Nayajj 1955 maranwa nasiwayta, kimsa jilanakanirakïtwa. Finlandia markanjja, sur toqenkir qota jakʼanwa jilsuwayta, uka cheqajj ciudad de Vantaa sasin uñtʼatäjjewa.

Mamitajajja nayajj janïr naskayäta ukhaw Jehová Diosan Testigopjamajj bautisasitayna. Ukampis papitujajj janiw Bibliat kuns yatiñ munkänti, mamitajamp Bibliat yateqapjjañajsa tantachäwinakar sarapjjañajsa jarkʼapjjarakitänwa. Ukhamäkchïnsa, papitujajj jan utankkäna ukhaw mamitajajj Diosat yatichapjjerïtu.

Nayajj jiskʼatpachaw Jehová Diosar serviñ amtawayta. Paqallqo maranïkayäta ukhajja, profesorajajj nayatak wal colerasïna, kuna laykutejj wilani mä torta janiw manqʼantañ munkayätti. Ukampis jupajj munkir jan munkirwa manqʼantayañ munitäna. Ukham obligatpachas janiw manqʼantañ munkayätti, oraqeruw uka torta liwtarakiyäta.

Tatajajj 12 maranïkayäta ukhaw jiwjjäna. Uka qhepatwa tantachäwinakar sarjjayäta. Jilat kullakanakajj nayat wal llakisipjjäna, ukaw Diosar jukʼamp jakʼachasiñatak yanaptʼitäna. Sapürurakiw Biblia liyiyäta, qellqatanaks jukʼampiw yatjjatarakiyäta. Taqe ukanakaw bautisasiñatak yanaptʼawayitu, ukat 14 maraniruw 8 de agosto, 1969 maran bautisasta.

 Colegior sarañ tukuyjjayäta uka qhepatjja, precursor regularat serviñwa qalltayäta. Mä qhawqha semananakatsti, Finlandia markankir Pielavesi sat cheqaruw predicacionan yanaptʼañatak sarjjayäta.

Pielavesi cheqansti, Sirkka esposajaruw uñtʼta. Jupajj humilde chuymanïnwa, Jehová Diosarus wal munasirakïna. Maysa toqetjja, jupajj kunatï jakañatak munaski ukakwa thaqäna. Cheqansa Diosar serviñan panpachaniw mä amtanikïpjjayäta, kun lurañatakis dispuestokïpjjarakiyätwa. Ukatjja 23 de marzo, 1974 maranwa casarasipjjta. Ukat qhepürpachaw Karttula jiskʼa markar predikir sarapjjta, uka cheqan Diosan arunakap yatiyirinakaw wal munasïna.

Casarasipkta uka qhepatjja, janiw Jehová Diosajj kuns faltayapkitänti (Mat. 6:33). Sañäni, Karttula markan sirvkasajj qalltan janiw autonïpkayätti, bicicletatakwa predikir sarapjjayäta. Ukampis awti pachan janiw bicicletat sarañjamäjjänti, kuna laykutejj uka tiempojj wali thayänwa. Uka markan territoriopajj wali jachʼarakïnwa, ukatwa taqe cheqar sarañatakejj mä autojj munasïna, ukampis auto alañatakejj janiw qollqejj utjapkitänti.

Mä urojja mä jilajaw visitir autopamp purinïna, ukatjja “aka autojj jumanakatakiwa” sasaw sapjjetäna. Uka auto lantejj janiw kuns churapkayätti ni pagapkayätsa, gasolinakwa alapjjañajäna. Ukhamatwa nanakajj autonëjjapjjayäta.

Jehová Diosajj kunjamats yanaptʼapjjapunitänwa, nanakajj Diosan Reinopakwa nayrar uchapjjañajäna.

