Hna hnaho ni lo 1955. Köni nekötrahmany eahun, nge eni la wenepuhnen. Hnenge hna tru e Vantaa, ketre traon ngöne la götrane kolojë ne Finlande.

Hnei nenë hna xomi bapataiso, itre macatre qëmekene troa hnaho ni. Ngo ka icilekeu kaka, nge xele kö nyidrë tro nenë a ini Tusi Hmitrötr me eahun me xomi eahuni koi itre icasikeu. Matre e patre kö nyidrë, eahlo a canga ini eahuni la itre nyipici qa hnine la Tusi Hmitrötr.

Co petre kö ni la eni a mekune ka hape, tro palahi ni a drei Iehova. Ame lo eni a 7 lao macatre, hnene la maîtresse hna elëhni koi ni, ke xele kö ni ma xen la verilättyjä (itre pancakes hna ce lomëne me madra). Hnei eahlo hna xolouth la itrasitreng matre troa fe angangane la iqëng. Nge eahlo pa thine ju la pancakes hnei ifok, matre alöne ngöne qëng. Eloine pe, hnenge hna jipa matre mala pi la ifok e kuhu hnadro.

Kola mec hnei kaka lo eni a 12 lao macatre. Matre eni hë e cili a nyiqane sine la itre icasikeu. Hetre itre xaa trejin trahmanyi ka xatua ni, matre celë hi ka acatrene la imelekeung me Iehova. Hnenge hna nyiqan e Tusi Hmitrötr e nöjei drai me inine hnyawane lo itre itusi së. Hnene lai, matre ame lo 8 Ogas 1969 lo eni a 14 lao macatre, hnenge hna xomi bapataiso.

 Ame la eni a fenesi qa hna ini, ke hnenge hna xome la huliwa ne pionie lapa. Nge itre wiik thupen, hnenge hna fek a tro Pielavesi, ketre traon ka aja ixatua, nyipine la Finlande.

E cili hi e Pielavesi la eni a iöhny me Sirkka ketre neköjajiny, hnenge hna xome matre föeng. Hna ketri ni hnene la aqane tulu ewekë i angeic memine la aqane imelekeu i angeic me Iehova. Tha ka pi mama kö angeic me aja ewekë. Ame la aja i nyio, ke troa ce nyihlue i Iehova, ngo tha itre hnëqa kö. Hnei nyio hna faipoipo lo 23 Maac 1974. Tha hnei nyio kö hna voyage de noces, ngo hnei nyio pe hna tro Karttula, ke kola aja ixatua e cili.

Ame la nyio a xötrei faipoipo, ke hnei Iehova hna amamane koi nyio ka hape, tro Nyidrëti a hamëne la ka nyipiewekë, e tro nyio a amë panëne la Baselaia. (Mat. 6:​33) Pëkö loto i nyio e Karttula, nyio hi me velo. Ame ijine hnötr ke, sepalapen la hnötr e cili. Nge tru pena la teritoar, matre loi e troa hetre loto göi troa nyapën asë teritoar. Ngo tha ijije kö la manie i nyio troa itöne la ca loto.

Ame la ketre ijin, sesëkötre ju hi nyio la kola traqa la ketre mama i eni. Hnei angeic hna hamë nyio la loto i angeic. Nge ase fe hë angeic nyithupene la asuras. Nyio pe hi a xomi sas. Hetre loto i nyio hë.

Iehova e cili a amamane ka hape, tro palahi Nyidrëti a eatrëne lo hnei Nyidrëti hna qaja laka, troa hamëne la ka nyipiewekë koi nyio. Ame hi la qa i nyio ke, troa amë panëne la huliwa ne Baselaia.

Ame lo 1978, hnei nyio hna sine la Ini Thatraqane La Huliwa Ne Pionie. Hnei Raimo Kuokkanen, a ketre ka hamë ini, hna ithuecatr koi nyio troa nyialiene la pepa ne Ini Gileada. E cili, hnei nyio hna nyiqane inine la qene Papale. Ngo ame ju hi lo 1980, qëmekene tro nyio a nyialiene la pepa ne sipo, ke hna hë nyio troa huliwa ngöne la Bethela e Finlande. Ame ngöne la ijine cili, ke tha ijije palakö tro la itre atrene la Bethela a hane sine la Ini Gileada. Ngo ame la aja i nyio, ke troa kuca la aja i Iehova, ngo  tha aja i nyio kö. Celë hi matre hnei nyio hna kapa la ihë a tro Bethela. Nge hnei nyio palahi hna inine la qene Papale, e traqa ju hë nyio elany sine la Ini Gileada.

Itre macatre thupen, hnene la Lapa Ne Xomi Meköt hna aijijën la itre atrene la Bethela troa hane sine la Ini Gileada. Hnei nyio hna canga nyialiene la pepa ne sipo. Tha kolo kö lai a hape, tha madrine kö nyio ngöne la Bethela. Waea! Nyio pe a ajane troa huliwa i Iehova ngöne la itre götrane ka aja ixatua. Hnei nyio hna sine la 79 Ini Gileada, me kapa la diplôme i nyio lo Semitrepa 1985. Matre hna upi nyio a tro Colombie.

