Neyana ngà turi ta 1955. Sakan i pinaka-urian ta tallu nga lalaki. Ziminakal ngà ta southern nga parte na Finland nga aranni ta bebay. Magalan ngana yatun nga lugar tu siudad na Vantaa.

Nabbalin tu Saksi ni Jehova i yenà piga dagun nige ngà nga neyana. Ngem opposer i yamà, yatutta manaki na nga i-Bible study nakami na yenà onu ivulu nakami ta study. Yatutta nu awan si yamà, tari nga ituddu nikami na yena mi i simple ira nga kinakurug ta Biblia.

Abbing ngà pagalaman, kanayukku ngana nga tuttulan si Jehova. Turi ta pitu i dagukku, fermi i poray nio na mestrà gafu ta manaki ku i kuman tu verilättyjä. Makan yatun ta Finland nga daga nga kingngua da tu pancake. Pinazzi na i muka ku tapus finersa na nga itallung ta simu ku i tinidor nga egga i pancake na. Ngem nitafe ku i lima na.

Turi ta 12 anios ngà, natay i yamà. Kabalin natun, makangay ngà ngana ta study ira. Masippo niakan i brother ira ta kongregasion. Nakoffun yatun nio tapenu mapprogreso ngà ta espiritual. Pinegafanakku nga bibbigan i Biblia anna gigiammuan i publikasiottam ira. Megafu tatun nga makasta nga rutinà ta paggigiammu, na-baptize ngà turi ta Agosto 8, 1969 ta edad nga 14.

Kabalikku nga nagiskuela, nappayunir ngà. Ta unag laman na piga ligguan, nagali ngà ta  lugar nga mas dakal i pakawagan, ta Pielavesi, nga aranni ta tangnga na Finland.

Ta Pielavesi, nakilalà i babay nga nabbalin tu iddeddu ku nga atawa, si Sirkka. Nagustuakku yayya gafu ta mapakalinno yayya anna makasta i espiritualidad na. Ari na kayà i mabbalin tu sikat onu mariku. Parefu nga kakayà mi nga passerbian si Jehova ta adde na mawayya mi maski anni paga i pribilehio nga meyawa nikami. Nakkasal kami turi Marso 23, 1974. Ngem imbes tu ma-honeymoon, nappa-Karttula kami insigida ta mas dakal i pakawagan tari.

Namegafu turi ta pagatawa mi, nipasingan ni Jehova nga yayya i bahala ta pakawagammi, basta pagolluammi i Pappatulan na. (Mat. 6:33) Angngarigan na ta Karttula, awan tu takemi. Ta gafu na, mabbisi-bisikleta kami laman. Ngem nu winter, talaga managga ka ta lammin tari. Mawag mi i takay tapenu malayyagayyammi i alalawa nga teritoria na kongregasion. Ngem awan tu paggatammi tu takay.

Ngem gavva nga nabbisita nikami i manung ku. Kinagi na nga iyawa na i takay na nikami. Napagan ngana i insurance natun. Sikami ngana laman i bahala ta gasolina. Yayya nga egga ngana i takemi.

Nipasingan nikami ni Jehova nga yayya i bahala ta pakawagammi ira, basta maffokus kami laman ta intereses na Pappatulan.

Habang map-Pioneer Service School kami turi ta 1978, pinagaram nakami na tadday ta instruktor mi nga si Raimo Kuokkanen a nga magaplay kami ta Gilead. Yayya nga pinegafanammi i maggigiammu tu English ta goal mi talaga yatun. Ngem turi ta 1980, ari kami paga nga naka-apply eh inagaladdakami nga masserbi ta branch office ta Finland. Tatun nga tiempo, ari nga mag-Gilead i Bethelite ira. Ngem kayà mi i masserbi nu sitaw i pamaddoban ni Jehova nikami, ari ta nu sitaw i ikaya mi. Yatutta nab-Bethel kami. Ngem nituloy mi lapa i maggigiammu tu English ta baka laman egga saw i chansa nga mag-Gilead kami.

Nappasa i piga dagun, kinagi na Manangngal nga Baggi nga puede ngana nga mag-Gilead i Bethelite ira. Insigida kami nga nagaplay, ngem ari nga megafu ta manaki mi ngana ta Bethel. Kakayà mi lagu tari eh! Kayà mi laman i mabbalin tu available nu sitaw mas dakal i pakawagan,  basta kualipikadu kami tatun. Nagalakkami nga mag-Gilead anna nag-graduate kami ta meka-79 nga klase turi ta Setiembre 1985. Ta Colombia i asayment mi.

Ta Colombia, neyasayn kami ta branch office. Kingnguà i adde na mawayyà ta asayment ku. Ngem kabalin na tanga-ragun, natageno ku nga kayà ku na labbi gapa i duma. First time nga nikiddò nga manguli nakuan i asayment ku. Tatukku laman nga kingngua yatun ta interu pattolè. Turi kua, neyasayn kami nga mam-missionary ta siudad na Neiva ta rehion na Huila.

