ITALANOA NI NONA BULA
Laurai na Kaukaua ni Kalou Niu Malumalumu
NI KEIRAU yaco kei watiqu e Colombia ena 1985, dua na ka na levu ni itovo voravora ena vanua qori. Na matanitu sara ga e valuta tiko na isoqosoqo era lewa tu na volitaki ni waigaga ni veivakamatenitaki ena siti, vaka kina o ira na sotia tagane kei na yalewa era tiko ena veiulunivanua. Ena vanua o Medellín, keirau qai lai veiqaravi kina, era veilakoyaki e gaunisala na cauravou vakaiyaragi. Era volitaka na waigaga ni veivakamatenitaki, era veivakasaurarataki mera saumi mera veitaqomaki kina, ra saumi tale ga mera veivakamatei. Dau sega ni dede na nodra bula. E vaka ga me duatani na vuravura keirau sa mai bula tu kina qo.
Keirau cavutu mai Finiladi, e dua na vanua yawa sara ena vualiku, ia keirau mai tu vakacava e Sauca Merika? Na cava tale ga au sa vulica ena veiyabaki sa sivi?
NIU SE GONE E FINILADI
Au sucu ena 1955, keitou le tolu na tagane, au gone taudua. Au susu ena baravi ena ceva kei Finiladi, ena vanua sa kilai tu nikua ena siti o Vantaa.
E papitaiso o tinaqu me iVakadinadina i Jiova ni vo e vica na yabaki meu sucu kina. Ia e sega ni taleitaka o Ta na ka dina, e vakatabui Na me vakavulici keitou ena ka dina se me keitou gole ena soqoni ni ivavakoso. Dau vakavulici keitou gona o Na ena ka dina vakaivolatabu rawarawa sara ena gauna e sega ni tiko kina o Ta.
Au talairawarawa vei Jiova niu se qai yabaki vitu
Niu se gone au sega ni via talaidredre vei Jiova. Kena ivakaraitaki, niu se qai yabaki vitu, e cudru noqu qasenivuli niu sega ni via kania e dua na kakana e waki vata kei na dra, e boboka na galegalequ ena dua na ligana me dolava kina na gusuqu, me saga me vakani au, ia au qai tavia tani na ligana qai lutu na icula ni kana.
Niu yabaki 12 sa vakacegu o Ta. Oti qori au sa lako ena soqoni ni ivavakoso. Era kauaitaki au na tacida tagane ena ivavakoso, uqeti au qori meu toso kina vakayalo. Au tekivu wilika na iVolatabu e veisiga, au vulica tale ga vagumatua na noda ivola vakaivolatabu. Na noqu dau vuli va qori e uqeti au meu papitaiso ena ika8 ni Okosita, 1969 niu se qai yabaki 14.
Ni oti ga noqu vuli, au sa tekivu painia tudei. Oti tale e vica na macawa, au toki sara ena vanua e vinakati tu kina na dautukutuku e Pielavesi, volekata na loma i Finiladi.
Niu tiko e Pielavesi, au sotava kina na goneyalewa e qai watiqu lomani o Sirkka. Au taleitaka nona dau vakarokoroko kei na nona matua vakayalo. E sega ni qara rogo se vinakata na iyau. Keirau vinakata ruarua me keirau qaravi Jiova ena kena levu keirau rawata se itavi cava keirau lesi kina. Keirau vakamau gona ena ika23 ni Maji, 1974. Keirau sega mada ga ni gade ni oti neirau vakamau, keirau mani biubiu me keirau lai veiqaravi e Karttula, e vinakati sara tu ga kina na dautukutuku ni Matanitu ni Kalou.
Na vale keirau redetaka e Karttula, e Finiladi
E KARONI KEIRAU O JIOVA
Na motoka e solia vei keirau o tuakaqu
Ni tekivu neirau bula vakawati, sa vakaraitaka vei keirau o Jiova ni na karoni keirau vakayago kevaka keirau vakaliuca na Matanitu ni Kalou. (Maciu 6:33) Kena ivakaraitaki, keirau sega ni vakamotoka ni keirau tiko e Karttula. Keirau dau vodo basikeli voli ga. Ia ena vulaililiwa e dau batabata sara ga na draki. Me keirau vunau gona ena levu ni yalava e lesi kina na ivavakoso, e vinakati na motoka. Ia e sega na ilavo me keirau volia kina e dua.
