Aku lahir bas tahun 1955. Telu kami ersenina, janah aku me si nguda. Aku mbelin bas sada kota i deher pantai selatan i Finlandia. Gundari gelar kota e eme Vantaa.

Mamak iperidiken jadi Saksi Jahwe piga-piga tahun sope aku lahir. Tapi Bapak la nggit erlajar, janah la berena ajari Mamak kami erlajar Pustaka ntah pe reh ku perpulungen. Emaka sampati Mamak kami erlajar Pustaka sanga Bapak la i rumah.

Mulai aku anak-anak, enggo pang aku mbela kinitekenku man Jahwe. Contohna, sanga umurku pitu tahun, merawa kel guruku perban la aku nggit man verilättyjä (kue khas Finlandia si iban arah dareh). Ipaksa guruku gelah kubuka babahku, masukkenna atena kue e ku babahku, tapi mis kukupisken tanna.

Sanga umurku 12 tahun, mate Bapak. Dungna, banci aku reh ku perpulungen. Turang senina bas runggun keleng kel atena aku. Sampati kalak e aku erban kemajun. Mulai me kubaca Pustaka tiap wari janah meriah kuakap mpelajari publikasita. Emaka, banci aku iperidiken sanga umurku 14 tahun bas tanggal 8 Agustus 1969.

Kenca tamat aku sekolah, mulai aku merintis biasa. Piga-piga minggu kenca si e, pindah aku ku ingan si merluken terbuen  perberita. Gelar kota e Pielavesi, kota e ndeher ku pusat kota Finlandia.

Bas Pielavesi, jumpa aku ras Sirkka. Ngena ateku ia perban ia meteruk ukur janah keleng kel atena Jahwe. La atena jadi kalak si penting, janah labo daramina kebayaken. Ate kami mereken si mehulina man Jahwe janah nggit kami ndahiken tugas kai pe si ibereken man kami. Erjabu kami tanggal 23 Maret 1974. Dung kami erjabu, la kami bulan madu. Pindah kami ku Karttula perban ingan e merluken terbuen perberita asangken Pielavesi.

Mulai kami erjabu, lalap bereken Jahwe kebutuhen kami adi pelebe kami KerajanNa. (Mat. 6:33) Contohna, sanga kami i Karttula la lit motor kami. Tangtangna ersepeda kami. Tapi, sanga musim salju mbergeh kel cuaca bas ingan enda. Selain si e, mbelang kel daerah dinas kami. Emaka perlu kami motor, tapi lenga lit sen kami nukursa.

La isangka-sangka, reh abangku ndahi kami. Berekenna motorna man kami. Asuransi motor e pe enggo dung galarina. Emaka, minakna ngenca perlu galari kami. Dungna, enggo lit motor kami.

Kejadin e erban reh paguhna kiniteken kami man Jahwe. IurusNa kerina keperlun kami. Tugas kami mpelebe KerajanNa ngenca.

Sanga ikut kami Sekolah Dinas Perintis bas tahun 1978, Turang Senina Raimo Kuokkanen a salah sada instruktur kami. Iahkenna kami ndaftar ku Sekolah Gilead. Emaka, mulai kami erlajar bahasa Inggris gelah banci kami memenuhi syarat ku sekolah e. Tapi bas tahun 1980, sope isi kami formulir ku Sekolah Gilead, kami iundang ngelayani i kantor cabang Finlandia. Paksa si e, keluarga Betel la banci ndaftar ku Sekolah Gilead. Amin pe bage, meriah ukur kami ngelayani i japa pe kami itugasken perban Jahwe si metehsa i ja ingan si mehulina man kami. Emaka, aloken kami undangen e. Amin gia bage, tetap kami erlajar bahasa Inggris, ntah uga kari lit kesempaten kami ndaftar ku Sekolah Gilead.

 Piga-piga tahun kenca si e, ikataken Badan Pinpinen maka keluarga Betel pe enggo banci ndaftar ku Sekolah Gilead. Mis isi kami formulirna. Labo perban lanai meriah akap kami bas Betel. Tapi meriah ukur kami ngelayani i japa pe merluken terbuen perberita. Emaka, kami isetujui ikut Gilead kelas pe-79-ken janah wisuda kami bas bulan September 1985. Itugasken me kami ku Kolombia.

