1. Мар со сыӵе духовной рай но мар каремзы потэ отын улӥсьёслэн?

 ТУННЭ музъем вылын рай вань. Отын уло трос миллион тупаса улонэз яратӥсь адямиос. Ваньзы соос ӟеч ужъёс лэсьто. Со райын улӥсьёслэн отысь потэмзы уг поты. Со сяна, соос мукетъёссэ но ӧтё отчы пырыны. Кыӵе рай сярысь вераськон мынэ? Со духовной рай! a

2. Малы туж паймымон, туннэ духовной рай вань шуыса?

² Та дуннеын адямиос лекъяськыса но ог-огзэс адӟемпотостэм карыса уло (1 Иоанн 5:19; Усьт. 12:12). Нош Иегова сюлмаське аслаз калыкез сярысь. Со кылдытӥз духовной рай, кытын солэн ужась-тыршисьёсыз тупаса но огкылысь улыны быгато. Со духовной раез Библия ӵошатэ ватӥськон интыен но «вуэн тырмыт кисьтэм садэн» (Ис. 4:6; 58:11). Иегова бакель каре аслэсьтыз калыксэ, соин ик соос отын таӵе секыт вакытэ но кышкатэк но шумпотыса уло (Ис. 54:14; 2 Тим. 3:1).

3. Кызьы Исаиялэн книгаысьтыз 65-тӥ люкетысь азьпалзэ ивортон нырысетӥзэ быдэсмиз?

³ Иегова вераз, кыӵе улон луоз духовной райын. Со сярысь лыдӟыны луоз Исаиялэн книгаысьтыз 65-тӥ люкетысь. Та азьпалзэ ивортон нырысетӥзэ быдэсмиз асьме  вакытлэсь азьло 537-тӥ арын. Соку еврейёс, кудъёсыз ӧпкелизы, Вавилон пленысь вордскем музъемазы берытскизы. Иегова соосты бакель кариз. Со юрттӥз соослы тупатыны Иерусалимез но храмез, кытчы быдэс израиль калык Иеговалы йыбыртъяны ветлэ вал (Ис. 51:11; Зах. 8:3).

4. Кызьы Исаиялэн книгаысьтыз 65-тӥ люкетысь азьпалзэ ивортон асьме дыре быдэсме?

⁴ Исаиялэн книгаысьтыз азьпалзэ ивортон кыкетӥзэ быдэсмыны кутскиз 1919-тӥ арын. Соку Иеговалэн ужась-тыршисьёсыз Быдӟым Вавилонлэн ки улысьтыз мозмытэмын вал. Со арысен духовной рай бадӟымгес луыны кутскиз. Быдэс дунне вылын Эксэйлык сярысь ӟеч иворез тодытӥзы, кенешъёс кылдылӥзы, нош духовной райын улӥсьёс умойгес возьматыны кутскизы Христослэн кадь сямъёссэс. Пиосмуртъёс но кышномуртъёс, кудъёсыз азьвыл лекъяськыса, азыса-калгыса улӥзы, воштӥськизы но «выль адями» луизы (Еф. 4:24). Исаиялэн книгаысьтыз азьпалзэ ивортон быдэсак быдэсмоз выль дуннеын гинэ. Но духовной райын улон милемлы али ик ини пайда вае. Ойдолэ тодомы, кыӵе ми пайда басьтӥськомы но малы духовной райысь милемлы ноку но потоно ӧвӧл.

МАЛЫ МИЛЕМЛЫ КЕЛЬШЕ ДУХОВНОЙ РАЙЫН УЛЫНЫ

5. Кызьы асьме вылын быдэсме азьпалзэ ивортон, кудӥз гожтэмын Исаиялэн 65:13?

⁵ Милям вань сиёнмы но умой тазалыкмы. Исаиялэн азьпалзэ ивортонысьтыз яркыт адӟиське, маин пӧртэм луо соос, кинъёс духовной райын уло, соослэсь, кинъёс отын уг уло. (Лыдӟе Исаиялэсь 65:13.) Иегова — шырыт сямо Атай. Со туж сюлмаське аслаз калыкез сярысь. Со сётӥз милемлы святой духсэ, Библиез но тырмыт духовной сиён, ми сютэм медам улэ но шумпотыса мед уломы шуыса. (Ӵошатэ Усьтӥськонэз 22:17.) Нош мар вераны луоз соос сярысь, кинъёс духовной райын уг уло? Соос курадӟо, сютэм уло но возьытэ усемын, малы ке шуоно соос Инмарез уг тодо (Ам. 8:11).

