An fèt an 1955. Paran an mwen fè 3 gason é sé mwen ki pi piti la. An lévé adan on réjyon yo ka kriyé Vantaa alèla. Sé on vil ki ka touvé-y o sid a Lafenland.

Manman-mwen pran lèbatèm é i vin Témwen a Jéova déotwa lanné avan an té fèt. Men pap’an mwen pa té vé tann palé dè lavérité menm é i pa té vé manman palé-nou dè Labib, ni menné-nou adan sé réinyon-la. Alò, lèwvwè i pa té ka la, manman té ka pwofité pou aprann-nou sé vérité-la ki adan Bib-la.

Dépi lèwvwè an té piti, an té byen désidé a obéyi Jéova. Pa ègzanp, on jou lèwvwè an té ni 7 an, métrès an mwen fè kòlè asi mwen pas an té ka rèfizé manjé on sòt dè ti gato yo ka fè an Fenland é ki fèt èvè san. Yo ka kriyé gato-lasa verilättyjä. I mété-y ka pijé jou an mwen pou wouvè bouch an mwen é i pran mòso gato èvè on fouchèt é i éséyé fè-y rantré an bouch an mwen. Men an réyisi fè fouchèt-la tonbé.

Lèwvwè an té ni 12 an, pap’an mwen mò. Kifè, aprésa an té pé ay adan sé réinyon-la. Déotwa frè pran-mwen anba zèl a yo. Sé frè-lasa té janti toubònman é yo édé-mwen vin pi bon zanmi èvè Jéova. An mèt-mwen ka li Labib touléjou é an té ka pran tan étidyé sé piblikasyon-la byen konm i fo. Grasa sé bon labitid-lasa, an té paré pou pran lèbatèm é sé sa an fè lè 8 out 1969 ; an té ni 14 an.

 Tibwen tan apré an fin lékòl, an vin pyonyé pèwmanan. É déotwa simenn apré, an ay rété Pielavesi. Vil-lasa ka touvé-y anmitan a Lafenland é sé on koté yo té bizwen plis pwoklamatè.

Sé lè an té Pielavesi an vin konnèt Sirkka, ti madanm an mwen. Sé té on moun ki ka rèkonnèt limit a-y é ki té enmé Jéova toubònman. Lè an vwè sa an pri asi-y. I pa té ka fè biten pou fè moun vwè-y é i pa té ka chèché a viv alèz a-y. Sa ki té enpòwtan pou nou toulédé, a pa té risivwè rèsponsabilité men sé té fè tousa nou té pé adan travay-la nou té ka fè la pou Jéova. Nou mayé lè 23 maws 1974. Olyé nou pati an vwayaj apré nòs an nou, nou ay Karttula. Adan vil-lasa, yo té bizwen plis pwoklamatè ankò ki a Pielavesi.

Dépi an koumansman a mayé an nou, Jéova montré-nou kè i té’é ban-nou sa nou té bizwen si nou té ka chèché Wayòm-la an prèmyé (Mat. 6:33). Pa ègzanp, lè nou té Karttula, nou pa té ni vwati. Donk nou té ka fè tout alé é vini an nou a bisiklèt. Lè sé té livè, tanpérati-la té ka désann tèlman ba, kifè sa té vréman nésésè kè nou ni on vwati pou préché adan gran téritwa-la yo té ban-nou la. Men nou pa té ni asé lajan pou achté yonn.

On jou, yonn adan sé granfrè an mwen la vin vwè-nou akaz. I fè-nou kado vwati a-y èvè onlo jantiyès. Asirans-la té ja péyé ; sèl biten pou nou té achté sé té ésans-la. Sé konsa nou vin ni vwati-la nou té bizwen la.

Jéova pwomèt kè i ké ban-nou tousa nou bizwen pou nou viv, é i fè-nou vwè kè i tchenn pwomès a-y. É nou, tousa nou té ni a fè, sé té mèt Wayòm-la prèmyé douvan adan vi an nou.

