1. Ayyaanaa gannatee aybee, qassi nuuni waatanawu murttana koshshii?

 HA WODIYAN loꞌꞌobaa ubbatoo oottiya asan kumida leemiso gannatee ha saꞌan deꞌees. Hegan daro miiloone asay tumu sarotettan deꞌees. He gannatiyan deꞌiyageeti yaappe mule kiyennan agganawu murttidosona. Qassi eti daro asay hegawu yaanaadan koyoosona. Hegee aybee? Ayyaanaa gannatiya! a

2. Ayyaanaa gannatiya xeelliyagan maalaaliyabay aybee?

² Asay issoy issuwa ixxiyo, iitabaynne qohiyabay kumido Seexaana alamiyan Yihoowa asay deꞌikkokka, sarotettaaninne issippetettan deꞌiyo sohuwa Yihooway leemiso hanotan giigissidoogee maalaalissiyaba. (1 Yoh. 5:19; Ajj. 12:12) Nu siiqo Xoossay ha alamee asaa keehi qohiyogaa akeekeesinne ba ashkkarati baassi ufayssan ubbatoo haggaazana mala eti woppu gaanaadan oottees. Ayyaanaa gannatee ‘baqati attiyo sohonne’ “haattaa ushshiyo gannatiyaa” mala gidiyogaa A Qaalay yootees. (Isi. 4:6; 58:11) Ha gannatiyan deꞌiyageeta Yihooway anjjiyo gishshawu, eti ha waayissiya gallassatun ufayssan woppu giidi deꞌoosona.—Isi. 54:14; 2 Xim. 3:1.

3. Isiyaasa shemppo 65n deꞌiya hiraagay beni Israaꞌeelan waani polettidee?

³ Yihooway ba erissidobaa yootiya Isiyasa baggaara ayyaanaa gannatiyan deꞌiyageetuyyo deꞌoy ay mala gidanaakko qonccissiis. He qofaa Isiyaasa shemppo 65n demmana danddayaasa; qassi hegee 537 K.K., koyro polettiis. He wode bantta nagaran zilꞌꞌetti laamettida Ayhudati Baabiloone omoodduwappe laꞌa kiyidi bantta biitti simmidosona. Yihooway ba  asaa anjjiis; qassi eti xayida Yerusalaame katamaa zaarettidi loyttanaadaaninne Xoossaa garoy zaarettidi Israaꞌeelan tumu goynuwawu waanna sohuwa gidana mala oottanaadan maaddiis.—Isi. 51:11; Zak. 8:3.

4. Isiyaasa shemppo 65n odettida hiraagay ha wodiyan waani polettiiddi deꞌii?

⁴ Ha wodiyan Yihoowassi goynniyageeti Gita Baabiloonippe laꞌa kiyido 1919 M.Ln., Isiyasa hiraagay naaꞌꞌantto polettiyogaa doommiis. Hegaappe simmin, ayyaanaa gannatee loddan loddan saꞌan aakkiyogaa doommiis. Kawotettaabaa minni awaajjiyageeti daro galchchata essidosona; qassi ayyaanaa ayfiya ayfidosona. Kase danobaa oottiyanne shori baynna deꞌuwa deꞌiya attumaageetinne maccaageeti “Xoossaa leemisuwan merettida ooratta asatettaa [maayidosona.]” (Efi. 4:24) Isiyasi yootido anjjotuppe daroti ooratta alamiyan polettanaagee qoncce. Gidoppe attin, ayyaanaa gannatiyan deꞌiyogan haꞌꞌikka daro ogiyan goꞌettoos. Ayyaanaa gannatee nuna waati maaddiyakko, qassi nuuni hegaappe mule kiyana koshshennay aybissakko ane beꞌoos.

AYYAANAA GANNATIYAN DEꞌIYAGEETU HANOTAA

5. Isiyaasa 65:13y yootiyogaadan, nuussi ayyaanaa gannatiyan deꞌiyabay aybee?

⁵ Payyanne gazddidaageeta. Ayyaanaa gannatiyan deꞌiyageetunne hegaappe kareera deꞌiyageetu deꞌoy ay malakkonne Isiyasa hiraagay loytti qonccissees. (Isiyaasa 65:13 nabbaba.) Yihooway baayyo goynniyageetussi ayyaanaaban koshshiyabaa palahissidi immees. Nuuyyo A geeshsha ayyaanay, Geeshsha Maxaafaynne gidi palahiya ayyaanaabaa qumay deꞌiyo gishshawu, ‘maana, uyananne ufayttana danddayoos.’ (Ajjuutaa 22:17​ra gatta xeella.) Shin ayyaanaa gannatiyappe kareera deꞌiyageeti ‘namisettoosona, saamettoosonanne yeellatoosona.’ Xoossaara etawu dabboti baawa.—Amo. 8:11.

