Lidan irumu 1955 nagüriahóua, ǘrüwañadiwa houn wagübürigu, ani au agumuhóunibei. Yarafa lun kosu le súrubei Finlandia naweirida, lidan aban fulasu le subudiwabei guentó kei uburugu Vantaa.

Fiu irumu lubaragiñe nagüriahóun ligía tabadiseirún núguchu, ánheinti núguchi mínsiñeti meha inarüni lun, ligíati leweridirubarun núguchu lun marufudahan tan ni kata woun tuagu Bíbülia ni lun tanaahaniwa adamuridagua. Dan meha le ua lan wáguchi, meferidiruntu meha chansi lun tarufudahan woun luagu Heowá.

Lúmagiñe meha niñüraü aba nidin luéigiñe lóubadina Heowá. Haritagua nágili dan le lan meha sedü lubéi irumu nau, aba tagañidun numaistaran numa ladüga numahan neigin verilättyjä (aban tuwuyeri durudia finlandiana to gaganatu mórusiya). Aba tárügüdüni náribügü lun tádarun murusun tídangiñe durudia tuguya niyumulugun, ábati nádaruni túhabu ani aba léiguadun fígiedu múarugun tau durudia.

Dan meha le duusu lubéi irumu nau, aba lounwen núguchi. Lárigiñebei lounwen, gayarahali meha nabasiihan adamuridagua. Arufudatiña meha íbirigu ínsiñehabuni nun, ani adügati katei le lun nawanserun lidan numadagua luma Bungiu. Gumesetina aliihoun Bíbülia sagü weyu luma aturiahoun wani agumeiraguagüdüni hulili. Adügati lubuidun échuni le lun nabadiseirun 8 lidan widü-hati, irumu 1969, dan meha le katorusu lubéi irumu nau.

Murusun dan lárigiñe nagumuchunu nileskuelan, aba nagumeserun eseriwida kei prekursoru. Fiu dimaasu  lárigiñe, aba náguyun Pielavesi, aban aüdü yarafa lun lamidangua Finlandia, lun nídehan lidan apurichihani ñein.

Ani ñein meha Pielavesi nasubudiroun Sirkka, to meha lunboun nániboun lan weiriou. Le meha hínsiñetimabei nun tuagu Sirkka, ǘnabugu tan luma weiri lan tumadagua luma Heowá. Mabusenrúntu meha taweiridagüdünu hanigi gürigia ni lun gibe lan túmati. Biángubei wagía, busentiwa meha wíchuguni le buídutimabei wámagiñegua lidan weseriwidun lun Bungiu. Ani aranseñu waña meha lun wadügün furumiñeguarügü dasi le ichugúti woun. Aba wamarieidun 23 lidan ǘrüwa-hati, irumu 1974. Lubaragiñe hamuga woudin asariñaha kei hadügüni hiibe-agei maríeitiña, ábarüga woudin eseriwida Karttula, le ñein lubéi hemegeirúa Gefentiña lun hapurichihan.

Lúmagiñe wamarieidun, arufudaali Heowá leteniruba lan woun anhein wíchiga Larúeihan lidan furumiñeti lúgaaru (Mat. 6:33). Kei hénpulu, dan meha le weseriwidunbei Karttula, makarüntiwa meha, tidan meha beiki waweiyasuha. Lidan méhati lidaani lidiliga, hénrenguti meha waweiyasuhan tidan. Lun meha gayara lan wapurichihan lidan sun fulasu le aubei lariha damuriguaü le ñein wabéi, mégeitiwa meha aban karü, ani maseinsuntiwa meha lun wagañeihan aban.

Aban weyu, aba lachülürün aban hádangiñe níbugañanu abisidahawa, ani magurabun wamuti yebe, ani aba lariñagun woun gayara lan werederun tau likarün. Mafayeihantiwa ni kata, nírügü seguru. Lérügüñein meha lunbei wadügüni, wagañeihan gasolina tun. Chülüdüga buga dan lun gakarün wamá!

Furanguti meha larufuduni Heowá woun líchugubei lan le wemegeirubei woun, rúrügü wamaali ligía Larúeihan furumiñe.

