Munu butukaka na 1955, beto vuandaka bana tatu mpe munu vuandaka muana ya nsuka. Munu yundukaka na sud ya Finlande, na kizunga yina mezabana bubu na nkumbu ya Vantaa.

Mama na munu bakaka mbotama lokola Mbangi ya Yehova mua bamvula tekila munu butuka. Kasi, tata na munu vuandaka telemina kedika mpe yandi vuandaka pesa ve mama nzila ya kulonguka na beto mpe kunata beto na balukutakanu ya kimvuka. Na yau mama vuandaka longa beto bakedika ya ngudi ya Biblia kana tata na beto kele ve.

Banda bumuana na munu, munu ponaka kusadila Yehova. Na kifuani, kilumbu mosi ntangu munu vuandaka na bamvula 7, nlongisi na munu ya kalasi fueminaka munu ngolo samu munu mangaka kudia gato yina bamesala na menga yina bakebokidilaka verilättyjä, bakesalaka yau na buala ya Finlande. Na diboko mosi, yandi niemaka matama na munu mpe na diboko yankaka yandi kotisaka furshete na gato yango samu na kukotisa yau na yinua na munu. Munu nungaka kubuisa furshete yango na ntoto.

Ntangu munu kumaka na bamvula 12, tata na munu kufuaka. Na manima na yau, munu kumaka na dikoki ya kukutakana na balukutakanu ya kimvuka. Bampangi ya babakala ya kimvuka vuandaka tudila munu mpenza dikebi, mpe yau salaka ti munu kuenda na ntuala na kimpeve. Munu bandaka kutanga Biblia konso kilumbu mpe munu bandaka kulonguka mikanda na beto ya Buklisto na dikebi nionso. Mimeseno yango ya mbote, sadisaka munu munu baka mbotama na kilumbu ya 8 août 1969, ntangu munu kumaka na bamvula 14.

 Na manima, ntangu munu manisaka kalasi, munu bandaka kisalu ya mpasudi nzila ya ngonda na ngonda. Mua basabala na manima, munu kuendaka kusala na kisika yina nsatu ya bansamuni vuandaka mingi, na Pielavesi, mbanza yina kele na pembeni ya katikati ya buala ya Finlande.

Na Pielavesi, munu kutanaka na Sirkka yina kumaka nketo na munu ya nzola. Munu sepelaka na yandi mingi mpenza samu yandi vuandaka na kumikitisa mpe yandi vuandaka zola Yehova mingi. Yandi vuandaka sosa ve kuzabana to kuvuanda na bima mingi ya kinsuni. Beto nionso zole beto vuandaka na nsatu ya kusala nionso yina beto lenda samu na kusadila Yehova, mpe beto vuandaka pene ya kukokisa konso kiyekua yina bavuandaka pesa beto. Beto kuelanaka na kilumbu ya 23 mars 1974. Na kisika ya kukuenda pema lokola beto kuelanaka bosi, beto kuendaka sala na Karttula, kisika yina nsatu ya bansamuni ya Kimfumu vuandaka mingi kuluta.

Banda na ebandeli ya dikuela na beto, Yehova monisaka beto ti yandi kekokisa bansatu na beto ya kinsuni kana beto metula Kimfumu na yandi na kisika ya ntete. (Mat. 6:33) Na kifuani, na Karttula beto vuandaka ve na ntomabilu. Na ebandeli, beto vuandaka sala bavuayaje na velo. Nzokande, na nsungi ya madidi, madidi vuandaka ngolo mpe yavuandaka kita tii na yinsi ya 0 degre. Samu na kusamuna na terituare ya nene ya kimvuka na beto, beto vuandaka na nsatu ya ntomabilu. Kasi beto vuandaka na mbongo ve ya kusumbila yau.

Kondua ti beto kukivingila na yau, mpangi na munu ya bakala ya mbuta kuizaka tala beto. Yandi pesaka beto ntomabilu na yandi na nzola nionso. Yandi futaka deja asiranse ya ntomabilu yango. Yalombaka beto sumba kaka karbiran. Na manima na yau, beto bakaka ntomabilu yina beto vuandaka na yau nsatu.

Yehova monisaka ti yandi bakaka kiyekua ya kukokisa bansatu na beto ya kinsuni. Diambu yina lombamaka beto sala vuandaka kaka kutula mambote ya Kimfumu na kisika ya ntete.

