Ndakashalwa mu 1955, alimwi ndime mwanike pa bamasankwa botatwe mulifumo lyesu. Ndakakomenena mu tauni pacecino ciindi iitwa ayi Vantaa iyo ili kufwiifwi alweenge, kulubasu lwa kumalenge kwa cishi ca Finland.

Bama bakabombekwa akuba womwi wa Bakamboni Bakwe Yehova, myaaka iniini kaantana kushalwa. Nacibi boobo, bata tabakalinga kusuniwo kwiiya cancine alimwi tabakalinga kusuminisha bama kutwiisha Baibo nabi kuya andiswe kumabungano. Aboobo bama bakalinga kutwiisha njiisho shakutaanguna shamu Baibo na bata baswaawo.

Kuswabo kubwanike, ndakalinga kusuni kutolelela kunyumfwila Yehova. Kucakubonenaako, ndyendakalinga kucite myaaka 7, bumwi bushiku batica bakakalala ndyendakakaka kulya shakulya shiitwa ayi verilättyjä (makeeke aku Finland ngobabikako bulowa pakupanga). Aboobo bakanfyanta kumacili kwaamba ayi ndakame, lyalo kulyaansa limwi bakalinga kucite foloko kakuli akakeeke kwaamba ayi bandiishe. Sombi ndakaitombola foloko.

Ndyendakalinga kucite myaaka 12, bata bakafwa. Kuswawaawo, ndakatalika kucanika kumabungano. Bamakwesu mulibungano bakalinga kumbikilako maano alimwi ici cakancafwa kuba abushicibusa buyumu a Yehova. Ndakatalika kubelenga Baibo bushiku abushiku akwiiya cakubikila maano mabuku esu aamba shamu Baibo. Kucita boobo kwakancafwa kwaamba ayi nje panembo akweelela kubombekwa pa 8 August 1969, kaancite myaaka 14.

Ndyepakeendabo ciindi ciniini kuswa ndyendakamanisha  cikolo, ndakatalika kusebensa bupainiya bwaciindi coonse. Ndyepakeendabo nsondo shiniini, ndakaya mukusebensela kumusena ubulishite ku Pielavesi, musena wakalinga pafwiifwi apakati ka cishi ca Finland.

Ndyendakalinga ku Pielavesi, ndakakumanya ba Sirkka, mwanakashi uyo wakalinga kusa mukuba mukaangu ngoonsuni abuumbi. Ndakalinga kubasuni abuumbi mukwiinga bakalinga kuliceesha alimwi bakalinga kusuni Yehova abuumbi. Tabakalinga kusuniiwo kupuka nabi kuba ashintu shiinji lwakumubili. Soonse twakalinga kusunishishi kucita shiinji muncito yakwe Yehova, alimwi twakalinga kulyaabite kusebensa ncito ili yoonse njeenga twapeekwa. Twakeebana pa 23 March 1974. Muciindi cakwaamba ayi tuye mukufwakasha kumusena umwi pesule lya kweebanabo, twakaya mukusebensela ku Karttula, uko kwakalinga kuyandika bunene beshikushimikila sha Bwaami.

Kuswabo ndyetwakeebana, Yehova watondesha ayi ananootupa nshetuyandika lwakumubili na katubika sha Bwaami panembo. (Mate. 6:33) Kucakubonenaako, ndyetwakalinga ku Karttula, tatwakalinga kuciteewo motoka. Pakutaanguna twakalinga kweenda ancinga. Nacibi boobo, muciindi camupewo kwakalinga kutontola abuumbi. Kwaamba ayi tucikonshe kushimikila kumusena unene libungano nkolyakalinga kushimikila, twakalinga kuyandika kuba amotoka. Sombi tatwakalinga kuciteewo maali akuula motoka.

Cakuteengashila, munene wangu musankwa umwi wakatufwakashila. Wakatunyumfwila nkuumbu akutushiila motoka yakwe. Wakalinga walipila kale inshuwalansi. Swebo twakalinga kweelete kuulilamobo mafuta. Lyalo twakaba amotoka njotwakalinga kuyandika.

Yehova wakatondesha ayi watupa ncotwakalinga kuyandika lwakumubili. Swebo ncotwakalinga kweelete kucita nkubika sha Bwaami panembo.

