Ya nace yo del 1955 y iyo el de con todo menor na tres hombre. Ya engranda yo cerca na sur parte del Finland, na un lugar que ta llama ahora como ciudad de Vantaa.

Ya bautiza el de mio nana como uno del maga Testigo de Jehova cuanto año antes yo nace. Pero, contra el de mio tata na verdad y nuay le permiti con el de mio nana que man Bible study kanamon tres o lleva kanamon na maga miting na congregacion. Poreso, ta enseña kanamon si Mamang acerca na maga importante verdad na Biblia si nuay si Papang.

Desde bata yo, ya pricura yo obedece con Jehova. Por ejemplo, cuando siete año yo, rabiao gayot el de mio maestra cay gendeh yo ta come verilättyjä (pancake que tiene sangre). Ya pichi le con el de mio boca y despues, forzao le ya hace subuh conmigo el pancake. Bueno ya lang ya puede yo hace hampas con el tenedor na de suyu mano.

Cuando 12 año yo, ya muri el de mio tata. Despues de ese, ta puede ya yo atende na maga miting na congregacion. Ya dale conmigo mira personal interes el maga hermano y ya motiva se conmigo para progresa na espiritual. Ya principia yo le cada dia con el Biblia y estudia enbuenamente con el diaton maga publicacion. Por causa con ese, ya puede yo bautiza na edad de 14, del Agosto 8, 1969.

 Despues yo entra escuela, ya principia yo sirvi como un regular pioneer. Despues lang del cuanto semana, ya cambia yo na Pielavesi, cerca na centro del Finland, donde tiene mas grande necesidad.

Na Pielavesi, ya puede yo conoce con Sirkka. Ya gusta yo con ele cay humilde le y tiene buen espiritualidad. Nuay le pricura queda prominente o queda rico. Quierre kame hace el todo na servicio con Jehova maskin cosa privilegio pa se. Ya casa kame del Marzo 23, 1974. En vez de anda man honeymoon, ya anda kame na Karttula, donde tiene mas grande necesidad.

Desde ya casa kame, ya dale mira kanamon si Jehova que hay dale le el diamon maga material necesidad si hace kame una con el de suyu Reino. (Mat. 6:33) Por ejemplo, nuay kame coche na Karttula. Tan bicicleta lang kame. Pero, bien frio gayot si winter. Poreso, para puede predica na grande teritorio del congregacion, necesita kame coche pero nuay kame sen para cumpra.

Despues, un dia, ya visita el de mio mayor hermano. Ya dale le kanamon el de suyu coche. Pagao ya el insurance de este y gasolina ya lang kame necesita cumpra. Poreso, tiene ya kame coche.

Ya dale kanamon mira si Jehova que hay dale gayot le el diamon maga material necesidad. El cosa lang kame necesita hace amo hace una con el de suyu Reino.

Cuando ya atende kame na Pioneer Service School del 1978, ya anima kanamon si Raimo Kuokkanen, a uno del maga instructor, que man apply para na Gilead School. Poreso, ya principia kame aprende con el lengguaje English para queda kame cualificao atende. Pero del 1980, antes pa kame puede man apply, ya invita kanamon que sirvi na branch office na Finland. Na aquel tiempo, gendeh puede atende na Gilead el maga Bethelite. Pero quierre kame sirvi onde ta pensa si Jehova que bueno para kanamon y gendeh si onde kame ta pensa que bueno para kanamon. Poreso, ya acepta kame con el invitacion. Maskin pa ansina, ya continua siempre kame aprende con el English lengguaje en caso tiene kame oportunidad que man apply na Gilead.

 Cuanto año despues, ya habla el Cuerpo Gobernante que puede ya man apply el maga Bethelite na Gilead. Ese dayun el cosa kame ya hace pero gendeh cay gendeh kame alegre na Bethel. Alegre kame sirvi alla! Pero quierre lang kame queda available para sirvi onde tiene mas grande necesidad. Ya acepta kanamon na Gilead y ya gradua kame na ika-79 clase del Septiembre 1985. Despues, yan assign kanamon na Colombia.