E sega ni namaki na nona mai sikovi keirau o tuakaqu. E solia sara vei keirau na nona motoka. Sa saumi tale tu ga kena inisua. Me keirau qai vakatawana ga na kena waiwai. Qori sara ga na ka keirau vinakata tiko.
E vakaraitaka sara ga o Jiova ni karoni keirau vakayago. E neirau itavi ga me keirau vakaliuca na Matanitu ni Kalou.
KORONIVULI O KILIATI
Kalasi ni Koronivuli ni Cakacaka Vakapainia ena 1978
Ni keirau tiko ena Koronivuli ni Cakacaka Vakapainia ena 1978, e dua vei ratou na veivakavulici tiko o Raimo Kuokkanen, a e uqeti keirau me keirau vakalewena na fomu ni vuli e Kiliati. Keirau tekivu vulica sara na vosa vakavalagi ni neirau isausau me keirau vuli kina. Ia ena 1980 ni bera ni keirau vakalewena na fomu, keirau sa sureti me keirau lai veiqaravi ena valenivolavola ni tabana e Finiladi. Ena gauna qori, era sega ni dau sureti na lewenivuvale e Peceli. Ia keirau via veiqaravi ga ena vanua e vinakata o Jiova, sega ni vanua keirau vinakata. Keirau mani vakadonuya na veisureti ni valenivolavola ni tabana. Keirau vulica tiko ga na vosa vakavalagi de dua keirau na mani sureti.
Ni oti e vica na yabaki, e vakadonuya na Lawalawa Dauvakatulewa mera vuli e Kiliati na lewe ni vuvale e Peceli. Keirau vakalewena sara na kena fomu, ia sega ni kena ibalebale qo ni keirau cata na veiqaravi e Peceli. Keirau marautaka tiko. Keirau tu vakarau me keirau veivuke ke ganiti keirau. E vakadonui sara me keirau lai vuli e Kiliati ena ika79 ni kalasi, keirau qai tuvaitutu ena Seviteba 1985. Keirau lesi sara e Colombia.
IMATAI NI ILESILESI VAKADAUKAULOTU
Ni keirau yaco i Colombia na imatai ni neirau ilesilesi na valenivolavola ni tabana. Au gumatua meu cakava na noqu ilesilesi, ia ni oti e dua na yabaki ena valenivolavola ni tabana, au nanuma me sa veisau na neirau ilesilesi. Qo e kena imatai e kena iotioti tale ga ni gauna meu kerea kina e dua na ilesilesi vou. Oti qori keirau lesi sara vakadaukaulotu ena siti o Neiva, ena yasayasa o Huila.
Au dau taleitaka vakalevu na cakacaka vakavunau. Niu se painia dawai e Finiladi, eso na gauna au dau vunau ena matakalailai me yacova na yakavi. Qo ni keirau veiwatini vou, keirau dau cakacaka vakavunau tale ga ena siga taucoko. Ni keirau lako ena yalava yawa, so na gauna keirau dau moce tu ga ena loma ni neirau motoka. Qo e vakabula gauna, e tekivu totolo tale ga na cakacaka ena siga tarava.
Ni keirau veiqaravi tiko qo vakadaukaulotu, keirau sa qai gumatua tale me vaka neirau se qai tekivu cakacaka vakavunau. E tubu na ivavakoso, era dau veidokai na tacida, era dau loloma ra dau vakavinavinaka.
NA YAGA NI MASU
Era toka voleka ga e Neiva na tauni era sega tu kina na iVakadinadina i Jiova. Au kauai gona vakalevu se ra na rogoca vakacava na itukutuku vinaka. Ia nira veivaluvaluti tiko kina na sotia yalewa kei na sotia tagane vakaiyaragi, e sega toka ni ka vakayalomatua me keimami lako kina na vulagi. Au masulaka gona me dua mai na tauni qori me iVakadinadina i Jiova. Au nanuma ni o koya e vulica na ka dina qo me tiko sara ga e Neiva. Au masulaka tale ga me oti nona papitaiso me totolo nona matua vakayalo me lesu i nona tauni me lai vunau kina. Ia e duatani sara na ka e nanuma tiko o Jiova ni vakatauvatani kei na ka au vakasamataka tiko.
