Mi meke aini a yali 1955. Mi be abi ete 2 gaanbaala. Mi kiya koosube fu wan peesi di sama sabi now enke a foto Vantaa.

Mma dopu enke wan Yehofa Kotoigi wantu yali fosi a meke mi. Ma nda á be lobi a leli. Aa be e meke mma sutudeli anga u efuso tyai u go a den komakandaa. Neen meke a te nda á be de a osu a be e leli u sani fu Beibel.

Yonkuuyonkuu kaba mi be e teke a se fu Yehofa. Wan leisi di mi be abi seibin yali, mi yefolow ati boon a mi fu di mia be wani nyan verilättyjä (Wan sowtu baka bolon, ma buulu be de aini). A be e kwinsi mi mofu opo anga wan se ana, fu a be sa poti wan pisi go aini mi mofu anga a taa se ana. Koloku mi be poi naki a foluku puu neen ana.

Nda dede di mi be abi 12 yali. A di a dede fosi mi be man go a den komakandaa. Den baala aini a kemeente be e poti pakisei a mi. A sani ya yeepi mi fu mi anga Yehofa toon mati. Mi be bigin leisi Beibel ala dei. Mi be e sutudeli den buku fu a olikanisâsi tu. A den sani ya yeepi mi fu mi dopu di mi be abi 14 yali. Mi dopu a 8 augustus 1969.

 Mi bigin du a kowownu-pionili wooko di mi kaba sikoo. Baka wantu wiki, neen mi foloisi go tan a Pielavesi, wan peesi pe moo peleikiman be de fanowdu. A foto ya be de koosube fu a mamafoto fu Finland.

A Pielavesi mi miti mi uman Sirkka. A be abi sakafasi. A be lobi Yehofa tu. A den manii ya meke mi be kon lobi en. Aa be e suku balinen anga gudu. U be wani du ala saw man gi Yehofa, neen meke u be de kabakaba fu du ala san den baala be akisi u. U toow a 23 maart 1974. Faisi u toow a so u go yeepi a Karttula, wan pikin foto aini Finland pe den be abi moo peleikiman fanowdu.

Fanafu di u toow, neen Yehofa soi u taki aw solugu u efu we poti a Kownukondee fi en a fesi (Mat. 6:33). Wa be abi wan wagi a Karttula. A baisigii u be e lei. Ma te a koo ten fu a yali be doo, a peesi be e koo bunbun fasi. Efu u be wani peleiki na a pisi fu a kemeente, u be abi wan wagi fanowdu. Ma wa be abi moni fu bai wan.

Wan leisi mi gaanbaala be kon luku mi. A be wani giw wan wagi. A be seeka den pampila fu a wagi kaba. A wan enkii sani di u be mu du, a lai oli. A so u fende a wagi di u be abi fanowdu.

Yehofa be soi u taki neen faantiwowtu fu giw den sani di wi abi fanowdu. A sani di u be mu du a fu poti a Kownukondee a fesi.

Di u be de na a Pionili Sikoo aini a yali 1978, Raimo Kuokkanen, a a be wan fu den leliman na a sikoo. A be giw taanga-sikin fu poti u nen fu go na a Gileyad sikoo. Neen meke u bigin leli Ingiisitongo fu doo den maiki fu go na a sikoo ya. Ma aini 1980, den kai u fu go wooko na a beikantoo fu Finland. A ten de den sama di be e wooko a Betel á be poi go na a Gileyad sikoo. Ma u be wani dini Yehofa a pe a be si moo bun giw. Neen meke u teke a kai fu go wooko a Betel. Toku u be  e leli Ingiisitongo go doo, bika di u be o fende wan okasi fu go na a Gileyad sikoo u be mu de seekaseeka.

Baka wantu yali, den baala di e tii a wooko be gi den sama di e wooko a Betel a okasi tu fu go na a Gileyad sikoo. Wa daaidaai, neen meke u poti u nen wantenwanten. A ná fu di wa be e piisii a Betel meke u be wani go na a sikoo ya, ma u be wani go yeepi a pe moo yeepi be de fanowdu. U be de aini du fu 79 kalasi fu a Gileyad sikoo. U kaba a sikoo ya aini september 1985. Den be sende u go a Kolombiya.