An 1978, alòskè nou té ka fè Lékòl pou lé pyonyé, frè Raimo Kuokkanen a, yonn adan sé fòwmatè an nou la, ankourajé-nou a ranpli on dèmann pou fè Lékòl a Galaad. Alò, nou mèt-nou ka aprann palé anglé. Men an 1980, avan menm nou té ni tan ranpli on dèmann, yo mandé-nou vin travay adan Bétèl a Lafenland. A épòk-lasa, lèwvwè ou té bétélit, ou pa té pé fè Lékòl a Galaad. Men nou té vlé sé Jéova ki chwazi kikoté nou té’é ay olyé sé noumenm ki fè pwòp chwa an nou. Alò nou aksèpté envitasyon-la. Men kanmenmsa, nou kontinyé aprann palé anglé pou sianka on jou nou té ni lokazyon fè Lékòl a Galaad.

 Kèlkè lanné apré, Komité santral la di kè sé bétélit-la té pé fè Lékòl a Galaad. Alò onfwamenm nou ranpli on dèmann. Sa pa té vé di kè nou pa té kontan travay an Bétèl-la. Sa nou té vlé sé té fè sé frè-la sav kè, si nou té pé bay on pal, nou té paré pou ay nenpòt koté yo té bizwen pwoklamatè. Yo aksèpté dèmann an nou é nou pawtisipé adan 79^èm klas a Lékòl a Galaad. Nou risivwè diplòm an nou an sèptanm 1985 é yo voyé-nou an Kolonbi.

An Kolonbi, prèmyé koté-la yo voyé-nou la sé té an Bétèl-la. An éséyé fè tousa an té pé pou fè travay-la yo té ban-mwen fè la byen, men apré on lanné, an di-mwen kè an té bizwen fè on chanjman. Sé té prèmyé é dènyé fwa an vi an mwen kè an té ka mandé pou yo té voyé-mwen ondòt koté. Alò, yo voyé-nou a Neiva antankè misyonè. Sé té on vil ki ka touvé-y adan réjyon a Huila.

An toujou té enmé préché. Lèwvwè an té pyonyé an Fenland é kè an té sélibatè toujou, délè an té ka koumansé préché granbonnè maten é an té ka fin ta lèswa. É lèwvwè nou té toufré mayé osi, mwen é Sirkka nou té ka préché tout lajouné é nou té ka fè sa plizyè jou an simenn-la. Lèwvwè nou té k’ay préché dé koté ki té lwen a kaz an nou, délè nou té ka dòmi adan vwati an nou. Konsa, nou pa té ka pèd tan asi lawout é sa té ka pèwmèt-nou koumansé préché granbonnè lèlandèmen-la.

Lèwvwè nou té misyonè, nou rèsanti menm jwa-la ki lè nou té toufré koumansé préché. Lasanblé-la nou té adan-y la gwosi, é sé frè é sè kolonbyen la té ni onlo rèspé pou lézòt, yo té plen lanmou é yo té ni onlo rèkonésans osi.

Toupré Neiva, koté-la nou té yé la, té ni dòt vil men pa té ni pon Témwen a Jéova ki té ka viv sé koté-lasa. An té ka mandé-mwen kijan sé moun-la ki té la la té’é tann palé dè bon nouvèl-la, é an té ka sonjé-yo onlo. Men sé vil-lasa té danjéré pou moun ki pa té lévé la, pas sé koté-lasa té ni onlo moun ki té ka pran zàm pou goumé èvè gouvènman-la. Alò an priyé pou on moun ki ka rété adan yonn adan sé vil-lasa vin Témwen. É an té ka di-mwen kè fò moun-lasa té’é vin rété Neiva pou i vin konnèt lavérité. An priyé osi pou moun-lasa té vin on moun ki byen doubout adan lavérité apré batèm a-y é pou i té viré koté-la i té ka rété la pou préché. Men Jéova té ja ni on solisyon ki té lontan méyè ki tan mwen la.

Tibwen tan apré, an koumansé étidyé Labib èvè on jennboug non a-y sé Fernando González. I té ka rété Algeciras, yonn adan sé vil-la ki pa té ni pon Témwen a Jéova adan. Chak simenn, i té ka fè plis ki 50 kilomèt pou i té vin travay Neiva. I té ka préparé-y byen toubònman chaklè i té kay fè étid a-y. É tousuit, i koumansé ay adan tout sé réinyon-la. Dépi prèmyé simenn-la étid-la té koumansé, Fernando té ka sanblé plizyè moun ki té ka rété adan menm vil ki-y pou aprann-yo sa limenm té aprann adan étid a-y.

