1. Paradayizi yakumuuya niinzi alubo tweelede kukanza kuchitaanzi?

 MAZUBAANO, kuli Paradayizi iili aanyika iili aamamiliyomi aabantu bajisikini akuchita zintu zilikabotu. Mamiliyoni aabantu aaba bali aaluumuno lwachoonzyo. Bantu bali muparadayizi eeyi bakanzide kukkala kabali mumo. Alubo bayanda kugwasya bantu biingi kuti baze mundawu eeyi iisiyene azimwi ndawu. Ndawu eeyi itegwaanzi? Itegwa paradayizi yakumuuya. a

2. Niinzi chigambya atala aparadayizi eeyi yakumuuya?

² Jehova wakalenga ndawu yakukozyanisya oomo bakombi bakwe mubali aaluumuno alubo mubajisini nikuba kuti bakkala munyika yaSaatani iili aabantu babi bazondaana. (1 Joh. 5:19; Chi. 12:12) Leza wesu siluyando ulibwene mbuyili kutupambaninsya nyika yaSaatani alubo ulikutukwabilila kuchitila kuti twiinkilile kunembo kumubelekela katubotelwa. Jwi lyakwe lipandulula paradayizi yakumuuya kuti nindawu iikwabililidwe ‘yakuchijila’ akuti “muunda uutilailwa kabotu.” (Is. 4:6; 58:11) Aabo bali muparadayizi yakumuuya balikubotelwa alubo balikwabililidwe muchiindi eechino chiyumu chakumazuba aakumamanino akaambo kakuti Jehova ulikubagwasya.—Is. 54:14; 2 Tim. 3:1.

3. Bupolofita bwaambidwe muli Isaya chaandaano 65 bwakazuzikizigwa biyeni muchiindi chama-Israyeli?

³ Jehova wakabelesya mupolofita Isaya kuti aambe buumi  mbubunoobede muparadayizi yakumuuya. Nzyaakaamba Jehova zijanika muli Isaya chaandaano 65 alubo zyakazuzikizigwa kale kakusaanguna mu537 B.C.E. Aachiindi eecho, maJuda bakali basanduka bakaangununwa kuzwa mubuzike kuBbabbiloni alubo bakabweeda kulimbabo. Jehova wakabalongezya bakombi bakwe alubo wakabagwasya kuti bawubotye lubo muunzi waJerusalema wakali wanyonyooka alubo wakabagwasya kuti bayakulule tempele nkaambo nindawu njibakali kumukombela mu-Israyeli.—Is. 51:11; Zek. 8:3.

4. Bupolofita buli muli Isaya chaandaano 65 bulikuzuzikizigwa biyeni mazubaano?

⁴ Bupolofita buli muli Isaya bwakasaanguna kuzuzikizigwa kachibili mu1919 chiindi bakombi baJehova bamazubaano nibakaangununwa mubuzike kuzwa muli Bbabbiloni Mupati. Kuzwa waawo, paradayizi yakumuuya yakasaanguna kukomena munyika yoonse. Bakambawusi baBwaami bakajula mbungano zyiingi alubo bakazyala michelo yamuuya. Baalumi abanakazi bakali kuyandisya zyakulwana abakali aabuntu bwabunyama bakazwaata “buntu bupya bwakalengwa kweendelana akuyanda kwaLeza.” (Ef. 4:24) Zimwi zilongezyo zyiingi nzyaakaamba Isaya zizoozuzikizigwa munyika mpya. Pesi, lino tuli kujana zilongezyo zyiingi muparadayizi yakumuuya. Lino atubone mbutugwasigwa aaparadayizi eeyi yakumuuya akuti nkamboonzi nituteelede kuzwa mulinjiyo.

MBUBALI KUGWASIGWA AABO BALI MUPARADAYIZI YAKUMUUYA

5. Mbuli mbukwaambidwe muli Isaya 65:​13, tujanaanzi muparadayizi yakumuuya?

⁵ Balakkuta munzila yakukozyanisya alubo balikukatalusigwa. Bupolofita bwa-Isaya butondeezya musiyano uuliwo aakati kabuumi bwabaabo bali muparadayizi yakumuuya abaabo batali muparadayizi yakumuuya. (Bala Isaya 65:13.) Jehova ulikusanina bakombi bakwe achakulya chiingi chakumuuya. Tujana muuya uusalala, tuli aaJwi lyakwe alubo tuli aachakulya chiingi chamubukombi kuchitila kuti ‘tulye, . . . tunywe, . . . [akuti] tusekelele.’ (Kozyanisya aa Chiyubunuzyo 22:17.) Pesi aabo batali muparadayizi yakumuuya ‘balikufwa nzala . . . , nyota [alubo] balikufwa nsoni.’ Taakwe chakulya chamubukombi nchibali kujana pe.—Am. 8:11.

