1. Ino o paradisa ara-pagnahy zao sady toko’e ho tapa-kevetse ty hanao inogne tika?

 MISY paradisa agn’ohatse feno ndaty tondregne manao raha soa ty ambone tane etoa. Feno ndaty an-tapetrisa’e mahatsapa ho miadagne ty ao. Tapa-kevetse ty tsy hiala ao ze ndaty fa amo o paradisa iohoe ao. Teà iareo ka naho maro ty ndaty hilitse agnate o toeragne miambake iohoe ao. Inogne io? I paradisa ara-pagnahỳ! a

2. Ino ty raha mahalatsa miomba i paradisa ara-pagnahỳ?

² Mahalatsa fa namorogne toeragne agn’ohatse misy vahoake mifankatea naho miharo saigne ty Jehovah ndra tie miaigne agnivo ty tontolo raty i Satana sady tea aly toy eto aza iareo. (1 Jaona 5:19; Apok. 12:12) Vazoho i Jehovah soa fa mihasimba naho miharaty ty tontolo toy, faie atao’e ty hahavy o mpanompo’eo hahatsapa ho voaro naho ho fale amy ty fanompoagne aze avao. Atao ty Saontsi’e tihoe toeragne “fialofagne” naho “tanembole azon-drano soa” o paradisa ara-pagnahy iohoe. (Isaia 4:6; 58:11) Noho ty fitahia i Jehovah, le mahatsapa ho voaro naho ho fale avao ze ndaty amo o paradisa ara-pagnahy iohoe ao.​—Isaia 54:14; 2 Tim. 3:1.

3. Akore ty nahatanteraha ty Isaia toko faha-​65 tie taloha?

³ Nisaontsie i Jehovah tamy ty alala i Isaia mpaminany tie hanao akore ty fiaigna ze ndaty agnate o paradisa ara-pagnahy iohoe ao. Afake mahatrea izay rehe amy Isaia toko faha-​65 ao sady fa nitanterake tamy ty taogne 537 T.K. io. Tamy ze fotoagne zay,  le nivotsoragne boake ta Babilona tagne o Jiosy nibebake reo. Nitahy o vahoa’e reo ty Jehovah le nagnampe iareo mba hamboatse indraike i tanà i Jerosalema fa niravay sady nagnova aze ho soasoa indraike. Namboatse i tempolỳ indraike ka iareo satria io ty foibey ty fivavahagne maregne ta Israely tagne.​—Isaia 51:11; Zak. 8:3.

4. Akore ty ahatanteraha ty Isaia toko faha-​65 amy ze o androntika zao?

⁴ Nitanterake fagnindroe’e o faminania i Isaia iohoe nanomboke tamy 1919, naho fa niakatse boake tamy i Babilona Lahibey tao o vahoa i Jehovah amy izao reo. Nanomboke niparitake magneran-tane i paradisa ara-pagnahỳ tafara izay. Nagnoregne fiangonagne maro o mpitory nafana fo sady nanagne toetse arake ty fagnahy reo. Nanjare “niakanjo toetse vaovao niforognegne mifagnarake amy ty zoton’arofon’Andrianagnahare” ty lahilahy naho ty ampela nipiarotegne naho nanagne toetse manahake o bibio. (Efes. 4:24) Maregne aloha fa amy ty hoavy vaho hotanterake ara-bakiteny ty ankamaroa i faminania i Isaia mpaminany rey. Faie ndra amy izao aza, le fa maro ty fitahiagne azontikagne. Andao tika handineke ty soa azontikagne noho itika agnate o paradisa ara-pagnahy iohoe ao naho ty anto’e tsy toko’e hialantikagne ao.