Kakayà ku i mamministerio. Turi ta single ngà paga nga payunir ta Finland, ummumma ngà nga mallawan adde ta gaba-gabi ngana. Turi ta bagu kami gapa nga magatawa ni Sirkka, whole day kami nga map-preach. Nu ararayyu i teritoria mi ira, makkatrug kami ngana laman ta takay nu karuan. Megafu tatun, makatipid kami ta oras na pabbiahe mi anna ummumma kami nga makapegafu ta tumunug nga aggaw.

Megafu ta pammisionero mi, nanoli i ayayya mi ta pamministerio. Ziminakal i kongregasiommi. Minarrespeto, minangngaya, anna minangngappresia i wawwaragi nga Colombian.

Egga ira i ili aranni ta Neiva nga awan tu Saksi. Agga-nono ku nu kunnasi nga makadde tatun ira nga lugar i mapia nga dumug. Ngem megafu ta maggegerra i gerilya ira, ari nga safe yatun para ta dayu ira. Yari tu nipakimallo ku nga egga nakuan i mas-Saksi tatun ira nga lugar. Nanono ku nga mawag tu maddian ta Neiva yatun nga tolay tapenu mannammuan na i kinakurug. Yayya nga nipakimallo ku gapa nga kabalin nga ma-baptize yatun nga tolay eh mapprogreso nakuan yayya ta espiritual tapus manoli ta diadda tapenu map-preach. Ngem egga balo i mas makasta nga solusion ni Jehova.

Ari nabbayag, nakapegafu ngà tu Bible study ta kabataan nga si Fernando González. Taga-Algeciras yayya, tadday ta ili ira nga awan tu Saksi. Kada ligguan, mabbiahe si Fernando tu maturu 50 nga kilometro tapenu mattrabahu ta Neiva. Kada mab-Bible study kami ni Fernando, naka-review yayya tu mapia anna insigida gapa yayya nga nagatende ta ngamin nga study. Ta gafu pagalaman na paki-Bible study ni Fernando, agalan na ngana i totolay ta diadda tapus ituddu na ta nira i nagigiammu na.

Annam nga vulan i nappasa ta paki-Bible study ni Fernando, na-baptize yayya turi ta Enero 1990. Turi kua, nar-regular pioneer yayya. Megafu ta egga ngana i tadday nga Saksi ta Algeciras, safe ngana para ta branch office nga mangiyasayn tu special pioneer ira tari. Turi ta Pebrero 1992, nabuu i tadday nga kongregasion tatun nga ili.

Ta ili da laman kari nga nallayyagayya si Fernando? Ari. Kabalidda nga nakkasal ni Olga, nagali ira ta San Vicente del Caguán, tadday paga nga ili nga awan tu Saksi. Nanguffun ira tari tapenu mabuu i tadday nga kongregasion. Turi ta 2002, natunno si Fernando bilang manangngal ta sirkito. Adde sangawe, mat-traveling work lagapa ira na atawa na.

Megafu tatun ira nga ekspiriensa, nagigiammù nga kuruga importante nga ipakimallo tam  i espesipiko ira nga gannug nga konektadu ta asayment tam ira. Makua ni Jehova i ari tam nga makua. Yayya mabba gare i maggatab, ari tu sittam.—Mat. 9:38.

Turi ta 1990, nat-traveling work kami. I ollu nga sirkito nga binisita mi ay ta kabisera na Colombia, i siudad na Bogotá. Mavurukkami ta asayment mi. Sissimple kami laman gare na atawà anna awan tu espesial nga talento mi. Ari kami gapa nga napenam nga maddian ta magulu nga siudad. Ngem sinuppal ni Jehova i promesa na ta Filipos 2:13: “I Dios i kanayun nga egga nikamu nga mangiyawa ta pakkaraga anna pakawayya nu nga mamarulo ta uray na.”

Turi kua, neyasayn kami ta tadday nga sirkito ta Medellín, i siudad nga nakagì ta gafu. Sanay nga sanay i totolay tari ta gulu yayya nga gitta na awan ngana laman nira yatun. Angngarigan na, habang mab-Bible study ngà, egga ira i napparalattug ta lawan na balay na Bible study. Mallakág ngà ngana nakuan ngem itulu-tuloy lagapa na Bible studỳ nga bibbigan i parapo nga gitta na awan laman ta nisa i mesissimmu. Kabalin na nga nabbibbig, nagexcuse yayya tapus nallawan. Manganannuan laman i nappasa, nanoli yayya kavulu i dua nga abbing tapus kakkalmadu nga kinagi na, “Pasensia ka na ah, ina ku lang yari ána ku.”

