A yẹ omẹ evaọ 1955, yọ usu emezae esa nọ ọsẹgboni mẹ o yẹ na, mẹ họ ọmaha. Ma jẹ rria ẹwho jọ nọ ọ kẹle abade evaọ obọ Finland, nọ a bi se Vantaa enẹna.

Imikpe jọ taure a te ti yẹ omẹ, oni mẹ o ro kurẹriẹ jẹ họ-ame evaọ egagọ Isẹri Jihova. Eva e dha ọsẹ mẹ gaga. Ọ jẹ tubẹ rọwo nọ oni mẹ o wuhrẹ omẹ avọ inievo mẹ Ebaibol ho, yọ ọ rọwo nọ ọ wha omai kpohọ ewuhrẹ hẹ. Rekọ ọ jẹ hai wuhrẹ omai Ebaibol nọ ọsẹ mẹ ọ gbẹ rrọ uwou ho.

No emaha ze, mẹ rẹ gwọlọ ru oware nọ o rẹ dha Jihova eva ha, a tẹ be make gwọlọ gba omẹ họ. Okenọ mẹ jọ ikpe ihrẹ, nọ a kẹ omẹ ikeki ekpakpala jọ nọ a re se verilättyjä evaọ obọ isukulu, mẹ rọwo riẹe he, keme azẹ a jẹ hai ro ru ei. Eva e dha iticha mai gaga. O te je si egba mẹ re o rovie unu mẹ, avọ efọko nọ ọ riẹe obọ nọ ọ gwọlọ ro fi ikeki na họ omẹ unu. Rekọ me lele i rie thikra te epanọ me ro gele efọko na noi obọ.

Ọsẹ mẹ o whu okenọ mẹ jọ ikpe ikpegbivẹ. Me te ti mu ewuhrẹ họ ẹnya. Oghẹrẹ nọ inievo ukoko na a jẹ hai ro dede omẹ rehọ je fiobọhọ kẹ omẹ, o lẹliẹ omẹ kru egagọ Ọghẹnẹ ga. Me te mu Ebaibol họ ese kẹdẹ kẹdẹ, je se ebe ukoko na. U te ru nọ mẹ rọ họ-ame okenọ mẹ jọ ikpe ikpegbene, evaọ edẹ eree Aria, 1969.

 Nọ mẹ nwani nwrotọ no isukulu no, me te mu ọkobaro oke-kpobi họ. Nọ emeka jọ e vrẹ no, mẹ tẹ kwa kpohọ oria nọ a jọ mae gwọlọ iwhowho-uvie, evaọ ẹwho nọ a re se Pielavesi nọ ọ kẹle obọ udevie orẹwho Finland.

Obọ Pielavesi mẹ jọ nyaku oniọvo-ọmọtẹ nọ mẹ rehọ. Odẹ riẹ Sirkka. Uruemu riẹ o were omẹ gaga. O wo omaurokpotọ, yọ ọ rẹ gwọlọ ru oware nọ o rẹ were Jihova ẹsikpobi. Ọ rẹ gwọlọ ru re ahwo a riẹe he, yọ ọ rẹ gwọlọ ikpeware he. Epanọ mẹ gwọlọ rehọ uzuazọ mẹ kpobi ru iruo Jihova, ere ọyomariẹ ọ gwọlọ ru re. Ma gwọlọ nọ ma re ru iruo kpobi nọ a kẹ omai evaọ ukoko na. Ma rọo evaọ edẹ udhegbesa Asa, 1974. Nọ ma rọo no, ma kpohọ oria jọ nyae reakpọ kuoma tao ho. Obọ Karttula nọ a jọ mae gwọlọ etausiuwoma ma kpohọ ovavo.

Anwẹnọ ma rọ rọo no Jihova o bi ro dhesẹ kẹ omai nọ ọ rẹ rẹrote ohwo kpobi nọ ọ rọ Uvie riẹ karo. (Mat. 6:33) Okenọ ma jọ obọ Karttula ma wo omoto ho. Ebasikoro ọvo ma jẹ hae dhẹ. Rekọ evaọ ezi iso, whọ tẹ rrọ otafe, ekpahe i re kpe owhẹ whu no. Ma gwọlọ omoto nọ ma rẹ dhẹ kpohọ eria ithethabọ nyae ta usi uwoma. Rekọ ma wo ugho nọ ma rẹ rọ dẹ omoto ho.

