Mʉ̃ra tosida 1955de, mʉ̃ papabara daira tosi yumakẽrãrata ũbea, mʉ̃ta yi tẽãbema. Mʉ̃ra warisi pʉwʉrʉ Vantaade, pʉza kʼawa Finlandiade.

Mʉ̃ todai naweda mʉ̃ papara buru kʼoesi Jeowa ʉ̃rʉ kʼawuabibari kĩrãkʼa, mʉ̃ zezeba kãga ẽ basimina. Mʉ̃ zezeba kãga ẽ basi mʉ̃ papaba daiʼa jaradiamarẽã Daizeze ʉ̃rʉ akʉza iduaribi ẽ basi ãba yi jʉrebarima dai mʉ̃ papaba edeita, maʉ̃ kʼarea mʉ̃ papabara Daizeze Bedʼea ʉ̃rʉ daiʼa jaradiasi mʉ̃ zeze deda neẽãne.

Mʉ̃ warraenaʉba ũdubi zebʉrʉ Jeowarebʉta. Bari jaraita, mʉ̃ 7 poaga baside mʉ̃ propesorãra mʉ̃me kĩrʉsi mʉ̃a ko ẽ baera beka wa eda wiachuta (verilättyjä). Maʉ̃ kʼarea iya mʉ̃ra ibirabara jidape kucharadeba kobibasi, mamina mʉ̃a yi kucharara jãrĩedasi.

Mʉ̃ 12 poaga babʉrʉde beisi mʉ̃ zezera, mawũã berabaribʉrʉ baera mʉ̃ra wãseabasi ãba yi jʉrebarima. Mʉ̃ jʉ̃ẽbʉrʉdera mebẽrãba ũdubisi daira mejãchade kãgabʉta. Maʉ̃ba kʼarebasi audre Jeowa kʼawa bʼaita. Daizeze Bedʼeata ewariza akʉ jʉ̃drʉsi akʉza kartarata akʉ jʉ̃drʉsi, maʉ̃ba kʼarebasi mʉ̃ buru kʼoeita 8 agosto 1969de, mʉ̃ 14 poagabidade.

 Mʉ̃ kolegiodeba ẽdrʉda tẽã yi nãã edebari 50 ora diabariba jʉ̃drʉsi. Dããra ẽãne audre jaradiai nesidabʉma wãsi Pielavesima, Finlandiade.

Pʉwʉrʉ Pielaveside ũdukʼawuasi mʉ̃ kima bai Sirkkata, iyara Jeowata kãgabasi, sainʉ oita kʼawuabasi, eda krĩchabasi, jʉrʉ ẽ basi wuabemaraba iyitrʉ akʉdamarẽã akʉza jʉrʉ ẽ basi naʉ̃ drʉade nebia erbaita, maʉ̃ kʼarea kãgasi. Daibara kãgapanasi Jeowata, maʉ̃ kʼarea daiʼa nekʼãrẽ omarẽã jarabʉdata okĩrãpanasi soiduba. Daira juwa jidasi 23 marzo 1974de. Juwa jidada tẽã wãsi Karttula eda, mama nesidabasi baera Daizeze Nokʼo ʉ̃rʉ audre jaradiaita.

Dai juwa jidadadeba ʉ̃ta, Jeowaba ũdubi zebʉrʉ kʼarebakĩrãbʉta daiba bʉepanʉbʉrʉ nããra Daizeze Nokʼota (Mat. 6:33). Karttuladera daira karru neẽbasi, daiba jaradia wãbasi bisikletadeba, doidadera mejãcha kʉrãzabasi maʉ̃ kʼarea nesidabasi karruta jaradia wãita. Mamina neẽbasi platara karru edaira.

Maʉ̃ tẽã junea mʉ̃ nabʉba akʉ zesi daita, mõbe jarasi iyi karruta mʉ̃aʼa diaita akʉza yi kartara karrudebemara jõma biga chuasi maʉ̃ kʼarea mʉ̃a nesidabasi platara bari gasolina tʉitrʉ.

Maʉ̃ba kʼawuasi Jeowaba diabʉta dayirãba nekʼãrẽ waebʉra, nãã daya bʉebʉbʉrʉ Daizeze Nokʼota.

Daira jʉ̃ẽsi 1978de yi nãã edebarira nejaradia bari deda. Raimo Kuokkanen, a daiʼa nejaradia badaba kʼarebasi krĩchamarẽã nekʼãrẽ oita Eskuela Galaad eda wãita. Maʉ̃ba daiba kʼawua jʉ̃drʉsida ingleta maʉ̃ eskuela eda wãita. Mamina poaga 1980de trʉ̃sida Betel Finlandiadebemane kʼarebamarẽã, maʉ̃ ewaribasidera betelitarãra wãbe ẽ basi Galaad edara, mamina daibara Jeowaba kãgabʉta okĩrãbʉ baera ĩjãsi Betel eda wãita, mawũãsidu daiba kʼawuapanasi ingle bedʼeara kʼawua ẽ basi baera badu ewaride trʉ̃naita Eskuela Galaad eda.