6. Kweendelana alugwalo lwa Joweli 2:​21-24, niinzi nzyatupa Jehova alubo nzyatupa zitugwasya biyeni?

⁶ Chiindi Joweli naakapolofita, wakaamba chakulya chili mbuli zilyo, wayini amafuta aama-olifa kuti atondeezye Jehova mbasanina bakombi bakwe azintu nzibayanda kuswaanizya achakulya chamubukombi. (Joe. 2:​21-24) Uchita oobo kabelesya Bbayibbili, mabbuku eesu, webbusayiti yesu amiswaangano yambungano, yamabazu ayabbooma. Tulagwasigwa achakulya eechi buzuba abuzuba alubo nga twakkuta munzila yakukozyanisya akukatalusigwa.

7. Niinzi chipa kuti ‘myoyo yesu ikkomane’? (Isaya 65:14)

⁷ Balabotelwa alubo balakkutisikana. Bakombi baJehoba ‘baloongolola cakukondwa’ akaambo kakuti balamulumba Jehova. (Bala Isaya 65:14.) ‘Myoyo yesu ilakkomana’ akaambo kakuti kasimpe kasimya lusyomo lwesu, zisyomezyo zili muJwi lyaLeza zilatuumbulizya akuti tuli aabulangilizi muchinunuzyo chaKkristu. Kwaambuula atala azintu eezi katuli aabakwesu abachizi kupa kuti tubotelwe chachoonzyo.—Int. 34:8; 133:​1-3.

8. Nziizili zintu zibili zipati zitondeezya mbuyibede paradayizi yakumuuya?

⁸ Luyando akujatana kwabakombi baJehova nzizyo zintu zibili zipati zitondeezya mbuyibede paradayizi yakumuuya. ‘Chaanzyo chakujatana’ chitugwasya kuti tuyeeyele mbubunoobede buumi munyika mpya oomo bakombi  baJehova mubatanooyandane loko akujatana kwiinda mbubali kuchita lino. (Kol. 3:14) Umwi muchizi wachiKkristu wakaamba nzyaakabona chiindi naakasaanguna kubonana aabakombi baJehova. Wakati: “Teendakali kukonzya pe kubotelwa, nikuba mumpuli yangu teendakali kubotelwa pe. Bantu mbindakasaanguna kubona kabatondeezyania luyando lwachoonzyo Mbaakamboni baJehova.” Muntu woonse uuyanda kubotelwa chachoonzyo akukkutisikana weelede kuza muparadayizi yesu yakumuuya. Bakombi baJehova bayitwa aazina lilemekwa alubo bali aabweenzinyina busimide aJehova abakombinyina kazitakwe ndaba kuti bantu bali munyika bababona biyeni.—Is. 65:15.

9. Lugwalo lwa Isaya 65:​16, 17 lutusyomezyaanzi?

⁹ Balikkalikene alubo balibeteme. Lugwalo lwa Isaya 65:14 lwaamba kuti aabo basala kukkala kunze aaparadayizi yakumuuya ‘bayoolila akaambo kakucisa kwamyoyo yabo alimwi bayakoomoka akaambo kamuuya uuside.’ Kutegwani azintu zyoonse zipa kuti bakombi baLeza bamvwe kuchisa akuti bakataazikane? Zintu eezyo ‘ziyoolubwa alubo ziyoosiswa kumeso aaLeza.’ (Bala Isaya 65:​16, 17.) Jehova uzoogwisya mapenzi woonse alubo tatukaziyeeyi lubo pe zintu eezyo zipa kupa kuti tumvwe kuchisa.

10. Nkamboonzi nubotelwa akaambo kakuba aakati kabakwesu abachizi bachiKkristu? (Langa chifanikisyo.)

¹⁰ Nikuba lino, nga twalimvwa katubeteme chiindi nitunga tuli kumiswaangano yambungano, ooko nkutunga twalyiiba akuluba zintu zitukataazya zili munyika eeyi mbi. Alubo tugwasya bakwesu abachizi kuti balyiibe chiindi nitutondeezya michelo yamuuya uusalala iili mbuli luyando, kukondwa, luumuno, luzyalo amoyo uubombede. (Gal. 5:​22, 23) Nchilongezyo kuba mumbunga yaLeza. Aabo bakanza kukkala kabali muparadayizi yakumuuya bazoobona chisyomezyo chaLeza chili atala ‘amajulu mapya anyika mpya’ kachili kuzuzikizigwa chakumaninina.