Cuando ya llega kame na Colombia, yan assign kanamon na branch office. Ya pricura yo hace el todo cosa yo puede hace na de mio assignment pero despues del un año na branch, ya sinti yo que necesita kame cambio na diamon assignment. Por primer vez na de mio vida, ya pidi yo otro assignment y ese lang tambien el solamente tiempo que ya hace yo con ese. Poreso, yan assign kanamon como maga field missionary na ciudad de Neiva, na region de Huila.

Tan enjoy gayot yo na ministerio. Cuando single pioneer yo na Finland, ta predica yo bien temprano aga hasta man denoche. Cuando nuevo kame casao de Sirkka, entero dia tambien kame na ministerio. Si lejos el diamon teritorio, tiene vez na coche ya lang kame ta durmi. Por causa con ese, gendeh mas kame necesita viaja y mas temprano kame ta puede principia na ministerio pagka-alamañana.

Cuando ya queda kame maga field missionary, ya queda kame otravez con gana na ministerio igual de antes. Ya queda manada el publisher na diamon congregacion y el maga hermano y hermana na Colombia ta dale mira respeto, amor y apresacion.

Nuay maga Testigo na maga lugar que cerca na Neiva onde kame ta sirvi. Yan lingasa gayot yo si paquemodo llega el buen noticia na ese maga lugar. Pero por causa na guerra, peligroso ese maga lugar para na maga gendeh de alla. Poreso, ya reza yo que tiene era queda Testigo na uno de ese maga lugar. Ya pensa yo que para aprende ese persona el verdad, necesita le queda na Neiva. Y ya reza tambien yo que despues del de suyu bautismo, hay progresa le na espiritual y bira na de suyu lugar para predica. Pero tiene pa gale mas buen solucion si Jehova.

Nuay tarda, ya puede yo principia man Bible study con el un joven hombre que si Fernando González. Ta queda le na Algeciras, uno del maga lugar que nuay maga Testigo. Ta viaja si Fernando mas de 50 kilometro para trabaja na Neiva. Ta prepara le enbuenamente para na cada estudiada y ya atende dayun na todo maga miting. Desde primer semana que yan Bible study le, ya invita si Fernando con el maga gente na diila lugar y ya enseña kanila el cosa le ya aprende na Biblia.

Ya bautiza si Fernando del Enero 1990, seis meses despues le principia man Bible study. Despues, ya queda le un regular pioneer. Cay tiene ya un Testigo na Algeciras, gendeh mas tanto peligroso y puede ya man assign el branch office maga special pioneer alla. Del Febrero 1992, ya forma un congregacion na ese lugar.

Na de suyu lugar lang ba ya predica si Fernando? Gendeh! Despues le casa, ya cambia sila  man maridable na San Vicente del Caguán, otro lugar que nuay tambien maga Testigo. Ya ayuda sila alla para establicia un congregacion. Del 2002, ya queda un circuit overseer si Fernando y junto con el de suyu mujer que si Olga ya continua sila na traveling work hasta ahora.

Na este experiencia, ya aprende yo que bien importante que reza especifico acerca na diaton maga assignment. Puede hace si Jehova el maga cosas que gendeh kita puede hace ciendo de suyu este trabajo y gendeh diaton.—Mat. 9:38.

Del 1990, yan assign kanamon man maridable na traveling work. El diamon primer assignment amo na Bogotá, el centro del Colombia. Yan lingasa kame na diamon nuevo assignment. Nuay kame especial talento y gendeh kame anad que queda na maga ciudad donde busy el maga gente. Pero, ya cumpli si Jehova el de suyu promesa na Filipo 2:13: “El Dios mismo, na disuyo plano de amor, amo el ta dale con ustedes el voluntad y el fuerza para hace el todo maga cosa-cosa.”

Despues, yan assign kanamon na un circuito na lugar de Medellín, el ciudad que ya menciona yo na introduccion. Anad el maga gente alla na violencia poreso gendeh mas sila destorbao si ta sucede se. Por ejemplo, un dia cuando ta conduci yo Bible study, ya tiene tiroteo apuera del casa. Man hapa ya era yo na piso pero el de mio Bible study ya continua lang le con el parapo que dol nuay lang quel con ele. Despues ele le, ya pidi le permiso que sale anay apuera. Despues, ya bira le junto con el dos diutay bata y ya habla, “Paciencia ya tu, ya saca pa yo con el maga bata.”

