1955-imi nukappiaqqani pingasuusuni nukarlersaallunga inunngorpunga. Finlandip kujataata sineriaata ungasin­ngisaani, Vantaami, peroriar­torpunga.

Ukiualuit suli inunngun­ngitsunga anaana Jehovap Nalunaajaasuisut imermut morsutsin­neqarsimavoq. Ataatali akerlilersuisuuvoq, anaanamalu Biibilimik uagutsinnik ilinniar­titsinissaa ataatsimiigiaqatigisar­nissaaluunniit akuerinngilaa. Taamaattumik Ataata peqanngik­kaangat anaanap Biibilimit ilumoortut pillugit ilinniar­tittarpaatigut.

Meeraal­lungali Jehova naalakkusulerpara. Assersuutigalugu arfineq-marlunnik ukioqarlunga ilinniar­titsisuma kamaammiuppaanga verilättyjä-mik nererusun­nginnama (Finlandimiut pannakaaliarisartagaat aattalik). Ulussakkut tigullunga aatsartin­niarsarilerpaanga ajassaammillu pannakaalimmik oqummius­sitinniarsarilerlunga, siggukkali ipummeq­qavakka. Ajassaat assaaniit patippara nakkartillugu.

Aqqaneq-marlunnik ukioqarlunga ataata toquvoq. Taava ilagiit ataatsimiit­tarnerinut najuuttalerpunga. Qatanngutit angutit ilagiin­niittut isumassorpaannga, tamannalu Jehovamut qanimut attaveqaler­nissannut iluaqutigaara. Ullut tamaasa Biibili atuartalerpara misissueq­qissaarnerlu nuannaringaalerlugu. Pimoorus­sillunga taamaaliortarama aggustip 8-anni 1969-imi 14-inik ukioqarlunga  imermut morsutsitaanissannut piareerpunga.

Atuarfimmiit soraarum­meqqammerlunga pionerin­ngorpunga. Sapaatit-akunneri arlaqan­ngitsut qaangiummata pisariaqar­titsiffiusumut, Finlandip qeqqata eqqaaniittumut Pielavesimut, nuuppunga.

Pielavesimi Sirkka, nuliariligara, naapippara. Maniguut­tuummat Jehovalu qamannga pisumik asammagu nuannareqaara. Nuimasumik inissisimaf­feqarniar­tuunngilaq pigisatigul­luunniit ilorrisimaar­niartuunani. Marluulluta, aamma uagutsinnut suliassiis­sutigineqartoq suugaluarpal­luunniit, sapinngisatsinnik Jehovamut kiffartorusuppugut. Marsip 23-anni 1974-imi katippugut. Katernaatut angalanata Karttulamut oqaluus­sisartunik pisariaqar­titsiffiusumut nuulluta aallarpugut.

Katerngaajunitsinniilli Jehovap ersersippaa kunngeqarfini salliuk­kutsigu pigisatigut pisariaqar­titatsinnik isumagiumaarluta. (Mat 6:33) Assersuutigalugu Karttulami biileqan­nginnatta sikkiler­tarpugut. Ukiormalli nillertippoq. Ilagiillu oqaluus­siffigisartagaat isorartummat biileqar­tariaqarpugut. Biilitaar­nissatsinnulli akissaqan­ngilagut.

Naatsorsuutigin­ngisatsinnik angajuma tikeraarpaatigut. Biilini uagutsinnut tunniuppaa! Sillimmataa akilereersimavoq, taamaallaat orsussaa akilertar­tussaavarput. Taamaalilluta pisariaqar­titatsinnik biilitaarpugut.

Jehovap ersersippaa timikkut pisariaqar­titagut isumaginiarlugit. Uagut akisussaaf­figiinnarparput kunngeqarfiata salliunnissaa.

