Joʼuushi taya soʼu 1955, piamashii tawalayuu otta taya chi emülieekai. Kepiashii waya peje sünain tü palaa uuchijeeruʼukat sünain Finlandia, «Vantaa» münüsü tia pueulokot maaʼulu.

Woutiisasü tü teikat nnojoluiwaʼaya joʼuuin taya. Niyoutuin chi tashikai süpüleerua sunoujain otta nnojotsü nuuʼulaain shikirajüin waya nüchiki Maleiwa jee sümaainjanain waya sünain tü outkajawaakat. Shikirajapuʼuin waya sünain tü Bibliakat nnojoipa chi washikai miichipaʼa.

Suluʼusü taaʼin jintüliiwaʼaya taya toonooinjachin waneepia nümaa Jehová. Soʼu wanee kaʼi wanaa sümaa akaratshin touyase jashichisü tamüin tü ekirajakat taya suluʼu koleejia süka tayoutuin teküin tü kanüliakat verilättyjä, shia wanee panqueque aainjuushika süka isha ekaajünaka chaa Finlandia. Saapaaka taya süpüla shiiruluinjatüin taanükü, katsüinjiraaka taya sümaa jee tasütaka suulia tü kuchaarakat.

Anaajaashi chi tashikai wanaa sümaa 12 touyase. Süchikijee tia, waneepiashi taya sünain tü outkajawaakat. Kamaneeshii maʼin tamüin na wawalayuukana. Suluʼujee tia tachajaain sukuwaʼipa süpüla aleewainjachin taya nümaa Jehová. Ekirajaashi taya waneepia sünain tü Bibliakat otta sünain tü karaloʼuta wamaʼanakat. Sutuma taaʼinrüin tia waneepia woutiisashi taya akoosütoʼu 8 soʼu 1969, 14 touyase soʼu tia.

Kettaapa tatuma tü bachilleratokot pürekutsootshi taya rekulaat. Maʼaka jeʼra semaana süchikijee  tia takolojooka eere palitchoin Aküjalii pütchi. Antüshi taya Pielavesimüin tü chakat Finlandia.

Chajatü Pielavesi teʼraajüin tü taʼwayuuseinjatkat, Sirkka sünülia. Müliashi taya shiiʼiree süka teʼrüin nnojoluin pülain saaʼin otta süka alin maʼin Jehová süpüla. Shiyouta achiki shiʼnnaajünüin sutuma wayuu otta nnojotsü kachiiruain saaʼin washirüü. Aʼyataweeshii waya nümüin Jehová süka süpüshuaʼa waaʼin jaʼitasü jaralüin tü aʼyatawaa aapünakat wamüin. Kasaatshii waya maatsoʼu 23 soʼu 1974. Süchikijeechon kasaalüin waya wakolojooka Karttulamüin eere palitchoin maʼin na Aküjaliikana pütchi.

Kasaatpa waya watüjaatüjülia aaʼu naapeerüin Jehová tü kasa choʼujaakat wamüin müleka waaʼinmaale tü waʼyataainkat nümüin (Mat. 6:33). Meʼejenasalii waya chaa Karttula, shiaʼala neʼe eejatka wamaʼana wisiküleeta. Juyapoʼupa chayaa aisü maʼin jemiai. Choʼujaasü wamüin wanee kemionchon süka wattain nepia na wayuu waküjainjanakana amüin pütchi. Isapejeʼe wachiki wayaʼlajüin wanee kemionchon süka manneetsein waya.

Soʼu wanee kaʼi nuwaraijaaka waaʼu wanee tawala. Nüsülajaka wamüin wanee kemionchon jee anasü süpüshuaʼa sükaraloʼutse. Shiaʼala neʼe choʼujaaka wayaʼlajüinjatüin süsüinñe. Eeitpakalaka wamaʼana tü kemion choʼujaakat wamüin süpüla waküjain pütchi.

Sükajee tia wayaawata aaʼulu naapeerüin Jehová tü kasa choʼujaakat wamüin. Shiaʼala neʼe choʼujaaka waʼyataainjanain waneepia nümüin.

Oʼunushii waya sünain tü Ekirajawaa napülajatkat na Pürekutsootkana soʼu 1978. Soʼu tia nütütüleʼerüin waaʼin chi wawalakai Raimo Kuokkanen a süpüla wepirajüin tü karaloʼuta napülajatkat na oʼuneekana sünain tü Ekirajaaleekat Galaad. Wekirajaakalaka sünain inglés süpüla tia. Weenajaanaka süpüla waʼyataainjanain suluʼu tü Weteet chakat Finlandia soʼu 1980 nnojoluiwaʼaya wepirajüin tü karaloʼuta süpülajatkat tü Ekirajaaleekat Galaad. Soʼu tia nnojotsü süpüla nepirajüin tia karaloʼutakat na wawalayuu aʼyataakana suluʼu Weteet. Jülüjasü waaʼin waneepia waʼyataweein nümüin Jehová süka süpüshuaʼa waaʼin suulialeʼeya jülüjain waaʼin tü suchuntaakat waaʼin. Woʼunaka Weteetmüin, ayatapejeʼe wekirajaain sünain inglés süka jülüjain waaʼin eein süpüla wounejaanüin soʼu wanee kaʼi sünain tü Ekirajaaleekat Galaad.