Ndyetwakalinga ku Cikolo ca Bapainiya mu 1978, Mukwesu Raimo Kuokkanen, a uyo wakalinga womwi pabakalinga kutwiisha, wakatuyuminisha kulemba foomu yakucanika ku Cikolo ca Gilyadi. Aboobo twakatalika kwiiya Cisungu kwaamba ayi tukeelele kucanikaako kucikolo ici. Nacibi boobo, mu 1980 katutana kulemba foomu, bakatwiita ayi tuye mukusebensela pa musampi waku Finland. Paciindi cilya, abo basebensela pa musampi tabakalinga kulembaawo foomu yakuya ku Cikolo ca Gilyadi. Sombi twakalinga kusuni kusebensela Yehova nkwaakalinga kubona ayi inga twamusebensela kabotu, kuteshi  swebo nkotwakalinga kuyeeya. Aboobo twakasumina kuya mukusebensela pa musampi. Sombi twakatolelela kwiiya Cisungu kwaamba ayi na twaba acoolwe cakucanika ku Cikolo ca Gilyadi, inga twalemba foomu.

Pesule lya myaaka iniini, bamu Likoto Litanjilila bakasuminisha kwaamba ayi abo basebensela pa musampi inga balemba foomu ya kucanika ku Cikolo ca Gilyadi. Penkaapo twakalemba mafoomu sombi kuteshi ceebo cakwaamba ayi tatwakalinga kusuniiwo kusebensela pa musampi. Twakalinga kusangalete kusebensela pa musampi! Twakalinga kusunibo kuba balibambite kusebensela kuli koonse kweenga kwayandika basebenshi baanji na katweelela kusebensa ncito iyo. Bakatwiita kucanika ku Cikolo ca Gilyadi alimwi twakamanisha cikolo ici ca namba 79 mu September 1985. Bakatutuma kuya mukusebensela ku Colombia.

Ndyetwakashika ku Colombia, bakataanguna kututuma kuya mukusebensela pa ofesi ya musampi. Ndakacita nsheenga ndacikonsha muncito njondakapekwa, sombi pesule lya mwaaka womwi, ndakalinyumfwa ayi twakalinga kuyandika kupekwa ncito imwi. Kwaciindi cakutaanguna mubuumi bwangu, ndakasenga ayi bampeko ncito imwi. Lyalo bakatutuma kuya mukusebensa mbuli bamishonali mu tauni ya Neiva, ili kumusena wiitwa ayi Huila.

Lyoonse ndanyumfwa kabotu kushimikila. Ndyendakalinga kusebensa mbuli painiya ku Finland kaantana kweeba, ndakalinga kushimikila kuswa macuunsa kushikila lisuba lyapila. Ndyetwakeebanabo, nebo aba Sirkka twakalinga kushimikila bushiku boonse. Ndyetwakalinga kusebensela kumisena yakulaale, cimwi ciindi twakalinga koona mumotoka yesu. Ici cakalinga kupa kwaamba ayi tutatoli ciindi cilaamfu kweenda alimwi twakalinga kufwambaana kutalika kushimikila bushiku bwakalinga kukonkelaawo.

Ndyetwakalinga kusebensa mbuli bamishonali, twakalinga kusangalala kushimikila bweenka mbotwakalinga kulinyumfwa pakutaanguna. Beshikushimikila bakafula mulibungano lyesu, alimwi bamakwesu abenankashi baku Colombia bakalinga kututondesha lusuno, bulemu akutulumba.

Kufwiifwi a tauni ya Neiva motwakalinga kusebensela kwakalinga ma tauni amwi mwatakalingaawo Bakamboni. Ndakalinga kulisukama abuumbi kuyeeya bantu bamu matauni ayo mbweshi bakashimikilwe makani abotu. Nacibi boobo, ceebo ca nkondo yakalinga kumusena uyu, tacakalinga kabotu bantu bamumisena imwi kuya mumatauni ayo. Aboobo ndakatalika kupaila ayi womwi pabaabo bakala mumatauni ayo akabe Kamboni. Ndakalinga kuyeeya ayi muntu uyo alyeelete kusa mukutalika kukala mu Neiva kwaamba ayi eeye cancine. Aboobo, ndakalinga kupaila kwaamba ayi pesule lyakubombekwa akabe Mwineklistu ushimpite lwakumushimu, akuboolela mu tauni inemishaabo mukushimikila. Ndakalinga kweelete kushiba ayi Yehova wakalinga kucishi nshila ibotu bwakucafwa bantu bamu matauni ayo kwiiya cancine kwiinda ambondakalinga kuyeeyela.

Ndyepakeendabo ciindi ciniini, ndakatalika kwiisha Baibo musankwa wacanike waliina lya Fernando González. Wakalinga kukala mu tauni ya Algeciras, tauni yomwi pa matauni mwatakalingaawo Bakamboni. Nsondo ansondo, Fernando wakalinga kweenda mushinso ulaampa makilomita eendilila 50 kusa ku Neiva mukusebensa. Wakalinga kulibambila kabotu ciiyo comwi acomwi alimwi peenkapo wakatalika kunoocanika kumabungano lyoonse. Kuswabo munsondo yakutaanguna Fernando ndyaakatalika kwiiya, wakalinga kwiitako bamwi ba mutauni mwaakalinga kukala kwaamba ayi abaisheko nshaiiya mu Baibo.