Sanga bas Kolombia, penugasen kami si pertama eme ku kantor cabang. Kuusahaken kel ngelakoken si mehulina bas tugasku. Tapi kenca setahun i kantor cabang, kuakap perlu aku perubahen. Emaka kupindo perubahen tugas. Sekali e ngenca bas geluhku aku mindo perubahen tugas. Kenca si e, itugasken me kami jadi utusen injil bas kota Neiva i daerah Huila.

Meriah kel ukurku erberita. Sanga merintis biasa aku i Finlandia, erberita aku mulai erpagi-pagi nari seh ngayak berngi. Kenca erjabu pe bage denga kang, banci kami sada warin erberita. Tapi, adi ndauh ingan kami erberita arah rumah nari, la kami mulih ku rumah, bas motor kami medem. Emaka paginna, banci kami lampas erberita. Perban adi mulih kami, enggo dekahen kami bas dalan.

Sanga kami jadi utusen injil, seri semangat kami erberita ras sanga tangtangna jadi perberita. Reh majuna me runggun kami. Turang senina bas Kolombia e sikeleng-kelengen ras siergan.

I deher Neiva lit sada kuta si la lit Saksi Jahwe i je. Bas kuta e sangana lit perang. Emaka bahaya adi lit kalak asing si reh ku je. Lalap kuukuri uga nge carana gelah berita si meriah banci seh ku ingan e. Emaka kutotoken gelah lit min sadalah gia si tading i je jadi Saksi Jahwe. Kuakap, adi lit kalak si erlajar Pustaka arus min ia tading bas Neiva. Kutotoken ka gelah kenca ia iperidiken maju min ia. Alu bage, sanga mulih ia ku kutana banci ia erberita i je. Kepeken, iteh Jahwe cara si ndauh ulin asangken si lit bas ukurku.

La ndekah kenca si e, kusampati sekalak dilaki erlajar Pustaka, gelarna Fernando González. Ia tading i Algeciras. Bas kuta e la lit Saksi Jahwe. Ingan erdahin Fernando i Neiva, dauhna lebih 50 kilometer arah rumahna nari. Sikap banna persiapenna sope erlajar Pustaka, janah reh ia ku kerina acara perpulungen. Sada minggu kenca ia erlajar Pustaka, pepulungna kalak i kutana janah ajarina kalak e kerna Pustaka.

Enem bulan kenca Fernando erlajar Pustaka, iperidiken ia bas bulan Januari 1990. Kenca si e, jadi perintis biasa ia. Perban enggo lit sekalak Saksi Jahwe i Algeciras, itugasken kantor cabang me perintis istimewa ku ingan e. Bas bulan Februari 1992, ibentuk me runggun bas daerah e.

Labo bas kutana saja Fernando erberita. Kenca erjabu ia, pindah ia ras diberuna, Olga, ku San Vicente del Caguán. Bas  kuta e pe la lit Saksi Jahwe. Erberita kalak e i je, janah dungna iban me sada runggun i je. Bas tahun 2002, ilantik me ia jadi pertua keliling janah ngelayani ia seh ngasa gundari.

Arah pengalamen enda, erlajar aku maka penting kel ertoto alu jelas ntah pe spesifik kerna tugasta bas organisasi. Kai si la banci silakoken, banci ilakoken Jahwe. Jahwe kap Si Mada peranin, labo kita.—Mat. 9:38.

Bas tahun 1990, itugasken aku jadi pertua keliling. Daerah tugas kami si pertama eme i Bogotá, ibu kota Kolombia. Labo akap kami ngasup ndahiken tugas e perban kami kalak biasa janah labo lit bakat kami. Kami pe labo biasa tading bas kota si galang. Tapi tepati Jahwe janjiNa si icatat bas Pilipi 2:​13, si ngataken, “Dibata kap si ngiahken kena ngelakoken kai si erban ngena ateNa. BereNa man kena sura-sura ras gegeh guna ngelakokenca.”

Kenca si e, itugasken me kami ku daerah i kota Medellín. E me kota si tangtangna kuceritaken ndai. Kalak si tading i je enggo biasa ngidah kejahaten i dalan, emaka lanai kalak e mbiar. Pernah sanga kusampati sekalak dilaki erlajar Pustaka, begi kami sora tembaken, minter aku tiarap. Tapi si erlajar ras aku e tetap tenang. Teruskenna mbaca paragrap si sangana bacana. Kenca enggo dung bacana, permisi ia lawes ku darat. Sanga mulih ia, babana dua anakna. Nina, “Sori ya, ngelegi anakku ndai aku.”