Na a beikantoo na a fosi peesi pe den sende u go aini Kolombiya. Mi be e du ala san mi poi, ma baka di mi de ape wan yali, mi be wani du wan taa sani. Fositoon aini mi libi mi akisi fu den gi mi wan taa wooko. Bakadati den sende u go na a foto Neiva enke spesuutu-pionili, na a pisi kondee fu Huila.

Senten di mi de mi lobi a peleikiwooko. Di mi be e pionili a Finland, son yuu mi be e peleiki fuuku mmanten te enke neti. Di mi anga Sirkka toow, son yuu u be e peleiki a hii dei tu. Te u be e peleiki a den peesi di de faawe fu pe u be e tan, u be e siibi aini a wagi son yuu. A sani ya meke u be e poi bigin fuuku a taa dei.

Di u bigin du a spesuutu-pioniliwooko, u be e fii a piisii di u be abi na a bigin gi a peleikiwooko. A kemeente be e moo bigi. Den baala anga sisa a Kolombiya be e lesipeki u, den be e soi u tu taki den lobi u. Boiti dati, den be e teke sani fu bigi.

Koosube fu Neiva, a foto pe u be e tan, i be abi peesi pe Kotoigi á be de. Mi be e booko mi ede fa a bun nyunsu be o doo a den peesi de. Ma fu di wan feti be e feti na a pisi de, meke a be moo bun fu ya go de, moomoo efu ya na be fu den foto de. Neen meke mi begi Yehofa fu wan sama aini wan fu den foto ya be sa toon wan Kotoigi. Mi be e si enke a sama ya be mu tan aini Neiva fu leli a waaleiti. Neen meke mi begi tu taki te a sama ya dopu en biibi mu taanga fu daai go neen foto baka fu peleiki. Ma Yehofa be abi wan moo bun sani a pakisei.

Aa langa seefi neen mi bigin sutudeli Beibel anga wan yonkuman den e kai Fernando González. A be e tan a Algeciras, wan fu den foto pe Kotoigi á be de. Fernando be e lei wan sani fu 50 kilomeiti ala wiki (30 miniti) go a Neiva fu go a wooko. A be e seeka bun gi a sutudi. A be bigin kon na ala den komakandaa tu. A fosi wiki di a bigin sutudeli, a be kai den sama fi en foto kon a wan, da a be e soi den den sani di a leli na a Beibelsutudi.

Fernando dopu aini yanuari 1990, sigisi mun baka di a bigin sutudeli. Bakadati a toon wan kowownu-pionili. Fernando a  be fu Algeciras, neen meke a be moo makiliki gi a beikantoo fu sende spesuutu-pionili go na a foto ya. Aini februari 1992, den opo wan kemeente aini a foto de.

A Algeciras wawan Fernando be e peleiki? Nono. Baka di a toow, en anga en uman foloisi go a San Vicente del Caguán, wan taa foto pe Kotoigi á be de. Den yeepi opo wan kemeente ape tu. Aini 2002, Fernando fende a gaandi fu du a kelen-owluman wooko. Te anga now en anga en uman Olga e du a kelen-wooko.

A ondoofenitoli ya leli mi taki mi mu e taigi Yehofa pilisisi fa mi wani a yeepi mi. Yehofa poi du sani di wa poi du. A koti wooko a fi en, ná fu wi.​—Mat. 9:38.

Aini 1990, u fende a gaandi fu du a kelen-wooko. A fosi peesi pe den sende u go a Bogota, a mamafoto fu Kolombiya. U be e si enke wa be o poi du a wooko ya. Mi anga mi uman a ná sama di kofaliki. Wa be gwenti libi a wan gaan foto. Ma Yehofa soi wi taki ai du san a taki a Filipisama 2:13: ‘Bika a Gadu na a sama di e gi u kaakiti. Ai meke wi angii fu du sani di e meke a piisii tu.’

Bakaten u du a kelen-wooko na a pisi fu Medellín, a foto di mi be taki fi en na a bigin. Den sama ape be kon gwenti den ogii di e pasa, neen meke den á be e feele moo. Wan leisi di mi be e sutudeli anga wan sama neen wantu sama bigin sutu anga goni a doose fu a osu pe mi be de. Mi be wani kai paata, ma a sutudi be e leisi a paragraaf go doo. Aa be e buuya. Di a kaba leisi a taki: ‘Piimisi ye.’ Neen a go a doose. Baka wan pisiten, a tyai tu pikin kon aini a osu. A taki: ‘Wai ede gi mi baa, mi be mu go teke den pikin fu mi.’

