Ba butaka munu na 1955, mu ke mwana ya nsuka ya bana tatu ya babakala. Mu kulaka na sude ya bwala ya Finlande, na kisika mosi yina ba ke bokilaka bubu yayi mbanza ya Vantaa.

Mama ya munu kuzwaka mbotokolo mpe kumaka Mbangi ya Yehova mwa bamvula fioti tekila mu butuka. Tata ya beto vanda niminaka mama ya beto na kulonga beto Biblia mpe na kunata beto na balukutakanu. Ata faso yina, mama vanda longaka beto Biblia na ntangu tata vandaka ve na yinzo.

Kubanda bufioti ya munu, mu bakaka mukanu ya kutumama na Yehova. Na kifwani, na lukolo, ntangu mu vanda na bamvula 7, mulongisi ya munu kumaka na nkele mingi samu mu mangaka kudya gato yina ba ke yidikaka na menga ya bibulu na bwala ya Finlande. Yandi nyemaka munu mabundi samu na kufungula munu yinwa. Yandi sosaka na kukotisa na ngolo nyonso gato yango na yinwa ya munu, kasi, mu babulaka yawu na diboko ya yandi.

Ntangu mu vanda na bamvula 12, tata ya munu kufwaka. Na manima ya yawu, mu lendaka na kukwenda na balukutakanu. Bampangi ya bakala ya kimvuka lakisaka munu luzolo mpe ya sadisaka munu na kukulisa kimpeve ya munu. Mu bandaka kutanga Biblia bilumbu nyonso mpe kulongoka mbote-mbote mikanda ya beto. Bifu yayi sadisaka munu na kuzwa mbotokolo na 8 Août 1969.

 Ntangu mu manisaka lukolo, mu kumaka mupasuli-nzila ya ntangu nyonso. Mwa balumingu na mantwala, mu kwendaka pesa diboko na Pielavesi, kisika ba vandaka na nsatu ya basamuni mingi.

Na Pielavesi, mu kutanaka na kento ya munu, Sirkka. Kima yina bendaka munu na yandi ni kukuluka ya yandi mpe samu ti yandi ke zolaka Yehova mingi. Yandi ke sosaka ve kuvanda na mbongo mingi to bima mingi. Beto nyonso zole vandaka na nsatu ya kusadila Yehova na makoki ya beto nyonso, ata kisalu ni kisalu ba zola pesa beto. Beto kwelanaka na kilumbu ya 23 Mars 1974. Beto kwendaka lutisa ve ntangu ya kitoko na manima ya makwela, kasi beto kwendaka samuna na Karttula, kisika yina ba vandaka na nsatu ya basamuni ya kulutila.

Na kubanda ya makwela ya beto, Yehova lakisaka beto ti, yandi zola kipe bansatu ya beto kana beto tula ntete Kimfumu na kisika ya ntete. (Mat. 6:33) Na kifwani, na Karttula, beto vandaka ve na camion, samu na banzyetelo ya beto, beto vanda sadilaka vélo. Na ntangu ya madidi, madidi vandaka ngolo mingi, samu na kusamuna na bwala ya nene yayi, ya lombaka na beto na kuvanda na camion. Kasi, beto vandaka ve na mbongo mingi samu na kusumba ata mosi.

Na faso yina beto vanda vingila ve, yaya ya munu kwizaka tala beto. Ntima ya yandi ya mbote salaka ti yandi kabula beto camion ya yandi. Yandi futilaka beto mikanda nyonso ya camion. Beto zola sumba kaka essence. Ya salaka ti beto kuma na camion yina beto vanda sosa.

Yehova lakisaka ti yandi vandaka na beto mpe vandaka kipe bansatu ya beto. Kisalu ya beto kumaka kutula Kimfumu ya Yehova na kisika ya ntete na luzingu ya beto.

