I bungiaki n 1955, ao ngai te bina i buakoia tariu aika uoman. I ikawairake n uakaan ma mataniwin te aba i maiakin Finland, n te aono ae kinaaki ngkai bwa te kaawa ae Vantaa.

E bwabetitoaki tinau ao ni kaaina Ana Tia Kakoaua Iehova tabeua te ririki imwaini bungiakiu. Ma e kaitaraa te koaua tamau ao e aki kariaia bwa e na reirei tinara ma ngaira ke ni kairira nakoni bobotaki n te ekaretia. Ngaia are e reireinira moan reirei man te Baibara ngkana akea tamau i rarikira.

I tei ibukin Iehova mangke I uarereke. N te katoto, n te taina ngke itiua au ririki, ao e a rangi n un au tia reirei irou ibukina bwa I rawa ni kana te verilättyjä (aia kabuki kaain Finland ae renganaki ma te raraa). E koona tabau neiei ni kaurea wiu ni baina are teaina, ao ni baina are teaina e kataia ni karina te kabuki i nanoni wiu n te buun ae te kainiwaiteke. E reke angau n taenakoa te buun are i baina.

Ngke 12 au ririki ao e a mate tamau. Imwin anne, ao I a kona ni kaakaei bobotaki n te ekaretia. A kaota tabeakinau ma te akoi taari n te ekaretia, ao aei are e a kairai bwa N na ririkirake n te onimaki. I a moana warekan te Baibara ni katoabong ao ni kakorakoraai n ukeuke n ara boki ni Kristian. Ibukini baikai I a kona ni bwabetitoaki ngke 14 au ririki n Aokati 8, 1969.

 Imwini banen au reirei, I a moana naba au bwaiania ae katoatai. I nanon tabeua te wiki, I a mwaing nakon te tabo ae kainnanoaki riki iai te ibuobuoki, n te kaawa ae Pielavesi n uakaan ma nukan Finland.

I a kaitiboo ma te aine are e na riki bwa buu ae Sirkka i Pielavesi. E bwaka nanou n aroarona ae te nanorinano ao tangiran Iehova ae korakora irouna. E aki ukera neiei te kakannato ke bwaikorakin te maiu aika kamwengaraoi. Ti kani kabanea ara konaa ni beku iroun Iehova, ao ti tauraoi ni karaoi mwiokoara nako ake ti anganaki. Ti mare ni Maati 23, 1974. N oneani mwin are ti na nako ni motirawa imwin ara mare, ti a nako ni beku i Karttul, ae te tabo ae a rangi ni kainnanoaki riki iai taan uarongorongoa te Tautaeka n Uea.

E a tia ni kaotia Iehova nakoira mangke ti moan tekateka n taanga, bwa e na bon tabeakini kainnanora ngkana ti ukera moa ana Tautaeka n Uea. (Mat. 6:33) N te katoto, akea ara kaa i Karttula. N te moantai, ti bwabwatika, ma n tain te kamwaitoro ao e a rangi ni kamariri. Ti kainnanoa te kaa ngkana ti na uarongorongo n aonon te ekaretia ae bubura. Ma akea ara mwane.

I mimi ngke e a kawarira naba tariu are te kauoman. E anganira ana kaa ao e a tia naba ni kabwakaa te mwane ibukin te kaboomwi, ma ti na tii kabooa bwaana. E a reke ngkanne baora are ti kainnanoia.

E kaotia nakoira Iehova bwa tabena tabeakinara ni kaineti ma baike ti kainnanoi. Ao tabera ngaira boni moanibwaian te Tautaeka n Uea.