Hna pane upi nyio ngöne la Bethela e Colombie. Hnenge palahi hna isine troa eatrëne la itre hnëqang thenge la itre hnenge hna atrein. Ngo thupene la ca macatre, hnenge hna mekun troa pane saze götran. E cili hi la eni a sipone troa saze huliwa. Haawe, hna upi nyio pë hë troa mesinare e Neiva, ngöne la götrane Huila.

Ka pi cainöj catre ni qane ekö. Ame lo eni a pionie e Finlande, nge tha faipoipo palakö ni, hnenge hna lapa cainöj qane hmahmakanyi utihë e hej. Ame hë la eni a faipoipo, eni me Sirkka a cainöj drai ka pexej. Ame itre xaa ijin, nyio a tro ngöne la itre teritoar gaa nany, matre nyio a meköl e kuhu hnine loto. Kolo hi matre tha tro kö a aluzi traem ngöne itre gojeny, me canga cainöj e hmahmakany.

Ame lo nyio a mesinare, ke tru palahi la madrine tune lo xötrei. Hna kökötre la ekalesia i eahun, nge ame la itre trejin ne Colombie, ke itre ka metrötre catr, me ihnim, nge ka hetre hni ne ole.

Nyio a lapa e Neiva, nge ame la itre xaa traon ezin, ke pëkö ca Temoë. Tha lapa hnyawa kö ni, ke eni a thele la aqane troa tro fë la maca ka loi ngöne la itre traone cili. Ngo tha loi kö tro la itre trenyiwa a tro kowe la itre traon e cili, ke tru la itre isi. Hnenge hna thith, matre tro kö la ketre atr qa cili a hane Temoë. Ngo loi e tro angeic a mel e Neiva. Hnenge fe hna thith ka hape, thupene la bapataiso, tro la atre cili a kökötr, me bëek hmaca kowe la traone i angeic matre troa cainöj. Ngo hetre ketre aqane mekune i Iehova kö.

Tha qea ju kö, nge eni a nyiqane ini Tus memine la ketre jeune, Fernando González la ëjen. Ka mele angeic e Algeciras, nge pëkö ca Temoë e cili. E nöjei wiik, Fernando a nyiapëne la 50 km, qa ngöne la hnalapa i angeic utihë la hnë huliwa i angeic e Neiva. Ka hnëkë hnyawa palahi angeic kowe la ini Tusi Hmitrötr, nge angeic fe hë a sine la itre icasikeu. Thupene hi la ca wiik ne ini Tus, hnei angeic hna hëne la itre atr ne la traone i angeic, matre ce thawa me angatr la hnei angeic hna inin.

Thupene la sikis lao treu ne ini Tusi angeic, hna bapataiso Fernando lo Januare 1990. E thupen, hnei angeic hna xome la huliwa ne pionie lapa. Pine laka, hetre Temoë hë e Algeciras, tha jole hë troa upe la itre pionie hut troa cainöj e cili. Ame hë lo  Febuare 1992, ke hna acile la ca ekalesia e cili.

Hnei Fernando kö hna cainöje hmekuje hi ngöne la traone i angeic? Waea! Thupene la angeic a faipoipo me Olga, hnei nyidro hna tro e San Vicente del Caguán, ketre traon ka pëkö ca Temoë. Nge tru la huliwa i nyidro e cili matre hna acile la ketre ekalesia. Ame hë lo macatre 2002, hna acili Fernando troa atre thupëne la sirkoskripsio, nge nyidroti palahi enehila a xome hnëqa cili.

Eni a öhne hnyawa e cili la enyipiewekëne troa qaja koi Iehova la itre jol hne së hna melëne ngöne la itre hnëqa së. Atreine kö Iehova aejën la itre ewekë hne së hna thatreine kuca. Nyipici, Nyidrëti kö la Maseta ne la huliwa cili.​—Mat. 9:​38.

Ame lo 1990, hna upi nyio troa wange trongëne la itre ekalesia. Ame la pane sirkoskripsio hnei nyio hna wang, ke kolo itre ekalesia ne la traone ka tru e Bogotá. Ame koi nyio, ke tha ijiji nyio kö la hnëqa cili, ke lue atr ka thatreine nyio. Ketre, tha majemine kö nyio mele ngöne la itre traon ka tru. Ngo hnei Iehova hna xatua nyio thenge la hna qaja ngöne Filipi 2:​13: “Thenge la aja i nyidrë, Akötresieti casi hi la ka atreine huliwane la itre hni i nyipunie, matre hetre aja me trengecatre i nyipunie troa kuca.”

E thupen, hnei nyio hna wang la itre ekalesia e Medellín, lo traon hnenge hna qaja lo xötrei. Majemine hë la itre atr e cili kowe la ikuqany, matre kösë tha xou i angatre hë. Ame lo ketre ijin, eni a ini Tus kowe la ketre trahmany, nge drenge jë hi nyio la kola ikuqany e kuhu gojeny. Eni ha mejë troa meköle e kuhu hnadro, ngo tha enije fe kö la ka ini Tus, angeic palahi a e la paragaraf. Ame hë la angeic a ase e, hnei angeic hna pane tro. Tha hmitre ju kö, nge bëek hmaca jë hi angeic memine la lue nekönatr, nge öni angeic, “Paredo qang hna pane thenge la lue neköng.”