6. Yuu7eela 2:21-24y Yihooway nuussi immido imotatuppe amaridaageeta waati qonccissii, qassi nuuni hegeetuppe waani goꞌettana danddayiyoo?

⁶ Yihooway ba asawu ayyaanaabaa qumaa gujjin, koshshiyabaa darissidi immiyogaa bessanawu Yuuꞌeeli ba hiraagan kattaa, woyniyanne zaytiya mala koshshiyabata yootiis. (Yuu. 2:21-24) Geeshsha Maxaafaanne Geeshsha Maxaafaa qofay deꞌiyo nu xuufetu baggaara, nu websaytiya baggaara, qassi galchchaa, woradaanne killiliya shiiqotu baggaara I hegaadan oottees. Nuuni hegeetuppe ubbatoo goꞌettana danddayiyo gishshawu payyanne gazddidaageeta.

7. Nuuni nu ‘wozanan ufayttanaadan’ oottiyabay aybee? (Isiyaasa 65:14)

⁷ Ufayttiyageetanne banttawu deꞌiyabay gidana giyageeta. Yihoowa asay A keehi galatiyo gishshawu “ufaittidi yexxana” danddayees. (Isiyaasa 65:14 nabbaba.) Xoossaa Qaalay yootiyo minttettiya tumaynne I gelido qaalay, qassi Kiristtoosa wozuwa yarshshuwappe denddidaagan nuussi deꞌiya ammanttiya hidootay nuuni ‘wozanan ufayttanaadan’ oottees. Hegeetubaa nu ishanttuuranne michchonttuura haasayiyogee nuuni tumuppe ufayttanaadan oottees!—Maz. 34:8; 133:1-3.

8. Ayyaanaa gannatiyan keehi koshshiya naaꞌꞌubati aybee?

⁸ Yihoowa asaa giddon deꞌiya siiqoynne issippetettay ayyaanaa gannatiyan keehi koshshiyaba. (Qol. 3:14) Hagee Yihoowa ashkkarati ha wodiyagaappe aaruwan keehi siiqettiyonne issippetettan deꞌiyo ooratta alamiyan deꞌoy ay mala gidanaakkonne nuuni qoppanaadan maaddees. Issi michchiya Yihoowa asaara koyro gayttido wode  akeekidobaa hagaadan yootaasu: “Taani waana ufayttanaakko erabeykke; ubba qassi so asaa deꞌuwankka tawu ufayssi baa. Taani Yihoowa Markkatuura koyro gayttido wode, eti issoy issuwara siiqettiyogaa akeekaas.” Tumuppe ufayttanawunne bawu deꞌiyaban woppu giidi deꞌanawu koyiya ooninne ayyaanaa gannatiyan deꞌana koshshees. Ha alamee Yihoowa ashkkaratubaa qoppiyobay ayba gidikkonne, Yihoowanne awu goynniyageetu sinttan etawu loꞌꞌo sunttay deꞌees.—Isi. 65:15.

9. Ha wodiyan nuuni azzananaadaaninne waayettanaadan oottiyabaa xeelliyagan Isiyaasa 65:16, 17y woygii?

⁹ Darin hirggennaageetanne woppu giyageeta. Ayyaanaa gannatiyappe kareera deꞌanawu koyiyageeti ‘wozanan azzanidi waassanaagaanne bantta ayyaanay meqqin zilaalidi yeekkanaagaa’ Isiyaasa 65:14y yootees. Xoossaa asay waayettanaadaaninne azzananaadan oottiya ubbabay shin? Wurssettan, hegeeti ‘dogettananne Xoossaa ayfiya sinttaappe geemettana.’ (Isiyaasa 65:16, 17 nabbaba.) Yihooway nu metuwa xayssana; qassi wurssettan he metoy nuna ay keena qohidaakkokka nuuni hassayokko.

10. Neeni ishanttuuranne michchonttuura issippetettan deꞌiyogawu galatiyoy aybissee? (Misiliyakka xeella.)

¹⁰ Gidikkonne, shiiqota shiiqiyo wode nuuni woppu goosinne ha iita alamee gattiyo unꞌꞌissiyabaa qoppokko. Qassi nuuni Xoossaa ayyaanaa ayfiya macara gidida siiquwa, ufayssaa, sarotettaa, kehatettaanne ashkketettaa bessiyo wode nu ishanttinne michchontti woppu gaanaadan maaddoos. (Gal. 5:22, 23) Nuuni Xoossaa dirijjitiya yame gidiyo gishshawu, keehi galatoos! Ubbatoo ayyaanaa gannatiyan deꞌiyageeti Xoossay “ooratta saluwaanne ooratta sa7aa” ehaanawu gelido qaalay muleera polettishin beꞌana.

