Umhạr imhị lhạ phọ 1955, mị kụ obạm esi iraạr alhephiri anmụny. Uukonhom imhị ekpisi dị etuman ogbạl ophiịny esoorom mọ aFinland, epẹ egbogh emhạ phọ aVantaa.

Onhiin amhị maḍiiny ni muụm iyạl ikpo asiạ eten kụ ogbi omhạr amhị. Toroboiperolbọ, odẹ amhị asophoghom ni igey phọ kụ o/mheera ghan mọ onhiin ayoor utughemhị ghan iyoor Baibul phọ ḅilhẹ uphạm ghan iyoor aghimọm ituughạ. Esi iduọn phọ, onhiin ayoor amhian ghan kụ utughemhị iyoor Baibul phọ mem dị odị u/lo.

K’eghoroghọr amhị kụ eghị, mị usopha oḍighi idị eḅeraạn aZihova. Esi omaạm, mem dị mị amhạn oḍual asiạ, otughemhiạ askul ayoor ughaghạm ni imhị olhoghi loor iduọn mị u/meera bọ ule eḍien dị oghol mọ verilättyjä (Apancake awe aFinland dị roḍighinhom ghan iḅaạl). Otughemhiạ phọ ayoor asighẹ ḍiniin aḍighaạgh odị apoghọm rukpo amhị obọ onhụ amhị aphoghogho, kụ asighẹ okangị asighenhọm apancake phọ kụ akparaghạ ghan olhọgh onhụ amhị. Kuolọ mị ukparaghạ ni akpor okangị phọ asighẹ siphẹ aḍighaạgh phọ odị.

Mem dị mị amhạn 12 asiạ bịn odẹ amhị amhugh. Onyebel roten, mị amhiigh oghị ghan ituughạ. Abumor phọ siphẹ ookpomhoghan phọ ukạr kụ uḍeenhaan imhị ḍiḅeraạn, kụ iphẹn phọ inyu ni imhị oḍuraan ogbị aZihova. Mị amhiigh aạl ghan aBaibul phọ r’arinyạ ookpomhoghan phọ ḍio ḍio ḍio. Ophamhanhạm edeọm ituughạ phọ iphẹn phọ kụ isabị phọ ilhoghonhaạn bọ imhị ḍighaạgh oḍiiny amuụm mem dị mị amhạn 14 asiạ, unwanyụ August 8, 1969.

 Mị r’omhadạn askul, bịn i/bia mị amhiigh okọy eten opọ oomo amem mọ. Esi iyạl ikpo asiwiki, mị aḍuạ aghị ekpisi dị ewaạm mọ ebụgh, epẹ Pielavesi, etuman bọ ogbo aFinland.

Epẹ Pielavesi, kụ edị mị aazuanhaan onyanhị phọ Sirkka, aḍighi bọ ooḅi anhịr phọ amhị rodon. Imạ phọ araagharạ phọ odị ḅilhẹ r’asiya phọ odị r’aZihova ekpạr bọ kụ iḍạ bọ ḍiḅeraạn amhị. Odị ra/wạ ghan igbogh asidọl obobọ ruphua. Iyạl phọ ayoor ukạr kụ omhoọgh ephuọm okumu aZihova ipẹ yoor kotue bọ etigheri odọ arukumuan phọ kungọ bọ iyoor. Yoor aalhạn unwanyụ aMarch 23, 1974. Kparipẹ r’oghị ekpisi oghelhọm omhoom apinien phọ ayoor, yoor unyeenhe ghụn Karttula, ekpisi dị emhoghi bukaaphọm.

K’emhiighom apinien phọ ayoor, aZihova muḍeenhaan iyoor mọ odị kamiteom ni raraạr phọ ipẹ yoor omhoghi bọ, lọ yoor osighẹ Omhạr phọ kụ oḍighi eḅẹl. (Mat. 6:33) Esi omaạm, epẹ Karttula phọ, yoor u/moọgh ghan moto. Eḅẹl amem mọ yoor uḍigh ghan oghiilhom. Toroboiperolbọ, mem eephoọm, osipheeny rabụgh ghan ni iboom. Esi iduọn phọ, orue oghaạph iiḅi iinhaghạn phọ ephẹn ekool arukumuan phọ ayoor, emoghi ni moto. Kuolọ yoor u/moọgh ikpoki oghoom.