Ẹdẹvo idudhe, oniọvo mẹ ọkpako ọ tẹ nyaze te ruẹ omai. Ọ tẹ kẹ omai omoto riẹ. O ru ebe omoto na no. Oware nọ ma re ru ọvo họ, epẹtiro nọ ma rẹ dẹ fihọ iẹe. Ma nwai wo omoto nọ ma te dhẹ no.

Ma ruẹ vevẹ nọ Jihova ọ ruẹrẹ oma kpahe inọ ọ rẹ rẹrote omai, thakpinọ ma rọ iruo Uvie na karo.

Evaọ okenọ ma kpohọ Isukulu Ekobaro evaọ 1978, Brọda Raimo Kuokkanen a omọvo iwuhrẹ mai, ọ vuẹ omai nọ ma fili efọmo Isukulu Giliad. Fikiere ma te mu ẹvẹrẹ Oyibo họ ewuhrẹ re a sai zizie omai. Rekọ evaọ ukpe 1980, re ma te ti fili efọmo Isukulu Giliad, a te se omai kpohọ uwou ogha Finland. Oke yena ohwo nọ ọ rrọ Ebẹtẹle ru iruo o re kpohọ Giliad he. O make rrọ ere ghele na, ma gwọlọ nọ iruo nọ Jihova ọ kẹ omai ma re ru, orọnikọ enọ e were  omai ọvo ho. Ere mẹ avọ aye mẹ ma ro kpohọ Ebẹtẹle. Rekọ nọ ma maki kpohọ Ebẹtẹle no, ma gbe je wuhrẹ Oyibo, ariẹse he nọ uvẹ Giliad u je rovie ẹdẹfa, ma vẹ sae nya.

Nọ imikpe jọ e vrẹ no, Utu Ẹruorote na o tẹ ta nọ inievo nọ e rrọ Ebẹtẹle a sai fili efọmo Giliad. Ma raha oke he, ma tẹ nwani fili efọmo na. Rekọ orọnọ fikinọ iruo Ebẹtẹle e were omai hi ma ro fili efọmo na ha. Iruo nọ ma jọ Ebẹtẹle je ru e jẹ were omai oma. Rekọ ma gwọlọ kpohọ oria nọ a jọ mae gwọlọ ahwo nọ a re ru iruo Uvie na. A gine se omai kpohọ isukulu Giliad na. Eklase avọ udhosa gbe ikpegbizii ma jọ. Nọ ma nwrotọ no evaọ Azie 1985, a te dhe omai kpohọ obọ Colombia.

Uwou ogha nọ o rrọ obọ Colombia a ta nọ ma jo ru iruo. Me je ru utho ẹgba mẹ evaọ iruo na, rekọ nọ me ru iruo na te ukpe no, mẹ tẹ ta nọ jọ a kẹ omẹ oghẹrẹ iruo efa. Oyena o jọ orọ ọsosuọ evaọ uzuazọ mẹ nọ mẹ rọ ta nọ a kẹ omẹ oghẹrẹ iruo efa. Ere a ro vi omẹ avọ aye mẹ kpohọ iruo imishọnare evaọ okpẹwho nọ a re se Neiva nọ o rrọ ubrotọ Huila.

No anwọ uzoge mẹ ze usi uwoma o rẹ rọ were omẹ. Okenọ mẹ jọ ọkobaro oke-kpobi evaọ obọ Finland nọ me ri wo aye he, ẹsejọ mẹ rẹ ta usi uwoma no ohiohiẹ te owọwọ. Nọ me wo aye no, epọvo na, mẹ avọ aye mẹ ma je ru. Nọ ma te kpohọ eria nọ i thabọ, ẹsejọ omoto mai ma rẹ wezẹ. U je ru nọ ma jẹ hae rọ kaki te obonọ ma be nya, jẹ kaki mu usi uwoma họ.

