Ah mi baan eena 1955, an Ai da-mi di yongis owta chree bwai. Ah groa op kloas tu di see da di sowt a Finland, da wahn siti weh naym Vantaa.

Mi ma geh baptaiz az wan a Jehoava Witnisiz bifoa Ah baan. Bot mai pa mi deh gens di chroot an ih neva alow mi ma fi teech wi bowt di Baibl er fi eevn kehr wi da meetin. Soh wen mai pa neva deh rong, shee wuda teech wi baysik Baibl teechinz.

Fan Ah smaal, Ah mi stan op fi di chroot. Fi egzampl, wen Ah mi sevn yaaz oal, mi skool teecha mi geh beks bad wid mi bikaaz Ah neva waahn eet verilättyjä, wahn pankayk weh mek owta blod. Wid wan han ih skweez mi mowt fi oapm it, ahn wid di ada han ih chrai foas wahn pees a di pankayk eena mi mowt. Bot Ah manij fi nak it owta ih han.

Mi pa ded wen Ah mi 12 yaaz oal. Afta dat, Ah kuda mi staat goh da meetin. Di persnal inchres weh di bradaz shoa mi help mi fi geh kloasa tu Jehoava. Ah mi staat tu reed di Baibl evri day ahn stodi wi poblikayshan dehn. Dehnya gud stodi habits help mi fi geh baptaiz wen Ah mi 14 yaaz oal, pahn Aagas 8, 1969.

Afta Ah finish skool, Ah mi staat regyula painyaa. Wahn fyoo weeks layta, Ah moov  tu Pielavesi, wahn tong weh mi deh midl a Finland, bikaaz dehn mi need help fi preech di gud nyooz deh.

Ah meet Sirkka da Pielavesi. Shee da-mi wahn hombl yong laydi weh mi lov Jehoava wahn lat, ahn dat da weh jraa mee tu shee. Shee neva chrai bee impoatant er foakos pahn mateeryal tingz. Di too a wi mi waahn du az moch az wi kud fi Jehoava, noh mata weh asainment wi get. Wi geh marid pahn Maach 23, 1974. Insteda gaahn pahn honimoon, wi gaahn serv da Karttula, wehpaat dehn mi need moa help fi preech di gud nyooz.

Fahn wi geh marid, Jehoava shoa wi dat if wi put di Kingdom fers eena wi laif hihn wahn mek shoar wi aalwayz ga weh wi need. (Mach. 6:33) Fi egzampl, wen wi mi deh da Karttula wi neva ga wahn kaar, soh wi yoostu goh bowt pahn baisikl. Bot joorin winta taim, ih yoostu geh veri koal. Sins di kangrigayshan weh wi mi-di serv eena mi ga wahn big teritori, wi wuda mi need wahn veekl, bot wi neva ga di moni fi bai wan.

Wahn day, mi oalda breda mi dak op da wi hows kohn vizit wi. Hihn mi aafa wi ih kaar, an ih mi don ga inshoarans. Wi mi onli haftu bai gyas. Soh wi mi fainali ga wahn kaar.

Jehoava proov tu wi dat hihn mi wahn provaid weh wi need. Aal weh wi mi haftu du da put di Kingdom fers eena wi laif.

Wail wi mi-di goh da Painyaa Servis Skool eena 1978, Brada Raimo Kuokkanen, a wan a wi teechaz, mi inkorij wi fi aplai fi Gilyad Skool. Soh wi mek it wi goal ahn wi staat tu laan English. Bot eena 1980, bifoa wi kuda eevn aplai fi goh da Gilyad, wi mi geh invaitid fi serv da di Finland branch. Eena dehndeh dayz, Betelaits kudn aplai fi goh da Gilyad. Bot wi mi waahn goh wehpaat Jehoava mi waahn sen wi, noh wehpaat wee tink wi shuda goh. Soh wi mi aksep di invitayshan ahn kantinyu laan English jos in kays wi kuda mi goh da Gilyad laytaraan.

Wahn fyoo yaaz layta, di Govanin Badi mek wahn chaynj weh alow Betelaits fi aplai  fi Gilyad. Wi mi aplai rait away, bot da neva bikaaz wi neva hapi da Betel. Wi mi jos waahn serv wehpaat dehn mi need moa help. Dehn mi aksep wi aplikayshan ahn wi gaahn da Gilyad. Wi mi grajuayt fahn di 79th klaas eena Septemba 1985, ahn wi fers asainment da-mi Colombia.

Di fers asainment weh wi mi geh da Colombia da-mi fi serv da di branch aafis. Ah mi chrai mi bes eena mi asainment, bot afta wahn yaa, Ah mi feel laik wi mi need wahn chaynj. Dat da di onli taim Ah mi eva aks fi mek dehn chaynj mi asainment. Afta dat, dehn mi asain wi fi serv az mishineri da wahn siti weh naym Neiva eena di Huila Dischrik.

