Mono butukaka na 1955. Beto kele bana tatu ya babakala na dibuta na beto mpi mono kele mwana ya nsuka. Mono yelaka pene-pene ya sudi ya Finlande na mbanza mosi yina bo ke bingaka bubu yai nde Vantaa.

Mama bakaka mbotika mpi kumaka Mbangi ya Yehowa bamvula fioti na ntwala nde mono butuka. Kansi papa vandaka kutelemina kieleka mpi yandi vandaka kupesa ve mama nswa ya kulonguka Biblia ti beto to ya kunata beto na balukutakanu. Yo yina mama vandaka kulonga beto malongi ya ntete-ntete ya Biblia kana papa kele ve.

Banda kileke, mono vandaka kuzola kulemfukila Yehowa. Mu mbandu kilumbu mosi, ntangu mono vandaka ti bamvula 7, longi na beto wilaka mono makasi mingi kibeni sambu mono buyaka kudia verilättyjä (bagato yina bo ke salaka ti menga na Finlande). Yandi bwetaka mono na munoko mpi yandi bakaka kitini ya gato yina na nsomo mpi yandi sosaka kukotisa mono yo na munoko na kingolo-ngolo. Kansi mono bulaka nsomo yina diboko mpi yo bwaka.

Papa fwaka ntangu mono vandaka ti bamvula 12. Na nima na yo, mono kumaka kukwenda na balukutakanu ya dibundu. Bampangi na dibundu vandaka kutudila mono dikebi mpi yo salaka nde mono yela na kimpeve. Mono yantikaka kutanga Biblia konso kilumbu mpi mono vandaka kulonguka mbote-mbote mikanda na beto ya ke tendulaka Biblia. Mambu ya mbote yina mono vandaka kusala, sadisaka mono na kubaka mbotika ntangu mono kumaka ti bamvula 14. Yo vandaka na 8 août 1969.

Kaka ntangu mono manisaka nzo-nkanda, mono kumaka mupasudi-nzila ya ntangu yonso. Na nima ya mwa bamposo, mono kwendaka na Pielavesi, pene-pene ti kati-kati ya Finlande, kisika yina mpusa ya bansamuni vandaka mingi.

 Na Pielavesi, mono kutanaka ti Sirkka, mwana-nkento yina kumaka nkento na mono ya mono ke zolaka mingi. Mono zolaka yandi mingi sambu na kudikulumusa na yandi mpi kimpeve na yandi ya ngolo. Yandi vandaka ve kusosa kukuma muntu ya lukumu to kukuma ti bima mingi ya kinsuni. Beto yonso zole vandaka ti mpusa ya ngolo ya kusala mingi na kisalu ya Yehowa mpi beto zolaka kusala konso kisika yina bo ta tinda beto. Beto kwelanaka na 23 mars 1974. Na kisika ya kukwenda konso kisika yina beto me zola sambu na kulutisa ntangu ya mbote na nima ya makwela na beto, beto kwendaka na Karttula, mbanza mosi ya fioti na Finlande, kisika yina mpusa ya bansamuni ya Kimfumu vandaka mingi kibeni.

Banda na luyantiku ya makwela na beto, Yehowa me monisaka beto nde yandi ta lungisa bampusa na beto ya kinsuni kana beto ke sosa ntete Kimfumu na yandi. (Mat. 6:33) Mu mbandu, beto vandaka ve ti kamio na Karttula. Ntete, beto vandaka kusala ba voyage na velo. Kansi na nsungi ya hiver, madidi ke vandaka mingi kibeni kuna. Yo yina, beto vandaka ti mfunu ya kamio sambu na kulonga nsangu ya mbote na teritware ya nene yina beto vandaka ti yo. Kansi beto vandaka ve ti mbongo ya kusumba kamio.

Na kintulumukina, mbuta na mono ya bakala kwisaka kutala beto. Yandi kabilaka beto kamio na yandi na luzolo yonso. Yandi futaka dezia mbongo yina bo ke futaka sambu na bakamio (assurance). Yo lombaka kaka nde beto sumba esanse. Beto kumaka ti kamio yina beto vandaka ti yo mfunu.

Yehowa monisaka beto nde yandi bakaka mukumba ya kulungisa bampusa na beto ya kinsuni. Yo lombaka kaka nde beto tula mambote ya Kimfumu na kisika ya ntete.