Ame itre xaa ijin, ke xönë hi hun troa mec. Ame la ketre drai, eahuni a cainöj trootro, nge traqa pi hi la föeng, angeic a kötr, nge öni angeic ka hape, hetre ka huji kuqa angeic. Ketre xounge pi kö! Eahuni pë hë a atre e thupen laka, tha angeic kö lo hna pi humuth, ngo ketre atre kö.

Kola tro la itre drai, nge co trootro hë la xoue i nyio. Ame la nyio a goeëne la aqane catre la itre trejin e cili, ke kola ithuecatr koi nyio. Öni nyio, maine Iehova a xatua angatr, ke tro fe Nyidrëti lai a hane xatua nyio. Hnei nyio palahi hna drengethenge la itre qatre thup e cili, me hmek, me thithi koi Iehova.

Ngo traqa pi kö e xaa ijin laka, easa mekun ka hape, jole hë easë, ngo ka loi hi. Ame lai ketre ijin, eni a vizitëne la ketre atr, drenge ju hi ni la lue “föe” a iqaqa e kuhu trön. Tha pi okupe kö ni la lue ka iwesitrë, ngo hnene lai atrekë hnalapan hna iele ni troa goeën qa ngöne la verada. Eni e cili a öhne ka hape, ame lo lai lue “föe” ka iqaqa, ke lue peroke ka nyitipune lo itre ka lapa ezin.

Ame lo 1997, hna acili ni troa atre hamë ini ngöne la Ini Thatraqane La Cainöj. b Pi tro catre ni a sine la itre uma ne ini së. Ngo tha ase pi kö ni mekune ka hape, troa hane ië ni troa hamë ini.

E thupen, hna acili ni troa surveillant de district. Nge ame hë la kola apëne lai service cili, ke hnenge hmaca hna xom hmaca la huliwa ne sirkoskripisio. Matre madrine catre ni, ke 30 lao macatre hnenge hna xome la hnëqa ne atre iwai trootro me atre hamë ini. Ngacama nyimutre catr la itre manathith hnenge hna kapa qa ngöne la itre hnëqa cili, ngo hnenge hna ixelë me itre jol.

Ame ni, ketre atr ka qaja mekötine la itre ewekë. Celë hi ka xatua ni troa cile catr qëmekene la itre jol. Ngo ame itre xaa ijin, la eni a thele troa nyinyine la itre jole ngöne la itre ekalesia, ke catre palaha la aqane ithanatang. Eni pena a catrëne la itre trejine matre tro angatr a ihnimekeu me itrotrohni. Ngo eni a öhn e thupen ka hape, tha hnenge kö hna amamane la ihniming me itrotrohni.​—Roma 7:​21-​23.

Hnene la itre triang matre kucakuca catre ni e itre xaa ijin. (Roma 7:​24) Goi qaja fe ni koi Iehova ka hape, eni a pi nue la hnëqa ne mesinare me bëeke hmaca a tro Finlande. Ame ju lai heji cili, qange hna icasikeu. Hna ithuecatre koi ni, hnene la itre hnenge hna dreng. Mama pi hi koi ni e cili ka hape, tro kö ni a lapa, me thele troa saze. Enehila palahi, eni a madrine kowe la aqane sa mekötine Iehova la thithing. Nge eni a olene la aqane hnimi ni hnei Nyidrë me xatua ni troa elë hun la itre jole cili.

Tru la hnenge me Sirkka hna huliwa koi Iehova drai ka pexej, nge tru la hni ne ole i nyio koi Nyidrë. Nge eni fe a olene koi Iehova la hna hamë ni la ketre föe ka ihnimi me nyipici, nge ka ce huliwa me ni qane ekö.

Pine laka easenyi hë tro ni a 70 lao macatre, matre tro hë ni a nue la hnëqa ne hamë ini me atre thupë sirkoskripsio. Ngo tha hace kö la hning. Pine nemen? Ke xecie koi ni laka, easa atrunyi Iehova la easa hamë Nyidrë la hne së hna hetreny, me nyihlue i Nyidrë memine la hni ne ole me hni ka pexej. (Mika 6:​8; Mar. 12:​32-​34) Tha nyipiewekë kö troa cilëne la itre hnëqa ka tru matre atrunyi Iehova.

Ame la eni hmaca a mekune la itre hnëqa hnenge hna kapa, ke tha eni kö a mekune ka hape, ka sisitria kö ni hui itre xan, maine atreine kö ni hui angatr. Atre hnyawa hi ni ka hape, tha eje kö lai. Nyidrëti a hamë ni la itre hnëqa cili, hnene la ihnimi gufa i Nyidrë. Nge Nyidrëti a hamë ni, ngacama atre ka tria ni. Hnene la ixatua i Nyidrë, matre eni eatrëne hnyawan la itre hnëqang. Kola pexeje la mene i Iehova ngöne la kucakucang.​—2 Kor. 12:​9.