TY RAHA TSAPA ZE NDATY AMY I PARADISA ARA-PAGNAHỲ AO

5. Arake ty fampitamaegne amy Isaia 65:13 ao, ino ty fitahiagne azontika amy i paradisa ara-pagnahỳ ao?

⁵ Salama soa naho velombelogne. Mirehake ty raha lahibey tsy mampitovy ty fiaigna ty ndaty mitoboke ivela i paradisa ara-pagnahỳ agne naho ty ndaty mitoboke agnate’e ao ty Isaia mpaminany. (Vakio ty Isaia 65:13.) Mea i Jehovah ty mpanompo’e ze hanegne ara-pagnahy paliave iareo mba hahavy iareo hifandrambe soa ama’e. Managne ty fagnahi’e masigne, ty Saontsi’e naho boke Ara-baiboly maro tika amy izay afake “mihinagne, ... minogne, ... [naho] mifale.” (Ampitahao amy ty Apokalypsy 22:17.) Mifanohetse amy izay, fa ze ndaty ivela i paradisa ara-pagnahỳ agne, le “keregne ..., maeake ..., [naho] salatse.” Tsy managne fifandrambesagne soa aman’Andrianagnahare iareo.​—Amosa 8:11.

6. Akore ty fomba irehafa ty Joela 2:21-24 ty hanegne ara-pagnahy azontika, le nagnino rey ro mahasoa antika?

⁶ Amy ty faminania’e ao ty Joela le nirehake hanegne tena ilaegne amy ty fiaignagne. Agnisa izay ohatse ty voan-draha, voaloboke naho menake oliva mba hampisehoagne fa mea i Jehovah antika ze kila raha paliaentikagne mba hahavy antika hilongo soa ama’e. Tafilitse amy izay ty hanegne ara-pagnahy. (Joela 2:21-24) Magnomey izay amy ty alala ty Baiboly, ty boke aman-gazete Ara-baiboly, ty tragnom-porarontika, ty fivoriagne, ty havoriambey faritse naho vondrom-paritse reke. Afake mandrambe soa boake amo raha reo tikagne isan’andro. Voka’e manjare salama soa amy ty lafi’e ara-pagnahy tikagne sady velombelogne.

7. Ino ty raha mahavy ty ‘fontikagne ho fale?’ (Isaia 65:14)

⁷ Sambatse naho afa-po. Afake “mirebeke” ty vahoa i Jehovah satria feno fankasitrahagne ty fo iareo. (Vakio ty Isaia 65:14.) Mahavy ty ‘fontikagne ho fale’ ty fampaherezagne naho ty fampionognagne boake amy ty Saontsin’Andrianagnahare vaho ty fanantenantika mioregne amy i solovoigne natao i Jesosỳ. Mahavy antika ho fale ty firehafantikagne ze raha zay amo o rahalahy naho rahavaveo!​—Sal. 34:8; 133:1-3.

8. Ino ty raha lahibey roe mampiambake i paradisa ara-pagnahỳ?

⁸ Lafi’e roe lahibey mampiambake i paradisa ara-pagnahỳ ty hatea naho ty firaisan-tsaigne misy amo o vahoa i Jehovah-o eo. Ze “fehe mampiharo raike” zay ro magnampe antika  hahazo sare an-tsaigne ty ho fiaignagne naho fa amy i tontolo vaovaoy ao, satria hahatsapa hatea naho firaisan-tsaigne bey lavitse noho ty fa misy amy hinane zao o vahoa i Jehovah-o naho fa ao. (Kol. 3:14) Nirehake ty raha nitsapa’e miomba o vahoa i Jehovah-o ty rahavave raike toy naho fa niarake amy iareo voaloha’e. Hoe reke: “Mbe liako naho mba nahatsapa ho sambatse zao, ndra tamo o keleiako teo aza. Ty fotoagne voaloha’e nahatsapako izay le tamo o Vavolombelo i Jehovah-o eo.” Naho te ho fale vata’e sady te ho afa-po ty ndaty raike, le mila militse amy i paradisa ara-pagnahỳ ao. Ndra manao akore ty fihevera ty tontolo toy o vahoa o Jehovah-o, le managne agnaragne miambake naho laza soa miarake amo o vahoa’e magneran-taneo iareo.​—Isaia 65:15.

