Ngai hpe 1955 hta shangai ai. Kahpu kanau 3 kaw na kaji htum re. Hpinlan Dingda maga hka hkingau makau na Banta ngu ya aten hta masha ni chye da ai mare hta nga kaba wa ai.

Ngai garai n shangai shi ai aten kaw na anu gaw Yehowa Sakse langai hku nna hkalup hkam ngut sai. Raitim, anu hpe awa ninghkap ai. Kasha ni hpe Chyum Laika n sharin ya shangun ai, zuphpawng ni n woi sa shangun ai. Dai majaw, awa n nga ai aten hta Chyum Laika madung lam ni sharin ya ai.

Ma prat kaw nna Yehowa maga ngai tsap ai. Asak 7 ning hta jawng kaw Hpinlan sai pankik muk n sha ai majaw sarama grai pawt mat ai. Lata maga mi hte nye shabyi hpe manat nna n-gup hpe atik anang hpaw ya ai. Lata maga mi hte gaw muk hpe n-gup de atik anang bang ya ai. Sarama a lata hpe ngai ahpre jahkrat kau ai.

Ngai asak 12 ning hta awa si mat ai. Awa si mat ai hpang ngai zuphpawng ni lu lung wa ai. Ngai hpe nawku hpung na hpunau ni gaw, tsawra myit hte myit lawm ai lam madun ma ai. Dai majaw mung wenyi lam hta grau rawt jat mayu wa ai. Shani shagu Chyum Laika hti hpang ai, uhpung kaw na shapraw ai laili laika ni hpe shakut nna hkaja hpang ai. Dai hku nna, 1969, August 8, asak 14 ning hta hkalup hkam lu wa ai.

 Jawng ngut ai hte aten galu ningshawng galaw hpang ai. Bat loi mi na ai hpang Hpinlan mungdan ka-ang na hkaw tsun masha grau ra ai Pailapet-si mare hta sa magam gun ai.

Dai shara kaw nye madu jan byin wa na num kasha re ai Sika hte hkrum ai. Sika lata npu taw ai myit nga ai, wenyi myit jasat nga ai hpe ra mat ai. Mying gum hkawng na matu, lusu na matu shi n myit ai. An hkam la da ai lam bung ai. Yehowa a matu hpring tup magam gun lu yang rai sai. Hpa lit mi lu lu hpa n ra ai. 1974, March 23 hta, an hkungran ai. Han-ni-mun n sa ai sha hkaw tsun masha grau ra ai Kattula mare hta sa magam gun ai.

Mungdan lam hpe shawng tawn yang, ra ai lam hpe Yehowa jaw na ngu ai hpe dinghku nnan de ai kaw nna chye wa ai. (Mat 6:33) Ga shadawn, Kattula du ai shaloi anhte hta mawdaw n nga ai. Shawng nnan hta lagaw leng hte hkawm sa ai. Raitim, nshung ta du wa ai shaloi kahtet shadang gaw, hka gye masat npu de du ai. Nawku hpung lawk mung grai kaba ai. Mawdaw nga yang she mai na re. Raitim, mari na matu gumhpraw n nga ai.

N myit mada ai sha an hpang de Hpu Bawk wa chyai ai. Shi a mawdaw tawn da ya ai. Amahkam shabrai mung jaw da chyalu re. Sau bang nna gawt dat sha re. Ra nga ai mawdaw lu mat sai.

Ra kadawn ai hpe jaw na matu lit la ai lam Yehowa madun dat ai re. Anhte a lit gaw Mungdan lam hpe shawng tawn na matu sha re.

