1. Kodi cinyi cinozwi paraizo ye kumwiya, uye tinodikana kushinga kuitei?

 NYAMASI uno, pa nyika pano paraizo yekuti mamiriyonji e anhu ari kurarama imona mu runyararo uye awona ano zvakawanda zve kuita. Anhu aa mu paraizo ii, akashinga kutama kubudemo uye awona ari kuda kubetsera anhu akawanda kuti abatane pamwepo nawo mu mbuto ii yakanaka maningi. Kodi i mbuto ipi iyona? I paraizo ye kumwiya! a

2. Cinyi cinoshamisa patinoreketa ngezve paraizo ye kumwiya?

² Zvinoshamisa mushobo wakakwanisa Djehovha kugadzira mbuto yakacengeteka mu nyika yakacinjwa na Sathani, yogara mbuto yakadzara no matambudziko, uzondi, uye ngozi. (1 Juau 5:19; Zvak. 12:12) Mwari wedu ano rudo anonyasa kuziya mashatire a zvakaita kurarama mu mugariro we zviro uu; ndiyo ndaa, iyena anotipasa rucengeteko ratinoda kuti tirumbwe tecikura pane zve kunamata, kuitira kuti tikwanise kurumbwa tecimuseenzera no mupfaro. Bhaibheri rinoreketa ngezve paraizo ye kumwiya hinga “mbuto ye kutizira” uye “jardhim yakanyasa kudirirhwa.” (Isa. 4:6; 58:11) No makomborero a Djehovha, aya anoita dii ro paraizo ii ye kumwiya, angakwanisa kuzwa mupfaro uye kucengeteka kunyazi mu mazuwa ano e kupedzesera anoshupha kurarama.—Isa. 54:14; 2 Ti. 3:1.

3. Masoko ari pana Isaya kapituro 65 akadzadzika rini?

³ Djehovha akaseenzesa muphorofita Isaya kuti apanganidze mushobo waizogara upenyu mu paraizo ye kumwiya. Imwimwi mungaerenga zviro izvi mu kapituro 65 ye bhuku ra Isaya, mekuti uphorofiti uu wakadzadzika ke kutanga mu gore ra 537 K.A.A., Adjudha paakasudzunurhwa ku Bhabhironi, uye ohwirira ku nyika  yaakabarirhwa. Djehovha akakomborera anhu ake uye akabetsera Adjudha pa kuwakazve thaundi re Djerusarema rainga ratsakatiswa. Adjudha aizoitazve kuti Djerusarema igare mbuto yakanaka ye kuraramira uyewo kuwakisazve tempro kuti igare mbuto ye kunamatira Djehovha.—Isa. 51:11; Zak. 8:3.

4. Masoko api ari pana Isaya kapituro 65 ari kudzadzika mazuwa ano?

⁴ Kudzadzika kecipiri ke uphorofita wa Isaya, kakatanga mu gore ra 1919 K.A. Mu gore iri, anamati a Djehovha e mazuwa ano akasudzunurhwa pa maitiro e Bhabhironi Guru. Hino, ndipo pakatanga kukura ke paraizo ye kumwiya uye ungano dzakawanda dzakaumbwa mu nyika yese. Anarume no anakadzi, ekuti kare-kare airarama upenyu we uhure uye aiita zvecisimba, akatanga kupangidza mawara e Cikristu uye “kupfeka unhu upsva wakasikwa maererano no kuda ka Mwari.” (Aef. 4:24) Izvirokwazvo kuti makomborero akawanda akatarhwa na Isaya, acanyasa kudzadzika basi mune ramangwana, mu nyika ipsva. Asi kunyazi zvino, aya ari kurarama mu paraizo ye kumwiya angakwanisa kugara no makomborero akawanda. Ngatione kuti ngei zvakatinakira kugara mu paraizo ii ye kumwiya uye kuti ngei atitodikani kubudemo.