11. Isiyaasa 65:18, 19y yootiyogaadan, Yihooway nuussi giigissido ayyaanaa gannatee nuuni waananaadan oottii?

¹¹ Galatiyageetanne ufayssan hombbociyageeta. Nuuni ayyaanaa gannatiyan ‘ufayttananne hashshu gaana’ koshshiyo gaasuwa Isiyasi kaallidi qonccissiis. He sohuwa giigissiday Yihoowa. (Isiyaasa 65:18, 19 nabbaba.) Yaaniyo gishshawu, Xoossaabaa asaa tumaa tamaarissennanne leemiso hanotan gannate gidida sohuwa gelanaadan maaddenna ha alamiya dirijjitetuppe asay kiyanaadan Yihooway nuna goꞌettiiddi deꞌiyogee maalaalissiyaba gidenna! Nuuni tumaa erido gishshawu demmido anjjotun keehi ufayttoosinne hegaa haratuyyo yootanawu keehi koyoos.—Erm. 31:12.

12. Isiyaasa 65:20-24n qonccida hidootay nuuni waananaadan oottii, qassi aybissi?

 ¹² Qassi nuuni ayyaanaa gannatiyan deꞌiyogan demmido hidootaa gishshawu galatoosinne ufayssan hombbocoos. Xoossay ehaana ooratta alamiyan nuuni beꞌananne oottana ubbabaa qoppa! Geeshsha Maxaafay hagaadan gees: “Guutta wode xalaala de7idi haiqqiya qii na7i, woikko ba laittaa wurssennan haiqqiya cima asi de7enna.” Nuuni “keettata keexxidi, etan de7ana; [qassi] woiniyaa turatakka tokkidi, eta aifiyaa maana.” Nuuni ‘coo daafurokko;’ ayssi giikko, nuna ‘Yihooway anjjana.’ Nuuni ufayssiyanne woppissiya deꞌuwa deꞌanaagaa I nuussi qaalaa geliis. I ‘eti xeesanaappe kasetidi’ ubba asawu koshshiyabaa erananne ‘paxa deꞌiyageetu ubbaa amuwa alana.’—Isi. 65:20-24; Maz. 145:16.

13. Asay Yihoowawu haggaaziyogaa doommiyo wode, ba deꞌuwan laamettiyogaa Isiyaasa 65:25y waati qonccissii?

¹³ Sarotettaa demmidaageetanne qohuwappe naagettidaageeta. Kase danobaa oottiyageeti, hanqqettiyageeti, woy ammanettennaageeti Yihoowa geeshsha ayyaanay maaddin bantta deꞌuwan laamettidosona. (Isiyaasa 65:25 nabbaba.) Eti bantta iita eeshshaa agganawu wozanappe baaxetidosona. (Roo. 12:2; Efi. 4:22-24) Xoossaa asay nagaranchcha gidiyo gishshawu haꞌꞌikka balabaa oottiyogee attennaba. Gidikkonne, Yihooway A siiqiyanne issoy issuwara siiqettiya “asa ubbaa” baakko ehiis; hegaappe denddidaagan, nuussi tumu sarotettaynne issippetettay deꞌees. (Tii. 2:11) Hagee ubbaa danddayiya Xoossa xalaalay oottana danddayiyo maalaalissiyaba!

14. Isiyaasa 65:25y tuma gidiyogaa issi ishaa hanotay waati bessii?

¹⁴ Tumuppe asi ba eeshshaa laammana danddayii? Ha hanotaa qoppa. Layttay 20 gidido issi yelagay shori baynna deꞌuwa deꞌidonne danobaa oottido gishshawu darotoo qashettiis. I kaamiya wuuqqido, keettaa mentti gelidonne hara gita danobaa oottido gishshawu qashettiis. I ubbatoo warettanawu giigi uttiis. I Geeshsha Maxaafaappe tumaa koyro siyido wodenne Yihoowa Markkatu shiiquwa shiiqiyogaa doommido wode deꞌuwawu koshshiya issibaa demmidoogaa ammaniis; hegeekka ayyaanaa gannatiya. I haattan muuketti simmidi, Isiyaasa 65:25y A hanotaara waani gayttiyakko darotoo qoppees. I gaammuwa mala makkalanchcha asa gidiyogaappe laamettidi dorssa mala saro asa gidiis.