Ngke ti kaea te Kuura Ibukin te Mwakuri ni Bwaiania n 1978, ao e kaungaira temanna mai buakoia ara tia reirei ae Raimo Kuokkanen, a bwa ti na karina ara booma ibukin te Kuura ni Kireata. Ngaia are ti a moana reiakinan te taetae n Ingiriti ma tiara ae ti na tau ni kaea. Ma n 1980 imwain ae ti karina ara booma, ao ti a kaoaki bwa ti na beku n te aobiti n tararua i Finland. N te tai anne, ao a aki kona kaain te Betaera ni karina aia booma ibukin te Kireata. Ma ti kani beku n te tabo are e iangoia Iehova bwa e raoiroi ibukira, tiaki n te tabo ae ti iangoia bwa e raoiroi ibukira. Ngaia are ti a butimwaea te kakao anne. Ma ti bon teimatoa n reiakina te taetae n Ingiriti, mwina tao  ti a kariaiakaki naba bwa ti na karina ara booma ibukin te Kireata.

Tabeua te ririki imwina, e a kariaia te Rabwata n Tautaeka bwa a a kona n ira te Kireata kaain te Betaera. Ti waekoa ni karina ara booma ma tiaki ibukina bwa ti aki kukurei n te Betaera. Boni kaitaraana raoi! Ti bon tii kan anga ngaira ao ni beku n te tabo ae kainnanoaki riki iai te ibuobuoki ngkana ti tau iai. Ti a butimwaeaki nakon te Kireata ao ti angabeeba n te ka-79 ni koraki n te Kireata n Tebetembwa 1985. Ti mwiokoaki nako Colombia.

Ti mwiokoaki moa nakon te aobiti n tararua i Colombia. I kataia ni kabanea au konaa ni mwiokoau, ma imwin teuana te ririki n te aobiti n tararua, I a namakinna bwa ti a riai ni karaoa te bitaki. Ai tibwa te moantai ao tii te tai naba aei, ae I a tuatua mwiokoau ae kaokoro. Imwin anne, ti a mwiokoaki bwa mitinare n te kaawa ae Neiva, n te aono ae Huila.

I kukukurei n taai nako n te mwakuri ni minita. Ngke I bwaiania ngkoa ngke I tuai n iein i Finland, ao n tabetai I uauarongorongo n te ingabong ni uaa e bong. Ngke I a mare ma Sirkka ao ti kona naba ni kabongbong n uarongorongo. N tabetai ti matu i nanon ara kaa ngkana ti mwakuri n aono aika raroanako. E a aki anaaki ara tai ni mwamwananga n aei ao ti a kona iai ni moantaai ni moana ara mwakuri n te bong are imwina.

Ngkai mitinare ngaira, ti a manga namakina naba te ingainga are ti karekea mai mwaina n te mwakuri ni minita. E a rikirake ara ekaretia, ao taari ake i Colombia a bwaina te karinerine, te tatangira, ao te kakaitau.

Iai kaawa aika uakaan ma te tabo are ti mwiokoaki iai ae Neiva, aika akea iai taani Kakoaua. I rangi n tabeaianga bwa e na kangaa n roko te rongorongo ae raoiroi n aono aikai. Ma ibukin te buaka a aikoa kona ni mano raoi aomata ake tiaki kaaini kaawa aikai. Ngaia are I tataro bwa e na riki bwa te tia Kakoaua temanna mani kaawa aikai. I iangoia bwa te aomata anne e na maeka i Neiva ao n reiakina te koaua. Ngaia are I tataro naba bwa imwini bwabetitoana, e na riki bwa te tari ae ikawai n te onimaki ao e na okira ana kaawa n uarongorongo iai. I riai ni kaman ataia ae iai ana anga Iehova ae tamaroa riki nakoiu.

N te tai ae waekoa imwin anne, I a moana te reirei n te Baibara ma temanna te mwaane ae arana Fernando González. E maeka i Algeciras, ae teuana mai buakoni kaawa aika akea iai taani Kakoaua. E mwamwananga Fernando n te raroa ae raka i aon 30 te maire nako Neiva ni kaea ana mwakuri. E kakatauraoi raoi nakon ara reirei ni kabane ao e waekoa ni kaakaei bobotaki n taromauri. Ni moani wikin ana reirei Fernando ao e a botiia tabeman kaain ana kaawa ao e reireinia baike e a tia n reiakin man ana reirei n te Baibara.

