Ich sin in 1955 uf te welt khom un ich waar te yingste fon 3 puupe. Ich waar kans am siit fon Finlant kroos ketsoo kep, in een plats woo hayt kekhënt is wii ti Vantaa xtat.

Phaar yoore eep ich uf te welt khom sin, hot mayn mama sich taafe kelos wii Yeehoowa sayn Tsayer. Awer mayn papa hot sich keeche ti woerheet kextelt. Tee hot net kelos mayn mama mit uns xtutiire orer uns tsu te fersamlunge nëme. Soo hot se ti haupste inlërnunge fon te Piipel uns in kelërnt wën mayn papa net ticht waar.

Fon khint aan, wolt ich Yeehoowa imer aan heere. Tsum payxpiil, wii ich 7 yoore alt waar, is mayn leerin pees mit mich kep wayl ich wolt net verilättyjä ese, een sort wafel woo mit pluut kemacht is un woo keweenlich in Finlant is. Mit eene hant, hot se fersuucht mayn munt uf mache; un mit te aner, hot se fersuucht een xtik wafel in mayn munt rin xtope. Tsum klik, hon ich es hin kriit te kawel wech xmayse.

Wii ich 12 yoore alt waar, is mayn papa um khom. Tes weeche, khont ich aan fange tsu te fersamlunge keen. Ti priiter in te kemaynt hon liiplich interes aan mich ketsaycht un tas hot mich keholef tichter pay Yeehoowa khome. Ich hon aan kefang ti Piipel yeete taach leese un unser puplikatsyoone imer xtutiire. Tas hot mich keholef mich taafe lose wii ich 14 yoore alt waar, am 8^te akust fon 1969.

 Wii ich fërtich mit te xuul waar, hon ich klaych aan kefang wii rekulaar pyoneer tiine. Phaar woche tëm noo, hon ich mich kewanert tsu een plats woo ti neetichkheet kreeser waar: Pielavesi, am mite fon Finlant.

In Pielavesi, hon ich Sirkka khëne kelërnt, woo xpeeter mayn liipe fraa kepe teet. Ich hat se aarich kërn weeche sayn teemuut un ticht fraayntxaft mit Yeehoowa. Tii wolt sich net kroos mache orer een kemiitlich leepe hon. Meyer tswaay wolte unser pestes mache fer Yeehoowa tiine un meyer waare wilich fer se mache ekaal was uns ferlangt weyer. Meyer hon uns kehayrat am 23^te mërts fon 1974. Meyer hon khee hoochtsayt rees kemacht; xtats tas, hon mer uns tsu Karttula kewanert, een plats woo ti neetichkheet noch kreeser waar.

Xon am aanfang fon unser hayrat, hot Yeehoowa uns ketsaycht tas eyer unser materyaalixe neetichkheete uf phase teet wën mer sayn Raych im eyerste plats xtele teete. (Mat. 6:33) Tsum payxpiil: in Karttula, hate mer khee khare. Am aanfang, sin mer in tswaayraate kereest. Awer te winter waar mechtich khalt un fer im kroos teritooryum fon te kemaynt preetiche, praychte mer een khare. Es waar toch een propleem kewees: meyer hate net kelt fer een khare khaafe.

Eene taach, wii mer net kewaart hon, is mayn elter pruuter uns pesuuche khom. Tee hot uns sayn khare hërtslich aan kepoot. Ti fersicherung fom khare waar xon petsaalt; meyer praychte ploos kasoliin khaafe. Soo, yets hate mer te khare woo mer praychte.

Yeehoowa hot uns ketsaycht tas eyer sayn teel mache teet un unser materyaalixe neetichkheete fersoriche teet. Meyer miste ploos unser teel mache: tas Raych im eyerste plats xtele.

