1955 uwitin akiniamiajai iikia manaintiuitji, wikia muntsu ukupuitjiai. Finlandia nayantsanam jeastatuk Vantaanam nui pujusan tsakarmiajai.

Wikia akintsain nukurka testigo de Jehová ajasmiayi. Winia aparka nuna nakitia asa nukurun uchir ainiana nuka Yuusa chichame unuiniaraip tura iruntramunmasha jukiaraip tu timiayi. Tuma asamtai winia apar jea pujachkui nukurka Jehovanun unuitiam wemiaji.

Uchi asanak Jehovan umirkatniun wakeriniuyajai. Siete uwi takumiajna nui verilättyjä nuna yuatniun nakitiakui unuikiartin kajertukmiayi (verilättyjä tana nuka shaa harina najanamu numpajai pachimprar panka anin najanamuiti). Kakai kakain wenurun achik uratri chikich uwejejain tenedorjai ayurtuattsa wakerimiayi. Ainis turutakui tenedoran awatin ajapruamiajai.

12 uwi takumiajna nui apar jakamiayi. Apar jakamiania nuyainia iruntainiam wetinian nankaamamiajai. Testigos de Jehová armiania nu shiir amajtuinia asarmatai Yuusna nuna wakeruktinian juarkimiajai. Yuusa chichamen kashi kashinin unuimiatratniun nankaamamiajai nuyasha papii Yuusnan aujmatainian tishipsan unuimiat wemiajai. Nuna turakun imiantinian wakera  asan 14 uwi takumiajna nui 8 de agosto 1969 nu uwitin imianmiajai.

Natsa unuimiatain amukan precursor regular ajasmiajai. Precursor regular ajasan pujusan Finlandianman Pielavesi nui Yuusa chichamen etserkatniun yaimkiattsan wemiajai.

Pielavesiniam nuar atinian nekaamiajai. Ninkia ninki warinkisha mash turamnia enentaimchauyayi nuyasha Yuusan ti penker enentaimtimiayi. Ninkia paant ajastinian turutskesha warinkisha nukap takutniun enentaimchauyayi. Maimtaik Jehovanu warinmansha yaimkiatin enentaimmiaji. 23 de marzo 1974 uwitin Sirkkajai nuatnaikiamiaji. Yama nuatnaikia asar tuinsha iraumniaitiatar testigos de Jehová Yuusa chichame etsernaktin utsumnamiania nui Karttulanam wemiaji.

Nuatnaikiamiajnia nuyainia Jehovanu emka najanu asakrin ii utsumamurincha amasuitji (Mat. 6:33). Karttulanmanka carro takuchmiaji. Tuma asar bicicletanam wu wumiaji. Tumaitkiusha micha tsawantinkia penkesha jinkishminiuyayi. Aran weri etserkatin asamtai carron utsumnamiayi tumaitkiusha nu sumaktin kuit takurmachmiaji.

Tuma pujarin aya neachma yatsur iiraittsa taa carron amajme turutmiayi. Antran amasmiaji tura warinkisha akikmakchamiaji. Ayataik gasolina sumakar apujtustiniuyaji.

Jehová ii utsumamun suramsamniuyajnia nu paant nekaamamiaji. Iikia ayataik Yuusna nu emka najanatniuyaji.

1978 uwitin Escuela del Servicio de Precursor nui pujarin Raimo Kuokkanen a ninkia nui iin unuitiammiaji tura nui Escuela de Galaad nui wetasrum papii aimkiatarum turammiaji. Nui wentajti tusar inkis chicham unuimiatratin juarkimiaji. Tumaitkiusha 1980 uwitin Betel Finlandia nui yaimkiat tusar ipiatmawakrin nu papiikia akupkachmiaji. Yaunchuka Betelnum pujuiniaka Galaadnum wecharminiuyayi. Ii tui pujusar Jehová enentaimtustasar wakeraj nuka turutsuk Jehová tui pujusara yaimkiarat tusa wakera nui yaimkiattsar wakerimiaji.  Neachma Galaadnum wentajti tusar inkis chichamka tuke unuimiatmiaji.

Tsawan nankaamaki weak testigos de Jehová takatrin irunturar chichamprin ainiana nu Betelnum pujuiniasha Galaadnum wetasar wakeruiniakka wearminiaiti tu tiarmiayi. Tu etserkarmatai nu chichamtaik papii aimkiar akupkamiaji. Betelnum pujusar yaimiu asar wara warat enentaimmiaji tumaitkiusha tuinsha nu nukap yaimkiamnianum wetasar warinkisha turatin wakerimiaji. Clase número 79 Galaadnum unuimiararat tusar ipiatmawarmiaji tura 1985 nui unuimiarar amukmiaji. Tui akuptamkarmiaj? Colombianam.