Ntangu beto vanda sala lukolo ya mipasuli-nzila, na 1978, Raimo Kuokkanen, a yina vandaka mosi ya milongisi ya beto, sadisaka beto na kupesa mukanda samu na lukolo ya Galaad. Na yawu beto bandaka kulongoka Anglais samu na kukubama samu na lukolo. Kasi, na 1980, tekila beto fulusa mukanda, ba bokilaka beto na kukwenda sala na Betele ya Finlande. Na ntangu yina, babetelite vanda fulusaka ve mikanda samu na kusala lukolo ya Galaad. Kasi beto vandaka mpe na nsatu ya kusala kisika yina Yehova vanda tala ti ya ke mbote samu na beto na kusala. Ni yina salaka ti beto ndima na kukwenda sala kuna. Ata mpila yina, beto bikaka ve  na kulongoka Anglais na dikanisi ti, beto lenda kuzwa bweso ya kufulusa mukanda ya lukolo ya Galaad.

Mwa bamvula na mantwala, kimvuka ya bantwadisi pesaka nzila na bampangi yina ke salaka na betele na kufulusa mukanda samu na kusala lukolo ya Galaad. Beto fulusaka mukanda yina na mbangu, kasi ya vandaka ve ti samu beto vanda sepela ve na betele. Beto salaka 79^e classe ya Galaad na septembre 1985. Na manima ba filisaka beto na Colombie.

Na bwala ya Colombie, ba filisaka beto na kusala ntete na betele. Mu sosaka kusala nyonso yina mu lenda sala na kisalu yina ba pesaka munu, kasi na manima ya mvula mosi, mu talaka ti ya vandaka mbote na beto na kusoba kisalu. Ya vandaka mbala ya ntete mpe ya nsuka na luzinga ya munu, yina mu lombaka ti ba soba munu kisalu. Na yawu, ba filisaka beto mutindu bamisionaire na mbanza ya Neiva, na bwala ya Huila.

Mu ke zolaka ntangu nyonso kisalu ya kusamuna. Na ntangu mu vandaka mupasuli-nzila na Finlande, mu vandaka ntete ve ya kukwela. Mu vanda samunaka kubanda suka-suka tii na nkokila. Mpe ntangu mu kwelanaka na Sirkka, beto vanda samunaka bilumbu ya muvimba. Na yawu, samu beto vanda samunaka ntama na yinzo ya beto, bantangu ya nkaka beto vanda lalaka na kati ya camion, samu ti beto vanda vutukaka ve mpe kukwiza dyaka na kisika yina beto vanda samuna. Ya salaka ti beto banda kusamuna na suka-suka kilumbu yina ke landa.

Awa mpe mutindu bamisionaire, beto vanda tala ti, tiya ya beto ya kusamuna manisaka ve. Ya vandaka kaka faso na ntama. Kimvuka ya beto vanda kula mpe bampangi ya kento na ya bakala ya Colombie vanda na kifu ya kuvutulaka matondo, na kulakisaka buzitu mpe luzolo.

Na Neiva kisika yina beto vandaka, ya vandaka na babwala ya nkaka yina Bambangi ya Yehova vandaka ve. Mu vanda kanisaka na faso beto zola kumisa nsangu ya mbote kuna. Kasi, samu ti mvita vandaka na bisika yango, ya vandaka ve kisika ya mbote samu na banzenza. Mu sambilaka samu mosi ya bantu ya bambanza yango kuma Mbangi ya Yehova. Mu vanda kanisa ti muntu yango zola longoka matsyeleka kisika yina mu vandaka na Neiva mpe mu sambilaka ti na manima ya mbotokolo ya yandi, yandi kula na kimpeve mpe vutuka na mbanza ya yandi samu na kusamuna. Kasi mu zabaka ti kaka ni Yehova zola yidika mambu yayi na faso ya mbote.

Mwa ntangu fioti na manima, mu bandaka kulongoka Biblia na ntwenya mosi na nkumbu ya Fernando González. Yandi vanda vandaka na Algeciras, mosi ya bambanza yina Bambangi ya Yehova vandaka ve. Fernando vanda salaka nzyetelo ya 50 kilomètres samu na kukuma na kisalu ya yandi na mbanza ya Neiva. Yandi vanda kubamaka mbote-mbote samu na kulongoka ya yandi ya Biblia mpe na mbala mosi yandi bandaka kukwenda na balukutakanu nyonso. Kaka lumingu yina yandi bandaka kulongoka Biblia, Fernando vukisaka bantu ya mbanza ya yandi mpe vanda longaka bawu Biblia.