1978 maran precursoranakatak escuelankkasajja, Raimo Kuokkanen a jilatajj Galaad escuelar sarapjjañajatakiw chʼamañchtʼapjjetäna. Ukatwa nanakajj inglés aru yateqañ qalltapjjayäta, ukampis janiw uka escuelar sarañatakejj solicitud phoqantapkayätti, kuna laykutejj 1980 maran Finlandia sucursalan serviñatakiw invitapjjetäna. Uka maranakan betelitanakajj janiw Galaad escuelar sarañ puedipkänti. Nanakajj janiw askijak thaqapkayätti, jan ukasti Jehová Diosan voluntadap lurañatakiw  chʼamachasipjjayäta, ukatwa betelar taqe chuym sarapjjayäta. Ukampis inglés aru yateqasipkakiyätwa.

Mä qhawqha maranak qhepatjja, betelitanakajj Galaad escuelar sarjjapjjaspawa sasaw Cuerpo Gobernantejj säna, uk istʼasajj jankʼakiw solicitud phoqantapjjayäta. Cheqansa nanakajj wali kusisitaw betelan servisipkayäta, ukampis yaqha cheqan yanaptʼañatakejj dispuestokïpjjarakiyätwa. Ukhamaruw Galaad escuelar invitapjjetäna, ukat septiembre de 1985 maranwa graduasipjjta, nanakajj clase número 79 ukankapjjayätwa. Uka escuelatjja Colombia markaruw khitapjjetäna.

Colombia markar purisajj sucursalaruw khitapjjetäna, ukanjja taqe chuymaw asignacionaj phoqayäta, ukampis mä mara qhepatjja yaqha asignacionwa mayiyäta. Ukat Neiva sat jiskʼa markaruw misionerot serviñatak khitapjjetäna, uka markajj Huila sat departamentonkiwa.

Predicañajj walpun gustitu. Finlandia markanjja, precursorat sirvkasajj alwat jaypʼukamaw awisajj predikirïta. Sirkka esposajamp casarasipkta uka qhepatjja, ukhamarakiw jurnälpach predicapjjerïta. Wali jaya territorionakar sarapjjerïta ukhajja, awisajj autonwa ikipjjerïta. Ukhamatwa tiempo jan ina chʼusar aptʼasisajj jankʼak qhepürojj predicañ qalltapjjerïta.

Diosan arunakap yatiyañatak mayamp asignatäsajj wali kusisitäpjjayätwa, asignatäpkayäta uka congregacionas wal jiltarakïna. Colombia markankir jilat kullakanakajj respetasiri, munasiri ukat yuspärasiri chuymanïpjjänwa.

Neiva sat marka jakʼanakanjja, walja jiskʼa markanakaw utjarakïna. Uka cheqanakarojj janiw yaqha cheqat jutirinakajj mantapkänti, kuna laykutejj wali armantat guerrillanakaw utjäna, Testigonakas janirakiw uka cheqanakan utjkänti. Ukatwa kunjamsa uka lugaranakan predicasispa sasin wal lupʼiyäta. Uka toqet Jehová Diosaruw orasiyäta, akham sarakiyätwa: “Uka lugaranakat Neiva markar jutiri mä jaqer jikjjatañatak yanaptʼita, ukat uka jaqen Testigor tukuñapatakisa, bautisasiñapatakisa, nayrar sartañapatakis yanaptʼarakita. Ukhamat jupajj uka lugaranakan predicañapataki” sasa. Ukham mayisitajarojj Diosajj istʼitänwa.

Uka qhepatjja, Fernando Gonzáles sat waynaruw Bibliat yatichañ qalltayäta, jupajj Algeciras sat cheqatänwa, uka cheqan janiw Testigonakajj utjkänti. Jupajj Algeciras cheqat Neiva markakamajja, 50 jila kilometronakwa sapa semanajj trabajiñatak viajirïna. Bibliat yatjjatañatakejj wali sumwa wakichtʼasirïna, qalltatpachwa tantachäwinakarus jan faltasis jutirïna. Yateqañ qalltkäna uka nayrïr semanajja, markapankir mä qhawqha jaqenakaruw tantachtʼäna, ukhamat kuntï jupajj yateqkäna ukanakat parlañataki.

