A chrii breda a wi, mi a di yonggis wan an mi baan 1955. Mi gruo op iina wan siti dong a di sout paat a Finlan an a da siti ya dem kaal Vantaa ya nou.

Mi mada baptaiz an ton wan Jeuova Witnis likl bit bifuo mi baan, bot mi faada did a fait gens di chuut so im neehn waahn wi mada fi stodi wid wi ar fi kyar wi go a di miitn dem niida. So wa shi wuda du a tiich wi tingz fram di Baibl wen im no di de.

Fram mi a pikni mi mek op mi main se mi a-go sorv Jeuova. Laik wen mi a did sevn, mi tiicha did beks wid mi kaa mi neehn waahn fi nyam di pankiek we mek outa blod we di Finish piipl dem iit. So mi lak op mi mout an shi yuuz wan a ar an dem fi skwiiz mi jaa fi chrai an uopm it op, den shi yuuz ar ada an fi yuuz wan faak fi fuos piis a di pankiek iina mi mout. Bot mi get fi lik it outa ar an.

Mi faada ded wen mi a 12. So afta dat, mi kuda get fi go a di miitn dem. Di breda an sista dem did de de fi mi an dat did elp mi fi get kluosa tu Jeuova. Mi staat fi riid di Baibl evridie an stodi wi buk an pamplet dem. An dem ting ya did riili elp mi so dat mi kuda baptaiz Aagos 8, 1969 wen mi a 14.

Likl afta mi don skuul, mi staat fi regila paiyanier. Kopl wiik afta dat, mi go wich  paat dem niid muo elp fi du di priichin wok iina wan plies we niem Pielavesi we de nier di migl paat a Finlan.

Wen mi de a Pielavesi, mi did miit wan nais gorl we ombl an we lov Jeuova we niem Sirkka. Shi neehn a luk no big laif, bot jos laik mi shi did waahn fi du wol iip fi Jeuova no mata di kain-a wok we shi get fi du iina Jeuova sorvis. Wi marid Maach 23, 1974. Bot insted-a fi go pan wi onimuun, wi ga’a wan plies we niem Kaatuula we dem did niid muo elp fi du di priichin wok.

Fram wi marid til nou, Jeuova mek wi si se ef wi mek im govament bi di big ting iina wi laif, im a-go gi wi di ting dem we wi niid fi liv. (Mat. 6:33) Laik wan a di taim wen wi did de a Kaatuula, wi neehn av no kyaar an a baisikl wi yuus tu yuuz. So wen winta taim kom an it kuol bad, it did aad fi wi kaaz a did wan big ieriya di kanggrigieshan did av fi priich iina an wi neehn av no moni fi bai no kyaar.

Wan die mi big breda kom luk fi wi wen wi neehn nuo se im a kom an gi wi im kyaar fi yuuz, an im did pie di inshuorans fi it aredi. So di onggl ting wi did afi du a bai gyas fi’it. A so wi en op wid wan kyaar.

Jeuova mek wi si klier klier se wa wi fi a du a put im govament fos iina wi laif an a im a-go gi wi di ada ting dem we wi niid fi liv.

Iina 1978 wen wi de a di paiyanier skuul, wan a di tiicha dem we niem Raimo Kuokkanen, a tel wi se wi kuda sain op fi go a Gilead School. So wi staat fi stodi Ingglish so dat wi kuda get fi go. Bot iina 1980, bifuo wi kuda sain op fi go dem aks wi fi go elp out a di branch afis iina Finlan. Dem taim de di breda an sista dem we de a Betel kudn sain op fi go a Gilead. Wi did jos waahn fi du wa Jeuova waahn wi fi du, so wi go a Betel. Bot wi did stil a chrai lorn Ingglish so dat ef wi get di chaans fi go a Gilead wi wuda redi fi go.

Kopl ier afta dat, di Govanin Badi se di breda an sista dem we de a Betel kuda sain op fi go a Gilead, so wi sain op fi go. An  a neehn bikaa wi neehn api a Betel, bot wi did jos waahn fi go du muor fi Jeuova eniwe dem niid elp wid di wok. So dem mek wi go a Gilead an wi gradiyiet Septemba 1985. Fi wi klaas a did klaas 79. An dem sen wi go a Kolombiya.

Wen wi go a Kolombiya, dem sen wi go a di branch afis fi go wok. Iivn duo mi did chrai mi bes fi du da wok de, afta wan ier, mi fiil laik se it wuda beta fi mi du sitn els. So fi di fos an onggl taim iina mi laif mi aks dem fi gi mi sopm els fi du. An afta dat, dem sen wi fi go ton mishineri iina wan plies niem Niiva we de iina Wiila.

