Nasyaiwe 1955, na kwitũ ninyie ĩlumaita. Nĩsyaanĩwʼe na imwana ingĩ ilĩ. Neanĩie kĩsionĩ kĩ ngalĩ ya ĩtheo ya Finland vakuvĩ na ũkanga, taoninĩ oyu yĩtawa Vantaa.

Mami avatisiwe atwʼĩka Ngũsĩ ya Yeova myaka mĩvũthũ ndanasyawa. Ĩndĩ Tata ndendete ũwʼo na ndendaa tũyĩmanyĩsya Mbivilia na Mami kana kũthi maũmbanonĩ ma kĩkundi. Kwoou Mami atũmanyĩasya ũwʼo wa mũsingi ũla wĩ Mbivilianĩ yĩla Tata ũte vakuvĩ.

Kuma nĩ kana, nĩnatwʼĩte kana ndikalea kũmwĩwʼa Yeova. Kwa ngelekanyʼo, ĩvinda yĩmwe nĩ na myaka mũonza, mwalimũ ũmwe nĩwathatie mũno nũndũ ndyaĩsaa lĩu wĩtawa verilättyjä, ũla wauawa na nthakame. Atũmĩie kwʼoko kũmwe kũmbathamũkanyʼa mũnuka, na atũmĩa kũla kũngĩ kũnthingʼĩĩsya nakĩle lĩu ũsu. Ĩndĩ nĩnavotie kũũkũnĩa nthĩ.

Nĩ na myaka 12, Tata nĩwakwie. Yu naĩ ndonya kũthi maũmbanonĩ ma kĩkundi. Ana-a-asa kĩkundinĩ nĩmambonisye kana nĩmekwendeewʼa ninyie, na kĩu nĩkyandetheeisye kwĩana kĩ-veva. Nĩnambĩĩie kũsoma Mbivilia kĩla mũthenya na kwĩmanyĩsya mavuku maitũ na kĩthito. Maũndũ asu nĩmo matumie nĩvatiswa Matukũ 8, Mwei wa 8, 1969 nĩ na myaka 14.

Ĩvinda ĩkuvĩ ĩtina wa kũmina sukulu, nĩnoosie ũvainia wa kĩla ĩvinda. Ĩtina wa syumwa mbũthũ, nĩnathamĩĩie taoninĩ ya Pielavesi, ĩla yĩ kĩsionĩ  kya katĩkatĩ kya Finland, vala vaĩ na vata mũnene wa atavanyʼa.

Nĩ Pielavesi nĩnakomanie na mwĩĩtu wĩtawa Sirkka, ũla wesie kũtwʼĩka kĩveti kyakwa. Nĩnamwendie mũno nũndũ aĩ wĩnyivyo na nĩwamwendete Yeova vyũ. We ndamanthaa nguma kana kwĩmanthĩa malĩ. Ithyelĩ twaĩ na wendi wa kũmũthũkũma Yeova ũndũ tũtonya, na nĩtweeyũmbanĩtye kwĩtĩkĩla kĩanda o na kĩva. Twatwaanie Matukũ 23, Mwei wa 3, 1974. Na vandũ va kũthi honeymoon, twaendie kĩsionĩ kĩngĩ kyaĩ na vata mũnenange wa atavanyʼa kĩtawa Karttula.

Kuma twatwaana, Yeova nũtwonetye nesa kana twamantha Ũsumbĩ mbee, akeanĩasya mavata maitũ ma kĩ-mwĩĩ. (Mt. 6:33) Kwa ngelekanyʼo, twĩ Karttula tũyaĩ na ngalĩ. Mbeenĩ, twaendaa na kĩsululu. Ĩndĩ mavindanĩ ma mbevo, nĩkwathithaa mũno. Nũndũ kĩsio kya kĩkundi kitũ kyaĩ kĩnene, nĩtwendaa ngalĩ nĩ kana tũkĩtavanyʼe. Ĩndĩ tũyaĩ na mbesa tũthooa ĩmwe.