Fernandojj enero de 1990 maranwa bautisasïna, sojjta phajjsinak Bibliat yateqjjasajja precursor regularat serviñwa qalltäna. Qhepatjja sucursalajj precursor especialanakwa Algeciras cheqar khitjjäna, kuna laykutejj mä Testigow ukan utj-jjäna. Ukat febrero de 1992 maranjja, mä congregacionaw ukan uttʼayasjjarakïna.

 Ukampis Fernandojj janiw Algeciras cheqan quedaskänti. Casarasjjäna uka qhepatjja, Olga esposapampejj San Vicente del Caguán sat jiskʼa markaruw sarjjapjjäna, uka markan janiw Testigonakajj utjkänti. Mä congregación utjañapatakis yanaptʼapjjarakïnwa. Ukat 2002 maranjja, circuitot serviñapatakiw jupanakar uttʼayapjjäna, jichhürkamaw uka asignacionan servisipki.

Fernandon experienciapajj akwa yatichawayitu: mä asignacionan kunanakas llakisiyistu ukanak qhanwa Jehová Diosar yatiyañasa. Jupaw kunatï jiwasatak chʼamäki uk phoqaspa. Cheqansa cosecha apthapiyir Dueñojj Jehová Diosawa (Mat. 9:38).

1990 maranjja circuitot serviñatakiw uttʼayapjjetu, nayraqatajj Bogotá markanwa circuitot servipjjayäta. Nanakajj janiw wali yatjjattʼat jaqenakäpkti, ni wali experiencianïpktsa, janirakiw jachʼa markan jakirïpktsa. Ukatwa uka asignacionan sirvkasajj mä jukʼit ajjsarayasipjjayäta, ukampis Jehová Diosaw yanaptʼapjjetäna. Filipenses 2:13 textojj akham siwa: “Diosaw jumanakarojj kunjamtï munki ukarjam chʼamañchapjjtamjja, juparakiw munañap lurañ munapjjañamatakisa phoqapjjañamatakisa chʼam churapjjtamjja” sasa.

Uka qhepatjja, qalltan parlaniwayktan uka Medellín markaruw circuitot khitapjjetäna. Uka markajj jan wali lurañanakamp phoqantatänwa, ukampis jaqenakajj janiw ukan jakañ ajjsarayasipkänti. Mä kutejja, Bibliatwa maynir utapan yatichaskayäta, ukhaw callen disparonakajj istʼasïna. Uk istʼasajj imantasiñwa munayäta, ukampis Bibliat yateqerijajj jan sustjasis liytʼasinkakïnwa. Liytʼañ tukuyasajj añchhitaw kutinï sasaw anqar mistuwayäna, mä jukʼa minutonak pasatatsti pä jiskʼa wawanakampiw kuttʼanïna, akham sarakitänwa: “Perdontʼita, wawanakaj irptiriw sarta” sasa.

Janiw ukürukejj ukhaman uñjaskayätti. Mä urojja utat utwa predicasipkayäta, ukhamaruw esposajajj tʼijukam purinïna, wali sustjatarakïnwa. “Mä jaqew nayar disparaniwayitu” sasaw sitäna, uk istʼasajj nayajj walpun sustjasiyäta. Ukampis uka jaqejj janiw esposajarojj disparkataynati, jan ukasti esposaj lado pasir jaqeruw disparatayna.

Tiempompejja, jan wali lurir jaqenak taypin jakañ janiw ajjsarjjapjjayätti. Maysa toqetjja jan walinakan uñjasipkäna uka jilat kullakanakajj janiw aynachtʼapkänti, Diosats janirakiw jitheqtapkänti, uk uñjañajj walpun chʼamañchtʼapjjetäna. Ukatwa akham sapjjayäta: “Jehová Diosaw jupanakarojj yanaptʼaski, jiwasarojj ukhamarakiw yanaptʼistani” sasa. Congregacionanakankir ancianonakan ewjjtʼaparojj istʼapjjapunirïtwa, wali amuyumpiw sarnaqapjjarakirïta, Jehová Diosaw yanaptʼistani sasas taqe chuymaw confiyapjjerïta.

