Isaka 1955 mihecaan hofocen kako, tatosaay ko faˈinayan kaka. Itiniay i lawac no riyar i katimol no Fenlan a lomahad kako, o Wanta hananay a niyaroˈ nohatini kora pala.

ˈAyawho no hofocen kako to pina miheca o wina ako micadaay to paputisem malo Misawacayay Tamdaw ni Yihofa. Kawra misafelitay ko wama to soˈlinay kimad, cowa ka kahi cingra a mipasifanaˈ ko wina tamiyanan minanam to Fangcalay Cudad, cowa ka kahi papihawikid to wina tamiyanan a mirienang to saˈopo. Mansa, ano awa ko wama ilomaˈ i, pasifanaˈay cingra tamiyanan to Fangcalay Cudad.

Mimingho kako i, misetekayto ko falocoˈ midofdof ci Yihofaan. Tinakoen kinacecayay, cowa ka kahi kako komaen to mipacamolan to remes a epang, tada maketeray ko singsi. O cecay kamay ningra mikomimitay to fiˈik ako, pangatowa to ngoyos ako, cecay kamay pacoled sanay to epang i ngoyos ako. Samaamaanen cowa ka kahi kako a komaen, salikor wanik hananay ako kora ˈalapit i kamay ningra.

12 ko mihecaan ako i, mapatayay ko wama. Ikorto, ngaˈayayto kako mirienang to saˈopo. Tada ciharatengay ko salikaka i takowanan, mikowaday konini takowanan padadotoc mingata ci Yihofaan. Misatapangay kako miˈosi to Fangcalay Cudad to romiˈamiˈad, misarocoday a micekiw to mitepangan cudad no likakawa. Mapalahaday  ako ko mahaenay a nanaman, mansa padadotocay kako macakat, itiniay isaka 1969 miheca saka 8 folad 8 romiˈad micada to paputisem. 14 ko mihecaan ako itiya.

Micudiyapto kako i, kalikiay misatapang malo miceriday a misakafahay. Ikor no pina lipay, malinahay kako tayra i tatenokan no Fenlan a Pilawisi, tada misaaliay to mitosilay kora pala.

Itini i Pilawisi, malitemohay ako ci Sirka, tada kanonoˈan a fafahiyan. O misapoeneray cingra tangongolay ko olah ci Yihofaan, masolotay ningra ko falocoˈ ako. Cowa pisaareteng cingra minengneng to saaroˈan, cowa picangacang to sinowayay kaˈorip. Malecaday ko patosokan no kaˈorip niyam, misaˈicelay matayal saki Yihofaan, ano o mananto a tayal misarocoday ko falocoˈ ningra a dademak. Itini 1974 miheca saka 3 folad 23 romiˈad mararamoday kami, caho ka piliwko to nika raramod, tangsolay tayra i Kartola, ikakaay ko pisaali to mitosilay itira.

Isatapang no mararamod kami i, pasifanaˈayto ci Yihofa tamiyanan, ano salakaten niyam micangacang ko Hongti Kitakit Ningra i, o mamidimokos Cingra tamiyanan. (Matay 6:33) Tinakoen itini Kartola, satapangho awaay ko tosiya niyam, tano fatikar sanay kami a talacowacowa. Kawra tada lietecay ko kasienawan itira, tocerid cisoedaay ko romiˈad a sienaw, kakahaday ko pitosilan a kilac no kasakopang, awa ko paliding cowa ka depoc, kawra awaay ko payci micakay to paliding.

Ikor, cowa ka harateng saka tosa faˈinayan kaka ako tayniay milisoˈ tamiyanan, pafeliay to paliding ningra. O hoking mapateliayto ningra, o simal aca ko haharatengen niyam. Iraayto ko paliding niyam!

Paihkalay ci Yihofa i tamiyanan, o Ningra ˈinorong a midimokos to sakaˈorip niyam, o saali tamiyanan i, paisalakaten i nokaˈorip ko Hongti Kitakit Ningra.

