Nkazarwa omu mwaka gwa 1955, kandi ni inye muto omu bojo bashatu abu twazirwe hamwe. Nkakurira omu mashuma ga Finilandi omu kacweka akahikine n’enyanja, hati omuri obu bwire ni etawuni eri kwetwa Vantaa.

Hari kuburwayo emyaka mice ngu nzarwe, mama akabatizibwa yaba Omuhamya wa Yehova. Konka tata tarabire ari kwikiririza mama kutwegesa Bibuli ninga kututwara omu nterane. Obwe rero akaba naronda oburyo bw’okutwegesa Bibuli tata atariho.

Kwiha omu buto bwange nkakura ndi kukunda Yehova. Ecokureberaho: Obu nabire nyine emyaka mushanju, omwegesa wange akagubwa kubi, obu nayangire kurya ahari keke eyabire eri kwetwa verilättyjä ekozirwe omu shagama. Akankwatisa omukono gumwe, rero ogundi yagukwatisa efoka ninga ehuma eyabire eriho keke kugira ngu ayite omu kanwa kange. Nkahika ndi kunaga eyo foka ninga ehuma eyi yabire ayine omu ngaro.

Obu nabire nyine emyaka 12, tata akafa. Eco kikatuma mbwenuho nabasa kwekwatanisa omu nterane. Benetata b’omu kibina bakanfaho munonga, kandi bankwasa kugira entunguka omu by’omwika. Nkantandika kushoma Bibuli burizoba, kandi nayeyegesa ebitabo byitu ebyegamire ahari Bibuli ntireho amani. Eyo ntebekanisa ndungi y’okweyegesa eyi nabire nyine, ekatuma nabatizibwa aha kiro ca 8 Okwamunana, 1969 nyine emyaka 14.

Ku naherize kwega, nkatandika omurimo g’obupayoniya. Bwanyima y’esande nce, nkafurukira  ahabire hari kwetengwa abababurizi bingi omuri Pielavesi, hihi y’etawuni nkuru ya Finilandi.

Omuri eyo tawuni ya Pielavesi, ni ho ahu nabuganire na Sirkka, owayizire kuba omukazi wange. Nkakunda oku yabire ari kwecureza n’oku yabire ari kukunda ebintu by’omwika. Kandi nambwenu akaba atari kukunda obutungi. Twena tukaba turi kwenda kukorera Yehova byingi kandi tukaba twetegwire kukora omurimo gona ogu bakutushaba kukora. Tukagitwa aha kiro ca 23 Okwakashatu, 1974. Omu mwanya g’okuza omu kwezi kwa bwoki, tukasharamu kuza kukorera omurimo omuri Karttula, ahabire hari kwetengwa ababurizi bingi b’okuburira Obukama.

Kwiha turi kutasana, Yehova akatwereka ku yabire arije kutufaho omu bi turi kwetenga by’omubiri twagumizamu kuta eby’Obukama omu mwanya g’okubanza. (Mat 6:33) Ecokureberaho: Obu twabire turi Karttula, tukaba tutine emotoka. Omu kubanza, tukaba nitukora engendo tukoresize amagari. Konka omu bwire bw’obufuki, hakaba nihafuka munonga. Obwe rero kugira ngu tubase kuburira omu tucweka twa hare twa teritori yitu, kikaba nikishaba kukoresa emotoka. Konka tukaba tutine esente z’okuyigura.

Omu buryo obutungurine, mukuru wange akija kututayayira. Akatugirira embabazi rero yatuha emotoka yeye. Kandi emishoro y’emotoka ekaba yashashwirwe. Eki twabire turi kushabwa, ni okwerondera amajuta kusha. Bwanyima y’obwire tukija kutunga emotoka eyi twabire turi kwetenga.

Yehova akatwereka ku omurimo g’okutufaho omu bi twabire turi kwetenga gwabire guri ogweye. Itwe eki twabire tushemerire kukora kusha, ni okuta eby’Obukama omu mwanya g’okubanza.