Fernando kuzwaka mbotokolo kaka na manima ya bangonda 6 ya kubanda kulongoka ya yandi. Ya vandaka na janvier 1990. Na manima, yandi kumaka mupasuli-nzila ya ntangu nyonso. Samu ya kumaka na Mbangi ya Yehova mosi na Algeciras, bampangi ya Betele talala ti ya kumaka mbote  na kufilisa mpangi mosi ya mupasuli-nzila ya spécial kuna. Na février 1992, ya kumaka na kimvuka na mbanza yango.

Fernando sukaka kwandi kaka na kusamuna na mbanza ya yandi? Ve! Na manima ya makwela ya bawu, ba kwendaka samuna yandi na kento ya yandi na San Vicente del Caguán, mbanza ya nkaka yina Bambangi ya Yehova vandaka ve. Kuna, ba tulaka diboko samu kimvuka ya malu-malu butuka. Na 2002, Fernando kumaka ntwadisi ya circonscription mpe yandi na kento ya yandi ke na tatamanaka na kusala kisalu yango tii bubu yayi.

Mambu yayi longaka munu mfunu ya lusambu samu na kisalu ya beto na kimvuka ya Yehova. Ya ke bilanga ya yandi kasi ya beto ve.—Mat. 9:38.

Na 1990 mu kumaka ntwadisi ya circonscription. Circonscription ya beto ya ntete vandaka na Bogotá. Ya vanda pesa beto boma. Munu na kento ya munu, vandaka ve bantu yina vanda salaka bamambu ya ngitukulu. Mpe beto mesanaka ve na kuzinga na mbanza ya nene. Kasi, Yehova lungisaka nsilulu yina ke na Bafilipi 2:13: “Nzambi muntu ke pesaka beno bukindi samu na mambu yina ke pesaka yandi kilengi mpe yandi ke pesaka beno nsatu mpe ngolo ya kusala bamambu.”

Na manima, ba filisaka beto na circonscription ya Medellín, mbanza yina mu zonzilaka na mbandukulu. Bantu mesanaka na kuwa makele ya minduki mpe ya vanda kamwisaka ve bawu. Na kifwani, kilumbu mosi ntangu mu vanda longoka Biblia na muntu, na ngaanda ya yinzo ya yandi bantu bandaka kukubula bampangi, mu vanda sosa kolosa nzutu na ntoto kasi mulongoki vanda tanga ya yandi paragrafe na kizunu nyonso. Na ntangu yandi manisaka, yandi lombaka mulemvo mpe kwendaka na ngaanda. Na manima ya yawu, yandi vutukaka na bana ya yandi zole ya fioti mpe na malembe nyonso zonzaka: “Mulemvo mu kwendaka baka kaka bana ya munu.”

Ya vandaka mpe na bantangu ya nkaka yina beto kutanaka na mambu ya yimbi. Na ntangu beto vanda samuna yinzo na yinzo, kento ya munu vanda kwiza kisika yina beto vandaka na mbangu nyonso. Yandi vanda ya kulemba. Yandi zonzaka na munu ti muntu vanda me kubula yandi. Ya kamwisaka munu. Kasi na manima ya yawu, beto kwiza zaba ti yandi vanda sosa ve kukubula Sirkka, yandi vanda kubula muntu ya nkaka yina vandaka pene-pene na yandi.

Na manima ya mwa ntangu, beto kwiza mesana na bamambu ya faso yayi. Bukindi mpe bifwani ya bampangi ya beto ya Medellín kindisaka mingi beto samu ti, ba nungaka bamambu ya mutindu yayi mpe ya kulutila. Beto talaka ti, kana Yehova sadisaka bawu, yandi lenda sadisa mpe beto. Beto landaka malongi ya bakuluntu ya mbanza yina, beto sala keba mpe beto bikaka mambu nyonso na maboko ya Yehova.

Bantangu ya nkaka, mambu ya yimbi vandaka ya yawu ve faso beto vanda kanisaka. Kilumbu mosi yina mu kwenda tala muntu, mu vanda kuwa mutindu bakento zole vanda swana na ngaanda ya yinzo mosi, kisika yina mu vanda solola na muntu. Mu vanda kipe ve makelele ya bawu, kasi muntu ya yinzo zabisaka munu, beto na kukwenda solola na terrasse. Ntangu beto manisaka, beto kwiza zaba ti ya vandaka kaka batyaku zole yina vanda  zonza mutindu bakento zole yina vanda swana na ngaanda.