Ntangu beto kotaka na Nzo-Nkanda ya Bapasudi-Nzila na 1978, mpangi Raimo Kuokkanen a yina vandaka mpi longi na nzo-nkanda yango, songaka beto nde yo ta vanda mbote kana beto fulusa formilere sambu na kukota na Nzo-Nkanda ya Gileade. Yo yina beto yantikaka kulonguka Kingelesi sambu na kulungisa lukanu yina. Kansi na 1980, na ntwala nde beto fulusa formilere ya Nzo-Nkanda ya Gileade, bo bingaka beto na Betele ya Finlande. Na ntangu yina, bampangi yina vandaka kusala na Betele, lendaka ve kufulusa formilere ya Nzo-Nkanda ya Gileade. Kansi beto zolaka kusadila Yehowa kisika yina yandi vandaka kumona nde yo me fwana sambu na beto kansi ve kisika yina beto mosi vandaka kuzola. Yo yina beto ndimaka kukwenda na Betele. Kansi  beto landaka kulonguka Kingelesi sambu beto zabaka nde mbala ya nkaka beto lenda zwa dibaku ya kufulusa formilere ya Nzo-Nkanda ya Gileade.

Mwa bamvula na nima, Nto-Kimvuka tubaka nde bampangi ya ke salaka na Betele lendaka kufulusa mpi formilere ya Nzo-Nkanda ya Gileade. Kaka na ntangu yina, beto fulusaka baformilere ya Nzo-Nkanda ya Gileade. Kansi yo ke tendula ve nde beto vandaka kusepela ve ti Betele. Nkutu, beto vandaka kusepela mingi na Betele. Beto vandaka kaka kuzola kusala kisika yina mpusa vandaka mingi kana beto kota na Nzo-Nkanda ya Gileade. Beto kotaka Nzo-Nkanda ya Gileade ya 79 mpi beto bakaka maplome na septembre 1985. Bo tindaka beto na Colombie.

Bo tindaka beto ntete na Betele ya Colombie. Mono salaka yonso yina mono lendaka kusala na Betele ya Colombie kansi na nima ya mvula mosi, mono monaka nde yo lombaka nde bo tinda beto kisika ya nkaka. Yo yina, mono lombaka nde bo tinda beto kisika ya nkaka. Yo vandaka mbala ya ntete mpi ya nsuka na luzingu na mono yina mono lombaka nde bo tinda beto kisika ya nkaka. Na nima, bo tindaka beto bamisionere na mbanza Neiva yina kele na provense ya Huila.

Mono vandaka kusepela mingi ti kisalu ya kulonga nsangu ya mbote. Ntangu mono vandaka mupasudi-nzila na Finlande mpi ntangu mono vandaka ntete ve ti nkento, bantangu ya nkaka, mono vandaka kulonga nsangu ya mbote banda na suka-suka tii na nkokila. Na luyantiku ya makwela na beto, mono ti Sirkka vandaka kulonga mpi nsangu ya mbote kilumbu ya mvimba. Ntangu beto vandaka kulonga nsangu ya mbote na bateritware ya ntama, bantangu ya nkaka beto vandaka kulala na kamio na beto. Yo vandaka kusala nde beto pema mwa fioti mpi na suka-suka beto telema diaka ti ngolo sambu na kuyantika kilumbu.

Ntangu beto kumaka bamisionere na teritware, beto waka diaka kiese yina beto vandaka kuwa ntete ntangu beto yantikaka kulonga nsangu ya mbote. Dibundu na beto yelaka mpi bampangi ya Colombie vandaka luzitu, zola mpi bo vandaka kumonisa ntonda.

Pene-pene ti mbanza Neiva, bambanza mingi ya nkaka vandaka ve ata ti Mbangi ya Yehowa mosi. Mono vandaka kudiyangisa mingi sambu mono vandaka kuzaba ve nki mutindu bantu ya bambanza yina lenda wa nsangu ya mbote. Kansi sambu na mavwanga ya bitumba yina vandaka kubasika kuna, yo vandaka ve bisika ya lutaninu sambu na banzenza. Yo yina mono sambaka nde ata muntu mosi na bambanza yina kukuma Mbangi ya Yehowa. Mono yindulaka nde muntu yango fwete vanda muntu mosi yina me katuka na bambanza yina mpi me kwisa kuzinga na Neiva sambu yandi longuka kieleka. Mono sambaka mpi nde kana muntu yango me baka mbotika, yandi fwete yela na kimpeve mpi yandi vutuka na mbanza na bo sambu yandi longa nsangu ya mbote. Yo lombaka nde mono zaba nde Yehowa vandaka ti bangindu ya mbote kuluta ya mono.

Ntangu fioti na nima, mono yantikaka kulonguka Biblia ti Fernando González, toko mosi ya bakala. Yandi vandaka kuzinga na Algeciras yina vandaka mpi na kati ya bambanza yina vandaka ve ata ti Mbangi ya Yehowa mosi. Fernando vandaka kusala bakilometre kuluta 50 konso mposo sambu na kukwisa kusala na Neiva. Yandi vandaka kuyilama mbote na ntwala ya kulonguka Biblia mpi kukonda kusukinina, yandi yantikaka kukwisa na balukutakanu yonso. Na mposo ya ntete yina Fernando yantikaka kulonguka Biblia, yandi vandaka kuvukisa bantu na mbanza na bo mpi yandi vandaka kulonga bo mambu yina yandi vandaka kulonguka.