Tũtataĩĩe, mũkũũa nĩwatũthokeie. Nĩwatũnengie ngalĩ yake. Na yaĩ mbĩvĩe inisualenzi. Kĩla twaaĩlĩte kũthooa no mauta. Yu twaĩ na ngalĩ.

Yeova nĩwoonanisye nesa kana nĩwe waĩ na kĩanda kya kũtũnenga syĩndũ sya kĩ-mwĩĩ ila twaĩ na vata nasyo. Kĩla twaaĩlĩte kwĩka no kũvĩtya mbee Ũsumbĩ.

Twĩ Sukulu ya Mavainia 1978, mwalimũ ũmwe wĩtawa Raimo Kuokkanen, a nĩwatwĩkĩie vinya tusũsye vomu ya kũthi Sukulu ya Ngileati. Kwoou nĩtwambĩĩie kwĩmanyĩsya Kĩsũngũ twĩ na mũvango wa kũthi sukulu ĩsu. Ĩndĩ 1980, tũtanamba kusũsya vomu ĩsu, nĩtwathokiwʼe tũkathũkũme ovisinĩ wa ũvonge wa Finland. Ĩvindanĩ yĩu, athũkũmi ma Mbetheli mayeetĩkĩlĩtwʼe kũthi sukulu ya Ngileati. Ĩndĩ tũyendaa kwĩnyuvĩa vala tũũthũkũma, vandũ va ũu, twendaa Yeova atũnyuvĩe nowe. Kwoou nĩtweetĩkĩlile kũthi Mbetheli. O na vailye ũu, nĩtwaendeeie kwĩmanyĩsya Kĩsũngũ ũndũ twĩsa kwĩtwa Ngileati.

Ĩtina wa myaka kauta, Nzama Ĩla Ĩtongoesye nĩyeetĩkĩlilye athũkũmi ma Mbetheli kũendaa sukulu ya Ngileati. Nĩtwausũisye vomu na mĩtũkĩ, ĩndĩ tũyaaĩka ũu nũndũ tũyatanĩaa kũthũkũma Mbetheli. Kĩvathũkanyʼo na ũu, twendaa twĩthĩwe twĩyumĩtye kũtavanyʼa kũla kwĩ na vata mũnene  wa atavanyʼa. Nĩtwathokiwʼe tũthi Ngileati na twamina Mwei wa 9, 1985, na kĩlasi kitũ kyaĩ kya 79. Ĩtina wa ũu, twatũmiwe nthĩ ya Colombia.

Twavika Colombia, twatũmiwe ovisinĩ wa ũvonge. Nĩnatatie kwĩka kyonthe kĩla ndonya kĩandanĩ kyakwa, ĩndĩ ĩtina wa mwaka ũmwe, neewie twaĩlĩte kwĩka moalyũku. Kwa ĩvinda ya mbee na ya mũthya thayũnĩ wakwa, nĩnakũlilye nĩnengwe kĩanda kĩngĩ. Ĩtina, nĩtwatũmiwe ta amisonalĩ taoninĩ ya Neiva, ĩla yĩ kĩsionĩ kya Huila.

Kuma tene nĩndanĩaa wĩa wa kũtavanyʼa. Yĩla ndatwaanĩte nĩ Finland, mavinda amwe nĩnatavanasya kuma kwakya tene nginya ĩ-ya-wĩoo. Na natwaana, nĩ na Sirkka nĩtwaendaa ũtavanyʼanĩ mũthenya mũima. Na yĩla tũũtavanyʼa isionĩ syĩ vaasa na mũsyĩ, mavinda amwe twakomaa ngalĩnĩ yitũ. Kĩu nĩkyatumaa twambĩĩa ũtavanyʼa tene mũthenya ũla ũatĩĩe.

Yu twĩ amisonalĩ tweewʼaa tũitanĩa ũtavanyʼa o ũndũ twaũtanĩaa mwambĩĩonĩ. Kĩkundi kitũ nĩkyeanie, na ana-a-asa na eĩtu-a-asa ma Colombia nĩmatũnengete ndaĩa, nĩmatwendete, na maĩ andũ matũngaa mũvea.