Mi aalwiez lov di priichin wok. Wen mi did de a Finlan an a paiyanier wen mi neehn marid, som a di taim mi wuda staat fi priich fram orli iina di maanin til liet iina di iivnin. An wen mi marid, a di sed ting mi an Sirkka yuus tu du. An wen wi a wok somwe we de faar fram we wi liv, som a di taim wi wuda sliip iina di kyaar so dat wi na’afi spen wan lang taim pan di ruod a chravl, an dis wuda mek wi get fi staat priich orli di neks die.

Wen wi did out de a priich iina di mishineri wok, wi staat fi fiil di siem wie laik ou wi yuus tu fiil bout di priichin wok agen. Di breda an sista dem iina wi nyuu kanggrigieshan a Kolombiya did av nof rispek fi wi, dem did lov wi, an dem did api fi wa wi a du. An nof muor piipl did staat fi kom iina di kanggrigieshan.

No Jeuova Witnis neehn de iina di komyuuniti dem nier Niiva wich paat wi did a priich, so it did de pan mi main nof. Mi did a wanda ou dem piipl de wuda get fi lorn bout Jeuova. Bot kaaz a di waar we did a gwaan wid di suoja dem an di govament, it neehn sief fi piipl we no kom fram de fi go de. So mi prie tu Jeuova fi mek sumadi fram wan a dem ieriya de lorn di chuut. Bot mi did fiil se di sumadi wuda afi kom liv iina Niiva fi lorn di chuut. So mi prie tu Jeuova fi sumadi fram dem ieriya de lorn di chuut an afta dem baptaiz an get chrang iina di sitn dem we dem biliiv iina, dem wuda go bak we dem kom fram fi go priich. Bot mi shuda did nuo se Jeuova wuda du sitn beta dan dat.

Likl afta dat, mi staat fi stodi di Baibl wid wan yuut niem Fernando González. Im did liv iina Aljisiiras, an no Jeuova Witnis neehn liv iina da ieriya de. Fernando did afi chravl 30 mail fi go a Niiva go wok. Im wuda stodi di paat dem we wi a-go du iina di Baibl stodi gud bifuo mi kom an im staat fi kom a aal a di miitn dem tu. Im did staat fi tel ada piipl iina im ieriya bout di sitn dem we im a lorn. Fram di fos wiik wen im du im Baibl stodi, im wuda gyada op som piipl iina di ieriya we im liv an tel dem bout di sitn dem we im a lorn iina im Baibl stodi.

Siks mont afta Fernando staat stodi, im get baptaiz Janiweri 1990. An afta dat, im ton wan regila paiyanier. Kaa im did de a Aljisiiras, di branch kuda sen speshal paiyanier  de nou. An iina Febiweri 1992, di fos kanggrigieshan did staat op iina da ieriya de.

A no onggl wich paat im kom fram Fernando did a priich, kaa afta im marid, im an im waif muuv go a San Visente del Kagwan go priich. An no Jeuova Witnis neehn liv de-so niida. So dem elp fi staat op wan neda kanggrigieshan de-so tu. An iina 2002, dem pik im fi bi wan Sorkit Uovasiya. An im an im waif, Olga, stil a du da wok de ya nou.

Wa did apm wid Fernando elp mi fi si wa mek it impuotant fi prie bout di ting dem we wi wuda waahn fi gwaan wen it kom aan tu di wok we Jeuova gi wi fi du. Kaa Jeuova kyan du di sitn dem we wi kyaahn du an a im sen out piipl fi du im wok.​—Mat. 9:38.

Iina 1990 dem pik wi fi go iina di sorkit wok. Di fos plies dem sen wi go a di kyapital a Kolombiya we niem Bogota. Chuu mi an mi waif did tingk se notn neehn so speshal bout wi an wi kudn du notn beta dan nobadi els, wi did kain-a fried fi go du da wok de. An wi neehn yuus tu fi a liv iina wan siti we nof piipl de. Bot Jeuova du wa im se im wuda du iina Filipiyan 2:13 we se: “Unu kyan liv da wie de, kaaz a Gad a wok iina unu laif. A Gad mek unu waahn fi du di sitn dem we im waahn unu fi du. An a im gi unu di chrent fi du dem tu. An wen unu du dem, it mek im wel api.”