Lidan irumu 1978, dan le meha tídanñadiwa lubéi Leskuela houn Prekursorugu, aba línchahaniwa Raimo Kuokkanen, a aban hádangiñe arufudahatiña, lun wabuinchagüdün gárada lun wagunbirahóun tidoun Leskuela Galaadü. Ligía wagumeserunbei aturiaha inglesi lun gayaraabei lan wadügüni le mégeiwabei lun wagunbirahóun. Gama lumoun, mabuinchagüdün wamutu gárada lugundun, aba wagunbirahóun eseriwida tidan sukursáli to Finlandiaboun lidan irumu 1980. Lidan meha dan ligía, siñati meha habuinchagüdün betelitagu gárada lun houdin tidan Leskuela Galaadü. Busentiwa meha weseriwidun lun Heowá le ñein lubéi labusenra, mama le ñein lubéi wabusenra. Ligía wánharunbei  lun weseriwidun Betelirugu. Lau sun lira, sigimémetiwa aturiaha inglesi luéidügü meha lachülürün dan lun wagunbirahóun tidoun Galaadü.

Fiu irumu lárigiñe, aba lánharun Musu Úaraguati lun habuinchagüdün betelitagu gárada lun houdin tidoun Leskuela Galaadü. Ligía aba lubéi wabuinchagüdünu gárada lau lóufudagun ani aba wóunahanu. Lau sun meha gunda wamá lau weseriwidun Betelirugu, busentiwa meha wagunfulirun lau le mégeiwabei lun weseriwidun le ñein lumuti mégeiwatima lan. Aba wagunbirahóun tidoun Leskuela Galaadü númeru 79 ani aba weresibihan lidan nefu-hati, irumu 1985. Haliñounba méhati wounahóua? Wounahóua meha Kolonbioun!

Dan le wachülürünbei Kolonbia, aba wounahóun eseriwida tidan sukursáli. Áfaaguatina meha lun nadügüni nuadigimari buidu, lau sun lira, aban irumu lárigiñe, busenhadina meha asansiruni lidan neseriwidun, ani ligíarügügili meha wéiyaasu lidan nibagari namuriahan lun lasansirúniwa nidasin. Ábati wounahóun eseriwida kei misionérugu uburugu Neiva, lóubawagu Huila.

Hínsiñegubeiñein apurichihani nun. Dan meha le prekursoru nubéi Finlandia ani mamarieidungidina meha, anihein meha dan napurichihan lúmagiñe binaafin darí laburigadun. Lárigiñe meha namarieidun tuma Sirkka sun meha weyu wau apurichiha. Dan meha le woudin apurichiha dise, anihein meha dan warumugun tidan wakarün. Ítara liña meha meferidirun wamá dan, ani larugan, gumesegia wamuti meha apurichihani.

Lau wagiribudun eseriwida ítara, ábaya wasandiruni ubebeni le meha wasandirubei luagu apurichihani. Aba aganwoundeina hamá lílana damuriguaü le ñein lubéi meha weseriwida, inebehabutiña meha íbirigu ha Kolonbiabaña, hínsiñehabu hagía ani geteingiradi.

Yarafa lun Neiva, anihein meha saragu aüdü le ñein lubéi ua hamá ni aban íbirigu. Le meha turobulibei ñein, añahein hamá meha geriyeru lidan fulasu burí ligía ani mama meha aban fulasu chóuruti houn ha mámabaña ñeinna. Ida luba méhati lachülürün inarüni lidoun fulasu ligía? Sun meha oura nasaminarun luagu katei le. Aba nagumeserun afurieida lun Heowá lun ñein lan somu lílana aüdü burí ligía le awinwanduti Neiva adügaguti lungua gefentime luagu Heowá. Amuriahatina giñe danme lan le labadiseirun gürigia ligía lun laganwoundun lisubudin luagu Bungiu, giribu ligíame lageiroun lun lapurichihan houn lílana. Lau sun meha buidu lan narihin lun saminaü le, anihein meha aban saminaü le buídutimati luma Heowá.

Murusun dan lárigiñe, aba wagumeserun íchiga aturiahani lun aban wügüri nibureinti gíriti Fernando González, le meha awinwandubei Algeciras, aban meha lídangiñe aüdü le ñein lubéi ua hamá Gefentiña. Sagü meha dimaasu laweiyasuhan lóugiñe 50 kilometuru (30 maili) lun lidin awadigimarida Neiva. Aranseti meha buidu lubá laturiahan ani gumeseti adamuridagua lau lóufudagun. Lúmagiñebei lagumeserun aturiaha, aba lóundaraguagüdün hádangiñe lílana lageira lun larufudahani le lafurendeirubei houn.