Colombianam Jehovakrin Betelnum pujus yaimkiat tusar akuptamkarmiaji. Nui pujusan penker takakma pujumiajai, nui takakmamun chikichik uwi ejen tuinsha weri yaimiumniaitji tu enentaimsamiajai. Aran we yaimkiat tusarum tuinsha akuptuktarum tu timiajai. Nuyainianka atakka ainis tichaitjiai. Matsatkamu Huilanam werum Neivanam pujusrum yaimkiatarum tusar misionero anaitiamkar akuptamkarmiaji.

Yuusa chichamen etserkatniunka tuke wakeriniaitjiai. Natsauyajna nui tura precursor aa wemiajna nuinkia kashik juarkimiutak etse etserkuan kashi amaj wemiajai. Nuarjai Sirkkajaisha kashik juarkimiutak etse etserkuar kiriri amaj wemiaji. Aran etserkattsar we wemiajnia nuinkia jeanka wakettsuk nuin carronmansha kanu wemiaji. Nu turakur nuin kashik Yuusa chichame etserkatin juar wemiaji.

Yaunchuk Yuusa chichame wakerusmajai etser wemiajnia aitkiasrik nui pujusrisha turimiaji. Ii pujumiajnia nuinkia ii yachi ii umainkia nukap ajaki wearmiayi. Ii yachi ii umai Colombianmayanka arankartin anenkratin tura yuminsatniuncha unuimiatra armiayi.

Neiva nuntumas nukap irutkamu irunmiayi nuinkia testigo de Jehová yaksha atsumiayi. Nuinkia guerrillero irunu asamtai nu irutkamunmania ainiachuka nui pujuscharminiuyayi. Nuisha Yuusa chichame itiuran etserkamniait tu enentaimsan pujumiajai. Nu irutkamunmaya Neivanam puja testigo de Jehová ajasat tusan Jehovan sea wemiajai. Nuyasha yaksha nuya imianinkia Yuusnum katsuar ni nunken Yuusa chichamen etserut tusan sea wemiajai. Wi enentaimmiajna nuka penkerauyayi tumaitkiusha nakastiniuyajai. Wi enentaimmiajna nunasha iniankas Jehovaka turatniun enentaimmiayi.

Arusan natsamaru Fernando González naartinian Yuusa chichame unuiniartinian juarkimiajai. Ninkia Algeciras irutkamunam pujumiayi, nuinkia testigos de Jehovaka atsumiayi. Ninkia tuke atsakamutin Neivanam takakmastasa wu wumiayi. Neivaka 50 kilómetros timianu arantauyayi. Warinia unuimiatratniuya nunaka ti penker iwiarna wemiayi, tura Yuusa chichame unuimiartin juarkimiajnia nuyainian iruntramunmanka wetinian nankaamamiayi. Tura nu irutkamunmaya aentsun Yuusa chichamen jintiawartasa irurtinian juarkimiayi.

 Seis nantu Yuusa chichamen unuimiatar Fernando naartinkia enero 1990 uwitin imianmiayi, arusan precursor regular ajasmiayi. Algeciras irutkamunam testigo de Jehová puja asamtai nu irutkamunam precursor especial anaikiar akupkamu jeawarmiayi. Tura febrero 1992 uwitin nuinkia congregación ajasmiayi.

Tumaitkiusha Fernando naartinkia Algeciras irutkamunmanka juakchamiayi. Nuatak ni nuwe Olga naartinjiai irutkamu San Vicente del Caguán nui wearmiayi, nuinkia testigo de Jehová chikichkiksha atsumiayi. Nuisha congregación ajasat tusar yaimkiarmiayi. Nuya 2002 uwitin wekas iikratin ati tusar anaikiarmiayi, yamaisha wekas iikratniukete.

Ainis nankaamasu asamtai Jehovanu ii najaneajnia nuna warinkisha nakak seatniuitiajnia nuna nekaamamiajai. Ninkia iikia turachminiaitiajnia nuna najanatin jeawai. Jehovayaiti aents penker enentain achiakainiana nuna wainkiatniun yainkrateaka (Mat. 9:38 TNM).

1990 nu uwitin wekas iikratin ati tusa anaitiukarmiayi tura Bogotanam nui wekasan iikratsatniuyajai. Nuar Sirkkajainkia chikich aents uruku ainia nujai meteketji, warinkisha ti nekachuitji. Nuyasha uunt yaktanam pujuchuyaji. Tuma asamtai ashamshim ajamiaji. Tumaitkiusha Jiripiusnum 2:​12, 13 nui Jehová junis tana nuna umikmiayi “Yus atumí enentái̱n takaak ni shiir wakeramu wakeruktinniasha tura umiktinniasha pujurtamprume”.

Arum yama juarkun tayaitiajna aintsan Medellinnium akuptamkarmiaji. Nui pujuiniaka mankartamu irunmanum pujuinia asar sapijmiacharmiayi. Nui pujusan Yuusa chichamen unuiniaku pujai ipiatainiak taker amajiarmiayi. Wikia tukuriarain tusan nunka nankimnattsan wakerimiajai. Tumaitkiusha wijiai Yuusa chichamen unuimiak pujumiania nuka pachitsuk papiin aujmiayi. Aujas amuk ishichik aa waketuwajai timiayi. Arusan jimiara uchin takaku tamiayi tura chichaak tsankurturta uchirun itiartasan wejai timiayi.

