Naburhwagwa omu mwaka gwa 1955, nyono nye mudorho omu barhabana basharhu omu mwerhu. Nakuliraga hofi n’enyanja omu side ye Finlande omu eneo emenyikene zene nka vile ye Vantaa.

Nyama abatizwaga n’okuba Muhamirizi wa Yehova myaka migeke embere mburhwe. Aliko, Darha aliri apinga okuli arhanayemereraga nyama arhuyigiriza Ebiblia changwa kurhuheka oku mbuganano ze chibaga. Bobola aliri arhuyigiriza enyigirizo z’omusinji ze Biblia amango darha arhaliri ahambuga.

Kurhenga nchili mudorho, naliri nakenga Yehova. Omufano, amango naligwerhe myaka mushanvu, mwalimu wani aligwarhire ebisirani bwenene bulala nalahire kulya verilättyjä (Echapati ye Finlande eli m’omwamba). Efune yage nguma y’aliri yalonza kufungula obunu bwani, n’eyindi fune yage yalifarhire akanya ey’ali ashonda kusindagiza eyo chapati eli m’omwamba omu bunu bwani. Namunyaga akola kanya.

Amango naligwerhe myaka ekumi n’ebiri, darha ava afa. Enyuma wahola, narhondera kuja oku mbuganano ze chibaga. Bene-berhu b’omu chibaga banyereka oku bandagireko n’echola chantabala ngwarhe obwira bukomere haguma na Yehova. Nahwanza kusoma Ebiblia oku bushiru buli lusiku n’okusoma ebitabu byerhu biyumangire oku Biblia. Bulala naligwerhe ogola mwete g’okuyiga ntyo, nabatizwa eyi ngwerhe myaka 14, omu Mwezi gwa 8, 1969.

 Imala amasomo mani ntya, naba painiya mugwasi. Enyuma wa maboso mageke, nahamira ahalikenere bahubiri banene omu Pielavesi, hofi n’ahagarhi k’echihugo che Finlande.

Omu Pielavesi, nabugana n’omunyere wakayinjire kuba mukani muzigirwa, Sirkka. Namusima bwenene bulala aliri w’olugero, mwirhohye analizigire Yehova bwenene. Arhaliri alonza kuchiheba embere arhanaliri asima bwenene ebintu by’omubiri. Rhwembiye rhwalilonzeze kujira okwerhu koshi yi rhukola binene omu kasi ka Yehova, rhwanaliri tayari kukola choshi choshi rhwalihemerwe rhujire. Rhwashabana omu Siku 23, Mwezi gwa 3, 1974. Ahali mpu rhuje omu konje enyuma w’okujira obuhya, rhwahamira e Karttula, ahalikenere bwenene abahubiri b’Obwami.

Oku murhondero g’obuhya bwerhu, Yehova alirhuyerekere okw’agenderera kurhuhereza eby’omubiri rhukenere akaba rhugenderere kuheba enyungu z’Obwami oku nafasi y’oburhanzi. (Mt. 6:33) Omufano, amango rhwaliri omu Karttula, rhurhaligwerhe omutugari. Burhanzi rhwaliri rhwabalama oku kinga. Aliko omu siku z’emboho, emboho yalivire yakabya bwenene. Byalirhuhemere rhugwarhe omutugari yirhugala kuhubiri mw’eyola eneo y’echibaga nzibuzibu. Aliko rhurhaligwerhe efuranga z’okugula omutugari.

Buzira kulangalira, mukulu wani ayinja kurhulambagirira. Arhuha omutugari gwage oku bulonza. Abaga amalire kulipa amatagise mago. Byalirhuhemere kugula esanse yonyine.

Yehova alirhuyerekere okw’aliri ashishikala ebi rhulagirire. Akasi kerhu rhwabo kaliri kuheba enyungu z’Obwami oku nafasi y’oburhanzi.

