Miyo ddibaliwe yaka ya 1955, mwa abalaga araru miyo ddili omarihaya. Miyo ddunuwile waddamana na sidadi dhahi enkala o litoral sul ya Finlândia, masaka abano onziwiwa ninga sidadi ya o Vantaa.

Mamayaga obatiziwe vyaka ngasi miyo ddihinabaliwa. Mbwenyi, papayaga kaziveliwe sabwa ya iyene okala Munamoona wa Yehova, iyene karumelile mamayaga onisunziha Bibilia vina wahimukoddiha mamayaga onittukulela omatugumanoni. Nona iyene wampura mudhidhi wabudduwavo babani wi anisunzihe Bibilia.

Oromana muhimani mwaga, ddahigana ohimunyimula Yehova. Motagiha, vanimina vyaka tanu na bili namasunziha waga wahisilidhiwa vaddiddi sabwani miyo kaddafuna oja verilättyjä (pankeka enkosiwetxa elabo ya Finlândia munikiwa nikami). Na mono mmodha wahiddittidda omaguguni wi addididele ofugula mulomo, na mono mwina wahitagiha oddika garfu na pedaso ya pankeka mwano. Miyo ddihiwodha ovada mono waye wi garfuna nimotte.

Babani okwile baddina vyaka 12. Sabwa ya ejuwene miyo ddahikana ofuru wa wona matugumano. Abali a mmulogoni ahiddilagiha okwela, eji ehiddikamihedha wunuwa mpaddi womuyani. Ddahiroma omwengesa Bibilia malabo otene vina osunza mapublikasau ehu. Matadelo aba omuyani ahiddikamihedha venjene ogana obatiziwa, ddibatiziwe 8 wa Agostu wa 1969 na vyaka 14.

 Mudhidhi mung’onovi vamalile miyo ogomiha masunzo aga ddihiroma olaba ninga pionero wa mudhidhi wotene. Sumana dhing’onovi musogorho ddihimwalela murudda wajombeliwa anamalaleya, o Pielavesi, vakuvi na o Finlândia.

O Pielavesi, ddihimuziwa mwana muyana odhile okala mwadhaga wokweleya, Sirkka. Miyo ddihiziveliwana venji na iyene, sabwa ya okala muttu wovipimelela, woviyeviha vina woliba mpaddi womuyani. Iyene katamela osibiwa vina wannagalala na dhilobo dhing’onovi dhomaningoni. Iyo noheeli nanfuna okosa mpaka vawodhelihu wi nimulabele Yehova, se ohizuzumela dhittomo dha mabasa. Iyo nitelanile 23 wa Marsu wa 1974. Ottiya okosa oleddo wa lua de mel, iyo nidhowile okamihedha o Karttula, murudda wajombeliwa venjene anamaleya.

Oromana labo nitelilena iyo, Yehova ohilagiha wi agahinivaha esile dhiganijombele mpaddi wonaningoni. (Mt. 6:33) Ninga motagiha, vamaromo nikalaga o Karttula, iyo kanana karo. Nankosa oleddo na sikaleta. Mbwenyi, nsaka n’eridho, elaboya yanridha vaddiddi, wi niwodhe olaleya murudda wattomeliwe mulogo wehu nanfwanyela okana na karo. Mbwenyi kanana kobiri ya ogula karo.

Mohijedheleya, mbalaga mmodha wahidha onona. Iyene wadhile onivaha karo yaye. Iyene wahimala opitxa seguru ya karoya. Yafwanyelihu okosa yali wikamo kombustiveli bahi. Na eji, nahikana karo yafunetxihu vaddiddi.

Yehova wahoniha wi agahinivaha dhotene dhanijombela. Yafwanyelihu okosa ja wika Omwene waye vamburoni voroma.