 Yandi bakaka mbotika na janvier 1990, bangonda 6 na nima ya kulonguka Biblia. Na nima, yandi kumaka mupasudi-nzila ya ntangu yonso. Mbanza Algeciras kumaka ti Mbangi ya Yehowa mosi, yo yina Betele monaka nde yo fwanaka nde bo tinda bapasudi-nzila ya nene kuna sambu bo ta vanda na lutaninu. Na février 1992, dibundu mosi kangukaka na mbanza yina.

Keti Fernando sukaka kaka na kulonga nsangu ya mbote na mbanza na bo? Ve. Na nima ya makwela na bo, yandi ti nkento na yandi kwendaka na San Vicente del Caguán, mbanza ya nkaka yina vandaka mpi ve ti Bambangi ya Yehowa. Kuna, bo kangulaka mpi dibundu. Na 2002, mpangi Fernando kumaka nkengi ya nziunga. Yandi ti nkento na yandi Olga ke landa kaka kusala kisalu ya nziunga tii bubu yai.

Mambu yina yonso sadisaka mono na kubakisa mfunu ya kutuba na pwelele yonso na kisambu mambu yonso yina beto kele ti mfunu na yo na yina me tala mikumba yina beto fwete lungisa na kisalu ya Yehowa. Yehowa ke salaka mambu yina beto ta kuka ve kusala. Nkutu kisalu ya kukatula bima na bilanga kele kisalu na yandi kansi ya beto ve.—Mat. 9:38.

Na 1990, Beto kumaka na kisalu ya nziunga. Kisika ya ntete yina bo tindaka beto vandaka Bogotá, nto-mbanza ya Colombie. Beto waka boma nde beto ta kuka ve kulungisa mukumba yina. Mono ti nkento na mono, beto kele ve ti makuki mingi mpi beto me yikamaka ve ti luzingu na bambanza ya nene. Kansi Yehowa lungisaka lusilu na yandi yina kele na Bafilipi 2:13. Yo ke tuba nde: “Nzambi muntu ke pesaka beno kikesa sambu na mambu yina ke pesaka yandi kiese, mpi yandi ke pesaka beno nzala ti ngolo ya kusala mambu.”

Na nima, bo tindaka beto na kusala kisalu ya nziunga na mbanza Medellín, yina mono tubilaka na luyantiku. Kuna, bantu me yikamaka ti mubulu yina ke salamaka mingi na babala-bala mpi bo ke waka diaka ve boma. Mu mbandu, kilumbu mosi ntangu mono vandaka kulonguka Biblia ti muntu mosi na kati ya nzo, bantu ya nkaka na nganda yantikaka kudibula masasi. Mono zolaka kubwa na ntoto kansi muntu yina beto vandaka kulonguka ti yandi Biblia, vandaka kaka kutanga paragrafe mpi yandi vandaka ve kuwa boma. Ntangu yandi manisaka kutanga, yandi songaka mono nde mono lolula yandi mwa fioti mpi yandi kwendaka na nganda. Na nima mwa ntangu, yandi vutukaka ti bana-fioti zole mpi yandi tubaka ti ntima-madidi yonso nde: “Pardo, mono kwendaka kubaka bana na mono.”

Bantangu ya nkaka, beto kutanaka mpi ti bigonsa ya nkaka. Kilumbu mosi, ntangu beto vandaka kulonga nsangu ya mbote nzo na nzo, nkento na mono kwisaka ntinu na mono mpi yandi vandaka na boma mingi. Yandi tubaka nde muntu mosi bulaka yandi masasi kansi yo simbaka yandi ve. Yo pesaka mono boma mingi kibeni. Kansi na nima, bo songaka beto nde muntu yina zolaka ve kubula Sirkka kansi yandi vandaka kubula muntu ya nkaka yina vandaka kuluta na lweka ya Sirkka.

Na nima ya mwa ntangu, beto yikamaka ti mubulu yina vandaka kusalama kuna. Kikesa ya bampangi ya kisika yina vandaka kupesa beto mpi kikesa, sambu bo vandaka kukutana ti mambu mingi ya mutindu yina mpi ya nkaka ya mpasi mingi kuluta. Beto bakisaka nde kana Yehowa vandaka kusadisa bo, yandi ta sadisa beto mpi. Ntangu yonso, beto vandaka kulanda bandongisila ya bankuluntu ya mabundu ya bisika yina, beto vandaka kuditanina mpi beto vandaka kubika mambu yonso na maboko ya Yehowa.