Omu mwaka gwa 1978 amango rhwaliri oku masomo ma bapainiya, mwalimu werhu muguma k’okuderha Raimo Kuokkanen a arhuheba omurhima oku rhujaze eformilere y’okuja kusoma amasomo me Gileyadi. Bobola rhwarhondera kuyiga echingereza eyi rhugwerhe omuhigo g’okuyeneza ebihemerwe kuja kw’amola masomo. Aliko, omu mwaka gwa 1980, embere rhujaze eformilere y’okuja kw’amola masomo, barhuhamagala oku Beteli ye Finlande. Burhanzi abakozi b’Ebeteli barhakajajize eformilere y’okuja oku masomo me Gileyadi. Aliko rhwalilonzeze kukolera emunda Yehova abwene oku h’ahenja s’arhali aha rhwabo rhuwazize oku h’ahenja. Bobola  rhwayemera eyola envitasiyo. Chiro akaba ntyo rhwagenderera kuyiga echingereza, nkabaga mango maguma nji rhwakahabwa orozo l’okuja kuyiga amola masomo.

Enyuma wa myaka migeke, Ebaraza Lirhambwire lyaderha oku n’ab’omu mulala gwe Beteli bakala bakahwanza kuja kusoma amasomo me Gileyadi. Rhwajaza eformilere ahohan’aho aliko arhali mpu rhurhalisimire Ebeteli. Arhali ntyo ku byaliri! Rhwalilonzeze rhube tayari kuja kurhabala ahakenere oburhabale akaba rhuyeneze ebihemerwe. Barhuyemerera kuja kusoma amasomo me Gileyadi, rhwasoma esomo lya 79 omu Mwezi gwa 9, 1985. Barhurhuma omu chihugo che Colombie.

Omu Colombie, engabane yerhu y’oburhanzi, barhurhuma kukolera oku Beteli. Najira okwani koshi yinkola engabane yani, aliko enyuma w’okuyikola mu mwaka muguma, nayinja n’abona nka bihemere bahindamule engabane yani. Nahema bahindamule engabane yani, b’obwanaliri b’oburhanzi najira ntyo omu kalamo kani. Naho, barhurhuma kukola nka bamisiyonere omu vile ye Neiva omu eneo y’omu Huila.

Buli mango nagendaga nasima akasi k’amahubiri. Amango nali chili mulamba na painiya omu Finlande, nagendaga nahubiri olusiku loshi kuhika egolo. Aliko bunola nkala nshabire, nyono na Sirkka rhunageza olusiku loshi eyi rhuli rhwahubiri. Mango maguma eyi rhwakajire kuhubiri hale n’ahamwaberhu, rhwaliri rhwalala omu mutugari gwerhu. Echola chaliri chapunguza oku lugenzi rhwakajirire, n’okurhuma rhwagala kushuba kulamukira omu mahubiri.

Omu kasi k’obumisiyonere rhwalishubire kugwarha obusime nk’obu rhwaligwerhe embere amango rhwaliri rhwahubiri omu eneo. Echibaga cherhu chachiyongera, bene-berhu na bali-berhu b’omu Colombie baligwerhe obukenge, obuzigire, kandi baligwerhe n’eshukrani.

Hofi n’omu eneo yerhu omu vile ye Neiva, haliri amavile marhalirimw’Abahamirizi. Naliri nachibaza gurhe obukweri bwakahikire eyola munda. Aliko barebele baliri balwisa abantu barhaburhwaga mw’ezola vile. Bobola nasalira oku muntu mulebe wa mw’amola ma eneo abe Muhamirizi wa Yehova. Nawaza oku oyola muntu akwanene kulama omu Neiva y’ayiga okuli. Bobola kandi nasalira kw’enyuma y’okubatizwa ajire amajambere, naho agaluke omu vile yage y’akaburhano aje kuhubiri eyola munda. Nalikwanene kumenya oku Yehova agwerhe enjira nyinja y’okumala ebibazo kulusha oku naliwazize nyono.

Enyuma wa bisanzi bigeke, narhondera kuyiga Ebiblia na musole muguma oyirikirwe Fernando González. Alilamire omu Algeciras, vile nguma mu zilala zirhaliri mw’Abahamirizi. Fernando alikwanene kulambagira bilometre birhalukire 50 y’aja e Neiva oku kasi. Aliri achirheganya bwinja ku buli funzo lyage, anarhondera kuhika oku mbuganano ze chibaga ahohan’aho. Kurhenga omu boso lyage lirhanzi arhondere kuyiga Ebiblia, Fernando aliri agusha abandi bantu b’emwababo n’okuhwanza kubayigiriza ebyaliri ayiga omu funzo lyage lye Biblia.