Nsaka nakosihu eskola ya apionero yaka ya 1978, mbali Raimo Kuokkanen, a odduwene wali namasunziha wehu mmodha, wahinikokomeza ottikitta petisau wi nakose Eskola ya Gileade. Nona oromana venevo nahiroma osunzela ologa Engelezi wi niwodhe okana mikalelo dhiganiwodhihile okosa eskolaya. Mbwenyi yaka ya 1980, nihinatti ottikitta petisaudha, nahidha okuweliwa wila nakamihedhe o Beteli ya o Finlândia. Nsaka nttile, kiyali yofuneya a Betelita ottikitta petisau wi adhowe o Gileade. Mbwenyi iyo nafuna nikamihedhe mburo wanifunana Yehova, ottiya mburo wafunihu. Nona nahirumela niwobo nttile. Masiki dhawene, iyo nahidhowa nisunzagavi  Engelezi wila akala na sikuna ninokuweliwa wi nidhowe oskola ya Gileade nalabihedhe wenewo Engeleziya.

Mvireli vyaka dhing’onovi Nikuru Nolamulela naharumeliha a Betelita okosa eskola ya Gileade. Mohigonela iyo nahittikitta petisau wi nidhowe nakose eskolaya. Kahiyo wi kanaziveliwetxa na mabasa akosihu o Beteli, ottiya ejo iyo nafuna nikale womala-nawale wi nittomeliwe mburo wajombeliwa anamalaleya akala nigahirumelihiwa. Iyo nahiwobiwa wi nakose Eskola ya Gileade turma 79, yali yaka ya 1985 mweri wa Setemburu. Vasogorhova iyo nahittomeliwa o Colômbia.

Mfiyedhihu o Colômbia, nahittomeliwa olaba o Beteli. Miyo ddahikosa muli-mwetemwene wila ddiwodhege ottidda mabasa aga o Beteli na mukalelo wapama, mbwenyi nvireli yaka modha miyo ddahikumbirha wila dditxinjiwe. Eji yali dila yoroma vina yomariha ekosilimi ejene mwigumini mwaga. Iyo nahidha ottomiwa ninga amisionario sidadi ya Neiva, murudda wa Huila.

Oromana wale miyo ddinoziveliwa venjene mabasa olaleya. Valimi muziye ddikamihedhaga ninga pionero elabo y’o Finlândia, ddaroma mabasa olaleya membesi ddeyelela vatakulu mattiyu. Mmaleli miyo na Sirkka otelana, nanvira mudhidhi mwinjene nilaleyaga. Nigakosa oleddo wi nalaleye mirudda dhakala wolapela na vatakulu, iyo nagona mukaroni. Dhahene nanwodha opurelamo pama oleddo obule vina oroma mutanene mabasaya labo nafwarela.

Olaba ninga amisionario mmabasani olaleya, ohinivaha gari ya wiyelela okana wili wagalala ninga okule wanihuna omaromo. Mulogo wehu wahunuwa vaddiddi, vina nahitanalela wi abalihu akala o Colômbia, anlagiha venji nriho, okwela vina otamalela.

Murudda waddamelile elabo yakala iyo o Neiva kuwali nne Munamoona mmodha. Miyo ddanfuna venjene olaleya miselu dhapama mimburo esile. Mbwenyi, sabwa ya owana-wana woneya, yanrutxa olaleya makamaka mirudda esile. Nona miyo ddannimulobelela Yehova wila attu a sidadi ejile akale Anamoona a Yehova. Miyo ddobuwela wila yafuneya jawi attu o Neiva murudda wakalihu, asunze ebaribari, abatiziwe, onuwe mpaddi womuyani, ngamala eyelele elabo yawa wi alaleyewo. Miyo kaddobuwela wi Yehova wahikana mukalelo mwina wohirutxa wa ogomiha makattamiho aba.

Mudhidhi mung’onovi, miyo ddahiroma omusunziha Bibilia muzombwe dhahi wakuweliwa Fernando González. Iyene wakala o Algeciras, sidadi modha mwahali Anamoona a Yehova. Fernando wankosa oleddo wa makilometru owakwana 50 wi adhowe alabe o Neiva. Iyene wansasanyedha pama masunzoya, mohigonela wahiroma wona matugumano. Oromana sumana yoroma eromiliye osunza, iyene wanasunziha attu a sidadi yaye dhisunziliye mBibiliani mwari mwa masunzo aye.