Vaĩ taoni itaĩ vaasa mũno na Neiva na iyaĩ na Ngũsĩ o na ĩmwe. Nĩnathĩnĩkaa mũno ndyĩkũlya ũndũ ũvoo mũseo ũkavika kũu. Ĩndĩ nũndũ wa kaũ ũla watwaĩĩwʼe nĩ imaamai taoninĩ isu, andũ ala mataĩ ma kũu maĩ mũisyonĩ. Kwoou nĩnavoyie mũndũ o ũmwe taoninĩ isu atwʼĩke Ngũsĩ. Nasũanĩaa mũndũ ta ũsu aĩle kwĩthĩwa ayĩkala taoninĩ ya Neiva nĩ kana emanyĩsye ũwʼo. O na ĩngĩ, nĩnavoyie nĩ kana mũndũ ũsu avatiswa eane kĩ-veva na aisyoka mũsyĩ akatavanyʼe kwʼo. Ĩndĩ kĩla ndeesĩ nĩ kana Yeova aĩ na mũvango mũseo kwĩ ũsu wakwa.

Ĩtina wa ĩvinda ĩkuvĩ, nĩnambĩĩie kwĩmanyĩsya Mbivilia na mũndũũme wa mũika wĩtawa Fernando González. Ekalaa taoninĩ yĩtawa Algeciras, ĩla ĩtaĩ na Ngũsĩ o na ĩmwe. Kĩla kyumwa, Fernando nĩwaendaa mũendo wa mbee wa kĩlomita 50 (maili 30) nginya taoninĩ ya Neiva, vala wathũkũmaa. Eeyũmbanĩasya nesa kĩlungu kĩla tũkwĩmanyĩsya na nĩwambĩĩie kũka maũmbanonĩ onthe ate kweteela. Kuma kyumwa kya mbee ambĩĩa kwĩmanyĩsya, nĩwoombanasya andũ vau taoninĩ kwoo na aimamanyĩsya kĩla weemanyĩasya ĩmanyĩsyonĩ yake ya Mbivilia.

Twĩ Mwei wa 1, 1990, myei thanthatũ kuma Fernando ambĩĩa kwĩmanyĩsya, nĩwavatisiwe. Ĩtina wa ũũ, nĩwoosie ũvainia wa kĩla ĩvinda. Nũndũ yu vaĩ Ngũsĩ kĩsionĩ kya Algeciras, ovisi wa ũvonge nĩwoonie vate mũisyo kũtũma mavainia ma kĩla ĩvinda kĩsionĩ kĩu. Na twĩ Mwei wa 2, 1992, kĩkundi nĩkyambĩĩiwʼe taoninĩ ĩsu.

We Fernando atavanasya o vau kwoo? Aiee. Ĩtina wa kũtwaana, e na mũka mathamĩĩie taoninĩ yĩtawa San Vicente del Caguán, vala vataĩ Ngũsĩ o na ĩmwe. Me kũu, nĩmatetheeisye vambĩĩwʼa kĩkundi. Twĩ 2002, Fernando nĩwatwʼĩkĩthiwʼe mũsyaĩĩsya wa mũthyũlũlũko, na e na mũka, Olga, nĩmaendeee na wĩa wa kũthyũlũlũka nginya ũmũnthĩ.

Ũndũ ũsu wamanyĩisye vata wa kũmũvoyaa Yeova kuma ngoonĩ ĩũlũ wa kĩndũ o na kĩva kĩkonetye ianda sitũ. Yeova ekaa maũndũ ala tũtatonya kwĩka. Na ũu nĩ wʼo nũndũ ngetha ĩno nĩ yake, ti yitũ.—Mt. 9:38.