9. Ino ty rehafe ty Isaia 65:16, 17 miomba ty raha mampijale antika amy izao?

⁹ Tony naho tsy matahotse. Rehafe ty Isaia 65:14 fa ze ndaty mifily ty tsy hilitse agnate i paradisa ara-pagnahỳ ao le “hangoihoy ty tagny satria malahelo ty fo’e sady hirohadrohake ty tagny satria kivy.” Faie akore ty amy i raha mampijale naho mampitaraigne o vahoa i Jehovah amy izao rey? Tsy ho ela i raha rey ‘le tsy ho tsiarovegne sasa, [sady] haetake tsy ho vazoho ty fihainon’Andrianagnahare.’ (Vakio ty Isaia 65:16, 17.) Hofoagna i Jehovah ze olagne manjò antika sady tsy hisy voka’e amantikagne sasa i raha rey.

10. Nagnino ro ankasitraha’o ty fahafahagne anagna’o hifandrambe amo o rahalahy naho rahavaveo? (Henteo i sarey.)

¹⁰ Ndra amy izao aza, le mahatsapa ho tony tika naho fa am-pivoriagne agne satria milamin-tsaigne sady tsy mifantoke amy ze olagne manjò antika. Magnampe o rahalahy naho o rahavaveo ho tony ka tikagne naho fa mikezake mampiseho hatea, hafaleagne, fiadanagne, hasoa fagnahy naho fahalemem-pagnahy sady agnisa ty vokatse ty fagnahin’Andrianagnahare o toetse reo. (Gal. 5:22, 23) Tena tombotsoa ho antikagne areke tihoe agnisa ty fandamina i Jehovah! Hahatrea amy ty fomba feno ty fahatanteraha ty fikasàn’Andrianagnahare miomba ty “lagnitse vaovao naho ty tane vaovao” ze ndaty mijanogne amy i paradisa ara-pagnahỳ ao avao.

11. Arake ty Isaia 65:18, 19, ino ty toko’e ho voka i paradisa ara-pagnahy niforogne i Jehovah-y amantika?

¹¹ Fale sady feno fankasitrahagne. Nihazavae i Isaia magnarake tie nagnino ty ndaty amy i paradisa ara-pagnahỳ ao ro “fale naho mirebeke.” Satria ty anto’e i Jehovah ty namorogne o toeragne agn’ohatse iohoe. (Vakio ty Isaia 65:18, 19.) Tsy isalasalagne areke fa mampiasa antikagne ty Jehovah mba hagnampe o ndatio hiala amy ty fikambanagne amy ty tontolo  toy eto, satria tsy mampianatse iareo ty maregne miomba aze rey, sady tsy hagnampe iareo mba hilitse amy i paradisa ara-pagnahy soasoay ao! Tena fale tika noho ty fitahiagne azontikagne noho itika agnate ty hamarenagne ao sady irientika mafe ty hirehake izay amy ty hafa.​—Jer. 31:12.

12. Ino ty tsapa’o noho i fampitamaegne amy Isaia 65:20-24 aoy, le nagnino?

¹² Tena mahafale antika sady ankasitrahantika ka ty fanantenagne anagnantika noho itika agnate i paradisa ara-pagnahỳ ao. Mba eretsereto moa ty raha hotreantika naho hataontikagne amy i tontolo vaovaoy ao! Hoe ty Baiboly: “Tsy hisy ... ajaja ho velogne andro tsiampeampe avao, ndra ndaty antetse tsy hahatapetse ty androm-piaigna’e.” ‘Hamboatse tragno tikagne le hitoboke ao [sady] hambole voaloboke le hihinagne ze voka’e.’ ‘Tsy ho montso antoke ty asa mafe ataontikagne’ satria tika “hotahie i Jehovah.” Nampitamà reke fa hagnomey antika fiaignagne milamigne sady misy dika’e. “Ndra tie mbe tsy mitoka aza iareo,” le fa oni’e ty raha paliave iareo tsikiraidraike sady “hagnomey fahafaham-po ty fagniria ze raha miaigne” reke.​—Isaia 65:20-24; Sal. 145:16.