 Shiasaʼa maʼaka jeʼra juya süchikijee tia, naküjaka na Laülaashii Jülüjakana Aaʼin na Aküjaliikana pütchi eeitpain süpüla nepirajüin tü karaloʼuta süpülajatkat tü Ekirajaaleekat Galaad na wawalayuu aʼyataakana suluʼu Weteet. Wepirajamaataka tia karaloʼutakat, nnojotpejeʼe waaʼinrüin tia süka nnojoluin talatüin waaʼin sünain aʼyatawaa nümüin Maleiwa suluʼu Weteet. Shia jülüjaka waaʼin anain waʼyataale eere choʼujaain maʼin Aküjalii pütchi. Chajanaka waya sünain tü Ekirajaaleekat Galaad sünain tü ekirajawaakat 79 soʼujatka settienpüroʼu soʼu 1985. Waluwataanaka Kolonpiamüin.

Wajütünaka Kolonpiamüin süpüla waʼyataainjanain suluʼu Weteet. Taaʼinrüin süka süpüshuaʼa taaʼin tü aʼyatawaa aapünakat tamüin suluʼu Weteet. Waneepa juya taya suluʼu Weteet, jülüjaka taaʼin anain shiiʼiratünüle tü taʼyataainkat. Tachuntakalaka shiiʼiratünüinjatüin tü taʼyataainkat, nnojorüleesia tachuntuin piantua shiiʼiratünüin taʼyataain. Waluwataanaka sünain aküjaa pütchi suluʼumüin tü pueulo kanüliakat Neiva, tü chakat Huila.

Kamalaintüjülia tamüin taküjain pütchi. Maʼwayuuseiwaʼaya taya jee pürekutsoolüiwaʼaya taya chaa Finlandia, eeshi taküjawaire pütchi wattaʼajee maalü sünainmüinreʼeya aipoʼu. Kasaatpa taya sümaa Sirkka, eesü siraawaire kaʼi waaʼu sünain aküjaa pütchi. Waküjainjanale pütchi eere wattain nepia na wayuukana eeshii watunkawaire suluʼu tü weʼejenachonkot. Sutuma waaʼinrawalin tia, oʼttawaishii waya wattachon sünain aküjaa pütchi.

Süka misioneeroinnapain waya aküjaleeinnapa maʼin waya pütchi maʼakaapuʼu paala. Awainmalaashii mapa na wawalayuu woutkajaakana amaa kepiakana Kolonpia. Kamaneeshii naya wamüin, aishii waya napüla otta kojutusü namüin tü waaʼinrakat.

Wainma pueulo pejepünaa sünain Neiva eere nnojoliin eein Aküjalii pütchi. Jülüjasü taaʼin waneepia jameerüin sukuwaʼipa süpüla süküjünüin tü pütchikat namüin na wayuu kepiakana suluʼu tia pueulokot. Eeshii süpüla jamajüin atumawaa na nnojoliikana yalejeʼewaliin süka jouluin guerrilla soʼu tia. Toʼuraajaka maʼin süpüla eeinjachin wanee wayuu anoujakai nünain Jehová suluʼu tia pueulokot. Jülüjaka taaʼin kepiainjachin nia Neiva süpüla sülatüinjatüin tia. Toʼuraajaka süpüla laülaainjatüin naaʼin sünain anoujaa süchikijee woutiisaa jee nüleʼejüinjachin nüchikuaʼa nuumainpaʼamüin süpüla nüküjain pütchi. Anapejeʼe maʼin tü naaʼinrakat Jehová suulialeʼeya tü jülüjakat taaʼin.

Tekirajaka mapa sünain tü Bibliakat wanee jimaʼai Fernando González nünülia, chejeʼewai nia Algeciras wanee pueulo eere nnojoliin eein Aküjalii pütchi. Alatüsü suulia 50 kiloometüro eejeʼewaire nia süpüla nüntajachin chamüin Neivamüin sünain aʼyatawaa. Yapasü nutuma tü wekirajaainjatkalü anain sünain tü Bibliakat jee outkajaamaatüshi nia wamaa. Nuʼunapa nipialuʼumüin nikirajawalin na waneinnua sünain tü ekirajünakalü anain nia.