Tiene pa kame maga experiencia que igual ansina. Un dia, cuando ta predica kame casa en casa, ya anda corre el de mio mujer para conmigo y dol yan pucla. Ya habla le que tiene quien ya tira con ele. Ya tiene gayot yo miedo. Pero, ya realiza kame na uliji que gendeh gale quel ta tira con Sirkka, sino con el un gente que ya pasa cerca con ele.

Despues del cuanto tiempo, gendeh mas kame tanto ta nervia si tiene violencia. Ya anima gayot kanamon el ejemplo del maga Testigo alla quien ta enfrenta igual ansina situacion y gane el otro, mas grabe pa. Ya realiza kame que si ta ayuda kanila si Jehova, hay ayuda tambien le kanamon. Pirmi kame ta sigui con el consejo del maga anciano alla, pirmi con cuidao y ta confia que ayuda kanamon si Jehova.

Siempre, tiene maga situacion que pensaba kame que peligroso pero gendeh gale. Un dia, ya puede yo oi dol tiene dos mujer que tan insultajan apuera del casa onde yo ta visita. No quierre yo mira kanila pero ya llama conmigo el householder na de suyu balcon. Nuay gale quien tan peleajan sino dos parrot quel que ta copia con el vecinos.

Del 1997, ya queda yo un instructor na Ministerial Training School. b Quierre-quierre yo  atende na maga escuela del organizacion. Pero, nuay gayot yo pensa que hay tene yo el privilegio que enseña na uno de ese maga escuela.

Despues del cuanto tiempo, ya queda yo un district overseer. Cuando nuay mas se arreglamiento, ya bira yo na circuit work. Poreso por mas de 30 año, ya queda yo un instructor y un traveling overseer. Por causa na ese maga assignment, ya ricibi yo manada bendicion. Pero, ya experiencia tambien yo maga dificultad.

Tiene yo duro personalidad. Ya ayuda este conmigo para enfrenta maga dificil situacion. Pero tiene vez, sobra yo de con gana para corecta maga cosas na congregacion. Tiene tiempo que ya anima yo con el cuanto que queda amable y razonable con otro. Pero na ese tiempo, necesita gale tambien yo demonstra con ese maga calidad.—Roma 7:21-23.

Por causa na de mio maga kamali, tiene maga tiempo que ya queda yo bien maluya. (Roma 7:24) Un dia, ya habla yo con Jehova na rezo que mas bueno para conmigo si bira yo na Finland y gendeh mas queda misionario. Na ese noche, ya atende yo un miting na congregacion. El cosa yo ya oi alla ya convinci conmigo que debe yo esta na de mio assignment y hace esfuerzo para cambia con el de mio personalidad. Hasta ahora, ta puede yo siempre acorda si paquemodo si Jehova ya contesta con ese rezo. Mas pa, ta aprecia gayot yo si paquemodo le ya ayuda conmigo para enfrenta con el de mio maga kamali.

Ta rindi gayot kame gracias de Sirkka con Jehova cay ya dale le kanamon el privilegio que usa con el diamon grande tiempo para sirvi con ele full-time. Ta aprecia tambien gayot yo cay ya dale conmigo si Jehova un amable y fiel mujer.

Gendeh dura, hay queda ya yo 70 año y necesita yo deja con el de mio privilegio como un field instructor y traveling overseer. Pero, gendeh yo triste. Porque? Cay ta creé gayot yo que mas quierre si Jehova que modesto kita sirvi con ele y que alaba kita con ele por causa na amor y apresacion. (Miq. 6:8; Mar. 12:32-34) Para honra con Jehova, gendeh kita necesita tene un importante assignment.

Si ta pensa yo con el maga assignment que ya tiene yo, ya realiza yo que nuay yo ricibi con ese cay mas bueno yo contra con otro o cay mas ma-abilidad yo. Sino, ya dale conmigo si Jehova ese maga assignment por causa na de suyu incomparable pagka-bueno. Maskin pa na de mio maga kamali, ya dale le conmigo este maga privilegio. Sabe yo que ya puede lang yo hace con ese maga assignment cay ya ayuda conmigo si Jehova. El de mio maga kamali ya hace mas claro con el poder del Dios.—2 Cor. 12:9.