IMWIMWI MUNOZWA KUDINI MU PARAIZO YE KUMWIYA

5. Maererano na Isaya 65:13, makomborero api atinawo nge kugara mu paraizo ye kumwiya?

⁵ Uthongo wakanaka uye kunyasa kuguta pa zvekurhya zve kunamata. Uphorofita wa Isaya unopangidza musiyano wakakura uripo pakati po aya ari mu paraizo ye kumwiya no aya asiripi imona. (Erengai Isaya 65:13.) Djehovha anopasa zvese kutodarika zvinodiikanwa no aseenzi ake, kuti awona arumbwe ecimunamata. Iyena anotipasa mwiya wake mucena, Soko rake Bhaibheri, uye zvokurhya zvakawanda zve kumwiya, kuitira kuti isusu “tirhye, . . . timwe, . . . [uye] tipfare.” (Ezanisai na Zvakapangidzwa 22:17.) Mugariro wedu we zviro zvakasiyana maningi no mugariro we aya ari kunza ke paraizo ye kumwiya; anhu aya “anozwa nzara . . . , anozwa mukaha . . . , [uye] anopsveruka.” Awona anozwa kuti pano ciro ciri kushota mu upenyu wawo, ngokuti aana ushamwari na Mwari.—Amo. 8:11.

6. Joeri 2:21-24 inopangidza kudini zviro zvinganani zvatinopaswa na Djehovha, uye tinganyasa kukhorovhera kudini zvese izvi?

⁶ Muphorofita umweni, Joeri, wakaseenzesa zviro zve zuwa no zuwa, zvakadai hingana zvokurhya, vhinyu, uye azeiti, kutira kuti apangidze kuti Djehovha ano rupo rakakura. Ndiyo ndaa, iyena anotipasa zvese zvatinoda pa kunamata. (Joe. 2:21-24) Djehovha anoita izvona eciseenzesa Bhaibheri, mabhuku edu e sangano, saiti yedu ye jw.org, uyewo misangano yedu, magungano e nharaunda uye magungano. Kana tikanyasa kukhorovhera zvese zvatinopaswa na Djehovha, ticazwa tino uthongo wakanaka uye tecinyasa kugutiswa pane zve kunamata.

7. Cinyi cinotipasa “mugariro wakanaka we mu mwoyo”? (Isaya 65:14)

⁷ Akapfara uye akagutsikana. Anhu a Mwari “anodainzira no mupfaro” ngokuti mu mwoyo mawo makadzara no kutenda, nge ndaa ye zviro zvinoita Djehovha. (Erengai Isaya 65:14.) Tino “mugariro wakanaka mu mwoyo” nge ndaa ye zvokwadi zve Bhaibheri zvinotibambisa uye nge ndaa ye kariro yedu yakabamba inotsamira mu cibairo ca Djesu. Uyewo kucedza no hama no hanzvadzi dzedu ngezve zviro izvi zvakanaka maningi, zvinotunhudzira mupfaro wedu!—Pis. 34:8; 133:1-3.

8. Zviro zvipi zviiri zvinokosha zvinoita dii re paraizo ye kumwiya?

⁸ Paraizo ye kumwiya inooneka pa zviro zviiri zvinokosha: Rudo uye rubatano pakati pe anhu a Djehovha. “Cisungo ici ce rubatano” cinotipangidza mushobo ucagara upenyu mu nyika ipsva aseenzi a Djehovha maacararama no rudo uye rubatano rakakura kudarika ratinaro nyamasi uno. (Ako. 3:14) Hanzvadzi  imweni inopanganidza zvayakaona payakaziya Apupuri a Djehovha ke kutanga: “Kandiri, zvaindishuphira kuona mupfaro, kutobatanidzawo mu mhuri yangu. Asi, ndakatanga kuona anhu anobatana no rudo re zvirokwazvo reciseenza pakati pe Apupuri a Djehovha.” Munhu upi hake unoda kuzwa mupfaro uye kugutsikana, unodikana kuziya paraizo yedu ye kumwiya. Anhu angareketa zvaanoda ngezva Apupuri a Djehovha, asi isusu tinoziya kuti tino zina rakanaka, uye maitiro akanaka pamberi pa Djehovha uye pakati pe hama no hanzvadzi dzedu mu nyika yese.—Isa. 65:15.