Ah mi aalwayz lov di minischri. Wen Ah mi singl an Ah mi-di painyaa da Finland, Ah yoostu goh preech fahn erli da maanin til layt da eevnin. Ahn wen mee ahn Sirkka mi jos marid, wi wuda du hoal-day servis tu. Wen wi wuda preech eena wahn teritori weh deh faar fahn wehpaat wi liv, sohntaim wi wuda sleep eena wi kaar soh dat wi ku staat preech erli di neks day.

Afta wi asainment chaynj, wi mi feel di saym hapinis wi mi feel bifoa eena di minischri. Wi kangrigayshan mi groa, ahn di bradaz ahn sistaz mi shoa lata lov, rispek, an apreeshiayshan.

Noh tu faar fahn Neiva, dehn mi ga sohn tong weh no Witnisiz mi liv eena. Sins dehn mi ga rebl soaljaz deh, da ayrya neva sayf fi peepl weh da neva fahn deh. Bot, how di peepl fahn deh mi wahn geh fi hyaa di gud nyooz? Wel, Ah mi pray fi mek sohnbadi weh da fahn wan a dehndeh tong laan di chroot ahn geh fi bee wahn Witnis. Ai mi tink dat fi mek dat hapm, dehn mi wahn haftu liv da Neiva. Ah mi aalso pray fi mek di brada geh baptaiz ahn groa fi bee wahn spirichwali machoar persn ahn goh bak da ih hoamtong fi preech tu di peepl deh. Ah shuda mi noa dat Jehoava wuda ga wahn beta plan dan weh Ai mi-di tink.

Lee wail afta dat, Ah mi staat stodi wid wahn yong man weh naym Fernando González. Hihn mi liv da Algeciras, wan a di tong weh neva ga no Witnisiz. Evri week, hihn wuda chravl oava 30 mailz (50 kilomitaz) fi goh werk da Neiva. Hihn yoostu pripyaa gud fi evri stodi an ih mi staat goh da aala di meetin dehn rait away. Fahn di fers taim ih stodi, ih mi staat tu tel peepl fan ih hoamtong bowt weh ih mi laan fahn di Baibl.

Fernando mi geh baptaiz eena Janiweri 1990, siks monts afta ih mi staat stodi. Ahn afta dat, ih staat tu regyula painyaa. Now dat dehn mi ga wahn brada da Algeciras, ih mi sayf inof fi mek di branch sen speshal painyaaz. Ahn di fers kangrigayshan mi staat op eena Febiweri 1992.

Fernando neva jos preech eena ih hoamtong. Afta hihn an ih waif, Olga, geh marid, dehn moov tu San Vicente del Caguán, wahn nada tong weh neva ga no Witnisiz. Dehn mi help staat op wahn nyoo kangrigayshan  deh tu. An eena Disemba 2002, Fernando mi geh apointid az wahn serkit oavaseeya. Hihn an ih waif stil di du serkit werk op tu tudeh.

Aala dis mi teech mi dat ih impoatant fi bee spesifik wen wi pray bowt mataz weh ga fi du wid wi asainment. Jehoava ku du weh wee kyaahn du. Aftaraal, dis da fi hihn haavis, noh fi wee wan.—Mach. 9:38.

Eena 1990, wi mi geh asain fi du serkit werk. Wi fers asainment mi deh da di kyapital siti, Bogotá. Mee ahn Sirkka da aadineri peepl, wi noh ga no speshal skilz. Wi mi frayd dat wi neva mi wahn du gud eena dis asainment kaaz wi neva yoostu liv eena wahn big siti. Bot wi si how Jehoava mi kip ih pramis da Filipiyanz 2:​13, weh seh: “Gaad di du weh pleez hihn wen ih giv unu di dizaiya ahn di powa fi du weh hihn waahn.”

Laytaraan, wi mi geh asain fi du serkit werk da Medellín, di saym plays Ah mi menshan erliya. Di peepl mi soh yoostu di lata vailens owt da schreet dat dehn neva frayd nohmoh. Fi egzampl, wahn taim Ah mi-di kandok wahn Baibl stodi ahn wahn shoot-owt mi staat rait owtsaida di hows wehpaat Ah mi deh. Ah mi redi fi jrap da di grong, bot di Baibl styoodent jos kantinyu reed di paragraaf laik if notn mi-di hapm. Wen ih finish reed, ih tel mi dat ih gwehn owtsaid fi wahn lee wail. Afta wahn wail, ih kom bak wid too lee pikni an eena wahn kaam vais ih tel mi: “Sari, bot Ah mi haftu goh fi mi pikni.”