Fernando pran lèbatèm an janvyé 1990 ; sa té ka fè 6 mwa i té koumansé étidyé Labib. Aprésa i vin pyonyé pèwmanan. Konm on moun Algeciras té vin Témwen a Jéova, konnyéla sa té mwen danjéré. Alò filyal-la té pé voyé pyonyé èspésyal koté-lasa. An févriyé 1992, yo fòwmé on lasanblé adan vil-lasa.

Ès Fernando kontanté-y dè préché enki adan vil-la i té ka rété la ? Awa ! Apré i mayé, li é  madanm a-y, Olga, ay rété San Vicente del Caguán, ondòt vil ki pa té ni pon Témwen adan-y. Grasa éfò a yo, yo fòwmé on lasanblé koté-lasa. An 2002, yo nonmé Fernando rèsponsab a siwkonskripsyon, é li é madanm a-y ka kontinyé adan aktivité-lasa jis a jòdijou.

Sa aprann-mwen on biten ki enpòwtan toubònman. Lèwvwè nou ka priyé Jéova anrapò èvè sa nou ka viv adan aktivité an nou, fò-nou prési. I ka rivé fè sa nou pé pa fè. É sa toutafè nòwmal piskè a pa travay an nou men sé travay a-y (Mat. 9:38).

An 1990, yo voyé-nou sèvi adan siwkonskripsyon-la. Prèmyé siwkonskripsyon an nou té adan vil a Bogotá, ki sé kapital a Lakolonbi. Men nou pa té ka santi-nou alahotè pou fè travay-lasa, pas nou té dé moun kon toutmoun é nou té pè pa fè travay-la byen konm i fo. Anplisdisa, nou pa té ni labitid viv adan on gran gran vil konsa. Men, Jéova soutyenn-nou kon i pwomèt an Filipyen 2:13. Vèwsé-lasa ka di : « Sé Bondyé ki ka ba-zòt balan, ki ka ba-zòt lanvi-la é fòs-la anmenmtan pou zò pé aji, paskè sé sa ki tout plézi a-y. »

Plita, yo voyé-nou sèvi adan plizyè lasanblé adan réjyon a Medellín, vil-la nou té palé la an koumansman a istwa-la. Koté-lasa, té ni tèlman vyolans adan sé lari-la kè sé moun-la pa té ka menm chaléré kò a yo ankò tèlman yo té abityé vwè sa. Pa ègzanp, on jou, pannan an té ka fè on étid, moun koumansé tiré koudfizi an lari-la. Alò an té kay plonjé atè-la, men étidyan-la, li, pa menm réyaji é i kontinyé li paragraf-la. Lèwvwè i fin lèkti a-y, i mandé-mwen èskizé-y é i pati. On ti moman apré, i wouvin èvè 2 jenn timoun a-y. I té toukalm é i di-mwen : « Dézolé, men fò an té ay chèché timoun an mwen. »

Dòt fwa, nou manké pri adan sa. On jou, toupannan nou té ka préché dè kaz-an-kaz, madanm an mwen kouri vin jwenn-mwen. I té vin blèm, é i di-mwen kè on moun té tiré asi-y. Alò sa fè-mwen pè toubònman. Men plita, nou fin pa konprann kè a pa té madanm an mwen moun-la ki tiré la té bizwen tchouyé men sé té on misyé ki té ka pasé owa a-y.

Té ni onlo vyolans alantou an nou men piti-a-piti, sa pa té ka angwasé-nou kon avan. Lè nou té ka vwè jan sé frè é sè la ki té ka rété la té ka tchenbé rèd magré yo té ka viv dé sitiyasyon kon séla nou viv la é dòt ankò ki té pi mové, sa té ka ankourajé-nou onlo. Nou té ka di-nou konsa kè si Jéova té ka édé-yo, nou osi, i té’é édé-nou. Nou toujou suiv konsèy a sé ansyen-la ki té la la, nou té ka pran prékosyon an nou é nou té ka lagé tout rèstan-la an men a Jéova.