Afta dat, dem sen wi go a Medeyin iina di sorkit wok, a de-so mi did a taak bout wen mi fos staat tel di tuori. Piipl de-so get yuus tu di wol iip a faitin we a gwaan. Laik wan a di taim wen mi did a du wan Baibl stodi an wan shuutout staat fi gwaan, mi did a-go go dong pan di fluor bot di sumadi we mi did a stodi wid jos gwaan riid di paragraaf laik notn neehn a gwaan. An afta im don riid di paragraaf, im beg mi paadn an go outa duor. An den mi si im kom bak wid im tuu likl pikni dem an se, “Mi sari bot mi did afi go fi mi pikni dem.”

A nof taim tingz laka dis apm tu wi. Laik wan a di taim wen wi did a priich fram ous tu ous, mi si mi waif a ron a kom. It did luk laik se shi a-go ded. Shi se sumadi shuut aafa ar. Mi did fraitn. Bot afta dat, wi fain out se a no Sirkka di gon man did a shuut aafa, bot a wan man we did a waak paas ar im did a shuut aafa.

Bot afta a wail, wi lorn ou fi diil wid dem ting ya. An wen wi luk pan ou di breda an sista dem iina di ieriya diil wid dem ting ya an wosa tingz, it push wi fi tan op chrang an go aan. Wi se tu wiself se ef Jeuova a elp dem im wuda elp wi tu, an wi aalwiez du wa di elda dem iina di ieriya se wi fi du. An wi du wa wi kyan du fi kip sief an mek Jeuova gwaan tek kier a wi.

Somtaim tingz no so bad az ou dem luk. Laik wan a di taim mi did ier laik tuu  uman uova di ous we mi did a-go go a kos dem wan aneda. Mi neehn waahn fi ier wa did a gwaan, bot den wan uman tel mi fi kom pan ar varanda stil. Onggl fi riyalaiz se a tuu parat a gwaan laik ou dem nieba dem wuda gwaan.

Iina 1997, dem pik mi fi tiich a di Ministerial Training School. b Mi did aalwiez api fi go a dem kain-a skuul ya bot mi neva tingk se mi wuda eva get di chaans fi a tiich wan a dem.

Afta dat dem pik mi fi bi wan dischrik uovasiya. An afta dem no av dischrik uovasiya wok agen, mi go bak iina di sorkit wok. A muo dan 30 ier mi did a tiich dem kain-a skuul de fa an a du di sorkit wok tu, an mi did api kaa mi did get wol iip a blesn. Bot it neehn aalwiez iizi fi mi. Mek mi tel yu wa mek.

Kaa mi a sumadi we wi taak op chrang bout wa mi biliiv, it elp mi nof taim fi go chuu sortn tingz. Bot som a di taim mi taak op tuu chrang wen mi afi diil wid tingz iina di kanggrigieshan. An somtaim mi wuda tel di breda an sista dem fi lov dem wan aneda an se dem no fi waahn sumadi fi du muor dan wa dem kuda du. Bot nof a di taim, mi no du wa mi did a tel dem fi du.​—Ruo. 7:21-23.

Kaaz a ou mi stie, som a di taim mi fiil laik se mi fi gi op. (Ruo. 7:24) Wan a di taim mi aal prie tu Jeuova an tel im se it wuda beta ef mi tap du di mishineri wok an go bak a Finlan. Bot da siem iivnin de mi go a wan miitn, an di push we mi get elp mi fi si se mi no fi gi op bot mi fi gwaan wok pan miself. Til tide die ya, mi lov fi si ou Jeuova ansa mi prieya an mi lov ou im elp mi fi gwaan beta.

Mi an Sirkka tangk Jeuova fi lou wi fi yuuz muos a wi laif fi du im wok. An mi tangk Jeuova tu fi mi waif we lov mi an we stik tu mi.

Mi suun ton 70, so mi naa go a tiich dem skuul de an a du di sorkit wok agen. Bot dis no mek mi fiil no wie kaa mi nuo se di big ting tu Jeuova a dat wi a sorv im an fi nuo wa wi kyan du fram wa wi kyaahn du, an fi wi lov im an sorv im wid aal wi aat, an tangk im fi aal a wa im du fi wi. (Mai. 6:8; Maak 12:32-34) Kaa fi worship Jeuova no miin tu se evribadi afi a si wa wi a du.

Wen mi tingk bout aal a di wok dem we mi get fi du fi Jeuova, mi get fi si se mi neehn get fi du dem kaa mi muo dan nobadi els, ar kaa mi kyan du sitn beta dan sumadi els. Bot Jeuova gi mi dem sitn ya fi du kaa im a shuo mi lov iivn duo mi no dizorv it an aalduo mi neehn a du tingz di bes wie som a di taim. Mi nuo se a Jeuova a elp mi fi du di difrant wok dem we im gi mi fi du. So wen mi wiik, a da taim de mi si Jeuova powa.​—2 Kor. 12:9.