Isaka 1978 miheca itini i Pahatatanaman to Misakafahay i, singsi ci Layimo Koawkani pakalalokay tamiyanan tayra i Kiliyat Picudadan. a To saka citatodongaw, misatapangay kami minanam tono Padaka a sowal. Caho ka pisingsi kami i, isaka 1980 miheca macadaay niyam ko satahidang no fenpo i Fenlan tayra matayal. Itiya i,  o Pitil a tamdaw cowa ko ngangaˈay misingsi tayra i Kiliyat Picudadan. Kawra cowa ka saareteng han niyam minengneng ko mihalakaan no falocoˈ, ano icowaayto ko kangaˈayan matayal sa ci Yihofa i, cada hananayto niyam ko satahidang. Nikawrira, padadotocayho kami minanam to no Padaka a sowal, ikor ano hangangaˈay i, itiya sato kami pangangan tayra i Kiliyat Picudadan.

Ikor no pina miheca o Malohemay Malitengay i Congpo saan pasowal, i Pitilay a tamdaw ngaˈayay misingsi tayra i Kiliyat Picudadan sanay, oranto i, tangsolay kami misingsi. Kawra awaay ko hemek niyam matayal i Pitil cowa ka saan, ˈarawhan masafelitay! Maolahay kami tonini a katayalan. O ci Yihofa aca ko patorodan niyam, o harateng Ningra ano iraay ko hatatodong niyam talacowa matayal i, o mamakahi kami a tayra. Ikorto, mirienangay kami to saka 79 Kiliyat Picudadan, itiniay isaka 1985 miheca saka 9 folad micudiyap, maocoray kami tayra i Koronpiya.

Itini Koronpiya, saˈayaw tayniay kami i fenpo matayal. Misaˈicelay kami milahci to tayal no niyah, kawra ikor no cecay miheca miharatengay kami mifalic to kaˈorip, mansa misingsiay kako to faelohay a ˈinorong. O sakinacecay i nokaˈorip ako konini a mihaen to demak. Oranto i, mapanilnilay kami tayra i Niwa a niyaroˈ no Oila a kasapala, malo mikiriwiˈay manilnil a mitosilay.

Maolahay kako to mitosilay. Isaˈayaw itini i Fenlan malo misakafahay i, nolatekay mikidafak tahira i dadaya mitosil. Ikor no mararamod, kako ato fafahi mihaenay a midemak. Ano tayra kami i maraayay a pala mitosil i, itira sanayto i paliding mafotiˈ, hongaˈ caka palak ko i lalanay a toki, tocila romiˈad pacerem misatapang matayal.

Patikolto kami i kilac a mitosil i, matikolayto koya isaˈayaway a falocoˈ noka pitosil. Mahemekay kami maˈaraw ko nika cowat no kasakopang, masemeran nanay kami to itiraay a salikaka, samanen tada ciolahay cangra ato iraay ko miakoˈiday a falocoˈ, hanaca mikangodoay to romaroma tamdaw.

Ingata no Niwa iraay ko mimingay a niyaroˈ awaayho ko mitosilay itira. Haharateng sanay kako: “Sasamaan mapatenak tayra tora kilac ko ngaˈayay lihaf hani?” Samanen iraay ko lalood, o cowa ko itiraay a tamdaw tayra tora kilac cowa ka rihadayen, mansa mitolonay kako, nanay ira ko cecay naitiraay tora niyaroˈ a tamdaw malo Misawacayay Tamdaw ni Yihofa. Miharatengho kako, maedeng o itiraay i Niwa cingra a mafanaˈ to soˈlinay kimad, mihaenay i, micangacangay kako ci Yihofaan, nanay micada cingra to paputisem ikor malo matenesay tamdaw, ngaˈ minokay tayra i nalacolan ningra a mitosil. Soˈlinay pacaˈofan ni Yihofa ko satolon no mako, kawra o pidemak ni Yihofa mikikakaay to niharatengan ako ko nika ngaˈay.

Caho ka halafin mitolon kako, iraay ko cecay kapah tamdaw misatapangay minanam to Fangcalay Cudad takowanan. Ci Fernanto Konsales, itiraay i Alkeciras ko aroˈ ningra, awaay ko Misawacayay Tamdaw tora niyaroˈ, to lipalipayan naitiniay 50 kongli tayraay i Niwa a matayal. Ngaˈayay ko pisaday ningra to cerid a picekiw, hanaca kalikiay misatapang mirienang to polong a saˈopo. Misatapang minanam to Fangcalay Cudad to saka cecay lipay i, minokayay cingra palisopsop  to tamdaw, pasowal cangranan to mananamay ningra a soˈlinay kimad no Fangcalay Cudad.

