Әз сала 1955-да һатьмә буйине. Дӧ бьред мьн һәнә, у йе һәри бьчʹук әз ьм. Әз башура Финландайе ль бәр бәʹре мәзьн бумә. Әв щи иро бажаре Вантаайе йә.

Чәнд сал пешийа кӧ әз һатьмә буйине, дийа мьн ча Шәʹде Йаһоԝа һатә ньхӧмандьне. Баве мьн мьԛабьли рʹастийе бу у изьн нәдьда, кӧ дийа мьн тʹәви мьн у бьред мьн Кʹьтеба Пироз лекʹолин кә у мә бьвә щьвата. Ләма жи, гава баве мьн малда нибу, әԝе һинкьрьнед сәрәкә жь Кʹьтеба Пироз әм һин дькьрьн.

Жь зарʹотийеда мьн гӧһ дьда Йаһоԝа. Мәсәлә, гава әз һʹәфт сали бум, дәрсдара мьн щарәке сәр мьн гәләк һерс кʹәт, чьмки мьн нәхԝәст хԝарьнәкә Финйи бьхԝьм, йа кӧ пе хуне те чекьрьне. Пе дәстәки хԝә әԝе дәве мьн зоре вәкьр у бь дәсте дьн, дьхԝәст кьдорәки бькә дәве мьн, ле мьн дәсте хԝә лехьст авит.

Гава әз 12 сали бум, баве мьн мьр. Паши мьрьна ԝи, әз ида чумә щьвата. Хушк у бьред щьвате гәләк гӧһ дьданә мьн, у ве йәке али мьн кьр кӧ әз дьһа незики Йаһоԝа бьм. Мьн Кʹьтеба Пироз һәр рʹож дьхԝәнд у әʹдәбйәтед мәйә сәр һʹиме Кʹьтеба Пироз бь хирәт лекʹолин дькьр. Бь сайа ве йәке, 8 Тʹәбахе сала 1969-да, гава әз 14 сали бум, әз һатьмә ньхӧмандьне.

 Паши хьлазбуна мәкʹтәбе, һьнә ԝәʹдә дәрбаз бу у әз бумә пешәнг. Паши чәнд һʹәфтийа, әз дәрбази бажаре Пйелавесийайе бум, незики мәркʹәза Финландайе, чьмки ԝедәре мьзгинван кем бун.

Ль Пйелавесийайе, мьн кәчʹькәкә бь наве Сирка нас кьр. Мьн ле һʹәз кьр, чьмки әԝ йәкә мьлук бу у Йаһоԝа һʹәз дькьр. Әԝе дина кәсед дьн нәдькʹьшандә сәр хԝә у әԝ пәй һәбуке нәдькʹәт. Мә дьхԝәст чь жь дәсте мә те бькьн, кӧ Йаһоԝарʹа хьзмәт кьн, у әм һазьр бун һʹәму хәбата кӧ мәрʹа бе дайине, бькьн. Сала 1974, 23 Адаре, әм зәԝьщин. Паши зәԝаще, дәԝса кӧ әм һәрʹьн һеса бьн, әм чунә бажаре Картулайе, чьмки ԝедәре һʹәԝщәтийа мьзгинвана һәбу.

Жь дәстпека зәԝаща мә Йаһоԝа нишани мә кьр, ԝәки һәрге әм жь һәр тьшти зедәтьр дина хԝә бьдьнә шьхӧле Пʹадшатийа ԝи, әԝе мә бьбә хԝәйи (Мәтта 6:33). Мәсәлә, Картулайеда, әʹрәба мә тʹӧнә бу у әм пе бисиклета дьчун-дьһатьн. Ле зьвьстана ԝедәре гәләк сар бу. Ләма жи бона хьзмәтийе мәрʹа әʹрәбә лазьм бу, ле пʹәре мә тʹӧнә бу, кӧ әм әʹрәбе хԝәрʹа бькʹьрʹьн.

Рʹожәке бьре мьни мәзьн һатә мала мә у әԝи әʹрәба хԝә пʹешкʹеши мә кьр. Хәрщед бона хԝәйкьрьна әʹрәбе һатьбунә дайине. Тʹәне лазьм бу, кӧ әм бензине бькʹьрʹьн. Паше ве йәке ида әʹрәба мә һәбу.

Әв йәк кӧ Йаһоԝа жь алийе материйали һаԛас бона мә хәм дькьр, мә фәʹм кьр, кӧ гәрәке әм жи щабдарийа хԝә биньн сери у жь һәр тьшти зедәтьр дина хԝә бьдьнә шьхӧле Пʹадшатийа ԝи.