Ya kieleka, mambu ya nkaka vandaka ve kibeni kigonsa mutindu beto vandaka kuyindula.  Kilumbu mosi, ntangu mono kwendaka kulonga nsangu ya mbote na nzo mosi, mono waka bonso nde bankento zole vandaka kuswana mpi kudifinga na nganda. Mono vandaka ve kusepela kutala bantu ke swana kansi munkwa ya nzo songaka mono na kuvanda na veranda na yandi. Ntangu mono vandaka, mono bakisaka nde yo vandaka batiaku zole yina vandaka kufulula bantu yina vandaka kuzinga pene-pene ti bo.

Na 1997 bo tulaka mono longi na Nzo-Nkanda Yina Ke longaka Mutindu ya Kusala Kisalu. b Mono vandaka kusepela kukota na banzo-nkanda ya Kimfumu, kansi mono vandaka kuyindula ve nde mono ta zwa mukumba ya nene ya kukuma mpi longi na nzo-nkanda yango.

Na nima mono kumaka nkengi ya distrike. Ntangu bo fwaka kisalu ya kinkengi ya distrike, mono vutukaka nkengi ya nziunga. Yo yina bamvula kuluta 30 mono vandaka na kiese ya kuvanda longi na nzo-nkanda ya Kimfumu mpi na kuvanda nkengi ya nziunga. Yo me natilaka mono mambote mingi. Kansi mambu yonso vandaka ve pete. Inki mutindu?

Mono ke vandaka kikesa mpi mono ke kuditudilaka ntima. Yo me sadisaka mono ntangu mono kutanaka ti mambu ya mpasi. Kansi bantangu ya nkaka kikesa na mono vandaka kuluta ndilu ntangu mono vandaka kusosa kuyidika mambu na mabundu. Kilumbu mosi, mono songaka bampangi ya nkaka na kusadila bantu mambu na zola mpi na kuvanda ve makambu ngolo. Kansi na bantangu yo yina, mono mosi vandaka ve ti bikalulu yango.—Bar. 7:21-23.

Bantangu ya nkaka, mono vandaka kulemba kibeni nitu sambu na bifu na mono. (Bar. 7:24) Kilumbu mosi mono songaka Yehowa nde yo ta vanda mbote nde mono yambula kisalu ya kimisionere mpi mono vutuka na Finlande. Kaka kilumbu yina na nkokila, mono kwendaka na lukutakanu mosi ya dibundu. Kikesa yina mono bakaka na lukutakanu yina ndimisaka mono nde mono fwete landa kaka kusala kisalu ya kimisionere mpi mono fwete landa kusala bikesa ya kukatula bifu na mono. Tii bubu yai, yo ke yitukisaka mono kibeni mutindu Yehowa pesaka mvutu na kisambu na mono na pwelele yonso. Diaka, mono ke pesaka yandi mersi mingi mutindu yandi me sadisaka mono na kukatula bifu na mono.

Mono ti Sirkka, beto ke pesaka Yehowa mersi mingi mutindu yandi me pesaka beto dibaku ya kulutisa luzingu na beto ya mvimba na kisalu ya ntangu yonso. Mono ke pesaka mpi Yehowa mersi mingi mutindu yandi me pesaka mono nkento ya zola mpi ya kwikama ya me sadisaka mono bamvula yai yonso.

Ntama mingi ve mono ta lungisa bamvula 70 mpi mono ta yambula mikumba na mono ya kuvanda longi na nzo-nkanda ya Kimfumu mpi ya kuvanda nkengi ya nziunga. Kansi yo ke yangisa mono ve. Sambu na nki? Sambu mono ke ndima kibeni nde Yehowa ke sepelaka mingi ntangu beto ke sadilaka yandi na kudikulumusa yonso mpi ntangu beto ke kumisaka yandi na ntima na beto ya mvimba sambu beto ke zolaka yandi mpi beto ke monisilaka yandi ntonda. (Mika 6:8; Mar. 12:32-34) Yo ke lombaka kaka ve nde beto vanda ti mikumba sambu na kukumisa Yehowa.

Kana mono yindula, mono ke bakisaka nde mono bakaka ve mikumba yina yonso sambu mono me luta bantu ya nkaka to sambu mono kele ti makuki mingi kuluta bo. Yo kele ve mutindu yina. Kansi Yehowa pesaka mono mikumba yina sambu na ntima na yandi ya mbote. Yandi pesaka mono yo ata mono vandaka ti bifu. Mono ke zaba nde mono kukaka kulungisa mikumba yina kaka ti lusadisu ya Yehowa. Yo yina, bifu na mono me monisaka kibeni ngolo ya Nzambi.—2 Bak. 12:9.