Dị yoor u/seere olhoghi, okumoor umor amhị aru ni ophogh ayoor. Bịn uwilhenhaạn iyoor moto phọ odị. Odị makpeeghị oomo araraạr ilọ amoto phọ. Iyaạr dị yoor omhoọgh oḍighi pọ olhọgh ghan afuẹl bịn. Bịn poronọ yoor omhoọgh moto phọ yoor owạ ghan bọ.

AZihova uḍeenhaan ni iyoor mọ onọ marool dool omiteom araraạr orolhọm mọ ipẹ yoor omhoghi bọ. Oḍighi ayoor pọ osighẹ Omhạr phọ bịn oḍighi eḅẹl.

Mem mọ yoor oghị bọ Pioneer Service School, lhạ phọ 1978, oniin otughemhiạ phọ dị oghol mọ Raimo Kuokkanen, a uromha ni iyoor ogẹ aani aḍinyạ oghị Askul aGilead phọ. Esi iduọn phọ, yoor umhiigh ni otuughạ onhụ aḅekeeny pidị yoor osianhaan oghị aani. Toroboiperolbọ, tutụ yoor kogẹ bọ ilọ oghị aani askul aGilead phọ lhạ phọ 1980, bịn umhạgh iyoor oghị okumuan isiphẹ olạ agadạ phọ odi bọ Finland. Mem mọ amuphẹ phọ, u/meera ghan mọ awe dị rokumuan Betẹl oghị aani askul aGilead phọ. Kuolọ yoor uwạ ghan okumuan atorobọ esi dị aZihova rawạ mọ yoor okumuan, ke/si dị yoor kụ ootughiạn mọ enighẹ. Esi iduọn phọ, yoor umhegheron ni  ḍimhạgh oghị aBetẹl phọ. Kuolọ yoor ughiọm ni ghisigh otuughạ ghan onhụ aḅekeeny phọ pidị eḍighi maạr dị eepoogh phọ eru oghị askul aGilead phọ yoor osianhaan oghị aani.

Iyạl ikpo asiạ reten, bịn Aloor Phọ Repogh Bọ omheera mọ awe dị rokumuan Betẹl otue ni ogẹ ḍinyạ oghị aani askul aGilead phọ. Egina amem bịn yoor ogẹ oghị aani askul aGilead phọ, kuolọ i/ḍighi edị oḅẹm mọ olhoghi ayoor kụ edị u/ḅaạl okumuan isiphẹ aBetẹl phọ. Eeye i/ḍighi idiphọ! Yoor uwạ ghan omiteom aloor okumuan agạ dị ewaạm mọ ekạr ebụgh iboom lọ yoor osianhaan ni. Umhạgh ni iyoor oghị askul aGilead phọ, kụ yoor kụ omhunhenhiom 79 ekụ dị ophạm askul aGilead phọ unwanyụ aSeptember 1985. Urom iyoor oghị aColombia kụ okumuan.

Epẹ Colombia phọ, uphụr uḅenhị imhị okumuan isiphẹ olạ agadạ phọ. Mị ukparaghạ ni oḍighi oḍighi phọ oomo ipẹ mị katue bọ, kuolọ alhạ reten, mị aru alhoghoma mọ emoghi dị yoor konme agạ arukumuan phọ ayoor. Epẹ kụ eḅẹl amem siphẹ aghuḍum mọ amhị dị mị alhọm mọ onme gạ arukumuan phọ amhị. Bịn onyebel roten, usighẹ iyoor oghị eniin egbogh emhạ dị oghol mọ Neiva, ekpịgh aHuila oḍighi amisonarị.

Mị rakelhọm ghan agey oḍighi iphelhegbeel phọ. Mem mọ mị aḍighi bọ okọy eten dị anhịr k”ophin epẹ Finland, eeni amem mị umite ghan epẹ erugh phọ ḍiroọr kụ mị atọl keminighạn amem ḍulhe. Kụ iḍiphọ omhoom olom r’anhịr, aSirkka r’amhị urọl ghan kẹn ni oomo emhụ aḍio oḍighi iphelhegbeel phọ. Kụ mem dị yoor oghị ekpisi dị ekelhạn iboom olhoghi otu ayoor, yoor umhinhạ ghan eeni amem olhoghi amoto phọ ayoor. Iphẹn phọ isoph ghan eroph eboom erelhe eḅilhẹ ilhoghonhaạn iyoor ḍighaạgh oḅon ghan omhiigh oḍighi iphelhegbeel phọ ḍieriphọ aḍio phọ.