Dehn mi ga ada taimz wen wi mi eena daynja. Wahn taim wen wi mi-di preech fahn hows tu hows, mi waif kohn di ron, an ih mi luk fraitn no miks. Ih mi seh dat sohnbadi mi chrai shoot ahn. Mee anaal mi feel frayd. Bot wi fain owt dat di man akchwali mi-di shoot aata wahn neks man weh mi-di paas kloas tu shee.

Afta wahn wail, wi mi laan fi deel wid di vailens. Wi mi reeli admaiya how schrang di bradaz ahn sistaz mi schrang fi deel wid sichuwayshanz laik dehnya an eevn wers. Wi mi figa dat if Jehoava mi-di help dehn, ih wuda help wee tu. Wi mi aalwayz lisn tu di eldaz advais, wi mi chrai fi stay sayf, ahn wi mi lef tingz eena Jehoava han.

Af koars, sohntaim tingz neva az bad az wi mi tink. Fi egzampl, wahn taim wen Ah mi-di preech da wahn hows, Ah mi hyaa laik too laydi di hala ahn kos op aata eech ada. Ah neva waahn intafyaa, bot di howshoalda neva don til ih mek Ah kohn pan ih varanda fi si weh di hapm. Ahn wen Ah luk, da mi too paarat weh mi-di kapi di nayba dehn.

Eena 1997, Ah mi geh apointid az wahn teecha fi di Ministeeryal Chraynin Skool. b Ah mi aalwayz lov goh da wi teeyokratik skool dehn, bot Ah neva imajin dat Ah mi wahn geh di privilij fi teech da wan a dehn.

 Laytaraan, Ah mi serv az wahn dischrik oavaseeya. Bot wen da araynjment mi stap, Ah mi serv az wahn serkit oavaseeya agen. Soh fi oava 30 yaaz, Ah geh fi serv az wahn teecha an az wahn chravlin oavaseeya. Ah injai lata blesinz eena dehnya asainment, bot ih neva aalwayz eezi. Mek Ah tel yu wai.

Ai ga wahn schrang persnaliti. Sohntaim ih help mi fi deel wid tof sichuwayshanz, bot sohntaim Ah ku bee lee bit tu schrik wen Ah chrai fiks sertn kangrigayshan mataz. Sohntaim, Ah wuda giv schrang kongsl tu difrent bradaz ahn sistaz fi mek dehn bee moa lovin ahn reeznabl wid adaz. Bot weh foni da dat eena dehndeh sichuwayshan, Ai mi need fi fala mi oan kongsl.—Roam. 7:​21-23.

Wen Ah tink bowt di mistayks weh Ah mek, ih mek Ah feel reeli dong. (Roam. 7:24) Wahn taim, Ah mi feel soh diskorij dat Ah pray ahn tel Jehoava dat ih wuda beta if Ah lef mishineri servis ahn goh bak da Finland. Da saym eevnin, doh, Ah gaahn da meetin an ih mi veri inkorijin. Ih kanvins mi fi stay eena mi asainment ahn fi kip di chrai werk pahn mi persnaliti. Tu dis day, Ah stil apreeshiayt how Jehoava mi ansa da pryaa. An Ah reeli apreeshiayt how ih help mi eena soch a kain way fi bee wahn beta persn.

Sirkka ahn mee kyaahn tank Jehoava inof fi di privilij fi serv hihn eena ful-taim servis fi moas a wi laif. Ah soh tankful dat Jehoava gi mi wahn lovin waif weh sopoat mi chroo aala dehnya yaaz.

Ah wahn soon ton 70, an Ah wahn haftu giv op mi privilij fi serv az wahn teecha ahn wahn serkit oavaseeya. Bot Ah noh feel sad bowt it. Wai nat? Bikaaz Ai bileev dat fi aana Jehoava wi noh need fi ga wahn impoatant asainment. Weh moa impoatant da fi bee hombl, graytful, ahn serv ahn wid wahn haat ful a lov.—Mic. 6:8; Maak 12:​32-34.

Wen Ah tink bowt weh aal Ah geh fi du fi Jehoava, Ah si dat Ah neva geh dehnya asainment bikaaz Ah mi beta dan enibadi els; ner Ah neva get dehn bikaaz a eni speshal skilz weh Ah gat. Ih noh ga notn fi du wid dat! Jehoava gi mi dehnya asainment bikaaz a ih grayt kainis. Hihn gi mi dehnya privilij eevn doa Ah noh perfek. Ai noa dat Ah onli kuda mi du dehnya asainment wid Jehoava help. Ah si how grayt Gaad powa wen Ai week.—2 Kor. 12:9.