Maʉ̃ tẽã junea Zõrãrã Burubiaraba jarasida betelitarasida Eskuela Galaad eda jʉ̃ẽseabʉta, maʉ̃ kʼarea daiba mesera birasida  solisituta. Daira Beteldera sobiapanasi mawũãsidu ĩjãnara dai solisituta, daiba jaradiakĩrãpanasi yi audre jaradiaita nesidabʉmae. Daira trʉ̃sida Eskuela Galaad eda klase 79de, daira septiembre 1985de graduasida, maʉ̃ tẽã zokʼasida Colombia eda.

Dai Colombia eda zesidera jarasida Betelde kʼarebamarẽã, trajakĩrã trajasi mʉ̃ra mamara, mamina ewari berabarida tẽã junea mʉ̃a krĩchasi kĩrã awuara oibarata, maʉ̃ kʼarea widisi mʉ̃a awuruta okĩrãbʉta, maʉ̃nebʉrʉ kĩrã awuara oita widibarisi, maʉ̃ kʼarea zokʼasida Neiva eda misionero bʼaita, maʉ̃ra Huiladebʉ.

Mʉ̃ara mejãcha kãgabasi Daizeze bedʼea jaradiaira. Mʉ̃ Finlandiade doba basidera edaʉde wãbasi Daizeze bedʼea jaradiade diapedaʉba kiʉyeda. Mʉ̃ra Sirkkaʉ̃me ʉ̃rabʉrʉ juwa jidasidebida abarika berabarisi, daibara Daizeze bedʼeara ewari jõma jaradiapanasi, edaʉde daiba jĩga jaradia wãibaradera karrude kʼãĩpanasi, daiba mawũã obʉba kʼarebabasi diapedaʉba Daizeze bedʼea jaradia jʉ̃drʉita.

Maʉ̃ba daiba misionero ojʉ̃drʉsidebida soiduba jaradiasida Daizeze bedʼeara. Kongregasion daiba kʼarebabadara audre wari wãsi akʉza mebẽrã Colombiadebemarabara daiʼa kãgata ũdubipanasi akʉza bia edasida ãya daira.

Dai Neivade baside jaradiakĩrãpanasi pʉwʉrʉ Neiva kʼawabʉdebida, mamina jaradiabe ẽ basi meabemaraba kãga ẽ baera ãya ũduadua jʉ̃ẽita, maʉ̃ kʼarea mʉ̃a Jeowaʼa kʼareba widisi ũduita maʉ̃ pʉwʉrʉdebema ẽbẽrata Neivade Jeowa ʉ̃rʉ Kʼawuabibari bamarẽã akʉza biʼia kʼawuamarẽã Daizeze Bedʼeadebemata akʉza buru kʼoe kʼãrãpe jẽda wãmarẽã jaradiade maʉ̃ra pʉwʉrʉ idu Jeowa ʉ̃rʉ, maʉ̃ra pʉwʉrʉdera neẽbasi baera Jeowa ʉ̃rʉ Kʼawuabibarirãra, mamina Jeowaba audre biʼia kʼawuabasi sãwũã oira.

Maʉ̃ tẽã ũdusi ẽbẽra Fernando González, Algecirasdebemata, iyira wãibarabasi iyi pʉwʉrʉdeba Neiva eda trajade semanaza. Iya Daizeze Bedʼea kʼawua jʉ̃drʉdadeba ʉ̃ta, mʉ̃a jaradiai nãã iya akʉbasi mʉ̃a kʼãrẽta jaradiaita akʉza semanaza wãbasi ãba yi jʉrebarima. Iya kʼawua jʉ̃drʉdadeba ʉ̃ta, ãba jʉredabasi ẽbẽrarã iyi pʉwʉrʉdebemata iya kʼawua wãta jaradiaita.

Fernandoba Daizeze Bedʼea kʼawua jʉ̃drʉdata jedeko 6 babʉrʉde buru kʼoesi, enero 1990de. Mõbe yi nãã edebari 50 ora diabarita ojʉ̃drʉsi. Organizasionba maʉ̃ kʼarea zokʼaseabasi yi nãã edebari 100 ora obarita, mama kʼaiba kʼaibeada ẽ baibasi mebẽãta aba chu baera maʉ̃ pʉwʉrʉde, maʉ̃ba febrero 1992de kongregasion aba osida.