Oti qori au tekivu vunau kei na dua na cauravou o Fernando González. E tiko mai Algeciras, e dua na tauni e sega kina na iVakadinadina i Jiova. E taubaletaka o Fernando e 50 na kilomita me yaco i Neiva me lai cakacaka kina. E dau vakavakarau vinaka ena gauna kece ni nona vuli sega ni dede sa tekivu tiko tale ga ena soqoni kece. Ena imatai ga ni macawa e tekivu vuli kina, sa dau soqoni ira mai eso tale ena nona tauni me vakavulici ira ena ka sa vulica tiko ena iVolatabu.
Kei Fernando ena 1993
E papitaiso o Fernando ena Janueri 1990, ni oti ga e ono na vula na nona vuli iVolatabu. Oti ga qori sa tekivu painia tudei. Ni sa tiko rawa e Algeciras e dua na iVakadinadina i Jiova, sa rawa ni lesia na painia lavotaki na valenivolavola ni tabana me lai veiqaravi e kea. Ena Feperueri 1992, e tauyavu kina e dua na ivavakoso ena tauni qori.
Vakacava e yalani ga nona cakacaka vakavunau o Fernando ena nona tauni? Sega! Ni oti nona vakamau, erau toki vakaveiwatini e San Vicente del Caguán, e dua tale na tauni era sega kina ivakadinadina i Jiova. Rau veivuke ena vanua qori me tauyavu e dua tale na ivavakoso. Ena 2002, e lesi o Fernando me ivakatawa ni tabacakacaka, e veiqaravi tiko gona kei watina o Olga, ena cakacaka ni ivakatawa dauveilakoyaki me yacova mai nikua.
Ena veika au sotava qo, au vulica kina na bibi ni noda vakamatatataka ena noda masu na veika e vauca na noda lesilesi vakalou. Ena veivuke o Jiova ena veika eda sega ni rawa ni cakava. Me kena ilutua qo na nona tatamusuki, sega ni noda.—Maciu 9:38.
“KUA NI VINAKATA GA MONI CAKAVA SARA GA”
Ena 1990 keirau lesi ena itavi vakaivakatawa dauveilakoyaki. Tekivu sara na imatai ni veisiko ena koro turaga o, Bogotá. Keirau lomaleqataka ni sega ni caka vinaka na cakacaka ikeri. Keirau tauvanua ga, sega tu na neirau taledi. Sega tale ga ni matau vei keirau na bula ena tauni osooso. Ia e vakayacora o Jiova na ka e yalataka ena Filipai 2:13: “Na Kalou sara ga e cakacaka tiko vei kemuni me salavata kei na ka e vinakata, moni kua kina ni vinakata wale ga, me tiko tale ga vei kemuni na kaukaua moni cakava sara ga.”
Oti qori, keirau mani lesi sara ena dua na yasana vaka Medellín, ena siti au cavuta oti mai e liu. Sa nodra ivakarau ni bula tu ikeri na itovo voravora sa sega tu ni dua na ka vei ira. Me kena ivakaraitaki, dua na gauna niu veivakavulici tiko ena iVolatabu, a katuvu na veivanavanai ena yasa ni vale. Voleka sara ga niu davo ena fuloa meu vunitaki au, ia e tomana tiko ga na wiliwili na gone vuli, e sega mada ga ni kauai kina. Ni sa wiliwili oti, e kerea me curu mada e tuba. Oti vakalailai e curu lesu mai lomanivale kei na rua na gone qai kaya: “Vosoti au, au a lai kauti rau ga mai na gone.”
E dau yaco tale ga eso na ituvaki va qori. Dua na gauna ni keirau vunau tiko e veivale, sa cici mai vei au o watiqu, au raica ni domobula. E kaya ni dua e vanai koya. Au rere sara ga. Ia keirau qai kila e muri ni a sega ni vanai koya mai, a vana tiko ga na tagane rau a veisivi.
Toso na gauna keirau sa kila na ka me keirau cakava ena ituvaki qori. E uqeti keirau na nodra yaloqaqa na mataveitacini e kea era sotava na ituvaki va qori kei na kena e ca sara. Keirau vakadeitaka ke vukei ira o Jiova, ena vukei keirau tale ga. Keirau dau muria na ivakasala na qase ni ivavakoso e kea, me keirau dau qaqarauni, keirau qai biuta vei Jiova na kena vo.