9. Maererano na Isaya 65:16, 17, zvinyi zvicaitika no zviro zviya zvinotibarira matambudziko?

⁹ Akaterama uye akarerukirhwa. Pana Isaya 65:14, tinoerenga ngezve mugariro we aya anosanangura kugara kunza ke paraizo ye kumwiya, uye awona “anodainzira nge ndaa ye kurhwadziwa kawo mu mwoyo [uye] anocema nge ndaa ye kutambudzika kawo.” Izvirokwazvo kuti anhu a Mwari anobatanawo no matambudziko akawanda, asi zviro izvi mbai-mbai pano “zvicakanganika [uye] zvicabviswa pamberi pa” Mwari. (Erengai Isaya 65:16, 17.) Djehovha acaita kuti matambudziko edu apere, uye nokuhamba ke nguwa kunyazi zviro zvakashata zvakaitika na isusu zvinoita kuti tirhwadziwe maningi, zvicapera zvacose.

10. Ngei imwimwi munoona kuti makomborero kugara pamwepo no hama no hanzvadzi? (Onaiwo foto.)

¹⁰ Kunyazi mazuwa ano, zvinotisudzunura mu ndangariro patinoenda ku misangano, ikona tinorerukirhwa uye tinosiya sure stresi ye nyika ino yakashata. Patinopangidza mawara anoita dii re zvibereko zve ku mwiya wa Mwari, hinga rudo, mupfaro, runyararo, unaki, uye upfawi tinonga teciita kuti mu paraizo ye kumwiya mugare makaterama. (Aga. 5:22, 23) Katiri isusu tese i makomborero akakura maningi kugara tiri tese mu sangano ra Mwari! Uye aya anorumbwa ari mu paraizo ye kumwiya, mbai-mbai pano acaona kudzadzika kakakwana ke zvipikirhwa zva Mwari, zve kusika “matenga mapsva no nyika ipsva.”

11. Maererano na Isaya 65:18, 19, munozwa kudini pamunoziya kuti Djehovha akagadzira paraizo ye kumwiya?

¹¹ Ecitenda uye ecipfara. Isaya unotipasawo cikonzero cimweni cinoita kuti “tipfare uye timhuke no mupfaro” mu paraizo ye kumwiya. Ngokuti paraizo ii i cisikwa ca Djehovha. (Erengai Isaya 65:18, 19.) Masangano akaumbwa nge nyika ino aafundisi anhu ngezva Mwari; ndiyo ndaa, zvino musoro kuti Djehovha ari kutiseenzesa kuti tibvise anhu mu masangano aya uye kuti awona aite dii re paraizo ii ye kumwiya yakanaka! Isusu tinopfara maningi no makomborero ese aya atakapaswa nge kugara mu cokwadi, uye  tinoda kubvunza anhu ese ngezve makomborero aya akanaka maningi.—Djer. 31:12.

12. Munozwa kudini pamunoerenga zvipikirhwa zvatinogumira pana Isaya 65:20-24, uye ngei?

¹² Imwimwi amuzwi kupfara here uye kutenda mu mwoyo pamunorangarira ngezve kariro yatinayo nge kugara dii re paraizo ye kumwiya? Cimboimai padoko uye rangaridzai ngezve kuti upenyu ucazogara kudini mu nyika ipsva ya Mwari! Bhaibheri rinogondesa kuti: “amuzoonekizve mwana mudoko unorarama mazuwa padoko, kana kuti munhu acembera asikararami mazuwa ake ese.” Isusu ‘ticawaka nyumba uye togaremo uye ticasima minda dze muuvha uye torhya micero yadzo.’ Isusu ‘atizoseenzi no simba pasina,’ ngokuti ‘ticakomborerhwa na Djehovha.’ Iyena anogondesa kutipasa upenyu uno cinangwa ce zvirokwazvo, upenyu wakacengeteka, uye unopfadza. “Kunyazi asati atodainzira,” Djehovha anonga aakuziya zvinodiikanwa no munhu umwe na umwe uye ‘acadzadzisa zvido zve zvisikwa zvese.’—Isa. 65:20-24; Pis. 145:16.