Wii mer ti Xuul fer Pyoneere in 1978 am mache waare, hot Raimo Kuokkanen, a eene fon unser leerer, uns uf kemuut uns aan pite fer ti Xileat Xuul mache. Soo, hon mer aan kefang ti ënglix xprooch lërne fer uns foer perayte fer tiise xuul mache. Awer in 1980, foer ti petitsyoone xike, sin mer in kelaat kep fer im Petël fon Finlant tiine. In tëne tsayte, waare ti petelite net erlaupt ti Xileat Xuul mache. Awer meyer wolte tiine im plats woo Yeehoowa tenkt peser is, net im plats woo meyer  wolte. Soo hon mer ti inlaatung aan kenom. Awer meyer hon wayter ënglix kelërnt, wayl fiilaycht khente mer ti xans kriin fer tsu Xileat keen.

Phaar yoore xpeeter, hot ti Rechiirente Khërperxaft kesaat tas ti petelite khente sich aan pite fer ti Xileat Xuul mache. Meyer hon klaych ti petitsyoone aus kefiilt, awer net wayl mer untsufriite in Petël waare. Kraat anerste! Meyer wolte ploos uns aan pite fer se tiine woo ti neetichkheet kreeser waar, wën mer aprowiirt weyere. Meyer sin in kelaat kep fer ti Xileat Xuul mache un mer hon uns formiirt aan te 79^te klas, in septemper fon 1985. Unser inxtelung? Kolompya.

In Kolompya, sin mer eyerst in kelaat kep fer in te filyaal tiine. Ich hon fersuucht mayn pestes in te inxtelung mache, awer noo 1 yoer in te filyaal, hon ich kexpiirt tas een ënerung neetich waar. Fer tas eyerste un letste mool in mayn leepe, hon ich ferlangt fer mayn inxtelung ënere. Tan, sin mer in kelaat kep fer se preetiche wii misyoneere in Neiva xtat, in te rechyoon fon Huila.

Ich hat ti preetich aarwayt imer kërn! Wii letich pyoneer in Finlant, hon ich als mool fon moynts frii pis oomts xpeet kepreeticht. Kraat noo unser hayrat, hon ich un Sirkka aach te kanse taach kepreeticht. Wii mer in pletse kepreeticht hon woo wayt wech fon unser haus waare, hon mer als mool in unser khare kexloof. Tas hot uns keholef net tsu lange reese mache; soo khonte mer aach in te neekste taach frii aan fange.

Wii misyoneere, hon mer ti selwich frooheet kexpiirt wii mer am aanfang fon unser tiinst kexpiirt hon. Unser kemaynt is kewakst un ti priiter un xwestere in Kolompya hon respekt, liip un petanklichkheet ketsaycht.

Net tsu wayt wech fon unser inxtelung in Neiva waare xtete woo khee Yeehoowa sayn Tsayer hate. Ich hon mich ketanke kemacht iwer wii ti kuute notisye tsu tiise pletse khome teete. Te propleem waar tas, weeche ti repëlixe soltaate, waare tiise xtete tsu kefeerlich fer ti layt woo net tat uf te welt khom sin. Soo hon ich kepeet tas yemant fon tiise xtete Yeehoowa sayn Tsayer kepe solt. Ich hon ketenkt tas ti persoon mist in Neiva woone fer ti woerheet lërne. Tes weeche, hon ich aach kepeet tas, noom taaf, teet ti persoon kaystlich foran keen un tsurik tsu sayn xtat keen fer se preetiche. Ich hët mise xon kewaart hon tas Yeehoowa een solutsyoon kepe teet woo fiil peser weyer!

Klaych tëm noo, hon ich een Piipel xtuutyum aan kefang mit Fernando Gonzáles, eene yunge man. Tee hot in Algeciras keleept, eene fon te xtete woo khee Yeehoowa sayn Tsayer hat. Yeete woch, is Fernando mee wii 50 kilometer pis Neiva kereest fer se xafe. Tee hot sich kuut foer perayt fer yeete xtuutyum un klaych hot eyer aan kefang tsu te fersamlunge keen. Xon fon te eyerst woch fon sayn xtuutyum aan, hot Fernando anere layt in sayn xtat kesamelt un tëne in kelërnt was eyer in sayn Piipel xtuutyum kelërnt hat.