Mamina maʉ̃ awa ẽ basi, iyi juwa jidada tẽã wãsi San Vicente del Caguánʼena, mamabida neẽbasi Jeowa ʉ̃rʉ Kʼawuabibarirãra mamina mama kongregasion aba osida. 2002de, iyira kongregasionʼra akʉbari zõrãrã babisida. Idibasidu iyi kima Olgaʉ̃me maʉ̃nepanʉ.

 Naʉ̃ba mʉ̃aʼa jaradiabʉ daya Daizezede bia oira nãã iyaʼa yiwidʼibara, mawũãtrʉ bia oi baera akʉza jaraibara kʼãrẽne kʼarebamarẽã kãgabʉta. ¿Kʼãrẽa? Naʉ̃ trajora dayide ẽ, awuarabʉrʉ Jeowade baera (Mat. 9:38).

Poaga1990de trʉ̃sida kongregasionʼra akʉbari zõrãrã bʼaita Bogotáde. Daira maʉ̃ba mejãchade perasi pʉwʉrʉ zromane baka baera akʉza nekʼãrẽ mejãcha kʼawua ẽ baera, mamina Jeowaba osi Filipenses 2:13de jarabʉ kĩrãkʼa: «Daizezebʉrʉ, kʼarebabʉa marara iya kãgabʉta opanamarẽã akʉza kʼarebabʉ okĩrãnamarẽã akʉza odamarẽã».

Tẽã mʉ̃ra zokʼabʉesida pʉwʉrʉ Medellínʼena, mʉ̃a nãã pʉwʉrʉ jaradama. Naʉ̃ pʉwʉrʉdera mejãcha basi yõta, mamina ẽbẽrarãra maʉ̃ kʼarea mejãcha pera ẽ basi maʉ̃ta ewariza ũdubasi baera. Bari jaradaita, ewari aba mʉ̃ nekʼawuabaria Daizeze Bedʼea kʼawuabinʉmʉne ẽbẽrarãta ãyirai yi batatotosi ewarade, mʉ̃ra maʉ̃ kʼarea mejãcha perasi baera egorode taba wãibasi, mamina mʉ̃ nekʼawuabarira pera ẽ basi awuarabʉrʉ iya nekʼãrẽ lebadata ariwia lebasi, maʉ̃ le berabarida tẽã iya jarasi iyira atia degueita, maʉ̃ta ewarade wãnata jẽda zebʉrʉdera wũãwũã zake ũmeʉ̃me deguesi, aramaʉ̃ta iya mʉ̃a jarasi: «Mʉ̃ra ewara eda jʉ̃ẽtaibarabasi mʉ̃ wũãwũãra edade».

Maʉ̃ tẽã junea dai deza deza jaradianʉmʉne mʉ̃ kima mʉ̃ma wẽba deguesi pãpãra perabiba, iya jarasi iyira batatadata mamina tẽã junea daiba kʼawuasi mʉ̃ kima Sirkkata batada ẽ basita, awuarabʉrʉ batadaibasita iyi kʼawa berabari wã ẽbẽrata.

Ewari berabari wãne daira pera ẽã wãsi nekayirua mejãcha ũdupanʉ baera. Mebẽrãbara audre ũdupanasi bedʼea zromara daideira, mawũãsidu mebẽrãra kʼẽrẽpapanasi Jeowaʉ̃me, maʉ̃ba kʼarebasi daisida krĩchaita Jeowaba maʉ̃ra mebẽrãta kʼarebabʉbʉrʉ, daisida kʼarebaita akʉza ũrĩpanasi zõrãrãba jarapanʉ ũrãgʼata akʉza nekʼãrẽ opanasi dai kʼãrẽ sãwũã berabari ẽ baita. Yi wuabemara daiba Jeowa juwade amaepanasi.

Mamina ewari jõmaʉ̃nẽ mawũã berabari ba ẽ basi. Bari jaraita, ewari aba daiba ẽbẽra wẽrã deda Daizeze bedʼea jaradia jʉ̃ẽbʉrʉde iyi de ewarade ẽbẽrarãta bedʼeakanʉmʉ kĩrãkʼa ũrĩpanasi, daiba mama kʼãrẽ sãwũã berabarinʉmʉra kʼawuakĩrã ba ẽ basi mawũãsidu yi ẽbẽra wẽrãba jarasi ewarade eda wãpe akʉmarẽã kʼãrẽta berabarinʉmʉta. Daiba maʉ̃ akʉ jʉ̃ẽbʉrʉdera ũdusida karerata ũme bedeakʼapanʉta ãyi de kʼawabema ẽbẽraba obʉ kĩrãkʼa.

Poaga 1997de mʉ̃ra Eskuela de Entrenamiento Ministerial ne jaradiabarira babisida. b Naʉ̃ra eskuela edara mejãcha  wãkĩrãbasi mʉ̃ra, mamina jipade krĩchakabasi mʉ̃a maʉ̃ eskuelade jaradiaira.