E bwabetitoaki Fernando n Tianuare 1990, onoua namwakaina imwin ana reirei. Imwin anne, e a riki bwa te bwaiania ae katoatai. Ngkai e a reke temanna kaain te aba i Algeciras bwa te tia Kakoaua, e a kona ngkanne ngkai te aobiti n tararua ni mwiokoiia bwaiania aika okoro nakon te aono aei. Ni Beberuare 1992, e a tei te ekaretia n te kaawa anne.

E tii uarongorongo Fernando n ana kaawa? E aki! Imwini marena, ao e a mwaing ma buuna nako San Vicente del Caguán, ae te kaawa ae  akea naba iai taani Kakoaua. A buoka katean te ekaretia ikanne. N 2002, e a mwiokoaki Fernando bwa te mataniwi n te aono, ao e reitaanako te mwakuri ni mwamwananga ngaia ma buuna ae Olga n uaa ngkai.

Man te rongorongo aei, I a nora kakawakin te tataro ibukini bwaai tabeua aika irekereke ma mwiokoara. E karaoa Iehova ae ti aki kona ni karaoia. Ma ni koauana, bon ana uaa aika taiaki, tiaki ara uaa.—Mat. 9:38.

N 1990 ti a mwiokoaki n te mwakuri ni mwamwananga. Ara moan aono ni mwakuri boni kautun te kaawa ae Bogotá. Ti rangi ni maaku ni mwiokoara aei. Bon aomata ngaira aika akea ara tarena ae okoro. Ao ti aki taneiai ni maeka n te kaawa ae mwaiti kaaina. Ma e kakororaoa Iehova ana berita are n I-Biribi 2:13 ae kangai: “Bon te Atua ae mwamwakuri i nanomi ibukini kukurein nanona, bwa kam aonga ni karekei nanomi ma ni mwakuri.”

Imwina ti a mwiokoaki nakon te aono ae Medellín, ae te kaawa are I taekinna mai eta. A taneiai aomata ikanne ma te mwakuri n iowawa i rarikin te kawai ao a aikoa tabe iai. N te katoto, n te tai teuana ngke I kaira te reirei n te Baibara, ao a kakatii naba tabeman i tinanikun te auti are I kawaria. Ngke N nangi boni wene ni baraaki i aontano, ao au reirei n te Baibara e teimatoa ni wareka te barakirabe kaanga akea te bwai ae riki. Ngke e bane ana wareware, e a teirake naba ao n otinako. Imwin tabeua te tai, e a oki ma natina aika uarereke aika uoman ao e taetae n te aro ae akea te bwai ae riki, “Kabwaraa au bure bwa I tii nako n anaiia natiu.”

Iai riki taai aika e kuri n ruanikai iai maiura. N te taina ngke ti uarongorongo n te auti teuana ma teuana, ao e a boni biri naba buu nakoiu ma ubuna ae mainarake. E taekinna buu bwa e katiiaki iroun te mwaane temanna. I rangi ni maaku iai. Ma I a ataia imwina ae e aki katiia Sirkka teuaei ma e boni katiia te mwaane are rirarikin Sirkaa.

Imwin tabeua te tai, a aikoa nako nanora n te mwakuri n iowawa i rarikin te kawai. Ti kaungaaki n aia kakorakora taani Kakoaua n te aba aei ni kaaitarai kangaanga n aron aikai ao aika kakaiaki riki. Ti a ataia ae ngkai e buokiia Iehova, e na boni buokira naba. Ti aki toki ni maiuakin aia taeka n reirei unimwaane n te ekaretia n te aono aei, ti taratara raoi, ao ti katikui bwaai ni kabane i nanoni bain Iehova.