Nọ ma mu iruo imishọnare họ no, usi uwoma na u te je mu omai họ ẹwere wọhọ epanọ o jẹ were omai okenọ ma mu ọkobaro họ obọ. Ebuebu ukoko mai u je bu, yọ inievo obọ Colombia na a jẹ kẹ omai adhẹẹ, a you omai, yọ eware nọ ma je ru e jẹ da ae ẹro fia.

Ewho jọ nọ e kẹle Neiva nọ ma jọ na, uvumọ Osẹri Jihova ọ jarai hi. Mẹ jẹ ruawa inọ ‘Kọ ẹvẹ usi uwoma u ti ro te ewho nana?’ Ewho na e jọ oria nọ ọrara ọ rẹ sae rria ha, keme ozighi ọ jarai. Ahwo a jẹ họre egọmeti. Fikiere mẹ tẹ lẹ se Jihova inọ jọ ohwo jọ ọ jọ ewho yena zihe ruọ Osẹri Jihova. Me roro nọ re ohwo jọ ọ sae jarai kurẹriẹ, kiyọ ọ rẹ nyaze obọ Neiva nọ ma rrọ na, a vẹ jọ obonẹ ta usi uwoma kẹe. Mẹ tẹ jẹ lẹ nọ, ohwo na ọ tẹ họ-ame no, jọ o kruga evaọ ukoko na, o ve je zihe kpobọ ẹwho riẹ nyae ta usi uwoma. Kpakọ nọ me bi roro eyena kpobi na, Jihova ọ riẹ oware nọ o ti ru, nọ u ti woma vi onọ me roro na kpekufiẹ.

U kri hi, me te mu ọmọzae jọ nọ a re se Fernando González Ebaibol họ ewuhrẹ. Ọ jẹ rria ẹwho nọ a re se Algeciras, nọ ọ jọ usu ewho nọ Osẹri Jihova ọvo ọ rrọ họ. Fernando ọ jẹ hae ziọ obọ Neiva ti ru iruo, yọ no Algeciras rite Neiva u thabọ vrẹ ikilomita udhuvẹ-gbikpe hayo emaele ọgba. Ọ jẹ hae ruẹrẹ oma kpahe kẹ uwuhrẹ na gaga, yọ u kri re o te ti mu iwuhrẹ ukoko kpobi họ ẹnyaze he. No oka ọsosuọ nọ me ro mu ei họ ewuhrẹ na ọ jẹ hai ro koko ahwo họ nọ o  te te uwou, o ve wuhrẹ ai eware nọ mẹ rehọ Ebaibol wuhrẹ iẹe.

Nọ me wuhrẹ iẹe te emerae ezeza no, ọ tẹ họ-ame evaọ Ọvo 1990. O te mu ọkobaro oke-kpobi họ. Nọ ukoko o ruẹ nọ Osẹri Jihova jọ ọ be sae rria Algeciras, a te vi ekobaro obọdẹ kpohọ obei. Evaọ Ava 1992, a tẹ rọ ukoko mu ẹwho na.

Kọ ẹwho yena ọvo Fernando ọ jọ ta usi uwoma? Ijo. Nọ o wo aye no, tei te aye riẹ a tẹ kwa kpohọ ẹwho ọfa nọ a re se San Vicente del Caguán nọ Osẹri Jihova ọvo ọ rrọ họ. Ẹmẹrera na, a tẹ jẹ rọ ukoko mu etẹe. Ukpe 2002, a tẹ rọ Fernando mu ọsẹro okogho. Avọ aye riẹ Olga a gbẹ rrọ iruo ọsẹro okogho na rite inẹnẹ.

Oware nana o lẹliẹ omẹ riẹ nọ u wuzou gaga re ma hae lẹ kpahe iruo kpobi nọ a kẹ omai evaọ ukoko na. Jihova ọ sai ru oware nọ ma rẹ sai ru hu. Ọye o wo iruo ivuẹvu na, orọnọ omai hi.—Mat. 9:38.