Obu twabire turi kwega Ishomero ry’omurimo g’obupayoniya omu mwaka gwa 1978, omwe omu begesa bitu ori kwetwa Raimo Kuokkanen, a akatuhiga kwijuza fomu y’okushaba kwega Ishomero rya Gileyadi. Obwe rero, tukatandika kwega orujungu twine entego y’okwijuza ebiri kushabwa abari kwenda kwega eryo ishomero. Konka, omu mwaka gwa 1980, tutakijwize fomu bakatushaba kuza kukorera ahari Beteli y’omuri Finilandi. Omuri obwo bwire, abakozi ba Beteli bakaba batari kwikirizibwa kwega ishomero rya Gileyadi. Konka tukaba turi kwenda kukorera Yehova ahu yabire ari kureba ku ni ho harungi, atari ahu turi kweyendera. Obwe rero  tukikiriza kuzayo. Konka tukagumizamu kwega Orungereza turi kutecereza ku hine obu turitunga omugisha g’okwega Gileyadi.

Bwanyima y’emyaka mice, Akakiko k’abarisa kakikiriza ku n’abakozi ba Beteli bari kubasa kwijuza fomu y’abari kwenda kwega Gileyadi. Tukahika turi kwijuza fomu konka titurayijwize ahabw’okuba twabire tutari kukunda Beteli. Ahobwe tukayijuza kugira ngu twije kuba twetegwire kukorera ahantu hona ahu bari kubasa kutwohereza. Tukikirizibwa kwenga ishomero rya 79 rya Gileyadi kandi twarihendera omu Kwamwenda 1985. Tukashabwa kuza kukorera omuri Kolombiya.

Ku twahikire omuri Kolombiya, omu kubanza tukahebwa omurimo g’okukora ahari ofisi yitu. Nkaba ninkora cona eki nabire ndi kubasa kugira ngu nkore ge omurimo gwange, konka obu twabire tumazire omwaka gumwe ahari Beteli, nkareba ku twabire tushemerire kuhindurirwa emirimo. Aha murundi g’okubanza omu kubaho kwange, nkashabwa kukora omurimo ogu nabire ntakakoragaho. Tukashabwa kuza kukorera omurimo g’obumishonari omu tawuni ya Neiva, twatura omu kacweka ka Huila.

Burijo nkaba ninyesimira omurimo g’okuburira. Nk’oku byabire biri obu nabire ncari omuri Finilandi ntakatahize, burijo nkaba nimburira kwiha omu kasheshe ka kare kuhisa omu mwebazo. Ahakuba nyowe na Sirkka twabire tumazire obwire buce tutasine, tukaba nitumara izoba ryona turi kuburira. Ku twabire nituza kuburira omu tucweka twa hare, tukaba nitwerarira omu motoka. Ebyo bikaba nibituma twacendeza obwire obu twabire turi kumara turi kukora engendo kandi bituma twatandika omurimo ah’izoba erirakurateho bucari kare.

Ahakuba twabire turi abamishonari, tukaba nitukora omurimo g’okuburira n’amani nk’oku byabire biri omu kubanza. Ekibina kitu kikeyongera, kandi benetata b’omuri Kolombiya bakaba nibahana ekitinisa, bari kukundana, kandi bine okwikiriza okuhamire.

Omuri Neiva ahu twabire tutwire, tukaba twehingurizibwe n’amatawuni agabire gatarimu Abahamya ba Yehova. Nkaba ninkira kwebuza oku obutumwa burungi bwabire burije kuhika omuri ezo tawuni. Konka ahabw’ebizibu by’entaro ebyabire omuri otwo tucweka, abantu abatarazarirwe omuri ezo tawuni bakaba batikirizibwe kuzayo. Obwe rero nkashaba kugira ngu hagire omuntu owazarirwe omuri ezo tawuni orabe Omuhamya wa Yehova. Nkaba ndi kwenda ngu hije kurebeka omuntu owazarirwe omuri otwo tucweka owayija kutura omuri Neiva akahegera amazima. Obwe rero nkaba ninshaba ngu yayija kubatizibwa ayije kukura omu by’omwika, rero agaruke omu tawuni y’owabo kugira ngu ahaburire. Nkaba ndi kumanya ku Yehova yabire ayine oburyo burungi obu arije kukikoramu kukira obu nabire ndi kutecereza.