1978-imi Pionerinut Ilinniarfim­miitilluta Raimo Kuokkanenip, a ilinniar­titsisutta ilaata, kajumis­saarpaatigut Ilinniarfimmut Gileadimut qinnuteqaq­qulluta. Piukkun­narsarumalluta tuluttut ilinnialerpugut. 1980-imili suli qinnuteqan­ngitsugut Finlandimi Betelimut qaaqquneqarpugut. Taamani Betelimi kiffartortut Gileadimut qinnuteqaq­qusaanngillat. Uagulli iluarisarput pinnagu Jehovap iluarisaani kiffartor­nissarput kissaatigaarput. Taamaattumik Betelimi kiffartor­nissarput akueraarput. Tuluttulli ilinniar­tuarpugut Gileadimut qinnuteqar­nissamut periarfis­saqalis­sagaluarutta.

Ukiualuit qaangiummata Siulersuisoqatigiit aalajangermata Betelimi kiffartortut Gileadimut  qinnuteqarsinnaasut ingerlaannaq qinnuteqarpugut. Imaanngilaq Betelimiinnerput nuannarin­ngikkipput, kisiannili pisariaqar­titsiffiunerusumi kiffartor­nissamut piareersimanerput takutiin­narusupparput. Ilinniarfimmi Gileadimi klassit 79-issaannut qaaqquneqarpugut. 1985-imi septembarimi ilinniarnerput naammas­sigatsigu Colombiamut aallartus­sanngorpugut.

Colombiami Betelimi kiffartulerpugut. Suliassin­neqarninni sapinngisara tamaat iliorniarsarivunga, ukiorli ataaseq qaangiummat misigivunga allanngornissaq pisariaqar­tikkipput. Inuulil­laramali aatsaat ataasiaammik naggammillu allamik suliassin­neqaqqulluta aperivunga. Betelimi kiffartorun­naarluta Colombiap ilaani Huilamiittumi illoqarfimmut Neivamut aallartitaavugut.

Oqaluussineq nuannariuaan­narnikuuara. Kisimiik­kallarama Finlandimi pioneriullunga ilaannikkut ullaaralaamiit unnussuarmut oqaluus­sisarpunga. Aamma Sirkkalu katerlaajulluta ullut ilaat ulloq naallugu oqaluus­sisarpugut. Angerlarsimaf­fitsinniit ungasissumi oqaluus­sigaangatta ilaannikkut biilitsinni unnuisarpugut. Taamaalilluta piffissarujussuaq angalanermut atortariaqan­ngilarput aqaguanilu oqaluus­sinerput aallartiaarsin­naallutigu.

Oqaluus­sisartutut aallartitatut siornatigutulli oqaluussineq nuannareqisatsinnik aalluteq­qilerparput. Ilagiitsin­niittut amerliar­tulerput, qatanngutigullu Colombiamiut asannittut, ataqqinnittut qujamasuttullu asanaqaat.

Najugaqarfitta Neivap ungasip­pallaan­ngisaani illoqarfinni arlalinni Nalunaajaasoqanngilaq. Nutaarsiassat nuannersut aamma taakkunani oqaluus­sissutigineqar­nissaat kissaatigeqaara. Sumiiffinnili taakkunani pinerliiniaqatigiit akersuus­suataartarput, allamiullu tassunnar­nissaat navianarsinnaavoq. Taamaattumik Jehova qinnuigisarpara illoqarfinni taakkunani najugaqartut ilaat Nalunaajaasun­ngussasoq. Takorloor­tarpara inuk taanna sallusuissummik ilinnialissaguni Neivami najugaqar­tariaqartoq. Taamaat­tumillu qinnutigisarpara soqutiginnittoq imermut morsutsitaareernermi kingorna anersaakkut inersimal­luartun­ngussasoq oqaluus­siumallunilu illoqarfimminut uterusussasoq. Jehovali uanniit pitsaanerungaartumik aaqqiis­sutissaqarpoq.

Sivitsun­ngitsoq angut inuusuttoq Fernando Gonzálezimik atilik Biibilimik ilinniar­tittalerpara. Taanna Algecirasimi, illoqarfiit Nalunaajaasoqarfiun­ngitsut ilaanni, najugaqarpoq. Fernando Neivami sulisarpoq siumut utimullu katillugit kilometerit 100-t sinnerlugit angalasarluni. Biibilimik misissueqatigiin­nissatsinnut tamanut piareersarluartarpoq ingerlaannarlu ataatsimiigiar­talerluni. Fernandop ilikkak­kaminik illoqarfeqatini avitseqatigerusuppai. Sapaatip-akunnera taanna Biibilimik ilinniar­tinneqarnini aallartikkamiuk illoqarfimmini nammineq inuppaaluit ilinniar­tittalerpai.