Twĩ 1990, nĩtwatwʼĩkĩthiwʼe asyaĩĩsya ma kũthyũlũlũka. Mũthyũlũlũko witũ wa mbee waĩ taoninĩ nene ya nthĩ ĩsu yĩtawa Bogotá. Twaĩ na kĩũũyũ tũyona ta tũteanĩsya kĩanda kitũ nesa. Nĩ na kĩveti kyakwa twĩ o andũ ma kĩlasi kya nthĩ mate na inengo sya mwanya. Na tũyamanyĩĩte kwĩkala taoninĩ yĩ andũ aingĩ. Ĩndĩ Yeova nĩweanĩisye watho ũũ wake wĩ Avilivi 2:13: “Ngai nĩwe ũmũnengae vinya na akamũnenga wendi na ũtonyi wa kwĩka maũndũ onthe ala we wendaa.”

Ĩtina, nĩtwatũmiwe mũthyũlũlũkonĩ wĩ ĩla taoni nĩwetie mwambĩĩonĩ yĩtawa Medellín. Andũ kũu nĩmamanyĩĩte ithokoo nginya o na mayatelemawʼa nĩsyo. Kwa ngelekanyʼo, ĩvinda yĩmwe nĩendeee kwĩmanyĩsya Mbivilia na mũndũ, ve andũ nĩmambĩĩie kũathangana na mavuti nza wa nyũmba ĩla twaĩ. Naĩ vakuvĩ kũvalũka, ĩndĩ mũmanyĩwʼa wakwa aendeeie kũsoma kalungu o auĩtye. Amina kũsoma, eetisye mwanya aumaale. Ĩtina wa ĩvinda, asyokie na twana twĩlĩ na asya ũũ auĩtye, “Nĩ vole, nĩendete kwosa twana twakwa.”

Ve o mavinda angĩ twaĩ mũisyonĩ. Ĩvinda yĩmwe tũendeee kũtavanyʼa nyũmba kwa nyũmba, Sirkka nĩwookie vala nĩĩ asembete na atelemete mũno. Aisye kana ve mũndũ wendaa kũmũatha. Kĩu kyandelemilye mũno. Ĩndĩ ĩtina, nĩtwesie kũmanya kana mũndũ ũsu ndendaa kũmũatha, ĩndĩ aathaa mũndũũme ũngĩ wesĩlĩte vakuvĩ nake.

Ĩtina wa ĩvinda, nĩtwamanyĩie ithokoo ila syaĩ taoninĩ ĩsu. Nĩtweekĩawa vinya nĩ wũmĩĩsyo wa Ngũsĩ ila syaĩ kĩsionĩ kĩu, ila syakomanaa na maũndũ ta asu na angĩ momũ mũnango. Twaisye kana ethĩwa Yeova nũmatetheesye, o naitũ nũkũtũtetheesya. Kĩla ĩvinda nĩtwaatĩĩaa ũtao ũla twanengawe nĩ atumĩa, nĩtwosaa matambya ma kwĩsũvĩa, na ĩndĩ nĩtwaekaa maũndũ ala angĩ mokonĩ ma Yeova.

Ĩndĩ mavinda angĩ maũndũ mayeethĩawa me mathũku ũndũ twasũanĩaa. Kwa ngelekanyʼo, ĩvinda yĩmwe, nĩneewie wasya ũilye ta wa aka elĩ meũtetanyʼa na wasya mũnene nza wa nyũmba ĩla nathokeete. Nyie ndyendaa kwĩloela andũ meũtetanyʼa, ĩndĩ mwene nyũmba nĩwambĩsũvie nũke valandanĩ. Na ĩndĩ nĩnamanyie kana ti andũ matetanasya, ĩndĩ twaĩ tũsũni twĩlĩ twĩtawa kasũkũ twakwetye kwekeeka atũi.

Twĩ 1997, nĩnanyuviwe nĩtwʼĩke mwalimũ wa Sukulu ya Kũmanyĩsya Maũndũ ma Ũthũkũmi. b Nĩnendete mũno kũthi sukulu ila ivangĩthawʼa nĩ ũseũvyo, ĩndĩ ndyaasũanĩa kana no nĩse kwĩthĩwa na kĩanda kya kũmanyĩsya sukulu ĩmwe katĩ wa isu.