Cheqansa uka lugaran janiw taqe kunas jan walipunïkänti. Mä urojja mä utaruw visitaskayäta, ukatjja pä warminakas wal toqesipkaspa ukhamwa istʼayäta. Nayajj janiw ukar  yäqkayätti, ukampis uka utani warmejj ventanat uñtam sasaw sitäna. Ventanat uñtasajj pä loritonakarukiw uñjayäta, jupanakajj vecinonakapat yateqasisaw wal toqesisipkäna.

1997 maranjja, Escuela de Entrenamiento Ministerial b ukan yatichañatakiw instructorjam uttʼayapjjetäna. Diosan markapan utjki uka escuelanakar sarañajj wal gustitu, ukampis uka escuelanakan yatichañ janiw suykayätti.

Qhepatjja superintendente de distritotwa servirakiyäta. Ukat superintendente de distritonakajj jan utj-jjäna ukhajja, mayampiw circuitot sirvjjayäta. Nayajj 30 jila maranakaw instructorata ukat circuitot serviskta. Taqe ukanakan Diosar sirvkasajj walja bendicionanakwa katoqawayta, ukampis janiw taqe kunas sumapunïkänti. ¿Kunatsa ukham sistjja?

Nayajj jan ajjsariri jan sinttʼasis kuns arsuri ukhamäyätwa. Jan walinakan uñjaskayäta ukhajj ukhamätajaw yanaptʼitäna, ukampis congregacionan mä kun askichañas utjiri ukhajj jan sinttʼasisaw kuns arsurïta. Amuytʼañataki, yaqhep jilatanakarojja awisajj akham sirïtwa: “Mayninakajj kunjamas jikjjatasipjje uk amuyapjjañamawa, munasiñampiw uñjapjjañamaraki” sasa. Cheqansa uka arunakajj nayatakjamänwa, kuna laykutejj nayaw ukhamäñajatak chʼamachasiñajäna (Rom. 7:21-23).

Awisanakajja, pantjasirïtaj laykojj wali aynachtʼataw jikjjatasirïta (Rom. 7:24). Mä kutejj wali llakitapuniw uñjasiyäta, ukatwa Jehová Diosarojj oracionan akham sista: “Misionerot serviñ jaytjjañajäspawa, ukat Finlandia markar kutʼjjañajaw wakisispa” sasa. Ukampis uka urojj reunionan kuntï istʼkayäta ukajj chuymarupuniw purtʼitäna, asignacionaj jan jaytañataki ukat suma jaqer tukuskakiñatakiw chʼamañchtʼarakitäna. Jehová Diosajj kunjamsa oracionajar jaysanïna, kunjamsa suma jaqer tukuñatak munasiñamp yanaptʼawayitu taqe ukanak janipuniw armkäti.

Sirkka esposajampejj kunayman asignacionanwa Jehová Diosar serviwayapjjta, taqe ukanakat walpun jupar yuspärapjjta. Ukat nayar munasiri, taqe kunan yanaptʼasiri mä esposa churatapats walpun Jehová Diosar yuspärta.

Niyaw 70 maranëjjäja, ukhamajj instructorata ukat circuitot serviñ jaytañajaw wakisjjani. Ukampis janiw ukat llakiskti, kuna laykutejj Jehová Diosar serviñatakejj janiw wali jachʼa privilegionakajj wakiskiti. Jan ukasti humilde chuymampi, yuspärasir chuymampi, munasiñamp Diosar serviñaw jukʼamp wakiskirejja (Miq. 6:8; Mar. 12:32-34).

Jehová Diosar sirvkasajj kunayman asignacionanakwa katoqawayta, ukanakan wali kusisitaw serviwayarakta. Ukampis taqe ukanak janiw mayninakat sipan jilankataj layku, jan ukajj mä kuns sum lurtʼirïtaj layku katoqawaykti, antisas Diosaw khuyapayasiñapat uka asignacionanak churawayitu. Cheqas Diosan jan yanaptʼapampejja, janiw asignacionanakaj phoqañ puedkiriskayätti. Ukatwa nayajj akham sista: “Aynachtʼatäkayäta ukhajj Diosaw yanaptʼitäna” sasa (2 Cor. 12:9).