Ikor no 6 folad to pinanam ni Fernanto to Fangcalay Cudad i, itiniay isaka 1990 miheca saka 1 folad micada to paputisem, ikor i, malo miceriday misakafahay cingra. Tona iraayto ko mitosilay i Alkeciras, rihadayan nanayto ko naitiraay i roma niyaroˈ a salikaka, mansa ocoranto no fenpo ko mikiriwiˈay misakafahay tayra. Isaka 1992 miheca saka 2 folad, iraayto ko kasakopang itira.

Ci Fernanto cowa ka itira aca i niyaroˈ no niyah a mitosil. Ikor no mararamod i, cingra ato fafahi ci Alciya malinahay tayra i Senwisente Tarkakan, o roma mimingay a niyaroˈ awaayho ko mitosilay itira. Misaˈicelay cangra a mitosil, mapatirengayto ko cecay kasakopang itira. Isaka 2002 miheca, ci Fernanto manilnilay malo kasakilac kantok. Tahanini cingra ato fafahi kamayanho malo milisoˈay ko tayal.

Mananamay ako itini tonini a nalifetan, matayal to demak ni Yihofa i, patodiceken a mitolon tada masakalimlaan. O cowa ka dangar no mita a demak o mamadangar ni Yihofa. Samanen, o tawki no mipanayay Cingra, cowa ko kita.—Matay 9:38.

Isaka 1990 miheca, mapanilnilay kami to milisoˈay a tayal, o saka cecay kilac i, itiniay i Poketa. Calemcemay kami to cowa ko mamadangar niyam, samanen kami i, o kalo a tamdaw awaay ko maanan a inaneng, hanaca cowa ka nanam itini i taˈangayay niyaroˈ a maroˈ. Nikawrira, palaˈosian ni Yihofa i tamiyanan ko sakiˈok Ningra i Filipi 2:13, sanay ko sinael: ‘Toha sapalaˈosiaw ko Kawas to makapahay araaw Ningra i, o mamikowad tamowanan, hongaˈ ira ko kalim no falocoˈ hanaca ira ko ˈicel a dademak.’

Ikor, maocoray kami tayra i roma a kasakilac, oya nisowalan i satapangho Matelin a pala. Itini toniya maci, marariday mafekad ko malatiˈilay, kawra cowato ka fahkaˈen ko tamdaw. Kinacecayay, itiniay kako i cecay lalomaˈan misikay to pacekiway, i papotal fahal sanay masoni ko kowang. Miharatengay kako sapihinefaaw i sera, ˈarawhan padadotocay a miˈosi to lalakaw kora pacekiwan, hato awaay ko manan a mafekaday. Malahci cingra miˈosi akaho sanay takowanan, masadakay cingra. Sahosaho, mihawikiday to tatosa wawa micomod, rihadayay cingra pasowal: “Kangodoanto, panokayan ako ko wawa isawni.”

Kinapinaay kami ira ko kaciˈangian a milifetan. Kinacecayay pakalomalomaˈan mitosil i, fahal sanay ci Sirka comikay tayni takowanan, safodingaw sa ko pising. Pasowal iraay ko mamikowang sanay, macekokay kako. Ikor mafanaˈ kami, oya mamikowang a tamdaw cowa ka pasayra ci Sirkaan, ao itatihiay ningra a faˈinayan ko kakowangen.

Ikorto i, minanamay kami sasamaan misiˈayaw to hatiniay a mikariˈangay a demak, hato cowato ka ciˈangien. O itiraay a salikaka tahalifa to hatiniay a demak, latek ikakaay ko nika tatiih, kawra fanekfekay cangra, taˈangayay ko pikowad tamiyanan. Miharateng kami, ano padamaan ni Yihofa cangra i, o papadama tamiyanan. Miraridan niyam mitoor ko sapaini no itiraay a malohemay malitengay, paliˈayaw misaday to demak. Ano caka ˈimer niyam i, patorod hananayto ci Yihofa.