Na 1997, mu kumaka mulongisi na École de formation ministérielle. b Mu vanda zolaka mingi kulongoka bamambu na balukolo ya beto. Kasi mu vanda kanisaka ve ti ya zola vanda na kilumbu munu mpe mu zola longisa kuna.

Na manima mu kumaka ntwadisi ya district. Ntangu ba katulaka kisalu ya ntwadisi ya district, mu vutukaka na kusala na circonscription. Na kati ya bamvula 30 yina me luta, mu vandaka mulongisi mpe ntwadisi ya circonscription. Bisalu yayi natinaka munu bambote mingi. Kasi ya vandaka mpe na bantangu ya mpasi. Mu ke zonzila beno.

Mu ke muntu yina ke tekitaka ve ntangu mu ke salaka bamambu. Kifu yayi sadisaka munu mingi na bamambu ya mpasi yina kuminaka munu. Kasi bantangu ya nkaka, tiya ya munu ya kuyidika bamambu na bimvuka vandaka ya kulutila. Kilumbu mosi, mu kwiza zonza na ngolo nyonso na bampangi na kulakisa luzolo mpe bukati-kati ya bawu na bampangi. Kasi na ntangu yina, bifu yina mu lombaka na bawu na kusadila, munu mosi, mu vandaka ve na yawu.​—Rom. 7:21-23.

Ya vandaka na bantangu bifu ya munu ya yimbi vanda lembisaka munu. (Rom. 7:24) Kilumbu mosi, ya nataka munu tii na kulomba na Yehova na lusambu ti yandi katula munu na kisalu ya misionaire, mu vutuka na bwala ya munu na Finlande. Na mpimpa yina mu kwendaka na lukutakanu. Bamambu yina mu kuwaka kuna salaka ti mu ndima ti mu me lunga kaka kuvanda na kisalu ya munu ya misionaire ata ti mu ke nwanaka na nzutu ya munu ya masumu. Tii bubu yayi, mu ke na kilengi ya kutala ti Yehova ke vutulaka munu mvutu na lusambu yina mu salaka. Mu ke sepelaka mingi na kutala ti Yehova ke sadisaka munu samu na kununga bifu yina vanda kwamisaka munu.

Munu na Sirkka ke vutulaka matondo mingi samu na nyonso yina Yehova me pesa beto nzila na kusala. Mu ke vutulaka mpe matondo na Yehova samu na kento ya mbote mpe ya kukwikama yina yandi pesaka munu.

Ntama mingi ve mu ke kuma na bamvula 70 mpe mu ke bika kisalu ya munu ya mulongisi mpe ya ntwadisi ya circonscription. Kasi, ya ke na salaka ve munu ntima mpasi. Samu na yinki? Samu ti mu ke na kundima ti, kima yina ke pesaka lukumu na Yehova ni na kusadila yandi na kukuluka, na ntima nyonso mpe na kuvutula yandi matondo. (Mik. 6:8; Mrk. 12:32-34) Samu na kupesa lukumu na Yehova beto ke ve na nsatu ya kusala kisalu yina ke sala ti beto talana na meso ya bantu nyonso.

Ntangu mu ke talaka bisalu nyonso yina Yehova me pesaka munu nzila na kusala, mu ke talaka ve ti, mu me lenda kusala yawu samu mu ke na makoki ya kulutila bampangi, ya ke ve mpe ti samu mu ke muntu yina ke salaka bamambu ya ngitukulu. Ya ke ve ni mutindu yina. Ya ke kaka samu na ntima ya mbote ya Yehova mu me lenda kusala bamambu yayi. Yandi me pesa munu bweso ya kusala bamambu yayi ata ti mu ke muntu ya masumu. Na yawu, ata ti mu vandaka ve ya kulunga, kasi na ngolo ya Nzambi mu lendaka kulungisa kisalu ya munu.​—2 Ko. 12:9.