Ni koauana, a aki rangi ni karuanikai kangaanga tabeua n aron are ti kantaningaia. N te taina, I a ongo kaanga bwanaaia aine aika uoman aika tatakarua n un i marenaia i tinanikun te auti are I kawaria. I aki kan taraa te kauntaeka are riki, ma e tuangai kaain te auti bwa N na nako nakon ana bwaranta n noria. N tokina, te kauntaeka arei, bon i marenaia mannikiba aika uoman aika taian parrot aika katotonga bwanaaia aomata.

N 1997, I a mwiokoaki bwa te tia reirei n te Kuura Ibukini Kataneiaakia Minita. b I kakaitau n taai  nako ni kaeani kuura n reirei aikai, ma I aki kantaningaia ae N na mwiokoaki bwa te tia reirei iai.

Imwina, I a beku bwa te mataniwi n te aono ae bubura. Ngke e a toki te babaire anne, I a manga okira te mwakuri ni mwamwananga n te aono. Ngaia are I kukurei ngke I beku i nanon 30 tabun te ririki bwa te tia reirei ao te mataniwi ae mwamwananga. A riki mwioko aikai bwa nibwani kakabwaia aika bati. Ma a aki bebete bwaai ni kabane. N na kabwarabwaraa.

Bon te aomata ngai ae I rangi n tataua ma nanou ni bwaai ni kabane. I a tia ni buokaki n aroarou aei ni kaaitarai kangaanga ake I rinanoi. Ma n tabetai e a manga nang riao au taua n nano ni kani kaetii bwaai tabeua n te ekaretia. Iai taai ake I kakorakoraai iai ni kairoroia tabemwaang bwa a na tatangira ao ni bwaina te wanawana nakoia tabemwaang. Ma e kamimi bwa n taai akanne I aki bwabwaini naba aroaro akanne.—IRom 7:21-23.

I namakina te bwarannano ae korakora n tabetai ibukini kabwakau. (IRom 7:24) N te taina ao I a tuanga Iehova n te tataro, ae e raoiroi riki irou bwa N na kitana te mwakuri ni mitinare ao n okira Finland. N te tairiki anne, I kaea te taromauri n te ekaretia. I buokaki n te kaungaunga are I karekea n te tairiki anne bwa I riai n tiku ni mwiokoau ao n teimatoa ni mwakuria aki kororaoiu. Ni karokoa ngkai, e ringaki nanou n aron Iehova ni kaekaa te tataro anne. Irarikina, I rangi ni kakaitau n arona ni buokai ma te akoi n tokanikai i aoni mamaarau.

I rangi ni kakaitau nakon Iehova ngai ma Sirkka ibukin te mwioko ae kabanean riki maiura n te beku ni kabwanina ara tai. I rangi ni kakaitau naba nakon Iehova ngkai e anganai buu ae tatangira ao e kakaonimaki i nanon ririki aikai ni kabane.

I aoni kawaina ni koro 70 au ririki ao N nang katoka au beku ae te tia reirei n te kuura ao te mataniwi ae mwamwananga. Ma I aki nanokawaki n rikin aei. Bukin tera? Ibukina bwa I kakoauaa raoi ae te bwai ae karineaki riki iai Iehova, ngkana ti beku irouna ma te nanorinano ao ngkana ti karaoiroia ma nanora ae onrake n te tangira ao te kakaitau. (Mika 6:8; Mareko 12:32-34) Ngkana ti na karinea Iehova, ti aki kainnanoa te mwioko ae kakawaki.

Ngkana I tanrikaaki nakoni mwioko ake I a tia ni karekei, I ataia ae I aki karekei ibukina bwa I kakawaki riki nakoia tabemwaang, ke a reke mwiokoau aikai ibukina bwa e rianako riki mwaataiu. Bon tiaki ngaia anne! Ma e anganai Iehova mwioko aikai ibukin ana akoi ae rianako. E anganai mwioko aikai n aki ongei mamaarau. I ataia ae I a tia ni kona ni kakororaoi mwioko aikai, tii man ana ibuobuoki Iehova. N te aro aei, e a kakororaoaki mwaakan te Atua ni mamaarau.—2Kor. 12:9.