Ĩtina, nĩnanyuviwe nĩthĩwe mũsyaĩĩsya wa kĩvalo. Na yĩla mũvango ũsu waũngamiwʼe nĩnasyokie wĩanĩ wa kũthyũlũlũka. Kwoou kwa ĩvinda ya myaka mbee wa 30, nĩndanĩĩte ianda syĩ kĩvathũkanyʼo, ta kwĩthĩwa nĩ mwalimũ na mũsyaĩĩsya wa kũthyũlũlũka. Ianda isu nitumĩte ngwata moathimo maingĩ. Ĩndĩ maũndũ mayĩthĩĩtwe me o katheeo. Ekai nĩmũelesye.

 Nyie nĩthĩawa na kĩthito na ũkũmbaũ. Kĩu nĩkĩndetheesye ngakĩlya vinya maũndũ momũ. O na vailye ũu, ve mavinda amwe nĩthĩawa na kĩthito kingĩ mũno kya kũlũnga maũndũ ikundinĩ. O na mavinda angĩ nĩnĩkĩaa angĩ vinya mũno mende ala angĩ na maimasũanĩaa. Ĩndĩ kũneena ũwʼo, mavindanĩ asu ninyie ndethĩawa na nguma isu.—Alo. 7:​21-23.

Nũndũ wa kwĩthĩwa na mawonzu asu, mavinda amwe nĩndũlĩkaa ngoo. (Alo. 7:24) Ve ĩvinda yĩmwe namũvoyie Yeova namwĩa kana wĩthĩwa wĩ ũndũ mũseo ngaeka kũtwʼĩka misonalĩ na ndisyoka Finland. Mũthenya ũsu ĩ-ya-mawĩoo, nĩnaendie ũmbanonĩ wa kĩkundi. Ũmbano ũsu nĩwambĩkĩie vinya na wandĩkĩĩthya kana naĩlĩte kũendeea na kĩanda kyakwa na ndiendeea kwĩkĩa kĩthito nĩkĩlye vinya mawonzu makwa. Nginya ũmũnthĩ, nĩngiitawa ngoo mũno nĩ ũndũ Yeova wasũngĩie mboya ĩsu kwa nzĩa nzeo. O na ĩngĩ, nĩndũngaa mũvea mũno nũndũ nũndetheesye o nesa ngakĩlya vinya mawonzu makwa.

Nĩ na Sirkka nĩtũmũtũngĩaa Yeova mũvea mũno nũndũ wa kũtũnenga kĩanda kya kũtũmĩa vakuvĩ thayũ witũ wʼonthe ũthũkũminĩ wa ĩvinda yonthe. O na nĩnĩmũtũngĩaa mũvea mwingĩ nũndũ wa kũnenga kĩveti kĩthĩĩtwe kĩmbendete na kĩ kĩĩkĩĩku myaka ĩsu yonthe.

O mĩtũkĩ, nĩngũvikya myaka 70 na ndieka kwĩthĩwa nĩ mwalimũ na mũsyaĩĩsya wa kũthyũlũlũka. Ĩndĩ kĩu kĩinthatasya. Nĩkĩ? Nũndũ nĩnĩĩkĩĩe vyũ kana kĩla kĩtumaa Yeova ataĩwa nĩ kũmũthũkũma twĩnyivĩtye na tũimũtaĩa kũma ngoonĩ twĩ na wendo na tũimũtũngĩa mũvea. (Mika 6:8; Mko. 12:​32-34) Nĩ kana tũmũtaĩe Yeova, ti nginya twĩthĩwe na kĩanda kya mwanya.

Natata kũsũanĩa ianda ila nĩthĩĩtwe nditanĩa, nĩnĩmanyaa kana ndyaaikwata nũndũ nĩ wa vata mũno kũvĩtũka angĩ, kana nũndũ wa inengo sya mwanya nĩ nasyo. Ĩndĩ Yeova anengie ianda isu nũndũ wa ũseo wake mwingĩ. Na eekie ũu o na kũtwʼĩka nĩ o na mawonzu. Nĩnĩsĩ nesa kana no Yeova ũndetheesye kwĩanĩsya ianda isu. Kĩu nĩkĩtumĩte vinya wa Ngai woneka nesa mawonzunĩ makwa.—2 Ako. 12:9.