Woutiisashi Fernando eneeroʼu soʼu 1990, aipirua kashi süchikijee nuʼttuin sünain ekirajawaa sünain tü Bibliakat. Soʼujee tia pürekutsootshi rekulaat nia. Süka eeichipain wanee Aküjai pütchi chayaa Algeciras, eeitpa süpüla suluwataain Weteet waneinnua pürekutsoot pesiaat chamüin. Akumajaasü wanee outkajaalee chayaa peʼureeroʼu soʼu 1992.

 Nnojotsü shiain neʼe nüküjain pütchi aluʼu Fernando eejeʼewaire nia. Kasaatpa nia akolojooshi sümaa nuʼwayuuse chamüin San Vicente del Caguán, wanee pueulo eere nnojoliin eein Aküjalii pütchi. Soʼu 2002 aneekünüshi Fernando süpüla nülapalaainjachin naaʼu na wawalayuukana. Ayatayülia naaʼinrüin tia aʼyatawaakat maaʼulu sümaa Olga, tü nuʼwayuusekat.

Sünainjee tü teʼrakat sünain nukuwaʼipa Fernando, tayaawata aaʼulu choʼujaain lotuinjatüin wanüiki nümüin Jehová süpüla anainjatüin watuma tü waʼyataainkat nümüin. Naaʼinrüin Jehová tü isakat wachiki, jama niain akaalinjain na aʼyataakana nümüin (Mat. 9:38).

Soʼu 1990 aneekünüshii waya süpüla walapalaain naaʼu na wawalayuu kepiakana Bogotá. Wainmajüsü waaʼin aneerüle watuma tü waʼyataainkat chayaa. Wayuʼla neʼe taya sümaa taʼwayuuse. Nnojoishii kiʼrain waya sünain kepiaa suluʼu wanee pueulo muloʼu. Naaʼinrüin Jehová wapüleerua tü sümakat Filipos 2:13, tü makat: «Nia Maleiwa katchinka atuma jaaʼin süpüla talatüinjachin nia jutuma, niʼitaainjeseʼe suluʼu jaaʼin jaaʼinreein sümüin wanee kasa jee juuntuin jaaʼinrüin shia nutuma».

Waluwataanaka mapa süpüla walapalaain naaʼu na wawalayuu kepiakana Medellín, tü pueulo taashajaakalü achiki paalapa. Nnojotsü müin mmoluyaakai saaʼin tü wayuu kepiakat chayaa süka kiʼrainnain naya saʼaka wayuu mojulaasü. Soʼu wanee kaʼi wanaa sümaa yalajachin tekirajüin wanee wayuu sünain tü Bibliakat shiʼinajiraalaʼa sümakalaka waneinnua wayuu mojulaasü. Alüʼütchon süpüla tapalasiraain mmoluʼu, nnojotpejeʼe taaʼinrüin tia süka teʼrüin jimatüin jee ayatüin naashajeʼerüin chi tekirajakai. Kettaapa tü naashajeʼerakat «jiattapa, sejeeshipa taya motsomüin», nümaka tamüin. Shiasaʼa yaaulerü nüntaka namaa piamashii tepichi. «Chejeejachi taya asaajüin tachonnii», nümaka tamüin.

Eesü wanee kasa alataka wamüinña wanaa sümaa waküjain pütchi sainküin miichi. Suwatiraleesia tanainmüin tü taʼwayuusekat, «asoteetchi tooʼomüin wanee wayuu», sümaka tamüin. Jaʼyasü saaʼu mmoluin maʼin saaʼin. Shiyoʼujaaka taaʼin. Waapakalaka süchiki mapa nüsoteerüin chia wayuukai süpüla niʼitajachin wanee wayuu alataka pejepünaa sünain Sirkka.

Nnojotsü mmoluin maʼin waaʼin mapa mayaainjeʼe saʼakain waya wayuu mojulaasü. Meimmoluinsalii waya süka weʼrüin meimmoluin na wawalayuu kepiakana chayaa Medellín mayaainjeʼe wainmain tü kasa mojusü alatakat namüin. Jülüjasü waaʼin nükaalinjeenain waya Jehová maʼaka nükaalinjain naya wawalayuukana. Jüüjüüshii waya sümüin tü namakat na laülaashiikana süpüla waaʼinmajiraainjanain suulia wayuu mojulaasü otta wooʼulaain niain Jehová oʼunirüin wakuwaʼipa.

Eesü waneirua kasa alataka wamüin nnojotka keemain wasirajaka akajee. Soʼu wanee kaʼi tantaka oʼu nipialuʼumüin wanee wayuu, taapakalaka shiyorolo wayuu eekai sütkaajiraain. Nnojoishi taya ekeroteein nipialuʼumüin chia wayuukai soʼu tia. «Pikerota», nümaka tamüin. Shiasaʼa tekerotopa teʼraka shiain piamasü loro tü kayorolokot, nashatüin sünüiki wayuu eekai sütkaajiraain.