1978 hta anhte ningshawng jawng lung nga ai shaloi, sharin ya ai hpunau Raimo Ka-oka-nan a gaw Gilead Chyum Jawng shawk shawn na matu n-gun jaw ai. Dai majaw Chyum Jawng lu lung na matu Inglik laika hkaja hpang ai. Raitim, shawk shawn laika n mara shi yang, 1980 hta Hpinlan ginjaw garan rung hta magam gun na matu saw shaga hkrum ai. Dai aten hta Behtela nta masha ni Gilead Jawng lung na matu shawk shawn laika n mai mara ai. Kaja htum ngu tinang masat da ai shara hta n re ai sha, Yehowa masat da ai shara hta magam gun na ngu nna saw shaga ai hpe hkap la kau ai.  Raitim, Gilead shawk shawn laika mara lu yang na matu ngu nna, Inglik laika hpe matut hkaja ai.

Shaning loi mi na ai hpang, Behtela nta masha ni Gilead Jawng shawk shawn mai sai ngu Uphkang Hpung tsun wa ai. Kalang ta shawk shawn laika mara dat ai. Behtela hta n pyaw ai majaw n re. Atsam she hpring yang, grau ra ai shara hta magam gun mayu ai majaw re. 79 lang na Gilead Chyum Jawng lung na matu saw shaga hkrum ai. 1985, September hta Chyum Jawng yu nna, Kolambiya kaw lit ang ai.

Kolambiya kaw du ai hte ginjaw garan rung hta lit lu ai. Lu ai lit hpe kaja htum shakut nna galaw ai. Raitim, laning mi na ai hpang lit galai shai yang she mai sana ngu hkamsha wa ai. Dai majaw lit galai shai ya na matu, prat hta shawng nnan lang hte hpang jahtum lang hku nna hpyi shawn dat ai. Huila ginra Neba mare hta hkaw tsun lawk sasana hku nna lit lu ai.

Hkaw tsun magam hpe myi kaw na ra ai. Hpinlan hta shabrang prat hte ningshawng galaw ai shaloi, kalang lang jahpawt kaw na shana du hkra hkaw tsun ai. Dinghku de ai hpang hta mung anhte shani tup hkaw tsun ai. Tsan ai shara de sa hkaw tsun yang, kalang marang mawdaw kata kaw sha yup kau ai. Dai majaw, hpang japawt jau jau hkaw tsun lu ai.

Hkaw tsun lawk sasana hku nna magam gun ai shaloi, moi na zawn bai myit rawt wa ai. Nawku hpung mung grai rawt jat ai. Kolambiya kaw na hpunau nauna ni gaw hkungga ai lam, tsawra myit, chyeju dum myit nga ma ai.

Anhte lit ang ai Neba mare hte nau n tsan ai mare ni hta Sakse Hkam langai mi mung n nga ai. Dai mare ni de kabu gara shiga du hkra gara hku galaw ra na kun ngu myit tsang wa ai. Prip la hpyen majan ni nga ai majaw, buga masha n rai yang shimlum lam n nga ai. Dai majaw, buga masha langai Sakse Hkam byin wa na matu ngai akyu hpyi ai. Tengman lam chye na matu, Neba hta nga ai masha rai yang she mai na. Dai sha n-ga, shi hkalup hkam ngut yang kunghpan ai hpunau byin wa nna, shi a mare hta sa hkaw tsun lu na matu akyu hpyi ai. Yehowa hta grau kaja ai ladat nga ai hpe ngai chye wa ging ai.

Kade n na yang, Hpanando Gonzalat ngu ai ramma langai Chyum Laika hkaja hpang ai. Shi gaw Sakse Hkam langai mung n nga ai Egesiret mare na re. Deng 30 daram tsan ai Neba hta bungli wa galaw ai. Hkaja lamang shagu a matu atsawm hkyen lajang wa ai. Kalang ta zuphpawng yawng hpe hkan lung ai. Hkaja hpang ai shawng nnan bat kaw nna, mare na masha ni hpe jahpawng nna shi chye wa ai Chyum Laika lam ni bai sharin ya ai.