Sisi hati lárigiñe lagumeserun Fernando aturiahoun Bíbülia, aba labadiseirun lidan eneru, irumu 1990, ani lau lóufudagun aba lagumeserun eseriwida kei prekursoru. Kei meha aniheinhali lubéi aban gefenti luagu Heowá Algeciras, gayaraahali meha tóunahan sukursáli prekursorugu espechalitiña ñeinhin lau ichouruni. Lídanti bián-hati, irumu 1992, aba lagumeserun aban damuriguaü ñein.

 Meredeti Fernando eseriwida Algeciras, lárigiñebei lamarieidun, tuma Olga, aba hounahóun eseriwida lidan amu aüdü le ñein lubéi úa hamá Gefentiña: San Vicente del Caguán líribei aüdü ligía. Ídehatiña giñe maríeitiña ha lun gayara lan lagumeserun aban damuriguaü ñein. Lidan irumu 2002, aba hounahóun eseriwida kei óunigirutiña sirkuitu, fadá lumoun dan le, añahagua eseriwida lidan sirkuitu.

Arufudahati sügǘ le nun súdini lan lun wariñaguni lun Heowá ka lan wabusenrubei wibihin lidan weseriwidun lun. Gayaraati ladügün Heowá katei le siñá wamuti adüga. Lugundun ligía Laburemebei dasi le (Mat. 9:38).

Lidan irumu 1990, aba niridún keisi óunigiruti sirkuitu, ani le furumiñeti sirkuitu le nabisidahabei, uburuguñein Bogotá, uburugu le ichügüdinaübei lun ageiraü. Au tuma Sirkka, gürigia kamanitiña wagía, úati aban iyaraani espechaliti wawagu. Lanwoun lira, méchuntiwa meha awinwanda lidan aban uburugu wéiriti. Ligía meha líchugubei dasi le anufudei woun. Gama lumoun, gúnfuli lumuti meha Heowá dimurei le lídanbei Filipuna 2:13 (TNM), le ariñagubei: “Ladüga kei lugundan lubéi Bungiu líchugun erei hun, gayaraati ladügün lun hayumahan hadügüni katei, gayara ligía líchuguni iyaraani hun lun hibihini”.

Luagu aban dan, aba nounahóun eseriwida lidan aban sirkuitu Medellín, uburugu le buga uágubei nayanuha. Lidan uburugu ligía, héchuhaña meha gürigia luagu anarimeni le ǘmadarugubei ani malouchunhaaña meha dan le harihini. Haritagua nágili aban weyu, níchuguña meha aturiahani lun aban wügüri, ligía waganbun haduuraguña lan gürigia balu bóugudi. Aranseñu niña yebe lun nachüüragun nungua múarugun, ánheinti aturiahati, aba lasigirun aliiha kamá hamuga úati mégeiti. Dan le lásurunbei laliihan, aba lariñagun aguñeeli lan gararagua, ábati láfuridun. Murusun dan lárigiñe, aba lagiribudun hau bián irahüñü, lau darangilaü, aba lariñagun nun: “Ferudunabana, mosu buga nidin anügaña nirahüñü”.

Mámarügüñein wuribani le wariha. Luáguya aban dan, wapurichihaña tidan burí muna, ligía tiabin nani weiriou sódini éibaagueina, haruha tigibu. Buin lau anufudei, aba tariñagun nun sun liña lan haduuragun tuagun, lau sun mahitirun hanamu. Lárigiñe, aba wíchugun fe mama lan tuagun haduuragua, luagun lan aban wügüri le ásügürübei tóubagiñe haduuragua.

Lau lásügürün dan, aba wagumeserun échuda luagu anarimeni murusunraü. Wéiritu burí wanigi dan warihini awanduni luma iderebugu le harufudubei wábirigu lidan sügǘ líbeina le o lidan le hanarimetimati luéi. Ábati wariñagun wóunguarügü anhein líderaguñanu lubéi Heowá wábirigu, líderagubadiwa giñe. Súnwandan meha wafalaruni adundehani le híchugubei wéiyaaña lidan afiñeni ha lídanbaña fulasu ligía woun, góunigiguatiwa meha woungua ani le líbiri, aba wígiruni lúhaburugu Heowá.

