Anyolara i oro 1955, man abino nyathin ma co mir adege yo fwa. Adongo ceng’ini ku dhu wat ma yo piny mi Finlande, ma tin ung’eyere ni adhura mi Vantaa.

Mama ulimo batizo pi nidoko Jamulembe pa Yehova i kind oro ma nok i wang’ nyoliri para. Ento baba ubed ujai i kum lemandha man ebed eyiyo ngo nia mama uponjwa ku Biblia kadi nia ebed ecidh kudwa i coko. Pieno, ebed eponjowa ku lemandha mir ukungu mi Biblia saa ma wegwa mbe i pacu.

Agam aketho lembakeca mi timo ni Yehova niai i thino para. Ku lapor, nindo moko kinde m’abino ku oro abiro, japonjo para mi somo udoko kwiny kuda pilembe akwero nicamu verilättyjä (m’utie mukathi mi Finlande ma jutedo ku rimo i iye). Ediyo dinga ku cinge acel pi niyabu dhoga m’amiyo, man ku cinge m’ucelo, eii niroyo kanya m’ecobo dund mukathine i wiye i dhoga. Atimo tego agudo kanyane cen kud i cinge.

Kinde m’adoko ku oro 12, baba tho. I ng’ey lembuno, anwang’u kaka mi caku cidho i coko. Umego mi cokiri ginyutho nia gibedieng’ kuda lee mandha; eno ucwala nitimo mediri i thenge mi tipo. Acaku somo Biblia kubang’ ceng’ man abed asomo girasoma mwa mi Jukristu mii mandha. Ng’iyo ma ber maeno mi ponji ukonya nibedo ayika nilimo  batizo ku oro 14 i nindo 8, mi dwi mir 8, 1969.

Ndhu ndhu i ng’ey m’adaru somo mi sekonder, acaku tic pa jayab yo ma nja. I ng’ey yenga ma nok kende ci, adok i theng ng’om mi Pielavesi ceng’ini i diere pa Finlande, kaka ma yeny mi jurwey ubino lee i iye.

I Pielavesi, awok arombo ku nyamego Sirkka m’udog udoko min ot para mir amara. Gin m’utela i bang’e ubino jwigiri pare man mer m’emaru ko Yehova. Ebino ngo ng’atu m’umaru jukupiny. Wan ario ceke wabino kud ava ma lee dit mi timo ni Yehova i kadhiri ceke ma copere iwa man i ayi tic moko ci. Wagamara kude i nindo 23, mi dwi mir 3, 1974. Kakare nicidho i yom i ng’ey nyom mwa, wadok pi nicikonyo i Karttula pilembe yeny mi jurwey lembanyong’a mi Ker ubino lee akeca kuca.

Niai i acaki mi gamiri mwa, Yehova unyutho iwa nia ebipong’o yeny mwa mi kum tek wayenyo ma kwong’a Ker pare. (Mat. 6:33) Ku lapor, wabino mbe ku mutukari i Karttula. Ku kwong’a, wabed wawotho ku gari. Ento i saa pa koyo, piny ubino ng’ic lee akeca. Pi nirweyo i therithwar ma lac mi cokiri mwa, wabino ku yeny pa mutukari. Re wabino mbe ku sente mi ng’iewe.

Rek kumeni, umira m’alubo ng’eye ubin uliewowa. Ewok emiyo iwa mutukari pare ku berocwinye. Nwang’u dong’ eng’iewo karathasine ceke. Wabino kende kende ku yeny mi ng’iewo mo i iye. E wanwang’u mutukari ma wabino ku yenyne.

Yehova unyutho kamaleng’ nia emaku rwom mi pong’o yeny mwa mi kum ceke i cinge. Tic mwa ubino ndhu niketho Ker i kabedo ma kwong’a i kwo mwa.