Tapi pernah kang terancam geluh kami. Pernah sanga erberita ate kami arah rumah ku rumah, ayaki diberuku aku. Pucat kel kuidah ayona. Nina lit sekalak dilaki si atena nembak ia. Sengget kel aku. Tapi dungna teh kami maka labo Sirkka si nandangi itembak dilaki e, tapi sekalak dilaki si ngelewati Sirkka.

Dungna, lanai kami mbiarsa ngidah kejahaten bas daerah e. Terpegegehi kami ngidah turang senina si pang ngadapi situasi si seri janah lit ka si terparahen. Tek kami, adi kalak e isampati Jahwe, kami pe pasti sampatiNa. Lalap ikutken kami petunjuk arah pertua. Hati-hati ka kami janah andalken kami Jahwe.

Memang bahaya nge daerah kami e. Tapi lit situasi si labo bagi si bayangken kami. Contohna, sanga erberita kami ku sada rumah, begi kami lit sora darat nari. Tempa sora diberu si sangana rubati, janah megang kel sorana. Tangtangna labo aku nggit ngenenca, tapi iajak si mada jabu aku ku teras. Sanga ndarat kami, kepeken labo lit si rubati. Sora ndai, sora dua burung beo si ngusih sora tetangga si mada jabu e.

Tahun 1997, ilantik aku jadi instruktur Sekolah Pelatihan Pelayanan. b Meriah kel ukurku ikut bas sekolah si iban organisasi.  Tapi labo pernah kubayangken aku jadi instrukturna.

Kenca si e, jadi pengawas distrik aku. Tapi kenca piga-piga waktu, mulihi aku jadi pertua keliling. Meriah kel kuakap banci jadi instruktur bage pe pertua keliling lebih 30 tahun dekahna. Melala kudat pasu-pasu arah tugas enda. Tapi mon-mon labo menukah ngelakokenca. Nta kuturiken engkai maka bage ningku.

Aku kalakna perpang janah percaya diri. Tapi perban sipatku e, mon-mon kuadapi situasi si sulit. Mon-mon semangatsa aku ndungi masalah bas runggun. Pernah semangatsa aku mereken saran man turang senina gelah cidahkenna kekelengen ras sipat masuk akal. Tapi situhuna, paksa si e aku nge si la ncidahken sipat e.—Rom. 7:​21-23.

Perban kelemahenku e, mon-mon kitik ukurku. (Rom. 7:24) Pernah kutotoken man Jahwe gelah ngadi saja aku jadi utusen injil janah mulih aku ku Finlandia. Tapi karabenna, perpulungen aku. I je, ipetetap ukurku gelah terus kudahiken tugasku janah la aku nyerah. Adi kuinget kenca kerna si e, malem pusuhku perban ijawap Jahwe totoku. Ngata bujur kel aku man Jahwe perban sampatiNa aku ngadapi kelemahenku.

Ngata bujur kel kami man Jahwe perban banci bereken kami geluh kami ngelayani Ia sepenuh waktu. Ngata bujur ka aku man Jahwe perban berekenNa man bangku diberu si mehuli ras setia.

Kentisik nari 70 tahun umurku. Enggo lanai aku banci jadi instruktur sekolah bage pe pertua keliling. Tapi labo aku sedih, perban enggo kuteh uga carana erban meriah ukur Jahwe. Arus meteruk ukur kita nembah Ia, janah sipuji Ia arah ukurta nari. (Mi. 6:8; Mrk. 12:​32-34) Gelah banci simuliaken Jahwe, labo arus sidat tugas si penting bas organisasi.

Adi kuinget mulihi tugas si kudat sedekah enda, sadar aku maka si e labo kudat perban ulin aku asangken kalak si deban ntah pe perban lit bakatku. Tapi, bereken Jahwe tugas e perban kiniulinNa si luar biasa. BerekenNa tugas si istimewa e amin pe lit kelemahenku. Kuteh maka perban penampat Jahwe nge maka ngasup aku ngelakokenca. Jelas me, reh belinna teridah kuasa Dibata perban kelemahenku.—2 Kor. 12:9.