Сала 1978-да, гава әм Мәкʹтәба бона Пешәнга дәрбаз дьбун, дәрсдаре мә Раимо Куоканен a әм һелан кьрьн, кӧ әм һәрʹьнә Мәкʹтәба Гиләде. Ләма жи мә дәстпекьр зьмане Инглизи һин бьн. Ле сала 1980-да, пешийа кӧ мә бланка бона Мәкʹтәба Гиләде тʹьжә кьра, мә тʹәглифи Бәйтʹәла Финландайе кьрьн. Ԝи чахи изьн тʹӧнә бу, кӧ Бәйтʹәлван һәрʹьн Мәкʹтәба Гиләде. Ле мә дьхԝәст, нә кӧ щийе кӧ мә  хԝәш те, ле щийе кӧ Йаһоԝа дьхԝазә, хьзмәт кьн. Ләма жи әм чунә Бәйтʹәле. Диса жи мә бәрдәԝам дькьр зьмане Инглизи һин бьн, ԝәки һәрге мәщал һәбә әм һәрʹьн Гиләде, әм ида бона ве йәке һазьр бьн.

Чәнд сал шунда, Кʹома Рʹебәрийе изьн да, ԝәки Бәйтʹәлван жи һәрʹьн Мәкʹтәба Гиләде. Мә дәрберʹа бланк тʹьжә кьр, ле нә кӧ бона ве йәке кӧ Бәйтʹәл мә хԝәш нәдьһат, ле чьмки нета мә әԝ бу, кӧ әм һинбуне бьстиньн у һәрʹьн щийе кӧ дьһа зедә аликʹари лазьм ә. Әм бона Мәкʹтәба Гиләде һатьнә ԛәбулкьрьне у сала 1985-да, әм кʹома 79 дәрбаз бун. Паше әм шандьнә Коломбйайе.

Ль Коломбйайе, пешийе мә Бәйтʹәледа кʹьфш кьрьн. Чь жь дәсте мьн дьһат мьн дькьр, ле паши саләке, әз һәвәки әʹщьз бум. Ләма жи, мә щара пешьн щабдарикә дьн хԝәст. У паше, мә ча мисйонер шандьнә бажаре Нейивайе.

Әз тʹьме жь хьзмәтийе шабуне дьстиньм. Финландайеда, гава әз һе нә зәԝьщи бум, әз ча пешәнг жь сьбәһе зу һʹәта еваре хьзмәтийеда бум. Гава әз зәԝьщим, мьн тʹәви Сиркайе тʹәмамийа рʹоже хьзмәт дькьр. Чахе әм бона хьзмәтийе дьчунә щийед дур, щарна әм әʹрәба хԝәда рʹадьзан. Бь сайа ве йәке, мә ԝәʹде хԝә ӧнда нәдькьр у дькарьбу рʹожа дьн зу хьзмәтийа хԝә дәстпекьн.

Ча мьзгинванед мисйонер, мә диса мина бәре жь хьзмәтийе шабун дьстанд. Щьвата мә чьԛас дьчу һаԛас мәзьн дьбу, у хушк-бьред Коломбйайеда гәләк дьлован у шекьрдар бун.

Дәр-дора Нейивайе, һьнә бажарада Шәʹдед Йаһоԝа тʹӧнә бун. Әз гәләк бәр хԝә дькʹәтьм, кӧ мьзгини ԝе ча бьгьһижә ԝедәре. Ԝедәре партизана шәрʹ дькьрьн, әв һәрем бона хәриба щики хоф бу. Ләма жи мьн дӧа дькьр, кӧ һәма кәсәк жь ве һәреме бьбә Шәʹде Йаһоԝа. Әз дьфькьрим ԝәки анщах кәсәк, кӧ бажаре Нейивайеда дьжи, дькарә дәрһәԛа рʹастийе пебьһʹәсә. Ӧса жи мьн дӧа кьр, кӧ әԝ кәс паши ньхӧмандьне рʹӧһʹанида пешда һәрʹә у диса вәгәрʹә бажаре хԝә, кӧ мьзгинийе бәла кә. Ле мьн гәрәке бьзаньбуйа, кӧ Йаһоԝа тьштәки дьһа баш дькарьбу бькьра.

Гәләк ԝәхт жи дәрбаз нәбу, кӧ мьн тʹәви хортәки бь наве Фернандо Гонзалез һинбуна Кʹьтеба Пироз дәстпекьр. Әԝ бажаре Алщезираседа дьжит. Ԝедәре Шәʹдед Йаһоԝа тʹӧнә бун. Фернандо ль Нейивайе дьхәбьти, ле мала ԝи 50 километри зедәтьр дури ԝедәре бу. Әԝи бона һинбуне хԝә рʹьнд һазьр дькьр у дәрберʹа дәстпекьр һәрʹә һʹәму щьвина. Жь һʹәфтийа кӧ әԝи дәстпекьр Кʹьтеба Пироз һин бә, әԝи бажаре хԝәда мәрьв тʹоп дькьр у тьштед кӧ әԝ педьһʹәсийа, ԝанрʹа гьли дькьр.