1990-imi januaarimi, ukiup affaa Biibilimik ilinniar­tinneqar­talernermi kingorna, Fernando imermut morsutsitaavoq. Kingornalu pionerin­ngorpoq. Algecirasimiumik Nalunaajaasoqalermat immikkoor­tortaqarfik specialpionerinik illoqarfimmut tassunga aallartitaqar­nissamut navianarpal­laarunnaarpoq. 1992-imi februaarimi tassani ilagiit pilersin­neqarput.

 Fernando illoqarfim­miniinnaq oqaluussiva? Naamik, katereerluni nulianilu, Olga, San Vicente del Caguánimut, illoqarfimmut Nalunaajaasoqan­ngitsumut, nuupput. Tassani ilagiinnik pilersitseqataapput. 2002-mi Fernando ilagiinnik nakkutil­liisunngor­tinneqarpoq, nulianilu suli ilagiit tikeraarlugit angalasarput.

Misigisamit tamatumannga ilikkarpara kiffartor­nitsinnut tunngatillugu kissaatinik immikkut ittunik qinusarnissap pingaaruteqassusia. Sapikkagut Jehovap iliuuserisarpai. Jehovami katersuisarpoq, uaguunngitsoq. – Mat 9:38.

1990-imi ilageeqatigiinni angalasartutut kiffartulerpugut. Kiffartorfigisarput siulleq tassaavoq illoqarfiit pingaar­nersaat, Bogotá. Suliassaq merserivarput. Tassami nuliaralu inuinnaagatta nalinginnaasut, immikkut piginnaasaqan­ngilagut. Illoqarfis­suarmilu ulapaarfiusumi najugaqarneq sungiusiman­ngilarput. Jehovalli neriorsuutini Filippimiut 2:13-imiittoq eqqortippaa. Tassanimi ima allaqqavoq: “Guutimmi iluarisamisut ilioqqullusi nakussatsit­tarlusilu piumassuseqalersit­tarlusilu pissatsit­tarpaasi.”

Kingusin­nerusukkut Medellínimi, illoqarfimmi eqqaariikkanni, eqqaanilu ilagiit tikeraar­talerpagut. Aqqusinerni tassani akersuunnerit amerlangaarmata inuit tamanna sungiusimaan­nalersimavaat. Assersuutigalugu taamaallunga Biibilimik misissueqateqarlunga illup silatinnguani eqqaattoqalerpoq. Eqqarsarut­torlunga natermut paluniarlunga Biibilimik misissueqatima immikkoortoq atuaannarpaa. Immikkoortoq atuareeramiuk utoqqatseriarluni anillappoq. Kingorna uteqqikkami meeqqat marluk ilagalugit iserpoq. Eqqissisimallunilu oqarpoq: “Utoqqatserpunga meeqqakka aasariaqarakkit.”

Aamma pisuni allani navianar­torsiorpugut. Taamaalluta illumiit illumut oqaluus­sitilluta nuliama arpaannaq ornippaanga. Qarsungaqaaq, taava oqarpoq aallaariar­neqarsimalluni. Tupaqaanga. Kingusin­nerusukkulli paasivarput aallaasersortup Sirkka aallaariarnagu angut saneqquttoq eqqoriarsimagaa.

Piffissap ingerlanerani akersuunnerit ernumas­sutigiun­naarpagut. Uppeqatigut nunaqavissut eqqissisimanerat ilinniarfigeqaarput. Isummerpugut Jehovap taakku ikiormagit aamma uagut ikiorumaaraatigut. Utoqqaanertat siunnersuutaat tamatigut maleruar­tarpagut, qanorlu iliornis­satsinnik piareersar­tarpugut. Jehovamullu suna tamaat isumagisas­sanngor­tillugu.