Kinde ma wabino i somo mi tic mi juyab yo i oro 1978, umego Raimo Kuokkanen a m’ubino acel m’i kind juponji mwa, umiyo amora i kumwa nia wapong’ karathasi mi kwayu pi Somo mi gilead. E wacaku ponjo dhok mir Anglais ku lembakeca mi yikara pi somone. Ento i oro 1980, julwong’owa pi nicitimo i biro mi Filial mi Finlande, nwang’u fodi wapong’o de ngo karathasine.  I saa maeca ebed eyiyere ngo ni umego ku nyimego ma gitimo i Bethel nipong’o karathisi pi nicidho i Somo mi gilead. Ento wabino ayika nitimo kaka ma Yehova re m’umaru, wan re ngo. E wayiyo lwong’one. Re asu wamedara niponjo dhok mir Anglais ku paru ma nia tek kaka binen, wabipong’o karathasi mi kwayu pi Somo mi gilead.

Oro moko nyanok i ng’eye, Guriri m’utelowic umiyo kaka mi pong’o karathasi mi kwayu pi Somo mi gilead ni umego ma gitimo i Bethel bende. E wapong’o karathasine wang’ acel. Ubino ngo pilembe tic mi Bethel ubenyang’uwa ngo; ebino nyang’uwa de lee! Wabino mito kende kende nibedo ayika nitimo kaka ma yeny utie lee i iye nisagu i ng’ey nwang’u diplom mi gilead. Julwong’owa i Gilead man jumiyo diplom mwa mi kalasine mi 79 i dwi mir 9, 1985. E juorowa i ng’om mi Colombie.

I ng’om mi Colombie, jular juorowa i biro mi Filial. Aii nitimo tic parane ku kero para ceke. Ento i ng’ey oro acel, anwang’u nia mito awil tic. Ebino wang’ ma kwong’a man ma tokcen i kwo para nikwayu nia jumii ira tic mange. I ng’eye, juorowa calu jumisioner ma jurwey lembanyong’a i adhura mi Neiva i theng ng’om mi Huila.

Tic mi rweyo lembanyong’a ubed unyang’a lee mandha. Kinde m’abino jayab yo ma jamusuma i Finlande, saa moko abed arweyo niai pir kugweno nitundo uthieno. Calu ma fodi wagamara ma nyen, waku Sirkka bende wabed warweyo duu. Ka waberweyo i therithwar ma bor, saa moko wanindo i mutukari mwa. Eno ubed ukonyowa niyom man nicaku tic con urwonde.

Tic maeno ukonyowa ninwang’u kendo kit anyong’a ma wabino ko saa ma fodi wacaku tic pa jayab yo acaka. Cokiri mwa de umedere. Bende, umego ku nyimego mi Colombie gibed ginyutho woro, mer man foyofoc lee mandha.

Jumulembe pa Yehova ubino mbe acel de i adhura ceke ma ceng’ini ku Neiva. Abed apenjara lee dit ka nyo jubirweyo lembanyong’a nenedi i kabedo maenogi. Ento nikum ulum, ebino tek magwei ni umondo nikwo i kabedonegi. Pieno arwo i bang’ Yehova nia timba ng’atu moko mir adhurane acel udok Jamulembe. Abed aparu nia mito ng’atune uponj lemandha kud i Neiva. Adog arwo nia i ng’ey batizo pare mito eteng’ini i tipo man edok erwey i adhura ma thugi. Agam ang’eyo ngo nia lembe ma Yehova upangu nitimo ubino ber nisagu m’apangu.

Ndhu ndhu i ng’eye, acaku ponjo Biblia ku jalawobi moko ma nyinge Fernando González. Ebed ekwo i Algeciras m’utie acel m’i kind adhura ma Jumulembe ubino mbe i igi. Fernando ubed uwotho pi kilometre ma kadhu 50 pi nicidho i tic i Neiva. Ebed eyikere ma ber mandha pi ponji pare man ecaku cidho i coko ceke m’umbe galu. Niai i yenga ma kwong’a m’ecaku ponjo iye Biblia, ebed ecoko dhu dhanu mange mir adhura ma thugi pi niponjogi ku gin m’eponjo i saa mi ponji pare mi Biblia.