Fernando amalire myezi ndarhu y’ali ayiga Ebiblia, abatizwa omu Mwezi gwa 1, 1990. Buzinda aba painiya mugwasi. Bulala haliri Muhamirizi muguma waburhwaga omu Algeciras, Ebeteli yakajire yarhuma bapainiya baminuzize mw’eyola eneo.  Omu Mwezi gwa 2, 1992, echibaga chihyahya charhondera mw’eyola vile.

Ka Fernando si alipungwize okuntu aliri ahubiri omu vile yage? Nanga! Amalire kushaba, yewe na mukage bahamira e San Vicente del Caguán, eyola vile nayo erhaliri mw’Abahamirizi. Eyola munda, arhabala kuhwanzisa echibaga chihyahya. Omu mwaka gwa 2002, Fernando ashimikwa kuba mwimangizi w’omuzunguluko, yewe na mukage Olga, bagenderere kulambagirira ebibaga kugera zene.

Kugerera ebyola nachibwenere, nayigire kangana gurhe kuli kw’akamaro okuderha bwinja bwinja omu sala ebirhulazize oku bilolere engabane zerhu z’echiteokrasi. Yehova anajira ebi rhwabo rhurhakagala kujira. Kwanza Yehova yenashalula s’arhali rhwabo.—Mt. 9:38.

Omu mwaka gwa 1990, rhwahabwa engabane y’okulambagirira ebibaga. Engabane yerhu y’okuzungulukira ebibaga yarhondereraga omu vile ye Bogotá, kapitale ke Colombie. Rhwaliyubahire oku rhurhakakolere bwinja eyola ngabane. Nyono na mukani rhuli bantu bantya ntya barhagwerhe buhashe bulebe bw’akaburhano. Kandi rhurha nalikomeere kulama omu vile eli m’orusabayange lunene. Aliko, Yehova ayeneza echilagane chage chili omu Wafilipi 2:13: “Bulala Mungu, oku bulonza bwage bwinja yely’abasisimula, anabaha enyorha n’emisi y’okukola.”

Buzinda, barhurhuma kulambagirira ebibaga by’omu eneo ye Medellín, evile nashambalagako oku murhondero. Abantu beyola munda balikomeere obubandi b’omu barabara omu kuntu burhalichili bwabayubahisa. Omufano, mango maguma naliri nayigiriza muntu mulebe Ebiblia, nayunva embuga bamarhondera kulashana amasasa embuga w’enju nalirimo. Naliri hofi kuchikabula oku budaka, aliko omwanafunzi agenderera kusoma echifungo ey’anarhulere. Amalire kusoma echifungo, ambwira mubabalire hityu arhange ahuluke. Enyuma wabisanzi bilebe, agaluka na bana babiri b’abarhabana barhaziyeneza myaka ekumi aderha ntya kubuyabuya: “Ombabalire, aliko nalikwanene kuja kulonza abana bani.”

Hali amandi mango rhwali omu buhanya. Mango maguma rhwaliri rhwahubiri nju oku nju, mukani ayinja alibirha emunda indi ey’agwerhe buba bunene. Ambwira ntya: hali owandashire. Echola chansomeza bwenene. Aliko, rhwayinja kumenya okw’oyola walashaga arhalilonzeze kulasha Sirkka; s’aliri alasha omulume waliri agera eburhambi bwage.

Buzinda rhwakomera kulama mw’akola kalamo kali m’obubandi b’omu barabara. Rhwaliheberwe omurhima n’Abahamirizi balamire mw’eyola eneo banazigana kuhurana n’ezola hali zibihire bwenene. Rhwaderha okw’akaba Yehova ali arhabala abola bene-berhu, nerhu arhurhabala. Buli mango rhwaliri rhwakenga empanulo z’abashamuka be chibaga ba mw’eyola eneo, rhwaliri rhwachilanga, n’ebindi rhwanabileka omu maboko ma Yehova.