Men sèwten sitiyasyon ki té ka sanm sa yo té danjéré pa té si danjéré ki sa an réyalité. Pa ègzanp, on jou an té ay vwè on moun akaz a-y é pannan an té la, an tann 2 madanm ki té ka jiré tout fòs a yo. Sa ki té ka pasé déwò-la pa té ka entérésé-mwen, men moun-la an té vin vwè la ensisté pou an vin adan lakou-la. Pannan an té ka konprann kè sé 2 madanm ki té ka babyé, ében sé té 2 péwoké ki té ka imité sé vwazen-la.

An 1997, yo nonmé-mwen fòwmatè pou l’École de formation ministérielle b. An toujou té enmé pawtisipé adan sé lékòl-la yo ka òwganizé la. Men an pa té jen imajiné on jou kè an té’é vin fòwmatè. Pou mwen sé té vréman on gran lonnè é an té kontan toubònman.

Plita, yo nonmé-mwen rèsponsab a distrik. Lèwvwè yo désidé kè pa té’é ni rèsponsab a distrik ankò, an wouvin rèsponsab a siwkonskripsyon. An rété plis ki 30 an ka sèvi Jéova ki sé antankè rèsponsab a siwkonskripsyon, ki sé antankè rèsponsab a distrik oben fòwmatè. É an té kontan fè sa toubònman. An jwenn onlo onlo bénédisyon adan sé aktivité-lasa. Men, a pa toutlè sa té fasil.

An sé on moun ki plito djòk, é ki sèten dè-y. Sa édé-mwen sipòté onlo sitiyasyon ki té difisil. Men délè, lèwvwè an té ka éséyé rézoud sèwten pwoblèm adan sé lasanblé-la, an té k’ay tibwen two fò. Dépawfwa, an té ka palé rèd ba sé frè é sè la. An té ka ba-yo konsèy pou yo aji èvè lanmou èvè lézòt é pou yo montré-yo rézonab èvè lézòt osi. Men an menm balan-la, toupannan an té ka fè sa, a pa konsa an té ka aji (Wom. 7:21-23).

Lè an té ka vwè défo an mwen, dépawfwa sa té ka dékourajé-mwen toubònman (Wom. 7:24). Onlè, an jous di Jéova kè vométan an té arété sèvi-y antankè misyonè é kè an té viré an Fenland. Menm jouswa-lasa, an ay réinyon é sa an tann ankourajé-mwen toubònman. Alèla an té sèten kè fò an té rété koté-la yo té voyé-mwen la é kontinyé goumé èvè défo an mwen. Jòdila ankò, lè an ka sonjé jan Jéova réponn a priyè an mwen on mannyè ki klè, sa ka touché-mwen. É an ni onlo rèkonésans davwa i montré-y janti konsa èvè mwen pou i pé édé-mwen rivé about a féblès an mwen.

Mwen é Sirkka, nou pasé on bon pati a vi an nou adan sèwvis aplentan la é nou ka di Jéova mèsi pou sa. É an ka di Jéova mèsi onlo osi pou ti madanm-la i ban-mwen la ki ni onlo lanmou é ki toujou soutyenn-mwen pannan tout sé lanné-lasa.

Talè, an kay ni 70 an, kifè an pé’é pé rété fòwmatè adan sé lékòl biblik la, ni rèsponsab a siwkonskripsyon ankò. Men an pa tris pou sa. Poukwa an ka di sa ? Pas an vréman sèten kè pibèl mannyè nou pé ba Jéova lonnè, sé lè nou ka tchenn kont dè limit an nou lè nou ka sèvi-y, lè nou ka louwé-y pas nou enmé-y é pas nou ni rèkonésans pou-y (Mich. 6:8 ; Mawk 12:32-34). Pou ba Jéova lonnè, nou pa bizwen yo ban-nou on rèsponsabilité ki enpòwtan.

Lè an ka sonjé tout sé rèsponsabilité-la an té ni la, an pa ka di-mwen kè Jéova pèwmèt-mwen ni yo pas an té mérité-yo plis ki ondòt oben pas kò an mwen té bon adan sé domenn-lasa. An sav byen kè a pa sa ditou ! Okontrè, si Jéova ban-mwen sé rèsponsabilité-lasa, sé davwa i ban-mwen favè a-y kè an pa mérité. É i fè sa magré an ni féblès. Sé enki grasa èd a-y si an rivé fè sé biten-la yo ban-mwen fè la. Sé konsa, féblès an mwen ba puisans a Jéova glwa (2 Kor. 12:9).