Fernando obatiziwe mweri wa Janero wa yaka ya 1990, kuloga dhivirile myeri mitanu na mmodha varomiliye omusunza Bibilia. Vasogorhova iyene wahidha okala pionero wa mudhidhi wetene. vowi o Algeciras wahikala Munamoona mmodha, Beteli wahattomelawo a pionero a mudhidhi wotene murudda obule. Mweri wa Feverero wa1992, wahitiwa mulogo sidadi ejile.

 Mbwenyi Fernando kalaleya bahi sidadi yaye, vamaleliye otela iyene na mwadhiye anlaleya o San Vicente del Caguán, ejene yali sidadi mwahali Anamoona a Yehova. Wenewo awene ahikamihedha witeya wa mulogo. Yaka ya 2002, Fernando wahittomiwa ninga nameddelela milogo, iyene na mwadhiye Olga anolaba napanovi ninga anameddelela milogo.

Na yotagiha eji, ddihisunza wi jofuneya vina ja makamaka olobelaga na murima wotene vina ohipottotxa makaniya, makamaka nigalobelelaga mabasa attomeliwe iyo. Yehova onowodha okosa dhilobo dhihinwodha iyo okosa, sabwani Yehova ddi mwinya wa munddaya ottiya iyo—Mt. 9:38.

Yaka ya 1990 iyo nahittomiwa olaba ninga anameddelela milogo. Yaka yoroma nahittomeliwa olaba okwatti ya sidadi y’o Bogotá. Ejo yahinittiya ozuzumene, sabwani nali nihinalemela okala sidadi enddimuwa mufwanyiwa attu enjene. Miyo na mwadhaga nili attu ahina ttotto yavawoka, mbwenyi nihona mukalelo wakwanihile Yehova mazu alogiliye va Filipi 2:13: “Txibarene ddi Mulugu onlaba mmurimani mwenyu: [Kanuvahani] guru dhowubuwelana bahi, onouvahani vina dhowirana dhinfuneye.”

Mvireli mudhidhi mung’onovi iyo nahittomiwa wi nidhowe neddelele sidadi y’o Medellín, sidadi elogilemi omaromo. Attuya a wenewale ahimala olemela wona dhotimbwini murampani, nona attuya katanala esuwene. Motagiha, siku nimodha ddeddihaga nsunzo na Bibilia, ddahiroma wiwa oruma wa futti ekalaga ninga attu elowobelana futti mpaddi wotakulu wa nyumba yalimi. Miyo ddali womala na wale wi ddiviponyedhe vati, mbwenyi namasunza waga wela wengesa ddima nofwaseyene. Mmaleliye wengesa, iyene wahiddikumbirha wi ddimujedhele, mmaleliye wahiyela na anaye eli vina wahiddikumbirha na okurumuwa, “Kaddilevelele ddàdhoweli ayima aba.”

Ottiya eji, nihigumanana vina midhidhi dhinji dhowopiha. Ninga motagiha, dila modha nele olaleya nyumba na nyumba, mohigonela mwadhaga wahidha attamagaga vaddiddi mpaka vali miyo. Iyene wali owovene vina bagagurumela. Wahiloga wi okala muttu wafuna omobela futti. Mbwenyi, vasogorhova iyo nahizinddiyela wi namoba futtiya kafuna omobela iyene; wafuna amobele mulobwana mwina wavira vakuvi na Sirkka ottiya iyene.

Guru yalagiha abali a wenewale yahinikamihedha ovilela makattamiho abale na mena ottabwa. Iyo nahinonelamo wi akala Yehova wanakoya abali abale, kavali waganyedha wi iyene vina agahinikoya. Ottiya ejo, dila dhotedhene iyo nanfwara malago a anddimuwa a mulogo a wenewale. Iyo nakala txenjewa vina nahittiya dhilobodha mmadani mwa Yehova.

Mbwenyi dhilobo dhina kadhali dhawopiyetxa dhahene ninga mobuwela iyo. Siku dhahi nela omwiyelela mwanamurala dhahi, venevo nahiwa malizu akala ninga a ayana eli akuwa vina akulagana mpaddi wotakulu. Miyo kaddafuna wawona attu akulagana, mbwenyi mwanamuralaya oddule wahiddikokomezavi wila ddidhowe okintalo wi ddone yapadduwa. Mfiweddimi, “wakulana” okule wobuwelimi, mwebaribari dhali balame  bili dhinkuweliwa papagayo dhatagiha anamwanddamani.