Ari laman tu yatun i tiempo nga maggi natay kami. Mittan, habang ma-house-to-house kami, nakkara-karela i atawà nga minaranni ta nio tapus maguzzuzzing yayya. Kinagi na nga egga i nappalattug nisa. Nagavvatan ngà tatun. Ngem nakannammuammi gabbalaman nga ari tu si Sirkka i target na nappalattug. Puntirian na i lalaki nga nattalebag ta biko na.

Ta pappasa na tiempo, nasanay kami ngana lagapa ta gulu-gulu tari. Napagaram kami ta tuyag na wawwaragi tari nga nappasa ta situasion ira nga kagitta na nappasammi anna nu karuan mas grabe paga lagu. Nanono mi nga nu uuffunan ira ni Jehova, uffunan na gapa sikami. Kanayummi nga sinuttul i tabarang na elder ira, nagimmugug kami, anna nitalo mi ngana kani Jehova i ganna-gannug.

Ngem siempre, ari gapa tu ngamin nga situasion nga abbo mi tu delikadu ay talaga delikadu. Mittan, egga i naginnà nga gitta na dua nga babay nga makkakukkulle ta lawan na balay na householder. Ari ngà interesadu nga maggiraw tu dama, ngem inagalan nà na householder ta terrace da. Kustu iningammi nu sinni i maddama, dua laman balo tu parrot nga paparigadda i karruba da.

Turi ta 1997, natunno ngà nga mabbalin tu instruktor ta Ministerial Training School. b Kanayukku nga appresian i pagatende ta teokratiko ira nga eskuela. Ngem kakku vuluvuga na-imagine nga meddan ngà tu pribilehio nga manuddu tatun.

 Turi kua, nabbalin ngà tu district overseer. Ngem turi ta neyemmang yatun nga unnug, nabbalin ngà uli tu circuit overseer. Yayya nga ta maturu tu 30 nga dagun, na-enjoy ku i mabbalin tu instructor anna traveling overseer. Aru nga bendision i nalawa ku megafu tatun ira nga asayment. Ngem egga gapa ira i tiempo nga nakkaproblema ngà. Istoriakku yatun.

Prangka ngà. Nakoffun yatun niakan ta mariga ira nga situasion. Ngem egga ira i tiempo nga sobra i komfiansà ta baggì ta kayà ku nga itunung i ganna-gannug ta kongregasion. Mittan, sobra i sikan na nono ku nga tabarangngan i karuan nga mabbalin nakuan ira tu minangngiddu anna rasonable. Ngem ammum nu anni i kaggalo tatun? Tatun mismu nga tiempo, sakan i ari nga nangipasingan ta kunnatun ira nga ugali.—Roma 7:​21-23.

Megafu ta pakkurangakku ira, egga ira i tiempo nga fermi nga nakkafi i nono ku. (Roma 7:24) Mittan, kinagì kani Jehova ta pakimallo ku nga mas makasta siguru nu iyemmakku ngana i pam-missionary anna manoli ngà ngana laman ta Finland. Ta gabi natun, minay ngà ta study. Nakumbinsi ngà ta naginnà ta study nga mas makasta nu itulu-tuloy ku i asayment ku anna ikagumakku nga pakastan i ugalì. Adde sangawe, makalua ngà lagapa nu manono ku nga sinabbag ni Jehova yatun nga pakimallo ku. Fuera tatun, kuruga ipappabalo ku gapa nga pinasa-pasensian nà nga uffunan tapenu malabanakku i pakkafiakku ira.

Fermi i appappabalo mi ni Sirkka kani Jehova ta pribilehio mi nga usan i halus interu nga pattolemi nga masserbi ta full-time. Mappappabalo ngà gapa kani Jehova ta niddan nà tu minaggiddu anna matalo nga atawa.

Aranni ngà ngana nga mas-70 anna mawawakku na saw i pribilehiò bilang field instructor anna traveling overseer. Ngem ari ngà nga maraddam. Ngatta? Mangurug ngà gare nga medayaw tam si Jehova nu mapakalinno ittam anna nu dayawattam yayya megafu ta napappannu i futu tam tu aya anna pappabalo nisa. (Mik. 6:8; Mar. 12:​32-34) Ari tam nga mawag i pribilehio tapenu medayaw si Jehova.

Nu nonopakku i nabbalin ira tu asayment ku, makagì nga nalawa ku danatun ari nga megafu ta mas malalaki ngà ta tanakuan. Ari ngà gapa napeggan tu kunnatun ira nga pribilehio megafu ta egga i espesial nga abilidad ku. Si Jehova i nangiyawa niakan ta kunnatun ira nga asayment megafu ta ari mepappangngo nga allo na. Niddan nà tu kunnatun ira nga pribilehio maski nu aru i pakkafiakku. Ammù nga nakuà laman danatun nga asayment ku ta uffun ni Jehova. Natageno ku i sikan na Dios megafu ta pakkafiakku ira.—2 Cor. 12:9.