Idiphọ amisonarị, yoor uphamhanhạm ni oophugh phọ yoor omhoọgh ghan bọ oghị esi oḍighi iphelhegbeel phọ. Ookpomhoghan phọ ayoor aphoph ni aghị ghisigh, kụ abumor r’abumaranhi phọ aColombia omoọgh agey eegharạ olhọgh eegu, ephomhoghiạn, ḅilhẹ r’osereghiạn ghan.

Aramhạ irọl li dị etuman egbogh emhạ phọ aNeiva yoor orọl bọ rokumuan dị r’oniin onyọ Ogbaanhaạn u/tọl. Mị ukạr kụ amhoọgh ogbolhomaam ipẹ oghaạph iiḅi iinhaghạn phọ kasi aani bọ ramhạ phọ ipẹ phọ. Toroboiperolbọ, iḍighi ni ooto r’osooromineen dị ooruen kakị epẹ phọ loor esi eghạm mọ erọl bọ igbo abuọ itooghị phọ r’awe eghạm dị u/meeraam itooghị phọ. Esi iduọn phọ, mị uuḅereghị ni alhọm aZihova mọ odị amiteom oye siphẹ aramhạ phọ ipẹ phọ dị kaḍighi aani onyọ Ogbaanhaạn. Mị ugbiom ghan olhoghi mọ oye phọ aZihova kamiteom bọ katọl Neiva kụ atuughạ igey phọ. Esi iduọn phọ, mị uḅilhẹ ni aaḅereghị mọ oye phọ r’oḍiiny muụm bịn asi amhanhanhaạm aḅilhẹ aḅula epẹ ekạr emhạ phọ odị amhiigh ogbeelhom aani iiḅi iinhaghạn phọ. Mị ukpẹ ni olhegheri mọ aZihova kụ kalegheri eten dị ekạr enhighẹ omiteom ekol upu imhị.

I/bia bịn mị amhiigh otuughạ aBaibul phọ r’onyugheel oọny dị oghol mọ Fernando González. Odị olọ Algeciras, eniin emhạ phọ epẹ onyọ Ogbaanhaạn u/lo ghan bọ. AFernando aḍuạ ghan 30 itobi oru aNeiva oḍighi. Odị aakolhobian ghan agey ituughạ aḍinyạ phọ odị torobọ amem dị yoor kotuughạ, kụ odị aḅilhẹ amhiigh oru ghan oomo ituughạ phọ ropạm ghan bọ. K’oḅẹl awiki phọ odị amhiigh bọ otuughạ aBaibul phọ, aFernando aakpomhoghi ghan ni we siphẹ emhạ phọ odị kụ atughemhị ghan raraạr phọ odị atuughạ bọ siphẹ ituughạ aBaibul phọ odị.

 AFernando atuughạ Baibul phọ odiiny unwanyụ bịn aḍiiny muụm unwanyụ aJanuary 1990. Onyebel roten, bịn odị aḍighi okọy eten opọ oomo amem mọ. Siẹn momhoọgh bọ oniin onyọ Ogbaanhaạn siphẹ Algeciras, ke/ḍighi mun ooto r’osooromineen dị olạ agadạ phọ kosighẹ bukọy eten dị ogbaatanhaạn okimọm epẹ phọ. Unwanyụ aFebruary 1992, bịn omiteom ookpomhoghan epẹ phọ.

AFernando aghaạph ghan iiḅi iinhaghạn phọ siphẹ okạr emhạ phọ odị bịn ḍughụm? Eeye! Mem dị odị aphin anhịr, anhịr phọ r’odị uḅuạ ni oghị San Vicente del Caguán, eniin siphẹ aramhạ phọ onyọ Ogbaanhaạn u/tọl bọ. Siphẹ emhạ phọ epẹ phọ, bidị ulhoghonhaạn ni ḍighaạgh ophighi ookpomhoghan. Kụ lhạ phọ 2002, omạ Fernando oḍighi opoghom eghir. Anhịr phọ odị, Olga r’odị rokiọm ni ghisigh oḍighi opoghom eghir phọ k’arodon.

Esi iphẹn emite bọ, mị matuughạ mọ emạn ni maạr okạr oghol ghan emhụ arukumuan ookpomhoghan phọ dị ungọ iyira ooḅereghị. AZihova raḍighi ghan ni raraạr dị yira r’aloor ko/tue oḍighi. Odị kụ uw-ozo phọ, k’/ayira.—Mat. 9:38.