Fernando ulimo batizo i dwi mi 1, 1990, niwacu i ng’ey dwi abusiel niai m’ecaku ponjo  Biblia. I ng’eye, edoko jayab yo ma nja. Calu ma gibino gin ario ku Jamulembe moko mir adhura mi Algeciras, ebino ngo lembe mir ariti ni biro mi Filial nioro juyab yo ma segi kuca. I dwi mir 2, 1992, jucaku the cokiri i adhura maeno.

Nyo Fernando ujigo nirweyo kende kende i adhura ma thugi? Ungo! I ng’ey m’egamu dhaku, giku min ot pare gidok i adhura mi San Vicente del Caguán, m’ubino adhura mange ma Jumulembe ubino mbe i iye. Giwok gikonyo pi nicaku the cokiri kuca. I oro 2002, jung’iyo Fernando ubed jaliew mi twodiri, man giku min ot pare Olga gibemediri ku tic mi liew cil tin.

Lembe maeno uponja nia pire tie tek nirwo pi lembe ma tap m’uneno tic mwa mi theokrasi. Yehova utie ku copo mi timo gin ma wacopo ngo. I andha, tic mi kayu cam eni utie tic pare, mwa ngo.—Mat. 9:38.

I oro 1990 juorowa i tic mi liew. Twodiri ma kwong’a ma waliewo ubino i adhura ma dit mi Bogotá. Tic maeno unyayu lworo lee i iwa. Pirang’o? Pilembe waku min ot para wambe ku bodho moko ma segi acel de. Man nwang’u wang’iyo ngo nikwo i adhura m’udhir ku tic ma tung’ tung’. Ento Yehova upong’o lembang’ola pare ma nwang’ere i Jufilipi 2:13, m’uwacu kumae: “Mungu re, ma ni kum yeny ma iye yenyo ubetimo i iwu, kara wubed kud ava man kero mi timo yeny pare.”

I ng’eye, juorowa i twodiri moko mi Medellín m’utie adhura m’aweco pire i acaki ca. Dhanu ma kuca gigam ging’iyo lee mandha ku rop mir adhurane uketho ebed emielo ngo kumgi. Ku lapor, ceng’ acel kinde m’abino telo wi ponji mi Biblia i ot moko, dhanu moko gicaku kiliri kud atum woko. Aboth ka podho i ng’om, ento japonj Biblia umedere asu nisomo udukuwec ma kume poto. Kinde m’edaru, ekwayu kisa pi nikewok woko. I ng’eye nyanok, edwogo kud awiya ario ma thindho man eyero ku yoo kumae: “Tim ira kisa, anwang’u nia mito acidh agam awiya para.”

Ariti mange de ubino nuti. Nindo moko kinde ma wabino rweyo lembanyong’a ot kubang’ ot, min ot para uringini i bang’a ma wang’e unyamere. Eyero ira nia ng’atu moko uyenyo kile kud atum. Lembuno unyayu lworo lee i iya. Ento wadok wanyang’ nia won atum maeno ulibo ngo Sirkka; ebino kilo jalwo moko m’ubino kadhu ceng’ini i ng’ete.

Nok nok, wan de wang’iyo ku ropne. Tegocwiny mir umego ma kuca ma gibed ginyego kadok ku peko ma lith lee, umiyo iwa bende tego. Waparu nia calu ma Yehova ubino konyogi, ebikoyo wan bende. Saa ceke wabed watiyo ku juk mi judong cokiri ma kuca, wabed watimo lembe m’ukwayere pi nigwokara man waweko donge i cing’ Yehova.