6. Кызьы Иегова быдэстэ сётэм кылзэ, кудӥз гожтэмын Иоильлэн 2:21—24?

⁶ Мукетыз пророк, Иоиль, нянь, виноград сок но вӧй сярысь вераса, возьматэ, Иегова аслаз калыкезлы ваньзэ кулэзэ сётэ шуыса, озьы ик духовной сиён но (Иоиль 2:21—24). Кылсярысь, милям вань Библимы, публикациосмы но сайтмы. Озьы ик милям ялан ортчо пумиськонъёсмы но конгрессъёсмы. Озьыен, адӟиське, милям духовной сиёнмы тырмыт шуыса.

7. Малы асьмеос «сюлэммы шумпотыса» кырӟаськомы? (Исаия 65:14).

⁷ Ми шудоесь. Иеговалэн ужась-тыршисьёсыз «сюлэмзы шумпотыса» кырӟало. (Лыдӟе Исаиялэсь 65:14.) Ми тау кариськомы Иеговалы зэмлык понна, кыл сётонъёсыз понна но азьпал улонлы оскон понна, кудӥз милям вань Христослэн кулэмезлы луыса. Куке ми агайёсын но сузэръёсын вераськиськомы вань та бакель каронъёс сярысь, ми эшшо но умойгес валаськомы, макем ми шудоесь! (Пс. 33:9; 132:1—3).

8. Мар духовной райын валтӥсез луэ?

⁸ Духовной райын валтӥсез — со яратон но огкылысь улон. Ми али ик ини тыршиськомы кенешъёсамы ог-огмес яратыса  но огкылысь улыны. Нош выль дуннеын со милям эшшо но умойгес пӧрмоз (Кол. 3:14, ВД). Тани мар вера одӥг сузэр Иеговалэн Адӟись-Ивортӥсьёсызлэн пумиськонъёсазы нырысетӥзэ ветлэмез бере: «Аслам семьяям мон шудо ӧй вал. Нош Иеговалэн Адӟись-Ивортӥсьёсызлэн пумиськоназы ветлэме бере мон нырысьсэ адӟи, кызьы адямиос зэмзэ ик ог-огзэс яратыса уло». Зэмзэ ик шудо луон понна, адямиослы духовной рае лыктоно. Ми доры лыктыса, адямиос адӟозы, мар гинэ ми сярысь медам вералэ, ми зэмзэ ик ог-огмес яратыса но огкылысь улӥськомы шуыса. Соин ик милям Инмар азьын ӟеч ниммы вань (Ис. 65:15).

9. Мар кароз Иегова курадӟонъёсынымы?

⁹ Ми каньыл сюлмын улӥськомы. Соослы, кинъёслэн духовной райын улэмзы уг поты, Иегова вера: «Лулды-сюлэмды куректэмлы чидатэк, куараен бӧрдоды» (Исаия 65:14). Нош туннэ Инмарлэн ужась-тыршисьёсыз но курадӟо ук. Со озьы. Но асьмеос тодӥськомы, азьланяз «куректон-кайгуос вунэтэмын луозы» шуыса. (Лыдӟе Исаиялэсь 65:16, 17.) Вань курадӟонъёсмес быдтэм сяна, Иегова соос сярысь тодэ ваёнъёсмес но ӵушоз.

10. Малы тӥледлы кельше агайёс но сузэръёс пӧлын луыны? (Озьы ик учке суредэз.)

¹⁰ Туннэ ик ини, пумиськонъёсамы лыктыса, милям сюлэммы буйга. Ми отын вань куректонъёсмес но шуг-секытъёсмес вунэтӥськомы. Пумиськонъёс ми понна эмъюм кадесь. Нош эшшо, пумиськонъёсы лыктыса, ми юрттыны быгатомы агайёслы но сузэръёслы буйгатскон шедьтыны. Кызьы? Святой духлэн емышез пӧлы пырись сямъёсты возьматыса — со яратон, шумпотон, тупаса улон, лякытлык но зӥбыт-востэм луон (Гал. 5:22, 23). Макем бадӟым шуд Иеговалэн организацияз луыны! Соос, кинъёс духовной райын улозы, ас синмынызы адӟозы, кызьы Иегова «выль ин, выль музъем» кылдытоз.

