1. Paladiso yi kipheve mu na mbi ayi diambu mbi wulenda bakila nzengolo yi vanga?

 LUMBU kiaki kuidi na paladiso yi mbonosono yo yiwedi na batu bobo beta vanga mambu mamboti. Muidi na zimilio zi batu bobo balembo yangalala mu ndembama yi kiedika. Bobo badi mu paladiso beni, badi bakubama mu kambu kuyibika ayi beta bue tomba ti diluaku didi batu baba buelama mu buangu beni ki sipesiali. Buangu mbi? Paladiso yi kipheve! a

2. Diambu mbi dilembo yitukisa mu paladiso yi kipheve?

² Diambu dinyitukisa didi ti Yehova wuvanga buangu beni va khati tsika nza yayi yi Satana, yo yime mana wala mambu ma kikhenene, mambimbi ayi bivonza. (1 Yow. 5:19; Tso. 12:12) Nzambi’eto yi luzolo wulembo moni mambu moso mambimbi mame mana wala mu nza yayi ayi weta kutuvana lutanunu lolo tuidi phuila muingi tutatamana yonzuka mu kipheve. Mbembo’andi yisudikisidi paladiso yi kipheve mu “suamunu kimboti” ayi mu “tsola yo yeta bondukulu bumboti.” (Yes. 4:6; 58:11) Mu lusakumunu lu Yehova, batu bobo badi mu paladiso beni, balenda baka mamboti mawombo mu bilumbu biabi bitsuka.​—Yes. 54:14; 2 Tim. 3:1.

3. Yesaya kapu 65 bue yilunginina mu thama?

³ Mu nzila yi m’bikudi Yesaya, Yehova wusudikisa bue buela bela luzingu lu batu bo bela ba mu paladiso yi kipheve. Wela mona tsudukusulu beni mu Yesaya kapu 65, yo yilungana mu khumbu yitheti mu mvu 537 T.T.E. Mu thangu beni yina, bayuda bobo babalula mintima batotuka mu buvika bu Babiloni ayi  bavutuka ku buala buawu. Yehova wusakumuna dikanda diandi ayi wudisadisa di bue bongisa Yelusalemi mbanza yo yimana bebusu ayi mu bue vutula diaka kinlongo mu diambu di tsambudulu yi kiedika mu Iseli.​—Yes. 51:11; Zak. 8:3.

4. Bue mbikudulu yi Yesaya kapu 65 yilembo lunginina mu bilumbu bieto biabi?

⁴ Lungana kummuadi ku mbikudulu yi Yesaya, kutona mu mvu 1919 T.E. Mu thangu yoyi bisadi bi Yehova bi thangu’eto bitotukila mu buvika bu Babiloni dinneni. Yawu yina thangu paladiso yi kipheve yitonina mu nza yimvimba. Minsamuni mi kipfuzi mi Kipfumu miyiza vanga bimvuka ayi miyiza buta mim’butu mi kipheve. Babakala ayi baketo bo babe monisanga mavanga ma kikhesi ayi ma bubulu “bavuata bumutu bumona boso bubela lukanu lu Nzambi.” (Efe. 4:24) Bukiedika kuidi na mamboti mawombo mo Yesaya katubila mela luta lungana mu nza yimona yo yilembo yizi. Buba lumbu kiaki, tulembo baki phe mamboti mawombo bo tuidi mu paladiso yi kipheve. Tutala phila yoyi paladiso yi kipheve yeta vangila diambu mu beto ayi bila kio katulendi mu botukila ko.

PHILA YOYI BATU BAKADILA MU PALADISO YI KIPHEVE

5. Banga phila Yesaya 65:13 yituvanini tsila, mamboti mbi tueta yangalala baka mu paladiso yi kipheve?

⁵ Ndiwulu yimboti yi bidia bi kipheve ayi luvovomo. Mbikudulu yi Yesaya yimonisini luviakunu lunneni lu luzingu lu batu bobo badi mu khati paladiso yi kipheve ayi bo basi ko muawu. (Tanga Yesaya 65:13.) Yehova weta dukisa mu phila yifuana ziphuila zi kipheve zi bisadi biandi. Tuidi na pheve santu, Mbembo’andi yo yisonama ayi bidia biwombo bi kipheve bio bieta tusadisa “tudia. . . . tunua . . . [ayi] tuyangalala.” (Dedikisa Tsongolo 22:17.) Luviakunu na batu bo basi ko mu paladiso yi kipheve luidi ti bawu badi “na nzala . . . , phuila . . . , [ayi] beta fua tsoni.” Badukisanga ko ziphuila ziawu zi kipheve.​—Am. 8:11.