Chyum Laika hkaja hpang nna shata 6 na ai hpang, 1990, January hta Hpanando hkalup hkam ai. Hpang hta aten galu ningshawng byin wa ai. Egesiret hta buga na hpunau nga mat sai majaw, ginjaw garan rung gaw laksan ning shawng ni hpe dat gwi mat sai. 1992, February hta nawku hpung langai byin wa ai.

Shi a mare hta hkaw tsun lu ai hte sha Hpanando myit dik nga ai kun? Myit n dik ai.  Hkungran ngut ai hpang, Sakse Hkam langai mung n nga ai hpang na mare langai re ai San Bitsante De Hka-wan de shanla htawt mat ai. Nawku hpung langai byin wa hkra karum ya ai. 2002 hta, ninghtawn hpung kawan hku nna Hpanando lit ap hkrum ai. Hpanando hte madu jan Oga dai ni du hkra hpung kawan hku nna matut magam gun nga ai.

Karai a magam lit ni hte seng nna, ga baw dat akyu hpyi na matu ahkyak ai lam ndai mahkrum madup kaw na ngai chye dat ai. Anhte n galaw lu ai lam ni hpe Yehowa galaw ya ai. Mam madu gaw Yehowa she re. Anhte n re.—Mat 9:38.

1990 hta, anhte hpung kawan bungli hta shang lawm wa ai. Shawng nnan na ninghtawn gaw mare kaba Bogota re. Loi mi gaw hkrit ai. Anhte hta laksan atsam ningja n nga ai. Yu maya sha re. Mare kaba kaw mung n nga ga ai. Raitim: “galaw mayu ai myit rai ti mung, galaw lu ai lam rai ti mung, Karai Kasang gaw shi a sharawng awng ai a marang e, nanhte hta shachyen da myit dai” ngu Hpilipi 2:13 hta ga sadi jaw da ai hte maren, Yehowa galaw ya wa ai.

Dai hpang, shawng nnan hta tsun wa ai Medelin ginra de hpung kawan ra ai. Lam ntsa na daw sa ai lam ni hpe dai kaw na masha ni hpa zawn n nawn mat sai. Kalang mi hta, Chyum Laika sharin ya nga ai shaloi, shinggan hta sanat gap ai sen na dat ai. Ngai chyinghkyen kaw dagup na hkyen dat ai. Chyum ga sharin hpe yu dat ai shaloi hpa n byin ai zawn sha laika pang matut hti taw ai. Hti ngut ai shaloi she “chyahkring mi yaw” ngu tsun nna shinggan pru mat ai. Loi mi na ai hpang ma lahkawng hte bai shang wa ai. “Garai agam ai yaw. Ma ni hpe sa woi la ai re” ngu shi tsun ai.

Shoihpa ganoi hkrum ai aten ni mung nga ai. Nta langai hpang langai sa taw ai aten hta re. Nye madu jan Sika gaw ngai hpang de kagat wa ai. Myiman pyi asit rai taw sai. Shi sanat gap hkrum ai ngu tsun ai. Ngai grai kajawng mat ai. Hpang she chye dat ai gaw, Sika hpe gap ai n re ai sha shi makau kaw na lai mat ai wa hpe gap ai re.

Anhte mung angwi ngwi hte lam ntsa na daw sa ai lam ni hpe n hkrit mat ai. Dai zawn masa ni, dai hta sawng ai masa ni hpe hkamjan nga ai buga na hpunau nauna ni a nden marai a majaw n-gun nga wa ai. Shanhte hpe Yehowa karum ya yang, an hpe mung karum ya na ngu myit ai. Buga na myitsu salang ni hpaji jaw ai hpe galoi mung madat ai. Sadi maja ai. Ngam ai hpe Yehowa a lata hta ap kau ai.