Lhạ phọ 1990, umạ ni Erkki Mäkelä r’anhịr odị oḍighi opoghom eghir. Eḅẹl ekpisi phọ umạ bọ iyoor oghị phọ pọ egbogh emhạ phọ, Bogotá. Yoor umhoọgh ni oghiilhaan ilọ ekpisi phọ ephẹn phọ. Anhịr amhị r’amhị u/moọgh ḍighalhanyạ dị egbatanhaạn, yoor oopho awe ni bịn. Yoor k”orọl ghan ekpisi araamhạ dị rekur. Toroboiperolbọ, aZihova amhunhenhi ni oguanhaan phọ odị odi bọ siphẹ Filipai 2:13 eḅẹm bọ mọ: “Ilegheri mọ iikpọ phọ Enaạn reḍighi ni oḍighi loor anyina, pidị nyina ewạ eḅiIẹ kẹn eḍighi ipẹ eḅeraạn bọ nyodị.”

Onyebel roten, usighẹ iyoor oghị epẹ Medellín, egbogh emhạ phọ mị aghaạph bọ aghol epẹ emhiighom mọ. Awe phọ mokạr kụ oluạn iigamaniạn ekpisi phọ epẹ phọ bịn i/kịgh mun iyaạr esi abidị. Esi omaạm, eniin amem dị mị aghị otughemhị oye Baibul olhoghi otu odị, itaphạn imhiigh ni epẹ erugh phọ. Mị uwạ omhinhạ ude oḅololo, kuolọ esi opọ mị ratughemhị bọ i/kịgh iyaạr, aạl li bịn aghiọm dị uu/ḅaghamhiạn loor. Odị r’omhạn aạl, bịn uḅenhị imhị m’onọ ratu ni. Onyebel roten, bịn aphạm iyạl ibạm anmụny odị aḍighom otu kụ amhiigha loor uḅenhị imhị mọ, “Ka/lẹ, mị u/wạ mun mọ ibạm anmụny phọ abuẹn phọ orọl epẹ erugh.”

Inhọn asimem irọl li dị yoor oḍigh esi ooto r’osooromineen. Esi omaạm eniin amem dị yoor odi epẹ erugh phọ, anhịr amhị aghiil li bịn aru uteẹny imhị kụ oomo aloor phọ repiigha. Odị uḅenhị imhị mọ oye marạph nyodị laagbạ. Oḅio amhị apheẹph ni. Toroboiperolbọ, yoor uru ni olhegheri mọ oye phọ arạph bọ laagbạ phọ arạph onhọn oye dị arelhe raboọr anhịr phọ amhị eten, o/gbon nyodị kụ arạph bọ.

Esighẹ rekị bịn iigamaniạn emhạ phọ iluạn aani iyoor. Ikạr kụ ikparamhị iyoor iduọn iigamaniạn phọ i/dughe bọ buọ emhạ phọ oḍighi bọ Bugbaanhaạn, kụ osoman bọ idọ asidọl phọ iphẹn phọ obobọ idị eeph epu siẹn. Yoor ukureri mọ eḍighi maạr dị aZihova raloghonhaạn ni bidị ḍighaạgh, pọ odị kulhoghonhaạn aani ni iyoor kẹn ḍighaạgh. Oomo amem yoor udạph ghan oroma ikumor awe phọ, ogona ghan loor, kụ owilhenhaạn aZihova ipheriphọ.

Ii, iniin asidọl i/ḍighi ghan ooto r’osooromineen idiphọ yoor ootughiạn ghan bọ. Eniin amem dị mị aghị otughemhị oye Baibul, mị unhaghạn ilooghị dị eghịgh mudị iyạl anmariịr kụ rotuạn. Imhị ri/ḅeraạn ghan onhaghạn iigbakiạn, kuolọ uwotu phọ ukpaariọm ni imhị omite aani epẹ erugh phọ omhiịn.  P’iduọn phọ eḍọgh “iigbakiạn” phọ yoor ronaghạn bọ pọ eḍọgh iyạl arokooko dị retuughaạny ghan we dị orugh siphẹ ekool phọ.

Lhạ phọ 1997, umạ imhị oḍighi otughemhiạ aMinisterial Training School. b Oomo amem mị usereghiạn ghan ni eepoogh oghị aani siskul ookpomhoghan phọ, kuolọ r’amem r’amem mị uu/tughiạn mọ mị kamoọgh aani imạ eepoogh oḍighi otughemhiạ oniin askul pho.