Chikich tsawantincha aintiaku nankaamasmiaji. Yuusa chichame jeakar jeakar etsereakur wekaimiajnia nui nuar awakmamak tseke tamiayi tura chichartak aents tukuri takui wisha sapijmiaschamiajai. Arusrik chikich aentsun tukuttsa ipiatniuyania nu nekaamiaji.

Mankartamu irunmanum puja pujakuar nui pujustin unuimiatkamiaji. Ii yachi ii umainkia mankartamu ti nukap irunmanum pujuinia asar warinkisha itiurchatan wainiainiaksha katsuntainia asarmatai shiir enentaimtiarmiaji. Jehová ii yachin ii umain yayainiana aintsan iincha yainmaktatji tu enentaimsamji. Uuntri anairamu warinkisha turamainiakrin antur wemiaji, iisha anermak aja wemiaji, tura nuniasha Jehová penker waitmaktatji tu enentaim wemiaji.

Antrarsha sapijmia wemiaji. Aentsun iyutasan wemiajna nui jea wayan pujai jimiara  nuwa jianainiak chara chara ajainia ainis antimiajai. Wikia nuna antuktinniaka penkesha wakerishmiajai, tumaitkiusha nuwa jea nerenniuri asas iimsakia turutiakui asas iimsataj tukaman jimiara kawash nuwa jianainia ainis tuinian wainkiamiajai.

1997 uwitin Escuela de Entrenamiento Ministerial b nui unuikiartin ati tusa anaitiukarmiayi. Yuusa chichameniu unuimiatai irunna nui wetinian wakeriniuyajai, tumaitkiusha nu unuimiatainiam unuikiartin atinniaka enentaimchauyajai.

Urum wekas iikratin ainian iin anaitiukarmiayi. Nu ainis turamun yapajiawarmatai ataksha wekas iikratin anaitiukarmiayi. Yuusa chichame unuimiatainiam unuikiartin tura wekas iikratin ajasmancha 30 uwi iniankasan takakeajai. Nui yaimiakun ti penker nankaamasuitjiai, tumaitkiusha tukeka ainis nankaamaschaitjiai. Urukamtai ainis taja?

Wikia nakak turatniun wakeriniaitjiai ainis asan itiurchatan wainkiancha wajatraitjiai tumaitkiusha warinkisha iwiaratin akui nakak junis atiniaiti tiniuitjiai. Ii yachi ainian atumka anenkratin atiniaitrume tura yajauchichuitkuinkia iniain atiniaitrume ainis tu wearmiajai. Tumaitkiusha amamkesam iiyamka wi ainis turachiatan tu wemiajai (Rum. 7:​21-23).

Ainis awajia asan urutainsha majat enentaimniuitjiai (Rum. 7:24). Jehovan seakun misionero ajasmanka iniaisan Finlandianam waketkittsan wakerajai tu timiajai. Nu tsawantinin iruntramunam jintinkratman antukmiajna nu yawetsuk kakartiniaitiajna nuna tura yapajniaki wetiniaitiajna nunasha nekaamatniun yainkiamiayi. Wi seamiajna nuna Jehovasha itiur enentaimia nuna paant nekaamtikruamiana nunaka penke kajinmatchaitjiai. Nuyasha yapajniakar wetinian Jehová ti yainkiaiti tuma asamtai nin yuminkiajai.

Nuar Sirkkajai Jehovanu ti nukap yaimkia asar ni yuminkiaji. Nuyasha nuwan winia anentan surusu asamtai tura nuarjai nukape uwi Jehovanun najana asar Jehovan yuminkiajai.

Jukerusnak 70 uwi ejettajai, nuna ejenka Yuusa chichame unuimiatainiam unuikiartiniaitiajna nuna tura wekas iikratniuitiajna nunasha iniaisattajai. Tumaitkiusha nui enentaimsan kuntuts enentaimiatsjai. Urukamtaiya? Warinmansha yaimkiat tusar anaitiamkakrin aya nuink Jehovaka shiir enentaimturmatsji antsu ni anea asar tura ni yuminkia asar warinkish najaneaj asakrin shiir enentaimturmaji (Mik. 6:8; Mar. 12:​32-34).

Wikia warinmansha yaimiakun ti penker nankaamasuitjiai. Wi chikichjainkia nankaamas turutskesha warinkisha unuimiatra asamtai ainis yaimkiat tusar anaitiukcharuiti. Warinmansha awajiniaitkiuisha Jehovaka anenkratin asa nui yaimkiat tusa tsankatrukuiti. Ni yainkiachuitkiuinkia nuinkia nunaka penkesha turachajai. Awajiniaitkiuisha Yuusa kakarmari ti nukap yainkiaiti (2 Kur. 12:9).