13. Akore ty fomba irehafa ty Isaia 65:25 ty fiovagne atao o ndatio naho fa iareo manomboke manompo i Jehovah?

¹³ Tea filongoagne naho voaro. Noho ty fagnampea ty fagnahin’Agnahare, le maro ty ndaty nipiarotegne nanao fagnovàgne lahibey amy ty fiaigna’e. (Vakio ty Isaia 65:25.) Nikezake mafe iareo mba hisintake ty toetse iareo taloha. (Rom. 12:2; Efes. 4:22-24) Maregne aloha fa mbe tsy voririke o vahoa i Jehovah-o, le azo antoke fa hanao fahadisoagne iareo. Faie naharo i Jehovah raike “ze karaza o ndaty iaby” tea aze naho tea filongoagne. (Tit. 2:11) I Jehovah tompo fara tampo’e avao ty mahavita ze fahagagagne zay!

14. Nagnino ro magnamaregne ty Isaia 65:25 ty raha niaigne ty rahalahy raike?

¹⁴ Tena afake magnova ty toetse’e vata’e vao o ndatio? Intoy misy ohatse. Nigadra mateteke ze ajalahy tanora raike zay tamy tie ireke ni-20 taogne. Tena niraty findesam-batagne reke sady nitea aly. Nigadraegne reke satria nangalatse tomabile, namaky tragno naho nanao raha raty hafa. Tena lava vognogne ty hialy amo o ndatio avao reke. Naho fa naharey ty hamarenagne voaloha’e boake agnate Baiboly ao reke sady nagnatreke ty fivoria o Vavolombelo i Jehovah-o, le nirese lahatse fa nahatrea fiaignagne misy dika’e, zane hoe hanompo i Jehovah amy i paradisa ara-pagnahỳ ao. Naho fa nivita badisa reke, le mateteke ro nirehake tie nitanterake tama’e ty Isaia 65:25. Nanahake o lionao ty toetse’e taloha satria nitea aly reke, faie niova nanahake ty anak’agnondry ty toetse’e amy izao satria nanjare tea filongoagne reke.

15. Nagnino tika ro te hitaogne ty hafa mba hilitse agnate i paradisa ara-pagnahỳ ao, le akore ty hanoantikagne izay?

¹⁵ Izao ty rehake fanomboha ty Isaia 65:13: “Izao ty nisaontsie i Jehovah, i Tompo Fara Tampo’ey.” Le hoe izao ka ty rehake fara’e amy ty andine’e faha-25: “Hoe ty Jehovah.” Lava tanterake avao ty raha saontsi’e. (Isaia 55:10, 11) Fa misy i paradisa ara-pagnahỳ ty amy hinane zao. Namorogne keleia ty mpirahalahy ty Jehovah. Satria tika agnisa o keleiagne io, le afake ty hahatsapa fiadanagne naho filaminagne ndra tie amy ty tontolo raty toy eto aza. (Sal. 72:7) Noho ze anto’e zay, le te hagnampe ndaty maro arake ze azo atao tikagne mba ho agnisa ty rahalahintikagne magneran-tane. Manao izay tika naho mifantoke amy ty asa fanoagne mpianatse.​—Mat. 28:19, 20.

 AKORE TY HAGNAMPEANTIKA TY HAFA MBA HILITSE AO?