Fernando hot sich taafe kelos in yanuer fon 1990, 6 moonate noo sayn xtuutyum aan fange. Nochter, hot eyer aan kefang se tiine wii rekulaar pyoneer. Yets, wayl een Yeehoowa sayn Tsayer in Algeciras waar, waar es kenuuch sicherheet fer ti filyaal spetsyaale pyoneere tsu te rechyoon  xike. In feepruer fon 1992, is een kemaynt in tiise xtat uf kemacht kep.

Fernando hot net ploos in sayn xtat kepreeticht. Noo sayn hayrat, hon Fernando un sayn fraa, Olga, sich kewanert tsu San Vicente del Caguán, een aner xtat woo khee Yeehoowa sayn Tsayer hat. Tat hon se keholef een kemaynt uf mache. In 2002, is Fernando in kextelt kep wii sirkuyt superintentent un pis hayt xaft eyer too traan.

Ich hon mit tiise speryens kelërnt wii wichtich es is spetsiifix sin wën mer iwer unser insetsunge peete. Yeehoowa khan mache was mer net kemacht kriin. Am ën, tas is tëm sayn ërntung, net unseres. (Mat. 9:38)

In 1990, hon mer in te reesenter aarwayt aan kefang. Unser eyerste insetsung waar in te haupst xtat fon Kolompya: Bogotá. Meyer hate pang tas tiise insetsung tsu xweyer fer uns weyer. Ich un mayn fraa sin keweenliche layt mit khee ekstra talënt. Un meyer waare net keweent in een kroos xtat woone. Awer Yeehoowa sayn ferxpreche in Filiper 2:13 hot sich fer uns erfiilt: “Kot is Tee, woo soo wii es iim kefalt, is am aych xafe, un kept aych te wunx un ti macht fer in krayfe.”

Xpeeter, sin mer tsu een sirkuyt in kesetst kep in te rechyoon fon Medellín, ticht pay te xtat woo ich am aanfang kexproch hon. Ti layt tat waare soo keweent mit te wyolënts uf te xtroose tas se net pang too temit kriit hon. Tsum payxpiil: een mool waar ich een Piipel xtuutyum am fiire. Too is een xiiseray aan kefang in te auswënich sayt fom haus woo ich pesuucht hon. Ich wolt mich ufm pootem xmayse, awer te Piipel xtutënt hot wayter te apsats ketultich kelees. Wii eyer fërtich mit te leesung waar, hot eyer sich ëntxulticht un is raus kang. Tan is eyer tsurik khom mit sayn 2 kleene khiner un hot mit ketult kesaat: “Ëntxultich mich, awer ich must mayn khiner hoole keen.”

Tas waar net ti eensich kefeerlich situatsyoon woo mer mit kemacht hon. Een mool, wii mer haus tsu haus am preetiche waare, is mayn fraa tsu mich kexprung un sayn kesicht waar ways wii xnee. Tii hot kesaat tas yemant in sayn richtung kexoos hat. Tas hot mich ferxrok! Awer xpeeter hon mer kemërkt tas te man wolt net Sirkka xiise; sayn tsiil waar een aner man woo kans ticht pay Sirkka am laafe waar.

Mit te tsayt hon mer kelërnt mit te wyolënts uf te xtroose um keen. Es waar wunerlich se siin wii unser priiter im plats mit eenliche orer noch xlimer situatsyoone um kang sin, un tas hot uns uf kemuut. Meyer hon ketenkt tas, wën Yeehoowa tëne am helfe waar, teet eyer uns aach helfe. Meyer hon imer acht kep fer ti aanreete fon te elteste, uns kexitst un te rest in Kot sayn hant kelos.