11. Кызьы ми асьмеды шӧдӥськомы, духовной райын улыса, кудзэ кылдытӥз Иегова? (Исаия 65:18, 19).

¹¹ Ми тау карыса но шумпотыса улӥськомы. Собере Исаия валэктэ, ми духовной райын шумпотыса улӥськомы шуыса, малы ке шуоно сое кылдытӥз Иегова. (Лыдӟе Исаиялэсь 65:18, 19.) Соин ик  ми пыр Иегова юрттэ адямиослы та дуннеысь потыны, кудӥз сутскем кыр дуннелы укша, но духовной рае пырыны, кудӥз чебер сяськаяськись сад кадь (Иер. 31:12).

12. Кыӵе кылсётонъёс, кудъёсыз гожтэмын Исаиялэн 65:20—24, тӥледлы тужгес но кельшо но малы?

¹² Духовной райын улӥсьёслэн шумпотон понна эшшо одӥг мугзы вань на — со выль дуннеын улыны оскон. Малпалэ ай, кыӵе отын улон луоз! Библиын верамын, отын вож нуныос но, пересьёс но уз кулэ ни шуыса. Асьмеос, коркаос пуктылыса, отын уломы, виноград мерттомы, солэсь емышсэ сиёмы. Асьмеос юнмелы ум тырше ни, малы ке шуоно Иегова асьмемыз бакель кароз. Со сӥзе асьмелы кышкатэк но шумпотыса улон. Иегова вера: «Тазьы луоз: соослэн вазиськемзылэсь азьвыл Мон соослы ответ сёто; соос эшшо вералозы на, нош Мон соосты кыло ини». Выль дуннеын Иегова вань адямиосты тыр кароз (Ис. 65:20—24; Пс. 144:16).

13. Кызьы адямиослэн улонзы воштӥське, куке соос Инмар сярысь тодо?

¹³ Ми тупаса но кышкатэк улӥськомы. Азьвыл куд-ог адямиос пӧйшур кадесь уродэсь, лекесь вал. (Лыдӟе Исаиялэсь 65:25.) Но Инмар сярысь тодыса, соос быдэсак воштӥськизы (Рим. 12:2; Еф. 4:22—24). Но со уг возьматы, соос сьӧлыктэмесь луизы шуыса. Ми азьвыл сямен ик янгышаськомы на. Озьы ке но Иегова асьмемыз, сокем пӧртэм адямиосты, огазея. Соин ик ми пӧлын яратон но тупаса улон вань (Тит. 2:11). Сое лэсьтыны быгатэ Иегова гинэ!

14. Кызьы одӥг егит пилэн учырез возьматэ, кылъёс, кудъёсыз гожтэмын Исаиялэн 65:25, зэм луо шуыса?

¹⁴ Зэмзэ ик-а адями быдэсак воштӥськыны быгатэ? Учкомы одӥг егит пияшлэсь примерзэ. Со туж лек вал но 20 арес луытозяз лушкаськемез понна, жугиськемез понна но мукет йыружъёсыз понна трос пол пытсэтын пукиз ини. Берлогес та егит пи Библиысь зэмлыкез тодӥз но Иеговалэн Адӟись-Ивортӥсьёсызлэн пумиськонъёсазы ветлыны кутскиз. Соку со валаз, мар понна улыны кулэ,— духовной райын Иеговалы ужан-тыршон понна. Пылатӥськемез бере со адӟиз, кызьы кылъёс, кудъёсыз гожтэмын Исаиялэн 65:25, со вылын быдэсмизы. Азьвыл со кион кадь лек вал, нош табере ыжпи кадь лякыт луиз.

15. Малы милям потэ, духовной рае тросгес адямиос мед пырозы шуыса, но кызьы соослы юрттоно?