Okuderha okuli, hali ziguma zirhalivire zabiha bwenene nk’oku rhwaliwazize. Mango maguma nayunva omulenge guli nka gwa bakazi babiri baliri barhongana n’okudukangana embuga wenju nali lambagirire. Nta lilonzeze kuja kulola abaliri barhongana eyola mbuga, aliko nyina enju anseza  oku nyinje ndole. Kumbe bakasuku babaliri “barhongana” omu kuyiganya abaturanyi.

Omu mwaka gwa 1997, nahabwa engabane y’okuba mwalimu oku masomo Shule ya Mazoezi ya Kihuduma (Amasomo m’Okukomeza Abantu m’Akasi m’Echiteokrasi). b Buli mango nalisimire kuba oku masomo m’echiteokrasi. Aliko ntali wazize chiro habanakatyu oku nakapatire olukengo lusimisize l’okuyigiriza haba n’eliguma.

Buzinda naba mwimangizi we wilaya. Amango ogola mupango gw’ewilaya guhwa, nagaluka kuja kukola nka mwimangizi w’omuzunguluko. Bobunola, mu myaka erhalukire 30, nagwarhire obusime b’okukola nka mwalimu oku masomo n’okulambagirira ebibaga. Ezola ngabane zoshi zabere shoko y’amigisho minene. Aliko, kurhali kuderha oku buli mango byoshi byalibiyorohere. Lekaga mbabwire.

Imba muntu onachinihira. Echola chantabere kulwisa ehali zikomere. Aliko, mango maguma naliri nagwarha obushiru bunene b’okulonza gurhe rhwakakwiza ebintu omu bibaga. Mango maguma naseza bantu baguma oku bakwanene kuzigirana, n’okulema bayunva amawazo m’abandi. Ech’okusomeza, mw’agola mango munalibulire ezola ngeso zenezo.—Ro. 7:21-23.

Eju y’okufundwa kuyeneza bintu bilebe, naliri nayunva nvunikire omurhima bwenene. (Ro. 7:24) Hali amango nalibwirire Yehova omu sala oku kwakaba kwinja ndeke akasi k’obumisiyonere ngaluke e Finlande. Mw’elyola golo, naja oku mbuganano y’echibaga. Ebi nayigaga kw’eyola mbuganano, byali ntabere mbone oku nalikwanene kubera omu ngabane yani, inangenderere kulwisa obuzamba bwani. Kugera zene, nahumirwe oku murhima n’okuntu Yehova ashubize bwinja bwinja kw’elyola sala lyani. Oku bwindi, ngwerhe eshukrani nene okubona gurhe antabere oku bwinja ngale kulwisa obuzamba bwani.

Nyono na Sirkka rhugwerhe shukrani nene bwenene emwa Yehova oku bona arhuhere olukengo l’okugeza hofi akalamo kerhu koshi omu kasi k’amango moshi. Ngwerhe eshukrani nene bwene emwa Yehova okumpereza omukazi muzigirwa onali mwimana mw’enola myaka yoshi.

Hanola hofi nayeneza myaka 70, ntachikola nka mwalimu oku masomo changwa kulambagirira ebibaga. Aliko, echola chirhambabeze. Bulagurhe? Bulala nchizerere okw’echinasimisa bwenene Yehova, mali amango rhwamamukolera eyi rhugwerhe olugero n’oku mukuza birhurhengere oku murhima guyunjwire obuzigire n’eshukrani. (Mik. 6:8; Mk. 12:32-34) Yirhukenga Yehova, birharhuhemere kugwarha engabane z’akamaro.

Eyi nyibuka engabane naliri nakola, na narhegera oku ntazihabwaga bulala naliri mwinja bwenene kulusha abandi; changwa arhali oku hali buhashe bulebe boshi boshi bw’akamaro naligwerhe. Intabo chiro! Yehova ampere ezola ngabane bulala arhuyerekere olukogo lwage rhurhalikwanene. Ampere ezola ngabane chiro akaba obuzamba bwani. Menyere bwinja oku nagalire kuyeneza ezola ngabane bulala Yehova antabere. Mw’eyola njira, obuzamba bwani bwayerekene obukuze bw’emisi ya Mungu.—2 Ko. 12:9.