Obwe rero bwanyima y’obwire buce, nkatandika kwegana Bibuli n’omusigazi ori kwetwa Fernando González. Akaba atwire omuri Algeciras, emwe omu za tawuni ezabire zitarimu Omuhamya ba Yehova. Fernando akaba nakora orugendo rwa kilomita 50 kugira ngu ahike omuri Neiva ahu yabire ari kukorera. Akaba ari kuba ategwire ge ahu turayege kandi akahika ari kutandika kwija omu nterane zona. Obu yabire yamara esande emwe ari kwega, Fernando akaba nabuganisiriza hamwe abandi bantu b’omu kacweka k’owabo atandika kubegesa ebi yabire ari kwega omuri Bibuli.

Fernando akabatizibwa omu Kokubanza 1990, hahwire amezi mukaga atandikire kwega Bibuli.  Bwanyima akahika ari kuba omupayoniya w’obwire bwona. Ahabw’okuba omuri Algeciras habire harebekayo Omuhamya wa Yehova, ofisi ekahika eri kumutaho ngu abe omupayoniya w’omutano omuri ako kacweka. Omu Kwakabiri 1992, omuri eyo tawuni hakatandikayo ekibina.

Mbehi Fernando akaburira abantu b’omu kacweka k’owabo kusha? Ingaha! Ku yamazire kutasana n’omukazi weye, bakafurukira omuri San Vicente del Caguán, endijo tawuni eyabire atarimu Abahamya ba Yehova. Ku bahikireyo, na ho bakatandikisayo ekibina. Omu mwaka gwa 2002, Fernando akaba omureberezi ori kutayayira ebibina kandi we n’omukazi weye Olga, na hati bacagumizemu kukora ogo murimo.

Eyo nkuru y’ebyambireho ekanyegesa ku tushemerire kushaba ekintu cenyine eki turi kwenda, omu murimo gwa Yehova. Yehova nakora ebi itwe tutari kubasa kukora. Kandi ekiri kukira ahari eco, ogu ni omurimo gweye ti ogwitu.—Mat 9:38.

Omu mwaka gwa 1990 tukahebwa omurimo g’okutayayira ebibina. Akacweka k’okubanza aku twatayayire ni etawuni nkuru ya Bogotá. Ogo murimo gukatutera obwoba. Nyowe n’omukazi wange tihine ekintu eki twabire twine eki twakugamba ngu ni ekiconco eki twabire twine. Kandi tihine obu twabire twatwireho omu tawuni erimu abantu bingi abari kutura bahugire. Konka Yehova akahikiriza ekiraganiso ceye ekiri omu Bafilipi 2:13 ekiri kugira ngu: ‘Ahakuba Ruhanga ni we okorera omuri imwe, akabaha okukunda ebi asima n’okubikora.’

Bwanyima tukahebwa omurimo g’okutayayira ebibina by’omu kacweka ka Medellín, etawuni eyi nagambaho ncatandika. Omuri eyo tawuni hakaba nihabamu ebikorwa byingi by’obugomi kandi ebyo bikaba nibitinisa abantu abayikuriremu. Ecokureberaho: Izoba rimwe obu nabire ndikwegesa omuntu Bibuli, amasasu gakatandika kugambira aheru y’enju y’ogo muntu owu twabire tutayayire. Nyowe nkagira obwoba nayenda kwiruka konka ogo mwegi akagumizamu kweshomera paragurafu aturize. Ku yaherize kushoma paragurafu akagamba ngu kanyijeho kace yashohora aheru. Ku hahwire akire kace akagaruka ari hamwe n’otwana tubiri rero yangambira ngu: “Nsasira naba ngire kureba otwana twange.”

Nambwenu hariho obundi bwire obu twahikire omu mbera ezigumire. Izoba rimwe obu twabire turi kuburira aha nju n’enju, omukazi wange akija ari kwiruka konka ari kurebeka nk’ohendekire. Akangambira ku hine omuntu owabire nayenda kumurasha. Eco kikanshasha. Konka bwanyima, tukija kumanya ku ogo mushija owabire ayine embunda yabire atari kwenda kurasha Sirkka ahobwe ku yabire ari kwenda kurasha omushija owabire ari aha rubaju rweye.

Oku obwire bwagenzire buri kuhwa, tukagenda turi kumanyira kuba omuri ako kacweka akabire karimu ebikorwa by’obugomi. Kikaba nikitugumya kureba oku Abahamya b’omuri otwo tucweka babire bari kugumizamu kuba abesigwa n’obu babire bari kuhikwaho n’engaruka z’ebyo bikorwa bibi. Eco kikatuma twayesiga ku yaba Yehova ari kubakwasa n’itwe yabire arije kutukwasa. Burijo tukaba nitukuratiza obuhabuzi obu abazehe babire bari kutuha bw’okwerinda rero tureka ebintu omu mikono ya Yehova.