Ntangu beto kotaka na Ekole ya bampasudi nzila na 1978, Raimo Kuokkanen a mosi ya banlongisi ya Ekole yango, kindisaka beto na kufulusa formilere samu na kukota na ekole ya Galaad. Na yau, beto bandaka kulonguka Anglais na lukanu ya kukuma na makoki ya kukota na ekole yango. Kasi, na 1980 tekila beto vuanda na dikoki ya kufulusa formilere, babokilaka beto samu beto kuenda sala na biro ya filiale ya Finlande. Na ntangu yango, Bampangi ya dibuta ya Betele vuandaka ve na dikoki ya kufulusa  formilere samu na kukota na ekole ya Galaad. Kasi beto vuandaka na nsatu ya kusala kisika yina Yehova vuandaka mona mbote, kasi ve kisika yina beto vuandaka kanisa ti yakele mbote. Na yau beto ndimaka mbokodoso yango. Kasi, beto tatamanaka kulonguka Anglais samu ntangu yankaka diluaku lendaka monana ya kufulusa formilere samu na kukota na ekole ya Galaad.

Mua bamvula na manima, Kimvuka ya Ntuadisi pesaka Bampangi ya dibuta ya Betele diluaku ya kufulusa formilere samu na kukota na ekole ya Galaad. Beto fulusaka baformilere na nsualu, kasi ve samu beto vuandaka sepela ve na kisalu na beto na Betele. Kutu! Beto vuandaka kaka na nsatu ya kuvuanda ntangu nionso pene ya kusala na kisika yina nsatu kele ngolo kana beto mendimama samu na kusala yau. Bandimaka beto na ekole ya Galaad mpe beto bakaka diplome na kalasi ya 79 na ngonda ya septembre 1985. Batindaka beto na Colombie.

Na Colombie, batindaka beto beto kuenda sala na biro ya filiale. Munu mekaka kusala nionso yina munu lenda na kiyekua na munu, kasi na manima ya kusala mvula mosi na biro ya filiale, munu kukimonaka ti beto vuandaka na nsatu ya kusala nsobolo. Samu na mbala ya ntete mpe ya nsuka na luzingu na munu, munu lombaka bapesa munu kiyekua yankaka. Na manima batindaka beto lokola bamisionere na mbanza ya Neiva, na kizunga ya Huila.

Munu vuandaka sepela ntangu nionso na kisalu ya kusamuna. Ntangu munu vuandaka kaka munu mosi lokola mpasudi nzila na buala ya Finlande, mbala mingi munu vuandaka banda kusamuna na sunka ya ngolo mpe kumanisa na mpipa. Ntangu beto vuandaka bankuelani ya yimpa, munu mpe Sirkka vuandaka lutisa kilumbu ya mvimba na kisalu ya kusamuna. Ntangu beto vuandaka samuna na bisika yina vuandaka ntama na yinzo na beto, beto vuandaka leka mbala yankaka na kati ya ntomabilu na beto. Yau vuandaka sala ti distanse vuanda diaka mingi ve mpe yavuandaka sala ti beto banda kisalu ya kusamuna sunkasunka na kilumbu melanda.

Ntangu beto kumaka bamisionere, beto vuandaka kaka kusepela na kisalu ya kusamuna mutindu beto vuandaka kusepela na yau na ebandeli. Kimvuka na beto kulaka mpe bampangi ya banketo mpe ya babakala na Colombie vuandaka na luzitu, na nzola, mpe na butondi.

Pembeni ya Neiva kisika yina batindaka beto, yavuandaka na bambanza yina vuandaka ata na Mbangi ya Yehova mosi ve. Munu vuandaka kukitungisa mpenza samu na mutindu nsangu ya mbote lendaka kuma na bizunga yango. Kasi, samu na mvita yina bavuandaka nuana na basoda ya batomboki, bantu yina vuandaka ve bana ya buala yango vuandaka ve na lutanunu na bambanza yango. Na yau munu sambilaka ti ata muntu mosi na kati ya bambanza yango kuma Mbangi ya Yehova. Munu vuandaka kanisa ti muntu yango fueti vuanda muntu yina kezingaka na Neiva samu na kulonguka kedika. Kasi, munu vuandaka sambila diaka ti na manima ya mbotama na yandi yandi kekuma bakala ya kuyela mpe yandi kevutuka na mbanza na yandi samu na kusamuna. Munu vuandaka zaba ti Yehova vuandaka na solision ya mbote kuluta ya munu.