Soʼu 1997 aneekünüshi taya süpüla tekirajüin na oʼunakana sünain tü ekirajawaa kanüliakat Escuela de Entrenamiento Ministerial. b Kamalaintüjülia tamüin toʼunuin sünain tü ekirajawaa naainjakat na wawalayuukana. Eetaayaai jülüjain taaʼin tekirajüinjanain na wawalayuukana.

Aneekünüshi taya mapa süpüla talapalaain naaʼu na wawalayuu alapalaakana naaʼu na wawalayuukana. Süsünneʼennapa tia aʼyatawaakat aneekünüshi taya tachikuaʼa süpüla talapalaain naaʼu na wawalayuukana. Alatüirü suulia 30 juya sünain talapalaain naaʼu na wawalayuukana otta sünain tekirajüin na wawalayuu aneekünakana süpüla ekirajawaa. Watta saalii tü kasa anasü teʼrakat sünainjee taaʼinrüin tia aʼyatawaakat. Eepejeʼe waneirua kasa kapüleeka tamüin. Taküjainpa jümüin süchiki tia.

Teʼrüle wanee kasa nnojotka anain atumawaa lotoleesia tanüiki sümaa nnojoluin mmoluin taaʼin sünain aküjaa süchiki tia. Sutuma müin takuwaʼipa, atüjashi taya süpüleerua anoutaa kasa. Eesü sülanaʼaleere tanüiki taküjapa wanee kasa nanoutajatka na wawalayuukana. Eesü taaʼayajaale naaʼin na waneinnua tachiaapa naya süpüla aipüraliinjanain jee nnojoliinjanain ichein naya süchiirua tü namakat. Nnojoipejeʼe aipüralin taya otta icheshi taya süchiirua tü tamakat tachiaapa naya (Roma 7:21-23).

Eesü mojuwaire taaʼin sutuma tü kasa nnojotkalü anain tatuma (Roma 7:24). Soʼu wanee kaʼi tachuntuin nümüin Jehová anain tooʼulaale suulia misioneeroin taya otta anain taleʼejüle tachikuaʼa Finlandiamüin. Shiasaʼa aipaʼa, chapa taya sünain tü outkajawaakat taapüin wanee pütchi atütüleʼeraka taaʼin süpüla ayatüinjatüin taaʼinrüin tü aʼyatawaa aapünakat tamüin otta tachajaainjatüin sukuwaʼipa süpüla tanoutuin takuwaʼipa. Ayatayülia jülüjain taaʼin maaʼulu tü naaʼinrakat Jehová süpüla nusoutuin shiʼipajee tü tamakat nümüin soʼu kaʼikat tia. Taapashaatain analuʼut nümüin Jehová saaʼujee nükaalinjain taya süpüla tanoutuin takuwaʼipa.

Tayakai sümaa Sirkka talatüshii maʼin waya nümaa Jehová süka nuuʼulaatüjüliin waʼyataain nümüin waneepia. Taapüin maʼin analuʼutka nümüin Jehová saaʼujee naapüin tamüin wanee wayuu aikai maʼin apüla taya otta waneepiaka tamaa.

Alüʼütsü süpüla 70 touyase otta süpüla kettaain taya suulia tekirajüin na wawalayuu aneekünakana süpüla ekirajawaa otta süpüla talapalaain naaʼu na wawalayuukana. Nnojotpejeʼe mojuin taaʼin saalinjee tia süka tatüjaain saaʼu shiain kojutuin nümüin Jehová waʼyataale nümüin süka süpüshuaʼa waaʼin sümaa nnojoluin yaletüin waaʼin (Miq. 6:8; Mar. 12:32-34). Süpüla kojutuinjachin watuma Jehová nnojotsü choʼujaain weʼnnaajünüin sutuma tü aʼyatawaa waaʼinrakat nümüin.

Nnojotsü aapünüin süpüshuaʼa tü aʼyatawaa taaʼinrakat süka kojutuleein maʼin taya noulia na waneinnua otta süka wainmain tü kasa tatüjakalü apüleerua. Naapajala shia tamüin Jehová süka muloʼuin nümanee tamüin mayaainjeʼe eein tü kasa mojukuwaʼipatkat tatuma. Anasü tatuma tü aʼyatawaa aapünakat tamüin süka nükaalinjain taya Jehová. Eekalaka süpüla taküjain katchinreein maʼin tü nüpülainkat taaʼu isale tachiki wanee kasa (2 Cor. 12:9).