Pesule lya myeenshi 6 kuswa ciindi Fernando  ndyaakatalika kwiiya Baibo, wakabombekwa mu January 1990. Ndipakeenda ciindi, wakatalika kusebensa bupainiya bwaciindi coonse. Ceebo cakwaamba ayi mutauni ya Algeciras mwakaba Kamboni womwi, cakakonsheka kwaamba ayi baku musampi inga batumako bapainiya balibetele. Mu February 1992, mutauni iyi mwakaba libungano.

Sa Mukwesu Fernando wakalinga kushimikilabo mutauni mwaakalinga kukala? Sobwe! Pesule lyakwaamba ayi weeba, lakwe abakaakwe bakalongela mutauni ya San Vicente del Caguán, tauni aimwi mwatakalingaawo Bakamboni. Bakacafwilisha kutalika libungano mutauni iyi. Mu 2002, Mukwesu Fernando wakasalwa kusebensa mbuli mutanjilili walubasu. Alimwi lakwe aba Olga bakaakwe, batolelela kusebensa ncito yakufwakashila mabungano kushika asunu.

Ishi shakacitika, shakanjiisha ayi cilayandika kupaila cakululama pamakani amwi akumite kuncito sha Bwaami nshotwakapekwa. Yehova alacita shintu swebo nsheenga tatucikoonshi. Alimwi incito yakutebula njaakwe, teshi yesu.—Mate. 9:38.

Mu 1990 bakatupa ncito yakutalika kufwakashila mabungano. Musena wakutaanguna nkotwakaya mukusebensela, mutauni inene ya Bogotá. Twakaloonda ayi inga tatucikonshiwo kusebensa kabotu ncito njotwakapekwa. Nebo amukaangu tuli bantubo bataciteewo alushibo lulibetele. Alimwi tatuna kushibila kukala mutauni muba bantu baanji. Nacibi boobo, twakabona Yehova mbwakakumanisha cishomesho ncotucana pa Bene Filipi 2:13 paamba ayi: “Lesa ngoomupa nkusu, akumupa kwaamba ayi muyande ankusu shakucita ceeco ncaasuni.”

Mukuya kwaciindi, bakatutuma kuya mukutalika kufwakashila mabungano akalinga mutauni iitwa ayi Medellín, iyo njondambaawo pakutaanguna. Bantu bakumusena uku bakalinga bashibila kubona shankondo alimwi tabakalinga kuloondaawo. Kucakubonenaako, bushiku bumwi ndyendakalinga kutanjilila ciiyo ca Baibo muŋanda, twakanyumfwabo bantu batalika kulwana pansengwe kusebensesha mafuti. Ndakalinga kusuni kuwa pacuuna ceebo ca boowa, sombi shikwiiya Baibo wakatolelela kubelenga palagilafu kaakalikite moyo. Ndyakamanisha kubelenga, wakaamba ayi ndaashika conoono lyalo wakaswa pansengwe. Ndyepakeenda kaciindi, wakaboolela kaali abaana bobilo akwaamba cakukalika moyo ayi, “Mundekeleleko, ndalinga ndaya mukubwesa bana bangu.”

Kuli shiindi ashimwi buumi bwesu ndyebwakalinga mumapensho. Bushiku bumwi ndyetwakalinga kushimikila kuŋanda aŋanda, bakaangu bakesa kuli ndime kabacica alimwi kababoneka kuloonda abuumbi. Bakaamba ayi musankwa umwi wakabeensha mfuti. Ico cakankankamika abuumbi. Nacibi boobo, twakesa mukushiba ayi musankwa uyo taakalinga kusuni kuyasa mfuti ba Sirkka; wakalinga kusuni kuyasa musankwa wakalinga panembo lyabo.

Mukuya kwaciindi, twakacileka kuloonda abuumbi na kuli shankondo. Twakayuminishikwa kubona bamakwesu bakumusena uku mbobakalinga kuliyumya ndyebakalinga kwiinda mubukaalo ubu nabi bumwi buloondesha abuumbi. Twakashoma ayi Yehova alaakutucafwa aswebo bweenka mbwaakalinga kubacafwa. Lyoonse twakalinga kukonkela nshobakalinga kutulwiita bamanene bakumusena uku, kubikila maano ku kulishitilisha akushiya shoonse mumaansa akwe Yehova.