6. Bue Yoeli 2:21-24, yilembo tubila zikhubukulu zieto zi kipheve, ayi phila yoyi ziawu zieta kutuvanina mamboti?

⁶ Mu mbikudulu’andi, Yoeli wusadila bidia bimfunu banga, céréale, vinyu ayi mafuta ma olive mu diambu di monisa ti Yehova weta vana mu luzolo loso bima bioso bio tuidi phuila muingi tuba minu kingolo buba phe bidia bi kipheve. (Yoe. 2:21-24) Weta kubutudila mu nzila yi Bibila, mu nzila yi minkanda mio mieta sudikisa Bibila, mu siti’eto yi internet ayi mu zikhutukunu zieto buba zizunga ayi zio zinneni. Kadika lumbu beto dianga bumboti mu kipheve, yawu mayi tula ti tuba buvini bumboti bu kipheve ayi yawu mayi tula tuluta ba mu luvovomo.

7. Mbi bieta tula ti “ntim’eto wuba mu zikhini”? (Yesaya 65:14)

⁷ Khini ayi yangalala. Bisadi bi Nzambi bilenda “yamikina mu zikhini” bila ntim’awu wuwedi na phutudulu matondo. (Tanga Yesaya 65:14.) Kiedika ki lukindusu, zitsila zi lukindusu zio zidi mu Mbembo Nzambi ayi vuvu kio kisimbulu mu nkayilu wu Kristu bieta tuvana “ntima wu zikhini.” Beto kumatubilanga va kimosi ayi bakhomba zieto ba kipheve, yawu mayi tula ti tuba mu zikhini!​—Nku. 34:8; 133:1-3.

8. Mambu mbi muadi manneni mammonisa paladiso yi kipheve?

⁸ Luzolo ayi bumosi madi mambu muadi manneni mo malembo monika kuidi bisadi bi Yehova mu paladiso yi kipheve. Nsinga beni “wubumosi” weta tuvana diyindu di phila yoyi luzingu luela bela mu nza yimona, koko bisadi bi Yehova biela bela mu luzolo luwombo ayi mu bumosi viokila lumbu kiaki. (Kol. 3:14) Khomba mosi wunketo tubidi diambu dio  kamona mu thangu kadengana bisadi bi Yehova mu Khumbu yitheti: “Ndibe zabanga ko bue bubela mu zikhini buba phe mu dikanda diama. Kuidi Bambangi zi Yehova kuawu ndimuena mu khumbu yitheti luzolo lo lueta monikina mu mavanga.” Woso mutu tidi ba mu zikhini zi kiedika, ayi yangalala, kafueti ba mu khati paladiso yeto yi kipheve. Buba moso kuandi mambu banyindudila bisadi bi Yehova, bawu, badi na khumbu ayi bumutu bu luzitu mu khati dikanda diawu di bisadi bi Yehova mu nza yimvimba.​—Yes. 65:15.

9. Yesaya 65:16, 17, tsila mbi yiveni mu diambu di ziphasi zi luzingu?

⁹ Phundulu ayi ndembama. Yesaya 65:14 yitubidi ti bobo beta manga ba mu khati paladiso yi kipheve, “bela dila mu kiadi kintima [ayi] bela nionga mu khati ntima.” Bosi buabu mambu maphasi mo madengana bisadi bi Nzambi? Tsuka tsuka mambu beni mana, “mela sie bue bambukulu moyo ko [ayi] mela sie bue monika ko va meso ma [Nzambi].” (Tanga Yesaya 65:16, 17.) Yehova wela zimbikisa mambu mo meta kututakisa ayi kuntuala, ziphasi zi mambu beni, tuela sie bue ziyindula ko mvimba mvimba.

10. Bila mbi wum’banzila ti luidi lusakumunu mu ba va kimosi na bakhomba zieto Bakristu? (Tala phe foto.)

¹⁰ Buba phe mu thangu yayi, mayindu meto meta ba mu ndembama mu thangu tueta ba mu zikhutukunu zi bukristu, koko tueta bela mu phundulu ayi ko tueta zimbikinina mambu mo malembo tutatikisa mu nza yayi. Tueta sadisa phe bakhomba zieto ba babakala ayi ba baketo baba mu ndembama mu thangu tueta kubamonisina luzolo, khini, ndembama, tsalasani ayi bulembami bila momo madi mambu mo madi mu khati m’butu wu pheve yi Nzambi. (Nga. 5:22, 23) Luidi lusakumunu lunneni mu ba mu khati khubukulu yi Nzambi! Bobo bela tatamana ba mu paladiso yi kipheve, bela mona lungana koso ku tsila yi Nzambi yi “diyilu dimona ayi ntoto wumona.”