Evaọ 1990 a tẹ rọ omẹ mu ọsẹro ọnyawariẹ. Okogho ọsosuọ nọ ma rri o jọ Bogotá, yọ Bogotá họ okpẹwho esuo Colombia. Udu epanọ ma ti ro ru iruo na u je bru omai. Mẹ avọ aye mẹ ma rrọ ahwo nọ a je ru ikpeware jọ vẹre he, yọ orọnikọ ma nwani wo eriariẹ gaga ha. Ma re rria okpẹwho nọ ahwo a re jo zurie kpenẹ avọ enẹ ẹdẹvo gbe he. Rekọ Jihova o fiobọhọ kẹ omai wọhọ epanọ ọ ta evaọ obe Ahwo Filipai 2:13 inọ: “Ọghẹnẹ họ ọnọ ọ be kẹ owhai ẹgba nọ wha re ro ru eware nọ e rẹ were iẹe, ọ be kẹ owhai isiuru na gbe ogaga nọ wha re ro ru ere.”

Nọ ma ru te oria jọ no, a te dhe omai kpohọ okogho ọfa evaọ obọ Medellín, ẹwho nọ mẹ fodẹ nọ me je mu iku na họ na. Ohọre nọ a rẹ jọ iyẹrẹ họre o reria ahwo obei oma no. Ozọ u gbe bi mu ahwo ho nọ u te du lahwe. Ẹdẹ jọ nọ me je wuhrẹ ohwo jọ obe evaọ uwou riẹ, ere a ro mu iresa họ ẹsa evaọ obọ otafe. Kiọkọ omojọ re me kiẹzẹ otọ, rekọ ohwo nọ me je wuhrẹ na o bi se edhe-ẹme na vrẹ ọvo. Ọ daezọ họ. Nọ o se edhe-ẹme na no, ọ tẹ ta nọ o bi kpobọ otafe re ọ nyaze. Nọ o zihe ze, avọ emọ ivẹ nọ ọ rehọ ziọ uwou na. Ọ tẹ be ta nọ: “Eva e dha owhẹ hẹ, emọ mẹ mẹ nyae rehọ na.”

Eware itieye e via kẹ omai oke ofa. Ẹdẹ jọ nọ ma jẹ ta usi uwoma no uwou ruọ uwou, aye mẹ ọ tẹ dhẹ bru omẹ ze, bi nuhu kpakpakpa. Anọ ohwo jọ ọ sa riẹ owọ. Udu o tẹ nawo omẹ. Uwhremu na ma tẹ ruẹ nọ orọnikọ aye mẹ a sa ha, rekọ ọzae jọ nọ ọ jọ akotọ riẹ ọye ohwo jọ ọ jẹ sa.

Nọ u te oria jọ no, ma te kru udu mai ga. Ozọ u gbe je mu omai gaga ha, keme ma ruẹ nọ inievo nọ e rrọ ẹwho na a kru udu rai ga dede nọ a ruẹ eware nọ e ga vi enọ ma be ruẹ na no. Ma tẹ ta nọ otẹrọnọ Jihova ọ kẹ rai ẹgba nọ a bi ro thihakọ eware nana, ọ te kẹ omai ẹgba re. Ma je lele ehrẹ nọ ekpako na a kẹ omai ẹsikpobi. Ma jẹ yọroma gaga, ma tẹ jẹ rẹroso Jihova.

Ẹsejọ oware nọ ozọ riẹ u re mu omai nọ o te via, o rẹ via ha. Ẹdẹ jọ me je yo edo nọ o  wọhọ edo eyae ivẹ nọ e be whọ evaọ otafe uwou nọ me bi jo wuhrẹ ohwo obe. Mẹ kpama inọ mẹ rẹ nyai rri ẹwhọ na ha, rekọ ohwo nọ me je wuhrẹ na o te si omẹ kpobọ aro uwou na re mẹ ruẹ oware nọ o be via na. Kpakọ ekwẹ ivẹ jọ ae a be ya ahwo jọ nọ a be rria etẹe na.

Evaọ ukpe 1997, a rọ omẹ mu ohwo nọ o re wuhrẹ inievo nọ e ziọ Isukulu Ewuhrẹ Odibọgba. b Isukulu ukoko e rẹ were omẹ oma nọ mẹ tẹ nya. Rekọ me roro ẹdẹvo ho inọ a te rọ omẹ mu ohwo nọ o re wuhrẹ ahwo evaọ isukulu ukoko na jọ. Iruo na e were omẹ gaga.