Ntangu fioti na manima, munu bandaka kulonguka Biblia na ntuenia mosi ya bakala na nkumbu ya Fernando González. Yandi vuandaka zinga na Algésiras, mosi ya bambanza yina vuandaka na Mbangi ya Yehova ata mosi ve. Fernando vuandaka sala vuayaje ya bakilometre kuluta 50 samu na kukuiza sala na Neiva. Yandi vuandaka kukibongisa mpenza mbote samu na konso ndongokolo mpe kondua kuvingila yandi bandaka kukutakana na balukutakanu nionso. Kubanda na sabala ya ntete ya ndongokolo na yandi, Fernando vuandaka sangisa bantu yankaka na mbanza na yandi samu na kulonga bau mambu yina yandi  vuandaka longuka na ndongokolo na yandi ya Biblia.

Bangonda 6 na manima ya kubanda kulonguka Biblia, Fernando bakaka mbotama na ngonda ya janvier 1990. Na manima, yandi kumaka mpasudi nzila ya ngonda na ngonda. Lokola muntu mosi ya buala Algésiras kumaka Mbangi ya Yehova, biro ya filiale kumaka na dikoki ya kutinda bampasudi nzila ya nene na buala yango kondua ti baluzingu na bau vuanda na kivonza. Na ngonda ya février 1992, kimvuka mosi zibukaka na buala yango.

Fernando sukaka kaka na kusamuna na buala na yandi? Ve! Na manima ya dikuela na yandi, yandi mpe nketo na yandi kuendaka na mbanza ya San Vicente del Caguán, mbanza yankaka yina vuandaka na Mbangi ya Yehova ata mosi ve. Kuna bapesaka maboko samu na kusiamisa kimvuka mosi. Na mvula 2002, Fernando ponamaka lokola nkengi ya kizungidila, mpe yandi mpe nketo na yandi Olga, kena kutatamana kusala kisalu ya kizungidila tii bubu yayi.

Na nzila ya disolo yango, munu longukaka ti yakele na mfunu kusala bisambu ya sikisiki na mambu metadila biyekua na beto ya teokrasi. Yehova kesalaka mambu yina beto kele ve na dikoki ya kusala. Ya kedika, yakele bilanga na yandi, kasi ya beto ve.​—Mat. 9:38.

Na 1990 beto bakaka kiyekua ya kusala kisalu ya ntambudi. Kizungidila na beto ya ntete vuandaka na mbanza ya kimfumu, Bogotá. Kiyekua yango bangisaka beto. Munu mpe nketo na munu beto vuandaka kaka lokola bantu nionso, beto vuandaka ve na makoki mosi ya spesiale. Mpe beto mesanaka ve kuzinga na bambanza ya nene. Kasi, Yehova kokisaka nsilulu na yandi yina kele na Bafilipi 2:13: ‘Samu Nzambi nde na kiese na yandi kena kupesa beno ngolo, yandi kena kupesa beno nsatu mpe kilendo ya kusala.’

Na manima, batindaka beto na kisalu ya kizungidila na kizunga ya Medellín, mbanza yina munu tubilaka na ebandeli. Bantu mesanaka mingi na kinkesi ya balabala mpe yavuandaka tungisa bau diaka ve. Na kifuani, kilumbu mosi munu vuandaka tuadisa ndongokolo ya Biblia, bantu mosi bandaka kubulana masasi na nganda ya yinzo ya muntu yina munu kuendaka tala. Munu kumaka pene ya kubua na ntoto, kasi nlonguki na munu ya Biblia vuandaka tatamana kutanga paragrafe, kondua kukitungisa. Ntangu yandi manisaka kutanga, yandi lombaka yandi bima na nganda. Na manima ya mua ntangu, yandi vutukaka na bana zole ya fioti ya babakala mpe na kiyenge nionso yandi tubaka, “Nlemvukila munu, kasi yalombaka munu kuenda sosa bana na munu.”

Yavuandaka na bantangu yankaka yina beto vuandaka na kivonza. Na diluaku mosi ntangu beto vuandaka na kisalu ya kusamuna yinzo na yinzo, nketo na munu vuandaka kuiza kisika munu kele na kuzawula, mpe yandi vuandaka zakama na kubanga. Yandi tubaka ti muntu mosi bulaka yandi masasi. Yakamuisaka munu. Kasi, na manima beto kuizaka bakusa ti muntu yango kanaka ve kubula Sirkka masasi; yandi vuandaka bula muntu mosi yina vuandaka luta pembeni na yandi.

Na ntangu yango, beto longukaka kukitungisa ve samu na kinkesi. Beto bakaka lukindusu na ngolo ya Bambangi ya Yehova ya mbanza yango yina kutanaka na mambu ya mpasi lokola yina beto kutanaka na yau mpe kuluta mambu yina beto vuandaka kutana na yau. Beto ndimaka ti kana Yehova vuandaka sadisa bau, yandi kesadisa beto mpe. Beto vuandaka landa ntangu nionso malongi ya bankulutu ya kimvuka, beto vuandaka baka bankubukulu samu na kukitanina, mpe beto vuandaka bika nionso na maboko ya Yehova.