Soorunami pisut ilaat navianar­tigisutut inneq ajorput. Taamaallunga pulaarlunga tusaavara arnaagunartut silami nilliallutik kamaattut. Kamaattut tusaarusun­ngilakka, kisianni pulaakkama oqarfigaanga anerasaar­tarfimmukaq­qullunga. Sunaaffa papikuujut marluk pulaakkama sanilii kamaattut ilaaraat.

1997-imi Kiffartortut Toqqakkat Ilinniarfianni b ilinniar­titsisun­ngortin­neqarpunga. Peqatigiis­sortatta  ilinniarfiini ilinniarnera qujamasuutigiuaan­narpara. Takorloorsiman­ngisaan­narparali ilinniarfimmi allanik ilinniar­titsinissamik immikkut pisinnaatitaaf­feqaler­nissara.

Kingusin­nerusukkut ilageeqatigiinnik arlalinnik nakkutil­liisutut kiffartulerpunga. Tamanna atorunnaarsin­neqarmat ilagiinnik nakkutil­liisutut kiffartoq­qilerpunga. Tassa ukiut 30-t sinnerlugit ilinniar­titsisutut nakkutil­liisutullu angalasartutut kiffartornera nuannaarutigisimavara. Suliassin­neqarnerit taakku pilluaq­quneqaatigisimaqaakka. Ajornaatsuin­naajuaan­nanngilarli, tamanna nassuialaassavara.

Inuuvunga tunuarsimaan­ngitsoq. Tamannalu pisuni ajornakusoortuni iluaqutigisarsimavara. Taamaattorli ilaannikkut ilagiinni aaqqitas­saqaraangat ilungersorpal­laartarsimavunga. Ilaannikkut uppeqatima ilaat asannit­tooqqullugit allanullu ingasap­pallaartumik piumasaqaq­qunagit tamaviaarlunga kajumis­saarisimavunga – aali nammineq tamanna pikkorif­figinerusin­naagaluarlugu. – Rom 7:21-23.

Kukkussutikka ilaannikkut pissutigalugit assut nikallor­toortarpunga. (Rom 7:24) Taamaallunga qinutillunga Jehova oqarfigaara Colombiami kiffartornera qimallugu Finlandimut uteruma ajunngin­nerussasoq. Ulloq taanna unnukkut ataatsimiit­tarfitsinni ataatsimiippugut, tassanilu saqqummiun­neqartut ima qiimmal­laatigitigaakka isummerlunga Colombiamiigin­nassalluta namminerlu inuttut sulissutigisassakka sulissutigiuarlugit. Ulloq manna tikillugu killitsis­sutigisarpara eqqarsaatigigaangakku Jehovap qinnutiga taanna qanoq akisimagaa. Qujamasuutigeqaaralu asannilluni sanngiissutima sulissutiginis­saannik ikiorsimammanga.

Sirkkalu inuunitta annersaa piffissaq tamaat kiffartornermut atorsin­naasimagatsigu Jehovamut qujamasoqaagut. Jehovamullu qujassutis­saqaqaanga asannittumik aalajaatsumillu nuliaqar­timmanga.

70-iliingajalerpunga, taamaattumik ilinniar­titsisutut nakkutil­liisutullu angalasartutut unissaanga. Tamannali nikalluutigin­ngilara. Upperil­luinnarakkumi anneruniajuitsuulluta uummammik pisumik asannittumik qujamasut­tumillu kiffartornerput Jehovamut ataqqinaataasoq. (Mika 6:8; Mak 12:32-34) Jehova ataqqiumagaanni nuimasumik suliassin­neqartariaqan­ngilagut.

Suliassin­neqarnikka eqqaagaangakkit paasisarpara imaanngitsoq allanit pitsaanerugama imaluunniit immikkut piginnaaneqarama taama suliassin­neqartunga. Taamaan­ngilluin­narpormi! Jehovap ajunngisaangaarnini pissutigalugu sanngiis­suteqaraluartunga suliassis­simavaanga. Paasivara Jehovap ikiuineratiguinnaq suliassiissutit taakku naammas­sisinnaallugit. Taamaalillutik sanngiis­sutikka Guutip pissaaneranik erseqqis­saasimapput. – Kor 2. 12:9.