11. Mu tadila Yesaya 65:18, 19, mu phila mbi paladiso yi kipheve yo Yehova kavanga yifueti vangila diambu mu beto?

¹¹ Phutudulu matondo ayi vanga diambu. Yesaya tatimini mu tuba bila kio tufueti bela mu zikhini ayi “yangalala” mu paladiso yi kipheve. Buangu beni kidi tsemono yi Yehova. (Tanga Yesaya 65:18, 19.) Diawu, disi ko diambu di kutuyitukisa ti Yehova katusadila mu sadisa batu babotuka mu khubukulu yi nza yayi yo kayi balonganga ko mambu makiedika mu diambu ditedi Nzambi, ayi muingi tubasadisa baba mu khati paladiso yeto yi kipheve! Tuidi mu zikhini ziwombo mu lusakumunu lolo tuidi lu ba mu khati kiedika ayi yawu yeta kututuma  tusadisa batu bankaka ba mu kota.​—Yel. 31:12.

12. Diambu mbi tsila yo yidi mu Yesaya 65:20-24 dikutula ayi bila mbi?

¹² Tuidi diaka na phutudulu matondo ayi mu zikhini ziwombo mu vuvu kioki kidi yeto bo tuidi mu khati paladiso yi kipheve. Yindula mambu moso mo wela mona, ayi wela vanga mu nza yimona yi Nzambi! Bibila kiveni tsila ti: “Kuela sie ba ko muana nio wela zinga bilumbu bifioti . . . Kuela sie ba ko nnunu nio wela fua mu bununu buandi.” Tuela “tunga zinzo [ayi] tuela mu kalanga, tuela kuna zitsola zivinyu ayi tuela dia makundi ma zitsola beni.” Tuela sie “sala ko mu phamba” bila tuela baka “lusakumunu kuidi Yehova.” Wutuveni tsila yi luzingu lumboti, lu zikhini ayi lumfunu. Tuamina mutu katomba, “Niandi wela zaba ziphuila zi kadika mutu,” ayi “wela dukisa zitsatu zi kadika kima kioso kidi moyo.”​—Yes 65:20-24; Nk. 145:16.

13. Bue Yesaya 65:25 yeta sudikisila mambu mo batu beta balula mu thangu batonini sadila Yehova?

¹³ Ndembama ayi lutanunu. Mu lusadusu lu pheve santu yi Nzambi, batu bawombo mu thama baba na mavanga ma bubulu, babalula mambu manneni mu luzingu luawu. (Tanga Yesaya 65:25.) Babika nzingulu yimbimbi yo baba mu thama. (Loma 12:2; Efe. 4:22-24) Tukadi manga dikanda di Nzambi, didi kaka dikambu lunga, diawu, tuela kue tatamana kaka tula zizimbala. Diawu Yehova kame kupikisila “ntindu woso wu batu” mu nsinga wu luzolo ayi wundembama wo kawedi zengana ko. (Tito 2:11) Diodi didi diambu dingitukulu dio difueti vangu kaka kuidi Nzambi yi nkua ngolo yoso!

14. Mu phila mbi Yesaya 65:25 yilunginina kuidi khomba mosi wubakala?

¹⁴ Bukiedika batu balenda balula bumutu buawu? Tutadila kifuani kimosi. Ntueni mosi wubakala nio wuba 20 ki mimvu, weba kotanga mu zikhumbu ziwombo mu buloko mu bila ki mavanga makheni ayi ma kikhesi mo kaba na mawu. Wukota mu buloko bila weba yibanga matoma mangana, yiba mu zinzo zi batu, ayi mu mambu mankaka mambimbi manneni ayi weba nuananga ayi nioso kuandi mutu. Mu thangu kawa mu khumbu yitheti kiedika ki Bibila, ayi mu thangu katona kutakana mu zikhutukunu zi Bambangi zi Yehova, wukikinina ti wumona mfunu wu zingila mu paladiso yi kipheve. Kumanima ma baka mbotama, wuyindudila mu zikhumbu ziwombo phila yoyi Yesaya 65:25 yilunginina kuidi niandi. Wuba mutu wumbimbi banga khosi, vayi wuyiza ba mutu wumboti banga dimemi.