Yaka ya 1997, miyo ddahittomiwa ninga namasunziha wa Eskola de Treinamento Ministerial. b Mwa miyo ddanziveliwa venjene okosa dhiskola esi mbwenyi txipo ddali ddhinatti wubuwelaga wi na sikuna ddigahidha okala namasunziha wa eskola modha.

Mudhidhi mung’onovi musogorho, miyo ddahidha olaba ninga nameddelela, mbwenyi mutximihiwe mabasa aba, ddahiyelela okala nameddelela milogo. Ovano okwaranya vyaka 30, miyo ddinowagalala olaba ninga namasunziha vina nameddelela milogo. Mabasa aba addidhelana mareliho menjene. Eji kintapulela wila dhotedhene dhanneddela pama. Ddinele outapulelani sabwaya enlogela miyo dhahene.

Miyo ddili muttu woliba vina wa nikuluvelo. Jijene eddikamihedhile ovilela midhidhi dhorutxa. Mbwenyi dila dhina miyo ddahitamela ogomiha makani a mmulogoni na mukalelo wovadda vaddiddi. Dila modha, ddahawaddela abali ofuneya wa okala attu okwela vina ofiyedheya na attu ena. Mbwenyi mukalelo ovahilemi malagoya kuwali mukalelo wofwanyelela, ddahiloga na mukalelo wovadda vaddiddi, se olagiha wokwela vina ovipimelela.—Rom. 7:​21-23.

Dila dhina miyo ddinokubanyaga venjene sabwa ya dhovonya dhaga. (Rom. 7:24) Labo dhahi ddahifiyedha omulobelela Yehova, ddilogaga wila egahikala miyo kottiya-wene mabasa abale a omisionario vina ddiyelela o Finlândia. Mbwenyi labonene nttile, mudhowilemi omatugumanoni, yonilemi wenewale yahiddilibiha okalavi mmabasani abale a omisionario vina ovilibihedha opemberha dhovonya dhaga. Miyo ddigobuwelaga nlobelo nikosilemi vina mukalelo oddakulile Yehova, ddinomottiyaga mintori. Ottiya ejo ddinomutamalela venjene Yehova sabwa ya oddivilela vina oddikamihedha opemberha dhowobana dhaga.

Miyo na Sirkka ninomutamalela venjene Yehova sabwa ya onivaha gari eji ya ovira mudhidhi mwinjene mmabasani a mudhidhi wotene. Miyo vina ddinomutamalela venjene Yehova sabwa ya oddivaha muyana oddu wororomeleya vina wokwela mwari mwa vyaka esi dhotedhene.

Mohigonela miyo ddinele wakwanihedha vyaka 70 nona enele ofuneya ottiya mabasa a okala namasunziha vina nameddelela milogo. Mbwenyi eji kinddikumula. Munoziwa sabwaya? Sabwani ddinoziwa elitxi yamakamakaya mwa Yehova—omulabela na ovyeviha, na okwela vina na murima w’otamalela. Eji elobo enimuttittimiha Yehova. (Mik. 6:8; Mk. 12:​32-34) Wila nimuttittimihe Yehova, kili yofuneya okana mabasa a ettomo.

Ddang’anaga mundduni vina dditanalelaga mabasa akanilemi ddinoziwa wila kaddakelile mabasa aba sabwa ya wapitta ena, obe sabwa ya okala muttu wamakamaka obe sabwa ya okana ewodhelo ya vawoka. Ottiya ejo, Yehova ohiddivaha gari ya ottidda mabasa aba sabwa ya opama waye ohinfwanyelela miyo. Iyene ohiddirumeliha ottidda mabasa aba masiki na dhovonya dhaga, miyo ddinoziwa wila ddiwodhile okosa mabasa aba otene na nikamihedho na Yehova. Nona miyo ddilogaga wi dhawobana dhaga dhinottittimiha ewodhelo ya Mulugu.—2 Kor. 12:9.