Anihein meha dan manarime lan luriban katei kei wasaminaruni. Luagu aban weyu wabisidahaña aban würi ligía waganbun kamá hamuga héreraguña bián würiña. Mabusenrungubeitina meha narihini éreraguni ligía, ábati tadügüdarun tabureme muna nuagu lun naganaridun ariha bóugudin. Dan le naganaridunbei, aba narihin habahüdahañein lan bián gurewegi héreragun besinagu.

Lidan irumu 1997, aba niridún kei arufudahati tidan Leskuela to Aransehabaliña íbirigu lun aban Ministeriu Espechaliti. b Súnwandan meha busén nan nidin tidan leskuela to, gama lumoun, masaminarungubeitina meha nibihibei lan lubuidun chansi lun narufudahan tidan aban tídangiñe.

Lárigiñe, seriwitina meha kei óunigiruti distritu. Dan le lagumuchagunbei eseriwiduni le, aba nagiribudun eseriwida kei óunigiruti sirkuitu. Barühadina lóugiñe 30 irumu eseriwida kei arufudahati luma kei óunigiruti sirkuitu luma distritu. Lau sun resibihadina lan saragu abiniruni lidan burí dasi le, anihein dan hénrengu lan. Ka uagu nariñagei le?

Subudi numuti héregu nan. Lau sun anihein lan dan lahuudun igaburi le nun dan le nagagibudagun luma turobuli, anihein meha dan ládarunina lidoun turobuli hama íbirigu dan le nálugun lun laranseragun ítaga katei lidan burí damuriguaü. Kéiburi meha dan le nariñagun houn íbirigu lau éregu mosu lan harufudun ínsiñehabuni luma gudemehabu houn amu. Ani le linarün katei, anihán meha igaburi burí le lunbei narufuduni ani anahán amuriahei hámagiñe amu (Rom. 7:​21-23).

Anihein burí dan, aba nasandiragun nungua wuriba ladüga burí nichara (Rom. 7:24). Luagu aban weyu, wéiriti meha luriban nasandiragun nungua darí lun nariñagun lun Heowá lidan furíei buítimati lan lun nígiruni neseriwidun kei misionéru lun nagiribudun nárigoun Finlandioun. Ani mabulieidun nubéi ida liña lan lóunabuni Heowá nafurieidun weyu ligía, lugundun adügati le naganbubei lidan adamuridaguni lun nachoururuni lunti lan nasigirun lidan neseriwidun lun Heowá ani áfaagua aume lun nabuiduragüdüni nigaburi. Wéiriti neteingiruni luagu ídemuei le líchugubei nun lau saragu ínsiñeni lun nibihini katei le.

Au tuma Sirkka, wéiriti weteingiruni Heowá luagu lubuidun chansi le líchugubei woun lun wásügürüni liibe-agei dan lidan wabagari eseriwida lun lidan dan dayarüti. Seremei numuti giñe luagu líchugun aban würi nun to arufuduboun ínsiñeni nun ani íderaguatana lidan sun irumu burí le.

Yarafa madise nagunfulirun 70 irumu, ligíati, meseriwidúnhadiname kei arufudahati ni kei óunigiruti sirkuitu. Mírudagüdün lumutina lira, lugundun chouru numuti mama lan mosu gadasin lan aban gürigia lun líchugun uéiriguni lun Heowá. Le súdinibei, weseriwidun lun luma walawahani tídangiñe sun wanigi buin lau ínsiñeni luma eteingiruni (Mik. 6:8; Mar. 12:​32-34).

Lidan sun nibagari, ibihaadina saragu dasi buíduburiti. Dan le narihin nárigoun, aba níchugun fe mama lan ladüga buídutima nan hawéi amu ni luagu anihein lan somu iyaraani espechaliti nuagu nibihinbalin dasi burí le. Le linarün katei, madüna numuti, esegarügü weiri lan lareini Heowá líchugunbalin nun. Lun hamuga míderagun lánina maweiyasunbadina yebe agunfulira lau dasi burí le. Gayaraati nariñagun lau lan lubafu Bungiu nibihei le násiñarubei ibiha lau nubafu guánarügü (2 Ko. 12:9).