Kalang lang rai yang gaw, anhte myit nna hkrit taw ai sha re. Masa ni gaw shadu da ai daram shoihpa nga ai n re. Kalang mi hta ngai nta langai de sa chyai ai. Nta shinggan kaw num lahkawng matsa ga law hkat ai nsen hpe na ai. Ga law hkat ai hpe yu na matu ngai myit n lawm ai. Raitim, sa yu na matu nta madu shaga ai. Ga law hkat taw ai ngu shadu taw ai wa, n rai taw ai. Htingbu ni galaw ai zawn, hkai ke lahkawng hkan galaw taw ai re.

1997 hta, Magam Shaman Shakyang Jawng b sharin ya ai wa hku nna lit ap hkrum ai. Chyum jawng ni lung ai hpe ngai grai pyaw ai. Raitim kaga ni hpe sharin ya ra ai ahkaw ahkang kaba hpe gaw myit pyi n myit ga ai.

Dai hpang ginwang hpaawn hku nna magam gun ra ai. Ginwang hpung kawan lamang n nga mat ai hpang gaw, ninghtawn bungli hta bai shang lawm ai. Sharin jawng hta sharin ya ai wa, hpung kawan hku nna magam gun wa ai shaning 30 jan re. Dai lit ni galaw let shaman chyeju law law lu wa ai. Raitim, yak ai aten ni mung nga ai. Loi mi tsun dan mayu ai.

Ngai gaw grai gwi ai wa re. Dai majaw mayak mahkak ni hpe hkamjan lu wa ai. Raitim, nawku hpung hta manghkang ni hte seng nna shading sharai ya na matu myit rawt lai ai aten ni nga ai. Tsawra myit madun na matu, rap ra ai lam nga na matu kaga ni hpe ngai n-gun jaw ai hpe naw dum ai. Mani hpa tsun ga nga yang, dai aten hta dai atsam ningja ni n nga ai gaw ngai rai taw ai.—Rom 7:21-23.

Gawng kya lam ni a majaw kalang lang myit daw ai. (Rom 7:24) Sasana magam hpe hkring nna Hpinlan de bai wa yang kaja htum rai na re ngu Yehowa kaw akyu hpyi ai. Dai shana hta zuphpawng sa lung ai. Zuphpawng hta na dat ai lam a majaw, lit kaw na n hkring na matu, gawng kya lam ni hpe sharai na matu dum mat ai. Akyu hpyi ai lam hpe Yehowa asan sha mahtai jaw ya wa ai hpe dai ni du hkra naw dum nga ai. Gawng kya lam ni hpe sharai na matu, tsawra myit hte karum ya ai majaw mung chyeju dum ai.

Prat hpe aten hpring magam hta law htum akyu jashawn na ahkang jaw ai majaw, Yehowa kaw hka kap nga ai ngu ngai hkamsha ai. Tsawra myit hpring ai, sadi dung ai ningrum ningtau jaw da ai majaw mung, Yehowa hpe grai chyeju dum ai.

Ngai asak 70 hpring hkyen sai. Sharin jawng hta sharin ya ai lit, hpung kawan lit hpe tat kau ra sana. Raitim, ngai n yawn ai. Lata npu taw ai myit hte magam gun ai, tsawra myit, chyeju dum myit hte myit masin mahkra hte shakawn ai gaw, Yehowa hpe shagrau lu ai ahkyak htum lam re ngu ngai kam ai. (Mik 6:8, Mrk 12:32-34) Lit kaba ni lu da yang she Yehowa hpe shagrau lu ai n re.

Lu wa ai lit ni hpe myit yu let, chye na mat ai langai nga ai. Lit ni lu ai gaw kaga ni hta grau ging dan ai, grau ram ai majaw n re. Yehowa a ngangkang ai tsawra myit a majaw sha re. Ngai hta gawng kya ai lam ni nga ninglen ndai ahkaw ahkang ni jaw wa ai re. Yehowa a karum shingtau lam a majaw sha lit hpe kangka hkra galaw lu wa ai. Nye a gawng kya lam gaw Karai a n-gun atsam hpe dan dawng shangun wa sai.—2 Ko 12:9.