 Ya kedika, mambu yankaka vuandaka mpenza kivonza ve mutindu beto vuandaka kanisina yau. Kilumbu mosi, munu kuwaka lokola banketo zole kena kufingana na nganda ya yinzo ya bantu yina munu kuendaka tala. Munu mesanaka ve kutala bantu yina kena kuzonza, kasi mfumu ya yinzo yango tubilaka munu beto bima na veranda. Yamonanaka ti “kuzonza” yango vuandaka kati na bansaku zole, yina vuandaka landa mutindu ya kutubila ya bantu ya lupangu yango.

Na 1997, munu ponamaka lokola nlongisi na Ekole ya formasion samu na kisalu ya kusamuna. b Munu vuandaka sepela ntangu nionso kukota na baekole ya teokrasi, kasi munu salaka kanisa ata fioti ve kubaka diluaku ya kuvuanda nlongisi na mosi ya baekole yango.

Na manima, munu salaka lokola nkengi ya kizunga. Ntangu nkubukulu yango manisaka, munu vutukilaka kisalu ya kizungidila. Na yau, samu na bamvula kuluta 30, munu salaka lokola nlongisi mpe na kisalu ya nkengi ntambudi. Biyekua yango natinaka munu balusakumunu mingi. Kasi, yavuandaka ntangu nionso pete ve. Bika munu sasila.

Munu vuandaka ve muntu yina vuandaka wongawonga. Yau sadisaka munu samu munu nunga mambu ya mpasi. Kasi, na ntangu yankaka munu vuandaka na vema kuluta ndilu mpe munu vuandaka zola kusemba mambu nionso na kimvuka. Na diluaku mosi, munu kindisaka bantu yankaka na kibakala nionso bavuanda na nzola mpe babika vuanda mambu ngolo na bantu yankaka. Nzokande, munu mosi munu vuandaka ve na bikadulu yango.​—Bar. 7:21-23.

Na bantangu yankaka, munu vuandaka lemba mpenza nzutu samu na banzimbala na munu. (Bar. 7:24) Na ntangu mosi, munu tubilaka Yehova na kisambu ti yakevuanda mbote munu bika kisalu ya misionere mpe munu vutuka na Finlande. Na nkokila yango, munu kuendaka na lukutakanu ya kimvuka. Lukindusu yina munu bakaka kuna, ndimisaka munu ti munu fueti bikana na kiyekua na munu mpe munu fueti tatamana kunuana samu na kubongisa banzimbala na munu. Na kilumbu yango, mutindu Yehova pesaka mvutu ya puelele na kisambu yango simbaka mpenza ntima na munu. Katula yau, munu kele mpenza na butondi mutindu yandi sadisaka munu na nzola nionso samu munu nunga babulembu na munu.

Munu mpe Sirkka, beto kevuandaka na butondi mingi na Yehova na diluaku ya kulutisa ntangu mingi ya luzingu na beto na kisalu ya ntangu nionso. Munu kele diaka na butondi mingi na Yehova mutindu yandi pesaka munu nketo ya nzola mpe ya kukuikama na bamvula yango nionso.

Ntama mingi ve munu kekokisa bamvula 70 mpe munu kelemba kusala lokola nlongisi mpe na kisalu ya nkengi ntambudi. Kasi, munu kele na kiadi ve samu na yau. Samu na yinki? Samu munu kendimaka mpenza ti diambu yina kepesaka Yehova lokumu kele kusadila yandi na bopolo mpe kukumisa yandi na ntima yina mefuluka na nzola mpe na butondi. (Mika 6:8; Mar. 12:32-34) Samu na kukumisa Yehova, yakena kulomba ve kuvuanda na kiyekua mosi ya lokumu.

Ntangu munu kekanisaka biyekua yina munu bakaka, munu kemonaka ti munu bakaka yau ve samu munu vuandaka na mfunu mingi kuluta bantu yankaka; munu bakaka mpe ve biyekua yango samu munu vuandaka na dikoki mosi ya kukamua. Munu kekanisaka ata fioti ve mutindu yina! Kutu, Yehova pesaka munu biyekua yango samu na nlemvo na yandi ya nene. Yandi pesaka munu biyekua yango, atako munu kele muntu ya babulembu. Munu mezaba ti munu vuandaka na dikoki ya kukokisa biyekua yango kaka na lusadusu ya Yehova. Na mutindu yango, babulembu na munu pesaka lokumu na ngolo ya Nzambi.​—2 Bk. 12:9.