Onyebel roten, kụ mị amhiigh okumuan idiphọ opoghom eephugh. Kụ mem mọ eepoogh arukumuan phọ epẹ phọ esi bọ eekunha, kụ mị aḅilhẹ amhiigh rukumuan eghir phọ. Mepel 30 asiạ mị amhiigh bọ oghelhọm eepoogh oḍighi opoghom eghir ḅilhẹ r’otughemiạ asiskul ookpomhoghan phọ. Aroopoogh phọ iphẹn phọ mekạr kụ ingọ imhị ḍisẹph kirokirọ. Toroboiperolbọ, ipaanhaạn irọl kẹn ni. Mị ugbạ uugeliọn.

Mị aḍighi oye dị ra/kiilhaan ghan iyaạr. Iphẹn phọ milhoghonhaạn imhị ḍighaạgh agey orue okaran igbagarạ asidọl dị mị asoman. Kuolọ eeni amem, oophugh phọ amhị asu ghan ni boph mem dị mị rakparaghạ oolemi araraạr siphẹ arookpomoghan phọ. Mem emhạn mem r’oophugh mị uromha ghan ni bunhọn awe mọ oḍeenhaan ghan bunhọn ephomhoghiạn r’onhaghanhạn aḍughụm. Kuolọ ipẹ phọ kụ araagharạ phọ mị r’aloor u/moọgh bọ mem mọ opọ phọ.—Rom. 7:21-23.

Loor asidugh phọ amhị, eeni amem mị raloghoma ghan ni oḅonyonhu ozuan. (Rom. 7:24) Amem irọl li dị mị aḅenhị aZihova esi iiḅereghị mọ kenighẹ dị mị kabilhẹ rukumuan amisonarị phọ aḅula epẹ Finland. Ḍughul phọ aḍiphẹ phọ, bịn mị aghị ituughạ. Kụ oromha phọ ongọ bọ epẹ otu ituughạ phọ ukparamhị ni imhị oghiọm aghisigh rukumuan phọ amhị etigheri e/munughan phọ amhị. K’aḍio arodon, ritir ghan ni imhị agey mem dị mị aatughiạn ipẹ aZihova aphagharanhaạn bọ iiḅereghị phọ amhị. Kụ oḅarạm isiphẹ, mị akạr kụ rasereghiạn ipẹ odị amhiigha ghan bọ loor ulhoghonhaạn imhị ḍighaạgh okpạr opu asidugh phọ amhị.

ASirkka r’amhị okạr kụ rosereghiạn aZihova loor esi eepoogh phọ odị ungọ bọ iyoor osighẹ ogbogh opol apakirị aghuḍum mọ ayoor olhọgh isiẹn arukumuan oomo amem mọ. Mị akạr kẹn rasẹph aZihova ongọ amhị anhịr dị amhoọgh ephomhoghiạn aḅilhẹ akpẹ oḍuomolhoghi siẹn oomo asiạ phọ iphẹn phọ.

Moọny amem mị kamạn 70 asiạ, kụ mị kabilhẹ ni eepoogh phọ amhị idiphọ oniin otughemhiạ asiskul ookpomhoghan phọ ḅilhẹ r’opoghom eghir. Toroboiperolbọ, iphẹn phọ imhị i/dughe. Eeghe kụ iḍighi? Loor esi dị mị akạr kụ ameeraam mọ iyaạr dị reḅeraạn ghan aZihova pọ okumu odị r’osooromhi aloor ḅilhẹ r’osighẹ ekpom dị ephomhoghiạn r’osereghiạn rekil kụ ooseenyom odị. (Mic. 6:8; Mạk 12:32-34) I/moghi mọ yira orọl risigh kụ ogbi olhegheri mọ yira rokuenhi ni aZihova.

Mem dị mị aatughiạn roopoogh phọ mị aghelhọm ghan bọ, mị amiịn mọ ke/kpạr amhị omhoọgh aroopoogh phọ ipẹ phọ obobọ i/ḍighi edị oḅẹm mọ mị kụ unhighẹ apu bunhọn; obobọ idị mị amhoọgh ḍighalhanyạ dị egbatanhaạn. Eeye i/ḍighi idiphọ! Kparipẹ ghụn, aZihova ungọ imhị roopoogh phọ iphẹn phọ loor onmạ ighirigiir phọ odị u/kpeanhaạn bọ. Odị ungọ imhị roopoogh phọ etigheri sidugh phọ amhị. Mị alegheri akuphom owol mọ aZihova kụ ulhoghonhaạn imhị ḍighaạgh orue oḍighi iiḍighi phọ ungọ bọ imhị. Esi iduọn phọ, asidugh phọ amhị megananamhi inyaạm mọ Enhaạn.—2 Kọr. 12:9.