Sunga kumpala kua’shi bayitanyine,” Yehowa akekala mupue kuuka lukalo lua muntu ooso na “ekutshisha bii na muuwa byooso byadi mufule.”—Yesh. 65:​20-24; Mis. 145:16.

13. Mukanda wa Yeeshaya 65:25 aulesha’shi bantu bakuete kushintuluka mushindo kinyi nsaa y’ababanga kufubila Yehowa?

¹³ Bulungantu na butaale. Ku bukuashi bua kikudi ki’Efile Mukulu, bantu be bungi babaadi na muikeelo wi bubi na wi butete, mbashintulukie ngofu mu nshalelo aabo. (Badika Yeeshaya 65:25.) Abekitshishaa ngofu bua kukambila ngikashi yabo i bubi ya kala. (Lom. 12:2; Ef. 4:​22-24) Biabia, muilo w’Efile Mukulu ta wekeele upuidikie nya, ngi buakinyi atukatungunuka na kukita bilubilo. Biabia, Yehowa mmubungie “bantu ba mishindo yoso” bamufule na befuleene, ngi buakinyi be mu butaale na mu buumune. (Tit. 2:11) Kino nyi nkilengieleeshi akilesha’shi nka penda Efile Mukulu sha bukome booso, ngi mulombene kukita bino!

14. Mukanda wa Yeeshaya 65:​25, ngulombane mu muanda wa uno mukuetu naminyi?

¹⁴ Bantu mbalombene kushintula bumuntu buabo su? Tutaleyi uno muanda wabadi bamone. Ungi nsongualume, babaadi bamukuate bamuela mu lukano pa muanda wa muikeelo wi butete na buntomboshi aye e na bipua 20. Babaadi bamuele mu lukano pa muanda wa kuiba miotoka, kunyengana bintu, na bingi bibeshi bibaadi akitshi. Baadi alu ngoshi nsaa yooso na bantu. Pa bapushiishe bia binyibinyi bia mu Bible bua musuusa wa kumpala na kutuela mu bisangilo bia Tumonyi tua Yehowa, baadi mushinkamishe’shi bapete muwa wi na kepatshila, kuamba’shi kulanguila Yehowa mu Mpaladiiso a mu kikudi. Kunyima ku’aye kubatshishibua na kuikala Kamonyi ka Yehowa, babangile kunangushena misuusa i bungi pabitale mushindo wadia kutumikila mayi e mu mukanda wa Yeeshaya 65:25. Bashintulukile akatuka bu nyema a ntambue bubaadi na bu muntu ntomboshi, afika bu muana a mukooko na bu muntu sha butaale.

15. Buakinyi atukumiinaa kuitanyina bantu bua’shi bafikie kuatudi mu mpaladiiso a mu kikudi, na tui kuibikita mushindo kinyi?

¹⁵ Mukanda wa Yeeshaya 65:13 aubanga na ano mayi aamba’shi: ‘Pushaayi bino abyakula Muanaana Yehowa Efile Mukulu.’ Verse 25 namu afudiisha na ano mayi aamba’shi: ‘Nnami Muanaana Yehowa akula byabya.’ Misuusa yooso ano mayi aaye aalombanaa. (Yesh. 55:​10, 11) Mpaladiiso a mu kikudi mmupue kuikala kuanka mu ano mafuku eetu. Yehowa mmupangie kifuko kia bakuetu ba mu nsenga ishima kifuleene mu mushindo wi pa buawo. Pa muanda wa’shi tui mu kino kifuko, tui na butaale bui bungi na dingi tukuete kuipusha mu bulungantu kubanga binobino mu ino nsenga iwule na buntomboshi. (Mis. 72:7) Bua tuno tubingilo, atukumiina kukuasha bantu be bungi patuki na mushindo buabadia kufika kuatudi mu kino kifuko ki bakuetu balume na bakashi bena Nkidishitu ba mu nsenga ishima. Tui kukita bino nka p’atutuulu binangu bietu ku mudimo wa kuikasha bantu bu balongi.—Mat. 28:​19, 20.