Son yuu ogii be e pasa koosube fu u. Wan leisi di u be e wooko osu fu osu, mi uman lon kon a mi. Mi be e si taki a dyombo. A taki wan man sutu kon neen tapu. A sani de foondoo mi. Bakaten u kon fusutan taki a ná Sirkka a man be wani sutu. A be wani sutu wan man di be waka pasa neen se.

Baka wan pisiten, wa be e feele so moo. A deki-ati di den baala anga sisa be e soi te ogii be e miti den be e giw taanga-sikin. Efu Yehofa be e yeepi den, a be o yeepi u tu. U be e wooko anga san den owluman fu a pisi de be e soi u, daw be e fika ala sani gi Yehofa.

Son yuu sani á be e ogii enke faw be e denki. Wan leisi mi be yee enke tu uman be e kosi denseefi a doose fu a osu pe mi be go peleiki. Mia be wani yee a sani de, ma a osu sama be kai mi fu kon taampu neen doomofu. Bakaten mi be kon fusutan taki a tu papakai be e gelisi den sama fu a pisi ape te den be e kwali.

Aini 1997, mi be fende a gaandi fu de enke wan fu den leliman na a sikoo gi dinali. b Mi be lobi go a den sowtu sikoo ya. Ma noiti mi be e si enke mi be o fende a gaandi fu gi leli a wan fu den.

Bakaten den be poti mi enke district owluman. Di den tapu a wooko ya, neen mi go du a kelen-wooko baka. A wan sani fu 30 yali mi wooko enke leliman anga kelen-owluman. A omen belesi mi be e fende di mi be e du den wooko ya. Ma a ná ala yuu sani be makiliki. Meke mi taigi i saide.

Mi a wan sama di nai daaidaai fu teke bosoloiti. A manii ya yeepi mi te sani be e miti mi. Ma son yuu mia be e abi boo te mi be e wani seeka sani aini den kemeente. Wan leisi mi taigi wantu baala anga sisa aini wan kemeente taki den be mu lobi taawan. Den á mu e suku fini tumisi tu. Ma a ten de miseefi be mu wooko a denseefi manii de.​—Rom. 7:21-23.

Fu di mi be e meke fowtu son yuu meke mi be e fii booko-saka (Rom. 7:24). Wan leisi mi taigi Yehofa taki a be o moo bun fu mi fika a zendeling wooko da mi daai go a Finland baka. A neti de mi go a wan komakandaa. Den sani di mi leli na a komakandaa gi mi taanga-sikin fu du a zendeling wooko go doo, da mi meke moiti fu wooko a den swakifasi fu mi. Te anga a dei fu tide ai doo mi ati fu si fa Yehofa piki a begi fu mi. Ai bigi gi mi taki a yeepi mi fu wooko a den swakifasi fu mi.

Mi anga Sirkka e gi Yehofa daa di a gi wi a gaandi fu du a fuuten diniwooko. Mi e gi Yehofa daa taki a gi mi wan uman di biibi taanga. Mi e gi en daa tu taki a gi mi wan uman di lobi mi.

Dyonson di mio tapu 70 yali, mio abi fu fika a leliman wooko anga a kelen-wooko. Ma a sani ya nai meke mi lasi-ati. Saide? Bika mi e biibi taki a sani di e meke Yehofa fii bun, a te we soi sakafasi te we dini en. Ai piisii tu te we gafa en anga u hii ati fu soi en fa den sani di ai du giw e bigi giw (Mika 6:8; Malik. 12:32-34). U naabi wan pelensipali wooko fanowdu fu man gafa Yehofa.

Te mi denki den wooko di mi du, mi e fusutan taki a ná di mi bun moo taawan meke mi be fende den gaandi ya. A ná fu di mi koni tu. Yehofa be gi mi den fu di a abi bun-ati. A gi mi den winsi fa mi be abi son manii di á bun. Neen namo be sa yeepi mi fu du den wooko ya bun. A so den swakifasi fu mi meke sama si a kaakiti fu Gadu.​—2 Kor. 12:9.