13. Isaya 65:25 inopangidza kudini cinjo dzinoizwa no anhu paanofunda cokwadi?

¹³ Kucengeteka uye mu runyararo. No rubetso re mwiya mucena wa Djehovha, anhu akawanda ekuti kareko ainga ari mabhinya, aida zve kupondana uye ainga asikazi kugondeka, akaita cinjo dzinoshamisa mu upenyu wawo. (Erengai Isaya 65:25.) Mumasure me kupeta masimba, awona akakwanisa kusiya unhu wawo wakashata. (Aro. 12:2; Aef. 4:22-24) Izvirokwazvo kuti nge ndaa ye kutama kukwana kedu, isusu tinorumbwa tecishaisha. Asi Djehovha ari kuunganidza “anhu ese” anomuda uye anoda umwe na umwe; uye hinga mubairo wakhona, isusu tino runyararo rezvirokwazvo uye rubatano. (Tito 2:11) Ici i cishamiso cingakwanisa kuizwa basi na Mwari we masimba-ese!

14. Muezaniso we hama imweni unopangidza kudini kuti masoko ari pana Isaya 65:25 ngee zvirokwazvo?

¹⁴ Kodi munhu zvezvirokwazvo angakwanisa kucinja unhu wake here? Onai muezaniso we mudjaha umweni, wekuti paainga ano makore 20 wakasungwa kakawanda uye wairarama upenyu we uhure uye we ubhinya. Iyena wainga wasungwa nge ndaa ye kuba makaru, kuphwanya nyumba dze anhu, uye no krimi dzimweniwo. Iyena wainga akagadzirira nguwa dzese kureketedzana no munhu upi hake. Paakandozwa basi ngezve cokwadi ce Bhaibheri, wakatanga kupinda misangano ye Apupuri a Djehovha, uye iyena wakagara no rugondo rokuti wainga agumira ciro caishota mu upenyu wake—paraizo ye kumwiya. Mumasure me kubhabhatidzwa, iyena nguwa dzese waiima kuti anyase kurangarira ngezve masoko ari pana Isaya 65:25 kuti aibatana kudini no upenyu waainga anawo. Iyena wainga asiya kugara munhu unothyisa waiita zvecisimba hingana mhondoro, uye wakagara munhu wakanaka hingana kabira.

15. Ngei tinoda kupika anhu amweni kuti abatane na isusu mu paraizo ye kumwiya?

¹⁵ Isaya 65:13 inotanga yeciti: “Izvi ndizvo zvinorekethwa na Cangamire Tenzi Djehovha.” Uye vhersikuro 25 inopedzesa yeciti: “Anodaro Djehovha.” Uye isusu tinoziya kuti zvipikirhwa zva Djehovha zvinodzadzika nguwa dzese. (Isa. 55:10, 11) Paraizo ye kumwiya yaa yezvirokwazvo. Djehovha aunganidza mhuri ye anamati asikaezaniswi, hingana kuti tiri ku mbuto imweni yakaparadzana no nyika ino inoda zve cisimba. (Pis. 72:7) Ndiyo ndaa, tinoda kubetsera anhu akawanda atinokwanisa kuti abatane na isusu mu mhuri ii, yo nyika yese. Isusu tinokwanisa kuita izvi nge kukanda ndangaridzo dzedu pa basa re kuita afundi.—Mat. 28:19, 20.