Tẽã mʉ̃ra superintendente distrito babisida, mamina maʉ̃ superintendente distrito obʉta jõna tẽãra kongregasionʼra akʉbari zõrãrã babisida. Mʉ̃ra maʉ̃ obʉta akʉza eskuelade nejaradiabʉta 30 poagaba. Mʉ̃a sobiade ozebʉrʉ Jeowaba mʉ̃aʼa nekʼãrẽ omarẽã jarabʉra. Jeowaba daiʼa nekʼãrẽta omarẽã jarabʉra daitara bia basi akʉza sobiapanasi maʉ̃ kʼarea, mamina edaʉde bedʼea zromata ũdupanasi.

Mʉ̃a jara ũrĩbikĩrãbʉ nekʼãrẽ oira jõma daucha odamarẽã kãgabʉta. Mʉ̃ mawũãchuba biode kʼareba zebʉrʉ mʉ̃a bedʼea zroma erbʉde awuantaita, mamina edaʉde maʉ̃ kʼarea kongregasione nekʼãrẽ ara oibaradera kãgabasi jõma daucha odamarẽã. Edaʉde mʉ̃a mebẽrã ũrãgʼabasi wuabema mebẽrãta bia edadamarẽã akʉza ibiade bedʼeadamarẽã adewara krĩchadamarẽã mebẽrãba aña obʉrʉdera kʼãrẽa mawũã obʉta, mamina mʉ̃ra maʉ̃ ewaridera mawũãchua ẽ basi (Rom. 7:​21-23).

Edaʉde mʉ̃ mawũãchu kʼarea, mʉ̃ra mejãcha sopʉabasi (Rom. 7:24). Akʉza krĩchasi idubʉita mʉ̃ misionerodebʉra. Ewari aba Jeowaʼa widisi mʉ̃ra jẽda idu wãbimarẽã Finlandia eda. Maʉ̃ diamasi mʉ̃ra ãba yi jʉrebarieda wãsi. Maʉ̃ne mebẽã abaʉba bedʼea jaradaba mʉ̃aʼa so zarea diasi, maʉ̃ba kʼarebasi mʉ̃ misionerodebʉra idubʉ ẽ baita, awuarabʉrʉ zarea oita mʉ̃a nebia audre oũdubita. Mawũã berabaridara idi basidu mʉ̃a biʼia kĩrãbebʉ Jeowaba maʉ̃ ewaride dajada panʉsi baera mʉ̃a widibʉra akʉza Jeowaʼa mejãcha biga diabʉ mʉ̃ta audre kʼarebasi baera maʉ̃ nebia audre oũdubita.

Mʉ̃ta Sirkkaʉ̃mera mejãcha sobiapanʉ Jeowaba iduaribisi baera iyitaʼa ewari jõmaʉ̃nẽ trajamarẽã adewara Jeowa biga diabʉ iya mʉ̃aʼa kima biata diasi baera, iyiare kʼẽrẽpabʉta akʉza iyaʼa kãga ũdubibʉta.

Mʉ̃a kʼawuabʉ mʉ̃ra 70 poaga babʉrʉde idubʉita mʉ̃a eskuelade nejaradiabʉta akʉza kongregasionʼra akʉbari zõrãrãnebʉta, mamina maʉ̃ kʼarea mʉ̃ra mejãcha krĩcha zroma obʉ ẽ, kʼawuabʉ baera Jeowabara akʉ ẽãta daya nekʼãrẽ mejãcha kʼawuachuta awuarabʉrʉ kãgabʉ omarẽã soiduba adewara iyaʼa biga diamarẽã (Miq. 6:8; Mar. 12:​32-34). Jeowaba kãgabʉ oira dayabʉrʉ nekʼãrẽra biʼia ochuaibara ẽ.

Mʉ̃a Jeowa kʼarea nekʼãrẽ jõma obʉta jẽda kĩrãbebʉrʉdera, mʉ̃a kʼawuasi Jeowaba mʉ̃aʼa dia ẽ basi maʉ̃ nebiara mʉ̃a audre bia jaradiabʉ kʼarea mawũã ẽ bʉrʉ mʉ̃a nekʼãrẽ bia obʉ kʼarea. Mʉ̃a kʼawuabʉ Jeowaba naʉ̃ nebiara iyiareba diasita, mʉ̃a nebia mejãcha oũdubi ba ẽ basimina adewara kʼawuabʉ Jeowaba kʼarebasita aripe oita iya zokʼabʉra, maʉ̃ba mʉ̃a nekʼãrẽ obe ẽãnera Jeowa jaure zareaba kʼarebabʉ (2 Cor. 12:9).