15. Harati ayyaanaa gannatiya yaanaadan nuuni shoobbanawu koyiyoy aybissee, qassi hegaadan waati oottana danddayiyoo?

¹⁵ Isiyaasa 65:13y hagaadan giidi doommees: “Ubbaa Haariya GODAI hagaadan yaagees.” Qassi paydo 25y wurssettan hagaadan gees: “GODAI hagaa odais.” I yootidobay ubbatoo polettees. (Isi. 55:10, 11) Ayyaanaa gannatee ha wodiyan deꞌees. Yihooway ba soo ehiido awu goynniyageeti tumuppe dumma. Nuuni A soo asaa yara gidiyo gishshawu, amarida hanotan sarotettaaninne qohiya alamiyappe naagettidi deꞌoos. (Maz. 72:7) Hegaa gishshawu nuussi danddayettida keenan daroti Yihoowawu goynnanaadan maaddanawu koyoos. Asay Yesuusa kaalliyagaa gidanaadan oottiyogan yaatana danddayoos.—Mat. 28:19, 20.

HARATI AYYAANAA GANNATIYA YAANAWU KOYANAADAN WAATI MAADDANA DANDDAYIYOO?

16. Asay ayyaanaa gannatiya yaanawu koyanaadan aybi maaddana danddayii?

¹⁶ Nuuni ubbay harati ayyaanaa gannatiya yaanawu koyanaadan oottana danddayiyobay  deꞌees. Yaatanawu nuuni Yihoowa milatana koshshees. I asay ba dirijjitiya yara gidanaadan giddenna. I asaa siiquwan baakko ‘ehees.’ (Yoh. 6:44; Erm. 31:3) Yihoowa siiquwabaanne ufayssiya A eeshshatubaa erida ashkke asati akko shiiqoosona. Nu loꞌꞌo eeshshaaninne oosuwan asay ayyaanaa gannatiya yaanawu koyanaadan waati maaddana danddayiyoo?

17. Harati ayyaanaa gannatiya yaanawu koyanaadan waatana danddayiyoo?

¹⁷ Nuuni harati ayyaanaa gannatiya yaanawu koyanaadan oottana danddayiyo issi ogee nu mala Kiristtaaneta siiqiyogaanne etawu kehiyogaa. Oorattati nu galchchaa shiiqota shiiqiyo wode geella beni Qoronttoosan shiiqota shiiqida ammanennaageetudan qoppanaadan koyoos. Eti hagaadan giidosona: “Xoossai tumu intte giddon de7ees.” (1 Qor. 14:24, 25; Zak. 8:23) Yaaniyo gishshawu nuuni “issoi issuwaara sarotettan de7ite” giya zoriya ubbatoo kaallana koshshees.—1 Tas. 5:13.

18. Asay nu dirijjitiyakko yaanawu koyanaadan oottana danddayiyabay aybee?

¹⁸ Nuuni nu ishanttanne michchontta Yihoowagaadan xeellanawu ubbatoo baaxetana koshshees. Eta balan, hegeekka eti loddan loddan aggana danddayiyo eeshshan gidennan, eta loꞌꞌo eeshshan ubbatoo xeelaa wottiyogan yaatana danddayoos. Nuuni ubbatoo ‘issoy issuwayyo kehiyageeta, qarettiyageetanne atto giyageeta’ gidikko, nu giddon merettana danddayiya ay metuwanne siiquwan giigissana danddayoos. (Efi. 4:32) Yaatiyo wode, nuuni hegaadan siiquwa bessanaadan koyiya asaykka ayyaanaa gannatiya yame gidanawu koyana danddayees. b

 AYYAANAA GANNATIYAPPE MULE KIYOPPA

19. (a) “ Yihoowappe Haakkidi Simmidaageeta” giya saaxiniyan qonccidaagaadan, amaridaageeti ayyaanaa gannatiya guyye simmido wode woygidonaa? (b) Nuuni ay oottanawu murttana koshshii? (Misiliyakka xeella.)

¹⁹ Ayyaanaa gannatiya gishshawu Yihoowa keehi galatoos! Awudeegaappekka aaruwan hegee keehi loꞌꞌeesinne daroti yan Yihoowawu goynnoosona. Yihooway nuussi giigissido gannatiya gishshawu merinawu A galatiyageeta gidoos. Gazddanawu, ufayttanawu, woppu gaanawunne sarotettan deꞌanawu koyiya ooninne ayyaanaa gannatiya yaananne hegaappe mule kiyennan deꞌana koshshees! Shin Seexaanay nuna yaappe kessanawu loytti baaxetiyo gishshawu, nuuni keehi naagettana koshshees. (1 PHe. 5:8; Ajj. 12:9) Seexaanay ba halchchuwa polanaadan eeno gookko. Keehi loꞌꞌiya, geeshshanne sarotettay deꞌiyo ayyaanaa gannatee moorettennaadan nuussi danddayettida ubbabaa oottiyageeta gidoos.