Мәһа Чьләйе сала 1990-да, паши кӧ Фернандо шәш мәһа Кʹьтеба Пироз һин дьбу, әԝ һатә ньхӧмандьне. Паше әԝ бу  пешәнге һәртʹьм. Ида бажаре Алщезираседа Шәʹдәки Йаһоԝа һәбу, у һаԛас хоф нибу кӧ пешәнгед мәхсус бьшиньн ԝедәре. Сала 1992-да, ԝи бажарида щьватәк саз бу.

Гәло Фернандо тʹәне мьзгини бажаре хԝәда бәла дькьр? Һәмьки на! Паши зәԝаща хԝә, әԝ у жьна ԝи дәрбази бажаре Сан Висенте дел Кагуан бун. Ԝедәре Шәʹдед Йаһоԝа тʹӧнә бун. Фернандо у жьна ԝи аликʹари дан, ԝәки ви бажарида жи щьватәк саз бә. Сала 2002-да, Фернандо ча бәрпьрсийаре мьһале һатә кʹьфшкьрьне. Һʹәта рʹожа иро, әԝ ча бәрпьрсийаре мьһале тʹәви жьна хԝә Олгайе хьзмәт дькә.

Жь ве дәрәще әз һин бум, кӧ әз гәрәке дӧайед хԝәда, һәр тьштед кӧ щабдарийа мәва гьредайи нә, һур бь һур Йаһоԝарʹа бежьм. Йаһоԝа хԝәйе дьруне йә, у һәрге тьштәк жь дәсте мә найе жи, әм дькарьн баԝәр бьн, кӧ Йаһоԝа чь лазьм бә ԝе бькә (Мәтта 9:38).

Сала 1990-да, әз бумә бәрпьрсийаре рʹеви. Мә пʹайтʹәхте Коломбйайеда кʹьфш кьрьн. Әм дьтьрсийан кӧ әме нькарьбьн щабдарийа хԝә ча лазьм ә биньн сери, чьмки әз у жьна мьн, әм мәрьвнә ӧса ньн, кӧ һини жийина бажарәки мәзьн нәбунә. Ле ча Йаһоԝа Филипи 2:13-да соз дайә, әԝи һьм хԝәстьна мә зедә кьр, һьм жи ԛәԝат да мә, ԝәки әм щабдарийа хԝә биньн сери.

Паше мә һәрема Меделинеда кʹьфшкьрьнәкә тʹәзә станд. Мәрьвед ԝедәре нава зӧлмийе у чәтьнайада мәзьн бьбун у жь тьштед хьраб ида әʹщебмайи нәдьман. Мәсәлә, щарәке гава мьн тʹәви кәсәки һинбуна Кʹьтеба Пироз дәрбаз дькьр, дәрва дәнге гӧләкьрьне һат. Мьн дьхԝәст хԝә бавита әʹрде, ле хԝәндәкʹаре мьн бәрдәԝам кьр бьхунә у нә жи хәма ԝи бу. Гава әԝи хԝәндьна абзасе хьлаз кьр, әԝи изьн хԝәст у чу дәрва. Паши әԝ тʹәви дӧ зарʹед бьчʹук вәгәрʹийа у бь дьләки рʹьһʹәт гот: «Бьбахшинә, мьн гәрәке зарʹед хԝә бьанийа».

Щарәкә дьн, гава мә мал бь мал хьзмәт дькьр, жьна мьн рʹәви һатә щәм мьн у әԝ гәләк тьрсийа бу. Әԝе гот кӧ мерәки пе чʹәк гӧлә алийе ԝеда бәрʹдьда. Әз гәләк әʹщебмайи мам. Ле паше, мә фәʹм кьр кӧ ԝи кәси нә кӧ дьхԝәст Сиркайе гӧлә кә, ле мерәки кӧ кʹеләка ԝе дәрбаз дьбу.

Ԝәхт шунда әм ида жь зӧльм у зордарийа кӧ ве һәремеда дьԛәԝьми, һаԛас дьлтәнг нәдьбун. Хушк-бьред ԝедәре рʹасти ван тьшта у тьштед дьһа хьраб жи дьһатьн, у ԝана әм ԛәԝи дькьрьн. Мә фәʹм кьр, кӧ һәрге Йаһоԝа али ԝан дькә, әԝе али мә жи бькә. Мә һәртʹьм гӧһ дьда ширәтед рʹуспийа, хԝә пешда бона дәрәщед хоф һазьр дькьр у һәр тьшт дьда дәсте Йаһоԝа.