In woerheet, etliche situatsyoone waare net soo kefeerlich wii mer uns foer kextelt hon. Een mool, hon ich een xraayeray keheert. Es hot aus kesiin tas 2 fraae sich naner ferxënt hon in te auswënich sayt fom haus woo ich am pesuuche waar. Ich wolt niks too triwer wise, awer te pewooner hot mich in kelaat tsu sayn hoof keen un ti “tsënkeray” siin. Un weer waare ti 2 fraae? Tswaay papakaye woo ti nochpere noo kemacht hon!

In 1997, waar ich in kesetst wii leerer fon te Xuul fer in te Preetich se Iipe. b Ich hat ti xuule fon te Orkanisatsyoon imer kërn, awer ich hat mich nii foer kextelt te priwilëj kriin fer een leerer sin.

Xpeeter, hon ich wii tistrikt superintentent ketiint. Noo heyer, wën ti Orkanisatsyoon noo kelos hot ti tistrikt superintentente penutse, sin ich tsurik tsu te sirkuyt aarwayt kang. Soo tuun ich xon mee wii 30 yoore wii leerer un superintentent tiine. Ich hon tiise insetsunge aarich kërn un tii hon mich fiile seechen keprung. Awer tas waar net imer laycht. Los mich tas aus leye.

Ich hon een xtark personaliteet. Es is woer tas es mich keholef hot torich ti xweyere tsayte. Awer als mool, waar ich tsu xtreng wii ich ti sache in te kemaynte korikiirt hon. Ich hon xon, tsum payxpiil, anere xtark aan kereet tas se solte liiplich un net xtreng mit te anere sin; awer te propleem waar tas, in tiise xtune, waar ich selepst xtreng un net liiplich. (Rom. 7:21-23)

Weeche mayn feeler, hon ich mich als mool kans oone muut kexpiirt. (Rom. 7:24) Een mool, hon ich tsu Yeehoowa kepeet un kesaat tas es peser fer mich weyer mayn aarwayt wii misyoneer lose un tsurik tsu Finlant keen. Te selwiche taach, sin ich tsu een fersamlung kang. Was ich in te fersamlung keheert hon, hot mich sicher kelos tas ich must in mayn insetsung plaype un wayter keeche mayn imperfektsyoone khëmpfe. Ti taytlich antwort woo Yeehoowa mich kep hot, tuut mich pis hayt tiif aan krayfe. Ich tuun Tëm aach imer tanke wayl eyer mich keholef hot torich mayn xwacheete triwer wech khome.

Ich un Sirkka sin aarich petanklich tsu Yeehoowa wayl eyer uns te priwilëj kep hot fer neekst unser kanse leepe in te fol tsayt tiinst xafe. Ich tanke aach imer Yeehoowa wayl eyer mich soo een liiplich un troy fraa kep hot torich al tiise yoore.

Klaych wëre ich 70 yoore alt; tes weeche, tuun ich noo lose wii leerer un superintentent tiine. Awer ich sin net traurich too teweeche. Weest tuu warom net? Wayl ich sin mich sicher tas was te meyerst Yeehoowa eere tuut, is tas mer tëm teemuutich tiine un loope wayl unser hërts fol liip un petanklichkheet is. (Mik. 6:8; Mar. 12:32-34) Fer Yeehoowa eere, prayche mer net een wichtich flicht hon.

Ich hon fiile insetsunge kriit woo ich aarich kërn hat. Ich hon kemërkt tas ich se kriit hon, net wayl ich peser wii ti anere waar orer weeche een ekstra apiliteet. Kans anerste! Yeehoowa hot mich tiise insetsunge kep weeche sayn unfertiint kuutheet. Tee hot mich tiise priwilëje kep opwool mayn xwacheete. Ich sin mich sicher tas ich se ploos erfiilt kriit hon weeche Yeehoowa sayn hilef. Soo, mayn xwacheete hon Kot sayn kraft keert. (2 Kor. 12:9)