11. Kweendelana a Isaya 65:​18, 19, paradayizi yakumuuya njaakalenga Jehova itujatikizya biyeni?

¹¹ Balalumba alubo balabotelwa. Isaya wakayinkilila kunembo kwaamba kaambo kapa kuti ‘tusekelele akukondwa’ katuli muparadayizi yakumuuya. Paradayizi eeyi yakukozyanisya yakalengwa aaJehova. (Bala Isaya 65:​18,19.) Nkinkaako, zili aamutwe kuti Jehova atubelesye kuti tugwasye bantu kuti bazwe mumbunga zili munyika zitabayiisyi kasimpe kali atala aLeza mpawo baze muparadayizi yakumuuya mbotu. Tulabotelwa azilongezyo nzitujana akaambo kakuba mukasimpe alubo tukanzide  kubuzya bamwi atala azilongezyo eezyo.—Jer. 31:12.

12. Zisyomezyo zili muli Isaya 65:​20-24 zipa kuti umvwe biyeni alubo nkamboonzi?

¹² Mbukunga tuli muparadayizi yakumuuya, tulabotelwa abulangilizi mbutulaabo. Yeeya atala azintu nzituyoobona anzituyoochita munyika mpya. Bbayibbili litusyomezya kuti: “Takukabi limbi mwana muvwanda uupona buyo mazuba masyoonto . . . naba mudaala waalilwa kupona mazuba aabuumi bwakwe.” Tuyooyaka “maanda akukkala mulingawo” alubo ‘tuyoosyanga myuunda yamisaansa akulya micelo yanjiyo.’ ‘Tatukabelekeli maliminya pe’ nkaambo tunooli ‘bana balelekedwe a Jehova.’ Jehova utusyomezya kuti tuyoopona buumi bubotu, buli aamakanze alubo tunookwabililidwe. Nikuba “kabatanaita,” Jehova unoozizi umwi awumwi nzyayanda alubo unooli aachoonzyo chakuti ‘wakkutya cilenge coonse cipona.’—Is. 65:​20-24; Int. 145:16.

13. Lugwalo lwa Isaya 65:25 lutondeezya kuchincha kuli nkubachita bantu chiindi nibasaanguna kubelekela Jehova?

¹³ Bali aaluumuno alubo balikwabililidwe. Bantu biingi bakali aabuntu bwabunyama bakachincha maponeno aabo kabagwasigwa aamuuya uusalala. (Bala Isaya 65:25.) Bakabeleka changuzu kuti bachinche buntu bwabo butali kabotu. (Rom. 12:2; Ef. 4:​22-24) Nichoonzyo, bakombi baLeza bachili aachibi, nkinkaako, chiindi chiingi tunoopambanisya. Nikuba oobo, Jehova wakajatanizya “bantu bamisyobo yoonse” bamuyanda kuti babe aaluumuno lwachoonzyo akuti bajatane. (Tit. 2:11) Eechi nchigambyo chikonzya kuchitwa aaLeza singuzuzyoonse alikke.

14. Zyakachitika kuli uumwi mukwesu zitondeezya biyeni kuti zyaambidwe muli Isaya 65:25 nzyachoonzyo?

¹⁴ Nichoonzyo na kuti bantu balakonzya kuchincha buntu bwabo? Atubone chikozyano. Umwi mulombe wakanjila mujele kwaziindi zyiingi kali aaminyaka iili 20 akaambo kabuntu bwakwe bwakutalijata akuyandisya zyakulwana. Wakasungwa akubikkwa mujele akaambo kakubba moota, kupaza maanda aabantu ayimwi milandu mipati. Taakwe muntu ngwaakali kubala pe, wakalilibambilide kuuntya kasuko. Chiindi naakasaanguna kumvwa kasimpe kamuBbayibbili anaakasaanguna kunjila miswaangano yaBakamboni baJehova, wakaziba makanze aabuumi aakuti tukombe Jehova katuli muparadayizi yakumuuya. Kuzwa naakabbabbatizigwa, chiindi chiingi ukkala kayeeya mbulwakazuzikizigwa lugwalo lwa Isaya 65:25 kulinguwe. Wakali mbuli mulavu pesi lino wakaba mbuli mbelele nkaambo waba aaluumuno abantu.