 Ni amazima burijo ti ko oku embera zabire ziri kuba ziri mbi nk’oku twabire turi kubitecereza. Izoba rimwe nkahurira amaraka gari nk’ag’abakazi babiri ababire bari nk’okutonganira aheru y’ahu twabire tusitami omu nju. Nkaba ntari kwenda kumanya ebi babire bari kutonganira, konka nyinenju akanshaba ngu tuze kuganirira aheru. Ku twahikire aheru nkashanga buri gamaraka gari ag’enyonyi ibiri ezabire ziri kutoreza amaraka g’abatahi.

Omu mwaka gwa 1997, nkahebwa omurimo g’okuba omwegesa w’Ishomero ry’abakozi b’omurimo. b Burijo kikaba nikishemeza kwekwatanisa omu kwega amashomero g’ekitongore kitu, konka nkaba ntari kutecereza ku nanye ndihebwa omugisha g’okuba omwegesa.

Bwanyima, nkaba omureberezi w’ihanga. Ogo murimo ku gwayihirweho, nkashuba kuba omureberezi ori kutayayira ebibina. Obwe rero, nkamara emyaka eri kurenga 30 ndi kukora omurimo g’okwegesa n’okutayayira ebibina. Eyo mirimo ekatuma natunga emirimo myingi. Konka ti ko burijo ebintu byabire biri kutura bibonire. Reka mbashobororere.

Obushangirwe ndi omuntu ori kweyesiga. Kandi ebyo bikaba nibinkwasa kuraba omu mbera ezigumire. Konka, obumwe kikaba nikituma nayenda kugira ebi nayehindurira omu kibina. Izoba rimwe, hine obu nagemire abantu kukundana n’okuba abantu abari kuringaniza. Konka, nkija kureba ku ari inye owabire ndi kwetenga kugira eyo mitwarize.—Rom 7:21-23.

Ahabw’enshobe ezi nabire ndi kukora, obumwe nkaba nincweka entege. (Rom 7:24) Hine obu nashabire Yehova, namugambira ku okuruga omu murimo g’obumishonari nkegarukira omuri Finilandi ari byo ebyabire biranshemeze. Omuri ogo mwebazo, nkaza omu nterane. Ebi nahuriremu bikanyereka ku nabire nshemerire kuguma omu murimo gwange kandi ngumizamu kwehanganira okutahikirira kwange. Omuri obu bwire, nikinshemeza kuba Yehova yagarukiremu eyo shara yange. Nambwenu nimusima munonga ahabw’okuba yankwasize kusingura obwo bweremwa obu nabire nyine.

Nyowe na Sirkka nikitushemeza munonga kuba twatungire omugisha g’okukora omurimo g’obwire bwona. Nambwenu nimusima ahakuba yampire omukazi oyine rukundo kandi w’omwesigwa w’okunkwasa omuri eyo myaka yona.

Juba aha ninyija kugira emyaka 70 kandi nikija kutuma nayihwa aha murimo g’okuba omwegesa n’omureberezi ori kutayayira ebibina. Konka eco tikiri kunshasha. Ahabw’enki? Ahabw’okuba, ninyikiriza ntari kubanganisa ku ekiri kushemeza Yehova ari okumuhereza n’obucurezi kandi tukamukunda n’omutima gwitu gona. (Mik 6:8; Mar 12:32-34) Ekiri kuhimbisa Yehova, ti omurimo ogu twine.

Ku ndi kugaruza amisho enyima nkareba emirimo yona eyi nahirwe, nikituma nayikiriza ku ntarayihirwe ahakuba ndi kukira abandi, ninga ahabw’obushoborozi obu nabire nyine. Ahobwe Yehova akampa eyo mirimo ahabw’embabazi zeye nyingi. Akampa ogo mugisha n’obu nabire nyine obweremwa. Nimanya ku nabasize kuhikiriza eyo mirimo ahabw’obuyambi bwa Yehova. Obwe rero, amani ga Ruhanga gakarebecera omu bweremwa bwange.—2 Kor 12:9.