Һәмьки һьнә дәрәщә һаԛас хоф нибун. Щарәке гава әм хьзмәтийеда мала кәсәкида бун, мә дәрва дәнге дӧ жьна бьһист кӧ шәрʹ дькьрьн. Мьн нәдьхԝәст бьзаньбьм кӧ ԝедәре чь дьԛәԝьмә, ле хԝәйе мале хԝәст  кӧ әз һәрʹьм һʹәԝша ԝи у бьньһерʹьм. Гава әз чум, мьн дит кӧ тʹӧ кәси һәврʹа шәрʹ нәдькьр, ле дӧ чʹьвикед тути зари щинара дькьрьн.

Сала 1997-да, әз ча дәрсдаре Мәкʹтәба Башкьрьна Хьзмәтийе b һатьмә кʹьфшкьрьне. Мьн һәртʹьм жь һинкьрьнед ӧса шабун дьстанд, ле мьн нә жи дьда бәр чʹәʹве хԝә кӧ рʹожәке әзе жи бьбьмә дәрсдар.

Паше мьн ча бәрпьрсийаре нәһийе хьзмәт дькьр. Гава әв щабдари ида һатә һьлдане, әз диса бумә бәрпьрсийаре мьһале. Ида зедәтьри 30 сал ә, кӧ әз ча дәрсдар у бәрпьрсийаре мьһале хьзмәт дькьм. Бь сайа ван щабдарийа, мьн гәләк кʹәрәм стандьнә. Ле жийин нә һәртʹьм һеса бу.

Әз мәрьвәки сәр хԝә бум у әве йәке али мьн дькьр чәтьнайада ԛәԝи бьминьм. Ле щарна, гава мьн гәрәке һьнә тьшт бона щьвате сафи кьра, мьнрʹа дьһа зедә хирәт лазьм бу. Мәсәлә, мьн сәрт тʹәми дьда һьнәка, кӧ әԝана һьндава кәсед дьнда дьлован у бь ԛәдьр бьн. Ле бь рʹасти әз хԝәха жи һʹәԝще ве ширәте бум (Рʹомайи 7:21-23).

Бона хәйсәтед хԝәйә нәбаш, мьн щарна хԝә гәләк хьраб тʹәхмин дькьр (Рʹомайи 7:24). Рʹожәке мьн дӧада Йаһоԝарʹа гот, кӧ дьһа баш ә әз ве щабдарийа хԝә бьһельм у вәгәрʹьм ԝәлате хԝә. Ԝе еваре әз чумә щьвате. Фькьре кӧ мьн сәр ве щьвате бьһист, мьн данә баԝәркьрьне кӧ әз гәрәке ве щабдарийа хԝә нәһельм, ле сәр хԝә бьхәбьтьм, ԝәки кемасийед хԝә рʹаст кьм. Һʹәта рʹожа иро жи әз сәр ве йәке дьфькьрьм, кӧ Йаһоԝа ча щаба дӧайе мьн да. Ӧса жи әз гәләк шекьрдар ьм, кӧ әԝи али мьн кьр, ԝәки әз кемасийед хԝә рʹаст кьм.

Әз у Сирка әм гәләки жь Йаһоԝа рʹази нә, чьмки мә һʹәчʹи зәʹф әʹмьре хԝә хьзмәтийа һәртʹьмда дәрбаз кьрийә. У шькьр Йаһоԝарʹа, кӧ әԝи кʹӧлфәтәкә һаԛас дьлован у амьн дайә мьн!

Әʹмьре мьн незики 70 сали йә. Ләма жи, дәмәкә незикда әзе ида нькарьбьм ча дәрсдар у бәрпьрсийаре мьһале хьзмәт кьм. Ле әз бәр хԝә накʹәвьм, чьмки әз баԝәр ьм кӧ гава әм бь мьлукти, бь рʹазибуне у бь дьл у щан Йаһоԝарʹа хьзмәт дькьн, әԝ жь мә рʹази йә (Миха 6:8; Маркос 12:32-34). Сәва кӧ әм пәсьне Йаһоԝа бьдьн, әʹсәйи нинә, кӧ щабдарийед мәйә мәзьн һәбьн.

Гава әз сәр щабдарийед хԝә дьфькьрьм, әз фәʹм дькьм, ԝәки мьн әв йәк стандийә нә кӧ жь бо һʹӧнӧред хԝәйә баш, йан жи кӧ әз кәсед дьн четьр ьм, ле чьмки Йаһоԝа рʹәʹма хԝә һьндава мьнда да кʹьфше. Чьԛас жи кемасийед мьн һәбун, Әԝи әз лайиԛи ван щабдарийа һʹәсаб дькьрьм. Әз заньм кӧ мьн тʹәне бь сайа аликʹарийа Хԝәде дькарьбу щабдарийед хԝә биньм сери. Бәле, бь ви щурʹәйи кемасийед мьн ԛәԝата Хԝәде әʹйан кьрьн (2 Корьнтʹи 12:9).