MUSHINDO WA KUKUASHA BANGI BUA’SHI BATUELE MU MPALADIISO A MU KIKUDI

16. Bantu abakakibuaa mu mpaladiiso a mu kikudi naminyi?

¹⁶ Ooso a kuatudi e na mudimo ukata wa kuikasha mpaladiiso a mu kikudi bu mbalo i buwa ilombene bangi bantu bafika batuela. Tui kulombasha uno mudimo wetu su tubambula Yehowa.  Yehowa t’akitshishaa muntu pa bukopo bua’shi afikie atuele mu ndumbuluilo aaye nya. Mu kuilekeena na biabia, Yehowa “akakaa” bantu kuadi aye nabene na kalolo kooso. (Yo. 6:44; Yel. 31:3) Bantu ba sha mashimba alulame abalongaa pabitale kifulo kia Yehowa na bumuntu buaye bui buwa abuibakakaa kuadi musuusa umune. Tui kukaka bantu mu mpaladiiso a mu kikudi kukiila ku ngikashi yetu i buwa na ku muikeelo wetu naminyi?

17. Tui kukaka bangi mu mpaladiiso a mu kikudi naminyi?

¹⁷ Mushindo umune watudi balombene kukaka bangi mu mpaladiiso a mu kikudi mpa kukitshina balanguidi neetu mianda na kifulo na kalolo. Nsaa ayituele bantu bapia mu bisangilo bietu bia kakongie, abitungu’shi bafikie mu kuakula bibakuile bangi bantu, pangi bashi baadi balanguidi mu kibundi kia Kodinda a kala. Babakuile’shi: “Efile Mukulu e munkatshi muenu binyibinyi.” (1 Ko. 14:​24, 25; Sek. 8:23) Biabia, abitungu tutungunukie na kutumikila elango adiamba’shi: “Ikalayi mu butaale munkatshi muenu.”—1 Te. 5:13.

18. Nkinyi kilombene kukaka bantu mu ndumbuluilo eetu?

¹⁸ Abitungu efuku dioso tuikitshishe bua kumona bakuetu balume na bakashi bena Nkidishitu bu abibamonaa Yehowa. Atukitshi biabia pa kutuula binangu bietu ku ngikashi yabo i buwa, kushi kutuula ku kukutua kuabo kua kupuidika akupu binobino. Abitungu tupue bilumbu bioso bi munkatshi muetu pa kuifuleena na kuikala na kiubishi kia kulombasha ano mayi aamba’shi: “Anka ikalayi na kalolo kui muntu na muntu, nuikale baule na lusa, nuilekieshene bilubilo bienu ku muntu na muntu.” (Ef. 4:32) Biabia, mpaladiiso a mu kikudi akaka bantu abakumiina’shi nuibakitshine mianda mu mushindo umune w’anuikitshishenaa mianda anue banabene. b

 SHAALA MU MPALADIISO A MU KIKUDI

19. (a) Nka bu abilesha kashibo akamba’shi: “ Babemutuukile akupu bemualuka” bangi mbaakule naminyi kunyima kua abo kualuka mu mpaladiiso a mu kikudi? (b) Abitungu tuikale na kitshibilo kia kukita kinyi? (Tala dingi kifuatulo.)

¹⁹ Tui na kineemo kikata kia kuikala mu uno mpaladiiso eetu a mu kikudi! Uno Mpaladiiso taadi buwa bukile kukila bibaadi kumpala, na mmuule na bantu abatumbisha Yehowa kukila bibaabidi kumpala. Atukumiina kutungunuka na kuikala na lutumbu mu uno mpaladiiso a mu kikudi abadi betupangile kui Yehowa. Muntu ooso akumiina kupeta bukome, kusanka na biadi nabio, butaale, na kuikala mu bulungantu, abitungu afikie ashaale mu mpaladiiso a mu kikudi na kushi kuimutuuka dingi! Abitungu tuikale badimukie muanda Satana kuete kukita kioso akitungu bua kuitudimba bua’shi tuimutuukie. (1 Mp. 5:8; Kbf. 12:9) T’abitungu’shi tumulekieele oobeshe kuitutuusha mu uno mpaladiiso a mu kikudi nya. Biabia, tukiteyi muetu mooso bua kulama buiselele, buwa, na butaale bua mu mpaladiiso a mu kikudi.