Ia eso na ituvaki e sega ni vakarerevaki sara me vaka keirau nanuma. Dua na gauna au rogoca ni vaka me rau veikailavaki tiko e rua na yalewa e tuba niu veisiko tiko ena dua na vale. Au sega ni via kauai kina, ia e qai uqeti au o itaukeinivale meu lai raica mada ena varada. Au qai raica ni rau veikailavaki tiko ga e rua na kaka ni rau vakatotomuri ira na tiko volekati koya.
ESO TALE NA ILESILESI KEI NA SASAGA
Ena 1997, au lesi meu lai veivakavulici ena Koronivuli ni Cakacaka Vakaitalatala. b Au dau taleitaka na tiko ena vuli vakalou. Ia au sega ni bau tadra vakadua meu lesi ena itavi dokai meu veivakavulici kina.
Oti au veiqaravi sara meu ivakatawa ni tikina. Ni sa mai cegu na ilesilesi qori, au veiqaravi tale vaka vakatawa ni tabacakacaka. Sa sivia gona e 30 na yabaki, na noqu dau veivakavulici tiko au veiqaravi tale ga vakaivakatawa ni tabacakacaka. E levu sara ga na veivakalougatataki e vu mai na ilesilesi qori. Ia au sotava tale ga eso na leqa. Meu vakamacalataka mada.
Au sega ni dau tu suka ni cakava e dua na ka. Qori tale ga e dua na ka e vukei au meu vosota na ituvaki dredre. Ia ena so na gauna sa sivia tale na noqu gugumatua ena noqu saga meu vakadodonutaka e dua na ka ena ivavakoso. Eso na gauna au dau uqeta eso mera veilomani mera yalorawarawa, kena leqa ga ni qori sara ga na itovo e vinakati meu cakacaka tale ga kina.—Roma 7:21-23.
E tiko eso na noqu malumalumu e dau vakavuna meu yalolailai ena so na gauna. (Roma 7:24) Dua na gauna, au tukuna vei Jiova meu sa biuta na cakacaka vakadaukaulotu meu lesu i Finiladi. Ena yakavi tiko ga qori, au tiko ena dua na soqoni vakaivavakoso. E veiuqeti na ka au vulica kina ni uqeti au meu kua ni biuta na noqu ilesilesi meu vakavinakataka tiko ga na noqu malumalumu. Me yacova mai nikua, au vakavinavinaka vakalevu ena matata ni nona dau sauma o Jiova na noqu masu. Au vakavinavinakataka tale ga na sala e vukei au kina vakayalololoma meu valuta na noqu malumalumu.
NUIDEI NI KEIRAU VAKANAMATA ENA GAUNA SE BERA MAI
Keirau vakavinavinaka vakalevu kei Sirkka vei Jiova ena neirau mai okati ena itavi dokai me keirau veiqaravi vakatabakidua ena dua na gauna balavu. Au vakavinavinaka tale ga vei Jiova ena nona solia vei au e dua na watiqu dauloloma, e yalodina tale ga ena veiyabaki kece qo.
Au sa voleka ni yabaki 70 qo, au sa na cegu tale ga ena itavi ni veivakavulici kei na ivakatawa ni tabacakacaka. Ia e sega sara ga ni vakayalolailaitaki au qori. Na vuna? Niu kila ni sala eda vakaraitaka kina noda rokova na Kalou oya na noda qaravi koya ena yalomalumalumu kei na noda vakacaucautaki koya mai vu ni lomada ni vuabale ena loloma kei na vakavinavinaka. (Maika 6:8; Mari. 12:32-34) Ke da rokovi Jiova eda na sega ni via rogo.
Niu raica lesu na ilesilesi au sa qarava mai, au kila niu sega ni lesi kina niu uasivi ira eso tale, se me dua noqu taledi. E sega sara ga. E lesi au ga kina o Jiova ena vuku ni nona loloma soli wale. Au lesi kina ia e tiko na noqu malumalumu. Au kila niu vakayacora vinaka ga na ilesilesi qori ena veivuke i Jiova. Ena sala qo e laurai na kaukaua ni Kalou niu malumalumu.—2 Kor. 12:9.