15. Nkamboonzi nitutamba bantu kuti baze muparadayizi yakumuuya alubo nga tulazichita biyeni?

¹⁵ Lugwalo lwa Isaya 65:13 lusaanguna aamajwi aakuti: “Mboobu mbwaamba Mwami Singuzuzyoonse Jehova.” Vesi 25 imana aamajwi aakuti “mbwaamba Jehova.” Majwi aakwe alazuzikizigwa chiindi choonse. (Is. 55:​10, 11) Paradayizi yakumuuya mpiili choonzyo. Jehova uli aampuli yabakombi bakwe alubo basiyene loko abamwi. Akaambo kakuti tuli aakati kabakombi bakwe, tuli aaluumuno lino alubo tulikwabililidwe munyika eeyi iili aabantu bayandisya zyakulwana. (Int. 72:7) Akaambo katwaambo ootu, tuyanda kugwasya bantu biingi kuti baze mumpuli yaJehova. Tulakonzya kuzichita eezi kuti twagwasya bantu kuti babe basikwiiya.—Mt. 28:​19, 20.

MBUTUKONZYA KUGWASYA BANTU KUTI BAZE MUPARADAYIZI YAKUMUUYA

16. Bantu bakwelwa biyeni kuti baze muparadayizi yakumuuya?

¹⁶ Toonse tuli aamulimu uuyandikana wakugwasya bantu kuti bayande kuza muparadayizi yakumuuya. Kuti tukonzye kuchita mulimu ooyu, tweelede kutobelezya Jehova. Jehova  taamanikizyi bantu kuti babe mumbunga yakwe. Pesi ‘ubakwela’ kabotu-kabotu. (Joh. 6:44; Jer. 31:3) Jehova ukwela bantu bali aamyoyo mibotu, aabo bayanda kwiiya atala aluyando lwakwe abuntu bwakwe. Niinzi nzitukonzya kuchita kuti buntu bwesu bubotu azintu zibotu nzituchita zipe kuti bantu bayande kuza muparadayizi yakumuuya?

17. Niinzi nzitukonzya kuchita kuti tupe kuti bantu baze muparadayizi yakumuuya?

¹⁷ Zimwi zikonzya kupa kuti bantu baze muparadayizi yakumuuya ninzila njitubajataayo bakwesu abachizi. Tubatondeezya luyando akubafwida luzyalo. Chiindi bapya nibanjila miswaangano yambungano, tuyanda kuti babone zintu nzibakabona aabo bakasaanguna kunjila aambungano yakuKkorinte, amwi bantu aabo teebakali basyomi pe. Bakaamba kuti: “Kwaamba choonzyo, Leza mpali aakati kanu.” (1 Kor. 14:​24, 25; Zek. 8:23) Nkinkaako, tweelede kwiinkilila kunembo kuswiilila malayilile aakuti ‘tukkale muluumuno abamwi.’—1 Tes. 5:13.

18. Niinzi zikonzya kupa kuti bantu baze mumbunga yesu?

¹⁸ Chiindi choonse, tweelede kubona bakwesu abachizi mbuli mbaababona Jehova. Tulakonzya kulangisisya buntu bubotu mbubali aabo kutali kutamaninina kwabo nkaambo kutamaninina ooko kuzoomana. Tulakonzya kubambulula kutamvwanana aakati kesu munzila yaluyando kwiinda ‘mukufwidilina luzyalo, kuba aamoyo mutete, katulekelelana amoyo woonse.’ (Ef. 4:32) Kuti bantu bazibona eezi, ambabo bayooyanda kujatwa munzila iili oobo. Eezi ziyoopa kuti baze muparadayizi yakumuuya. b

 KKALA KULI MUPARADAYIZI YAKUMUUYA

19. (a) Mbuli mbukutondeezedwe mukabbokesi kati “ Bakazwa Mpawo Baboola,” niinzi bamwi nzibakaamba nibakaboola muparadayizi yakumuuya? (b) Tweelede kukanza kuchitaanzi? (Langa chifanikisyo.)

¹⁹ Tulabotelwa akaambo kakuba muparadayizi yakumuuya. Paradayizi yakumuuya nimbotu loko lino kwiinda chiindi alubo mwaba bantu biingi bakomba Jehova. Toonse atwiinkilile kunembo kutondeezya kuti tulayilumba paradayizi yakumuuya njaakatulengela Jehova. Kufumbwa muntu uuyanda kukatalusigwa, kukkutisikana, kubatama akukwabililwa weelede kuza muparadayizi yakumuuya alubo atazwi pe mulinjiyo. Nikuba oobo, tweelede kuchenjelela nkaambo Saatani ulikuchita nzyaakonzya kuti atweene kuti tuzwe muparadayizi yakumuuya. (1 Pet. 5:8; Chi. 12:9) Tatweelede kumuzumizya pe kuti atugwisye. Atubeleke changuzu kuti tupe kuti paradayizi yakumuuya ikkale kayili mbotu, kayisalala alubo kamuli luumuno.