Kwalo, bukaalo bumwi tabwakalinga buloondesha mbuli mbotwakalinga kubuyeeyela. Bushiku bumwi ndakanyumfwa coongo anga mbanakashi bobilo  batokwaambana abo bakalinga pansengwe lya ŋanda mpondakalinga kusuni kuya. Nshindalinga kusuniiwo kukutika bantu kabaambana, sombi mwanakashi wakalinga kukala paŋanda iyo wakankakatisha ayi nje pamishaabo. Cakesa mukucanika ayi “kwaambana” nkondakanyumfwa, ntuyuni tobilo twiitwa ayi parrot twakalinga kukopelesha bantu bakumusena uku mbobacita.

Mu 1997, ndakapekwa ncito ya kunookwiisha mucikolo ca Ministerial Training. b Lyoonse ndakalinga kunyumfwa kabotu kucanika kushikolo sha Bwaami, sombi nshindakalinga kuyeeyawo ayi inga ndaba amukuli usangalasha wakwiisha mucikolo ca Bwaami cili coonse.

Mukuya kwaciindi, ndakatalika kusebensa mbuli shikufwakashila bamatanjilili balubasu. Bubaambo ubu ndyebwakamana, ndakatalika alimwi kusebensa mbuli mutanjilili walubasu. Aboobo kwamyaaka iindilila 30, ndisangalete kunookwiisha mushikolo sha Bwaami akusebensa mbuli mutanjilili walubasu. Mikuli iyi yampa kutambula shoolwe shiinji. Nacibi boobo, teshi lyoonse shintu ndyeshiba shuubu. Amuleke musansulwiite.

Ndi muntu muyumu alimwi ulishoma. Mibo iyi yancafwa kuliyumya mubukaalo buyumu. Nacibi boobo, cimwi ciindi ndaciindilisha kusuna kululika shintu mulibungano. Pashiindi shimwi, cakutaloonda ndakayuminisha bamakwesu abenankashi kunotondesha lusuno akuyeeyelako bamwi. Sombi paciindi ici, ndyendakaalilwa kutondesha mibo iyi.—Loma. 7:​21-23.

Ceebo cakwaalilwa kucita kabotu shintu shimwi, cimwi ciindi ndalinyumfwa kulefuka abuumbi. (Loma. 7:24) Paciindi cimwi, ndakalwiita Yehova mumupailo ayi inga cabota kucilekabo kusebensa bumishonali akuboolela ku Finland. Bushiku bweenka ubo macolesha, ndakaya kumabungano. Nshondakanyumfwa kumabungano shakancafwa kushoma cakutatoonsha ayi ndyeelete kutolelela kusebensa ncito njondakapekwa akusebensela pashintu nshontaciti kabotu. Kushika asunu, ndayuminishikwa abuumbi na ndayeeya Yehova mbwakakumbula mupailo wangu. Kwiilikaawo, ndalumba Yehova abuumbi kubona mbwaancafwa kusebensela pashintu nshontaciti kabotu.

Nebo aba Sirkka tulalumba abuumbi pacoolwe ncotucite cakusebensela Yehova muncito yaciindi coonse kwamyaaka iinji. Kwiilikaawo, ndalumba Yehova abuumbi pakumpa mukaangu utondesha lusuno alimwi ushomeka, kwamyaaka yoonse njondasebensela pomwi anguwe.

Conoono ndaakukwanisha myaaka 70 lyalo ndakucileka kwiisha mushikolo sha Bwaami akusebensa mbuli mutanjilili walubasu. Sombi ici tacimpi kulinyumfwa cibiibi. Ino nceebonshi? Mukwiinga ndashoma cakutatoonsha ayi ciyandika abuumbi kuli Yehova nkumusebensela cakulibombya akunoomulumbaisha ceebo cakumusuna akumulumba. (Mika 6:8; Maako 12:​32-34) Tatuyandiki kuba amikuli ilibetele kwaamba ayi tulemeke Yehova.

Na ndayeeya pamikuli njondakasebensaawo, ndabona ayi nshina kupekwa mikuli ceebo cakwaamba ayi ndakalinga kuyandika kwiinda bamwi nabi ceebo cakuba alushibo lulibetele. Sombi Yehova wakampa mikuli iyo ceebo ca nkumbu shakwe. Wakampa mikuli iyo nabi kwaamba ayi kuli shintu nshondatakalinga kucita kabotu. Ndicishi kwaamba ayi ndakacikonshabo kukumanisha mikuli iyo kwiinda mulucafwo lwakwe Yehova. Aboobo nkusu shakwe Lesa shakaboneka pali ndime mukulefuka kwangu.—2 Koli. 12:9.