I andha, lembene moko ubino ngo kwar ve ma wabed waparu. Ku lapor, nindo acel awinjo dwal moko ma ve dwand jumamon ario ma gibeyanyiri i ng’et ot m’aciliewo dhanu i iye. Abed amaru ngo nineno dhanu  ma gibeloko dhoggi i kindgi, ento ng’atu m’aciliewone ukwaya nia aidh i the ot. I ng’eye, wanyang’ nia “loko dhok” maeno ubino i kind kukulu ario ma gibeporo dwand dhanu ma ceng’ini keca.

I oro 1997, jung’iya nibedo japonji i Dharaza mi tendo umego pi tic pa Mungu. b Abed amaru lee mandha nidikara i somo mi theokrasi, ento abed aparu ngo nyanok de nia nindo moko abinwang’u rwom mi bedo japonji kadok i somone acel.

I ng’eye, adoko jaliew mi distrik. Saa ma jukathu the yub maeno, adoko kendo jaliew mi twodiri. Pi oro ma kadhu 30, anwang’u anyong’a mi bedo japonji man bende jaliew mi twodiri. Tic maeno umiyo ira mugisa dupa. Ento lembe ubed ubedo ngo yot saa ceke. Wukewek akekor.

Abed agenara lee i kwo para. Eno ubed ukonya ninyego ku peko m’ubed uwok. Ento saa moko abed anyutho amora nikadhu mukero pi niyiko lembe mi cokiri. Abed akwayu umego ku nyimego moko ku tego mandha nia gibed ginyuth mer ni jumange man gibed dhanu ma i lembe migi tek ungo. Ku lemandha, ubino tap i saa maeno re ma an gira de agam akoso kite maenogi.—Rum. 7:21-23.

Saa moko cwinya ubed utur lee mandha nikum ng’ico para. (Rum. 7:24) Abepoy nia ceng’ acel ayero ni Yehova i rwo nia ecibedo ber kan aweko tic mi bedo misioner man adok i Finlande. Uthieno ma cing’ nica acidho i coko. Tielocwiny m’awok anwang’u ukonya ninyang’ nia aromo medara asu ku tic para, kende kende ubemito amedara ninyego i kum ng’ico para. Kite ma Yehova ubed udwoko ko wang’ rwo para ubewang’u iya nitundo tin. Abefoye bende lee mandha pi kite m’ekonya ko ku bero nivoyo ng’ico para.

Waku Sirkka watie ku banja pa Yehova i iwa pi rwom m’emiyo iwa mi kwo pi kare ma lee zoo i tic mi saa ceke. Abefoye bende lee mandha pilembe emiyo ira min ot ma jamer man m’ugwoko bedoleng’ pare pi oro ceke ma wan’i karacelo kude.

Adhingo mondo i oro 70 man ceng’ini eni abijigo nibedo japonji i somo mi theokrasi man abiweko tic pa jaliew. Ento lembuno uberoyo ngo can i adundena. Pirang’o? Pilembe ang’eyo cuu nia gin ma miyo yung ni Yehova utie tic ma wabetimo ire ku jwigiri man pak ma wabemiyo ire niai kud i adundewa m’udhir ku mer man foyofoc. (Mik. 6:8; Mark. 12:32-34) Pi nimiyo yung ni Yehova, wambe ku yeny mi bedo ku rwom ma segi i dilo pare.

Kan abeneno ng’eya man abeparu pi rwom ceke m’abedo ko i tic pa Mungu, anyang’ nia anwang’ugi ngo pilembe asagu jumange; ubino de ngo pilembe nia atie ku copo moko ma segi. Ento ubino nikum bero ma yawe mbe pa Yehova. Emiyo ira rwom maeno ceke kadok nwang’u abino ku ng’ico dupa de. Ang’eyo nia apong’o rwomne ceke ma ber kende kende ku kony pare. I ayi maeno, ng’ico para uketho tego pa Yehova unyuthere.—2 Kor. 12:9.