Nọ oke jọ o vrẹ no, a tẹ rọ omẹ mu ọsẹro ubrotọ. Uwhremu na nọ ukoko u si ahwo no iruo ọsẹro ubrotọ no, a tẹ wariẹ rọ omẹ mu ọsẹro okogho. Mẹ jọ ọsẹro okogho gbe ọnọ o re wuhrẹ ahwo evaọ Isukulu Ewuhrẹ Odibọgba na vrẹ ikpe ọgba. Irere buobu i te omẹ evaọ iruo na. Rekọ orọnọ ẹsikpobi eware e jọ lọlọhọ họ. Eme o lẹliẹ omẹ ta ere?

Mẹ yọ ohwo nọ ọ rẹ rọ udu dhe iruo, yọ uruemu nana o lẹliẹ omẹ thihakọ ebẹbẹ buobu. Rekọ ẹsejọ me re ru vi oma. Omoware kpobi nọ o were omẹ hẹ evaọ ukoko na mẹ rẹ gwọlọ kpọvi. Ẹdẹ jọ mẹ whọku inievo jọ inọ jọ a daoma you inievo na, jẹ hai roro kẹ amọfa. Kpakiyọ mẹ u fo nọ a rẹ ta ẹme otiọye na kẹ.—Rom 7:21-23.

O kẹ omẹ uye gaga inọ mẹ be riẹ ru hu. (Rom 7:24) Ẹdẹ jọ nọ eva e jẹ were omẹ hẹ, mẹ lẹ se Jihova nọ mẹ gwọlọ no iruo imishọnare na no re me zihe kpobọ Finland. Owọwọ ẹdẹ yena, nọ me kpohọ ewuhrẹ, ẹme jọ nọ a ru o tẹ lẹliẹ omẹ ku iroro rẹriẹ. Mẹ tẹ ta nọ me re gbe ru iruo na, jẹ daoma nwene. Oghẹrẹ nọ Jihova o ro yo olẹ yena u gbe bi gbe omẹ unu rite inẹnẹ na. Yọ me yere Jihova gaga inọ o fiobọhọ kẹ omẹ siọ eware jọ nọ mẹ jẹ riẹ ru hu ba no.

Me yere Jihova gaga inọ mẹ avọ aye mẹ ma ru iruo odibọgba oke-kpobi na no oke uzoge mai ze rite enẹna. Me te je yere iei gaga nọ ọ rọ kẹ omẹ aye nọ o you omẹ je tilẹmu iruo na anwọ ikpe buobu ze na.

Uviemenẹ yọ mẹ kpako te ikpe udhosa-gbikpe no, me ve ti no iruo owuhrẹ isukulu ukoko gbe ọsẹro okogho no. Orọnikọ o be da omẹ inọ me bi ti no iruo na ha, keme mẹ riẹ nọ oware nọ o mae rro họ re ma romakpotọ gọ Jihova, je jiri ei fikinọ ma you rie, gbe fikinọ eware nọ o ru kẹ omai e da omai ẹro. (Mae. 6:8; Mak 12:32-34) Ma re wo ọkwa nọ a rẹ jọ riẹ omai gaga re ma te ti ru eva were Jihova ha.

Mẹ tẹ kareghẹhọ iruo nọ me ru no evaọ ukoko na, eva ọvo e rẹ were omẹ. Kọ fikinọ mẹ ọ rẹ mae riẹ oware ru jabọ Jihova ọ rọ kẹ omẹ uvẹ yena? Kakaka! Ohrọ-oriọ gheghe ọ rọ kẹ omẹ iruo na. Me te ohwo nọ o re ru iruo yena vievie he. Mẹ riẹ nọ ẹgba mẹ me ro ru iruo na ha. Jihova ọye o fiobọhọ kẹ omẹ nọ mẹ sai ro ru iruo na. Enẹ Ọghẹnẹ ọ rọ jọ eria nọ mẹ jọ ga ha dhesẹ ogaga riẹ via.—2 Kọr. 12:9.