KUBETSERA AMWENI KUTI ADE KUPINDA MU PARAIZO YE KUMWIYA

16. Cinyi cingabetsera anhu amweni kuti adewo kuita dii re paraizo ye kumwiya?

¹⁶ Umwe na umwe wedu ungakwanisa kuita ciro cinokosha pa kubetsera amweni kuti ade kupinda mu paraizo ye kumwiya. Isusu tingaita izvi patinoteedzera Djehovha. Djehovha  aabambidziri munhu kuti agare dii re mhuri yake. Pane kudaro, iyena “anounzisa” anhu kaari nge mushobo wakanaka. (Juau 6:44; Djer. 31:3) Ndiyo ndaa, mumasure me kufunda ngezve mawara a Djehovha uye unhu wake, zvinoshupha kuti munhu uno mwoyo unoda arambe kugara shamwari yake. Asi mawara edu akanaka no maitiro edu angakwanisa kudini kuunzisa anhu ku paraizo ye kumwiya?

17. Tingaunzisa kudini anhu amweni ku paraizo ye kumwiya?

¹⁷ Umwe we mushobo we kuunzisa anhu ku paraizo ye kumwiya, i kubata hama no hanzvadzi dzedu no rudo uye no unaki. Munhu paanouya kekutanga mu Nyumba ye Umambo, isusu tinoda kuti iyena azwe hinga mushobo wekuti pamweni wakazwa aya akapinda misangano mu ungano ye kare ye ku Korinti. Awona akagara no cokwadi uye akati: “Zvezvirokwazvo, Mwari ari pakati penyu.” (1 Ako. 14:24, 25; Zak. 8:23) Kuti izvi zviitike, tinodikana kurumbwa teciteerera zano re ‘kugara no runyararo no umwe na umwe wedu.’—1 Ate. 5:13.

18. Cinyi cingaunzisa anhu ku sangano redu?

¹⁸ Nguwa dzese tinodikana kuedza kuona hama no hanzvadzi dzedu hinga mushobo wadzinooniwa na Djehovha. Tinoita izvona nge kukanda ndangariro dzedu pa mawara adzo, haiwa pa kutama kukwana kawo, ngekuti ikona mbai-mbai pano kunonga kusisinazve. Tingagadzirisa cinetso cipi haco catingagara naco no hama yedu nge mushobo wakanaka, nguwa dzese ‘tecibatana zvakanaka, tecizwirana usisi, tecirekererana no mwoyo wese.’ (Aef. 4:32) Nge mushobo uwona, paraizo ye kumwiya icaita kuti anhu amweni adewo kubathwa kudaro. b

 RUMBWAI MURI MU PARAIZO YE KUMWIYA

19. (a) Maererano no bhokisi rinoti: “ Awona Akabuda uye Ohwirira,” zvinyi zvakabhuiwa no anhu anganani mumasure me kuhwirira mu paraizo ye kumwiya? (b) Tinodikana kushinga kuitei? (Onaiwo mufanikiso.)

¹⁹ Isusu tinopfara maningi nge kuita dii re paraizo ye kumwiya! Nyamasi uno paraizo ii ye kumwiya yakarungama maningi kudarika kare, uye anhu akawanda ari kuita dii re paraizo iyona. Isusu ticarumbwa tecitenda Djehovha nge paraizo ii yaakatiitira nokusikaperi. Kana munhu ecida kuzwa mupfaro, akaterama, uye akacengeteka anodikana kundoita basi dii re paraizo ii ye kumwiya uye otama kubudemo! Asi ngwarirai, ngokuti Sathani uri kurumbwa eciita zviri zvese kuti aticengedze, uye atibvise mu paraizo ii ye kumwiya. (1 Ped. 5:8; Zvak. 12:9) Atizombotenderi kuti iyena akwanise kuita izvona. Ndiyo ndaa, ngatiite zvese zvatinokwanisa kuti ticengetedze kurungama, kucena, uye runyararo ratinaro mu paraizo ii ye kumwiya.