 Nikawrira, o roma demak cowa ka haen to niharatengan niyam a masakatalawan. Kinacecayay, milisoˈ kako to cecay lomaˈ i, matengilay i papotal ko tatosa fafahiyan miceliˈay malapoˈi. Awaay ko harateng ako minengneng to malacongisay, kawra talapotalho a minengneng sanay ko cilomaˈay. ˈArawhan o tatosaay mafanaˈay mitodong to caciyaw no tamdaw a ˈayam, mitodongay to sowal no sakafiyaw.

Isaka 1997 miheca, misatapangay kako malo singsi no SKE. b Tohati:niay maolahay kako mapahatatanam no likakawa, kawra cowa ka maharateng to aira ko kalikoan ako mala singsi.

Ikor, manilnilay kako malo kasapala kantok. Mapalahdawto no likakawa konini a saaroˈan i, patikolay kako milisoˈ to kasakilac. Mataˈlifay ko 30 mihecaan, padadotocay kako malo singsi no SKE ato milisoˈay to kasakopang. Onini a tayal pairaay to adihayay a sapalemed takowanan, kawrira iraayho ko pina pasangaray a demak to raremoen ako.

ˈAtekakay ko pinangan ako, mansa tahasiˈayaw to pasangaray a demak i, madoloay a mikiemel. Kawrira, tona iraay ko hatiraay a pinangan, ano misalof to pasangar no kasakopang kako i, narikayay a macaloh. Kinapinaay ˈifowaay ko falocoˈ ako pakalalok to salikaka papipaihkal to olah ato mafanaˈ pacaˈi to tamdaw, ˈarawhan o kako kora cangoˈotay to hatiraay a capeling.—Loma 7:21-23.

Nolatekay cowa ka ngaˈay ko pidemak ako a matoleden ko falocoˈ. (Loma 7:24) Kinacecayay, hananay ako pasowal ci Yihofa itini satolon: “Ka piliyas ako tonini a saaroˈan, minokay tayra i Fenlan ko ngaˈayay.” Itiya toya dadaya, mirienang kako to saˈopo makowaday ko falocoˈ. Pakasoˈlin toha mamaterek kako tonini a saaroˈan, padadotocay milowid, miremo to dangoc no niyah. Ihkalay ci Yihofa pacaˈof to satolon ako, tahaniniay masemeray ko falocoˈ ako. Miakoˈiday kako ci Yihofaan damsay a padama takowanan miremo to dangoc no mako.

Kako ato fafahi hakelong no ˈorip mieminay to toki matayal saki Yihofaan, tangongolay ko piakoˈid niyam i Cingraanan. O fafahi ako o ciolahay madimadiay a fafahiyan salikaka, miakoˈiday kako ci Yihofaan padama tamiyanan halafin a malacafay.

Mangataayto 70 ko mihecaan ako, caayto ka mala singsi no SKE ato kasakilac kantok. Kawrira cowa ka somaden kako, misamaanay hani? Samanen mafanaˈay kako, cowa ko aitini saan ko mata no tao i takowanan, ao ci Yihofa ko papaˈodingaren. O papaira to sapaˈdil i ci Yihofaan, misapoener kami matayal Cingranan wangaˈ, tona maolahay ato miakoˈiday Cingranan mikifalocoˈay kami pakahemek Cingranan.—Mika 6:8; Marko 12:32-34.

Tikolen minengneng o malifokay ako a masakenakenaay a tayal, ihkalay mahapinang ako macada konini a tayal i, cowa ka ikaka ko nika ngaˈay to tao, ano iraay ko maanan kangaˈayen ako i tao i, o pakayniay to nika eca ka piliˈ ni Yihofa to dangoc no mako, mikiriwiˈay Cingra sidaˈit takowanan. Mafanaˈay kako, samanen iraay ko sapadama ni Yihofa, hato ngaˈayay kako milahci tonini a tayal. Mankora, wa saan kako pasowal: ‘Ano malonay kako i, mangalefay ko kataˈangay no ˈicel no Kawas.’—2 Korinto 12:9.