15. Bila mbi tueta tombila tedisila batu bankaka biza tubati mu paladiso yi kipheve ayi bue tulenda butudila?

¹⁵ Yesaya 65:13 yitonini mu ziphova ziazi: “Diawu, tala mo pfumu Yehova katubidi.” Verse 25 kutsuka yidi mu ziphova ziazi “butubidi Yehova.” Ziphova ziandi zieta lungana kaka. (Yes. 55:10, 11) Bukiedika mu lumbu kiaki, paladiso yi kipheve yidi. Yehova wuvanga dikanda dio dilutidi makanda moso. Bo tuidi mu dikanda beni, tuidi mu ndembama yiwombo mu lumbu kiaki ayi tueta kimona tuidi mu lutanunu mu khati dikanda beni bila nza yayi yime mana wala mambu mambimbi. (Nku. 72:7) Diawu, tueta tombila sadisila batu bawombo, biza tubati mu dikanda dieto di bukristu. Tulenda kubutudila beto luta tula thalu’eto mu kisalu ki kitula batu minlonguki.​—Mat. 28:19, 20.

BUE BUTEDISILA BATU BANKAKA MU PALADISO YI KIPHEVE

16. Mbi bilenda sadisa batu biza tubati mu paladiso yi kipheve?

¹⁶ Wumosi mosi mu beto widi na kiyeko kimfunu mu tula ti paladiso yi kipheve yiba buangu kimboti kuidi batu bankaka. Tulenda dukisa bumboti mboti kiyeko beni enati tusokudidi  Yehova. Kakuikanga ko batu mu kingolo biza mu khubukulu’andi. Vayi mu “zanti” yoso keta kubabendila. (Yow. 6:44; Yel. 31:3) Batu bobo badi mintima mifuana bo beta bakula luzolo lu Yehova ayi bumutu buandi bu kitoko, beta bendama kuidi niandi mu kondu kuiku. Bue tulenda tedisila batu mu paladiso yi kipheve, mu nzila yi mavanga meto mamboti ayi bumutu bueto bumboti?

17. Bue tulenda bendila batu bankaka mu paladiso yi kipheve?

¹⁷ Yimosi yi ziphila yo tulenda bendila batu mu paladiso yi kipheve yidi mu vangila bakhomba zieto Bakristu mambu mu luzolo ayi mu zanti. Mu thangu batu bamona bizidi mu zikhutukunu zieto zi kimvuka, tufueti tomba baba na mayindu ma phila mosi banga momo ma basi Kolinto bo basi ba ko bakristu mu thangu bakutakana mu kimvuka ki Kolinto. Batuba: “Bukiedika Nzambi widi yeno.” (1 Ko. 14:24, 25; Zak. 8:23) Diawu, tufueti tatamana landakana ndongi yi zingila mu ndembama “beto na beto.”​—1 Tes. 5:13.

18. Mbi bilenda benda batu mu khubukulu’eto?

¹⁸ Tufueti tula ngolo mu tadila bakhomba zieto Bakristu banga phila Yehova keta kubatadila. Tueta kubutudila mu luta tula mayindu meto mu bikadulu biawu bimboti vayi bika mu zinzimbala ziawu ziozi tsuka tsuka ziela mana kuandi. Tulenda manisa mambu mo tueta bakana ayi bakhomba zieto ba luzolo, mu sadilanga ziphova ziazi zitubidi ti: “Kadika mutu kamonika mutu wumboti kuidi n’diandi, lumonasanga kiadi ayi lulemvukilanga badieno.” (Efe. 4:32) Yawu yela tula ti batu bobo beta tomba ti ba bavangila mambu mu phila beni yoyi, bela tomba ba mu paladiso yi kipheve. b

 TATAMANA BA MU KHATI PALADISO YI KIPHEVE

19. a) Banga phila bumonisini enkadre “Bayenda ayi bavutuka,” mbi batuba mu thangu bavutuka mu paladiso yi kipheve? b) Diambu mbi tufueti bakila nzengolo yi vanga? (Tala phe foto.)

¹⁹ Tueta yangalala buwombo paladiso yeto yi kipheve! Yilutidi kitoko ayi yeta kembisa buwombo Yehova viokila mu thama. Tuluta banga phutudulu matondo mu paladiso yo Yehova kavanga mu diambu di beto. Woso mutu tidi ba mu luvovomo, mu mayangi, mu ndembama ayi mu lutanunu, kafueti ba mu paladiso yi kipheve ayi kabika mu botuka kadi fifioti! Vayi, tukeba bila Satana wulembo tudi zingolo muingi katutatula mu paladiso beni yi kipheve. (1 Pi. 5:8; Tso. 12:9) Tubika kum’bikila nzila muingi kedi nunga. Tuluta tanina bumboti mboti kitoko, buvedila ayi ndembama yi paladiso yi kipheve.