¹⁵ Исаиялэн книгаысьтыз 65-тӥ люкетысь 13-тӥ кылбур таӵе кылъёсын кутске: «Инмар Кузё-Инмар тазьы шуэ». Нош та люкетысь ик 25-тӥ кылбурлэн пумаз верамын: «Шуэ Кузё-Инмар». Инмар аслэсьтыз сётэм кылзэ котьку но быдэстэ (Ис. 55:10, 11). Али духовной рай вань ини. Иегова зэмзэ ик аспӧртэмлыко калык кылдытӥз. Соин ик туннэ асьмеос каньыл сюлмын но кышкатэк улыны быгатӥськомы (Пс. 71:7). Милям мукет адямиосты но та духовной рае ӧтеммы потэ. Нош со понна соосты дышетоно (Матф. 28:19, 20).

МАР КАРЫНЫ ЛУЭ, МУКЕТЪЁСЫЗЛЭН НО ДУХОВНОЙ РАЕ ПЫРЕМЗЫ МЕД ПОТОЗ ШУЫСА

16. Малы адямиослэн духовной рае пыремзы потэ?

¹⁶ Мукет адямиослэн но духовной рае пыремзы мед потоз шуыса, милемлы  котькудмылы Иеговалэсь адӟем кароно. Иегова адямиосты аслаз организацияз кужмысь кыскыса уг вайы. Со соослы кизэ мыче но лякытэн, яратыса соосты ас дораз вае (Иер. 31:3; Иоанн 6:44). Адямиос тодо ке, кыӵе милям Инмармы, Иегова, соослэн асьсэлэн со доры лыктэмзы потэ. Кызьы асьмеды возёно, мукетъёсызлэн но духовной рае пыремзы мед потоз шуыса?

17. Мае адӟо адямиос, куке пумиськонъёсамы лыкто?

¹⁷ Мае нырысь ик адӟо адямиос, куке пумиськонъёсамы лыкто? Соос адӟо, макем ми ог-огмес яратӥськомы. Милям потэ, соос но, Коринфын улӥсьёс кадь, мед вералозы шуыса: «Зэмзэ ик, Инмар тӥ пӧлын» (1 Кор. 14:24, 25; Зах. 8:23). Соин ик милемлы азьланяз но Библиысь та косонлэсь кылзӥськоно: «Куспады тупаса улэ» (1 Фес. 5:13).

18. Малы мукет адямиослэн но Инмарлэн калыкез пӧлын луэмзы потэ?

¹⁸ Агайёсмы но сузэръёсмы шоры ми Иегова кадь учкыны тыршиськомы. Ми соослэн урод сямъёссы шоры ум учкиське, нош умой сямъёссэс гинэ адӟыны тыршиськомы. Малы ке шуоно азьланяз соослэн вань урод сямъёссы бырозы. Веранэз ӧвӧл, куддыръя куспамы валамтэос но кылдо. Но ми соосты яратыса сэрттӥськомы-пертчиськомы но Библиысь та визь-кенешлэсь кылзӥськиськомы: «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ» (Еф. 4:32). Соин ик мукет адямиослэн но Инмарлэн калыкез пӧлын луэмзы потэ b.

 КОТЬКУ НО УЛЭ ДУХОВНОЙ РАЙЫН

19. а) Кызьы асьсэды шӧдо соос, кинъёс духовной рае берытско? (Учке  «Соос духовной рае берытскизы» рамкаез.) б) Кызьы возьматоно, ми духовной раез дунъяськомы шуыса? (Озьы ик учке суредэз.)

¹⁹ Милемлы туж кельше духовной райын улыны! Пумен со чебергес луэ но, отчы тросгес но тросгес адямиос пыро, кудъёсыз Иеговаез данъяло. Ми котьку тау каромы Иеговалы та кузьымез понна. Куке ми духовной рае пыриськомы, ми шумпотон басьтӥськомы, каньыл сюлмын но кышкатэк улыны кутскиськомы. Но милемлы чакласьконо но духовной райысь потоно ӧвӧл, малы ке шуоно Шайтан туж тырше милемыз отысь поттыны (1 Пётр 5:8; Усьт. 12:9). Милемлы солы сётсконо ӧвӧл. Нош тыршоно духовной раймес утьыны, со азьланяз но чебер, чылкыт но синмаськымон мед луоз шуыса.