16. Ino ty hagnampe o ndatio hilitse amy paradisa ara-pagnahỳ ao?

¹⁶ Tikagne tsikiraidraike le managne anjara asa lahibey amy ty hahavy o ndatio hagniry hilitse agnate i paradisa ara-pagnahỳ ao. Hahavita hanao izay tikagne naho manahake i Jehovah. Ireke zao tsy mamoresé o ndatio mba hilitse agnate fandamina’e ao, fa “mitaogne” iareo aman-kasoa fagnahy ho mbama’e mbeo avao ty atao’e. (Jaona 6:44; Jer. 31:3) Naho fa mianatse ty miomba ty hatea i Jehovah naho ty toetse maha ie aze ty ndaty managne toe-po soa, le izay ty handrisike iareo hagnatogne aze. Akore ty hahavy ty toetse soa naho ty findesam-batagne soa anagnantika hisarike o ndatio ho amy i paradisa ara-pagnahỳ ao?

17. Ino ty azontikagne atao mba hahavy o ndatio hilitse agnate i paradisa ara-pagnahỳ ao?

¹⁷ Hanjare te hilitse amy i paradisa ara-pagnahỳ ao o ndatio naho ohatse tikagne maneho hatea naho hasoa fagnahy amo o mpiara-manompò. Naho fa magnatreke ty fivoriantikagne o ndaty vaovaò, le teantika iareo naho mahatsapa manahake ty raha nitsapa ty ndaty tsy mpino nagnatreke ty fivoria ty Kristiana ta Korinto tagne tamy ty taonjato voaloha’e. Nirehake iareo tie: “Ama’areo eo vata’e ty Andrianagnahare.” (1 Kor. 14:24, 25; Zak. 8:23) Noho izay areke, le toko’e hikezake mba “ho tea filongoagne” avao tikagne.​—1 Tes. 5:13.

18. Ino ty va’e hahavy o ndatio hilitse agnate ty fandaminagne misy antikagne toy ato?

¹⁸ Toko’e hanahake ty fomba fivazohoa i Jehovah aze lognandro ty fomba fiheverantika o rahalahy naho o rahavaventikagneo. Manao izay tika naho mifantoke amy ty toetse soa iareo fa tsy amy ty toetse rati’e satria tsy raha hoe izay sasa ty ho toetse’e amy ty ho avy. Afake mandamigne ty tsy fifagnarahagne  misy amantikagne aman-katea ka tika naho mikezake mba “ho soa fagnahy, hifandefetse, hitretré naho hifamela heloke tanterake.” (Efes. 4:32) Naho fa mahatrea izay ze ndaty te hahatsapa hatea hoe izay, le hilitse agnate i paradisa ara-pagnahỳ ao. b

MIJANOGNA AGNATE I PARADISA ARA-PAGNAHỲ AO AVAO

19. a) Arake ty aseho amy ty efajoro tihoe “ Niala Iareo le avy eo Niheregne Indraike,” ino ty nirehafe ty ila’e naho fa niheregne indraike agnate i paradisa ara-pagnahỳ ao iareo? b) Toko’e ho tapa-kevetse ty hanao inogne tika? (Henteo i sarey.)

¹⁹ Tena fale tika satria agnate i paradisa ara-pagnahỳ ao! Tena vao mainke mihasoa reke ty amy izao sady vao mainke mitombo ty vahoa i Jehovah agnate’e ao. Lonike abey tikagne hankasitrake nainai’e i paradisa nimea i Jehovah antikagney. Ze ndaty te ho velombelogne, te ho afa-po, te ho tony naho te ho voaro, le tsy maintsy militse agnate i paradisa ara-pagnahỳ ao sady tsy miala ty ao! Mitaoa avao areke satria mipay fomba hanintonagne antika boake ao ty Satana. (1 Pet. 5:8; Apok. 12:9) Tsy toko’e hengantikagne handrese reke. Andao areke tika ho vognogne hiaro ty hasoa naho ty fiadanagne amy i paradisa ara-pagnahỳ ao.